بارشی میں بینک فراڈ

دسمبر ۲۰۲۱ کی ایک سرد صبح کو جب امر تھوربولے اپنی بائیک پر سوار ہوئے تھے، تو سڑکوں پر کہرے کی دبیز چارد تنی ہوئی تھی۔ ان کی منزل ۷۰ کلومیٹر کی دوری پر واقع سولاپور (مہاراشٹر) کے ضلع پولیس چیف کا دفتر تھی۔ وہ اپنے ساتھ ڈیزل کی کین اور ماچس کی ایک ڈبیہ لے کر چلے تھے۔

تھوربولے نے اپنی بائیک کھڑی کی، آہستہ سے کین کا ڈھکن کھولا اور پولیس اسٹیشن کی طرف قدم بڑھاتے ہوئے خود پر ڈیزل انڈیلنے لگے۔ انہوں نے ماچس جلائی۔ پہلے ماچس کی سنسناہٹ گونجی، پولیس بعد میں آئی۔

اس واقعہ سے قبل کے دو مہینوں میں ۳۸ سالہ تھوربولے کے آبائی شہر بارشی میں ریکروری (قرض اگاہی والے) ایجنٹ ان کو اور ان کے اہل خانہ کو دھمکیاں دے رہے تھے، اور ان سے اس قرض کا تقاضہ کر رہے تھے، جس کی رقم ان کی مانگی گئی رقم سے پانچ گنا زیادہ تھی۔ پولیس ان کے معاملے کی تفتیش سے انکار کر رہی تھی، کیونکہ جن لوگوں نے مبینہ طور پر ان کے ساتھ دھوکہ دہی کی تھی، وہ سیاسی اثر و رسوخ والے لوگ تھے۔

ایک سال قبل، مئی ۲۰۲۰ میں، مرہٹہ برادری سے تعلق رکھنے والے تھوربولے نے اپنے ناشتے کے کاروبار کو مزید وسعت دینے کا منصوبہ بنایا تھا۔ انہوں نے اپنی بچت کا ایک بڑا حصہ استعمال کرتے ہوئے زمین کا ایک پلاٹ خریدا۔ ان کا ارادہ اس اسٹال پر پہلے سے پیش کیے جانے والے ناشتے، جیسے پوہا اور وڑا کے ساتھ ساتھ مصالحے بھی فروخت کرنے کا تھا۔ وہ اس پلاٹ پر ایک اسٹوریج یونٹ بھی بنانا چاہتے تھے۔

تھوربولے نے ۵ لاکھ روپے کا قرض لینے کا فیصلہ کیا۔ اس کے لیے انہوں نے شیو شکتی اربن کوآپریٹو بینک میں دراخواست دی۔ اس بینک کا انتخاب انہوں نے اس لیے کیا کیونکہ برانچ مینیجر گنیش بارنگولے ان کے سابقہ آجر یوراج بارنگولے کے بزنس پارٹنر تھے۔

اس واقفیت کا تنیجہ یہ ہوا کہ جب گنیش نے تھوربولے سے یہ کہہ کر دوبارہ کاغذات پر دستخط کرنے کو کہا کہ ’’پچھلی درخواست میں ایک غلطی رہ گئی تھی،‘‘ تو تھوربولے اور ان کی بیوی دونوں نے اسے ایک عام اور دفتری معاملہ سمجھ لیا۔

جولائی (۲۰۲۰) کے اوائل میں گنیش نے انہیں مطلع کیا کہ قرض منظور ہوگیا ہے اور ان سے قرض کی قسطوں کی ادائیگی کی ضمانت کے طور پر دستخط شدہ ۱۰ بلینک چیک جمع کرانے کو کہا۔

اس جوڑے نے بغیر کسی ردوکد کے حکم کی تعمیل کی۔ ’’ہمارے اچھے تعلقات تھے،‘‘ تھوربولے کی بیوی، سجاتا (۳۴) کہتی ہیں، ’’ہم نے ان [گنیش اور یوراج] پر بھروسہ کیا۔‘‘

یہ بھروسہ ایک سال تک قائم رہا، لیکن پھر قرض ریکوری ایجنٹ ان کے گھر میں گھس آئے اور سجاتا کو دھمکی دی کہ اگر تھوربولے نے اپنے ۲۵ لاکھ روپے کے ہاؤسنگ لون (مکان کے قرضے) کی ادائیگی جاری نہ رکھی، تو بینک ان کی جائیداد ضبط کر لے گا۔ ’’میں الجھن میں پڑ گئی تھی،‘‘ وہ کہتی ہیں۔

