बूम बूम मट्टुकारर: अंधियार मं परे जिनगी

साल 2017 मं मोर फोटो प्रदर्सनी ह मोला पारी बर कमा करे बर प्रेरित करिस. फेर जेन प्रदर्सनी ह मोला विजुअल आर्टिस्ट के रूप मं सबके आगू मं रखिस, वो ह वानविल रेवती अऊ कलाकार नटराजन के बगेर होय नइ सके रइतिस. साल 2024 के सुनामी के बाद, रेवती ह नरिकुरवर अऊ बूम बूम मट्टुकारर समाज के लइका मन बर वानविल स्कूल सुरु करिस. ओकर जरिया ले मंय तुरविक्काडुअऊ ओन्ननकाडुबस्ती ले लइका अऊ सियान मन ले भेंट करंय, अऊ येकर बाद मोला लगिस के मोला वो मन के जिनगी के बारे मं लिखे अऊ फोटू खींचे ला चाही.

बूम बूम मट्टुकारर एक ठन अनुसूचित जनजाति आय, जेन ला अदियन (अथियन घलो लिखे जाथे) के नांव ले घला जाने अऊ सूचीबद्ध करे गे हवय. “बूम बूम” शब्द मट्टुकारर धन पशुपालक के अपन उरुमी, जेन ह दू मुड़ी वाले रेतघड़ी के आकार के (डमरू कस) ढोल आय, ले निकरे आवाज ले आय हवय. ये नांव के उत्पत्ति भविष्यत ला बताय के ओकर मन के पुरखौती के पेशा ले हवय, जेन मं वो मन अपन सजाय बइला के जरिया ले वोला बताथें

बेर बूड़तेच बूम बूम मट्टुकारर समाज अंधियार मं रहिथे. तंजावुर जिला के तुरविक्काडु गाँव के तीर बसे ये बस्ती मं अऊ एक ठन किसिम के अंधियार दिनभर बगरे रहिथे. तमिलनाडु के वानविल स्कूल मन मं जाके जिहां वो मन के लइका मन पढ़थें, मंय खुदेच ये सब्बो ला देखें हवं काबर के बीते सात बछर ले मंय वो मन के जिनगी उपर नजर राखत हवं.

“रतिहा हमर बर सबले कठिन जूझे के बझ्त आय,” मुरली कहिथे. “ इहाँ ले 500 मीटर दूरिहा, पार के दूसर डहर बिजली हवय, फेर ये कोती नइ ये,” वो बतावत जाथे. उहाँ सिरिफ बिजलीच भर नइ, पीये के पानी घलो अगर उछर हवय. मुरली कहिथे, हमन नहर के पार मं रहिथन. हमर बस्ती के पाछू मं एक ठन तरिया हवय. ये जगा पहिली घना जंगल होवत रहिस.”

बिजली नइ होय सेती न सिरिफ रोज के काम काज उपर असर परथे, फेर ये घूमंतु जनजाति के करीबन 50 ठन परिवार के सुरच्छा अऊ कल्यान उपर घलो असर परथे, जेन मन करीबन 25 बछर पहिली इहाँ आके बस गे रहिन अऊ कचरा बीन के अऊ बेचे ले मिलेइय्या पइसा ले गुजारा बर जूझत हवंय.

वो मन के गाँव के सरकारी नांव एमजीआर नगर आय, फेर वो ह कहिथे केर ऊंच जात के लोगन मन येला गारी जइसने नांव ले बलाथें: “राराकोट्टई”, जेकर मतलब आय बहिर धन बाहिर रखे गे.

अपन समाज के दीगर लोगन मन के जइसने, 21 बछर के मरली घलो माटी के कुरिया मं रहिथे, जिहां वो ह कइसने करके रहिके सुस्ता लेथे. 8-10 परानी के परिवार संकेला जगा मं एके संग रहिथें – तुरते बिहाव वाले जोड़ा अऊ आन सियान, संग मं हरेक उमर के लइका मन घला.

