برگر، لنگر اور جنتر منتر پر طلبہ کا احتجاج

’’اوہ، وہ آخری برگر تھا جو وہ لے گیا۔ معاف کیجئے گا، میڈم،‘‘ راہل نے کہا، جب میں ان سے جنتر منتر کے احتجاجی مقام پر ملی تھی۔ وہ اب بھی اپنی موٹر سائیکل پر بیٹھے ہوئے تھے۔ پیچھے بندھا لال رنگ کا زومیٹو ڈیلیوری بیگ خالی ہو چکا تھا۔ شام کے ساڑھے چھ بج رہے تھے۔ ’’اس تھیلے میں برگر کے ۳۰ پیکٹ تھے جو بنگلور کے کسی شخص نے بھیجے تھے ’ان کے لیے جو اسے کھانا چاہتے ہوں‘،‘‘ انہوں نے بتایا۔

بہار کے دربھنگہ ضلع سے تعلق رکھنے والے راہل کمار یادو ایک طالب علم ہیں۔ اس احتجاج میں شرکت کرنے کے لیے انہوں نے اپنی پڑھائی سے کوئی چھٹی نہیں لی تھی؛ بلکہ رات کی شفٹ میں ڈیلیوری بوائے کا کام کرنے کے لیے انہوں نے شام ۶ بجے سے صبح کے ۶ بجے تک کا وقت منتخب کیا۔ انہوں نے جنتر منتر پر جو آرڈر پہنچائے ان میں کچھ ایسے کھانے کے سامان بھی تھے، جن کے پیسے دوسرے شہروں میں رہنے والے لوگوں نے ادا کیے تھے۔ نامعلوم افراد کی طرف سے بھیجے گئے یہ پارسل جن پر کوئی خاص پتہ درج نہیں ہوتا تھا – بلکہ جنتر منتر پر موجود کسی بھی بھوکے شخص کے لیے تھا۔

جنتر منتر پر طلبہ کے اس پورے احتجاج کے دوران، لاٹھی چارج اور بڑے پیمانے پر تباہی کے باوجود، اس قسم کے کھانے مختلف سمتوں سے وہاں لگاتار پہنچتے رہے۔ برگر، سینڈ وِچ، پارلے جی کے پیکٹ وغیرہ، آن لائن ایپس کی مدد سے ’سروس ڈیلیوری پارٹنرز‘ کے ذریعہ پہنچائے جاتے رہے۔ دہلی کے گھروں سے پکے ہوئے کھانے بھی آتے تھے۔ اور سب سے اہم بات، پاس کے گرودوارہ میں لنگر بھی چل رہا تھا، جو دہائیوں سے عام لوگوں کو مفت کھانا مہیا کراتا آ رہا ہے۔

جون کی شروعات سے ہی، دہلی کے بیچوں بیچ موجود ۱۸ویں صدی کی یہ دھوپ گھڑیاں اور فلکیاتی عمارتیں کاکروچ جنتا پارٹی کی قیادت میں چل رہے احتجاج کا مرکز بن گئی تھیں۔ نوجوانوں کی اس تحریک کا آغاز آن لائن طنز کے طور پر ہوا تھا، جس نے بعد میں سڑکوں پر احتجاج کی شکل اختیار کر لی۔

مختلف طلبہ تنظیموں سے وابستہ مظاہرین نے ۲۰۲۶ کے نیٹ امتحان کے پیپر لیک اور دیگر امتحان سے متعلق بدعنوانیوں اور بد انتظامیوں کو بنیاد بنا کر مرکزی وزیر تعلیم دھرمیندر پردھان کے استعفیٰ کا مطالبہ کیا، جو بعد میں ہوا بھی۔ ساتھ ہی، انہوں نے عوامی تعلیمی نظام میں بڑے پیمانے پر اصلاحات کی بھی آواز اٹھائی۔ اس دوران لداخ کے سماجی کارکن سونم وانگچُک نے ۲۸ جون سے یہاں تین ہفتے سے زیادہ عرصے تک بھوک ہڑتا کی۔ پھر ۲۰ جولائی کو پارلیمنٹ کے مانسون اجلاس کے پہلے دن، جب ہزاروں لوگوں نے پارلیمنٹ کی طرف مارچ کرنا شروع کیا، تو دہلی پولیس نے ان پر لاٹھی چارج کیا اور آنسو گیس کے گولے داغے۔

ان سب کے درمیان، کھانا اور پینے کا پانی جنتر منتر پر مظاہرین کی تشویشات میں اُس طرح سے شامل نہیں تھا۔

