ബിഹു സംഗീതം: ‘നദിപോലെ ഞങ്ങളുടെ ചോരയിലൊഴുകുന്നു’

വല്ലപ്പോഴുമുള്ള ഒരു പക്ഷിയുടെ ശബ്ദത്തിനുപുറമേ നിങ്ങൾക്ക് കേൾക്കാനാവുന്ന ഒരേയൊരു പശ്ചാത്തലസംഗീതം, ഞാറ് നടുന്നതിനുവേണ്ടി, സ്ത്രീകൾ വെള്ളം നിറഞ്ഞ പാടത്തിലൂടെ നടക്കുന്ന ശബ്ദമാണ്. പിന്നെ, വളരെ സ്വാഭാവികമായി, പെട്ടെന്ന് ആ അഞ്ച് സ്ത്രീകൾ ആലപിക്കുന്ന ബിഹു ഗാനം നിങ്ങൾക്ക് കേൾക്കാം.

അസമീസ് കലണ്ടറിലെ അഹാർ മാസമാണ് (ജൂലായ്) അത്. നൊഭൂയി എന്ന് വിളിക്കുന്ന നെല്ലിൻ്റെ ഞാറ് നടുന്ന ആദ്യത്തെ ദിവസം. അക്ഷരാർത്ഥത്തിൽ, പുതിയ തൈകളുടെ ദിവസം. തിതദോറിലെ സലഗുരു ഗാംവിലെ ഹീര സൈകിയയുടെ പാടത്ത് സൂര്യൻ തിളയ്ക്കുന്നു. അന്തരീക്ഷത്തിൽ നല്ല ഈർപ്പം. ചെയ്യുന്ന ജോലിയോ, നടുവൊടിക്കുന്നത്. സീസണിൻ്റെ ആദ്യത്തെ ദിവസം ഹീര സൈകിയ എന്ന 55-കാരിയെ സഹായിക്കാൻ അവരുടെ നാല് സുഹൃത്തുക്കളും വന്നിട്ടുണ്ട്. 50 വയസ്സുള്ള ഗുണിത സൈകിയ ഗ്രാമത്തിലെ ആശ പ്രവർത്തകയാണ്. 55 വയസ്സുള്ള അരുണ ബോറ സ്കൂൾകുട്ടികൾക്ക് ഉച്ചയ്ക്ക് ഊണ് പാചകം ചെയ്യുന്ന സ്ത്രീയാണ്. 35 വയസ്സുള്ള ബൃഷ്ടിപർണ സോണൊവാൾ ഒരിക്കൽ പഞ്ചായത്തിലെ അംഗമായിരുന്നു. 35 വയസ്സുള്ള നോമി സൈകിയയാകടെ, ഒരു കർഷകയും വീട്ടമ്മയും. അവരെല്ലാവരും, അവരവരുടെ കുടുംബത്തിൻ്റെ നിലനിൽപ്പിനായി ചെറിയ തുണ്ടുഭൂമികളിൽ കൃഷി ചെയ്യുന്നവരാണ്. മറ്റൊരു ദിവസം ഇവരെ സഹായിക്കാൻ ഹീരയ്ക്കും പോകേണ്ടിവരും.

ഒരു ബിഗ (അസമിൽ ഇത് 0.33 ഏക്കറാണ്) ഭൂമിയിലെ നെൽക്കതിരുകൾ മാറ്റി നടാൻ ഈ അഞ്ച് സ്ത്രീകൾക്ക് അഞ്ചാറ് മണിക്കൂർ അദ്ധ്വാനിക്കണം. രാവിലെ മുതൽ പാടത്ത് പണിയെടുക്കുകയാണ് അവർ. ഉച്ചയായി. അപ്പോഴാണ് അവരാ ബിഹു ഗാനം പാടുന്നത്. ഗുണിത മുൻകൈയ്യെടുത്ത് ഒന്നിനുപിന്നാലെ ഒന്നായി ചില പരമ്പരാഗത ബിഹു നാമുകൾ പാടി. കൂടെയുള്ളവർ ഒരുമിച്ച് കൈകൊട്ടി സജീവമായി പങ്കുചേർന്ന് ആ പാട്ടിന് ഊർജ്ജവും താളവും നൽകി.

