’ہم اب بھی اندھیرے میں جی رہے ہیں‘

سال ۲۰۱۷ میں، میری فوٹو نمائش کے بعد سے میں نے پاری کے لیے کام کرنا شروع کر دیا تھا، لیکن جس نمائش نے ایک وژوئل آرٹسٹ کے طور پر دنیا سے میرا تعارف کرایا، اس کا پورا کریڈٹ وانوِل ریوتی اور اداکار نٹ راجن کو جاتا ہے۔ سال ۲۰۰۴ کی سُنامی کے بعد ریوتی نے نری کوروَر اور بوم بوم مٹّوکارر برادریوں کے بچوں کے لیے وانوِل اسکول شروع کیا۔ انہی کے ذریعہ میں تُروِکاّڈو اور اونّن کاڈو کی بستیوں کے بچوں اور لوگوں سے ملا، اور تبھی محسوس ہوا کہ مجھے ان کی زندگی پر لکھنا چاہیے اور ان کی تصویریں لینی چاہئیں۔

بوم بوم مٹّوکارر ایک درج فہرست قبیلہ ہے، جو ادیئن (یا اتیئن) کے نام سے مشہور ہے۔ ’’بوم بوم‘‘ لفظ اُس آواز کی طرف اشارہ کرتا ہے جسے مٹّوکارر یعنی مویشی پرور اپنی اُرومی پر بجاتے ہیں۔ اُرومی، ریت گھڑی (آور گلاس) کے سائز کا دو طرفہ ڈرم ہوتا ہے۔ یہ نام پیشن گوئی کرنے کے ان کے روایتی پیشہ سے جڑا ہے، جس میں وہ سجائے ہوئے بیل کو معاول کے طور پر استعمال کرتے ہیں۔

جیسے ہی سورج غروب ہوتا ہے، بوم بوم مٹّوکارر برادری کے لوگوں کی زندگی میں اندھیرا پھیل جاتا ہے۔ لیکن تنجاوُر ضلع کے تُروِکاّڈو گاؤں کے کنارے آباد ان بستیوں میں ایک دوسرے قسم کا بھی اندھیرا پھیلا رہتا ہے۔ میں گزشتہ سات برسوں سے ان کی زندگیاں دیکھ رہا ہوں، اور تمل ناڈو کے وانوِل اسکولوں میں ان کے بچوں سے ملتا رہا ہوں۔

’’رات ہمارے لیے سب سے بڑی لڑائی ہے،‘‘ مرلی کہتے ہیں۔ ’’یہاں سے بس ۵۰۰ میٹر دور، اُس پار بجلی آتی ہے، لیکن اِس پار نہیں۔‘‘ صرف بجلی ہی نہیں، بلکہ پینے کا پانی بھی نہیں ہے۔ ’’ہم نہر کے کنارے رہتے ہیں۔ ہمارے پیچھے ایک تالاب ہے۔ کبھی یہ جگہ گھنا جنگل ہوا کرتی تھی،‘‘ مرلی بتاتے ہیں۔

بجلی کی کمی نہ صرف روزمرہ کی زندگی کو متاثر کرتی ہے، بلکہ اس خانہ بدوش قبیلہ کے تقریباً ۵۰ کنبوں کے تحفظ اور ان کے عام مفاد پر بھی اثر ڈالتی ہے، جو تقریباً ۲۵ سال پہلے یہاں آ کر آباد ہو گئے اور کچرا چھانٹ کر اور بیچ کر گزر بسر کر رہے ہیں۔

ان کے گاؤں کا آفیشل نام ایم جی آر نگر ہے، لیکن اونچی ذاتوں کے لوگ انہیں ’راراکوٹّئی‘ کہہ کر پکارتے ہیں، جس کا معنی ہے باہری یا اچھوت۔

مرلی (۲۱) بھی اپنی برادری کے دوسرے لوگوں کی طرح ایک کچی جھونپڑی میں بیحد کم سہولیات کے ساتھ رہتے ہیں۔ آٹھ دس لوگوں کی فیملی بہت محدود جگہوں میں رہتی ہے – نئے شادی شدہ جوڑے، دیگر بالغوں اور بچوں کو اتنی ہی جگہ میں گزارہ کرنا پڑتا ہے۔

