बर्गर, लंगरु ऐं हिक अहिड़ो एहतिजाजु जंहिं बुखायल रहण सां इन्कार पिए कयो

जन्तर मंतर जी बुख हड़ताल लखें माण्हुनि जो ध्यानु छिकियो। ताजुब जी ॻाल्हि इहा आहे त अवाम जी हमदर्दीअ ऐं हिमायत जी अहिड़ी लहर ॾिसण आई जंहिं जे नतीजे में हज़ारें प्रदर्शनकारियुनि मां को बि बुखायलु न रहे।

“अड़े, उहो आख़िरी बर्गरु हो, सो बि हू वठी वियो। मूंखे माफ़ कजो, मैडम,” राहुल मूंखे उन वक़्ति ॿुधायो जॾहिं मां जन्तर मंतर वारी एहतिजाज जाइ खां ॿाहिर हुन सां मिलियुसि। हू अञा ताईं पंहिंजी बाईक ते वेठलु हो, जंहिं जे पोयां ज़ोमेटो जो ॻाढ़ो डिलीवरी वारो थेल्हो ॿधलु हो- जेको शाम 6:30 वॻे ज़ाहिरी तौर ख़ाली थी चुको हो। हुन चयो “थेल्हे में हर उन शख़्स लाइ ‘जंहिं खे ज़रूरत हुजे’ बर्गर जा 30 पैकेट हुआ, जेके बेंगलुर मां कंहिं मोकिलिया हुआ।”

बिहार जे दरभंगा ज़िले जो रहण वारो राहुल कुमार यादव, ॾींहं में पढ़ंदो आहे। हुन एहतिजाज में बहिरो वठण लाइ पंहिंजी पढ़ाईअ खां ब्रेक न वठी; उन बदिरां हुन शाम 6 वॻे खां सुबुहु 6 वॻे ताईं डिलीवरी बॉय तौर नाईट शिफ़्ट में कम करण जो विकल्पु चूंडियो। जेके आर्डर हू पहुचाईंदो हो, उन्हनि में उहे खाधा पिणु शामिलु हुआ जिनि जी अदाइगी ॿियनि शहरनि जे माण्हुनि कई हुई। गुमनाम दान कंदड़नि पारां मोकलियल उहे पार्सल कंहिं ख़ासि माण्हूअ लाइ न, बल्कि जन्तर मंतर ते मौजूद हर उन शख़्स लाइ हुआ जेको बुखायलु हुजे।

जन्तर मंतरु ते शागिर्दनि जे एहतिजाज दौरानि, लाठी चार्ज ऐं वॾे तइदाद में थींदड़ गिरफ़्तारियुनि जे विचु में, हर ॾिस मां खाधो पहुचंदो रहियो। बर्गर, सैंडविच, पारले-जी बिस्कूट जा पुड़ा ऐं ॿियनि शयुनि जा पार्सल मुख़्तलिफ़ आनलाइन ऐपुनि जे 'सर्विस डिलीवरी पार्टनर्स' (जंहिं खे गिग वर्कर चयो थो वञे) पारां पहुचाया पिए विया। तंहिं खां सवाइ दिल्लीअ जे आम घरनि मां खाधो रधिजी पिए आयो, ऐं सभ खां अहमु, वेझे गुरुद्वारे जे लंगर (स्वयंसेवकनि पारां मुफ़्त खाधो रधे परिछणु) मां बि खाधो पिए मिलियो, जेको ॾहाकनि खां अवाम लाइ खुलियलु आहे।

जून जे शुरूआति खां वठी, राॼधानीअ जे विच में मौजूदु 18हीं सदीअ जूं इहे सिज घड़ियाल ऐं आर्किटेक्चरल एस्ट्रोनॉमी जूं इमारतूं, कॉकरोच जनता पार्टी जी अॻवानीअ में कोठायल धरणे जो मर्कज़ु बणिजी वयूं। इहा नौजवाननि जी हिक अहिड़ी तहरीक हुई जेका सड़क ते अचण खां अॻु हिक आनलाइन तंज़ सां शुरू थी हुई।

मुख़्तलिफ़ शागिर्द तन्ज़ीमुनि सां गॾिजी, एहतिजाज कंदड़नि 2026 जे नीट पेपर लीक ऐं ॿियनि इम्तिहाननि जी बेक़ाइदगीअ ख़िलाफ़ मुख़ालिफ़त कंदे मर्कज़ी शिक्षा मंत्री धर्मेंद्र प्रधान जे इस्तीफ़े जी घुर कई- जेको पोइ थियो बि। उन्हनि देश में तइलीमी निज़ाम में वसीउ सुधारे जी घुर्ज कई। लद्दाख़ जे समाजी अॻवानु सोनम वांगचुक 28 जून खां हिते टिनि हफ़्तनि खां वधीक बुख हड़ताल ते वेठो। 20 जुलाई ते, जॾहिं हज़ारें माण्हुनि संसद जे मानसून सेशन जे पहिरिएं ॾींहुं मार्चु करण जी कोशिश कई, त दिल्ली पुलीस लाठी चार्ज ऐं आंसू गैस सां खेनि जवाबु ॾिनो।

