ढेरीयावत बरसात ले हलाकान भंडारा के किसान

सूखाय माटी मं एक ठन नान-कन बिल मं मरे केंकरा परे हवय, जेकर गोड़ ओकर देह ले अलग-बिलग होगे रहिस. देवेंद्र भोंगाडे अपन पांच एकड़ मं लगे धान के खेत मं ये बिल मन के डहर आरो गरत कहिथे, “ये मन घाम ले मरत हवंय.”

वो ह सूखके पींयर-हरियर धान के मंझा मं ठाढ़े कहिथे के गर पानी गिरे रइतिस, त तुमन मोर खेत के पानी मं केंकरा मन ला अंडा सेवत देखे रइतो. 30 बछर उमर पार ये किसान ला इहीच संसो हवय, “मोर धान नइ बांचही.”

542 के आबादी वाले (जनगणना 2011) ओकर गाँव, रावणवाडी मं किसान मन बरसात आय के पहिली, जून (जेठ) के पहिली पाख मं अपन खेत मं थरहा डार देथें. कुछु दिन बीते भारी बरसात के बाद, जब रोपा के खेत मं पानी भर जाथे, त वो मन 3 ले 4 हफ्ता के थरहा ला नींदके अपन खेत मन मं रोपा लगा देथें.

फेर बरसात बखत के सुरू के छै हफ्ता बाद घलो, ये बछर 20 जुलाई तक, रावणवाडी मं पानी नइ गिरे रहिस. भोंगाडे बताथे के दू बेर पानी छींटा परे रहिस, फेर भरपूर बरसे नइ रहिस. जेन किसान मन करा चुंवा रहिस वो मन कइसने करके धान ला पलोवत रहिन. अधिकतर खेती के बूता नइ होय सेती, भूमिहीन बनिहार मन काम बूता खोजे बर गाँव छोड़ देय रहिन.

करीबन 7 कोस दूरिहा, गरडा जंगली गाँव मं, लक्ष्मण बांटे घलो कुछु बखत ले ये कमी ला देखत हवय. वो ह कहिथे के जून अऊ जुलाई (जेठ अऊ असाढ़) बिन बरसात के गुजर जाथे. उहाँ ठाढ़े दीगर किसान मन घलो हामी भरत मुड़ी हला देथें. वो मन 2 ले 3 बछर मं एक पईंत वो मन सियारी फसल कमाय नइ सकंय.

बांटे, जेन ह करीबन 50 बछर के आय, सुरता करथे के ओकर बचपना मं मऊसम ये ढंग के नइ रहिस. सरलग पानी बरसत रहय, धान बखत मं होवत रहिस.

फेर साल 2019 नुकसान वाले एक ठन अऊ बछर होगे, अऊ नवा ढंग के हिस्सा घलो बनगे. किसान संसो करत हवंय. डेर्राय नारायण उइके ( भूंइय्या मं बइठे: जिल्द फोटू देखव) कहिथे, “मोर खेत सियारी मं घलो परती परे रइही.” वो ह 70 बछर के आय अऊ 1.5 एकड़ खेत मं 50 बछर ले जियादा बखत ले खेती करत हवय अऊ अपन जिनगी के अधिकतर बनिहारी मं घलो गुजार चुके हवय. वो ह सुरता करथे, ये ह साल 2017 मं परती परे रहिस, साल 2015 मं रहिस ... बीते बछर घलो, बरसात के ढेरियाय सेती बोये मं बिलम होगे रहिस.” उइके कहिथे के ढेरियाय सेती उपज अऊ आमदनी मं मार परथे. जब किसान बोय बर बनिहार करे नइ सकय, त बनिहार ला बूता घलो कम मिलथे.

भंडारा शहर ले करीबन 7 कोस दूरिहा बसे, भंडारा तालुका अऊ जिला के गरडा जंगली 496 लोगन के आबादी वाले नान-कन गाँव आय. रावणवाडी जइसने इहाँ के अधिकतर किसान मन करा छोटे-छोटे खेत हवंय- एक ले चार एकड़ तक के – अऊ पानी बर अकास के भरोसा हवंय. गोंड आदिवासी उइके के कहना आय के गर पानी नइ गिरिस, त खेती घलो नइ बांचय.

ये बछर 20 जुलाई (असाढ़ महिना) तक, ओकर गाँव के करीबन सब्बो खेत मं बोवाई नइ होय सकिस, खेत मन मं लगे थरहा सूखे लगे रहिस.