موتو کماری ایک نوجوان خاتون ہیں، جنہیں بجلی کے بغیر ہی گھر اور باورچی خانہ کو چلانے میں جدوجہد کرنی پڑتی ہے۔ ’’ہمیں کھانا خریدنا پڑتا ہے۔ ہم دال بھگو کر اڈلی یا ڈوسہ نہیں بنا سکتے، کیوں کہ اس کے لیے مِکسی اور فریج چاہیے،‘‘ ۲۲ سالہ موتو کماری بتاتی ہیں، جو تین بچوں کی ماں ہیں۔

ان کے پڑوس میں رہنے والی سیلوی کی یہیں پرورش ہوئی ہے۔ ان کے والدین یہاں تین دہائی قبل آ کر آباد ہوئے تھے۔ ’’ہمیں سوئچ آن کرنا تک نہیں آتا!‘‘ یہ بتاتے ہوئے کہ بجلی سے ان کا کوئی واسطہ نہیں رہا ہے، وہ کہتی ہیں۔ حکومت نے انہیں ٹی وی، مکسی، اور دوسرے الیکٹرانک سامان تو دیے ہیں، ’’لیکن بجلی کے بغیر ان کا کیا کریں؟‘‘ سیلوی کہتی ہیں۔ ’’ہم نے انہیں بیچ دیا۔‘‘

نیلامّل جن کی بیٹیاں اسی بستی میں پیدا ہوئیں، یاد کرتی ہیں کہ وہ بچپن میں پڑھنا چاہتی تھیں، لیکن ان کے والدین کو کافی بھٹکنا پڑتا تھا۔ حالانکہ، پنگونی (مارچ – اپریل) اور چتیرئی (اپریل – مئی) کے مندر کے تہواروں کے دوران فلم کی نمائش کا ذکر کرتے ہوئے ان کا چہرہ کھل اٹھتا ہے۔

’’پندرہ دن، ۱۵ فلمیں! پورا گاؤں ایک جگہ اکٹھا ہوتا تھا۔ ہم لائٹس کے لیے جنریٹر لاتے تھے۔ پونگل کے پانچویں دن سے دو دن تک سڑکوں پر لائٹ لگانے کے لیے ہر گھر سے پیسے جمع کرتے تھے اور بچے بہت خوش ہوتے تھے،‘‘ وہ بتاتی ہیں۔

جب بستی کے لوگوں کو ٹی وی سیٹ ملے، تو خاص طور پر بچے بہت خوش ہوئے۔ ’’ہمارے بچے کافی خوش تھے،‘‘ وہ کہتی ہیں۔ ’’لیکن بجلی نہ ہونے کے سبب ٹی وی بس پڑے رہے۔ چوہوں نے تار کاٹ دیے اور سب بیکار ہو گیا۔ ہم نے اسے صرف ۶۰۰ روپے میں بیچ دیا،‘‘ وہ بتاتی ہیں۔

بجلی کی کمی سبھی کی زندگی کو متاثر کرتی ہے، لیکن عورتوں کی زندگی پر اس کا اثر زیادہ ہوتا ہے۔ کم عمر میں لڑکیوں کی شادی کر دی جاتی ہے، تاکہ وہ اس جگہ سے نکل سکیں۔ شادی کے بعد یہاں آئی عورتوں کے لیے اندھیرا خاص طور پر مشکل ہوتا ہے، خاص کر زچگی کے وقت، کیوں کہ زیادہ تر زچگی گھر پر ہی ہوتی ہے۔

میں مدورئی میں گزارے گئے خود کے بچپن کو یاد کرتا ہوں، جب ہماری فیملی رہنے کے لیے ایک مستقل جگہ کی تلاش میں تھی۔ ہمیں پکّا گھر بنانا تھا، لیکن یہ آسان نہیں تھا۔ اپنے اسکول کے شروعاتی سالوں میں، میں نے اسٹریٹ لائٹ کے نیچے پڑھائی کی۔ نویں جماعت میں پہلی بار ہمارے گھر میں بجلی آئی۔ کئی بار میں اپنے پیری یَپّا (چچا) کے گھر چلا جاتا تھا، تاکہ پڑھائی کر سکوں۔ ان کے گھر میں بجلی تھی۔ پڑھیں: میری ماں کی زندگی – ایک لیمپ پوسٹ کی روشنی میں۔

