महाराष्ट्र: नेता मन के बपोती कस होगे सहकारी बैंक

दिसंबर 2021 के जाड़ वाले बिहनिया रहिस. घना कोहरा ले तोपाय रोड मं अमर थोरबोले महाराष्ट्र के सोलापुर जिला मं 23 कोस दूरिहा रद्दा नाप के एसपी आफिस डहर जावत रहिस. ओकर संग डीजल भरे पीपा अऊ माचिस की डिब्बी रहिस.

थोरबोले ह अपन फटफटी ला खड़े करिस, धीरे-धीरे पीपा के ढकना खोलिस अऊ पुलिस थाना डहर जावत अपन उपर डीज़ल उड़ेल लिस. वो ह माचिस जलाइस. आगि लगे के भभका उठिस, पुलिस ओकर बाद हबरगे.

ये घटना के दू महीना पहिली के दू महीना मं, ओकर गाँव बार्शी के करजा वसूली एजेंट 38 बछर के थोरबोले अऊ ओकर परिवार ला धमकावत रहिस, वोला ओ करजा बर जिम्मेवार माने जावत रहिस, जेकर रकम ओकर मांगे गे रकम ले पांच गुना जियादा रहिस. अऊ पुलिस ओकर मामला के जाँच करे ले इंकार करत रहिस, काबर के जेन लोगन मन के उपर धोखाधड़ी के आरोप रहिस ओकर मन के इहां के राजनीति मं भारी दखल रहिस.

बछर भर पहिली, मई 2020 मं, मराठा समाज के थोरबोले ह चाय-नास्ता ठेला के अपन कारोबार ला आगू बढ़ाय के बिचार करे रहिस. वो ह अपन जमा पूंजी ले एक ठन प्लाट बिसोय रहिस. वो मन अपन ठेला मं बेचे जवेइय्या पोहा अऊ बरा जइसने कलेवा के संग मसाला घलो बेचे ला चाहत रहिस, संगे संग, ओ प्लाट मं वो ह एक ठन गोदाम घलो बनाय ला चाहत रहिस.

येकर बर वो ह 5 लाख रूपिया के करजा लेगे के फइसला करिस. थोरबोले ह शिव शक्ति अर्बन को-ऑपरेटिव बैंक ले करजा लेय बर अरजी दिस, काबर के शाखा प्रबंधक गणेश बारंगुले ह ओकर पहिली के मालिक युवराज बारंगुले के कारोबार मं हिस्सेदार रहिस.

ये जान-पहिचान अऊ भरोसा के सेती जब गणेश ह ये कहिके फिर ले कागजात मं दसखत करवा लिस के “पहिली के अरजी मं कुछु गलती रहिस,” त थोरबोले अऊ ओकर घरवाली येला बैंक के सामान्य काम समझिस.

जुलाई 2020 के सुरु मं गणेश ह ओला बताइस के करजा मंजूर होगे हवय अऊ ओकर करजा चुकाय के गारंटी के रूप मं 10 ठन दसखत वाले कोरा चेक जमा करे ला कहिस.

ये जोड़ा ह बगेर कोनो सवाल करे चेक जमा करिन. 34 बछर के सुजाता थोरबोले कहिथे, “हमर संबंध बढ़िया रहिस. हमन ओकर मन के उपर [गणेश अऊ युवराज ऊपर] भरोसा रहिस.”

ये भरोसा करीबन बछर भर तक ले चलत रहिस. फेर एक दिन करजा वसूली एजेंट ओकर घर मं खुसरगे अऊ सुजाता ला धमकाय लगिस के गर थोरबोले ह 25 लाख रूपिया के अपन घर बनाय के करजा ला पटावत नइ रखही, त बैंक ओकर संपत्ति ला जब्त कर लिही. सुजाता कहिथे, “ मंय पूरा उलझन मं परगे रहेंय.”

नवमीं क्लास तक पढ़े थोरबोले ह कठवा कस होगे. वोला लगिस के जरुर कोनो गलतफहमी होय हवय अऊ वो ह तुरते बैंक हबरगे. कहे जाथे के उहाँ गणेश ह समान्य ढंग ले ओला बताइस के ओकर कारोबार के करजा के अरजी ला थोरबोले के नांव मं 25 लाख रूपिया के घर बनाय के करजा मं बदल दे गे रहिस अऊ ओ रकम के कुछु हिस्सा अपन कारोबार मं लगा ले रहिस.

