बिहू गीत: लहू मं नदिया कस बोहावत

कभू-कभार चिरई-चिरगुन के बोली ला छोड़, दूरिहा ले सिरिफ एकेच ठन आवाज सुने मं आथे, वो आय पानी ले भरे धान के खेत मं हरियर थरहा मन ला रोपा लगावत माईलोगन मन के. अऊ अचानक ले पाँचों माईलोगन मन बिहू गीत गाये लगथें.

असाढ़ (जुलाई) के महीना आय, धन असमिया कैलेंडर मं आहार के महीना, धान रोपई के पहिला दिन, जेन ला नोभुई कहे जाथे. सिरतोन, थरहा मन के दिन. टिटाडोर के होलोगुड़ी गाँव मं हीरा सैकिया के खेत मं घाम अभू घलो तेज, हवा मं नमी, अऊ हाथ मं धरे थरहा, कनिहा ला टोर दिही कस लागथे. 52 बछर के हीरा सैकिया के चार झिन संगी, सीजन के ये पहिला दिन मं ओकर मदद करे बर आय हवंय. 50 बछर के गुनिता सैकिया गाँव मं मितानिन (आशा कार्यकर्ता) आय. 55 बछर के अरुणा बोरा रसोइया आय जेन ह स्कूल के लइका मन बर ‘मध्यान्ह भोजन’ बनाथे. 35 बछर के ब्रिस्टिपर्णा सोनोवाल, जेन ह कभू पंच रहिस अऊ 35 बछर के नोमी सैकिया किसानिन अऊ घर-गृहस्थी वाली आय. सब्बो माईलोगन मन अपन-अपन, नान-नान खेत मं धान के खेती करथें, जेन ह ओकर परिवार मन के खाय के काम आथे.

सिरिफ एक बीघा जमीन (जेन ह असम मं 0.33 एकड़ के बरोबर आय) मं धान थरहा रोपा लगाय मं ये पाँचों माईलोगन मन ला करीबन पांच ले छै घंटा लाग जाथे. वो मन बिहनियाच ले खेत मं बूता करत हवंय. मंझनिया होगे अऊ अचानक ले वो मन एक ठन बिहू गीत गाये लागथें. गुनिता आगू बढ़के एक के बाद एक पारंपरिक बिहू नाम गाथे, बाकि माइलोगन मन घलो ओकर संग मं गाये लागथें, वो मन के ताली ये मंझनिया ला लय अऊ ताकत ले भर देथे.

गुनिता अऊ आने मन जेन बिहू गीत गाथें, वो ह रोंगाली धन बोहाग बिहू ले जुड़े हवय, जेन ह चइत अऊ बइसाख (अप्रैल अऊ मई) के लगालगी मनाय जाथे. असमिया नवा बछर के पहिला दिन, जुताई अऊ रोपई सुरु होय के प्रतीक घलो आय, बसंत तिहार आय. इही बिहू नृत्य, गीत अऊ तिहार ले जुड़े हवय. फेर नवा जमाना के बिगड़े रूप जइसने नो हे. न कोनो शहर के जगा, न कोनो बड़े अकन स्टेज, न कोनो पइसा लेवइय्या कलाकार, न कोनो लाइट, न कोनो तेज संगीत, न कोनो कारोबारी हित. बस सुरुज, मऊसम, खेती अऊ मिहनत के सहज नाता. ठीक वइसनेच जइसने हमन हीरा के खेत मं देखत हवन.

असम मं तीन ठन बिहू तिहार हवंय अऊ हरेक ह खेती-किसानी के कोनो न कोनो हिस्सा ले जुड़े हवय. बोहाग बिहू बोय के सीजन के तिहार आय. काति बिहू, थोकन शांत तिहार आय, अभाव के बेरा अऊ बढ़िया फसल बर देंवता के सुमिरन आय. अऊ माघ बिहू, खेती के आखिर के प्रतीक आय जेन ह बढ़िया फसल के संग सिराथे. ये गीत फसल, पुर/बाढ़, मया, आस, ऐतिहासिक संस्मरण अऊ बनेच कुछु के बरनना करथे. खेत मन मं बूता करेइय्या अनजान किसान मन के रचे बिहू गीत अपन आप मं एक ठन शैली आय अऊ बछर भर गाये जाथे. ये लोगन मन के जिनगी, मिहनत, मया अऊ आस के धरोहर आंय जेन ला वो मन अवेइय्या पीढ़ी तक पहुंचाय हवंय.

गुनिता कहिथे, “बिहू गीत कोनो अइसने जिनिस नो हे जेन ला हमन ला सीखे ला परे. इहाँ तक ले बियानम (बिहाव गीत) घलो हमन ला कभू सिखाए नइ गीस, हमन वोला बड़े होत-होत सीख लेन. हो सकथे के बोरगीत जइसने कोनो शास्त्रीय शैली होय, वोला कोनो ले सीखेच ला परथे. फेर बिहू गीत सिखाय नइ जावय. वो हमर जिनगी के हिस्सा आय. वो हमर लहू मं नदिया कस बोहावत हवय.”

अनुवाद: निर्मल कुमार साहू