تھوربولے، جنہوں نے صرف نویں جماعت تک تعلیم حاصل کی ہے، حیران تھے۔ انہوں نے سوچا کہ ایسا کسی غلط فہمی کے باعث ہوا ہے۔ وہ فوراً بینک کی طرف بھاگے۔ وہاں گنیش نے مبینہ طور پر دو ٹوک انداز میں تھوربولے کو بتایا کہ اس نے بزنس لون کی درخواست کو تھوربولے کے نام پر ہاؤسنگ لون میں تبدیل کر دیا تھا، اور اس میں سے کچھ رقم اپنے ذاتی کاروبار کے لیے نکال لی تھی۔

تھوربولے ہکا بکا رہ گئے۔ انہوں نے گنیش سے باز پرس کی تو انہیں انتہائی حقارت آمیز جواب ملا۔ ’’تم ہمارے ریستوراں میں برتن دھوتے تھے،‘‘ گنیش نے جواب دیا۔ ’’تم ہوتے کون ہو ہم سے سوال کرنے والے؟‘‘

گھبراہٹ میں تھوربولے نے پولیس سے رجوع کرنے کی دھمکی دی اور بینک سے باہر نکلنے لگے۔ لیکن بینک کے چند ملازمین نے انہیں راستے میں ہی پکڑ لیا اور ڈھکے چھپے انداز میں دھمکی دے ڈالی۔ ’’بات کا بتنگڑ نہ بناؤ،‘‘ تھوربولے اس گفتگو کو یاد کرتے ہوئے کہتے ہیں۔ ’’تمہارے لون اکاؤنٹس دو مہینے کے اندر درست کر دیے جائیں گے۔‘‘ تھوربولے یہ سوچ کر راضی ہو گئے کہ ان کے پاس زیادہ متبادل نہیں ہے۔ وہ ایک عام آدمی تھے اور جن لوگوں سے اس کا سابقہ پڑا تھا ان کا شہر میں اچھا خاصا اثر و رسوخ تھا۔

گنیش بارنگولے نے تھوربولے کے بیان کی تردید کی۔ ’’اس نے خود اپنی درخواست میں قرض کی رقم ۵ لاکھ روپے سے بڑھا کر ۲۵ لاکھ روپے کروائی تھی،‘‘ وہ کہتے ہیں۔ ’’ہم خود اس طرح کی ترمیم کیسے کر سکتے تھے؟‘‘

تاہم، ۳۰ دسمبر ۲۰۲۱ کو گنیش نے پولیس کے سامنے اعتراف کر لیا کہ انہوں نے، اپنے دو ساتھیوں کے ساتھ مل کر، اس فراڈ کو انجام دیا تھا اور بینک اور اس کے صارفین کے پیسوں کا غبن کیا تھا۔ جب گنیش سے حلف نامہ کے بارے میں پوچھا گیا تو انہوں نے لاعلمی کا اظہار کیا، اور جب اس رپورٹر نے انہیں پیغام بھیجا، تو انہوں نے کوئی جواب نہیں دیا۔

اس کے فوراً بعد تھوربولے اس مالی دلدل سے باہر نکلنے کے لیے در در کی خاک چھاننے لگے جس میں انہیں دھوکہ سے دھکیلا گیا تھا۔ وہ بڑی امید کے ساتھ پولیس اسٹیشن پہنچے۔ لیکن، ’’ہم سے کہا گیا کہ ہم انہیں ناراض نہ کریں۔ وہ سیاسی تعلقات رکھنے والے بااثر لوگ ہیں،‘‘ سجاتا یاد کرتے ہوئے کہتی ہیں۔

پوری طرح سے ناامید تھوربولے خود سوزی کی تیاری کے ساتھ سولاپور تھانے میں داخل ہوئے تھے۔

مہاراشٹر تقریباً ۴۸۹ کوآپریٹو بینکوں کا ٹھکانہ ہے، جن کا مقصد ایسے لوگوں کو بینک کی خدمات فراہم کرنا ہے جنہیں بڑے بینکوں تک رسائی حاصل نہیں ہے۔ یہ بینک کم آمدنی والے طبقوں، خاص طور پر دستکاروں اور کسانوں کو، سستا قرض فراہم کرنے کے لیے قائم کیے گئے تھے۔