मुतुकुमारी बिन बिजली के अपन घर अऊ रंधनी के काम बर जूझत रहिथे. तीन लइका के महतारी 22 बछर के मुतुकुमारी बताथे, “हमन ला बिसोय के खाय ला परथे. हमन इडली धन डोसा बर दार फिलोय नइ सकन काबर के ओकर बर मिक्सी अऊ फ्रिज के जरूरत परथे.”

ओकर परोसिन सेल्वी 30 बछर पहिली अपन दाई-ददा संग इहींचे पले-बढ़े रहिस. “हमन ला स्विच कइसने चालू करथें, ये घलो नइ आवय!” वो ह बिजली नइ होय के सेती येकर वजा ला बताथे. सरकार ह वो मन ला टीवी, मिक्सी अऊ बिजली के दीगर सामन दे तो दे हे, “फेर बिन बिजली के वोला काय करबो?” सेल्वी सवाल करथे, “हमन वोला बेच देन.”

बस्ती मं जन्मे जवान नोनी मन के महतारी, नीलाम्मल वो बखत ला सुरता करथे जब वो ह नानचिक रहिस अऊ पढ़े ला चाहत रहिस, फेर अपन दाई-ददा के येती-वोती चले जाय के सेती पढ़े नइ सकिस. वइसे,जब वो ह पंगुणी (मार्च-अप्रैल) अऊ चितिरई (अप्रैल-मई) के महिना मं मंदिर तिहार के बखत दिखाय जवेइय्या फिलिम के बात करथे, त ओकर चेहरा खिल जाथे.

“पंद्रह दिन, पंद्रह फिलिम! ये ला दिखाय जाय बखत सरा गाँव जुरत रहिस. उजियार बर हमन जनरेटर लावत रहेन. पोंगल के पाँचवां दिन ले दू दिन तक हमन गली मं बत्ती बारे बर हरेक घर ले चंदा लेवत रहेन, अऊ लइका मन मं भारी उछाह देखे ला मिलय,” वो ह हमन ला बताथे.

जब समाज के लोगन मन ला टीवी मिलिस त लइका मन के खुसी अपार रहिस. वो ह कहिथे, “हमर लइका मन भारी खुश रहिन. फेर बिजली नइ होय सेती टीवी घर मं परे रहय. मुसुवा मन तार ला कुतर दिन अऊ सब्बो खराब होगे. हमन वोला 600 रूपिया मं बेच देन.”

बिजली के कमी त हर कोनो करथे, फेर येकर सबले जियादा असर माइलोगन मन के उपर परथे. घर ले बहिर निकरे बर कम उमर के नोनी मन के बिहाव कर देय जाथे. जेन माईलोगन मन बिहाव करके इहाँ आथें, वो मन बर जचकी के बखत अंधियार भारी दिक्कत ले भरे होथे अऊ इहाँ अधिकतर लइका घरेच मं जनमथें.

मोला मदुरई मं बिताय अपन बालपन के सुरता आथे, जिहां मोर घर के लोगन मन पक्का घर बनाय बर जगा खोजत रहिन. हमन ला पक्का घर बनाय ला रहिस, फेर ये ह आसान नइ रहिस. मंय अपन सुरु के स्कूल पढ़ई एक ठन गली बत्ती के तरी मं करंय. नवमीं क्लास मं पढ्त बखत हमर घर मं बिजली आइस. कभू-कभू मंय तीर के अपन कका [पेरिअप्पा] के घर रुक जावत रहंयम जिहां बिजली रहिस जेकर ले मंय पढ़े सकंव. पढ़व: मोर दाई के जिनगी – गलीबत्ती के उजियार मं

नरिकुरवर अऊ बूम बूम मट्टुकारर समाज के जतको घलो लोगन मन ले मंय मिलंय, सब्बो झिन कहिन के बढ़िया घर अभू घलो सब्बो के चिंता करे के बात आय. नीलाम्मल ला सुरता नइ ये के ओकर करा बनेच लंबा बखत तक ले पक्का घर रहे होय. “बरसात होय के बखत हमन बस टेसन मं परे रहन; हमर करा कोनो तंबू नइ रहिस.”