फेर दुर्गाबाई दिघोरे के खेत मं, बिन बतर के थरहा ला रोप के काम चलत रहिस. ओकर घर के हेत मं एक ठन बोर हवय. गरडा मं सिरिफ चार-पांच किसान मन करा बोर हवय. ओकर 80 फीट गहिर बोर के सूखाय के बाद, दिघोरे परिवार ह दू बछर पहिली चुंवा के भीतरी बोर खनाय रहिस, जेन ह 150 फीट गहिर रहिस. फेर जब साल 2018 मं ये ह घलो सूख गे, त वो मन नवा बोर खनवाइन.

बांटे कहिथे के बोर इहाँ नवा जिनिस आय, कुछेक बछर पहिली तक ये इलाका मं नजर नइ आवत रहिस. वो ह कहिथे, “आगू के जमाना मं बोर कराय के जरूरत नइ परत रहिस. अब इहाँ पानी मिले मुस्किल आय, बरसात के कोनो भरोसा नइ ये, येकरे सेती लोगन मन येला (बोर ला) खनवावत हवंय.”

बांटे बतावत जाथे के साल 2019 के मार्च (फागुन) लेच गाँव के तीर के दू नान नान मालगुजारी तरिया घला सूखा के गे. अक्सर, घाम के बखत मं थोर बहुत पानी रहत रहिस. वो ह कहिथे के बढ़त बोर मन तरिया के पानी ला तीर लेवत हवंय.

ये तरिया मन ला इहाँ के राजा मन के देखरेख मं 17 वीं सदी के आखिर ले 18 वीं सदी के बीच तक, विदर्भ के धान कमाय वाले उत्ती जिला मन मं बनाय गे रहिस. महाराष्ट्र बने के बाद, राज के सिंचाई विभाग ह बड़े तरिया मन के रखरखाव अऊ देखरेख के जिम्मा ले लीस, फेर जिला परिषद ह छोटे तरिया मन के भार लीस. ये तरिया मन ला इहाँ के लोगन मन संभालथें,मछरी पालन अऊ अपासी के काम मं लाथें. भंडारा, चंद्रपुर, गढ़चिरौली, गोंदिया,अऊ नागपुर जिला मन मं अइसने करीबन 7,000 तरिया हवंय, फेर लंबा बखत तक ले येकर ऊपर धियान नइ देय गीस अऊ वो मं बिन काम के हालत मं परे हवंय.

बांटे कहिथे के इहाँ के नवा पीढ़ी के कतको लइका पलायन कर चुके हवंय – भंडारा शहर, नागपुर, मुंबई, पुणे, हैदराबाद, रायपुर, अऊ दीगर जगा मन मं – ट्रक के साफ सफाई करेइय्या, चऊड़ी मं कुली, बनिहार धन जेन घलो आन काम-बूता वो मन ला मिल जाथे वोला करे बर.

ये बढ़त पलायन आबादी के आंकड़ा मं नजर मं आथे: महाराष्ट्र के आबादी मं जिहां 2001 के जनगणना ले 15.99 फीसदी बढ़त होय हवय, उहिंचे भंडारा मं उही बखत मं सिरिफ 5.66 फीसदी के बढ़ोत्तरी दरज करे गीस. इहाँ गोठ-बात बखत घेरी-बेरी अवेइय्या मूल कारन ये आय के लोगन मन खेती होय के कोनो ठिकाना नइ होय मं बढ़त, खेती के काम मं कमी, अऊ घर के खरचा उठाय नइ सके सेती आन जगा मन मं चले जावत हवंय.

भंडारा खासकरके धान कमेइय्या जिला आय, इहाँ के खेत मन जंगल ले लगे घिराय हवंय. इहाँ के अऊसत सलाना बरसात 1,250 मिमी ले लेके 1,500 मिमी तक ले होथे( सेंट्रल ग्राउंड वाटर बोर्ड के एक ठन रिपोर्ट मं लिखतय हवय). बारोंमासी वैनगंगा नदिया, सात तालुका वाले ये जिला लेके होके बोहाथे. भंडारा मं बरसती नदिया अऊ करीबन 1,500 मालगुजारी तरिया घलो हवंय, जइसने के विदर्भ के सिंचाई विकास निगम के दवा आय. इहींचे वइसने, सीजन मं पलायन के लंबा इतिहास रहे हवय, फेर बूड़ती के कुछु जिला के उलट – भंडारा मं किसान मन के भारी संख्या मं आत्महत्या देखे ला मिले नइ ये.