ഗുണിതയും മറ്റുള്ളവരും ചേർന്ന് പാടുന്ന ഈ ബിഹു ഗാനങ്ങൾ ഏപ്രിൽ മുതൽ മേയ് വരെ ആഘോഷിക്കുന്ന രൊംഗാലി അഥവാ ബൊഹാഗ് ബിഹുവുമായി ബന്ധപ്പെട്ടതാണ്. ഉഴുകലിൻ്റേയും നടീലിൻ്റേയും കാലം ആവർത്തിക്കുന്ന അസമീസ് വർഷത്തിൻ്റെ ആ ആദ്യത്തെ ദിവസം വസന്തോത്സവംകൂടിയാണ്. നൃത്തം, പാട്ട്, ആഘോഷം എന്നിവയുമായി ബന്ധപ്പെട്ടതാണ് ബിഹു. ഇന്നത്തെപ്പോലെ വികലമായ രീതിയിലല്ലെന്ന് മാത്രം. വലിയ സ്റ്റേജോ, പളപളപ്പോ, പ്രതിഫലം വാങ്ങുന്ന കലാകാരരോ, ഉച്ചത്തിലുള്ള പാട്ടോ, പ്രഭാപൂരമോ, കച്ചവടക്കാരുടെ സ്പോൺസർഷിപ്പുകളോ ഒന്നുമില്ലാത്ത ഒരു ഉത്സവം. സൂര്യനും, ഋതുക്കളും, കാർഷികോത്പാദനവും അദ്ധ്വാനവും എല്ലാം ചേർന്ന ലളിതമായ ഒരു ഉത്സവം. ഹീരയുടെ പാടത്ത് നാം കാണുന്നതുപോലുള്ള ഒന്ന്.

അസമിൽ മൂന്ന് ബിഹു ഉത്സവങ്ങളുണ്ട്. ഓരോന്നും കാർഷികചക്രത്തിൻ്റെ ഏതെങ്കിലുമൊരു ഭാഗത്തെ ആസ്പദമാക്കിയുള്ളതാണ്. ബൊഹാഗ് ബിഹു, ഞാറ് നടുന്നതിൻ്റെ സമയമാണ്. ക്ഷാമകാലവും, നല്ല വിളയ്ക്കായുള്ള പ്രാർത്ഥനയുടേതുമാണ്, അധികം ആഘോഷിക്കാത്ത കാടി ബിഹു. കാർഷിക കാലം കഴിഞ്ഞ്, നല്ല വിളവ് കിട്ടുന്ന കാലത്തെ അടയാളപ്പെടുത്തുന്നതാണ് മാഘ ബിഹു. വിളവ്, പ്രളയം, പ്രണയം, കാത്തിരിപ്പ്, ചരിത്രസ്മരണകൾ ആദിയായവയെക്കുറിച്ചൊക്കെ പാടുന്ന പാട്ടുകളാണിവ. പാടത്ത് പണിയെടുത്തിരുന്ന പേരറിയാത്ത ഏതൊക്കെയോ കർഷകർ സൃഷ്ടിച്ച ഈ പാട്ടുശാഖയിലെ ഗാനങ്ങൾ വർഷം മുഴുവൻ ആലപിക്കപ്പെടുന്നു. തങ്ങളുടെ ജീവിതം, അദ്ധ്വാനം, പ്രണയം, കാത്തിരിപ്പ് എന്നിവയുടെ ഈ വലിയ ശേഖരത്തെ അവർ സംരക്ഷിക്കുകയും അടുത്ത തലമുറയിലേക്ക് കൈമാറുകയും ചെയ്തു.

“ബിഹു ഗാനങ്ങൾ ഞങ്ങൾ പഠിക്കുന്നതല്ല. വിവാഹഗാനങ്ങൾപോലും ആരും ഞങ്ങളെ പഠിപ്പിച്ചവയല്ല. കുട്ടിക്കാലംതൊട്ട് ഞങ്ങൾ കേട്ടു വളർന്നതാണ്. ബൊർഗീതുപോലുള്ള ക്ലാസ്സിക്കൽ രൂപങ്ങൾ ഒരുപക്ഷേ നിങ്ങൾക്ക് ആരിൽനിന്നെങ്കിലും പഠിക്കേണ്ടിവന്നേക്കാം. എന്നാൽ ബിഹു ഗാനങ്ങൾ പഠിക്കുന്നതല്ല. ഞങ്ങളുടെ ജീവിതത്തിൻ്റെ ഭാഗമാണ്. നദി പോലെ, ഞങ്ങളുടെ ചോരയിലൂടെ ഒഴുകുന്നതാണ്,” ഗുണിത പറയുന്നു.

പരിഭാഷ: രാജീവ് ചേലനാട്ട്