नरिकुरवर – जेन मन मूल रूप ले शिकारी रहिन - लंबा बखत तक एक ठन अति पिछड़ा समाज के रूप मं सूचीबद्ध रहिन अऊ वो मन ला साल 2016 ले अनुसूचित जनजाति के रूप मं मान्यता मिलीस.

बनेच बखत ले लड़े के बाद, आखिर समाज ला 2.25 सेंट ज़मीन (करीबन 1,000 वर्ग फुट) मं घर देय के वादा करे गीस. पइसा घलो नाम मं कर देय गे हे अऊ बनाय के काम साल 2024 के आम चुनाव के बाद ले सुरु होना रहिस.

साल 2018 मं तमिलनाडु मं आय चक्रवात गाजाले भारी नुकसान के बाद, समाज के लोगन मं अपन मांग मन ला लेके अऊ जोर लगाइन. 52 बछर के मुरुगेसन बताथे, “वो मन [सरकार] ह आखिर मं हमन ला पट्टा [भूमि अधिकार पत्र] दे दीस. फेर हमन अभू घलो ये जमीन मं घर बनाय नइ सकन.” वो ह कहिथे सिरिफ घरेच नइ, फेर ओकर समाज ह एक ठन मंदिर, मंदिर के तिहार अऊ घलो बनेच कुछु चाहत हवय.

जब वो मन लकठा के मंदिर मन मं जाथें, त वो मन ला पूजा करे नइ देय जाय, अऊ न मंदिर भीतरी जाय ला दे जाय. मंदिर के कार्यक्रम मन ला दूरिहा ले देखे के इजाजत होय के बाद घलो, वो ह ऊंच जात के लोगन मन के करे जावत जात आधार ले छुआछुत ला लेके बताइस.

सरकार स्कूल मन मं, बूम बूम मट्टुकारर के लइका मन ला छुआछुत के सामना ला परथे. अक्सर वो मन ला ‘असुदहा’ समझके दीगर लोगन मन वो मन के लकठा मं बइठे ले मना कर देथें. नुहाय ओकर मन बर तिहार मनाय कस आय, काबर के वो मन ला घर बउरे के पानी सेती घलो जूझे ला परथे. बासिंदा मन ला नुहाय, कपड़ा-लत्ता धोय अऊ पीये के पानी लाय बर करीबन आधा किलोमीटर रेंगे ला परथे. पानी ला लेके अक्सर लड़इ झगरा होवत रइथे, काबर के 60 परिवार मन ला सिरिफ दू घंटा पानी भरे बर मिलथे. अक्सर वो मन ला आधा मटका मिलथे अऊ उहिच ले रांधे अऊ पीये के काम चलाय ला परथे.

पेरियनायकी, वानविल ट्रस्ट मं ट्यूशन टीचर हवंय. ये ह एक ठन गैर-सरकारी संगठन आय, जेन ह राज भर मं कतको जगा मं ये घूमंतु समाज के संग काम करथे. पढ़व: वानविल: लॉकडाउन के तूफ़ान मं इंद्रधनुषी रंग

“इहाँ [तुरविक्काडु अऊ ओन्ननकाडु बस्ती] के अधिकतर लइका मं आठवीं कच्छा तक ले पढ़थें अऊ ओकर बाद काम मं लाग जाथे काबर के वो मन के दाई-ददा तीर मं नइ रहंय, अऊ सबले बड़े लइका अकेला घर चलाय नइ सकय, वो मन बोतल बीनथें, भीख मांगथें, नजर परे ला बचाय बर नान नान पुतरी बेचथें, धन ढोल बजाय सुरु कर देथें.”

