पढ़ईयो में जात के जहर

अगस्त 9, 2023. नांगुनेरी, के एगो सरकारी इस्कूल में चिन्नादुरइ 11 कक्षा के एगो दलित छात्र, अपना इस्कूल के बडका जात के सहपाठी लईकन के अत्याचार के बिरोध कईलस. एकरा चलते ओकरा प हमला भईल. औरी ओकरा के बहुत जादे घाही क दहल गईल.

फरवरी 12, 2025. शिवगंगा में, “तहरा जात के कवनो आदमी के एतना हिम्मत कईसे भईल कि उ हमनी के आगे गाड़ी चलाई?” शिवगंगा सरकारी कॉलेज में बीएससी के तीसरका साल के बिद्द्यार्थी अय्यासामी पर मोटरसायकिल चलावला के चलते भारी हमला भईल. उ कौनो तरे आपन जान ले के भागल.

मार्च 10, 2025. अरियनायगीपुरम: जबरजस्त युवा कबड्डी खिलाड़ी देवेंद्रराज प ओ समय हमला भइल, जब ऊंच जात के लोग एह बात से चिढ़ गइल कि दलित टीम ओनसे कइसे जीत गइल.

31 मार्च, 2025. अरुमुगमंगलम: केविन सेल्वगनेस के बेरहमी से हत दियाइल. काहे से कि उ दूसर जात के लयिकी से प्रेम करत रहलन.

तमिलनाडु के स्कूल औरी कालेज में जात-पात के भेदभाव अबहियों ओरायील नईखे. बलुक आपन भेस बदल लहले बा. कुछ काछ जघे प इ तोपल-झांपल बा. त कवनो-कवनो जघे सफ्फा उघार बा.

कई गो गांव में, जात के चीन्हा जिनगी के हर कोना में लउकेला. औरी एही से चिन्हायिला के चलते फर्क परेला. दलित औरी सोसित छात्र के आजो अलगे खड़ा कईल जाला. ओ सब के आजो हीनाई से बोलावल जाला. औरी आजो सिक्षक लोग ओर से ओ सब से सौचालय साफ़ करवावल जाला.

इस्कूल से ले के सरकारी दफ्तर ले, मंदिर से लगायत मीडिया संस्थान ले जात के दाबिस बहुते गहीर बा. लोकतंत्र के मानल ‘स्वतंत्र’ खंभा-संसद, न्यायपालिका, मीडिया औरी नौकरशाही – जात के ख़तम कईला के बजाय एकरा के बरियारे करता.

लोग कहेला, “एघरी जात के देखेला?” बाकिर सांच बात इ बा कि जाते के चलते दलितन प अत्याचार औरी खून होता. एकरा खिलाफ होखे वाला लोग, दलित छात्र कुल के आजो संतावल जाता.

जौन कुछु होता, हमनी के एकरा के जरुर ध लेवे के चाहीं. जे हमनी अइसन ना कईल जाई, त ईहो इतिहास मिटिक जाई. ठीक ओही तरे, जेतरे पहिले के दबाइल-कूंचाइल लोग के प्रेम, ओ सब के जिनगी, ओ सब के संघर्स मिटका दियाइल रहे. तनी देखीं कि कईसे बुद्ध काल के ‘अंधकार युग’ कहल गईल.चाहे कईसे चोल काल के जात बेवस्था प सवाल करे के बजाय ओकर बड़ाई कईल गईल. दबाइल-हीन लोग के इतिहास हमेसा से दाब के राखल गईल.

आजो कई जघ़े, एकओरा परल लोग के चप्पल पहिने, मंदिर में ढूके, चाहे समसान घाट जाए वाला आम रास्ता प चले के इजाजत नईखे. हीन जात के लईकन के, साथे पढ़े वाला दाबिस धरेवाला लईकन से बेइज्जती होला. ओ सब के इस्कूल में खयका ना बनावे दहल जाला. औरी जब उ सब नीमन कार करेला, तब जानबूझ के फेल क दहल जाला. जे उ केहू से परेम करेला, त ओकरा के नकली चाहे डरामा कहल जाला. जौन कि ‘लव जिहाद’ के दोसर रूप ह.

हमरा लायिकाइयें से जात-पात के भेद - भाव देखे के परल. बाकिर तब हमार आपन जात खातिर कौनो जागरूकता तब ले ना रहे, जब ले हम कैमरा से काम कईल ना सुरु कईनी, औरी अंबेडकर औरी पेरियार के पढ़ल ना सुरु कईनी. तब्बे हमरा इ समाज के बात बुझाए लागल, औरी हम अपना जात के साथे कदम मिला के चले लगनी.