راجیہ سبھا کے ریکارڈ کے مطابق ۲۰۲۰ کے بعد ہندوستان کے سرکاری شعبے کے بینکوں نے بڑی صنعتوں اور سروسز کے ذمے واجب الادا ۳ لاکھ کروڑ روپے سے زیادہ کے قرضے معاف کیے ہیں، جس کی وجہ سے قرض دینے کی ان کی صلاحیت کمزور ہوئی ہے۔

چھوٹے کوآپریٹو بینک ان سے بھی بدتر حالت میں ہیں۔

مقامی سیاسی رہنماؤں کے دباؤ میں آ کر بہت سے کوآپریٹو بینکوں نے مناسب چھان بین کے بغیر بڑے تاجروں کے چینی ملوں، کپڑا ملوں اور تعمیراتی کمپنیوں کو کم شرحِ سود پر قرضے دیے ہیں، جس کے نتیجہ میں ان کے ناقابل وصول قرضوں (بیڈ لون) اور نقصانات میں اضافہ ہوا ہے۔ بڑے پیمانے پر سیاسی مداخلت اور اثاثوں میں غبن کی وجہ سے کئی کوآپریٹو بینک دیوالیہ پن کے دہانے پر پہنچ چکے ہیں؛ جبکہ دوسرے بہت سے بینک کسی نہ کسی طرح اپنا کام جاری رکھے ہوئے ہیں۔

شیو شکتی اربن کوآپریٹو بینک اس تشویشناک خرابی کی جانب اشارہ کرتا ہے، جس سے کوآپریٹو بینکنگ کا شعبہ دوچار ہے۔

سابق شیو سینا رکنِ پارلیمنٹ شیواجی کامبلے کی عنایتوں سے ۱۹۹۸ میں قائم ہونے والا یہ بینک، بارشی میں واقع ایک تعلیمی ادارہ شیواجی شکشن پرسارک منڈل کے دو کمروں میں قائم کیا گیا تھا۔ ادارہ کے نائب صدر اور بینک کے شیئر ہولڈر ممبر نند کمار جگدالے کا کہنا ہے کہ یہاں کام کرنے والے ملازمین ہی بنیادی طور پر بینک کے شیئر ہولڈرز ہوتے ہیں۔

کامبلے کی خواہش تھی کہ تعلیمی ادارہ کے ملازمین کے پاس ایک ایسا بینک ہو جسے وہ اپنا کہہ سکیں۔ لیکن وقت گزرنے کے ساتھ بینک نے مزید شیئر ہولڈرز کو اپنے ساتھ شامل کر لیا اور ’’آج یہ بینک راجیندر راؤت اور ان کے قریبی ساتھیوں کے اثر و رسوخ کے تحت کام کرتا ہے،‘‘ جگدالے کہتے ہیں۔ راؤت بھارتیہ جنتا پارٹی کے سابق رکنِ اسمبلی ہیں، اور ۲۲ جون ۲۰۲۶ کو ایم ایل سی بن چکے ہیں۔ اس رپورٹر نے اس پورے معاملہ پر راؤت سے رابطہ کرنے کی کوشش کی۔ ان کا جواب ملنے پر اسٹوری کو اپ ڈیٹ کر دیا جائے گا۔

تقریباً ایک سال بعد، ۲۰۲۲-۲۳ میں پونے کے ایک آزاد چارٹرڈ اکاؤنٹنگ فرم ششانک پٹکی اینڈ ایسوسی ایٹس نے بینک کا آڈٹ کیا۔ ان کی یہ رپورٹ بعد میں بارشی کی سیشن کورٹ میں مقامی سماجی کارکن منیش دیش پانڈے کی جانب سے دائر کردہ ایک مقدمہ کی بنیاد بنی۔

رپورٹ کے مطابق راؤت اور ان کی فیملی کو ۹ کروڑ روپے سے زیادہ کا قرض دیا گیا، جبکہ بینک کے ذریعہ رقم کی ترسیل کی آخری حد صرف ۳ء۳ کروڑ روپے تھی – یعنی انہیں تین گنا زیادہ پیسہ دیا گیا۔