ये सुनके थोरबोले हकबका के रहिगे, वो ह गणेश ले सवाल-जवाब करिस, फेर ओला अपमानित करत जुवाब मिलिस. कहे जाथे के गणेश ह कहिस, “तंय हमर होटल मं बरतन माँजत रहय. हमर ले सवाल करेइय्या तंय कोन होथस?”

घबराय थोरबोले ह पुलिस करा जाय के धमकी दिस अऊ बैंक ले बहिर निकर आइस. फेर बैंक के कुछु करमचारी मन ओला बीच मं रोक लिन अऊ दूसर ढंग ले धमकावत कहिन, “तिल के ताड़ झन बना.” थोरबोले ला वो गोठ-बात आज घलो सुरता हवय. वो ह कहिस, “तोर करजा खाता ला दू महीना के भीतर सुधार ले जाही.” थोरबोले ह ओकर मन के बात ला मान लिस, काबर के ओकर करा कोनो दीगर उपाय नइ रहिस. वो ह सधारन मइनखे रहिस अऊ जेन लोगन मन के खिलाफ वो ह खड़े रहिस ओकर मन के शहर मं भारी असर रहिस.

गणेश बारंगुले ह थोरबोले के आरोप ला नकार दिस. ओकर कहना रहिस, “करजा के अरजी ला 5 लाख ले 25 लाख रूपिया करवाय के बिनती उहिच ह करे रहिस. हमन येला अपन डहर ले कइसने बदले सकतेन?”

वइसे, बाद मं 30 सितंबर 2021 के दिन गणेश ह पुलिस के आगू मंजूर करिस के वो ह अपन संग काम करेइय्या दू झिन के संग मिलके बैंक अऊ ओकर ग्राहेक मन संग धन के गबन अऊ धोखाधड़ी करे रहिस. जब ओकर ले ये स्वीकार करे के हलफनामा के बारे मं पूछे गिस, त वो ह येकर जानकारी नइ होय के बात कहिस. ये रिपोर्टर डहर ले भेजे गे संदेसा के घलो कोनो जुवाब नइ दिस.

येकर बाद, थोरबोले ह वो पइसा के लफड़ा-झंझट ले पार पाय बर भटके लगिस, जेन मं ओला कथित धोखाधड़ी के जरिया ले डार दे गे रहिस. वो ह भारी आस लेके पुलिस थाना गिस, फेर सुजाता के मुताबिक, “हमन ला कहे गिस के ओकर मन ले दुश्मनी झन मोल लेवव. वो मन भारी ताकतवाले लोगन मन आंय अऊ ओकर मन के राजनीतिक पहुँच हवय.”

हरेक डहर ले निरास अऊ हतास होके थोरबोले सोलापुर पुलिस आफिस हबर गिस, जिहां वो ह आत्मदाह करे बर तियार रहिस.

महाराष्ट्र मं करीबन 489 सहकारी बैंक हवंय, जेन ला ओ लोगन मन के मदद बर बनाय गे रहिस जेकर मन तक बड़े बैंक नइ जाय सकंय. येकर उद्देश्य खास करके कारीगर, किसान अऊ कम आमदनी वाले लोगन मन ला कम बियाज मं करजा देय ला रहिस.

राज्यसभा के रिकार्ड के मुताबिक, साल 2020 ले भारत के सरकारी बैंक मन बड़े कल-कारखाना अऊ सेवा के क्षेत्र मं बकाया 3 लाख करोड़ रूपिया ले जियादा के रकम माफ़ कर दे हवय, जेकर ले ओकर करजा देय के ताकत कम होगे हवय.

छोटे सहकारी बैंक मन के हालत त एकर ले घलो जियादा खराब हवय.