अपना कालेज के दिन में हम फ़ुटबाल टीम में रहनी. बाकिर हमार साथी लोग हमरा के कब्बो मैदान में खेले ना दहल. हमरा के हमेसा बहरा बईठा के राखल जाय. हम हमेसा दुसरा केहू के खेलत देखीं. हमरा आपन हुनर संवारे के मौका ना मिलल—जे हमरा खेले के ना मिली त हम सीखेम के तरे?

भेदभाव अलगे-अलगे तरीका से कार करेला. इ पहिले त हमारा के खेले ना दहलस. औरी ओकरा बाद ओही बात के इस्तेमाल इ दावा करे खातिर कईल कि हम खेले के लायके नईखीं.

भारत में परेमो राजनीतिक होला. ‘एविडेंस’ संस्था के संस्थापक विंसेंट राज, जे जात पात के खिलाफ लड़ेलन, कहतारन कि पछिला आठ साल में तामिलनाडु में जात के नाम प 65 गो इज्जत के नाम प खून भईल बा. तब्बो एमे से खाली आठे मामला में दुखमी के पच्छ में फैसला भईल बा.

दुसरो आदमी के अपना बराबर बूझल -ईहे जरुरियाती बात ह. तब्बो हमरा नईखे मालूम कि हमनी के समाज ओ जघे ले कब तक पहूंच पाई. जब कौनो एकओरा छांटल समुदाय के आदमी अपना मेहनत से आगे बढ़ेला, ओकरा इज्जत के नास कईल जाला. औरी ओ सब के घरन प बुलडोजर चला दहल जाला.

दिसंबर 2022 में पुदुकोट्टई जिला के वेंगाइवयल गांव में, दलितन के बस्ती में बनल पानी के टंकी में बड़का जात के लोग आदमी के मल डाल देले रहे. इ घटना ओ इलाका के दूसरो खराब चलन के उजियार क दहलस. एमे से एगो चाय के दोकान प चले वाला “दू गिलास सिस्टम” (दलित औरी दूसर जात के फरके -फरके गिलास) औरी दलित सब के जघे के अय्यनार मंदिर में ढूके से रोकल रहे.

इंहां खाली 12 गो दलित परिवार रहेला. जे अब इ मस्किल से जूझता. एगो अइसन घटना, जेकरा खातिर केहू के जवाबदेह नईखे कहल गईल. वेगाइवयल पहुंचे खातिर 12 गो पुलिस चौकी से हो के जाए के परेला. पत्रकार लोग के त अब ओहीजा जाए के इजाजत नईखे.

दबाइल-कूंचाइल लोग के इन्साफो संघर्स के बादे मिलेला.

जब हम दिसंबर 2025 में इ लेख लिखल ख़तम करतानी, तब ले त्रिची में दू गो सफाई करमचारी जमीन के भीतरी नाली के सफाई करत मिरतु हो गईल बा. इ सिलसिला अब्बो जारी बा.

केविन सेल्वगनेश के 31 जुलाई, 2025 के ‘इज्जत के नाम प’ हत दहल गईल. ओ बेर उ बस 27 साल के रहलन. इंजीनियरिंग से ग्रेजुएट हो के उ एगो सॉफ्टवेयर इंजीनियर के रूप में काम करत रहलन. उनकर माई -बाप एस. तमिल्सेल्वी औरी चन्द्रशेखर, तूतीकोरिन जिला के एरल में आरमुमंगलम के थेरकु माडा गली में रहेला.

केविन औरी सुभाषिनी स्कूल के दोस्त रहे. औरी बाद में प्रेम हो गईल. एक दिन, केविन अपना दादाजी के तबियत पूछे खातिर सुभाषिनी से भेंट करे गईलन. सुभाषिनी ओही अस्पताल में एगो सिद्ध डाक्टर के रूप में कार करत रहली.

तानियके देर में सुभाषिनी के भाई, सुजीत उंहा अयिलन औरी सुजीत से कहलन कि उनकर माई-बाप उनकरा से भेंट करे के चाहता. सुजीत केविन से अपना मोटरसायकिल प चले के कहलन. बस दू गली आगे जा के सुजीत रुकलन, उ एगो चक्कू निकलन औरी बेरहमी से केविन के हत दहलन.