تاہم، گنیش نے کہا کہ یہ قرضے این پی اے (غیر فعال اثاثے) نہیں بنے ہیں۔ انہوں نے مزید کہا کہ انصاف کی بات یہ ہے کہ بینک نے راؤت سے متعلق کئی کھاتے بند کر دیے ہیں۔ انہوں نے کہا، ’’شروع میں ہمارے پاس ان کے اور ان کے اہل خانہ کے ۱۱ کھاتے تھے، جو اب کم ہو کر صرف پانچ رہ گئے ہیں۔‘‘

آڈٹ میں بینک کی جانب سے دیے گئے دو مزید قابلِ اعتراض انفرادی قرضوں کی نشاندہی کی گئی۔ راؤت اور یوراج دونوں نے ۳ء۳ کروڑ روپے کا قرض حاصل کیا، جبکہ قرض لینے کی ان کی ذاتی حد ۲ کروڑ روپے سے کم تھی۔

آڈٹ میں مزید سنگین بے ضابطگیوں اور بدعنوانیوں کی نشاندہی کی گئی۔ مناسب کاغذی کارروائی کے بغیر ۴۱ کروڑ روپے سے زیادہ کی مالیت کے ۶۰ سے زیادہ قرضے اور کیش کریڈٹ جاری کیے گئے تھے۔ آڈٹ میں یہ بات بھی واضح کی گئی کہ ان میں سے کئی معاملات میں بینک نے قرض کے لیے ضروری تنخواہ کی پرچیاں، ضمانت یا انکم ٹیکس ریٹرن تک طلب نہیں کیے تھے۔ کچھ معاملات میں تو ماہانہ قسط، قرض لینے والے کی ماہانہ تنخواہ سے بھی زیادہ تھی۔

جب بینک کے بورڈ کے ممبران نے ستمبر ۲۰۲۴ کی ایک جنرل باڈی میٹنگ میں بینک کے کام کاج کے طریقے پر سوال کھڑے کیے، تو جگدالے کی سربراہی میں ایک انکوائری کمیٹی تشکیل دی گئی۔ اس نے جو رپورٹ پیش کی وہ چونکا دینے والی تھی۔

انکوائری رپورٹ میں کہا گیا ہے کہ بارشی برانچ کے مینیجر گنیش بارنگولے، ان کے کاروباری شراکت دار یوراج بارنگولے اور بینک کے چیئر پرسن کے بیٹے سُیوگ برگوٹے نے اپنے ذاتی کاروبار کے لیے بینک کی رقم استعمال کی۔ رپورٹ میں آٹھ اداروں کو دیے گئے ۲۵ کروڑ روپے سے زیادہ کے مشکوک قرضوں کی تفصیلات دستاویزی ثبوتوں کے ساتھ فراہم کی گئی ہیں۔ یہ تمام ادارے براہِ راست یا بالواسطہ طور پر مذکورہ تینوں افراد سے منسلک ہیں، اور ان میں ریئل اسٹیٹ کا ایک ایسا کاروبار بھی شامل ہے، جس سے تھوربولے نے اپنا پلاٹ خریدا تھا۔

ایک موقع پر بینک نے ۲۰۲۳ میں ایک کاروباری ادارہ، ہوٹل سینٹرو کو ۴ء۱ کروڑ روپے کا قرض دیا، جس کی ماہانہ قسط ۹ء۱ لاکھ روپے بنتی تھی، جبکہ ہوٹل کی ماہانہ آمدنی محض ۴۳ ہزار روپے تھی۔ گنیش اور یوراج دونوں اس ہوٹل میں شراکت دار ہیں۔ اسی طرح ہوٹل روتو لاج کو بھی۴ء۱ کروڑ روپے کا قرض دیا گیا، جس کی ماہانہ قسط ۹ء۱ لاکھ روپے تھی، جبکہ اس ہوٹل کی ماہانہ آمدنی ۳۶ ہزار روپے تھی۔ ایک اور معاملہ میں ایک اسٹون کرشر یونٹ (پتھر توڑنے والی یونٹ) کو ۱۵ء۲ لاکھ روپے کی ماہانہ قسط پر ۱ء۱ کروڑ روپے دیے گئے، جبکہ اس یونٹ کی ماہانہ آمدنی ۷۱ ہزار روپے سے کچھ ہی زیادہ تھی۔