جنتر منتر ایسے کمیونٹی کچن میں تبدیل ہو چکا تھا، جسے معاشرہ کے الگ الگ طبقوں کے لوگ باہمی طور پر چلا رہے تھے۔

دفتروں میں کام کرنے والے لوگ ڈیوٹی ختم کر کے یہاں پہنچتے تھے۔ بزرگ شہری اپنی فیملی اور بچوں کے ساتھ آتے تھے۔ ارد گرد گول گپّے اور دہی بھلّے بیچنے والے کئی دکاندار اکثر ان مظاہرین کو مفت میں کھلاتے تھے۔ طلبہ اپنے جیب خرچ سے خریدے گئے بسکٹ آپس میں بانٹ لیتے تھے۔ دوسرے شہروں سے بھی کھانا پہنچتا تھا۔ لوگ سُویگی اور زومیٹو کے ذریعہ کھانا آرڈر کر کے بھیجتے تھے، تاکہ جسے ضرورت ہو وہ کھا پائے۔ کھانے کا مینیو نوجوانوں کی پسند کے مطابق تھا، یعنی پژہ، بریانی، چپس، کولڈ ڈرنک اور جولائی کی حبس بھری گرمی سے راحت دینے کے لیے کچھ پیکٹوں میں کارڈ بورڈ کے ہاتھ والے پنکھے بھی رکھے ہوتے تھے۔ کھانا اتنا آنے لگا کہ مصروف ترین دنوں میں سے ایک دن منتظمین کو اپیل کرنی پڑی کہ اب کھانا بھیجنا بند کر دیں۔ ان کے پاس کافی کھانا تھا اور وہ کچھ بھی برباد نہیں ہونے دینا چاہتے تھے۔

جب ۲۱ سال کے لوکُش پرجاپتی اپنے ساتھی طلبہ کے ساتھ احتجاج میں شامل ہونے آئے، تو ان کے پاس صرف ۵۰۰ روپے اور گھر سے لایا ہوا ٹفن تھا۔ انہیں یہ معلوم نہیں تھا کہ اگلا کھانا کہاں ملے گا یا رات گزارنے کا ٹھکانہ کہاں ہوگا۔ وہ اتر پردیش کے باندہ ضلع کے اترّا قصبہ سے آئے تھے۔

وہ بتاتے ہیں، ’’لیکن جنتر منتر پر اس کے لیے سوچنا نہیں پڑا۔ ہم سب کو یہی محسوس ہوتا تھا کہ گویا ہم ایک بہت بڑے خاندان کا حصہ ہیں۔‘‘

ان کی سب سے بڑی تشویش پولیس کے ذریعہ برپا کیا جانے والا تشدد تھا۔ پلاسٹر میں جکڑا ان کا بایاں پیر ایک لال پلاسٹک کی کرسی پر رکھا ہوا تھا۔ انہوں نے پاری سے کہا، ’’میرا ٹخنہ ٹوٹ گیا ہے اور پلاسٹر چڑھا ہونے کے باوجود مجھے پانچ گھنٹے تک حراست میں رکھا گیا۔‘‘ انہوں نے ۲۰ جولائی کو دہلی پولیس کے لاٹھی چارج میں گردن، ہاتھ اور پیٹ پر لگے زخم بھی ہمیں دکھائے۔ انہیں رات ۱۰ بجے سے صبح ۴ بجے تک پولیس کی ایک بس میں بغیر کھانا دیے بند رکھا گیا۔

ہلکا گلابی ٹی شرٹ پہنے محمد عادل کی طرف اشارہ کرتے ہوئے انہوں نے کہا، ’’لیکن جب انہوں نے مجھے چھوڑا، تب ہزاروں لوگوں کا میرا خاندان مختلف قسم کا کھانا لے کر میرا انتظار کر رہا تھا۔ میں بس سے پوری طرح نیچے بھی نہیں اتر پایا تھا کہ اس لڑکے نے مجھے پارلے جی بسکٹ کا پیکٹ پکڑا دیا۔‘‘ غازی آباد کے بی اے کے طالب علم عادل اب بھی مجمع کے درمیان گھوم گھوم کر اپنے جیب خرچ سے خریدے گئے بسکٹ کے پیکٹ بانٹ رہے تھے۔

