بالو ماما کی طرف سے شاندار فصل کا تحفہ

مہاراشٹر کے کولہاپور ضلع میں چکی چلانے والی خواتین کے ذریعہ گائے گئے ان بھگتی گیتوں کا فوکس ایک بہت ہی محبوب چرواہا ہے

انیس (۱۹) ناموں کی فہرست کے ساتھ ، پاری اُن خواتین کی تلاش میں نکلا جنہوں نے دو دہائی قبل کولہاپور کے میتگے گاؤں میں اوریجنل گرائنڈمل سانگس پروجیکٹ (جی ایس پی) ٹیم کے لیے گیت گایا تھا۔ ہاتھ میں کیمروں کے ساتھ ٹیم کی موجودگی نے یہاں کے نوجوانوں اور بزرگوں کو متوجہ کیا۔
ہم نے اپنے گھر کے دروازے پر بیٹھی ایک خاتون سے پوچھا کہ کیا وہ اُن لوگوں کو جانتی ہے جنہوں نے کبھی پونے کے ایک گروپ کے لیے گایا تھا۔ اُس نے کہا، ’’ہاں، ہم نے جاتیا ورچیہ اوویہ ]گرائنڈمل کے گیت[ گایا تھا۔ میں اُن گلوکاروں میں سے ایک تھی۔‘‘

ہم اپنی فہرست میں شامل فنکاروں میں سے ایک، سونا بھارمل سے مل کر بہت خوش ہوئے۔ ۶۰ سال کی سونا نے ہمیں بتایا کہ لکشمی ڈَوَری واحد ایسی فنکارہ ہیں جو اب بھی میتگے میں رہ رہی ہیں۔

یہ ۲۰۱۸ کی بات ہے، اور کچھ گیت گانے والی خواتین جیسے باینا کامبلے جو جی ایس پی کے لیے گاتی تھیں، ان کی وفات ہو چکی تھی۔ باینا کے بیٹے اشوک کامبلے نے ہمیں بتایا، ’’میری والدہ اور ان کی دوست سکھو بائی کامبلے مشہور گلوکارہ تھیں۔ ’’وہ دونوں گنے کے کھیتوں میں کام کرتے ہوئے ایک ساتھ گانے گاتی تھیں ۔‘‘

کاگَل تعلقہ میں واقع یہ گاؤں ’بالو ماماچے میتگے‘ (بالو ماما کا میتگے) کے نام سے مشہور ہے۔ یہ نام بالو ماما کے نام پر ہے، جو کئی دہائیوں قبل ایک چرواہا تھے جنہیں مقامی لوگ آج بھی عزت و احترام سے یاد کرتے ہیں، اور ان کے نام پر ایک مندر بھی موجود ہے۔ پتھر کی اس عمارت کے دونوں طرف مینڈھوں کی دو مورتیاں ہیں۔ یہ ایک مقبول جگہ ہے جہاں بالو ماما کی وراثت آج بھی زندہ ہے اور اس نے نوجوان نسل کے تخیل کو بھی اپنی گرفت میں لے لیا ہے۔

وہاں کی خواتین نے ہمیں بتایا کہ بوائی سے پہلے، میتگے کے کسان بالو ماما کا انتظار کرتے تھے کہ وہ اپنی بھیڑوں کا ریوڑ ان کے کھیتوں میں چرنے کے لیے لے کر آئیں گے۔ بھیڑوں کا فضلہ قدرتی کھاد کا کام کرتا ہے اور اچھی فصل دیتا ہے، اور کسانوں کا ماننا تھا کہ جہاں جہاں بالو ماما کا ریوڑ چرتا ہے، وہاں کی زمین اس موسم میں شاندار فصل دیتی ہے۔

اکتوبر ۱۸۹۲ میں کرناٹک میں بالپّا کے نام سے پیدا ہونے والے بالو ماما نے سنت (سادھو) کا درجہ حاصل کیا۔ اُن کا انتقال ۴ ستمبر ۱۹۶۶ کو مہاراشٹر کے کولہاپور ضلع کے آدم پور گاؤں میں ہوا۔ اُن کی وراثت، مراٹھی کی کتابوں، ٹیلی ویژن سیریلز اور یہاں تک کہ مراٹھی اور کنڑ کی مقبول فلموں میں زندہ ہے۔

