‘बूम बूम के जिनगी अन्हार में गुम’

हमार 2017 में लागल फोटो प्रदर्शनी हमके पारी खातिर काम करे के प्रेरित कईलस. बाकिर प्रदर्शनी जवन हमके एगो दृश्य कलाकार (विजुअल आर्टिस्ट) के रूप में प्रस्तुत कईलस, उ वानाविल रेवती आ कलाकार नटराजन बिना ना संभव रहे. सन् 2004 के सुनामी के बाद रेवती नरिकुरवर आ बूम बूम मट्टुकारर समुदाय के बच्चन खातिर वानविल स्कूल के स्थापना कईली. हम उनकी माध्यम से तुरविक्काडु आ ओन्ननकाडु बस्तियन के बच्चन से मिलनी आ तुरंत महसूस भईल कि हमके उन्हनी के जीवन के बारे में लिखे के बा आ उन्हनी के तस्वीर खींचे के बा.

बूम बूम मट्टुकारर एगो अनुसूचित जनजाति हवे जेके अदियन (चाहे अतियन भी कहल जाला) के नाम से भी जानल जाला आ सूचीबद्ध कईल जाला. ‘बूम बूम’ शब्द ओ ध्वनि से आईल बा जवन मट्टुकारर या पशु संचालक अपना उरुमी पर पैदा करेला. उरुमी, रेतघड़ी (ऑवरग्लास) के आकार के दोतरफा ड्रम होखेला. ई नाम ओ भाग्य बतावे वाला पुस्तैनी धंधा से पैदा भईल बा जेकरा में उ लोग सजावल बैल के सहायक के रूप में उपयोग करेला.

जईसही सूरज डूबेला, बूम बूम मट्टूकारर समुदाय के लोगन के जीवन में अन्हार छा जाला. तंजावुर जिला के तुरविक्काडु गांव के किनारे के ए बस्तियन में उनकरी दिनन में एगो अउरी तरह के अन्हार छा जाता. हम पिछला सात बरिस से ओ लोगन के जिनगी के देख रहल बानी आ तमिलनाडु के वानविल स्कूलन में जा चुकल बानी जहां ओ लोगन के बच्चा कुल पढ़ेलें सन.

“रात हमनी खातिर सबसे कठिन होला,” मुरली कहेलें. “एइजा से 500 मीटर दूर, दूसरी ओर के किनारा पर बिजली बाटे बाकिर एइजा नईखे,” उ बतावेलन. खाली बिजलिये ना बल्कि पीये के पानी भी ओइजा भरपूर मात्रा में उपलब्ध बाटे. “हमनी के नहर के किनारे रहेनी जा. हमनी के बस्ती के पीछे एगो तालाब बा. ई कबो घना जंगल रहे,” मुरली बतावेलन.

बिजली के कमी से खाली रोज के कामे ना प्रभावित होला बल्कि एसे ए घुमंतू जनजाति के लगभग 50 परिवारन के सुरक्षा आ रहन-सहन पर भी असर पड़ेला. ऊ लोग एइजा लगभग 25 बरिस पहिले आके बस गइल रहे आ आजीविका खातिर कचरा बीने आ बेचे के काम करेला.

उनकरी गांव के अधिकारिक नाम एमजीआर नगर हवे. बाकिर ओ लोगन के कहनाम बा कि उंच जात के लोग एके अपमानजनक नाम ‘राराकोट्टई’ से पुकारेला जेकर अर्थ हवे बाहरी, चे अछूत.

अपना समुदाय के बाकी लोगन निहर 21 बरिस के मुरली भी एगो कच्चा झोपड़ी में बहुते कम सुविधा संघे रहेलन. आठ से दस लोगन के परिवार एक संघे बहुत सकेत जगह में रहेला जेमे नवविवाहित लोगन संघे वयस्क आ हर उमिर के बच्चा भी रहेलें सन.