نریکوروَر اور بوم بوم مٹوکارر برادری کے جن لوگوں سے میں ملا، ان کا کہنا ہے کہ ان کے لیے اب بھی پختہ مکان ایک بڑا مسئلہ ہے۔ نیلامّل کو یاد نہیں کہ انہوں نے پچھلا پختہ مکان کتنے عرصہ قبل دیکھا تھا۔ ’’بارش ہوتی تھی، تو ہم بس اسٹاپ میں لیٹ جاتے تھے؛ ہمارے پاس ٹینٹ بھی نہیں تھا۔‘‘

نریکوروَر، جو بنیادی طور پر خانہ بدوش شکاری تھے، لمبے عرصہ تک ’انتہائی پس ماندہ ذات‘ کے طور پر درج فہرست تھے۔ انہیں ۲۰۱۶ میں جا کر درج فہرست قبیلہ کے طور پر منظوری ملی۔

لمبی جدوجہد کے بعد برادری کو آخرکار ۲۵ء۲ سینٹ (تقریباً ۱۰۰۰ مربع فٹ) زمین پر گھر دینے کا وعدہ کیا گیا۔ فنڈ تقسیم ہو چکے ہیں اور ۲۰۲۴ کے انتخاب کے بعد تعمیر کا کام شروع ہونا تھا۔

سال ۲۰۱۸ میں تمل ناڈو کے ساحل پر آئے گازا سمندری طوفان نے بڑے پیمانے پر تباہی مچائی۔ اس کے بعد اس برادری نے اپنے مطالبات اور زور شور سے رکھے۔ ’’اب انہوں نے [حکومت نے] ہمیں پٹّہ [زمین پر مالکانہ حق کا دستاویز] تو دے دیا ہے، لیکن ہم اب بھی اُس زمین پر گھر نہیں بنا سکتے،‘‘ ۵۲ سالہ مروگیسن کہتے ہیں۔ صرف گھر ہی نہیں، بلکہ ان کی برادری مندر، مندروں کے تہوار اور بہت کچھ چاہتی ہے۔

جب وہ پاس کے مندروں میں جاتے ہیں، تو انہیں کوئی رسم ادا کرنے کی اجازت نہیں دی جاتی ہے، اور نہ ہی مندر کے اندر داخل ہونے دیا جاتا ہے۔ وہ مندر کی سرگرمیوں کو دور سے دیکھنے کے لیے مجبور رہتے ہیں اور بتاتے ہیں کہ مبینہ اونچی ذات کے لوگ ان کے ساتھ ذات پر مبنی بھید بھاؤ کرتے ہیں۔

سرکاری اسکولوں میں بوم بوم مٹوکارر بچوں کو سوشل بائیکاٹ کا سامنا کرنا پڑتا ہے۔ دوسرے بچے ان کے ساتھ بیٹھنے سے منع کردیتے ہیں، اور انہیں ’’گندا‘‘ مانتے ہیں۔ انہیں غسل تک کرنے کی سہولت دستیاب نہیں ہے، کیوں کہ انہیں بنیادی ضروریات کے لیے بھی پانی کے لیے جدوجہد کرنی پڑتی ہے۔ یہاں کے لوگ نہانے، کپڑے دھونے اور پینے کے لیے آدھا کلومیٹر تک پانی لینے جاتے ہیں۔ ساتھ کنبوں کو صرف دو گھنٹے میں پانی جمع کرنا پڑتا ہے۔ اکثر انہیں آدھا گھڑا ہی پانی مل پاتا ہے، جس سے پوری فیملی کا کھانا پینا چلانا پڑتا ہے۔

پیریہ نائکی، وانوِل ٹرسٹ میں ٹیوشن ٹیچر ہیں۔ یہ غیر سرکاری تنظیم اس خانہ بدوش برادری کے ساتھ ریاست کے مختلف حصوں میں کام کرتی ہے۔ پڑھیں: وَانَوِل: لاک ڈاؤن کی بحران زدہ زندگی میں قوس قزح

’’یہاں [تُروِکاّڈو اور اونّن کاڈو] بستیوں میں زیادہ تر بچے ۸ویں جماعت تک پڑھتے ہیں اور پھر کام پر لگ جاتے ہیں، کیوں کہ ماں باپ گھر پر نہیں ہوتے اور بڑا بچہ اکیلے سب سنبھال نہیں سکتا۔ وہ بوتلیں چُنتے ہیں، بھیک مانگتے ہیں، بری نظر سے بچانے کے لیے چھوٹی گڑیا بیچتے ہیں یا ڈھول بجاتے ہیں۔‘‘