دہلی کے سب سے مشہور مذہبی مقامات میں سے ایک، بنگلہ صاحب گرودوارہ سے مسلسل اور منظم مدد ملتی رہی۔ گرودوارہ نے احتجاجیوں کے لیے لنگر چلایا اور اپنے دروازے چوبیسوں گھنٹے کھلے رکھے۔ سچکھنڈ فاؤنڈیشن، ہیم کُنٹ فاؤنڈیشن اور کئی دوسری تنظیموں نے کھانا، کپڑے، پانی کی بوتلیں، رین کوٹ اور سلیپنگ بیگ پہنچائے۔ انہوں نے عارضی بیت الخلاء بنوائے، پاور بینک بانٹے اور مظاہرین کے سونے کا انتظام بھی کیا، جن میں سے کچھ کام گرودوارہ کے تعاون سے کیے گئے۔

دہلی سکھ گرودوارہ پربندھک کمیٹی کے میڈیا صلاح کار سُدیپ سنگھ نے پاری کو بتایا، ’’لنگر بنگلہ صاحب گرودوارہ میں تیار کیا جاتا تھا اور گرودوارے سبھی کے لیے کھلے ہوتے ہیں۔ احتجاج شروع ہونے کے پہلے دن سے ہی طلبہ دن میں تین بار یہاں آتے تھے اور ہم انہیں کھانا کھلاتے تھے۔ ہم نے طلبہ سمیت کئی مظاہرین کے رات میں رکنے کا انتظام بھی کیا۔ ایک تنظیم کے طور پر سی جے پی کے احتجاج کے بارے میں ہماری کوئی خاص رائے نہیں ہے۔ ہماری ذمہ داری صرف اتنی ہے کہ جو بھی ہمارے دروازہ پر آئے، اس کی خدمت کریں۔‘‘

لنگر یعنی مفت کمیونٹی کچن، سکھ مذہب کی سب سے پرانی روایتوں میں سے ایک ہے اور گزشتہ چند برسوں میں یہ ہندوستان کے مظاہروں میں بار بار دکھائی دینے والی چیز بن گئی ہے۔ سال ۲۰۲۰ اور ۲۰۲۱ میں زرعی قوانین کے خلاف دہلی کی سرحدوں پر چلے کسان آندولنوں کے دوران لنگروں نے سال بھر سے زیادہ وقت تک، کڑاکے کی سردی اور وبائی مرض کے دوران دن رات بے شمار لوگوں کو کھانا کھلایا۔ شاہین باغ میں شہریتی ترمیمی بل کے خلاف دھرنے کے دوران پنجاب کے کسانوں نے یکجہتی کا اظہار کرتے ہوئے لنگر لگایا تھا۔ بعد میں، پنجاب کے مالیر کوٹلہ میں مسلم نوجوانوں نے احتجاجی سکھ کسانوں کے لیے کھانا پکایا۔ یہ روایت بار بار اس لیے دہرائی جاتی ہے، کیوں کہ اس کا پیغام بالکل واضح ہے اور اس سے نا اتفاقی نہیں کی جا سکتی۔ اختلافات چاہے جو بھی ہوں، جو آیا ہے اسے بھوکا نہیں رہنا چاہیے۔

جنتر منتر پر موجود کسی بھی شخص سے یہ چیز پوشیدہ نہیں رہی۔ پولیس نے لَوکُش کو پوری رات بغیر کھانا دیے رکھا تھا۔ وہیں دوسری جانب، جیسے ہی وہ بس سے اترے، اجنبیوں نے ان کے ہاتھ میں کھانا پکڑا دیا۔

پھر ۲۵ جولائی آئی اور دھرمیندر پردھان نے استعفیٰ دے دیا۔ ساتھ ہی، سی جے پی نے اپنا احتجاج ختم کر دیا۔ اس سے پہلے والے ہفتوں کے دوران وہاں کھانا کبھی ختم نہیں ہوا۔

جنتر منتر سے واپس لوٹتے وقت بھی ہم نے دیکھا کہ اپنی رات کی شفٹ میں بائک چلاتے ہوئے راہل اُن لوگوں تک اجنبیوں کا بھیجا ہوا کھانا پہنچا رہے تھے جنہیں بھوک لگی تھی۔ لوکش کا ٹخنہ اب بھی پلاسٹر میں تھا؛ اور عادل کے ہاتھ میں اب بھی بسکٹ کے پیکٹ تھے، اس امید میں کہ کہیں کوئی اور بھی کسی بس سے بھوکا رہ کر نہ آ رہا ہو۔

صحافی نچّینارکّینیئن ایم کے ذریعہ فراہم کردہ بیش قیمتی معلومات کے لیے رپورٹر ان کا شکریہ ادا کرتی ہیں۔