मुतुकुमारी एगो नया उमिर के महिला हई जे बिना बिजली आपन घर आ रसोई चलावे के संघर्ष कर रहल बाड़ी. “हमनी के खाना कीने के पड़ेला. इडली या डोसा खातिर दाल ना भिंजा सकेनी जा काहें कि ओकरी खातिर मिक्सी (ग्राइंडर) आ फ्रिज के जरूरत होला,” तीन छोट बच्चन के माई 22 बरिस के मुतुकुमारी कहेली.

उनकर पड़ोसी सेल्वी एइजे बड़ भइल बाड़ी. उनकर माता पिता तीन दशक पहिले एइजा आईल रहे लोग. “हमनी के स्विच चालू करे ना आवेला!” उ बिजली से अपनी पूरी तरह से दूर भईला के उदाहरण देत के कहेली. सरकार ओ लोगन के टीवी, मिक्सी आ अन्य इल्क्ट्रोनिक उपकरण दिहले रहे “बाकिर हमनी के बिना बिजली के ओकर का करब जा?” सेल्वी पूछेली. “हमनी के उ कुल बेच दिहनी जा.”

बस्तिये में पैदा भइल बेटियन के माई नीलाम्मल ओ समय के याद करेली जब उ युवा रहली आ पढ़ल चाहत रहली बाकिर अपनी माई बाप के एने ओने जाके रहला के वजह से ना पढ़ पवली. हालांकि उनकर चेहरा पर चमक आ जाला जब उ पंगुनी (मार्च-अप्रैल) आ चितिरई (अप्रैल-मई) में मंदिरन के त्यौहारन के दौरान देखाए जाये वाला फिल्मन के शो के बारे में बतावेली.

“पन्द्रह दिन, 15 फिलिम! पूरा गांव फिलिम देखे खातिर जुटत रहे. हमनी के बिजली चलत रहे एकरा खातिर जनरेटर लेके आईं जा. हमनी के पोंगल के पांचवा दिन से दू दिन ले सड़क पर रौशनी खातिर हर घर से पईसा एकट्ठा करीं जा आ बच्चा कुल बहुत खुश होखें सन,” उ हमनी के बतावेली.

जब समुदाय के लोगन के टेलीविजन मिलल त बच्चन में खुशी के लहर दौड़ गईल. “हमनी के बच्चा बहुत उत्साहित रहलें सन,” उ कहेली. “बाकिर बिना बिजली के टीवी घर पे पड़ल रहल आ चूहा कुल तार काट दिहलें सन, सब बर्बाद हो गईल. हमनी के 600 रुपिया में ओके बेच दिहनी जा,” उ बतावेली.

बिजली के ना रहला से सबके दिक्कत बुझाला बाकिर महिला लोगन के जीवन पर एकर ढेर असर बा. जवान लइकियन के बियाह जल्दी कर दिहल जाला ताकि उ लोग एइजा से निकल सकें. जवन मेहरारू लोग एइजा बियाह कर के आवेला. ओ लोगन खातिर अन्हार बहुत चुनौतीपूर्ण होला, खास तौर पर बच्चा पैदा करे के समय पर आ इहां ज्यादातर बच्चा घरे पर पैदा होखेलन सन.

हमके मदुरई के आपन बचपन याद बा जहां हमार परिवार हमेशा एगो स्थायी निवास के खोज में रहत रहे. हमनी के एगो पक्का घर बनावे के रहे, बाकिर ई आसान ना रहे. स्कूल के शुरुआती साल में हमार समय स्ट्रीट लैंप के नीचे पढ़ाई करत के बीतल. हम कक्षा 9 में रहनी जब हमनी के घर में पहली बार बिजली आईल. कबो-कबो हम अपनी चाचा (पेरियप्पा के) के घरे पढ़े खातिर जाईं, काहें कि उनकी घरे बिजली रहे. पढ़ीं: हमारी माई के जीवन: उजास आ छांव के कथा

हम जेतना भी नरिकुरवर आ बूम बूम मट्टूकारर समुदाय के लोगन से मिलनी, सबकर कहनाम रहे कि रहे के उचित व्यवस्था अब्बो ओ लोगन के चिंता के विषय बा. नीलाम्मल के लम्बा समय से याद बा कि ओ लोगन के रहे के कवनो उचित व्यवस्था नईखे. “जब बरखा होखे त हमनी के बस स्टॉप पर सुत जाईं जा, हमनी के लगे तम्बू ना रहे.”