मनमेलकुड़ी के पेरियनायकी ह 12 वीं क्लास तक ले पढ़े हवय. ये टीचर ह देखिस के बिन बिजली के लइका मन पढ़े के मन करत नइ रहिन; वो मन ले सिरिफ तेनेच झिन 10 वीं के परिच्छा पास करे सकिन.

“माटी तेल के ढिबरी हमर बर सब्बो कुछु आय,” वो ह कहिथे. “हमन करीबन सात बजे बारथन, अऊ आठ बजे तक ले सब्बो खा लेथन. ओकर बाद हमन ढिबरी बुझाके सुत जाथन. पढ़न नइ.”

वइसे, मुरली किस्मतवाला रहिस काबर के ओकर ददा ह शिक्षा के महत्ता ला समझत रहिस. वो ह अपन बेटा के पढ़ई ला लेके चेत राखे रहय, फेर मुरली करा जाति प्रमाण पत्र नइ जेन मं ये कहे गे होय के वो ह आदिवासी समाज ले हवय अऊ ते पायके पढ़ई बर अनुसूचित जनजाति कोटा के तहत लाभ हासिल करे के हकदार हवय.

“बगेर प्रमाण पत्र के मोला मिलेइय्या छात्रवृत्ति मिले नइ सकत रहिस. अप्पा अऊ मंय अपन बात ला राखे बर कतको दफ्तर मं जाय रहेन,” मुरली कहिथे. फेर अफसर मन वो मन ला घिन अऊ अपमान के नजर ले देखेंय, वो कहिथे. वो मन कहंय, “अरे तुमन पेंट अऊ कमीज पहिरे हो, नुहाय हो काय, समझ गेंय.”

बाप-बेटा के तमिल बोले ला घलो वो मन के खिलाफ सबूत जइसने मानंय: “तुमन अतक बढ़िया तमिल बोलथो. मंय कइसने मान लेंव के तुमन ये जात/समाज के हव? मंय तुमन के कइसने भरोसा करंव? तुमन त कोनो जात के होच नइ.” वो मन ला प्रमाण पत्र दे ले मना कर देय गीस.

मुरली आगू कहिथे के वो मन के असलियत जय भीम फिलिम (कोनहा मं परे समाज के खिलाफ पुलिस के पक्षपात अऊ सरकार के अतियाचार ला लेके एक ठन फिलिम) मं दिखाय गे असलियत ले अलग नो हे.

“वो मन हमन ला संपेरा अऊ मुसुवा धरेइय्या कहिथें अऊ हमन ला प्रमाण पत्र देये ले इंकार कर देथें, काबर के येकर ले हमन ला कतको छुट मिलथे अऊ हमन वो मन के समान हो जाथन,” वो ह बतावत जाथे.

आखिर मं, एक झिन बने अफसर आइस अऊ वो मन के प्रमाणपत्र के अरजी के सुनवाई करिस. लोगन मन कतको दिन तक जिला कलेक्टर दफ्तर के आगू अगोरत रहंय. कतको परिवार के कहना रहिस के आखिर मं वो मन ला रासन कार्ड, आधार कार्ड अऊ वोटर आईडी मिलगे.

फेर मुरली करा अभू घलो ट्रांसफर सर्टिफिकेट (टीसी) नइ ये, जेकर बगेर वो ह आगू के पढ़ई करे बर दाखिला नइ लेगे सकय. ओकर कहना रहिस के वो मन ला बताय गे हवय के वो मन ला कोनो दीगर समजा के नांव ले सर्टिफिकेट मिलही, न कि अथियान (बूम बूम मट्टुकारर समाज के दूसर नांव) के नांव ले.