इन जे बावजूदि, जन्तर मंतरु ते प्रदर्शनकारियुनि लाइ खाधो ऐं पीअण जो पाणी सभ खां घटि परेशानीअ जो सबबु रहियो।

मुख़्तलिफ़ खेत्रनि सां लाॻापो रखंदड़नि जे सहकार सां ही हंधि, हिकु मुफ़्त समाजी बावर्ची ख़ाने में तब्दील थी चुको हो।

दफ़्तरनि में कम कंदड़ माण्हू कम खां पोइ आया, बुज़ुर्ग ऐं ॿार पंहिंजे कुटुंब सां गॾु आया; इलाइक़े जा गोलगपे ऐं दही-भल्ले वारा अक्सर प्रदर्शनकारियुनि खे मुफ़्त खाराईंदा हुआ; ऐं शागिर्द पंहिंजे जेब ख़र्चीअ मां ख़रीद कयल बिस्कूट वंडींदा हुआ। ॿियनि शहरनि मां पिणु स्विगी ऐं ज़ोमेटो ज़रिए खाधो आर्डरु कयो वेंदो हो ऐं जंहिं खे ज़रूरत हूंदी हुई इन लाइ छॾे वेंदा हुआ। मेन्यू में नौजवाननि जी पसंदि जूं शयूं वधीक हुयूं– पीज़ा, बिरयानी, चिप्स, कोल्डड्रिंक्स ऐं कुझु पेकेटनि सां गॾु कार्ड बोर्ड मां ठहियल हथ-पखा पिणु रखियल हुआ,-त जेकर जुलाईअ जी घिमियल गर्मीअ खां आराम मिले। खाधो एॾे मिक़दार में अची रहियो हो जो, हिक इंतहाई मसरूफ़ु ॾींहं ते, संभालींदड़नि माण्हुनि खे वधीक खाधो न मोकिलण जी अपील कई; उन्हनि वटि काफ़ी खाधो मौजूदु हो ऐं हुननि न थिए घुरियो त का बि शइ बेकार थिए।

जॾहिं 21 सालनि जो लवकुश प्रजापती हज़ारें साथी शागिर्दनि सां गॾु एहतिजाज में शामिलु थियण आयो, त हू रुॻो 500 रुपया ऐं घरां ठहियल लंच बाक्स खणी आयो हो, खेसि ख़बर न हुई त हुन जो ईंदड़ु वेलो किथां ईंदो या खेसि रिहाइश किथे मिलंदी। हू उतर प्रदेश जे बांदा ज़िले जे अतर्रा शहर मां सफ़रु करे आयो हो।

“पर” हुन चयो, “जन्तर मंतर ते कॾहिं बि परेशानीअ जी ॻाल्हि न हुई, असां सभु पाण खे हिक वॾे ख़ानदान वांगुरु महसूस करे रहिया हुआसीं।”

हुन जी असुलु परेशानी पुलीस जी हिंसा हुई। संदसि खाॿो पेरु, जंहिं ते पलस्तर चढ़ियलु हो, हिक ॻाढ़ी प्लास्टिक जी कुर्सीअ ते रखियलु हो। हुन पारीअ खे ॿुधायो, “मुंहिंजो मुरो भॼी पियो आहे, ऐं उन पलस्तर जे बावजूदि मूंखे पंजनि कलाकनि ताईं हिरासत में रखियो वियो,” ऐं 20 जुलाई ते दिल्ली पुलीस पारां कयल लाठी चार्ज जे नतीजे में पंहिंजी ॻिची, ॿांहं ऐं पेट ते लॻल ज़ख़्म पिणु ॾेखारिया। खेसि राति जो 10 वॻे खां सुबुहु 4 वॻे ताईं, बिना खाधे, पुलीस बस में रखियो वियो।

“पर जॾहिं उन्हनि मूंखे वापस छॾियो, त हज़ारें माण्हुनि जो मुंहिंजो परिवारु हर क़िस्म जे खाधे सां मुंहिंजो इंतिज़ार करे रहियो हो। हुन शख़्स मूंखे बस मां पूरीअ तरह लहण खां अॻु ई पारले-जी बिस्कूटु ॾिनो,” हुन गुलाबी टी-शर्ट पातल मोहम्म्द आदिल ॾांहुं इशारो कंदे चयो। गाज़ियाबाद मां बी.ए. जो शागिर्दु आदिल, पंहिंजे जेब ख़र्च मां ख़रीद कयल बिस्कूट पुड़ा खणी अञा ताईं माण्हुनि जे हुजूम में घुमी रहियो हो।