नरिकुरवर, मूल रूप से शिकार जुटावे वाला लोग, लम्बा समय ले सबसे पिछड़ा समुदाय के रूप में सूचीबद्ध रहे. ओह लोग के अब्बे 2016 में अनुसूचित जनजाति के रूप में मान्यता मिलल ह.

एगो लम्बा संघर्ष के बाद, ए समुदाय के आखिरकार 2.25 सेंट्स जमीन (लगभग 1000 वर्ग फीट) पर आवास के वादा कईल गईल बा. धन आवंटित कर दिहल गईल बा आ निर्माण 2024 के आम चुनावन के बाद शुरू होखे वाला रहे.

तमिलनाडु के तटन पर 2018 में गाजा चक्रवात से भारी नुकसान होखला के बाद समुदाय अपनी मांग के ले के अउरी दबाव डललस. “आखिरकार उ लोग हमनी के पट्टा (भूमि अधिकार दस्तावेज) दिहलें बाकिर अब्बो हमनी के ए जमीन पर घर ना बना सकेनी जा,” 52 बरिस के मुरुगेसन बतावेलन. उनकर समुदाय खाली घर नाहीं बल्कि एगो मंदिर, मंदिर के उत्सव आ अउर भी कुछ चाहता, उ बतावेलन.

जब उ लोग नजदीक के मंदिरन में जालें त उनके न कवनो अनुष्ठान करे के अनुमति होला आ न मंदिर के अंदर जाये के अनुमति होला. दूर से ओ लोगन के मंदिर के गतिविधि देखे के अनुमति मिलल बा आ उ लोग एकरी दौरान उंच जातियन के समूहन द्वारा होखे वाला जाति आधारित भेदभाव के विषय में बात कईलें.

सरकारी स्कूलन में बूम बूम मट्टूकारर बच्चन के समाज से अलग-थलग कर देहल जाला. दोसर बच्चा लोग उनकी लगे बईठे से मना कर देला, आ ओह लोग के ‘गंदा मानेला. ओ लोगन के पिए-खाए खातिर भी पानी के कमी रहेला. एसे नहाइल उनकरी खातिर एगो बड़ सुविधा निहर बा. ए लोगन के नहाये, धोये आ पीये के पानी खातिर लगभग आधा किलोमीटर ले चले के पड़ेला. पानी खातिर अक्सरहा झगड़ा हो जाला, काहे कि 60 परिवारन के खाली दू घंटा में पानी भर लेवे के रहेला. अक्सर ओ लोगन के खाली आधा बरतन पानी मिलेला आ ओही में पूरे घर के खाना बनावे आ पीये के जरूरत पूरा करे के पड़ेला.

पेरियनायकी वानविल ट्रस्ट में एगो ट्यूशन टीचर हई. ई एगो गैर-सरकारी संगठन हवे जवन राज्य भर में ए घुमक्कड़ समुदाय संघे अलग-अलग जगहन पर काम करेला. पढ़ीं: वानाविल: लॉकडाउन के तूफानी जिनगी में इन्द्रधनुष

“इहां (तुरविक्काडु आ ओन्ननकाडु बस्ती) के अधिकांश बच्चा कुल कक्षा 8 ले पढ़ाई करेलें सन आ फिर काम करे चल जालें सन. काहे कि माई बाप लोग लगे ना रहेला आ सबसे बड़ बच्चा खातिर अकेले कुल संभारल सम्भव ना होला. उ कुल बोतल बीनेलें, भीख मांगेले, नजग-गुजर से बचावे वाला गुड़िया बेचेलें, चाहे ड्रम बजावेलें सन.”

