बर्गर, लंगर अऊ विरोध-प्रदर्सन, जेकर आगू भूख पस्त

“ओह, वोहा आखिरी बर्गर रहिस, अऊ वोहा ओला अभिचे-अभिचे ले लिस. मोला बनेच दुख हे, मैडम,” राहुल ह मोला बताइस जब मंय ओकर ले जंतर-मंतर विरोध प्रदर्सन के जगा के बहिर मिलेंय. वो ह अभू घलो अपन बाइक मं बइठे रहिस, अऊ लाल रंग के जोमैटो डिलीवरी बैग ओखर पाछू बंधाय रहिस – जेन ह संझा के 6.30 बजे अब खाली दिखत रहिस. “बैग मं ‘जेन ला घलो चाही ओखर बर’ 30 बर्गर के पैकेट रहिस, जउन ला बेंगलुरु ले कोनो ह भेजे रहिस,” वोहा कहिथे.

बिहार के दरभंगा जिला के रहेइय्या राहुल कुमार यादव दिन मं पढ़ई करथे. वो ह विरोध-प्रदर्सन मं सामिल होय बर अपन पढ़ई ले नागा नइ करिस: येकर छोड़, वो ह संझा 6 बजे ले बिहनिया 6 बजे तक डिलीवरी बॉय के रूप मं नाइट शिफ्ट मं काम करिस. ओकर पहुंचाए कुछु ऑर्डर मं अइसने खाय के घलो रहिस, जउन ला आने शहर के लोगन मन भेजे रहिन. ये पार्सल अनजान लोगन मन भेजे रहिन अऊ ये ह कोनो घलो खास मइनखे के नांव मं नइ रहिस – ये ह जंतर-मंतर मं रहेइय्या कोनो घलो भूखाय मइनखे बर रहिस.

जंतर-मंतर मं पढ़ेइय्या लइका मन के विरोध-प्रदर्सन के बखत, लाठीचार्ज अऊ बनेच अकन लोगन मन के गिरफ्तारी के बीच, कतको जगा ले खाना आवत रहिस. बर्गर, सैंडविच, पार्ले-जी के पैकेट अऊ घलो बनेच कुछु, अलग-अलग ऑनलाइन ऐप्स के 'सर्विस डिलीवरी पार्टनर' (गिग वर्कर) लेके आइन. संगे संग, दिल्ली के घर मन ले बने खाना घलो आइस. अऊ सबले खास बात, लकठा के एक ठन गुरुद्वारा के लंगर (भंडारा) ले घलो आइस, जेन ह दसकों ले आम लोगन मन बर खुले रहिथे.

जून के सुरु ले, रजधानी के बीचों-बीच बने 18 वीं सदी के कतको धूप-घड़ी अऊ खगोल के उपकरन वाले जगा ह कॉकरोच जनता पार्टी के धरना के ठीहा बन गिस. ये ह नवा पीढ़ी के लइका मन के एक ठन अइसने आन्दोलन रहिस जेन ह पहिली ऑनलाइन मजाक-मजाक मं सुरू होइस अऊ ओकर बाद सड़क मं उतर आइस.

कतको छात्र संगठन मन के संग मिलके, प्रदर्सन करेइय्या मन साल 2026 के नीट पेपर लीक अऊ परीक्षा मं होय दीगर गड़बड़ी मन ला लेके केंद्रीय शिक्षा मंत्री धर्मेंद्र प्रधान के इस्तीफा के मनाग करे रहिन अऊ बाद मं वो ह इस्तीफा घलो दे दिस. ओ मन सरकारी शिक्षा बेवस्था मं कतको बड़े सुधार के मनाग घलो करिन. लद्दाख के समाजिक कार्यकर्ता सोनम वांगचुक 28 जून ले इहां तीन हफ्ता ले जियादा बखत तक ले भूख हड़ताल मं बइठे रहिस. 20 जुलाई के दिन, जब हजारों लोगन मन संसद के मानसून सत्र के पहिली दिन संसद तक रैली निकारे के कोसिस करिन, त दिल्ली पुलिस ह लाठीचार्ज करिस अऊ आंसू गैस के गोला छोड़े रहिस.