लाॻीतो मदद बंगला साहिब गुरुद्वारे मां मिलंदी रही, जेको दिल्लीअ में सिखनि जी जमाइत ऐं इबादत जो हिकु नुमायां मर्कज़ु आहे। हुननि प्रदर्शनकारियुनि लाइ पंहिंजो लंगरु जारी रखियो ऐं पंहिंजा दर चोवीह कलाक खोले रखिया। सचखंड फ़ाउंडेशन, हेमकुंट फ़ाउंडेशन ऐं ॿियनि केतिरनि ई खाधो, कपड़ा, पाणीअ जूं बोतलूं, रेनकोट ऐं स्लीपिंग बैग मुहैया कराया, आरज़ी ग़ुसलख़ाना ठाहिया, पावर बैंक विरिहाया, ऐं सुम्हण जो बंदोबस्तु कयो, जंहिं मां कुझु कमु गुरुद्वारे जे सहकार सां थिया।

दिल्ली सिख गुरुद्वारा मैनेजमेन्ट कमेटीअ जे मीडिया सलाहकार सुदीप सिंह पारीअ खे ॿुधायो, “लंगरु बंगला साहिब गुरुद्वारे में तियार कयो वेंदो हो, ऐं गुरुद्वारा सभिनी लाइ खुलियल हूंदा आहिनि। एहतिजाज जे शुरूआत खां ई शागिर्द ॾींहं में टे दफ़ा ईंदा हुआ, ऐं असां उन्हनि जी शेवा कंदा हुआसीं। असां केतिरनि ई प्रदर्शनकारियुनि खे, जिनि में शागर्दियाणियूं पिणु शामिल हुयूं, राति में तरिसण जी सहूलियत पिणु ॾिनी। हिक इदारे तौर, असां जो सी.जे.पी. जे एहतिजाज ते को ख़ासि मौक़ुफ़ु नाहे। असां जी ज़िमेवारी सिर्फ़ हर उन शख़्स जी शेवा करणु आहे जेको असां जे दर ते अचे थो।

लंगरु- मुफ़्त समाजी बावर्ची ख़ानो- सिख धर्म जी क़दीम रवायतुनि मां हिकु आहे, ऐं गुज़िरियल कुझु सालनि दौरानि इहो हिन्दुस्तान में एहतिजाज जे जौहर जो हिकु ॾेखु बणिजी चुको आहे। 2020 ऐं 2021 में कृषि क़ानूननि ख़िलाफ़ु दिल्लीअ जे सरहद ते थींदड़ एहतजाजनि दौरानि, लंगरनि सख़्तु सियारे ऐं महामारीअ जे विच में बि, हिक साल खां वधीक अर्से ताईं, ॾींहं राति हज़ारनि माण्हुनि खे खाधो खारायो। शाहीन बाग़ में सी.ए.ए. जे ख़िलाफ़ धरणे दौरानि, पंजाब जे सिख हारियुनि ऐको ॾेखारींदे लंगरु लॻायो; बैदि में, पंजाब जे मलेरकोटला जे मुसलमान नौजवाननि एहतिजाज कंदड़ु सिख हारियुनि लाइ खाधो पचायो हो। इहा रवायत वर-वर दुहराइजे थी, छाकाणि त इहो साफ़ आहे ऐं उन ते बहसु जी का गुंजाइश नाहे त इख़्तिलाफ़ु चाहे कहिड़ो बि हुजे, ईंदड़ को बि शख़्सु बुखियो न मोटणु घुरिजे।

इहो फ़र्क़ु जन्तर मंतर ते मौजूदु हर शख़्स जी नज़र में वाज़ह हो। पुलीस लवकुश खे पूरी राति बस में बग़ैर खाधे जे रखियो पर अणॼातल माण्हुनि हुन जे बस मां निकिरण खां अॻु ई हुन जे हथनि में खाधो रखी छॾियो।

25 जुलाईअ ते, प्रधान इस्तीफ़ो ॾिनो ऐं सी.जे.पी. पंहिंजो एहतिजाजु ख़तमु करे छॾियो। इन खां अॻु केतिरनि ई हफ़्तनि में, खाधो कॾहिं ख़तमु न थियो।

जॾहिं असां जन्तर मंतर मां निकितासीं, राहुल पंहिंजी नाईट शिफ़्ट जारी रखी, अणॼातल माण्हुनि जा आर्डर हर उन शख़्स ताईं पहुचाईंदो रहियो जंहिं खे बुख हुई। लवकुश जो मुरो अञा ताईं पलस्तर में हो ऐं आदिल जे हथ में अञा ताईं बिस्कूट हुआ, मतां को ॿियो बस मां बग़ैर कुझु खाइण जे लही पवे।

लेखकु नचिनारकिन्नियन एम जो हुन जे क़ीमती इनपुट लाइ थोरा मञे थो।