मौसम के बदलत मिजाज से भंडारा के किसान परेशान

सूख के कड़ा हो गइल माटी में एगो छोट छेद में एगो मरल केकड़ा पड़ल बा. ओकर गोड़ ओकरी देह से अलग हो गईल बा. “इ कुल गर्मी से मरत बाड़ें सन,” अपनी पांच एकड़ के धान के खेत में बनल छेद देखावत देवेन्द्र भोंगाडे कहेलन.

अगर बरखा भईल रहित त आप देखती कि केकड़ा कुल झुण्ड में घूमत आ अंडा सेवत लउकितन सन, अपनी सूखल पीयर हरियर धान के खेत में खड़ा उ कहेलन. “हमार पौधा ना बचिहें सन,” अपनी खेत में खड़ा 30 बरिस के ए किसान के चिंतित आवाज आवेला.

उनकी गांव रावणवाडी 542 लोगन (जनगणना 2011 के अनुसार) के गांव हवे जहाँ किसान लोग मानसून के आगमन खातिर जून के पहिला पखवाड़ा में अपनी जमीन के छोटे छोटे टुकड़ा में बियाड़ (नर्सरी) बना के बीया डालेला. कुछ बेर तगड़ा बरखा होखला के बाद जब मेड़न से घिरल खांचा में गन्दा पानी जमा हो जायेला तब उ लोग 3 से 4 हफ्ता पुरान पौधन के अपनी खेत में रोपेला.

बाकिर मानसून के सामान्य शुरुआत के छव हफ्ता बाद भी ए साल 20 जुलाई ले रावणवाड़ी में बरखा ना भईल. भोंगाडे बतावेलन कि दू बेर बूंदाबांदी भईल रहे बाकिर उ पर्याप्त ना रहे. जवनी किसानन के लगे कुआं बा उ लोग धान के पौधन के पानी देवे पे प्रबंध करत रहे. अधिकतर खेतन पर काम ख़तम भईला के वजह से भूमिहीन मजदूर लोग दिहाड़ी के खोज में गांव छोड़ दिहल.

लगभग 20 किलोमीटर दूर गरडा जंगली गांव में लक्ष्मण बांटे भी पिछला कुछ समय से ए कमी से जूझ रहल बाड़ें. जून आ जुलाई बिना बरखा के बीत गईल, उ कहलें आ बाकी किसान लोग सहमति में मूड़ी हिलावल. उ लोग हर 2 से 3 बरिस में अपनी खरीफ के फसल से हाथ धो बईठेला.

बांटे उमिर के पचासवां फेंटा में बाड़ें आ अपनी बचपन के याद करत कहेलन कि तब पैटर्न अइसन ना रहे. बरखा लगातार होखे आ धान बढ़िया जामत रहे.

एही पैटर्न के हिस्सा 2019 भी रहे जहां सबकर बहुत नुकसान भईल. किसान लोग चिंता में बाड़ें. “हमार जमीन खरीफ में परती रहि जाई,” भयभीत नारायण उइके (जमीन पर बईठल: कवर फोटो देखीं) कहेलन. उ उमिर के 70वां फेंटा में बाड़ें आ अपनी 1.5 एकड़ के जमीन पर पिछला पचास साल के खेती कर रहल बाड़ें. उ आपन अधिकतर समय दिहाड़ी मजदूर के काम करत निकलले बाड़ें. “ई 2017 में परती रहे, 2015 में भी...” उ याद करेलन. पिछला बरिस भी बरखा देरी में अईला के वजह से हमरी बोआई में देरी भईल. उइके कहेलन कि देरी भईला से फसल आ आमदनी दूनो के नुकसान होला. जब किसान लोग बोआई खातिर मजदूरन के ना लगा पावेला त खेतिहर मजदूरी के काम भी दुर्लभ हो जाला.

भंडारा शहर से लगभग 20 किलोमीटर दूर भंडारा तालुका आ जिला में गरडा जंगली 496 लोगन के एगो छोट गांव हवे. रावणवाड़ी निहर एइजो अधिकतर किसान लोग एक से चार एकड़ के जमीन के मालिक बाड़ें आ सिंचाई खातिर बरखा पर निर्भर बाड़ें. बरखा ना भईल त फसल बरबाद, गोंड आदवासी उइके कहेलन.