स्थानीय नेता मन के दुवाब मं कतको सहकारी बैंक मन शक्कर मिल मन ला, कपड़ा मिल अऊ निर्मान कंपनी मन जइसने बड़े कारोबार मन ला बगेर जाँच परख के कम बियाज मं करजा दे देय हवंय. नतीजा ख़राब करजा (बैड लोन) बढ़त चले गिस अऊ बैंको मन ला भारी नुक़सान उठाय ला परिस. भारी राजनीतिक दखल अऊ संपत्ति मन के दुरुपयोग सेती कतको सहकारी बैंक दिवालिया होया ला हवंय; फेर कतको कइसने करके अपन काम-काज चलावत हवंय.

“शिव शक्ति अर्बन को-ऑपरेटिव बैंक ह सहकारी बैंक मन के गड़बड़ी के एक बड़े उदाहरन आय.

साल 1998 मं पूर्व शिवसेना सांसद शिवाजी कांबले डहर ले स्थापित ये बैंक बार्शी के शैक्षणिक संस्था ‘शिवाजी शिक्षण प्रसारक मंडल’ के दू ठन खोली मं चलत हवय. संस्था के उपाध्यक्ष अऊ बैंक के शेयरहोल्डर सदस्य नंदकुमार जगदाले बताथें के बैंक के अधिकतर करमचारीच मन येकर शेयरहोल्डर हवंय.

कांबले चाहत रहिस के शैक्षणिक संस्था के करमचारी मन के अपन एक ठन बैंक होय. फेर बखत के संग बैंक मं अऊ घलो शेयरहोल्डर होवत गिन अऊ ”आज ये ह राजेंद्र राऊत अऊ ओकर क़रीबी लोगन मन के मुताबिक काम करथे,” जगदाले कहिथे. राऊत भारतीय जनता पार्टी के पूर्व विधायक रहे हवय. अऊ 22 जून 2026 मं एमएलसी चुनाव जीते रहिस. ये रिपोर्टर ह राऊत के पक्ष जाने बर ओकर ले संपर्क करे रहिस. ओकर जुवाब मिले के बाद वोला ये कहिनी मं जोड़े जाही.

साल 2022-2023 मं, करीबन बछर भर बाद, पुणे के स्वतंत्र चार्टर्ड अकाउंटेंसी फर्म शशांक पत्की एंड एसोसिएट्स ह बैंक के हिसाब-किताब के जांच (ऑडिट) करिस. बाद मं इही रिपोर्ट के आधार ले इहाँ के सामाजिक कार्यकर्ता मनीष देशपांडे ह बार्शी के सत्र अदालत मं एक ठन केस दायर करिस.

रिपोर्ट के मुताबिक, राऊत अऊ ओकर परिवार ला 9 करोड़ ले जियादा के करजा देय गे रहिस, फेर बैंक के करजा देय के सीमा सिरिफ 3.3 करोड़ रूपिया रहिस. मतलब राऊत ला तय सीमा ले करीबन तीन गुना जियादा करजा देय गे रहिस.

वइसे, गणेश के कहना रहिस के ये करजा ये बखत एनपीए (नॉन-परफॉर्मिंग एसेट) होय नइ यें. वो ह ये घलो कहिस के ईमानदारी ले बैंक ह राऊत के कतको खाता ला बंद कर दे हवय. वो ह कहिस, “सुरु मं ओकर अऊ ओकर परिवार के 11 ठन खाता रहिस. अब ये ह घटके पांच होगे हवय.”

ऑडिट मं दू ठन अऊ संदेहा निजी करजा के जिकर करे गे हवय. राऊत अऊ युवराज – दूनों ला 3-3 करोड़ रूपिया के करजा देय गिस, फेर ओकर मन के निजी करजा के सीमा 2 करोड़ रूपिया ले घलो कम रहिस.

ऑडिट मं अऊ बड़े गड़बड़ी अऊ भ्रष्टाचार आरो मिलिस. 41 करोड़ रूपिया ले जियादा के 60 ठन करजा बगेर कागजात के दे देय गे रहिस. ऑडिट ह ये घलो कहिस के बैंक ह कतको झिन ले जरूरी तनखा के रसीद, कउनो गारंटी धन इनकम टैक्स के कागज घलो नइ मांगे रहिस. कछू मन मं त, महीना के किस्त ह करजदार के महीना के तनखा ले घलो जियादा रहिस.