इ ध्यान राखल जरुरी बा कि केविन, सुजीत औरी सुभाषिनी बहुत साल से एक दूसरा के दोस्त रहे लोग. तब्बो, जब सुजीत केविन प हमला कईलन, त उ चिल्ला के कहलन, “एगो पल्लर [अनुसूचित जनजाति] के लईका हमरा परिवार के लईकी चाहता? अब जा के हमरा माई-बाप के सांति मिली.”

केविन के हत्या के ठीक पहिले, सुजीत एकदम ईहे कहले रहलन. सुजीत के माई -बाप दुनू जना पुलिस अधिकारी बा.

केविन एगो इंजीयर ग्रेजुएट रहलन. समाज एगो खतरनाक भरम में जीयता कि पढ़ाई, रोजगार औरी आर्थिक स्थिरता जात-पात मिटा दी. केविन के मामला में अइसन ना भईल.

केविन के मिरतु के बाद से, हमरा अइसन बुझाता जइसे हम चलत -फिरत मुर्दा हईं. जात के नाम प भईल ह्त्या के अपना आंखी से देखला के बाद भीतर बहुत कुछ बदल जाला. इ राउर सुरच्छा, सोच, औरी इंहां ले कि राउर चीन्हा छीन लेला. हम एकसुरे अपना के फेर से खोजे के कोसिस करतानी. ओ इंसान के लगे लौटे के कोसिस करतानी जौन हम रहनी. जौन हिंसा के लगे आवे के पहिले रहनी. इ मस्किल बा. इ दर्दनाक बा.

इ दुःख केविन चाहे उनका परिवारे खातिर नईखे. इ हमरा ओ हिस्सा खातिर बा जौन हमेसा खातिर बदल गईल. केविन खाली एगो दुखमी ना रहलन. उ एगो अंजोर रहलन. एगो अनोखे गरमाहट रहलन जे दुसरा इंसान के इ महसूस करावस कि ओकरा के देखल जा रहल बा, उ सब सुरक्षित बा औरी ओ लोग के मान-जान कईल जा रहल बा. उ सचहूं बहुत नीमन आदमी रहलन. ईहे बात इ दुनिया के असहनीय बना देता. दुनिया खाली एगो जान ना बिलवावलस, बलुक उ एगो अइसन इंसान के बिलवा दहलस जौन दूसर के जिनगी बेहतर बनावत रहे.

इ तीसरका ‘इज्जत के नाम प हत्या’ ह. जेकरा के हम अपना आंख से देखनी. लमसम साल भर पहिले हम पल्लीकरनइ में प्रवीण के हत्या के रिपोर्टिंग कईले रहनी. केविनो के मिरतु ओही खौफनाक घटना जइसन बा. दुनू प इतना बेरहमी से हमला कईल गईल रहे कि ओ सब के माई लोग चीन्ह ना पावल. इ खाली हत्या ना रहे. इ ओ सब के निसान मिटावे के काम रहे.

जौन बात हमारा मन में सबसे बेसी घर कईले बा, उ ह केविन के माई के हिम्मत. जौना दुःख के हमनी सोचियो नईखी सकत, ओ दुःख में उ जे तरे सांति औरी मजबूती से अपना के समहरले रहली ओकरा के सब्द में कहल मस्किल बा. बुझाता सालन एगो शिक्षिका के रूप में पढ़वला से उनका में इ धीरज आ गईल होखे कि उ इ पीर के सह सकस. जब केविन के अंतिम संस्कार के बाद हम उनका से भेंट कयिनी, त उनकर घर एकदम सांत रहे. उंहा दुःख भारी हो के पसरल रहे. भीतर से उ टूट गईल रहली बाकिर न्याय खातिर, अपना बेटा खातिर औरी सांच खातिर लड़े के उनकर इरादा पक्का रहे.

बड़ पत्रकार औरी साथी जेयारानी, जे बहुत पहिले से जात-पात के अन्याय, दुःख के बारे में लिखातारी, हमरा से कहली, “साथी अभिनो हमनी के समाज तानियक्को नईखे बदलल. अब बस एतने फरक बा कि सोशल मीडिया औरी सीसीटीवी के चलते कुछ सांच सामने आ जाता.” उ आगे कहली कि केविन के मामला -ठीक ओहिसने बा जइसे उदुम्लाई शंकर के मामला- खाली एसे लोग के नजर में आईल काहे से कि वीडियो में सबूत रहे. अइसन जाने केतने मामला लोग के नजर में ना अइला से दब जाला. उ कहली, “अब त इज्जत के नाम प ह्त्या’ एक तरह के ‘सांस्कृतिक’ चलन बन गईल बा. तेवहार औरी रीति-रिवाज के जइसन ईहो एगो साधारण बात हो गईल बा.”

