لکڑیوں میں جان ڈالنے والے بَستر کے پنڈی رام

ٹوکری لیے چلتی عورتیں، کلہاڑی اٹھائے مرد، بیل گاڑیوں کو ہانکتے کسان، اور گور ماریا کی لے پر تھرکتے نوجوان مرد و خواتین – گونڈ آدیواسی برادری کی پوری دنیا گویا گڑھ بینگل کے اس پرانے، بانس کی باڑ سے گھرے کچے مکان کے آنگن میں اتر آئی ہو۔ یہ گاؤں نارائن پور ضلع کے گھنے جنگلوں کے درمیان آباد ہے۔ یہاں تازہ کٹی لکڑی کے تختوں اور ٹکڑوں کی گرم، مٹی کی، ہریالی بھری خوشبو پھیلی ہوئی ہے۔ کچھ لکڑیاں آدھی سوکھی ہوئی ہیں، چاروں طرف بکھری پڑی ہیں – ہر ایک جیسے اپنی کہانی کہنے کو بیتاب ہیں۔ ٹھیک ویسے ہی جیسے ان کے درمیان بیٹھے بزرگ پنڈی رام، اپنے اوزاروں، لکڑی اور شاگردوں سے گھرے ہوئے ہیں۔

دو زانو بیٹھ کر، لکڑی کے ایک چھوٹے سے ٹکڑے پر جھکے ہوئے، اپنی اب کمزور ہو چلی، موتیابین سے متاثرہ آنکھوں کو چشمے کے پیچھے سکوڑے ہوئے، یہ ۷۰ سالہ دستکار اپنی تخلیق کردہ شے کو آخری شکل دے رہے ہیں۔ بیچ بیچ میں وہ اپنے خاص اوزاروں کو ان کے مقامی ناموں سے پکارتے ہیں – چھینی، تری کوڑ، ریگی، پٹاسی، ہتھوڑی۔ اپنے ہاتھوں کی ہر حرکت کے ساتھ وہ شاگردوں کو گونڈی زبان میں سمجھاتے ہیں – کہیں صلاح، کہیں احتیاط۔ لکڑی پر کندہ ہر لکیر صرف ایک ڈیزائن نہیں ہوتی، بلکہ وہ جنگل کی سانسوں سے جڑی ایک زندہ کہانی ہوتی ہے، جو کبھی موریا گونڈ برادری نے جنگل کے ساتھ ہم آہنگی میں جی تھی، اور جسے آج بھی کئی لوگ صاف صاف یاد کرتے ہیں۔

لیکن اِن دنوں اُن کے لیے کام کرنا مشکل ہوتا جا رہا ہے – اور اس سے دور رہ پانا اس سے بھی زیادہ مشکل۔ ’’انہیں بس لکڑی کو چھونا ہوتا ہے، اور انہیں پتہ چل جاتا ہے کہ کیا صحیح ہے اور کہاں کام باقی ہے،‘‘ ان کے بیٹے بلدیو کہتے ہیں، جو خود بھی ایک دستکار ہیں۔ ’’یہ ہنر میری سانسوں جتنا ضروری ہے،‘‘ پنڈی رام کہتے ہیں۔ ’’اگر اسے چھوڑ دوں تو شاید میں زیادہ دنوں تک زندہ نہ رہوں۔‘‘ وہ برآمدے میں بیٹھے ہیں، جہاں چار پانچ لوگ لکڑی گھِسنے، مورتیاں تراشنے اور بھاری ٹکڑوں کو ادھر ادھر لے جانے میں مصروف ہیں۔

’’پہلے مجھے لگتا تھا کہ یہ تو بس ایک گاؤں کا کام ہے،‘‘ پنڈی رام کہتے ہیں۔ ’’پھر شہر کے لوگوں نے اس کی تعریف کرنی شروع کر دی، اور مجھے سمجھ آیا کہ یہی میرا ذریعہ معاش بن سکتا ہے۔ میں نے طے کیا کہ والد سے حاصل کردہ اس ہنر کو آہستہ آہستہ نکھارتے ہوئے اسے ہی اپنی زندگی بنا لوں۔‘‘ ان کی ۳۵ برسوں کی مشق اپنی برادری کی بیش قیمتی وراثت اور لکڑی کے اس پرانے ہنر کو زندہ رکھنے میں گزری ہے۔ لکڑی اور اس سے بنی گھریلو اور آرائشی چیزیں ہمیشہ سے برادری کے گھروں، تقریبات، تہواروں اور روزمرہ کی زندگی کا حصہ رہی ہیں – کبھی بھی صرف کمائی کا ذریعہ نہیں۔