’’یہ کاروبار یہ نہیں دکھاتے ہیں کہ ان کی اصل آمدنی کیا ہے،‘‘ گنیش نے واضح طور پر حقائق بیان کرتے ہوئے کہا۔ ’’لیکن ہم مقامی لوگ ہیں۔ ہم جانتے ہیں کہ ان کی مالی حیثیت کیا ہے۔ اسی لیے ہم نے یہ قرض فراہم کیے۔‘‘ انہوں نے کہا کہ جگدالے کی رپورٹ میں بتائی گئی ماہانہ آمدنی محض کاغذی اعداد و شمار ہیں، اور اس سے بھی اہم بات یہ ہے کہ ریزرو بینک آف انڈیا (آر بی آئی) کو ان کے کام کاج میں کوئی خامی نظر نہیں آئی ہے۔

اب پیچھے مڑ کر دیکھنے پر تھوربولے کو یہ بات سمجھ میں آئی کہ جب انہوں نے اپنی قرض کی درخواست کی فائل دیکھنے کا مطالبہ کیا تھا، تو بینک کے ایک ملازم نے ان پرغصہ کیوں ظاہر کیا تھا۔ ان سے کہا گیا تھا، ’’شکر منائیں کہ آپ کو قرض مل رہا ہے۔‘‘ بعد میں تھوربولے کے گھر میں زبردستی داخل ہونے والے ریکوری ایجنٹسس دراصل وہ رقم واپس کرنے کے لیے ان پر دباؤ ڈال رہے تھے جسے گنیش اور یوراج نے مبینہ طور پر غبن کر لیا تھا۔

تھوربولے کے بینک اسٹیٹمنٹ سے معلوم ہوتا ہے کہ ان کی جانب سے ۵ لاکھ روپے کے قرض کی درخواست دیے جانے کے بعد، تین ماہ کے اندر متعدد قسطوں میں ان کے اکاؤنٹ میں ۲۹ لاکھ روپے سے کچھ زیادہ رقم جمع کی گئی۔ تاہم، کئی مواقع پر جمع کی گئی یہ پوری کی پوری رقم اسی دن یوراج کے اکاؤنٹس میں منتقل کر دی گئی تھی۔ دیگر مواقع پر یہ رقم چیک کے ذریعہ نکال لی گئی۔ اس طرح تھوربولے کا اکاؤنٹ تیزی سے خالی کر دیا گیا۔ ان کا کہنا ہے کہ انہوں نے اس عرصہ میں صرف ۲۵ء۲ لاکھ روپے نکالے تھے۔

تھوربولے نے کہا کہ اس لین دین پر ان کا دھیان اس لیے نہیں گیا کیونکہ انہیں اپنے فون پر ایس ایم ایس اطلاعات نہیں ملتی ہیں، اور پاس بک کے ذریعہ تفصیلات کی تصدیق کرنا مشکل تھا، کیونکہ کووڈ۔۱۹ کی وبا کے دوران، بینک کے عملہ کے ساتھ بات چیت پر پابندیاں عائد تھیں۔

سماجی کارکن دیش پانڈے نے بھی بینک میں ہونے والی بے ضابطگیوں کے خلاف بارشی پولیس اسٹیشن میں ایک شکایت درج کروائی تھی۔ اس شکایت اور آڈٹ رپورٹ کی بنیاد پر پونے کے کمشنر برائے کوآپریشن نے ایک انکوائری کرائی تھی۔ جنوری ۲۰۲۶ میں سامنے آنے والی اس انکوائری کی رپورٹ نے گزشتہ رپورٹوں کی تصدیق کی، کیونکہ اس میں بینک کی جانب سے جاری کردہ ۲۴ قرضوں میں بے ضابطگیوں کی نشاندہی کی گئی تھی، جن میں راؤت اور ان کے رشتہ داروں کو دیے گئے قرضے بھی شامل ہیں۔