अलगे-अलगे जात के बीच परेम करे, चाहे समाज के बनावल नियम के तूरे खातिर देवे वाला इ ‘सजाय’ के अब एगो ‘सांस्कृतिक’ काम के जईसन देखल जाता. ‘अनुसूचित जाती, जनजाति अधिनियम’ के नियम चाहे एकरा प कानूनी नतीजा के ओ सब प कौनो असर नईखे परत. ओ लोग के सोच में कौनो बदलाव नईखे आवत.

सोशल मीडिया के अयीला के बाद, जात-पात से भरल इ सोच अब खुल के सामने आवे लागल बा. कम उमिर के लईका- जौन अभी ठीक से बढ़हनो नईखे भईल सब- बड़ा निफिकिर हो के अपना बहिन के परेमी के जान हते के बात करता. इहे सचाई बा, जेकरा डर में हमनी जीयतानी.

तिरुनेलवेली सरकारी अस्पताल के कैजुअल्टी वार्ड हमेसा अफरा -तफरी में रहेला. तमिलनाडु के दाख्किनी जिला में, खासकर तिरुनेलवेली में, दलित छात्र कुल के, जवान लईकन के जात के नाम प हिंसा के खबर खतमे नईखे होत. आइसीयू हमेसा भरले रहेला, हालत इतना गंभीर बा.

जब हम देवेन्द्रराज से भेंट करे गईनी त हमरा के दुआरी प रोक लहल गईल. हम वामपंथी साथी लोग के मदद से भीतर जा सकनी औरी तस्वीर ले सकनी. पुलिस हमरा प सवाल के बौछार क दहलस. औरी ऊंहा प रहल कम्युनिस्ट कार्यकर्ता लोग हमरा के आगे बढ़े में मदद कईल. अस्पताल में तनाव इतना बेसी रहे कि ओह दिन देवेन्द्र राज के पिता से बात कईल संभव ना रहे. हम मदुरई चल गईनी औरी अगिला दिन फेर बयान लेवे खातिर अयिनी.

दुखमी के पिता, थंगा गणेश, थुथुकुड़ी जिला के कर्न्गुलम तालुक में, अरियानायकिपुरम के वल्लाकुलम गांव के रहे वाला हवन. उ कहलन, “हम अपना बेटा के बस में बईठा के अभी भेजलही रहनी औरी अभी घरे ना पहुंचल रहनी कि हमरा खबर मिलल कि लगे के एक्के गांव के तीन आदमी ओकरा प हमला क देले बा. हम तुरंते उंहा पहुंचनी औरी ओकरा के अस्पताल ले के गईनी. जे ओह दिन हम काम प चल गईल रहतीं त बात औरी बिगड़ गईल रहीत. सायद हमार बेटा जीयत ना बांचीत.”

उ 10 मार्च,2025 के देवेन्द्र राज प भईल हमला के बात कर्ट रहलन. इ हमला के जर लगे के गांव में कबड्डी मैच में रहे. जौना में दलिते टीम दुनु वर्ग में जीतल रहे.

एगो दलित टीम के जीतल जात-पात के हिंसा के उकसावे ला बेसी रहे. जब देवेन्द्र राज अपन परीक्षा देवे जात रहलन तब उनकर बस रोकल गईल. औरी उनका खींच के गाड़ी से बहरा निकालल गईल. औरी सड़के प उनका ऊपर तेज हथियार से वार कईल गईल. जब उनकर बाबूजी इ बात हमरा से बतावत रहलन, हमार देह कांप गईल. इ हिंसा कौनो खेल के बारे में ना रहे. इ सत्ता के बारे में रहे. एगो दलित जात के लईका कबड्डी में बड़ा जात के लईकन के नईखे हरा सकत, एकरा पीछे ईहे कारन रहे. औरी दुःख इ बा कि देवेन्द्र राज अपना इलाका के सबसे नीमन खेलाड़ी बाड़न.