सिरिफ 19.48 फीसदी शहरीकरन के संग, ये छोटे अऊ सीमांत किसान मन के एक ठन खेती-किसानी वाले जिला आय, जऊन मन अपन खुदेच के जमीन अऊ बनिहारी ले आमदनी हासिल करथें. फेर मजबूत बिन अपासी के, इहाँ के जियादातर खेती अकास भरोसा हवय; तरिया मन के पानी सिरिफ बरसात के सिरोय तक ले, अक्टूबर (कुंवार) के बाद, कुछु खेत बर भरपूर होथे.

कतको रिपोर्ट ले पता चलथे के मध्य भारत, जिहां भंडारा जिला बसे हवय, जून ले सितंबर तक बरसात के कमजोर परे अऊ भारी ले जियादा बरसात होय के बढ़त घटना के साखी रहे हवय. भारतीय उष्णदेशीय मौसम विज्ञान संस्थान, पुणे के 2009 के एक ठन अध्ययन मं अइसने किसम के बात कहे गे हवय. विश्व बैंक के 2018 के एक ठन अध्ययन मं भंडारा जिला ला भारत के सबले बड़े 10 क्लाइमेट हॉटस्पॉट मं पाय गे हवय. दीगर नौ ठन जिला मं शामिल जिला विदर्भ, छत्तीसगढ़ अऊ मध्यप्रदेश मं हवय, अऊ सब्बो मध्य भारत मं आथें. अध्ययन मं कहे गे हवय के ‘क्लाइमेट हॉटस्पॉट’ एक अइसने जगा आय जिहां अऊसत मऊसम मं बदलाव ले जीवन स्तर मं नकरात्मक असर परही. अध्ययन मं चेताय गे हवय के गर अइसने नजारा बने रइही, त ये हॉटस्पॉट वाले इलाका के बासिंदा मन ला भारी नुकसान के झटका लग सकथे.

रिवाइटलाइज़िंग रेनफेड एग्रीकल्चर नेटवर्क ह साल 2018, भारतीय मऊसम विभाग के बारिस के आंकड़ा के अधार ले, महाराष्ट्र ला लके एक ठन तथ्य-पत्र संकलित करिस. ये बताथे: पहिला, विदर्भ के करीबन सब्बो जिला मं साल 2000 ले 2017 के बीच मं बिन सूखा वाले दिन भारी गहिर ले बढ़े हवय.दूसर, बरसात के दिन कम होय हवय, वइसे लंबा बखत तक ले सलाना बारिस करीबन थिर रहे हवय. येकर मतलब ये आय के ये इलाका मं कुछेक दिन बरसात होवत हे – अऊ येकर ले फसल के बाढ़ उपर असर परत हवय.

एक ठन अऊ अध्ययन, जऊन ला टीईआरआई (द एनर्जी एंड रिसोर्सेज़ इंस्टीट्यूट) ह साल 2014 मं करे रहिस, कहिथे के: “1901-2003 के बखत के बरसात के आंकड़ा मन ले पता चलथे के जुलाई मं मानसून के बारिस (राज भर मं) कम होवत जावत हे, फेर अगस्त (सावन) मं बरसात बढ़त जावत हे ... येकर संगे संग, मानसून के बखत भारी बरसात ह बाढ़े हवय. खास करके सीजन के पहिली बखत (जेठ अऊ असाढ़) मं.”

ये अध्ययन जेकर नांव आय, असेसिंग क्लाइमेट चेंज वर्रेन्बिलिटी एंड एडाप्सन स्ट्रेजीस फोर महाराष्ट्र : महाराष्ट्र स्टेट एडाप्सन एक्शन प्लान ओं क्लाइमेट चेंज, हाईलाइट्स द मेन वर्रेन्बिलिटी एज “ लंबा अकाल बखत, हालेच मं बरसात मं बदलाव मं बढ़ोत्तरी अऊ (बरसात के) मात्रा मं कमी.”