ये जवान पढ़ेइय्या लइका स्नातकोत्तर के डिग्री हासिल करे ला चाहत हवय अऊ वो ह तब तक ले हार नइ मानय जब तक के वोला ओकर वाजिब हक मिल न जावय.

“ये मोर पहिचान आय, मोला येकर जरूरत हवय. मोला ये पहिचान लोगन मन के उपर राज करे बर नइ, फेर सिरिफ ये कहे बर चाही के ये ‘अथियन’ नांव के लोगन मन के समाज आय. अइसने कतको जनजाति नंदा गे हें. हमन घलो जनजाति के आन. हमर अपन संस्कृति अऊ रीति-रिवाज हवंय जेन ला हमन ला बचाके रखना हे,” वो ह बताथे.

जब मंय मुरली ले मिलथों त मोला मदुरई के अपन गाँव जवाहरपुरम के नवा पीढ़ी मन सुरता आथे जेन मन अपन पढ़ई पूरा करे के बाद अपन जिनगी ला बदले बर जूझत हवंय.

कुप्पम्मा जनम ले इहिचे रहत हवय अऊ अब इहाँ ले बहिर जाय बर आतुर हवय. वो ह जीविका बर प्लास्टिक बीनथे अऊ करीबन 150-200 रूपिया रोज के कमा लेथे. “ हालेच मं, एक ठन गाड़ी चोरी होगे. कोनो कार्रवाई करे नइ गीस. गर गाड़ी मन के ये हाल हवय, त सोचव गर हमन लापता हो जाबो त काय होही?” दू नोनी के 35 बछर के महतारी अपन घर ले बहिर जाय बर प्रन करे हवय. “हमन ला आजादी ले जीना हे. हमन ला अपन हक सेती लड़ना हे. हमन ला दूसर मन के आसरा नइ रहे ला चाही. येकरे सेती, हमर अपन खुद के घर होय ला चाही.”

घर बने नइ होय, बरसात मं पानी नव मुसीबत लेके आथे. सेल्वी कहिथे, “हमन जेन पानी लाथन, जेन ला पीथन, सुते के सरकी उपर, हमर कपड़ा-लत्ता मं, हर जगा कीरा-मकोरा लटके रहिथें.”

बरसात मं पानी बढ़े ले ओकर मन के घर पानी मं बूड़ जाथे अऊ लइका-पिचका उपर खतरा लगे रहिथे. सेल्वी कहिथे, “बरसात के संगे संग मच्छर अऊ जहरीला कीरा-मकोरा घलो आ जाथें; हमन वोला रोके नइ सकन. पानी के सांप घलो हवंय. हमन बरसात मं रत के अंधियार मं घलो सांप मन ला मारथन. बस भगवानेच ह हमर रच्छा करत हवय.”

इहाँ लोगन मन ले गोठियावत, हमेसा हांसी खुसी के माहौल रहिथे. फेर मंय जनत हवं के बिन हवा अऊ सुते बर बढ़िया उपाय के, दिन-रात, अइसने माहौल मं रहे कतक मुस्किल होथे. एक ठन बढ़िया घर सबके जरूरत आय, फेर सरकार ह वो मन ला नजरअंदाज करथे.

पेरियनायकी कहिथे ओद्दा के सीजन मं, ओकर संकेल्ला घर मं लकरी बार के रांधे मुस्किल होथे. नीलाम्मल कहिथे के आजकल मोबाइल फ़ोन मं टॉर्च के सुविधा त हवय, फेर फोन चार्ज करे एक ठन अऊ समस्या आय.

“गाँव के सरपंच वोट माँगे आय रहिस, त वो ह बिजली लगाय के वादा करे रहिस. हमन आज घलो अंधियार मं हवन. बिजली बर ये लड़ई 20 बछर पहिली सुरु होय रहिस,” सिविल सेवा परीक्षा के तियारी मं जी-जान ले जुटे मुरली कहिथे.