डाक्टर हमरा के बतवलन कि उनका मूड़ी, हाथ पर गहीर घाव रहे. जौना में से एगो बहुते गंभीर घाव रहे. उनकर अंगूरी कुल तनियक कटा गईल रहे. डाक्टर कहलन, “प्लास्टिक सर्जरी करे से पहिले अंगूरी के ठीक से जुटल जरुरी बा.”

देवेन्द्र राज अपना माई बाप के बड़हन संतान हवन. थंगा गणेश बतवलन, “हम एगो ईंटा भट्ठा प कार करनी. हमार दू गो लईका बा. देवेन्द्रराज हमार सबसे बड़ बेटा हवन. उ पलायमकोट्टइ के एगो इस्कूल में पढेलन. हमार छोट संतान हमार बेटी ह. हम औरी हमार मेहरारू, दुनुजना रोज भट्टा प कार करे जानी.”

एकरा बाद उ अपना जिनगी के बारे में धीरे-धीरे बतियावल सुरु कईलन. “जब हम छोट रहनी, तब हमारा जात के बारे कौनो जानकारी ना रहे. हमार कौनो मास्टर कब्बो आंबेडकर चाहे पेरियार के बारे में ना बतियावल. 10वां के परीक्षा के बाद पईसा-रोपया के तंगी के चलते हम मोटर मैकेनिक्स सीखे खातिर एगो आइटीआई के फ़रम भरनी. दाखिला के फीस के 650 रोपया हमनी ला मस्किल रहे. हमार माई दोसरा से उधार लहलस.

“हम उ पईसा के हाथ में थमले, सीखे के ललक औरी ढेर सपना के साथे उंहा गईनी. बाकिर जब हम उंहा पहुंचनी त अधिकारी लोग हमनी में से दू-तीन लोग के नाम बोलावल औरी कहल कि सीट खाली नईखे. उ लोग हमनी के धक्का दे के बहरा क दहल औरी केवाड़ी बंद क लहल. हम उनका दुआरी खड़िया के रोअनी. उ लोग कहल कि अइसन एसे भईल ह कि हमार नंबर कम रहे. बाकिर इ बात सांच रहे तब हमरा एड्मिसन फारम काहे मिलल? इ सवाल सालन तक ले हमरा के परेसान कईलस.”

जब हमनी तिरुनेलवेली के नागुनेरी पहुंचनी त गली सुनसान रहे. चिन्नादुरइ के घरे ताला लागल रहे. पोर्च प खून पसर के सूख गईल रहे. औरी खून से सनाइल हाथ के निसान लउकत रहे. भीतर ढुकते खून के बसना रहे. चिन्नादुरई के खून हर जगह लागल रहे. खून के बसना अब्बो रहे.

उनका स्कूल के झोरी में 100 परसेंट नंबर वाला टेस्ट पेपर औरी प्रिसिपल के लिखल एगो अधूरा चिट्ठी मिलल. चिन्नादुरई एगो सरकारी इस्कूल के 11 क्लास के छात्र रहलन. उ एगो इमानदार छात्र रहलन. जे एकसुरे नीमन परिणाम ले आवत रहलन. उनका इ इमानदारी के चलते टीचर औरी प्रिंसिपल उनकर तारीफ़ करे. उ सब एक बेर सब छात्र लोग के गोट्टा कईल औरी चिन्नादुरई के कड़ा मेहनत के तारीफ़ कईल. ओहू लोग के अइसने करे के कहल.

बाकिर उंच जात के लईकन के इ मंजूर ना रहे. काहे से कि चिन्नादुरई एगो पिछड़ा समाज से रहलन. ईहे कारन रहे कि उनका प हमला भईल.

चिन्नादुरइ के साथी छात्र लोग से हमेसा जोर-जुलुम सहे के परे. औरी उ अक्सरहां इस्कूल छोड़े औरी घरही रहल पसंद करे. आखिरकार, प्रिंसिपल के दखल से, उनकर बात सुनल गईल. औरी कानूनी कारवाई खातिर एगो लिखल चिट्ठी लियाइल. ओ दिन उंच जात वाला तीन गो छात्र प अनुसासन के करवाई भईल.

ओही रात उंच जात के सात गो छात्र -जौना में तीन गो नाबालिग औरी चार गो बालिग़ रहे-चिन्नादुरइ के घरे गईल. ओ लोग में से तीन गो लोग एक्के हथियार से बेर-बेर उनकरा के काटल. उनकर बहिन, जे बचावे अयिली ऊहो घाई हो गईली. इ हमला के क्रूरता अकल्पनीय रहे. इ दुखद घटना इस्कूलन में जात-पात के डाह, औरी हिंसा के हद औरी एकओरा परल छात्र के जइसन हिंसा के सामना करे के परता, ओकरा के उजागर करता.