منمیل کوڑی کی پیریہ نائکی نے ۱۲ویں جماعت تک پڑھائی کی ہے۔ نوجوان ٹیچر نے یہ دیکھا کہ بجلی کے بغیر بچے پڑھائی میں دلچسپی نہیں لیتے، اس لیے صرف تین بچوں نے دسویں پاس کی۔

’’ہمارے لیے مٹی کے تیل سے جلنے والا لیمپ سب کچھ ہے،‘‘ وہ کہتی ہیں۔ ’’ہم سات بجے لیمپ جلاتے ہیں، اور سب لوگ آٹھ بجے تک کھانا کھا لیتے ہیں۔ اس کے بعد لیمپ بجھا دیتے ہیں اور سو جاتے ہیں۔ کوئی پڑھائی نہیں ہوتی ہے۔‘‘

حالانکہ، مرلی کی قسمت اچھی تھی، کیوں کہ ان کے والد نے پڑھائی کی اہمیت سمجھی۔ وہ بیٹے کی پڑھائی کے تئیں سخت تھے، لیکن مرلی کے پاس کوئی ذات کا سرٹیفکٹ نہیں تھا، جس سے ثابت ہوتا کہ وہ آدیواسی برادری سے ہے اور تعلیم کے لیے درج فہرست قبائل کے کوٹہ کا حقدار ہے۔

’’سرٹیفکٹ کے بغیر مجھے وظیفہ نہیں ملا، جو ملنا چاہیے تھا۔ اپّا اور میں کئی دفتروں کے چکّر لگاتے رہے،‘‘ مرلی کہتے ہیں۔ لیکن سرکاری اہلکار انہیں نفرت و حقارت کی نظر سے دیکھتے۔ وہ کہتے، ’ارے، تم پینٹ شرٹ پہن رہے ہو، نہا بھی لیے ہو کیا؟‘‘‘

باپ بیٹے کے تمل بولنے پر بھی سوال اٹھتے۔ ’’تم اتنی اچھی تمل کیسے بولتے ہو؟ میں کیسے مانوں کہ تم اسی ذات یا برادری کے ہو؟ کیسے بھروسہ کروں؟ تم لوگوں کی یہ ذات کوئی ذات ہی نہیں ہے۔‘‘ انہیں سرٹیفکٹ دینے سے منع کردیا جاتا تھا۔

مُرلی کہتے ہیں کہ ان کی زندگی فلم ’جے بھیم‘ کی طرح ہے (یہ فلم پولیس کی بے رحمی اور سماج کے حاشیہ پر زندگی بسر کر رہی برادریوں پر ہونے والے ظلم و جبر پر مبنی ہے)۔

’’وہ ہمیں سنپیرا اور چوہا پکڑنے والوں کے نام سے بلاتے ہیں اور ہمیں سرٹیفکٹ دینے سے انکار کرتے ہیں، کیوں کہ اس سے ہمیں کئی رعایتیں ملیں گی اور ہم ان کے برابر ہو جائیں گے،‘‘ وہ کہتے ہیں۔

آخرکار، ایک اچھے افسر آئے اور سرٹیفکٹ دینے کا کام شروع کیا۔ لوگ کئی کئی دنوں تک کلکٹر آفس کے سامنے بیٹھے رہتے تھے۔ کئی کنبے بتاتے ہیں کہ انہیں اب راشن کارڈ، آدھار کارڈ اور ووٹر آئی ڈی مل گئے ہیں۔

لیکن مرلی کے پاس اب بھی ٹرانسفر سرٹیفکٹ (ٹی سی) نہیں ہے، جس کے بغیر اگلے تعلیمی ادارہ میں ان کا داخلہ ناممکن ہے۔ انہیں بتایا گیا ہے کہ انہیں کسی اور ذات کے نام سے سرٹیفکٹ ملے گا، نہ کہ ادیئن (بوم بوم مٹوکارر کا معروف نام) کے نام سے۔

یہ نوجوان طالب علم پوسٹ گریجویٹ ڈگری کے لیے پرعزم ہے اور تب تک شکست تسلیم نہیں کرے گا، جب تک اسے اس کا صحیح سرٹیفکٹ نہیں مل جاتا۔