ये सब्बो के बीच मं, जंतर-मंतर मं प्रदर्सन करेइय्या मन बर खाय-पिये के जिनिस ओकर मन के चिंता के बात नइ रहिस.

वो जगा ह भंडारा के जगा बन गे रहिस, जेन ला अलग-अलग बिरादरी के लोगन मन चलावत रहिन.

लोगन मन काम करे के बाद आफिस ले लहूटत, परिवार के संग लइका अऊ सियान उहाँ आवत रहिन. तीर के गोलगप्पा अऊ दही-भल्ला वाले मन अक्सर प्रदर्सन करेइय्या मन ला फोकट मं खवावत रहिन; लइका मन अपन जेब खरचा के पइसा ले बिस्कुट बाँटत रहिन. आने शहर मन ले घलो खाय पीये के जिनिस मन आवत रहिस, जेन ला स्विगी अऊ जोमैटो ले भेजे जावत रहिस अऊ जरूरतमंद मन ला देय जावत रहिस. खाय के जिनिस मं पिज़्ज़ा, बिरयानी, चिप्स अऊ कोल्ड ड्रिंक्स जइसने जिनिस जादा रहिस – जेन ह नवा पीढ़ी ला भारी भाथे, अऊ कुछू पैकेट के संग कार्ड पेपर ले बने फोल्ड होवेइय्या हाथ ले झले पंखा घलो रहिस, जेकर ले जुलाई के उमस ले राहत मिल सकय. अतक जियादा सामान आगे रहिस के सबले जियादा भीड़ वाले एक दिन, आयोजक मन ह लोगन मन ला सामान झन भेजे के अपील करिन. ओकर मन करा बनेच सामान जमा होगे रहिस अऊ ओ मन नइ चाहत रहिन के कुछु घलो बरबाद होय.

जब 21 बछर के लवकुश प्रजापति हजारों संगी मन के संग विरोध-प्रदर्सन मं सामिल होय बर आइस, त ओकर करा सिरिफ 500 रूपिया अऊ घर ले धरके आय टिफिन डब्बा रहिस. ओला ये मालूम नइ रहिस के आगू बखत के खाना कहां मिलही धन रात कहां गुजारहीं. वो ह उत्तर प्रदेश के बांदा जिला के अतर्रा कस्बा ले आय रहिस.

वो ह कहिथे, “फेर जंतर-मंतर मं ये कभू कोनो चिंता के बात नइ रहिस. हमन सब्बो एक बड़े परिवार कस मसूस करत रहेन.

ओला पुलिस के अतियाचार के चिंता रहिस. प्लास्टर चढ़े ओकर डेरी गोड़ प्लास्टिक के लाल रंग के कुर्सी उ रखाय रहिस. वो ह पारी ला बताइस, “मोर गुठवा टूट गे हवय, अऊ प्लास्टर लगे होय के बाद घलो मोला पांच घंटा तक हिरासत मं राखे गिस.” वो ह हमन ला 20 जुलाई के दिन दिल्ली पुलिस के लाठीचार्ज ले घेंच, हाथ अऊ पेट मं लगे चोट मन ला घलो दिखाइस. ओ मन ला रात भर, रात 10 बजे ले बिहनिया 4 बजे तक, बगेर खाना के एक ठन पुलिस बस मं राखे गे रहिस.

वो ह कहिथे, “फेर मोला जब ओ मन छोड़ दिन, त हजारों लोगन मन मोर परिवार जइसने, किसम-किसम के खाय के जिनिस धरे मोला अगोरत रहिन.” वो ह हल्का गुलाबी रंग के टी-शर्ट पहिरे मोहम्मद आदिल कोती आरो करत कहिथे. ‘ये लइका ह मोला बस ले निकरे के पहिलीच पार्ले-जी बिस्कुट दीस.” गाज़ियाबाद के बसिंदा बीए पढ़ेइय्या आदिल अपन जेब खरचा ले बिसोय बिस्कुट के पैकेट लेके भीड़ के बीच मं घूमत रहय.