चिन्नादुरइ औरी उनकर बहिन के तिरुनेलवेली के सरकारी अस्पताल में भर्ती करावल गईल. औरी कड़ा सुरक्षा के भीतर आईसीयू में रखल गईल. सुरु में हमरा के ओ लोग से भेंट करे के मना भईल. बाकिर हम राजनीतिक दल के सदस्य औरी ‘छुआछुत उन्मूलन मोर्चा’ के सदस्य लोग के साथे भीतर गईनी. उ लोग उनकर हाल-चाल जाने आई रहे. जब हम उनका के देखनी त उनकर हाथ, गोड़, मूडी प गहिरा घाव रहे. उनकर देह तुरंते के भईल सर्जरी से पट्टी औरी प्लास्टर से तोपायिल रहे. हम उनका ठीक होखे के ले के बहुत डेरायिल रहनी. तब्बो दरद के बादो उनकर मुस्कायिल हमरा के तनियक उम्मीद दहल.

दरद में होखला के बादो बोले खातिर मजबूत, चिन्नादुरइ बतवलन कि इ हमला ओही दिन भईल रहे, जौना दिने उ आपन अधूरा चिट्ठी प्रिंसिपल के देलन.

हम उनका के तनी संतोस दहनी, कुछ तस्वीर लहनी औरी भारी मन से उंहा से चल अयिनी. उनकर माई से त बतियावल त औरी मस्किल रहे. उ अपना लईकन के अकेलही पोसले रहस. औरी पढ़वले रहस. उ ओही छात्र कुल के घर में घरेलू कामगार के जइसन काम करत रहली, जे चिन्नादुरई प हमला कईलस. उनकरा बिस्वासे ना होत रहे कि ऊहे छात्र अइसन हिंसक हरकत क सकत रहलन. ऊ पूरा तरे से टूट गईल रहली औरी चुप रहली. हम तनियक देर बाद उंहा से चल अयिनी.

इ हमला एगो कडवा सच्चाई बतावता कि जात-पात इस्कूलनो में बहुत गहीर जमकल बा.

“आंबेडकर औरी पेरियार के पढला के बाद हमरा बुझाइल इ अंक के खेला ना रहे. हमरा के हमार जात के चलते बहरा कईल गईल रहे.” आजो इस्कूल, कालेज के आपन फोटोग्राफी के कार्यशाला में हम जवान लईकन से बतियावेनी. हम देखेनी कि ओ सब में जात के ले के जागरूकता बहुत कम बा.

एकरो से बेसी चिंता के बात आरक्षण के ले के बा. ओ सब में से बेसी लोग एकरा के खराब नजर से देखेला. ओ सब में ई सोच समाज डलले बा. उ सब इ मानेला कि आरक्षण दलित औरी आदिवासियन के ‘बिसेस अधिकार’ देला. आज हमनी के जवान लईकन के ईहे स्थिति बा.

हमनी के शिक्षा तंत्र इ कुल बिसय प सार्थक पाठ करे में नाकमयाब रहल बा. इंहा ले कि सरकारी लौ कालेज में अम्बेडकर के पढावल अब दूलम हो गईल बा. उनका बिचार प बतियावल बिबादित मानल जाता. कई गो क़ानून के छात्र कुल से बतियवला से हमरा इ बात बुझाइल.

इस्कूल औरी कालेज के जिमेदार नागरिक गढ़े के काम करे के चाही. बाकिर ईहो जगह जात-पात के भेद -भाव से भरल बा. इस्कूल के किताब भले इ कहत रहे कि ‘छुआछूत एगो पाप ह’ तब्बो हम कौनो शिक्षक के इ समझावत नईखीं देखले कि असल जिनगी औरी राजनैतिक औरी सामाजिक सन्दर्भ में एकर का मतलब ह.

पछिला आठ साल से हम अपना फोटोग्राफी के जरिये जात-पात वाला अत्याचार के दस्तावेज बनावतानी. अनुसूचित जाति औरी अनुसूचित जनजाति के छात्र कुल के साथे फोटोग्राफी कार्यशाला में कार कईला औरी ओ सब से बात चीत से हमरा ई समझे के मौक़ा मिला. कि इस्कूल औरी कालेज में ओ सब के कईसन यातना के सहे के परल.