ए साल के 20 जुलाई ले उनकरी गांव के लगभग हर खेत में बोआई ना हो पाईल काहें कि नर्सरिन में लागल पौधा सूखे लागल रहे.

बाकिर दुर्गाबाई दिघोरे के खेत पर अधपकल धान के पौधन के बोये खातिर खूब भीड़ रहे. उनकी परिवार के एगो जमीन पर बोरवेल बा. गरडा में खाली चार या पांच किसानन के लगे ई सुविधा बा. ओ लोगन के 80 फीट के खोदल कुआं सूख गईल त दिघोरे परिवार के लोग दू साल पहिले कुआं के भीतर 150 गहिर बोरवेल खोदल. जब 2018 में इहो सूख गईल त उ लोग एगो नया बोरवेल बनवलें.

बांटे कहेलन कि बोरवेल एइजा खातिर एगो नया चीज हवे आ कुछ साल पहिले ले एइजा देखाई ना पड़े. “पहिले बोरवेल खोदे के कवनो जरूरते ना रहे,” उ कहेलन. “अब पानी मिलल मुश्किल हो गईल बा त लोग खोद (बोरवेल) रहल बा.”

बांटे बतावेलन कि गांव के आसपास दू गो छोट मालगुजारी तालाब भी मार्च 2019 से सूखल बा. आमतौर पर सूखा मौसम में भी ओमे थोड़ा पानी रहे. उनकर अनुमान बा कि बोरवेल के बढ़त संख्या तालाब से भूजल के दूर कर देले बा.

पानी बचाए वाला इ तालाब सब 17वीं सदी के अंत से लेके 18वीं सदी के मध्य ले विदर्भ के धान उगावे वाला पूर्वी जिलन में स्थानीय राजा लोगन के देखरेख में बनवावल गइल रहे. महाराष्ट्र बने के बाद राज्य सिंचाई विभाग बड़ तालाबन के देखभाल आ चलावे के जिम्मा लिहलस. आ जिला परिषद छोट तालाबन के जिम्मा ले लेलक. ए जलाशय सब के देखभाल इलाका के समुदाय के लोग करेला आ एकर उपयोग मछरी पाले आ सिंचाई के काम में कईल जाला. भंडारा, चन्द्रपुर, गढ़चिरोली, गोंदिया, आ नागपुर जिला में लगभग 7,000 तालाब अइसन बा. बाकिर अधिकतर बहुत समय से उपेक्षित आ खराब हालत में बा.

बांटे कहेलन कि बहुत सा युवा लोग भंडारा सिटी, नागपुर, मुंबई, पुणे, हैदराबाद, रायपुर आदि जगहन पर चलि गईल बा. ओइजा उ लोग ट्रक क्लीनर, यात्रा करे वाला मजदूर, खेतिहर मजदूरी चाहे जवन काम मिल जाए ओके करिहें.

लोगन के बढ़त पलायन ओइजा के आबादी में देखल जा सकेला: जनगणना 2001 से 2011 के बीच में महाराष्ट्र के जनसंख्या में 15.99 प्रतिशत के वृद्धि भईल जबकि भंडारा के जनसंख्या खाली ए बीच 5.66 प्रतिशत बढ़ल. इहां बातचीत में आवे वाला प्रमुख कारण इहे बा कि लोग खेती में बढ़त अनिश्चितता, खेती के घटत काम आ बढ़ रहल खर्चा पूरा ना कर पावे के चलते पलायन कर रहल बा.

भंडारा बड़ पैमाना पर धान उगावे वाला जिला हवे जवन जंगलन से घिरल बा. एइजा वार्षिक औसत बरखा 1,250 मिलीमीटर से ले के 1,500 मिलीमीटर (केन्द्रीय भूजल बोर्ड के एगो रिपोर्ट के अनुसार) होखेला. बारहमासी वैनगंगा नदी सात तालुका वाला ए जिला से हो के बहेले. विदर्भ सिंचाई विकास निगम के अनुसार भंडारा में मौसमी नदी आ आ लगभग 1,500 मालगुजारी के तालाब भी बाटे. मौसमी प्रवास के एइजा एगो लम्बा इतिहास रहल बा बाकिर पश्चिमी विदर्भ के कई जिलन के उलट, भंडारा में बड़ पैमाना पर किसानन के आत्महत्या के कवनो खबर नईखे.