मनमेलकुड़ी से पेरियनायकी कक्षा 12 तक ले के पढ़ाई कईले बाड़ी. नया उमिर के एह शिक्षिका के पता चलल कि बिना बिजली के बच्चन के मन पढ़ाई में नईखे लागत; खाली तीन गो बच्चा कक्षा 10 के परीक्षा पास कर पवलें सन.

“किरासन तेल वाला लैंपे हमनी खातिर सब कुछ हवे,” उ कहेली. “हमनी के लगभग 7 बजे लैंप जरावेनी जा आ सब केहू 8 (रात) बजे ले खाना खा लेवेला. ओकरी बाद हमनी के लैंप बुता देनी जा आ सुते चल जायेनी जा. पढाई ना होला.”

हालांकि मुरली भाग्यशाली रहलें काहे कि उनकर पिता शिक्षा के महत्त्व समझत रहस. उ अपनी बेटा के पढ़ाई के ले के सख्त रहलें बाकिर मुरली के लगे कवनो सामुदायिक प्रमाणपत्र ना रहे जेसे पता चले कि ऊ आदिवासी समुदाय से हवें आ एकरी वजह से शिक्षा में अनुसूचित जनजाति के कोटा खतिर योग्य बाड़ें.

“प्रमाणपत्र के बिना हमके उ छात्रवृत्ति ना मिल पावल जवन मिले के रहे. अपनी मामला के हल करे खातिर हम आ अप्पा कई गो ऑफिसन में गईनी जा,” मुरली बतावेलन. बाकिर अधिकारी लोग उनके नफरत आ तिरस्कार से देखें, उ कहेलन. उ लोग ताना मारेला, “ओह तहं लोग पैंट शर्ट पहिनले बाड़ा’, ‘ओह, नहईले बाड़ा लोग का, बुझाता.”

पिता आ पुत्र के तमिल बोलल भी ओ लोगन के खिलाफ गईल. “तहां लोग एतना बढ़िया से तमिल बोलत बाड़. हमरा कईसे विश्वास होई कि तूं ए जात/समुदाय के हव लोग? हम कईसे तोहार भरोसा करीं? पहिले त तहां लोग के कवनो जातिये नईखे.” ओ लोगन के प्रमाणपत्र ना दिहल गईल.

मुरली बतवलें कि ओ लोगन के असलियत फिल्म ‘जय भीम’ (हाशिया वाला एगो समुदाय के खिलाफ पुलिस के पूर्वाग्रह आ राज्य के हिंसा देखावे वाली फिलिम) में जवन देखावल गईल बा ओसे अलग नईखे.

“उ लोग हमनी के सांप आ चूहा पकड़े वाला कहेला आ हमनी के प्रमाणपत्र देवे से मना कर देला काहें कि एसे हमनी के कई जगह छूट मिल जाई आ हमनी के ओ लोगन के स्तर पर आ सकेनी जा,” उ आगे बतावेलन.

आखिरकार एगो बढ़िया अधिकारी आईल आ प्रमाणपत्र के ओ लोगन के अनुरोध के स्वीकार करे शुरू कईलस. लोग जिला कलेक्टर के कार्यालय के बाहर कई दिनन ले इंतजार कईलें. कई गो परिवारन के कहनाम बा कि आखिरकार ओ लोगन के राशन कार्ड, आधार कार्ड आ मतदाता पहचान पत्र मिल गईल बा.

बाकिर मुरली के लगे अब्बो ट्रान्सफर सर्टिफिकेट (टीसी) नईखे जेकरी बिना अगिला शैक्षिक संस्थान में गईल असंभव बा. उ बतवलें कि उनसे कहल गईल बा कि उनके कवनो दूसरी समुदाय के नाम के सर्टिफिकेट मिली ना कि अदियन समुदाय के, जवन बूम बूम मट्टुकारर समुदाय के दूसर नाम हवे.

ए युवा छात्र के लक्ष्य पोस्ट ग्रेजुएट डिग्री हासिल कईल बा आ ऊ तब ले हार ना मनिहें जब ले उनके उनकर उचित प्रमाणपत्र नईखे मिल जात.