دیش پانڈے کا الزام ہے کہ عوامی نمائندے، سیاسی کارکن اور بااثر کاروباری افراد کوآپریٹو بینکوں کا غلط استعمال کر رہے ہیں۔ دسمبر ۲۰۲۵ میں دیش پانڈے نے بینک میں بے ضابطگیوں کو جاری رکھنے کی چھوٹ دینے کے الزام میں چارٹرڈ اکاؤنٹنٹ کے خلاف انسٹی ٹیوٹ آف چارٹرڈ اکاؤنٹنٹس آف انڈیا (آئی سی اے آئی) میں ایک شکایت درج کروائی تھی۔ ’’لیکن یہاں کسی کی بھی کوئی جوابدہی نہیں ہے،‘‘ وہ کہتے ہیں۔

’’عام آدمی جائے تو جائے کہاں؟‘‘ سجاتا دریافت کرتی ہیں۔ ’’یہاں قانون کی کوئی بالادستی نہیں، یہ ترقی پسند مفکرین کی سرزمین تصور کی جاتی ہے۔‘‘

جگدالے کی رپورٹ پر مبنی معاملہ سولاپور ضلع کے ڈپٹی رجسٹرار کے پاس ہے، جو حکومتِ مہاراشٹر کے محکمہ برائے کوآپریشن، مارکیٹنگ اور ٹیکسٹائل کے ماتحت ہیں۔ جبکہ دیش پانڈے کے معاملے کی سماعت بارشی کے سیشن کورٹ میں چل رہی ہے۔

جب تھوربولے نے پولس اسٹیشن میں خود سوزی کی کوشش کی تو پولس اہلکاروں نے انہیں گریبان سے پکڑ لیا اورخودکشی کی کوشش کے الزام میں سولاپور تھانے میں حراست میں لے لیا۔ تھوربولے یاد کرتے ہوئے کہتے ہیں، ’’میں ڈیزل میں شرابور وہاں تین گھنٹے تک بیٹھا رہا۔‘‘ انہوں نے مزید کہا کہ ان کے ساتھ ایسا سلوک کیا گیا جیسے وہ کوئی مجرم ہوں۔ ’’میری جلد زرد پڑ چکی تھی۔‘‘ ایک پولیس والے نے ان سے گرج دار آواز میں کہا، ’’ہم تم پر ایسے جرائم کا الزام لگائیں گے جو تم نے نہیں کیے… تم کبھی بھی [جیل سے] باہر نہیں نکل پاؤ گے۔‘‘

تھوربولے کہتے ہیں کہ وہ پورے دن اس آزمائش میں مبتلا رہے۔ ’’کسی نے مجھے پانی کا ایک گلاس تک نہیں دیا۔ آخرکار ایک صحافی جو میری کہانی کور کرنے آیا تھا، اس نے اپنی پانی کی بوتل میرے ساتھ شیئر کی۔‘‘

بارشی تھانہ کے پولس انسپکٹر بالاجی کُکڑے نے کسی بھی قسم کے دباؤ میں کام کرنے سے انکار کیا اور مزید تبصرہ کرنے سے منع کردیا۔ ’’میں بس اتنا ہی کہوں گا،‘‘ انہوں اس رپورٹر سے سختی کہا۔

تھوربولے کے مطابق، سولاپور کے ایڈیشنل سپرنٹنڈنٹ آف پولیس ہمت جادھو نے بینک حکام کو ہدایت دی کہ وہ ان کا پلاٹ اور اس پر تعمیر شدہ عمارت کو کسی نجی خریدار کو فروخت کر دیں (کیونکہ یہ جائیداد قرض کے عوض رہن رکھی گئی تھی) تاکہ بینک کے ساتھ گنیش اور ان کے ساتھیوں کے واجب الادا قرضوں کا تصفیہ کیا جا سکے۔

’’یہ سودا ۳۳ لاکھ روپے میں طے پایا،‘‘ یہ کہتے ہوئے تھوربولے نے مزید جانکاری دی کہ اس سودے سے انہیں صرف ۵ لاکھ روپے ملے، کیونکہ باقی کے ۲۸ لاکھ روپے بینک نے قرض کا تصفیہ کرنے کے لیے اپنے پاس رکھ لیے۔

اس کے بعد پولیس افسران نے گنیش اور یوراج کو ہدایت دی کہ وہ تھوربولے کو ۲۸ لاکھ روپے دیں اور ساتھ ہی ان کی پریشانیوں کے ازالہ کے لیے مزید ایک لاکھ روپے بھی ادا کریں۔ پولیس نے یوراج کو یہ ہدایت بھی کی کہ وہ دو لاکھ روپے بھی واپس کریں جو تھوربولے نے یوراج کے یہاں اپنی ملازمت کے دوران، خیر سگالی کے جذبے کے تحت امانت کے طور پر ان کے پاس رکھوائے تھے۔