मात्र 19.48 प्रतिशत शहरीकरण संघे ई छोट आ सीमांत किसानन के कृषि प्रधान जिला हवे. इहंवा के लोग आपन जमीन आ खेतिहर मजदूरी से कमाई करेला. बाकिर बरियार सिंचाई ब्यवस्था ना होखे से इहां खेती बड़ स्तर पर बरखा पर निर्भर बाटे; अक्टूबर के बाद कुछ खेतन खातिर तालाब में मानसून के आखिर में पानी होला बाकिर उ पूरा ना पड़े.

कइएक रिपोर्ट बतावत बा कि मध्य भारत, जहां भंडारा स्थित बा, ओइजा जून से सितम्बर ले मानसून के कमजोर भईला के संघे भारी से बहुत जादे भारी बरखा देखल जा रहल बा. पुणे के इंडियन इंस्टिट्यूट ऑफ़ ट्रॉपिकल मेटरोलॉजी के तरफ से 2009 में कईल गईल एगो पड़ताल में अइसन बात कहल गईल बा. विश्व बैंक के 2018 के एगो अध्ययन में भंडारा जिला भारत के शीर्ष 10 जलवायु हॉटस्पॉट में गिनल गइल बा, बाकी के नौ जिला विदर्भ, छत्तीसगढ़ आ मध्य प्रदेश के हवे जवन कुल मध्य भारत में बा. एह पड़ताल में कहल गईल बा कि ‘जलवायु हॉटस्पॉट अइसन जगह हवे जहां औसत मौसम में बदलाव के जीवन स्तर पर खराब असर पड़ी. अध्ययन में भारी आर्थिक झटका के चेतावनी दिहल गईल बा. जदि इहे हालात जारी रही, त ए हॉटस्पॉटन में रहे वाला लोगन के बहुते बड़ आर्थिक झटका के सामना करे पड़ सकेला.

रिवाइटलाइजिंग रेनफेड एग्रीकल्चर नेटवर्क, भारत मौसम विज्ञान विभाग के बरखा के आंकड़ा के आधार पर, 2018 में महाराष्ट्र पर एगो फैक्ट शीट तइयार कईले रहे. एमे साफ कईल गईल बा, पहिला कि 2000 से 2017 के बीच विदर्भ के लगभग कुल जिलन में सूखा के घटना आ गंभीरता बढ़ल बा. दूसरा कि बरखा के दिनघटल बा, एकरा बावजूद लंबा समय के सलाना औसत बरखा लगभग समान बा. मतलब एह क्षेत्रन में कम दिन में एतना बरखा हो जाता, जेसे फसलन के बढ़त पर असर पड़ रहल बा.

द एनर्जी एंड रिसोर्सेज इंस्टीट्यूट (टेरी) के ओर से 2014 में कईल गईल एगो बिस्लेषण के अनुसार: “बरखा के 1901-2003 तक के आंकड़ा देखल जाओ त पता चलेला कि जुलाई में मानसून के बरखा के हिस्सा (राज्य भर में) घट रहल बा, जबकि अगस्त में बरखा बढ़ रहल बा... एकरी अलावा मानसून के बरखा में, खासतौर पर शुरू के आधा समय (जून आ जुलाई), अत्यधिक बरखा के घटना बढ़ रहल बा.

'महाराष्ट्र में जलवायु परिवर्तन के खतरा आ अनुकूलन रणनीति: जलवायु परिवर्तन पर महाराष्ट्र राज्य अनुकूलन कार्य योजना' नाम से भइल अध्ययन में विदर्भ खातिर कुछ बिंदु पर ध्यान खींचल गइल बा. एह में “लम्बा समय ले सूखा के स्थिति, बरखा के बदलाव में हालिया वृद्धि आ कमी (बरखा के मात्रा)” के सबले बड़ समस्या मानल गईल बा.

अध्ययन कहत बा कि भंडारा ओ जिलन के समूह में शामिल बा जहां भारी बरखा 14 से 18 प्रतिशत ले बढ़ सकेला (पुरान आधार पर). संघही मानसून में सुखाड़ भी बढ़े के सम्भावना बा. अध्ययन में इहो कहल गईल बा कि नागपुर डिविजन (जहां भंडारा स्थित बा) खातिर औसत वृद्धि (27.19 डिग्री के सालाना औसत तापमान पर) 1.18 से 1.4 डिग्री (2030 ले), 1.95 से 2.2 डिग्री (2050 ले) आ 2.88 से 3.16 डिग्री (2070 ले) रही. इ बढ़त राज्य के कवनो हिस्सा में सबसे अधिका बा.