तुरविक्काडु अऊ ओन्ननकाडु मं रहेइय्या अधिकतर लोगन मन गुजर बसर बर कचरा बीनथें.

अंजू जब नानचिक लइका रहिस, तभेच ओकर ददा ह गुजर गे अऊ ओकर सियान महतारी ला कचरा बीनके आठ लइका मन के पेट भरे ला परिस. 16 बछर के अंजू कहिथे, “दाई अक्सर बीमार रहिथे. वो ह कभू-कभू समुंदर मं जाथे, मछरी बिसोथे अऊ बेचथे जेकर ले हमन ला खाय पिये के मिल सकय. हमन घर मं नइ रांधन. खाय बर दीगर मन के घर ले आथे.” ओकर एक झिन छोटे भाई छेरी चराथे, एक बहिनी भीख मांगथे, अऊ बाकि मन कचरा बीने मं मदद करथें.

“ढोल बजाय इहाँ नवा पेशा बन गे हे,” मुरुगेसन कहिथे. येकर पहिली, हमन कांच के बोतल, प्लास्टिक अऊ जुन्ना जूता-चप्पल गाड़ी मं लादके लावत रहेन,” 52 बछर के मुरुगेसन कहिथे. जेकर करा मवेसी रहिस, वो अपन बूम बूम गाय ला गाँव-गाँव ले जावत रहिस अऊ उहिच मं गुजरा करत रहिस.

नीलाम्मल कहिथे, “हमन ला कोनो दीगर काम बूता मिलत नइ ये काबर के हमन पढ़े लिखे नो हन. हमर दाई-ददा भीख मांगे के गुजारा करत रहिन. हमन बोतल बीनत हवन. फेर हमन चाहत हवन के हमर लइका मन पढ़ें-लिखें अऊ नऊकरी करके खुशहाल जिनगी गुजारें.”

कुछेक नोनी मन काम करे सुरु कर दे हवंय – एक झिन नोनी ह एक ठन लैब मं काम करके, खून निकारे के तरीका सीखके, 4,000 रूपिया महिना कमाथे. सेल्वी अब कालेज मं हवय अऊ एक अइसने भविष्य ला देखत हवय जिहां ओकर समाज बर जिनिस मं बदल जाहीं. “हमन ला बराबरी के दर्जा चाही. अम्बेडकर हमन ला कहिथे, ‘मंय तुंहर मन बर जम्मो फेरका ला खोल दे हवं, तुमन आगू आव अऊ जेन चाहो बदल डालो.’ घर हमन बने करके पढ़बो, बढ़िया पहिरबो, बढ़िया जिनगी जीबो, त हमन ला मन मिलही.”

“सिरिफ पढ़ईच ह आय जेन ह ये भेदभाव मन ला नइ देखय,” वो ह पारी ला बताथे. वो ह अइसने बखत के सपना देखथे जब, “मोर घर ले कोनो भीख मांगे नइ जाही. मोर घर मोर संगवारी के घर जइसने दिखही.”

कतको प्रतियोगी परीक्षा के तियारी मं जी जान ले जुटे मुरली अपन लोगन मन बर कतको जिनिस ला बदले ला चाहत हवय, वो जगा मं उजियार ले ला चाहत हवय, वो मन के जिनगी मं नवा अऊ बढ़िया बखत लाय ला चाहत हवय.

जब मंय ओकर ले गोठ बात करथों त मोला आस नजर आथे.

आखिर मं एक पईंत अऊ: 20 बछर के बाद, बूम बूम मट्टुकारर ला साल 2024 मं अपन अनुसूचित जनजाति प्रमाण पत्र मिलिस. सरकार ओन्ननकाडु मं ओकर मनके घर ला घलो बनावत हवय अऊ समाज ला आस हवय के वो मन इहीच बछर उहाँ चले जाहीं

ये कहिनी मूल मं तमिल मं लिखे गे रहिस.

अनुवाद: निर्मल कुमार साहू