छात्र कुल के साथे घूमत हम देखनी कि हर ऊ छात्र जे इ जात-पात सहले बा, ओकरा आपन बात राखे के आजादी ना भईला से केतना तनाव औरी दुःख सहे के परल. हम अपने इ बुझले बानी. जब हम कलास 11 में रहनी त साथे पढे वाला साथी लोग हमरा ऊपर झूठ ओछरंग लगा दहल कि हम कौनो अइसन काम कईले बानी जौन हम कयिलही ना रहनी. हमरा इ घटना से बहुत दुःख भईल. हम इस्कूल जाईल छोड़ दहनी. फेर से इस्कूल जाए के बिचारे से हमरा डर लागे. हमार माई हमरा ओर से बोलल औरी इ मामला सही भईल.

बाद में, कालेज परसासन हमार 72,000 रोपया के स्कालर शिप देवे से मना क दहल. जब हम एकरा बारे में पूछनी, त उ लोग कहल “हमनी के टैक्स के पइसा से तहर खर्चा काहे उठी?” औरी हमरा के ओहीजा से भगा दहल. हमरा त ईहो ना मालूम रहे कि उ स्कॉलरशिप हमार अधिकार रहे. फोटोग्राफी के जरिये लोग के साथे काम कईला से, ओ अनुभव से राजनैतिक जागरूकता हासिल कईला से, औरी आंबेडकर औरी पेरियार के पढला के बाद से हमरा समाज के जात -पात के रूप समझ में आईल. हम आपन अधिकार पहिचान लहनी.

समाज के हिनतावल समुदाय के दस्तावेज बनावत औरी राजनैतिक जागरूकता बढ़ावे बेरिया हम इ बुझनी कि इस्कूल में हमरा ऊपर लगावल ओछरंग औरी हमार स्कॉलरशिप से हमरा के वंचित कईल इ जाति के कारण रहे. हम एगो अनुसूचित जाती समुदाय से बानी. शिक्षा के संस्थान कुल में जब कौनो चीज भुला जाला, त सबसे पहिले ईहे हीनतावल छात्र कुल प सक कईल जाला. झूठ आरोप के चलते कई गो छात्र लगातार मानसिक तनाव में रहेलें. आजो, अइसन खबर मिलेला कि मास्टरो लोग सफाई कर्मचारी के लईकन से इस्कूल के सौचालय जबरदस्ती साफ़ करवावेला.

इस्कूल औरी कालेज में जात के आधार प भेद-भाव आजो जारी बा. हमनी के शिक्षा प्रणाली एकरा के सुधारे में नाकामयाब रहल. भारत में हमनी के लगे कब्बो कौनो जाति- विहीन कार्यक्रम ना रहल. आजादी के 75 साल बादो हमनी एकरा के खतम कईला के बजाय बरियारे कईनी.

जर्मनी के देख लीं. नाजी सासन के बाद उ लोग आपन अपराध लुकावल लोग ना. बलुक सामना कईल. शिक्षा सुधार औरी ‘डी-नाजीकरण’ एगो पूरा पीढ़ी के नफरत बिसरावे में मदद कईल. लईकन के सिखावल गईल कि ऊ सब अपना पुरनिया लोग के करनी के माफी मांगे. एही तरे समाज अपना घाव से उबरेला.

इ अन्यायपूर्ण स्थिति से उबरे खातिर भावनात्मक मजबूती चाहीं. जात आधारित हिंसा के बेर-बेर होखला के डरे कई गो छात्र चुप रह जालें. उ आपन दुःख भीतरे दबले जिनगी में आगे बढे के कोसिस करेलें.

चिन्नादुरइ अपना प भईल जान के हमला में बाल-बाल बच गईलन. बाद में उनकर इंटरव्यू लियायिल त उ कहलन, “जे लोग हमरा के घाव देले बा, ओहू लोग के नीमन से पढ़ाई करे के चाहीं, औरी जिनगी में नीमन मोकाम हासिल करे के चाहीं.” उनकर इ दयालु स्वभाव उनकर निरछल मन के बतावता, जेकर हकदार इ हिंसक समाज तनिको नईखे.