दिल्ली मं सिख मन के जुरे अऊ पूजा-पाठ के सबसे खास जगा मन ले एक, बंगला साहिब गुरुद्वारे ले सरलग मदद मिलत रहय. ये ह प्रदर्सन करेइय्या मन बर लंगर चलाइस अऊ अपन मुहटा ला चौबीसों घंटा खुला रखिस. सचखंड फ़ाउंडेशन, हेमकुंट फ़ाउंडेशन अऊ कतको दीगर संगठन मन खाना, कपड़ा, पानी के बोतल, रेनकोट अऊ स्लीपिंग बैग पहुँचाइन. संगे संग अस्थायी शौचालय बनवाइन, पावर बैंक बांटिन अऊ सुते के जगा के इंतज़ाम करिन – ये मन ले कुछु काम गुरुद्वारा के संग मिलके करे गिस.

दिल्ली सिख गुरुद्वारा मैनेजमेंट कमेटी के मीडिया सलाहकार सुदीप सिंह ह पारी ला बताइस, “लंगर बंगला साहिब गुरुद्वारा मं बनाय गे रहिस अऊ गुरुद्वारा सब्बो बर खुला हवय. विरोध-प्रदर्सन सुरू होय के बाद ले लइका मन दिन मं तीन बखत आवत रहिन अऊ हमं सेवा करत रहेन. हमन कतको प्रदर्सन करेइय्या, जेन मं माइलोगन मन घलो रहिन, ओ मन ला रत मं रुके के जगा घलो दे रहेन. एक संस्था के रूप मं, सीजेपी के विरोध-प्रदर्सन ला ले के हमर कोनो खास राय नइ ये. हमर जिम्मेदारी बस ओ लोगन मन के सेवा करे आय जेन मन हमर मुहटा मं आथें.”

लंगर- भंडारा- सिख धरम के सबले जुन्ना परंपरा मन ले एक ठन आय अऊ बीते कुछेक बछर मं देस (भारत) मं विरोध-प्रदर्सन के एक ठन बड़े साधन बन गे हवय. साल 2020 अऊ 2021 मं दिल्ली बॉर्डर मं कृषि कानून मन के खिलाफ होय विरोध-प्रदर्सन के बखत, भारी जाड़ अऊ महामारी के बाद घलो, बछर भर ले जियादा बखत तक ले लंगर के जरिया ले हजारों लोगन मन ला दिन रात खवाय गे रहिस. शाहीन बाग मं सीएए विरोधी धरना के बखत, पंजाब के किसान मन एकजुटता दिखावत लंगर लगाइन; बाद मं, पंजाब के मलेरकोटला मं मुस्लिम लइका मन विरोध करेइय्या सिख किसान मन बर खाना बनाइन. ये काम ला घेरी बेरी करे जाथे काबर के य ह भारी सुभीता के आय अऊ ये ला लेके कोनो बहस नइ करय. मतभेद चाहे जउन घलो होय, जउन घलो आय हवय, ओला जुच्छा पेट लहूटे ला नइ चाही.

जंतर-मंतर मं रहेइय्या हरेक के नजर ये फरक ला देखिस. पुलिस ह लवकुश ला सरी रतिहा एक ठन बस मं बइठा के राखिस अऊ वोला खाय बर कुछु घलो नइ दिस. बस ले पूरा उतरे के पहिलीच अनजान लोगन मन ओकर हाथ मं खाय के जिनिस धरा दिन.

25 जुलाई के दिन प्रधान ह इस्तीफा दे दिस अऊ सीजेपी ह अपन विरोध-प्रदर्सन खतम कर दिस. ओकर पहिली के कतको हफ्ता मं खाय-पीये के कभू कमी नइ होइस.

जब हमन जंतर-मंतर ले निकलेन, त राहुल ह अपन रात के पाली मं लगे रहिस अऊ भूखाय लोगन मन करा अनजान लोगन मन के भेजे आर्डर पहुँचावत रहिस. लवकुश के गुठवा मं अभू घलो प्लास्टर चढ़े रहिस. अऊ आदिल के हाथ मं अभू घलो बिस्कुट रहिस, गर कोनो बस ले उतरे अऊ ओकर करा कुछु न होय, त ओला देय जा सकय.

लेखक पत्रकार नच्चिनारक्किनियन एम ला ओकर नोहर सुझाव मन बर आभार जतावत हवय