ये ह कहिथे के भंडारा तऊन जिला मन मं सामिल हवय जिहां भारी बारिस मं 14 ले 18 फीसदी (मूल के बनिस्बत) बढ़त हो सकथे, अऊ मानसून बखत सूखा वाले दिन घला बढ़े के अंदाजा हवय. अध्ययन मं ये घला कहे गे हवय के नागपुर डिवीजन (जिहां भंडारा बसे हवय) बर अऊसत बढ़ोत्तरी (27.19 डिग्री के सलाना तापमान मं) 1.18 ले 1.4 डिग्री तक (2023 तक), 1.95 ले 2.2 डिग्री तक (20 50 तक) अऊ 2.88 ले 3.16 तक (2070 तक) होही. ये राज के कोनो इलाका बर सबले जियादा हवय.

भंडारा के कृषि अफसर मन घलो भारी पैमान मं बरसात के भरोसा ये जिला मं सुरुवाती बदलाव ला देखे हवंय, जेन ह अपन पारंपरिक तरिया, नदिया अऊ भरपूर बारिस सेती सरकारी साहित्य अऊ जिला के योजना मन ला अभू घलो एक ठन बढ़िया अपासी वाले इलाका के रूप मं बाँटथे. भंडारा के मंडलीय कृषि निरीक्षण अधिकारी, मिलिंद लाड कहिथे, “हमन जिला मं बारिस के ढेरियाय के सरलग रूप ला देखत हवन, जेन ह बोवई अऊ उपज ला नुकसान करथे. हमर तीर बरसात के 60-65 दिन होवत रहिस, फेर बीते दस बछर में, ये ह जून-सितंबर बखत मं 40-45 तक ले तरी मं आगे हवय.” वो ह बताथे के भंडार के कुछु इलाका मन मं –राजस्व वाले 20 ठन गाँव के मंडली- ह ये बछर जेठ अऊ असाढ़ मं बरसे के मुस्किल ले 6 धन 7 दिन देखे हवंय.

लाड बतावत जाथे, “गर मानसून ढेरियाइस, “त बढ़िया किसम के धान कमाय नइ सकव. धान के रोपा सेती थरहा ह 21 दिन होय के बाद , उपज ह हरेक दिन हेक्टेयर पाछू 10 किलो घर जाथे.”

खुर्रा बोनी के पारंपरिक तरीका – थरहा लगा के रोपा के बजाय बोनी के –जिला मं तेजी ले चलन मं आवत हवय. फेर रोपा के तरीका ले खेती के बनिस्बत खुर्रा बोवई ले बीजहा के कम जामे सेती उपज खराब हो सकथे. ओकर बाद, गर पहिली बरसात मं थरहा नइ जामिस, त जम्मो फसल गंवाय के बदला, किसान मन ला खुर्रा बोनी के बीजहा के नुकसान झेले ला पर सकथे.

लाड के मुताबिक, गरडा अऊ रावणवाडी के छोड़ भंडारा के धरगांव सर्कल के करीबन 20 ठन गाँव मं ये बछर पानी बने करके नई बरसीस – अऊ बीते कुछेक बछर मं घलो नइ होय रहिस. बारिस के आंकड़ा ले पता चलथे के भंडारा मं जून ले 15 अगस्त, 2019 तक 20 फीसदी कम बारिस होय रहिस, अऊ इहाँ 736 मिमी के जेन कुल जमा बरसात दरज करे गीस ( वो बखत के 852 मिमी के लंबा बखत के अऊसत मेर ले) वो ह 25 जुलाई के बाद होय रहिस. यानि के सावन के पहिली पाख मं जिला ह एक ठन बड़े कमी के भरपाई कर लीस.

येकर छोड़, ये बरसात भलेच असमान रहिस, भारतीय मौसम विज्ञान विभाग के सर्कल-वार आंकड़ा दिखाथे: भंडार दिग मं, तुमसर मं बढ़िया बारिस होईस: मंझा मं, धरगांव मं कमी देखे गीस: अऊ दक्खिन मं, पवनी मं कुछु जियादा बरसात होईस.

वइसे, मऊसम विभाग के आंकड़ा जमीन ले जुरे लोगन मन के गहिर ले देखे परखे ला नई दिखायवय: के बरसात तेजी ले आथे अऊ बनेच कम बखत बर आथे, कभू त कुछेक मिनट बर, वइसे बारिस ला नापे वाले जगा मं दिन भर के बारिस ला लिखे जाथे, बनिस्बत तापमान, घाम धन नमी ला लके गाँव के स्तर मं कोनो आंकड़ा नइ ये.