’’اُس وقت میرے والد کے لیے کھیتی چھوڑنا آسان نہیں تھا،‘‘ پنڈی رام کہتے ہیں۔ ’’شروعات میں مجھے خود بھی نہیں معلوم تھا کہ اسے ہنر کہا جا سکتا ہے۔ میں جنگل میں جو کچھ دیکھتا – جانور، پیڑ، پودے – اسے لکڑی پر اتارنے کی کوشش کرتا۔ میں والد کو کام کرتے دیکھتا، ان کے ساتھ بازار جاتا۔ انہی سے میں نے باریک نقاشی والی لکڑی کی کنگھی بنانا سیکھا۔‘‘

’’کوئی بڑی بات نہیں ہے، یہ کام میں نے سیکھا ہے۔ اب ایسی کوئی نقاشی نہیں جسے میں نہ کر سکوں۔ لیکن وہ کنگھی جو میں نے بنائی تھی، اسے آج تک میرے بیٹے بھی نہیں بنا پائے،‘‘ وہ فخریہ مسکراہٹ کے ساتھ کہتے ہیں۔

ان کے ۱۲ بیٹوں میں سے چار لکڑی کے اس ہنر سے وابستہ ہیں، جب کہ باقی الگ الگ پیشوں میں ہیں۔ ’’میری فیملی اسی ہنر پر منحصر ہے۔ میرے چار بیٹے اس کام میں میرا ساتھ دیتے ہیں۔ ضرورت پڑنے پر ان کی بیویاں اور بچے بھی مدد کرتے ہیں۔‘‘ جب کام زیادہ ہوتا ہے تو عورتیں بھی لکڑی چھیلنے اور کاٹنے میں ہاتھ بٹاتی ہیں۔ پنڈی رام نے برادری کے کئی لوگوں کو اس ہنر کی ٹریننگ بھی دی ہے۔

ان کی ٹیم کے رکن سُکدیو منڈاوی کا تعلق مغربی بَستر ضلع کی بھونڈا پنچایت سے ہے، اور وہ گزشتہ ۲۸ برسوں سے اس شعبہ میں کام کر رہے ہیں۔ چھ سال پہلے وہ پنڈی رام منڈاوی کے پاس آئے، تاکہ اس ہنر کی باریکیاں سیکھ سکیں، جو پوری طرح انسانی ہاتھوں سے کی جاتی ہے – بغیر کسی مشین کے۔ ٹیم کے ایک اور رکن بابو لال منڈاوی پچھلے ایک سال سے اس ۷۰ سالہ استاد کے ساتھ ٹریننگ حاصل کر رہے ہیں۔ پنڈی رام نے ریاست بھر کے کئی دستکاروں کو اپنا علم دیا ہے۔

لیکن گڑھ بینگل کا منظرنامہ تبدیل ہو رہا ہے۔ تازہ ترین مردم شماری کے مطابق، یہاں تقریباً ۱۷۰۰ آدیواسی رہتے ہیں۔ پنڈی رام کے بیٹے بلدیو مانتے ہیں کہ اس کی بڑی وجہ اسمارٹ فون ہے۔ ’’پہلے لوگ اپنی جڑوں سے زیادہ جڑے رہتے تھے۔ اب موبائل فون آ گئے ہیں، اور لوگ اپنی ہی ثقافت کو بھولتے جا رہے ہیں،‘‘ وہ کہتے ہیں۔

