பர்கர்களும் லங்கரும் பசியில்லா போராட்டமும்

“ஓ அதுதான் கடைசி பர்கர். அதை அவர் எடுத்துக் கொண்டார். சாரி, மேடம்,” என்றார் ராகுல் ஜந்தர் மந்தர் போராட்டக் களத்தில் அவரை நான் சந்தித்தபோது. பைக்கில் அமர்ந்திருந்த அவர், மாட்டியிருந்த சிவப்பு நிற சொமாட்டோ பை மாலை 6.30 மணிக்கு காலியாகி இருந்தது. “30 பர்கர் பாக்கெட்டுகள் பையில் இருந்தன. பெங்களூரை சேர்ந்த ஒருவர் ‘தேவைப்படும் எவரும் வாங்கிக் கொள்ளலாம்’ என எழுதி அனுப்பியிருந்தார்,” என்கிறார் அவர்.

பிகாரின் தார்பங்கா மாவட்டத்தை சேர்ந்த ராகுல் குமார் யாதவ், பகலில் கல்லூரிக்கு செல்கிறார். போராட்டத்தில் பங்கேற்க அவர் படிப்பை விட்டுவிடவில்லை. அதற்கு பதிலாக இரவில் அவர் மாலை 6 முதல் காலை 6 வரை டெலிவரி நபராக பணிபுரிகிறார். அவர் எடுத்து செல்லும் பொருட்களில், பிற நகரங்களை சேர்ந்தோர் வாங்கி அனுப்பிய உணவும் இருந்தது. பெயர் சொல்லாத நன்கொடையாளர்கள் இன்னாருக்கென இல்லாமல் ஜந்தர் மந்தரில் பசியுடன் இருக்கும் எவரும் வாங்கும் விதமாக அனுப்பிய பார்சல்கள் அவை.

ஜந்தர் மந்தரின் மாணவர் போராட்டத்தில் சிறைபிடிப்பு மற்றும் தடியடிக்கு நடுவே பல திசைகளிலிருந்து உணவு வந்து கொண்டே இருந்தது. பர்கர்கள், சாண்ட்விச்கள், பார்லே-ஜி பிஸ்கட்டுகள் என பல உணவுப் பொருட்கள், இணையவழி செயலிகளின் ‘டெலிவரி நபர்’களால் கொண்டு வரப்பட்டன. முக்கியமாக பக்கத்திலுள்ள குருத்வாராவின் லங்கர் (தன்னார்வலர்களால் சமைக்கப்பட்டு உணவு இலவசமாக விநியோகிக்கப்படும் சமையற்கூடம்) பல பத்தாண்டுகளாக மக்களென திறந்து வைக்கப்பட்டிருக்கிறது.

ஜூன் மாதத் தொடக்கம் தொடங்கி, 18ம் நூற்றாண்டின் இந்த சூரியக் கடிகாரம் மற்றும் கட்டிடக் கலை சார்ந்த வானியல் கருவிகள் இருக்கும் தலைநகரின் இந்த மையப்பகுதிதான், காக்ரோச் ஜனதா கட்சி நடத்திய காத்திருப்பு போராட்டத்துக்கான தளமாக இருந்தது. இணையவழி பகடியாக தொடங்கிய இளைஞர் இயக்கம், தெருக்களுக்கு இங்குதான் வந்தடைந்தது.

பல மாணவர் குழுக்கள் இணைந்த இயக்கத்தில், 2026ம் ஆண்டு நீட் வினாத்தாள் கசிவு மற்றும் பிற தேர்வு முறை குளறுபடிகள் காரணமாக ஒன்றிய கல்வித்துறை அமைச்சர் தர்மேந்திர பிரதானின் பதவி விலகலை கோரி போராட்டக்காரர்கள் போராடினர். அமைச்சர் பிற்பாடு பதவி விலகவும் செய்தார். பொதுக் கல்வி முறையில் போராட்டக்காரர்கள் சீர்திருத்தம் கொண்டு வரவும் கோரினர். லடாக்கை சேர்ந்த செயற்பாட்டாளரான சோனம் வாங்சுக் ஜூன் 28 தொடங்கி இங்கு மூன்று வார உண்ணாவிரதப் போராட்டம் நடத்தினார். ஜூலை 20ம் தேதி, நாடாளுமன்ற மழைக்கால கூட்டத்தொடரின் முதல் நாளில், ஆயிரக்கணக்கான போராட்டக்காரர்கள் பேரணி செல்ல முயன்றபோது டெல்லி காவல்துறை தடியடி மற்றும் கண்ணீர் குண்டுகளை கொண்டு பதிலளித்தது.

மொத்த சம்பவமும் நிகழும்போது கூட உணவும் குடிநீரும் போராட்டக்காரர்களுக்கு கிடைத்துக் கொண்டுதான் இருந்தது.

