بیہو گیت: ’ندی کی طرح ہماری رگوں میں دوڑتے ہیں‘

پرندوں کی آواز کے علاوہ ان گیتوں کے پس منظر میں اگر کوئی گیت سنائی دیتا ہے، تو وہ ہے دھان کے کھیتوں سے آ رہی پانی کی چھپ چھپ کی آواز، جہاں یہ عورتیں پودوں کی روپائی کر رہی ہیں۔ پھر اچانک ہی پانچ عورتیں ایک ساتھ بیہو گیت گانے لگتی ہیں، بڑے آرام سے، بغیر کسی تیاری کے۔

یہ جولائی کا مہینہ ہے، جسے آسامی کیلنڈر کے مطابق ’آہار‘ مہینہ کہا جاتا ہے۔ آج دھان کی روپائی کا پہلا دن ہے، جسے ’نبھوئی‘ کہا جاتا ہے، جس کا مطلب ہے: دھان کی ننھی فصلوں کا دن۔ تیتابور کے سلاگوڑی گاؤں میں ہیرا سیکیا کے کھیت میں سورج کی گرمی کافی تیز ہے۔ ہوا میں حبس ہے، اور کام بیحد تھکانے والا۔ ہیرا سیکیا (۵۲) کی چار سہیلیاں اس موسم کے پہلے دن اس کی مدد کے لیے آئی ہیں۔ سنیتا سیکیا (۵۰) گاؤں کی آشا کارکن ہیں۔ ارونا بورا (۵۵) اسکول کے بچوں کے لیے مڈ ڈے میل پکاتی ہیں۔ برشتی پرنا سونوال (۳۵) کبھی پنچایت کی رکن رہی ہیں، اور ۳۵ سال کی نومی سیکیا ایک کسان اور خاتون خانہ ہیں۔ ان سبھی عورتوں کے پاس اپنی اپنی چھوٹی زمین ہے، جس پر وہ دھان کی کھیتی کرتی ہیں۔ یہی ان کے معاش کا ذریعہ ہے۔ کسی اور دن، ہیرا بھی ان میں سے کسی ایک کی مدد کے لیے کھیت میں کام کر رہی ہوں گی۔

ایک بیگھہ زمین (تقریباً ۳۳ء۰ ایکڑ) پر دھان کے پودے روپنے میں ان پانچ عورتوں کو تقریباً پانچ سے چھ گھنٹے لگتے ہیں۔ وہ صبح سے ہی کھیت میں کام کر رہی ہیں۔ اب دوپہر ہو چکی ہے اور اچانک وہ بیہو گیت گانے لگتی ہیں۔ گیت کی شروعات گونیتا نے کی اور ایک کے بعد بعد روایتی بیہو نام (گیت) گنگنانے لگیں۔ باقی عورتیں بھی ان کے ساتھ جڑ گیں اور سُر سے سُر ملاتے ہوئے تالیوں کی دُھن کے ساتھ انہوں نے گانے میں گویا جان ڈال دی۔

گونیتا اور دیگر عورتیں جو بیہو گا رہی ہیں، وہ ’رونگالی‘ یا ’بوہاگ بیہو‘ سے جڑے ہیں، جسے اپریل اور مئی کے آس پاس منایا جاتا ہے۔ یہ موسم بہار کا ایک جشن ہے، جو آسامی نیا سال کا پہلا دن ہونے کے ساتھ ساتھ ہل چلانے اور روپائی کے نئے دور کی شروعات کی علامت بھی ہے۔ یہ رقص، گیت اور جوش سے جڑا ہے۔ حالانکہ، جیسا کہ آج کل اس کی نوعیت کافی حد تک بدل چکی ہے، جہاں بڑے بڑے اسٹیجوں پر بھاری لائٹوں کے درمیان پیشہ ور فنکار پیسے لے کر فن کا مظاہرہ کرتے ہیں، اور بیک گراؤنڈ میں زوردار گانا بج رہا ہوتا ہے۔ یعنی کہ دور حاضر میں اس کا مکمل طور پر بازاری پن ہو چکا ہے۔ لیکن یہ بیہو ویسا نہیں ہے۔ یہ تو بس سورج کی گرمی، مختلف موسموں، کھیتی کسانی اور محنت کے درمیان ہم آہنگی کی علامت ہے، جیسا کہ ہم ہیرا کے کھیت میں دیکھ رہے ہیں۔

آسام میں تین قسم کے بیہو تہوار منائے جاتے ہیں، اور ہر ایک تہوار زراعت کے سالانہ دور کے کسی نہ کسی مرحلہ سے جڑا ہوتا ہے۔ بوہاگ بیہو تب منایا جاتا ہے، جب فصل کی بوائی کا موسم آتا ہے۔ کاتی بیہو کمی کے دنوں کو ظاہر کرتا ہے جب اچھی فصل کی دعا کی جاتی ہے، جو نسبتاً پر امن اور آسان ہوتا ہے۔ وہیں ماگھ بیہو زرعی دور کے کامیاب اختتام اور فصل کٹائی کا جشن ہے۔ بیہو گیتوں میں فصل، سیلاب، محبت، فراق، تاریخی یادگار اور بہت کچھ سمویا ہوتا ہے۔ کھیتوں میں کام کرنے والے زرعی مزدوروں اور کسانوں کے ذریعہ تخلیق کیے گئے یہ گیت اپنے آپ میں ایک آزاد علاقائی فن ہیں۔ ان تخلیقات کو خواہ کوئی نہ جانتا ہو، لیکن ان گیتوں کو سال بھر گایا جاتا ہے۔ یہ گیت لوگوں کی زندگی، محنت، محبت اور تمناؤں کی دستاویز ہیں جنہیں انہوں نے نسل در نسل محفوظ رکھا ہے اور آگے بڑھایا ہے۔

گونیتا کہتی ہیں، ’’بیہو گیتوں میں ایسا کچھ نہیں ہے جسے ہم نے الگ سے سیکھا ہو۔ یہاں تک کہ ہمیں بیانام (شادی کے گیت) بھی کبھی کسی نے سکھایا نہیں۔ ہم انہیں بڑے ہوتے ہوتے اپنے آپ سیکھ گئے۔ شاید بورگیت جیسی کلاسیکی موسیقی کے ہنر کو جانے کے لیے آپ کو کسی سے سیکھنا پڑتا ہے، لیکن ایسا بیہو گیتوں کے ساتھ نہیں ہے۔ یہ ہماری زندگی کا حصہ ہیں۔ یہ کسی ندی کی طرح ہماری رگوں میں دوڑتے ہیں۔‘‘

ترجمہ نگار: قمر صدیقی