“ई हमार पहचान हवे, हमके एकर जरूरत बा. हमके ई पहचान लोगन पर नियंत्रण या प्रभुत्व जमावे खातिर ना चाहीं बल्कि खाली ई कहे खातिर चाहीं कि ‘अदियन’ नाम के लोगन के भी एगो समूह बा. कई गो अइसन जनजाति खतम हो चुकल बाड़ी सन. हमनी के भी जनजाति हईं जा. हमनी के आपन संस्कृति आ रीती-रिवाज बा जेके संरक्षित करे के जरूरत बा,” उ कहेलन.

जब हम मुरली से मिलेनी, हमके अपनी गांव जवाहरलालपुरम के युवा लोग याद आवेला जे आपन शिक्षा पूरा करे आ अपनी जीवन के बदले के कोशिश कर रहल बा.

कुप्पम्मा पैदा भईला के बाद से एइजे रहल बाड़ी आ अब एइजा से निकले के इच्छुक बाड़ी. आपन आजीविका चलावे खातिर उ प्लास्टिक बीनेली आ रोज के 150-200 रुपिया कमायेली. “हाले में एगो वाहन चोरी हो गईल रहे. कवनो कार्रवाई ना भईल. अगर वाहन के ई हाल बा त सोचीं अगर हमनी के गायब हो जाईं जा त का होई?” दू गो लईकियन के 35 बरिस के माई कुप्पम्मा अपनी खुद के जगह पर जाए खातिर संकल्प कईले बाड़ी. “हमनी के आजादी से जियला के जरूरत बा. हमनी के अपनी अधिकारन खातिर लड़े के चाहीं. हमनी के दूसरी के भरोसा प ना रहे के चाहीं. एसे हमनी के अपनी घर में जाहीं के पड़ी.”

उचित घर ना होखला की वजह से मानसून में बरखा से नया नया समस्या पैदा हो जाला. जवन पानी हमनी के पीयेनी जा ओमे कीड़ा तैरेले सन आ ओसे ले के सुते के चटाई पर, हमनी के कपड़ा में हर जगह उ भर जालें सन,” सेल्वी कहेली.

जब बरसात में पानी बढ़ेला त ओ लोगन के घर डूब जाला आ छोट बच्चन के खतरा हो जाला. “बरखा के संघे मच्छर आ जहरीला कीड़ा आवेलें सन, हमनी के रोक ना सकेनी जा. पनिहवा सांप भी आवेला. पूरा बरसात हमनी के सांप मारत बीतेला इहां तक ले कि रात के अन्हार में भी,” सेल्वी बतावेली. “भगवाने बाड़ें जे हमनी के बचवले बाड़ें.”

एइजा के लोगन से बात करत समय माहौल में हरदम हंसी मजाक चलत रहेला. बाकिर हमके एकदम बढ़िया से पता बा कि बिना उचित हवा पानी आ बिस्तर के दिन-ब-दिन रात-ब-रात अइसना माहौल में रहल केतना कठिन बा. एगो ठीक ठाक घर मूलभूत जरूरत हवे बाकिर सरकार ओ लोगन के नजरंदाज करेला.

नमी वाला मौसम में अपनी छोट छोट घरन में लकड़ी के आग पर खाना बनावल मुश्किल होला, पेरियानायकी कहेली. नीलाम्मल कहेली कि आजकल मोबाइल फोन के टॉर्च से मदद मिल जाला बाकिर फिर फोन के चार्ज कईल एगो अलग चुनौती बा.

“गांव में प्रधान (सरपंच) जब वोट मांगे आईल रहलें त हमनी के बिजली देवे के वादा कईले रहलें. हमनी के अबो अन्हार में बानी जा. बिजली खातिर हमनी के संघर्ष 20 बरिस पहिले शुरू भईल रहे,” मुरली कहेलें जे सिविल सेवा परीक्षा के तैयारी कर रहल बाड़ें.