அந்த இடம் பல்வேறு பின்னணி கொண்ட மக்கள் கொடுக்கும் உணவின் மூலம் இலவச சமூக சமையல் கூடமாக மாறியிருந்தது.

அலுவலகத்தில் பணிபுரிபவர்கள், வேலை முடிந்து வந்தனர். முதியவர்களும் குழந்தைகளும் குடும்பங்களுடன் வந்தனர். உள்ளூர் கொல்கப்பா மற்றும் தாகி-பல்லா வியாபாரிகள், இலவசமாக போராட்டக்காரர்களுக்கு உணவு வழங்கினர். கைக்காசை வைத்து மாணவர்கள் வாங்கும் பிஸ்கட்டுகளை பகிர்ந்து கொண்டனர். பிற நகரங்களிலிருந்து உணவு, ஸ்விகி மற்றும் சொமேட்டோ மூலம் ஆர்டர் செய்து அனுப்பப்பட்டது. யாருக்கு தேவையே எடுத்துக் கொள்ளலாம். இளைஞர்கள் விரும்பும் பிட்சா, பிரியாணி, சிப்ஸ், குளிர்பானங்கள் போன்றவையும் ஜூலை மாத புழுக்கத்தை தவிர்க்கவென சிறு மின் விசிறி பார்சல்களும் கூட வந்தன. நிறைய பொருட்களும் உணவும் வந்ததால், மேலதிகமாக வந்து பயன்படாமல் வீணாகி விடக் கூடாது என ஒருங்கிணைப்பாளர்கள் களத்துக்கு பொருட்களையும் உணவையும் அனுப்பியது போதும் என பதிவிட்டனர்.

21 வயது லவ்குஷ் பிரஜாபதி போராட்டத்தில் கலந்து கொள்ள 500 ரூபாய் மற்றும் ஒரு மதிய உணவு டிபன் பாக்ஸுடன் வந்து சேர்ந்தார். அடுத்த உணவு, வசிப்பிடம் பற்றியெல்லாம் அவர் எதுவும் யோசித்திருக்கவில்லை. உத்தரப்பிரதேசத்தின் அதார்ரா டவுனிலிருந்து பயணித்து வந்திருக்கிறார்.

”ஆனால் இங்கு ஜந்தர் மந்தரில் அவற்றை பற்றிய கவலை இருக்கவில்லை. நாங்கள் அனைவரும் ஒரு பெரிய குடும்பத்தை சேர்ந்தவர்கள் போலத்தான் உணர்ந்தோம்.”

அவரின் கவலை காவல்துறை வன்முறை குறித்துதான் இருந்தது. அவரின் இடதுகாலில் கட்டுப் போடப்பட்டு சிவப்பு பிளாஸ்டிக் நாற்காலியில் வைக்கப்பட்டிருந்தது. “என் கணுக்கால் உடைந்துவிட்டது. இந்த க்ட்டு போட்டும் கூட, ஐந்து மணி நேரங்களுக்கு என்னை சிறை வைத்திருந்தனர்,” என்கிறார் அவர் நெற்றி, கை மற்றும் வயிற்றில் ஜூலை 20ம் தேதி டெல்லி காவல்துறை தாக்கியதால் ஏற்பட்ட காயங்களை காட்டியபடி. ஓர் இரவு முழுக்க இரவு 10 மணி முதல் அதிகாலை 4 மணி வரை உணவின்றி ஒரு காவல்துறை பேருந்தில் சிறை வைக்கப்பட்டிருந்தார்.

“ஆனால் அவர்கள் மீண்டும் என்னை இறக்கி விட்டதும், ஆயிரக்கணக்கானோர் கொண்ட என் குடும்பம், பல வகை உணவுடன் காத்துக் கொண்டிருந்தது. பேருந்தை விட்டு தரையிறங்குவதற்கு முன்பே ஒருவர் பார்லே ஜி பிஸ்கட்டை இவர் கொடுத்தார்,” என்கிறார் வெளிர் சிவப்பு நிற டி-ஷர்ட் அணிந்திருந்த முகமது அதிலை சுட்டிக் காட்டி. காஜியாபாத்தை சேர்ந்த இளங்கலை மாணவரான அதில், தன் கைக்காசை கொண்டு வாங்கிய பார்லே ஜி பிஸ்கட்டுகளுடன் கூட்டத்துக்குள் இன்னும் நடந்து கொண்டிருந்தார்.