’’یہ میری پہچان ہے، مجھے اس کی ضرورت ہے۔ مجھے یہ پہچان لوگوں پر حکومت کرنے یا انہیں کنٹرول کرنے کے لیے نہیں چاہیے، بلکہ بس یہ کہنے کے لیے چاہیے کہ ’ادیئن‘ نام کے لوگ ہیں۔ کئی قبائل ختم ہو گئے ہیں۔ ہم بھی قبیلہ ہیں، ہماری اپنی وراثت اور روایتیں ہیں جنہیں ہمیں بچانا ہے،‘‘ وہ کہتے ہیں۔

جب میں مرلی سے ملتا ہوں، تو مجھے مدورئی کے اپنے گاؤں جواہر لال پورم کے وہ نوجوان یاد آتے ہیں جو اپنی پڑھائی مکمل کرنے اور اپنی زندگی بدلنے کے لیے جدوجہد کر رہے ہیں۔

کُپّمّا یہیں پیدا ہوئی تھیں اور اب وہ یہاں سے باہر نکلنا چاہتی ہیں۔ وہ پلاسٹک بیننے کا کام کرتی ہیں اور روزانہ ۱۵۰-۲۰۰ روپے کماتی ہیں۔ ’’ابھی حال ہی میں ایک گاڑی چوری ہو گئی۔ کوئی کارروائی نہیں ہوئی۔ اگر گاڑیوں کا یہی حال ہے، تو سوچئے اگر ہم غائب ہو گئے تو ہمارا کیا ہوگا؟‘‘ دو بیٹیوں کی ۳۵ سالہ ماں کُپّمّا نے یہاں سے جانے کی ٹھان رکھی ہے۔ ’’ہمیں بندھ کر نہیں رہنا ہے۔ اپنے حقوق کے لیے لڑنا ہے۔ ہمیں دوسروں پر منحصر نہیں رہنا چاہیے، اس لیے ہمیں اپنے گھروں سے جانا ہوگا۔‘‘

ٹھیک ٹھاک گھروں کی کمی میں بارش کئی نئی مصیبتیں لے کر آتی ہے۔ ’’ہمارے لائے پانی میں کیڑے تیرتے رہتے ہیں، وہی پانی ہم پیتے ہیں۔ کیڑے ہمارے کپڑوں اور سونے کے لیے استعمال ہونے والی چٹائیوں میں گھُس جاتے ہیں۔ وہ ہر جگہ موجود ہیں،‘‘ سیلوی کہتی ہیں۔

بارش کے موسم میں پانی چڑھتا ہے، گھر میں گھُس جاتا ہے، جس سے چھوٹے بچوں کے لیے خطرہ بڑھ جاتا ہے۔ ’’مچھر اور زہریلے کیڑے بارش کے ساتھ آ جاتے ہیں، ہم انہیں روک نہیں سکتے۔ پانی والے سانپ بھی آتے ہیں۔ ہم بارش کے موسم میں سانپ مارتے ہیں، یہاں تک کہ رات میں بھی،‘‘ سیلوی بتاتی ہیں۔ ’’صرف بھگوان ہی ہماری حفاظت کر رہا ہے۔‘‘

یہاں لوگوں سے بات چیت کرتے ہوئے اکثر ان کی ہنسی سنائی دیتی ہے، لیکن میں خود سمجھ سکتا ہوں کہ دن رات اور ہر دن بغیر روشنی، ہوا اور مناسب بستر کے رہنا کتنا مشکل ہوتا ہے۔ پختہ مکان بنیادی ضرورت ہے، لیکن حکومت انہیں نظر انداز کرتی ہے۔

گیلے موسم میں، لکڑی کی آگ پر ان تنگ گھروں میں کھانا پکانا مشکل ہو جاتا ہے، پیریہ نائکی بتاتی ہیں۔ نیلامّا کہتی ہیں کہ موبائل کے ٹارچ سے مدد ملتی ہے، لیکن فون چارج کرنا بھی ایک چیلنج ہے۔

’’گاؤں کے پردھان [سرپنچ] نے ووٹ مانگتے وقت بجلی کا وعدہ کیا تھا، لیکن ہم اب بھی اندھیرے میں جی رہے ہیں۔ بجلی کے لیے یہ جدوجہد ۲۰ سالوں سے چل رہی ہے،‘‘ مرلی کہتے ہیں، جو سول سروس کی تیاری کر رہے ہیں۔