सितंबर 2024 मं जब बैंक के आम सभा बैठक मं बोर्ड के सदस्य मन बैंक के कामकाज ला लेके सवाल उठाइन, जेन मं बैंक के अध्यक्ष घलो सामिल रहिस, तब जगदाले के अगुवई मं एक ठन जांच समिति बनाय गिस. ओकर सौंपे गे रिपोर्ट ह अचमित करे असन रहिस .

जांच रिपोर्ट मं कहे गे रहिस के बार्शी शाखा प्रबंधक गणेश बारंगुले, ओकर कारोबारी साझेदार युवराज बारंगुले अऊ बैंक चेयरमैन के बेटा सुयोग बुरगुटे ह बैंक के पइसा ला अपन निजी कारोबार बर करिस. रिपोर्ट मं आठ ठन संस्था मन ला देय गे 25 करोड़ रूपिया ले जियादा के संदेहा करजा के जानकारी दे गे हवय. ये सब्बो संस्था मन सीधा धन दीगर रूप मं ये तिकड़ी ले जुड़े रहिन. ये मं एक ठन जमीन कारोबार वाले कंपनी घलो रहिस, जेकर ले थोरबोले ह अपन प्लाट बिसोय रहिस.

एक ठन मामला मं, बैंक ह साल 2023 मं होटल सैंट्रो ला 1.4 करोड़ रूपिया के करजा दिस. जेकर हर महीना के क़िस्त 1.9 लाख रूपिया आवत रहिस, फेर ओकर महीना के कमई सिरिफ 43,000 रूपिया रहिस; गनेश अऊ युवराज दूनों होटल मं भागीदार आंय. अइसने होटल ऋतु लॉज ला 1.4 करोड़ रूपिया के करजा देय गिस, जेकर महीना के क़िस्त 1.9 लाख रूपिया रहिस, फेर ओकर महीना के कमई सिरिफ 36,000 रूपिया रहिस. एक ठन दूसर मामला मं, पथरा फोरे के मसीन (स्टोन क्रशर) यूनिट ला 1.1 करोड़ रूपिया मिलिस, जेकर महीना के क़िस्त 2.15 लाख रूपिया रहिस, फेर ओकर महीना के कमई सिरिफ 71,000 रूपिया ले थोकन जियादा रहिस.

गणेश कहिथे, “ये बेवसाय मन अपन असल कमई ला नइ देखावंय. फेर हमन इहां के लोकल लोगन मन हवन. हमन ला मालूम हवय के ओमन के असल हैसियत काय आय. इही आधार मं हमन ये करजा मन ला देय हवन.” ओकर कहना रहिस कि जगदाले के रिपोर्ट मं लिखे मासिक आमदनी सिरिफ कागज मन मं दरज आंकड़ा आय अऊ सबले बड़े बात ये आय के आरबीआई ह ओकर काम-काज मं कोनो समस्या नइ पाय हवय.

बाद मं थोरबोले ला समझ मं आइस के जब वो ह अपन करजा के अरजी के फाइल दिखाय ला कहे रहिस, त बैंक के एक झिन करमचारी ह ओकर ले काबर झल्लाय रहिस. ओला कहे गे रहिस, “तोर किस्मत रहिस के तोला करजा मिलत हवय.” थोरबोले के घर मं खुसर आय वसूली एजेंट असल मं वो पइसा ला चुकता करे के दुवाब बनावत रहिस, जेन ला कहे जाथे के गणेश अऊ युवराज ह हड़पे रहिन.

थोरबोले के बैंक खाता के लेन-देन ले पता चलथे के 5 लाख रूपिया के करजा के अरजी करे के बाद तीन महीना के भीतरी ओकर खाता मं कतको क़िस्त मं कुल 29 लाख रूपिया ले जियादा जमा करे गिस. फेर कतको बखत ये रकम उहिच दिन पूरा के पूरा युवराज के खाता मन मं डार दे गिस. कतको बखत रक़म चेक ले निकारे ले गे रहिस. अइसने करके थोरबोले के खाता ले बनेच जल्दी निकार ले गिस. थोरबोले के कहना आय के ओतके बखत तक ले वो ह अपन बर सिरिफ 2.25 लाख रूपियाच निकारे रहिस.