حتمی تصفیہ کے طور پر یوراج نے ۵ء۱۵ لاکھ روپے کے دو چیک دیے۔ لیکن وہ دونوں چیک باؤنس ہوگئے۔ چیک باؤنس ہونے کے بعد تھوربولے نے یہ خیال کرتے ہوئے دوبارہ پولیس سے رجوع کیا کہ پولیس نے ہی ان کے اور بینک کے درمیان اس معاملے کے تصفیہ میں ثالثی کا کردار ادا کیا تھا۔ لیکن ان کی شکایت کو ایک بار پھر نظر انداز کر دیا گیا۔

’’مقدمہ سولاپور کی ضلعی عدالت میں زیر سماعت ہے،‘‘ تھوربولے کہتے ہیں۔ ’’خدا جانے کب تک فیصلہ آئے گا۔‘‘

تھوربولے نے جہاں سے شروعات کی تھی اب وہیں واپس آچکے تھے: بینک نے ان کے ساتھ دھوکہ کیا تھا اور پولیس بے حس بنی ہوئی تھی۔ مگر اس بار انہوں نے کسی انتہائی قدم کی دھمکی نہیں دی۔ انہوں نے پوچھا، ’’اگر میں نے خودکشی کر لی، تو میرے بچوں کی دیکھ بھال کون کرے گا؟‘‘

تھوربولے (جن کی عمر اب ۴۲ سال ہے) اور سجاتا کی ایک ۲۰ سالہ بیٹی ہے جو بارشی کے ایک کالج سے انجینئری کی تعلیم حاصل کر رہی ہے، اور ایک ۱۹ سالہ بیٹا ہے، جس نے اسٹال پر اپنے والد کا ہاتھ بٹانے کے لیے پڑھائی چھوڑ دی ہے اور وہ اضافی آمدنی کے لیے ٹرک بھی چلاتا ہے۔

’’ہمارے پاس اپنے بیٹے کو پڑھانے کے لیے پیسے نہیں ہیں،‘‘ سجاتا نے روتے ہوئے کہا۔ ’’وہ سرکاری ملازمت حاصل کرنا چاہتا تھا۔ وہ پڑھنا چاہتا تھا، اور وہ سب کچھ کرنا چاہتا تھا جو اس کے والد نہ کرسکے۔ کہیں نہ کہیں ہمیں ایسا محسوس ہوتا ہے کہ ہم اپنے بیٹے کے معاملے میں ناکام ہو گئے۔ میرے بچے کا مستقبل تباہ کر دیا گیا ہے۔‘‘

اپنے بیٹے کی تعلیم مکمل کرنے میں مدد نہ کر پانے کے احساس جرم کے علاوہ، سجاتا کو قصبہ کے بااثر لوگوں سے دشمنی مول لینے کے بعد اب مسلسل اپنے اہل خانہ کی حفاظت کی فکر لاحق رہتی ہے۔ ریاستی اداروں اور نظام سے ان کا بھروسہ بالکل اٹھ چکا ہے۔

’’میں ایک دائمی خوف کے سائے میں جی رہی ہوں،‘‘ وہ اعتراف کرتی ہیں۔ ’’کیا میرے شوہر کام کے بعد خیریت سے گھر لوٹیں گے؟ میری بیٹی روز اپنی اسکوٹر پر کالج جاتی ہے۔ آیا مجھے اسے جانے دینا چاہیے یا نہیں؟ کیا ہوگا اگر وہ کسی رات ہم پر حملہ کرنے آ گئے؟ مجھے اکثر ایسا محسوس ہوتا ہے جیسے کوئی ہم پر نظر رکھے ہوئے ہے۔‘‘

تھوربولے کہتے ہیں کہ جن لوگوں نے انہیں لوٹا وہ بارشی میں آزاد گھوم رہے ہیں۔ یہ ان کے زخموں پر نمک چھڑکنے جیسا ہے۔

’’دوسری طرف، میں ڈرا سہما ہوا ہر وقت پیچھے مڑ مڑ کر دیکھتا رہتا ہوں۔‘‘