’’اب تہوار ویسے نہیں منائے جاتے جیسے پہلے منائے جاتے تھے،‘‘ بلدیو کہتے ہیں۔ ان کی نظریں لکڑی کے ستونوں اور پینلوں پر کندہ کیے گئے عوامی تقریبات کے مناظر پر ٹھہر جاتی ہیں، جنہیں ان کے والد نے تراشا ہے۔ اموس – کھیتی کے نئے دور کی شروعات کے لیے؛ نواکھائی – موسم کی پہلی فصل کے جشن کے لیے؛ دیاری – کٹائی کے بعد ان مویشیوں کے اعزاز میں، جن کے بغیر یہ ممکن نہیں تھا؛ چارو – زمین کا شکریہ ادا کرنے کے لیے؛ اور ماٹی تیہار – مٹی کے جشن کی شکل میں۔

’’جس طرح سے یہ تہوار منائے جاتے تھے، نئی نسل اسے جان ہی نہیں پائے گی۔ ہمارے جیسے دستکاروں کے لیے کوئی امید نہیں بچے گی،‘‘ روایات کے کھونے کا افسوس کرتے ہوئے بلدیو کہتے ہیں۔ ’’یہاں کبھی ایک گوٹُل ہوا کرتا تھا – نوجوان آدیواسی مردوں و عورتوں کے سیکھنے اور ساتھ رہنے کی جگہ – جو سیلاب میں بہہ گئی۔ اب نیا بنایا جا رہا ہے، لیکن گوٹل اب فعال نہیں رہے۔ حکومت انہیں صرف اس لیے بنوانا چاہتی ہے، تاکہ یہ احساس ہو کہ وہ لوگوں کی ثقافت کو بچا رہی ہے۔ یہ مورتیاں اُس وقت کی اصلی یاد دلاتی ہیں، جب جنگل، تہوار اور شراکت داری زندگی سے الگ نہیں تھی،‘‘ وہ مزید کہتے ہیں۔

لیکن یہ کہانی صرف نقصان کی نہیں ہے؛ اس میں کچھ حاصل بھی ہوا ہے۔ ’’موبائل فون سے کچھ اچھی باتیں بھی آئی ہیں۔ اب زیادہ لوگ ہمارے کام کو جانتے ہیں۔ ہمیں فون پر ہی آرڈر ملنے لگے ہیں،‘‘ بلدیو کہتے ہیں۔ ان کے والد بھی اس سے اتفاق کرتے ہیں۔ ’’ہمارے گاؤں سے باہر کی دنیا ہمیں اسی کام سے جانتی ہے۔ اور ہمیں اس پر فخر ہے،‘‘ پنڈی رام کہتے ہیں۔ پنڈی رام کے ذریعہ تراشے گئے ستون اور دروازے بھوپال اور حیدر آباد کے آدیواسی میوزیم میں نمائش کے طور پر لگائے گئے ہیں۔ بَستر کے چترکوٹ جیسے سیاحتی مقامات پر ان کے ذریعہ بنائے گئے ستون (کھمبے) مستقل طور پر لگائے گئے ہیں۔ ’’میں آج بھی اپنے بیٹوں کو اس فن کی باریکیاں سکھاتا ہوں، تاکہ یہ روایت آگے چلتی رہے،‘‘ پنڈی رام کہتے ہیں۔

حالانکہ، ان کی شناخت کا سفر اسمارٹ فون کی آمد سے کافی پہلے شروع ہو چکا تھا۔ یہ ۱۹۸۰ کی دہائی کی بات ہے۔ تب ان کی عمر صرف ۲۵ سال تھی۔ ’بھارت بھون‘ جیسے مختلف فنون پر محیط عمارت کی تعمیر سے وابستہ فنکار جگدیش سوامی ناتھن آدیواسی فنون کا ایک ذخیرہ تیار کرنا چاہتے تھے۔ انہوں نے پنڈی رام کا کام دیکھا اور انہیں بھوپال بلایا۔ ’’اُس وقت تک کئی بار مجھے لگتا تھا کہ سب کچھ چھوڑ کر مزدوری ہی کر لوں،‘‘ پنڈی رام کہتے ہیں۔ ’’لیکن میرا دل تو بس یہی کام کرنا چاہتا تھا۔ اس لیے میں نے طے کر لیا تھا کہ چاہے کوئی میرے ذریعہ تخلیق کردہ چیزیں خریدے یا نہیں، میں یہی کرتا رہوں گا۔ بھوپال سے لوٹنے کے بعد جب میں نے دیکھا کہ میرے کام کی کتنی تعریف ہو رہی ہے، تو اسی سے زندگی چلانا آسان ہو گیا۔ اُس وقت لکڑی کے کام سے میری آمدنی کاشتکاری سے بھی زیادہ ہونے لگی،‘‘ وہ مزید کہتے ہیں۔