थोरबोले के मुताबिक़,ये लेन-देन ओकर नजर मं येकरे सेती नइ आइस, काबर के ओकर फोन मं एसएमएस नइ आवत रहिस, अऊ कोविड-19 महामारी बखत बैंक करमचारी मन ले भेंट करे मं रोक सेती पासबुक ले कोनो लेन-देन के जाँच पड़ताल करे घलो कठिन रहिस.

सामाजिक कार्यकर्ता देशपांडे ह बैंक मं घपला के खिलाफ बार्शी पुलिस थाना मं सिकायत घलो करे रहिस. ये सिकायत अऊ ऑडिट रिपोर्ट के आधार ले पुणे के सहकार आयुक्त ह जांच के आदेश दिस. जनवरी 2026 मं आय ओकर रिपोर्ट ह पहिली के रिपोर्ट मन ला सही करत बताइस के बैंक के देय गे 24 ठन करजा मं घपला रहिस, जेन मं राऊत अऊ ओकर रिस्तेदार मन ला देय करजा घलो सामिल रहिस.

देशपांडे के आरोप हवय के जनप्रतिनिधि, राजनीतिक कार्यकर्ता अऊ असरदार बेपारी मन सहकारी बैंक मन के दुरुपयोग करत रहे हवंय. दिसंबर 2025 मं वो ह बैंक के चार्टर्ड अकाउंटेंट के ख़िलाफ़ भारतीय चार्टर्ड अकाउंटेंट्स संस्थान (आईसीएआई) मं सिकायत करिस, काबर के वो ह ये घपला मन कोती आंखी मूंद ले रहिस. देशपांडे कहिथे, “फेर ककरो कोनो जवाबदेही तय नइ होवय.”

सुजाता सवाल करत कहिथे, “आम जनता आख़िर कहां जाय? इहां न क़ानून के राज हवय, न कोनो व्यवस्था बांचे हवय, अऊ ये त प्रगतिशील विचारक मन के माटी कहे जावत रहिस.”

जगदाले के रिपोर्ट के आधार ले दरज मामला ये बखत सोलापुर के जिला उप-पंजीयक (डिप्टी रजिस्ट्रार) करा हवय, जेन ह महाराष्ट्र सरकार के सहकार, विपणन अऊ कपड़ा विभाग के तहत आथे. देशपांडे के मामला बार्शी के सत्र अदालत मं चलत हवय.

जब थोरबोले ह पुलिस थाना के आगू अपन आप ला जलाय के कोसिस करिस, त पुलिसवाले मन ओकर कालर धरके ओला आत्महत्या के कोसिस के आरोप मं सोलापुर पुलिस थाना मं हिरासत मं ले लिस. थोरबोले सुरता करत कहिथे, “मंय तीन घंटा तक ले डीजल मं भीगे उहिंचे बइठे रहेंय. मोर संग अइसने बेवहार करे गिस जनी मनि मंय कोनो दोसी अंव. मोर चमड़ी पिंयर पर गे रहिस.” ओकर मुताबिक, एक झिन पुलिसवाले ह ओकर उपर बफरगे, “हमन तोर उपर अइसने अपराध के केस कर देबो जेन ला तंय करेच नइ... तंय कभू जेल ले बहिर नइ निकर सकबे.”

थोरबोले कहिथे ये पूरा अतियाचार दिन भर चलिस. “कोनो मोला एक गिलास पानी तक नइ दिन, आखिर मं मोर खबर ला लिखे बर आय एक झिन पत्रकार ह अपन पानी के बोतल मोला दिस.”

बार्शी पुलिस थाना के पुलिस इंस्पेक्टर बालाजी कुकड़े ह कोनो घलो किसम के दुवाब मं काम करे ले इंकार करिस अऊ येकर ले जियादा कुछु बोले ले मना कर दिस. वो ह ये रिपोर्टर ला कड़ा लहजा मं कहिस, “मंय बस अतकेच कइहूँ.”

थोरबोले के मुताबिक, सोलापुर के एडिसनल एसपी हिम्मत जाधव ह बैंक अफसर मन ला निर्देस दिस के ओकर प्लाट अऊ वो मं बने मकान ला – जेन ह करजा के बदले मं गिरवी रहिस – एक ठन निजी खरीददार ला बेच दे जाय, जेकर ले गणेश अऊ ओकर सहयोगी के बैंक के बांचे करजा चुकता करे जा सकय.