سال ۲۰۱۸ میں پاری نے جب دوبارہ بالو ماماچے میتگے کا دورہ کیا، تو ۱۰ سے زیادہ خواتین گانے کے لیے ہمارے پاس جمع ہوئیں۔ اُن میں سے کچھ، ان پہلی ۱۹ خواتین فنکاروں میں سے تھیں جن سے اوریجنل جی ایس پی ٹیم دو دہائی قبل ملی تھی۔

خواتین نے مختلف قسم کے لوک گیت گائےاور خوشی سے چکّی چلاتے ہوئے بھی نغمے گائے۔ انہوں نے ایک پتھر کی چکّی ڈھونڈھی، اسے صاف کیا اور چکّی کے اوپر والے حصہ میں بنے سوراخ میں ایک لکڑی کی چھڑی لگائی، جس کے بعد کُمکُم اور ہلدی (سندور اور ہلدی پاؤڈر) سے اس کی پوجا کی گئی۔

خواتین نے چراغ روشن کرکے پرارتھنا میں ہاتھ جوڑے اور گانا شروع کر دیا۔

جلد ہی ان کی موسیقی کی رفتار تیز ہوگئی اور اُن کی آوازیں ایک دوسرے کے ساتھ تال میل بٹھانے لگیں۔ مرکزی گلوکارہ سُلابائی جادھو نے گانا شروع کیا اور باقی خواتین نے ان کا ساتھ دیا۔ یہ آٹھ اووی کا ایک سلسلہ تھا جسے پاری نے ریکارڈ کیا۔

گلوکاروں نے گیت گانا شروع کیا، ’’میرا پہلا گیت، اے خواتین، میرے بھگوان جیوتبا کے لیے ہے۔‘‘ یہ پہلا شعر جیوتبا کو وقف ہے، جنہیں کولہاپور کے ایک مندر میں بھگوان شیو کے روپ میں پوجا جانے والا دیوتا مانا جاتا ہے۔ گلوکارہ نے انہیں موتیوں کی ایک دوہری مالا، ایک مقدس دھاگے کے طور پر پیش کی۔

اگلے تین اووی لیجنڈری بالو ماما کے بارے میں ہیں، وہ بھی ایک ’’بھگوان کی طرح‘‘ ہیں۔

نصف شب کو، جب چاند بادلوں کے پیچھے چھپ جاتا ہے، بالو ماما کسانوں کو ’’موتیوں کا ڈھیر‘‘ – یعنی کھیتوں میں اچھی فصل – عطا کرتے ہیں۔

جیسے جیسے گانے کا سلسلہ آگے بڑھتا ہے، گلوکارہ ہمیں بتاتی ہیں کہ وہ آمبل (کھچڑی) بنانے کے لیے جوار اور چاول پیس رہی ہیں۔ بالو ماما قد آور، مضبوط جسم والے پہلوان ہیں۔ وہ گورے ہیں اور دودھ پینے کے شوقین ہیں۔ گیت سے پتہ چلتا ہے کہ بالو ماما کی گوری رنگت شاید اس دودھ کی وجہ سے ہے جسے وہ پیتے ہیں کیونکہ عموماً سورج کی تپش کسی بھی چرواہے کی جلد کو سیاہ کر دیتی ہے، جو لمبے وقت تک کھلے آسمان تلے جانوروں کو چرانے کا کام کرتا ہے۔

اس سلسلہ کے آخر میں چار گیت گلوکارہ کی خداترسی کو ظاہر کرتے ہیں۔ اس میں بتایا گیا ہے کہ گلوکارہ نے دیوی امبیکا کو اپنے گھر آنے کی دعوت دی ہے۔ وہ پنڈھری یا پنڈھر پور شہر کی تعریف کرتی ہے، جو بھگوان وٹھل اور رُکمنی کا گھر ہے۔ چکی کے گھومنے پر خاتون گاتی ہے، ’’رُکمنی وہاں رہتی ہے اور راج کرتی ہے، ان کی دائمی سلطنت میں۔‘‘

گلوکارہ نے آگے کہا کہ پنڈھرپور میں تلسی کے اتنے باغ ہیں کہ ’’میرے بھگوان وٹھل کو رتھ چلانے کی جگہ نہیں ہے۔‘‘