پھر بھی، کھیتی ان کی زندگی کا حصہ بنی رہی۔ اب آنکھیں کمزور ہو جانے کی وجہ سے، پہلے جیسی باریک کام والی مورتیاں بنانا ان کے لیے مشکل ہو گیا ہے۔ اب وہ کھیت میں زیادہ وقت گزارنے لگے ہیں، لیکن ان کا دل آج بھی لکڑی کے کام میں ہی دھڑکتا ہے۔ ’’اب حالات مشکل ہیں،‘‘ پنڈی رام کہتے ہیں۔ ’’اس کام کے لیے سب سے ضروری ہے اچھی لکڑی – ساگوان، سال، مہوا۔ یہ ہمیں محکمۂ جنگلات کی نیلامی سے ملتی ہیں۔ لیکن اب نہ تو افسر پہلے جیسے رہے، اور نہ ہی اچھی لکڑی آسانی سے ملتی ہے۔‘‘

ٹیم کے رکن بلدیو کہتے ہیں، ’’ہم چاہتے ہیں کہ ہر تراشی گئی شکل دائمی ہو۔ اس لیے ہم معیار سے کبھی سمجھوتہ نہیں کرتے، خواہ لکڑی کتنی بھی مہنگی کیوں نہ ہو۔‘‘ آج ٹیم کو آرڈر سے باقاعدہ آمدنی ہونے لگی۔ ایک گوٹُل ستون ۳۵ ہزار روپے میں فروخت ہوتا ہے، جب کہ ایک نقاشی دار پینل ۷۰ ہزار روپے تک کا ہوتا ہے۔ ’’مجھے آج بھی وہ دن یاد ہے، جب کسی نے میری پہلی مورتی خریدی تھی،‘‘ پنڈی رام یاد کرتے ہیں۔ ’’وہ ایک سرکاری ملازم تھا۔ مجھے اچھی رقم ملی تھی۔ اُس دن مجھے لگا کہ میں دنیا کا سب سے خوش انسان ہوں۔‘‘

’’آج اور پہلے میں بس یہی فرق ہے،‘‘ یہ پنڈی رام کہتے ہیں۔ پہلے بہت غریبی تھی، کوئی بازار نہیں تھا، اور میرے ہنر کو کوئی نہیں پہچانتا تھا۔ آج میں بوڑھا ہو گیا ہوں۔ میری آنکھیں کمزور ہیں۔ برادری کے نوجوان اس ہنر کی پرواہ نہیں کرتے۔ اس لیے یہ ہنر آہستہ آہستہ ختم ہو رہا ہے۔‘‘

پچھلے سال اگست میں جب میری ان سے ملاقات ہوئی، تب انہیں حکومت ہند کے ذریعہ پدم شری انعام سے نوازا جا چکا تھا۔ اب وہ گاؤں میں اپنے فن کا ایک مرکز کھولنے کا خواب دیکھ رہے ہیں، جہاں بچے لکڑی کو پہچاننا، اوزاروں سے کام کرنا اور اپنی ثقافت کو زندہ رکھنا سیکھ سکیں۔ ’’ہم چاہتے ہیں کہ یہ ہنر بچوں میں زندہ رہے،‘‘ وہ کہتے ہیں۔ ’’جنگل کی زبان، لکڑی کی یاد – اب آنے والی نسل تک پہنچے۔‘‘

یہ اسٹوری سب سے پہلے ہندی میں لکھی گئی تھی۔

یہ اسٹوری مرنالنی مکھرجی فاؤنڈیشن (ایم ایم ایف) سے ملی فیلوشپ کے تحت لکھی گئی ہے۔

ترجمہ نگار: قمر صدیقی