तुरविक्काडु आ ओन्ननकाडु में रहे वाला ज़्यादातर लोग आजीविका खातिर कचरा उठावे के काम करेला.

अंजू के पिता के मृत्यु भईल त उ बहुत छोट रहली. उनकी महतारी के आठ बच्चन के पालन-पोषण करे खातिर कचरा बीने से मिले वाला पईसा पर निर्भर रहे के पड़ल. “माई अक्सर बेमार रहेले. उ कबो कबो समुद्र में जाले, मछरी कीने आ बेचे ले ताकि हमनी के दूध आ खाना के इंतजाम कर सको. हमनी के घर पर खाना ना बनावेनी जा. हमनी के खाना दूसरी के घरन से आवेला,” 16 बरिस के अंजू कहेली जिनकर एगो छोट भाई बकरी चरावेला, एगो बहिन भीख मांगेले आ बाकी कचरा बीने में मदद करेलें सन.

“ढोल बजावल एइजा के नया धंधा हवे,” मुरुगेसन कहेलन. “ओसे पहिले हमनी के कांच के बोतल, प्लास्टिक आ पुरान जूता ले के ठेला भरल जाओ,” 52 बरिस के मुरुगेसन बतावेलन. जे लोग मवेशी राखे, उ लोग आपन बूम बूम मट्टुकारर (बइल नचावे वला) बनके गांव-गांव घूमत रहे आ ओकरे से आपन जीवनयापन करें.

“हमनी क अउरी नोकरी ना मिल सकेला काहें कि हमनी के पढ़ल-लिखल नईखी जा. हमनी के माई बाप लोग आजीविका खातिर भीख मंगलें. हमनी के बोतल उठावत बानी जा बाकिर हमनी के इच्छा बा कि हमनी के बच्चा कुल पढ़ें लिखें आ नोकरी पावें सन ताकि बढ़िया से जी सकें सन,” नीलाम्मल कहेली.

कुछ लईकी लोग काम करे शुरू कईले बाड़ी – एगो युवा महिला लैब में काम कर के 4,000 रुपिया महीना कमायेले जहां उ खून निकाले के काम सीखतिया. सेल्वी अब कॉलेज में बाड़ी आ भविष्य की ओर देख रहल बाड़ी जहां उनकी समुदाय खातिर बदलाव होखे के उम्मीद बा. “हमनी के बराबरी चाहीं. आंबेडकर हमनी के कहले रहलें, ‘हम तोहं लोगन खातिर कुल दरवाजा खोल देले बानी, आगे बढ़ा लोग आ जवन मन करे बदलाव ले आवा लोग.’ अगर हमनी के बढ़िया से पढ़ाई कईल जाओ त हमनी के बढ़िया कपड़ा पहिन सकिला, बढ़िया जीवन जी सकिला आउर सम्मान पा सकिला.”

“सिरिफ शिक्षे बा जे कवनो भेदभाव ना करे,” उ पारी से कहली. उ एगो अइसन समय के सपना देखेली जब, ‘हमरी घर से केहू भीख मांगे ना जाई. हमार घर भी हमरी दोस्त के घर निहर देखाई दी.’

प्रतियोगी परीक्षा के तैयारी में जुटल मुरली अपनी लोगन खातिर बदलाव ले आवल चाहेलें, ए जगह के रोशन कईल चाहेंलें आ उनकी जीवन के एगो नया आ बेहतर चरण के स्वागत कईल चाहेंलें.

उनसे बात कर के हमके उम्मीद जागेला.

पोस्टस्क्रिप्ट: बूम बूम मट्टुकारर लोगन के 20 बरिस के बाद उनके एसटी के प्रमाणपत्र मिलल ह. सरकार ओ लोगन के घर ओन्ननकाडु में तैयार कर रहल बा आ समुदाय के लोग एही साल ओइजा जाए के उम्मीद में बा

स्टोरी मूल रूप से तमिल में रहे.

अनुवाद: विमल चन्द्र पाण्डेय