تُروِکّاڈو اور اونّن کاڈو میں رہنے والے زیادہ تر لوگ کچرا بین کر اپنی زندگی چلاتے ہیں۔

انجو تب چھوٹی تھی جب اس کے والد کا انتقال ہوا تھا۔ اپنے آٹھ بچوں کی پرورش اس کی ماں نے کچرا بیننے سے ہونے والی آمدنی سے کی۔ ’’ماں اکثر بیمار رہتی ہے۔ وہ کبھی کبھی سمندر میں جاتی ہے، مچھلیاں خریدتی اور بیچتی ہے، تاکہ ہمیں دودھ اور کھانا مل سکے۔ ہم گھر میں کھانا نہیں بناتے۔ ہمارا کھانا دوسروں کے گھر سے آتا ہے،‘‘ ۱۶ سالہ انجو کہتی ہے۔ اس کا ایک چھوٹا بھائی بکریاں چراتا ہے، ایک بہن بھیک مانگتی ہے، اور باقی بھائی بہن کچرا بیننے میں مدد کرتے ہیں۔

’’ڈھول بجانا یہاں کا نیا پیشہ ہے،‘‘ مروگیسن بتاتے ہیں۔ ’’اس سے پہلے ہم کانچ کی بوتلیں، پلاسٹک اور پرانے جوتے چپل ٹھیلوں پر لادتے تھے،‘‘ تقریباً ۵۲ سال کے مروگیسن کہتے ہیں۔ جن کے پاس مویشی تھے، وہ بوم بوم گائے لے کر گاؤں گاؤں گھومتے تھے اور اس سے گزر بسر کرتے تھے۔

’’ہمیں دوسرے کام نہیں ملتے، کیوں کہ ہم پڑھے لکھے نہیں ہیں۔ ہمارے ماں باپ نے بھیک مانگی، ہم بوتلیں بین رہے ہیں۔ لیکن ہم چاہتے ہیں کہ ہمارے بچے پڑھیں لکھیں، نوکری کریں اور خوشی سے زندگی بسر کریں،‘‘ نیلامّا کہتی ہیں۔

کچھ لڑکیاں اب کام کرنے لگی ہیں – ایک لڑکی لیب میں کام کر کے ۴۰۰۰ روپے ماہانہ کما رہی ہے۔ یہاں وہ خون لینا سیکھ رہی ہے۔ سیلوی اب کالج میں ہیں اور اپنی برادری کے مستقبل کو بہتر بنانے کا خواب دیکھتی ہیں۔ ’’ہمیں برابری چاہیے۔ امبیڈکر کہتے ہیں، ’میں نے تمہارے لیے دروازے کھول دیے ہیں، اب تم آگے بڑھو اور جو چاہے بدلو۔‘ اگر ہم اچھی طرح پڑھیں، تو اچھے کپڑے پہن سکتے ہیں، اچھی زندگی بسر کر سکتے ہیں، اور عزت پا سکتے ہیں۔‘‘

’’صرف تعلیم ہی ہے جو ایک بھید بھاؤ کو نہیں دیکھتی،‘‘ وہ پاری سے کہتی ہیں۔ وہ اُس دن کا خواب دیکھتی ہیں جب ’’میرے گھر سے کوئی بھیک مانگنے نہیں جائے گا۔ میرا گھر بھی میری دوست کے گھر جیسا دکھائی دے گا۔‘‘

مرلی، جو مقابلہ جاتی امتحانات کے لیے کڑی محنت کر رہے ہیں، اپنے لوگوں کے لیے تبدیلی لانا چاہتے ہیں، اس جگہ کو روشنی دینا چاہتے ہیں اور ایک نئے اور بہتر زندگی کی شروعات کرنا چاہتے ہیں۔

ان سے بات کرتے ہوئے مجھے امید دکھائی دیتی ہے۔

پس نوشت: ۲۰ سالوں کی جدوجہد کے بعد، بوم بوم برادری کے لوگوں کو ۲۰۲۴ میں ایس ٹی سرٹیفکٹ ملنے کی شروعات ہوئی۔ ریاستی حکومت اب ان کے لیے اونّن کاڈو میں گھر تیار کرا رہی ہے اور برادری کے لوگوں کو امید ہے کہ اس سال وہ نئے گھروں میں منتقل ہو جائیں گے۔

یہ رپورٹ سب سے پہلی تمل زبان میں لکھی گئی تھی۔

ترجمہ نگار: قمر صدیقی