12 फरवरी,2025 के, शिवगंगा जिला के मनामदुरइ तालुका के मेलप्पडावूर गांव में, एगो दलित युवक प उंच जात के लोग बेरहमी से हमला कईल. उ लोग ओकरा के रोकल, जात वाला गारी दहल औरी कहल, “तहरा जात के कौनो बेक्ती के इतना हिम्मत कईसे भईल कि उ हमनी के सामने गाड़ी चलावे?” औरी फेर हथियार से ओकरा प हमला क दहल.

पीड़ित अय्यासामी, जौन शिवगंगा सरकारी कालेज के बीएससी के तीसरा साल के छात्र हवन. उनका के मदुरई के सरकारी अस्पताल में भर्ती करावल गईल. हम उनका से भेंट करे दू दिन बाद गईनी. उ बतवलन, “उ सब कहल, ‘एगो परियार लईका के बुलेट मोटरसाइकिल चाहीं? हमनी के सड़क प चलइबा? तहरा में एतना हिम्मत बा?’ औरी फेर उ लोग हमरा प हमला क दहल. उ लोग हंसुआ से हमरा गर्दन प वार कईल. बाकिर हम अपना के बचावे खातिर आपन हाथ उपर क दहनी औरी हमरा घाव लाग गईल. जब हम आपन बाइक छोड़ के भगनी त उ लोग चक्कू फेंक के मारल. भाग से हमार फोन ओकरा के रोक लहल, ना त हमार गोड़ कट जाईत. हम बांच के भाग ना पयितीं.”

उनकर जेठ भाई पोनमुथु हमरा के बतवलन, कि हमला करे वाल लोग बाद में उनका घरहूं तूर-फार कईल. उ कहलन, “हमनी के तरक्की ओ सब के बहुत समय से खलत रहे.”

हमनी के बातचीत के बीच में, अय्यासामी आगे कहलन कि अब त ऊ औरी मेहनत से पढ़ाई करे, औरी बड़का पद प पहुंचे के पक्का इरादा सोच लेले बाड़न.

कई जिला में जब हीनतावल समाज आर्थिक, सामजिक तरक्की करेला, त ओ सब के हिंसक बिरोध देखे के परेला.

पत्रकारिता में दलितन के आवाज सायदे कब्बो न्यूजरूम पहूंच पावेला. औरी एक ओरा छांटल समाज के कहानी सायदे कब्बो सुर्खी बन पावेला. आंकडा के हिसाब से, मीडिया में फैसला लेवे वाला जगह प दलितन के परतिसत शून्य बा.

पी. साईनाथ इ बिसय प काफी कुछ लिखले बाड़न. उ कहेलन, “हमरा मन में ई बात के ले के कौनो सक नईखे कि भारतीय लोकतंत्र में मीडिया सबसे ज्यादा लोग के बाहर राखे वाला संस्था ह. रउआ दूसर सब जगह देख सकतानी- बिधायिका, न्यायपालिका, कार्यपालिका, शिक्षा जगत चाहे कौनो औरी क्षेत्र. सब जगह दलित लोग के कुछ ना कुछ प्रतिनिधित्त्व जरुर बा. भले ही उ केतनो कम होखे. बाकिर मीडिया में इ स्थिति कमो से बदतर बा. ईंहा त दलित के प्रतिनिधित्त्व ना के बराबर बा. भारत में दू गो अइसन राष्ट्रपति भईल जे दलित रहे. बिस्वबिद्द्यालय में दलित कुलपति रहल. कुछ अईसनो दलित भईल जे मुख्यमंत्री रहल. भारत के दू गो न्यायधीस दलित रहल. (इ एगो अइसन पद ह जहां कौनो आरक्षण ना होला. एहीसे इ योग्यता के सवाल नईखे.)

“बाकिर, रउआ अखबार में, मने राष्ट्रीय दैनिक में एक्को ‘चीफ सब एडिटर खोज के देखाईं. चाहे टेलीविजन प दलित एंकर खोजे के कोसीस करीं. बहुत बेसी समय ले खोजे के परी. ओ सब के प्रतिनिधित्तव देवे के मामला में इ एगो बिना कहल क्रूरता औरी बिरोध के भावना काम करेला. ईंहा ना त कोटा बा, ना आरक्षण. मीडिया के सामजिक संवेदनशीलता बस एगो पाखंडी देखावा ह.”

जब हमनी जईसन लोग इ सब सांच के सामने ले आवेला त, हमनी ओ लोग में सामिल होनी जे ‘बिरलो में बिरल’ बा. औरी एकरा साथही जिम्मेदारियों आवेला.

अनुवाद: स्मिता वाजपेयी