‘बीहू गीत त हमनी के नस में नदी जइसन बहेला’

खेत में सन्नाटा पसरल बा, बस कबो कवनो चिरई के फुदके के आवाज आवत बा. मेहरारू लोग खेत में बिचड़ा रोप रहल बाड़ी. गोड़ से पानी में छप-छप के आवाज आ रहल बा. आउर फेरु अचके ऊ लोग गीत गावे लागत बाड़ी, बीहू गीत, बिना कवनो तइयारी के.

जुलाई, चाहे कहीं असमिया पंचांग के हिसाब से ‘आहार’ महीना लागल बा. धान रोपनी के पहिल दिन बा, जेकरा ‘नोभुई’ बोलल जाला. माने नयका बिचड़ा रोपे के दिन. तिटाबर के सालागुडी गांव में हीरा सैकिया के खेत में अबहियो बहुते घाम हो रहल बा, देह झुलसा देवे वाला. हवा में चिपचिपहाट बा, आ काम एतना कि पीठ टूट रहल बा. आज रोपनी के पहिलका दिन बा. बावन बरिस के हीरा सैकिया के चार ठो सहेली लोग खेत के काम में उनकर हाथ बंटावे आइल बा. पचास बरिस के गुनिता सैकिया, गांव के आशा वर्कर बाड़ी. पचपन बरिस के अरूणा बोरा, जे स्कूल में लइका लोग खातिर मिड-डे मील बनावेली. पहिले पंचायत के सदस्य रह चुकल बृस्टिपर्णा सोनवाल. आ नोमी सैकिया, जे खेतियो करेली आउर आपन घरो-दुआरो संभारेली. ई सब औरतन के आपन छोट-छोट खेत बा, जेकरा पर धान के खेती होखेला. एकरे से ओह लोग के घर चलेला. आज जइसे हीरा के लोग मदद करे आइल बा, वइसहीं काल खानी केहू आउर इहंवा काम रही, त हीरा मदद करे जइहन.

एक बीघा खेत (मोटा-मोटी 0.33 एकड़) में धान रोपे में पांचो मेहरारू लोग के कोई पांच से छव घंटा लाग जाला. ऊ लोग आज त भोरहीं से एह काम में लागल बा. दुपहरिया हो चुकल बा. अचके ऊ लोग बीहू गीत गावे लागत बा. गीत उठावत बाड़ी गुनिता. ओकरा बाद सभे लोग उनका संगे गाव लागत बा. राग मिलावत, ताली बजावत ऊ लोग के गीत में जान डाल देता.

गुनिता आ उनकर सखि लोग जवन बीहू गीत गावत बा, ऊ ‘रोंगाली’ चाहे ‘बोहाग बीहू’ से जुड़ल बा. ई साल में अप्रिल, चाहे मई महीना में बहुते चाव से मनावल जाला. असमिया नयका साल के पहिल दिन बा. ई खेती-बाड़ी के नया चक्र के सुरुआती चिन्हो बा, जब जोताई आ रोपाई फेरु से सुरु होखेला. ई त बसंत के त्योहार बा. ई उहे बीहू बा जे नाच-गाना आ खुसी के त्योहार मानल जाला. बाकिर आजकल जवन बदलल आ बिगड़ल रूप में देखे के मिलेला, ऊ अइसन ना ह. ना सहर के चकाचौंध, ना रंग-बिरंगा मंच, ना पइसा पर नाचे वाला कलाकार, ना चकमक बत्ती, ना तेज माइक, ना बजार के हल्ला गुल्ला. बस घाम, मौसम, बीया-बोआई आ मिहनत से जुड़ल बीहू. ठीक वइसहीं, जइसन हीरा के खेत में देखे के मिलत बा.

असम में तीन तरह के बीहू मनावल जाला. हर बीहू खेती के बरखा, बोआई, आ कटनी जइसन अलग-अलग चरण से जुड़ल बा. बोहाग बीहू नया फसल के रोपनी घरिया मनावल जाला. काति बीहू ओ बेरा आवेला जब खेत सून होखेला, अनाज के अभाव रहेला. लोग दिया-बाती जरा के अन्न खातिर मिन्नत करेला. ई बीहू शांत आ सामान्य तरीका से मनावल जाला. उहंई माघ बीहू खेती के चक्र के अंतिम पड़ाव बा, जब फसल कटेल आउर घर-खलिहान अऩ्न से भर जाला. एह गीत सब में फसल के खुसी, बाढ़ के डर, प्रेम-बिरह, आ बीतल बेरा के इयाद समेटले रहेला. खेत में पसीना बहावे वाला किसान आ मजूर लोग से ई बीहू गीत जनमल बा. ई आपन एगो अलग विधा बा, जे साल भर गावल जाला. ई लोग के जिनगी के कहानी ह, मजूरी के बात ह, मन के टीस आ प्रेम के पीर ह. एकरा लोग पीढ़ी दर पीढ़ी सुर में पिरो के आगू बढ़ा रहल बा.

“बीहू गीत अइसन चीज नइखे, जेकरा सिखावल जा सके,” गुनिता कहेली. “बियानम (बियाह गीत) गीतो हमनी के केहू सिखवले नइखे. ई त हमनी लरिकाइए से सुनत-सुनत सीख गइनी. बोरगीत जइसन कुछ शास्त्रीय गीत हो सकेला, जेकरा गुरु से सीखल जाला. बाकिर बीहू गीत त सिखावे के चीजे ना ह. ई त हमनी के जिनगी के अटूट अंग बा. कवनो नदी जेका हमनी के नस में बहेला.”