भंडारा के कृषि अधिकारी लोग भी इ बदलाव देखत बा. इ जिला जवन बड़ स्तर पर बरखा पर निर्भर बा, सरकारी कागज आ जिला योजना में अबहियो ‘अच्छा सिंचाई वाला इलाका’ मानल जाला. ई नाम पारंपरिक तालाबन, नदी आ पर्याप्त बरखा के वजह से मिलल बा. भंडारा के डिविजनल सुपरिटेंडेंट एग्रीकल्चर अधिकारी मिलिंद लाड कहेलन, “हमनी के जिला में बरखा देरी से अईला के एगो लगातार प्रवृत्ति देख रहल बानी जा जेसे बोआई आ पैदावार के नुकसान होखेला. पहिले 60-65 दिन ले बरखा होखत रहत रहे बाकिर पिछला दस बरिस में ई जून से सितंबर के बीच में, घट के 40-45 दिन रहि गईल बा.” भंडारा के 20 गांवन के समूह में कुछ इलाका में ए साल जून जुलाई में मात्र 6 से 7 दिन ले बरखा बरसल ह, उ बतावेलन.

“मानसून में देरी भईल त बढ़िया चावल ना उगावल जा सकेला,” लाड कहेलन. “बियाड़ के 21 दिन के बाद धान के रोपाई में देरी भईला पर रोज प्रति हेक्टेयर 10 किलो उत्पादन कम हो जाला.”

पहले बियाड़ लगावे फिर पौधन के रोपाई करावे के जगह बोआई के पुरनका तरीका– बीया के माटी में छींटल फिर से लौट रहल बा. लेकिन प्रत्यारोपण विधि के उलट अंकुरण के कम दर के वजह से ए विधि में पैदावार खराब हो सकेला. तब्बो पहिला बरखा के बाद अगर पौधा नर्सरी में ना ऊगल त पूरा फसल खराब भईला के जगह ए बोआई में किसानन के कम नुकसान क सामना करे के पड़ सकेला.

लाड बतावेलन कि गराडा आ रावणवाड़ी के अलावा भंडारा के धारगांव सर्कल के लगभग 20 गांवन में ए साल बढ़िया बरखा ना भईल ह, आ ना कई साल से होता. बरखा के आंकड़ा बतावता कि भंडारा में जून से 15 अगस्त, 2019 ले कुल मिला के 20 प्रतिशत कम बरखा भईल ह आ ओमे से 736 मिलीमीटर (ओ समय खातिर दीर्घकालिक औसत खातिर 852 मिलीमीटर) बरखा यानि बड़ हिस्सा 25 जुलाई के बाद दर्ज भईल ह. यानि अगस्त के पहिले पखवाड़ा में जिला एगो बड़ कमी से पार पा लिहलस.

भारतीय मौसम विभाग के सर्कल आधारित आंकड़ा से पता चलता कि ई बरखा भी आसमान भईल बा. उत्तर में स्थित तुमसर में बढ़िया बरखा भईल बा, धरगांव मध्य में बा जहां कमी देखल गईल आ दक्षिण में पौनी में फिर कुछ बढ़िया बौछार पड़ल.

हालांकि विभाग के आकंड़ा जमीनी तौर पर लोग के छोट-छोट अनुभव ना देखावे. लोग कहेला कि बरखा बहुत कम समय में बहुत कम अवधि खातिर होला, कबो कबो त कुछ मिनट खातिर. तब्बो बरखा नापे वाला मशीन में बरखा के पूरा दिन के हिसाब से दरज कइल जाला. गांव स्तर पर तापमान, गरमी आ नमी के कवनो जानकारी मौजूद नईखे.

जिलाधिकारी डॉ. नरेश गीते 14 अगस्त के बीमा कंपनी के निर्देश दिहलें कि उ कुल अइसन किसानन के मुआवजा देवे जे अपनी 75 प्रतिशत जमीन पर बोआई नईखे क पावल. शुरुआती अनुमानन में कहल गईल रहे कि अइसन किसानन के संख्या 1.67 लाख होखी जिनके लगे 75,440 हेक्टेयर के बिना बोआई वाला क्षेत्र होखी.