آخری اووی میں بھگوان وٹھل کی اپنے عقیدت مندوں کے لیے محبت اور لگاؤ کو ظاہر کیا گیا ہے۔ گلوکارہ مشہور بھکتی شاعر سنت نام دیو کے بارے میں بات کرتی ہے، جو بھگوان وٹھل کے پکّے عقیدت مند ہیں۔ جب نام دیو کے یہاں ایک بیٹا پیدا ہوتا ہے، تو وٹھل خود بچے کی پیدائش کے بارہویں دن روایتی نام رکھنے کی تقریب کا اہتمام کرتے ہیں۔

مہاراشٹر کے بالو ماماچے میتگے گاؤں کی خواتین کے ذریعہ گائے گئے یہ گیت سنیں۔

میرا پہلا گیت، اے خاتون، میرے بھگوان جیوتبا کے لیے ہے
اس کے مقدس دھاگے کے لیے موتیوں کی دوہری مالا ہے

اے خاتون، آدھی رات کو چاند بادلوں میں چھپ جاتا ہے
بالو ماما، جو ایک دیوتا کی مانند ہے، موتیوں کا ڈھیر [یعنی اچھی فصل] دیتا ہے

میں جوار اور چاول پیس کر کھچڑی بناتی ہوں
دوپہر کو میرا بالو ماما سرور میں ہوتا ہے

یہ کون ہے جو سفید رنگ کا ہے اور سو رہا ہے، یہ پرمسرت بالو ماما ہے
وہ پہلوان ہے، دودھ کا شوقین ہے، ہاں، اسے دودھ پینا پسند ہے

اے خاتون، میری دیوی کو دعوت بھیج
میری دیوی، میری امبیکا کو

اے خاتون، پنڈھری ناہموار زمین پر بنی ہے
رکمنی وہاں رہتی ہے اور راج کرتی ہے، ان کی دائمی سلطنت میں*

پنڈھر پور میں کتنے ہی تلسی کے باغ لگائے گئے ہیں
میرے بھگوان وٹھل کے رتھ کو چلنے کی جگہ نہیں ہے

اے خاتون، پنڈھر پور کی سبھی گلیاں سجائی گئی ہیں
نام دیو کے یہاں ایک بیٹا ہوا ہے

اور وٹھل اس بچے کے اوپر
بارہ ہاتھ کی چادر ڈال دیتے ہیں

نوٹ: *اس اووی میں گلوکارہ نے پنڈھر پور میں وٹھل اور رکمنی کے دور کو بیان کرنے کے لیے چودہ چوکٹی/چوکڑی یا چودہ مربع کی اصطلاح استعمال کی ہے۔ یہ ایک ایسی سلطنت کی نشاندہی کرتا ہے جو طویل عرصے تک قائم رہتی ہے۔ مذہبی لوک داستانیں بتاتی ہیں کہ یہ بادشاہت سینکڑوں ہزار سال تک ناقابلِ فنا رہے گی۔ ہندو صحیفوں کے مطابق، ایک چوکٹی سے مراد کرت، تریتا، دواپار، اور کل یگ کے ایک دور کی تشکیل کرتے ہیں۔ بھکتی سنت شاعر تکارام کی ایک نظم کے علاوہ، یہ لفظ ادب میں بڑے پیمانے پر استعمال ہوا ہے۔

فنکارہ/گلوکارہ: سنیتا جادھو، سونا بھارمل، لکشمی ڈَوری، سُلابائی جادھو، گیتانجلی ڈَوری، ہیمل بھارمل، دارکوبائی مانے، مکتا بائی تامبیکر، انوبائی مانے، سمن ستویکر

گاؤں: بالو ماماچے میتگے

تعلقہ: کاگل

ضلع: کولہاپور

تاریخ: یہ گیت ۱۷ مئی ۲۰۱۸ کو ریکارڈ کیے گئے اور تصویریں کھینچی گئیں۔

پوسٹر: سنچیتا ماجی

ہیما رائیرکر اور گی پائیٹواں کے ذریعہ تیار کردہ اصل گرائنڈمل سانگس پروجیکٹ کے بارے میں پڑھیں۔

ترجمہ نگار: عبدالحفیظ