டெல்லியில் சீக்கியர்கள் கூடி வணங்கும் பிரபல இடமான பங்க்லா சாகிப் குருத்வாராவிலிருந்து நிலையான உதவி வந்து கொண்டிருந்தது. போராட்டக்காரர்களுக்கென அதன் சமையற்கூடம் இரவுபகலாக இயங்கிக் கொண்டிருந்தது. சச்கந்த் அறக்கட்டளை, ஹெம்குந்த் அறக்கட்டளை மற்றும் பிற அமைப்புகள் உணவு, துணிகள், குடிநீர் பாட்டில்கள், மழைக் கோட்டுகள், தூங்கும் பைகள் போன்றவற்றை கொண்டு வந்தன. தற்காலிக கழிவறைகள் அமைத்தன. மின் சேமிப்பகங்களை கொடுத்தன. தூங்குவதற்கான இடங்களை தயார் செய்து கொடுத்தன. அவற்றில் சில அமைப்புகள் குருத்வாராவுடன் இணைந்து அனைத்தையும் செய்தன.

டெல்லி சீக்கிய குருத்வாரா மேலாண்மை குழுவுக்கான செய்தி தொடர்பாளரான சுதீப் சிங், “சமையல் பங்க்லா சாகிப் குருத்வாராவால் செய்யப்பட்டது. குருத்வாராக்கள் அனைவருக்கும் திறந்திருப்பவை. போராட்டங்கள் தொடங்கியதிலிருந்து மாணவர்கள் தினசரி மூன்று வேளை வந்தனர். நாங்கள் அவர்களுக்கு உணவளித்தோம். அமைப்பாக CJP போராட்டம் பற்றி எங்களுக்கு நிலைப்பாடு ஏதும் இல்லை. எங்களை தேடி வரும் அனைவருக்கும் சேவை செய்வதுதான் எங்களின் கடமை,” என்றார்.

இலவச சமூக சமையற்கூடமான லங்கர், சீக்கியத்தின் பழமையான அமைப்பாகும். கடந்த சில ஆண்டுகளில் நடந்த இந்தியப் போராட்டங்கள் பலவற்றில் தொடர் உதவியை செய்திருக்கின்றன. 2020 மற்றும் 2021ம் ஆண்டுகளில் வேளாண் சட்டங்களை எதிர்த்து டெல்லி எல்லையில் விவசாயிகள் போராடியபோது ஆயிரக்கணக்கானோருக்கு இரவு பகலாக, கடுங்குளிரிலும் தொற்றுக்காலத்திலும் ஒரு வருடம் வரை லங்கர்கள் சமைத்து உணவு கொடுத்துக் கொண்டிருந்தன. குடியுரிமை திருத்த சட்டத்துக்கு எதிராக ஷாகீன் பாகில் நடந்த போராட்டத்தில் பஞ்சாபி விவசாயிகள் ஆதரவளிக்கும் வகையில் லங்கர் அமைத்தனர். பிற்பாடு பஞ்சாபில் மலேர்கோட்லாவில் சீக்கிய விவசாயிகள் போராடியபோது இஸ்லாமிய இளைஞர்கள் சமைத்து உணவளித்தனர். இந்த செயல்பாடை எதிர்த்து யாரும் கேள்வி எழுப்ப முடியாது என்பதால் எளிமையாக இருந்தது. ஏனெனில் என்னதான் முரண் இருந்தாலும் யாரும் பசியோடு இருக்கக் கூடாது என்பதே நோக்கம்.

இதே நிலைதான் ஜந்தர் மந்தரிலும். எவரிடமும் உணவு குறித்து முரண் இல்லை. லவ்குஷை காவலர்கள் பேருந்தில் இரவு முழுக்க உணவின்றி சிறை வைத்திருந்து விடுவித்தபோது, அவர் தரையிறங்குவதற்கு முன்பே அவரது கைகளில் உணவுகளை திணித்தனர்.

ஜூலை 25 அன்று அமைச்சர் ராஜிநாமா செய்தார். CJP தன் போராட்டத்தை முடித்துக் கொண்டது. அதற்கு முந்தைய வாரங்களில் உணவு தீர்ந்து போகவே இல்லை.

ஜந்தர் மந்தரை விட்டு நாங்கள் கிளம்பும்போது ராகுல் இரவு டெலிவரி நபராக யாரென்று தெரியாதவர்கள் போட்ட ஆர்டர்களை சுமந்து சென்று கொண்டிருந்தார். லவ்குஷின் கணுக்காலில் இன்னும் கட்டு இருக்கிறது. அதிலின் கைகளில் இன்னும் பிஸ்கட்டுகள் இருந்தன. பேருந்திலிருந்து மீண்டும் ஒருவர் கையில் ஒன்றுமின்றி இறங்கினால், அவருக்கு அவை உதவலாம்.

கட்டுரையாளர், பத்திரிகையாளர் நச்சினார்க்கினியன் எம் அளித்த பங்களிப்புக்கு நன்றி சொல்கிறார்