थोरबोले बताथे, “ये सौदा 33 लाख रुपिया मं तय होय रहिस. फेर मोला सिरिफ 5 लाख रुपिया मिलिस, काबर के 28 लाख रुपिया बैंक ह करजा वसूली के रूप मं राख लिस.”

येकर बाद, पुलिस अफसर मन गणेश अऊ युवराज ला निर्देस दिन के वो मन थोरबोले ला 28 लाख रुपिया लहुटायें अऊ ओकर हलकान होय सेती उपराहा 1 लाख रुपिया घलो देवंय. पुलिस ह युवराज ला ये घलो कहिस के वो ह वो 2 लाख रुपिया ला लहुटाय, जेन ला थोरबोले ह ओकर इहां नउकरी करे बखत आपसी बिस्वास के आधार मं संभाल के राखे रहे बर देय रहिस.

आखिरी समझौता के तहत युवराज ह 15.5-15.5 लाख रूपिया के दू ठन चेक दिस, फेर दूनों चेक बाउंस हो गिस. चेक बाउंस होय के बाद थोरबोले पुलिस करा गिस, काबर के समझौता ला पुलिस ह कराय रहिस. फेर ओकर सिकायत डहर एक पईंत अऊ आंखी मूंद ले गिस.

थोरबोले कहिथे,”मामला सोलापुर के जिला अदालत मं चलत हवय. भगवान जाने, ये ह कब तक चलही.”

वो ह फिर उहिंचे हबर गे जिहां ले वो ह चले रहिस- बैंक ह ओला ठगे रहिस अऊ पुलिस वाले कुछु नइ करत रहिस. फरक बस अतका रहिस के ये बेर वो ह कोनो आत्मघाती रद्दा धरे के धमकी नइ दिस. वो ह कहिस, “ गर मंय आत्महत्या कर लिहूं, त मोर लइका मन ला कोन पोसही?”

ये बखत 42 बछर के हो चुके थोरबोले अऊ सुजाता के 20 बछर के बेटी हवय, जेन ह बार्शी के एक ठन कॉलेज मं इंजीनियरिंग पढ़त हवय, अऊ 19 बछर के बेटा ह, अपन ददा के ठेला ला चलाय मं मदद करे बर पढ़ाई छोड़ दे हवय. वो ह उपराहा आमदनी बर ट्रक चलाथे.

सुजाता रोवत कहिथे, “हमर करा बेटा के पढ़ई बर पइसा नइ ये. वो ह सरकारी नउकरी करे ला चाहत रहिस. वो ह पढ़े ला चाहत रहिस अऊ वो सब्बो हासिल करे ला चाहत रहिस जेन ह ओकर ददा ह करे नइ सकिस. हमन ला लागथे के हमन अपन बेटा बर कुछु करे नइ सकेन. मोर लइका के भविस्य बरबाद होगे.”

बेटा के पढ़ई छूट जाय के दोस मने मन मं लगेच रहिथे, सुजाता ला ये बात के घलो सरलग संसो बने रहिथे के शहर के असरदार लोगन मन के बगियाय के बाद ले ओकर परिवार के सुरच्छा कइसने बने रइही. सरकारी दफ्तर अऊ अफसर मन के काम-धाम ले ओकर भरोसा टूट चुके हवय.

वो ह बताथे, “मंय हर घड़ी डेर्रावत रहिथों. काय मोर घरवाला काम ले कुशल मंगल लहूट आही? मोर बेटी रोज के स्कूटी ले कालेज जाथे. मोला ओअला जय दे ला चाही धन नइ? गर ओ मन कोनो रतिहा हमर घर मं आ जाहीं त? मोला हर घड़ी अइसने लगथे के कोनो हमर उपर नजर राखत हवय.”

थोरबोले के मुताबिक, ओकर घाव मं नून डारे, जइसने बात ये आय के जेन मन ओला लूटीन, वो लोगन मन आज घलो बार्शी मं गोल्लर कस घूमत हवंय.

“अऊ मोला कहूँ घलो आय-जाय मं हरेक घड़ी डर लगे रहिथे.”