सितम्बर ले भंडारा में 1,237 मिलीमीटर बरखा (जून से शुरू) दर्ज कईल गईल रहे जवन ए अवधि खातिर दीर्घकालिक वार्षिक औसत (1,280.2 मिलीमीटर) के 96.7 प्रतिशत बाटे. ए बरखा के अधिकांश हिस्सा अगस्त आ सितम्बर में आईल आ जून-जुलाई के बरखा पर निर्भर खरीफ के बोआई पहिले से प्रभावित हो गईल रहे. बरखा से वाकेश्वर, गरडा जंगली आ रावणवाड़ी में मालगुजारी तालाब भर गईल. कई किसान लोग अगस्त के पहिला हफ्ता में फिर से प्रयास कईल, कुछ किसान एमे जल्दी जामे वाला बिचड़ा (धान के बीया) बोअलें. एतना के बावजूद फसल कम हो सकेला आ खेत कटला के समय एक महीना आगे खिसक के नवम्बर के आखिर तक जा सकेला.

जुलाई में फिर मारोती (66) आ निर्मला म्हास्के (62) तकलीफ में बा लोग. अप्रत्याशित बरखा के हिसाब से रहल कठिन काम बा, उ कहेलन. पहिले लम्बा चले वाला बरखा कबो 4 दिन त कबो 5 दिन ले चले आ कबो 7 दिन ले भी बाकिर अब अइसन नईखे. अब लोग बतावेला कि तेज बरखा बरसला, कुछ घंटा खातिर खूब तेज बरसेला फिर उहे सूखा अ गर्मी के लम्बा दौर चालू हो जाला.

लगभग एक दशक से उ लोग मृग नक्षत्र यानि जून के शुरुआत से जुलाई के शुरुआत के समय के बीच में बढ़िया बरखा के दर्शन नईखे पवले. इहे उ समय होत रहे जब उ अपनी धान के बियाड़ के बोआई करें आ 21 दिन के पौधा के रोपाई पानी में डूबल जमीन पर करें. अक्टूबर के अंत ले उनकर धान कटाई खातिर तैयार होत जात रहे. अब उ लोग फसल के कटाई खातिर नवम्बर आ कबो कबो दिसम्बर तक ले भी इंतजार करेला. देरी से भईल बरखा प्रति एकड़ पैदावार पर असर डालेला. एसे लम्बा अवधि के उत्तम गुणवत्ता वाला चावल के किसिम के खेती के ओ लोगन के विकल्प सीमित होखत जाता.

जब हम उनकी गांव वाकेश्वर के दौरा कईनी तब उ बतवली, “ए समय (जुलाई के अंत) ले हमनी के आपन रोपाई के काम पूरा कर लेईं जा. बहुते दोसर किसान, जइसे म्हास्के परिवार भी बरखा के इंतजार करता ताकि उनकी खेत में पौधन के रोपाई कईल जा सके. उ बतवलें कि दू महिना तक उनकी खेत पर काम करे वाला सात गो मजदूरन खातिर कवनो काम ना रहे.

म्हास्के परिवार के पुरान घर उनकी दू एकड़ के खेत पर बनल बा. इहां उ सब्जी आ धान के देसी किसिम उगावेलन. परिवार के लगे 15 एकड़ जमीन बा. मारोती म्हास्के के अपनी गांव में सावधानीपूर्वक फसल योजना बनावे आ उच्च पैदावार खातिर जानल जाला. बाकिर बरखा के बदलत ढंग, बढ़त अनियमित व्यवहार आ बरसला में असमानता के वजह से उ परेशानी में बाड़ें. उ कहेलन, “आप अपनी फसल के योजना कैसे बनाइब जब आपके पते नईखे बरखा कब आ केतना होखी?”

पारी के जलवायु परिवर्तन पर केंद्रित राष्ट्रव्यापी रिपोर्टिंग के प्रोजेक्ट, यूएनडीपी समर्थित ओ पहल के हिस्सा हवे जेकरी तहत आम जनता और उनकी जीवन के अनुभवन के द्वारा पर्यावरण में हो रहल अइसन बदलावन के दर्ज कईल जाला.

अनुवाद: विमल चन्द्र पाण्डेय