14 अगस्त मं कलेक्टर डॉ. नरेश गीते ह बीमा कंपनी ला निर्देश दीस के वो ह तऊन सब्बो किसान मन ला मुआवजा दे, जेन मन ये बछर अपन 75 फीसदी खेत मं बोवई करे नइ यें. सुरु के अनुमान मं कहे गे रहिस के अइसने किसान मन के आंकड़ा 1. 67 लाख अऊ बिन बुवाई वाले खेत 75, 440 हेक्टेयर होही.

सितंबर (भादों) तक, भंडारा मं 1,237.4 मिलीमीटर बरसात (जून ले सुरु होके) धन ये बखत बर अपन बनेच बखत के सलाना औसत के 96.7 फीसदी (1,280.2 मिमी) दरज करे गे रहिस. ये मं सबले जियादा पानी अगस्त अऊ सितंबर मं गिरे रहिस, जब जब जेठ-असाढ़ के पानी के भरोसे सियारी के बुवाई उपर पहिलीच ले असर परे चेके रहिस. ये बरसात ले रावणवाडी, गरडा जंगली, अऊ वाकेश्वर के मालगुजारी तरिया मन भर गे रहीं. कतको किसान मन अगस्त के पहिली हफ्ता मं एक पईंत अऊ बोय के कोसिस करिन, कुछू मं बौना किसिम के बीजहा लगाइन, वइसे उपज कम हो सकथे अऊ लुवई के सीजन के एक महिना अऊ, नवंबर (कार्तिक) के आखिर तक जा सकथे.

असाढ़ मं, 66 बछर के मारोती अऊ 62 बछर के निर्मला म्हस्के भारी हलाकान होइन. ओकर मनके कहना आय के अचानक बरसात ह जीना मुस्किल कर दे हे. लंबा बखत तक होवेइय्या बरसात के पहिली के समे –जन सरलग 4 धन 5 दिन तक ले झड़ी लगे रहय, अब नइ होवय. अब, वो ह कहिथे, बरसात तेज होथे – कुछेक घंटा बर भारी पानी गिरथे अऊ बीच बीच मं सुक्खा अऊ घाम बनेच दिन तक ले परत रहिथे.

करीबन 10 बछर तक ले, वो मन मृग नक्षत्र धन जेठ के सुरु ले असाढ़ के सुरु तक बढ़िया पानी गिरे ला नइ देखिन, इही बखत वो मन धान के थरहा बर बीजहा डारत रहिन अऊ 21 दिन के थरहा ला रोपा लगावत रहिन. कुंवार के आखिर तक ले, वो मन के धान लुवई लइक हो जावत रहिस. अब वो मन लुवई बर नवंबर अऊ कभू कभू अग्घन (दिसंबर) तक ले अगोरत रहिथे. ढेरीयाय बरसात ले एकड़ पाछू उपज मं असर करथे अऊ हरुना किसिम के धान के खेती कम हो जाथे.

जब मंय वो मन के गाँव वाकेश्वर गे रहेंय, वो बखत निर्मला ह बताइस, “ये बखत [असाढ़ के आखिर] तक हमन रोपा सिरो लेवत रहेन.” बनेच अकन आने किसान मन के जइसने, म्हस्के परिवार घलो बरसात ला अगोरत हवय, जेकर ले रोपा लगाय ला सकय. ओकर मन के मुताबिक, दू महिना बर, वो सात बनिहार मन बर कोनो काम-बूता नइ रहिस जेन मन ओकर खेत मं काम करथें.

म्हस्के परिवार के जुन्ना घर ओकर दू एकड़ के खेत मं बने हवय, जिहां वो मन साग-भाजी अऊ देसी धान कमाथें. परिवार करा 15 एकड़ जमीन हवय. मारोती म्हस्के ला अपन गाँव मं, चेत धरे फसल लगाय अऊ भारी उपज कमाय सेती जाने जाथे. फेर बरसात के बदलत तरीका, गिरे के बखत तय नइ होय मं बढ़त, कम जियादा गिरे ह, वो मन ला हलाकान करके राख दे हवय. वो ह कहिथे; “अपन फसल के तियारी कइसने करे जाय गर जब ये पता नइ के कब अऊ कतक पानी बरसही?”

पारी के बदलत मऊसम ऊपर केन्द्रित देश भर ले रिपोर्टिंग के प्रोजेक्ट, यूएनडीपी समर्थित तउन पहल के हिस्सा आय जऊन मं आम जनता अऊ ओकर जिनगी के अनुभव के जरिया ले पर्यावरन मं होवत बदलाव ला दर्ज करे जाथे.

अनुवाद: निर्मल कुमार साहू