آشا اوگلے: ۱۹۳۶-۲۰۲۵

’’میں چاہتی ہوں کہ او وی کے ترجموں پر کام کرتی رہوں۔‘‘

آشا تائی نے جب یہ بات کہی تھی، تب ان کی عمر ۸۰ سے کافی اوپر تھی۔ وہ گرنے کی وجہ سے لگی چوٹ سے جوجھ رہی تھیں اور لیپ ٹاپ استعمال کرنا ان کے لیے مشکل ہو گیا تھا۔ اس لیے ہم نے ہاتھ سے تحریر کردہ ترجموں کی جانب رخ کیا۔ وہ ۸۰ سے ۱۰۰ اشعار والے پرنٹ آؤٹ پر ترجمہ لکھا کرتی تھیں۔ ایک بَیچ پورا ہونے کے بعد وہ اگلے ترجمے میں مصروف ہو جاتی تھیں۔

جتیندر میڈ ان کے ساتھ مل کر ان ترجموں پر کام کرتے اور انہیں ڈیٹابیس میں اپ ڈیٹ کرتے تھے۔

جتیندر میڈ بتاتے ہیں، ’’لائبریرین ایک سنجیدہ آدمی ہوتا ہے، جو کتابوں کی دیکھ ریکھ کرتا ہے، کالج کے دنوں تک میری یہی سمجھ تھی۔ مگر ۱۹۹۶ میں جب میں ہیما تائی رائیرکر کے گھر آشا تائی اوگلے سے ملا، تو یہ [محدود] سمجھ ختم ہو گئی۔‘‘ انہوں نے آشا تائی کے ساتھ تقریباً تین دہائیوں تک، ۱۹۹۶ سے لے کر ان کے آخری دنوں تک، چکّی کے گانوں کے ترجمہ پر کام کیا۔

آشا اوگلے نے فرنچ میں ایم اے اور لائبریری سائنس میں ڈپلومہ کیا تھا۔ مراٹھی اور فرنچ سے انگریزی میں ترجمہ کا ان کا لمبا رشتہ اور تجربہ تھا۔ سال ۱۹۶۳ میں گریجویشن کرنے کے بعد انہوں نے ۱۹۷۲ سے ۱۹۷۹ تک لیور پول پبلک لائبریری اور ماریشس یونیورسٹی لائبریری میں ٹرینر کے طور پر کام کیا۔ سال ۱۹۸۱ سے لے کر ۱۹۹۶ میں اپنے ریٹائرمنٹ تک، انہوں نے پونے میں واقع گوکھلے انسٹی ٹیوٹ آف پالیٹکس اینڈ اکنامکس میں ڈاکیومنٹیشن آفیسر اور لائبریرین کے طور پر کام کیا۔ سال ۱۹۸۳ سے ۲۰۰۸ تک انہوں نے گی پائیٹواں اور ہیما رائیرکر کے ساتھ مل کر سینٹر فار کوآپریٹو ریسرچ اِن سوشل سائنسز کے لیے ایڈٹنگ اور ترجمے کا کام کیا۔

اس مہینہ ۱۳ ستمبر، ۲۰۲۵ کو آشا اوگلے کا ۸۹ سال کی عمر میں انتقال ہو گیا۔

ایک ماں کی طرح دیکھ بھال کرنے والی آشا تائی سبھی سے پیار سے باتیں کرتی تھیں اور لوگوں کے گھر والوں کی خبر خیریت پوچھا کرتی تھیں۔ جتیندر کہتے ہیں، ’’آشا تائی میرے لیے ایک انسائیکلوپیڈیا تھیں۔ ہر بار جب میں ان سے ملتا، کچھ نیا سیکھتا تھا۔‘‘

ان کا کام طویل، وسیع اور منظم ہوتا تھا۔ انہوں نے کتابوں کے وسیع ذخیرہ کو درجہ بند کیا اور رائیکر بنگلہ میں ایک لائبریری کھڑی کی، جو گرائنڈ مل سانگز پروجیکٹ کے شریک کار بانی ڈاکٹر گی پائیٹواں اور ہیما رائیرکر کی رہائش گاہ تھی۔

جتیندر میڈ کہتے ہیں، ’’میرے لیے انہیں آخری بار الوداع کہنا کافی مشکل رہا۔ وہ ایک مضبوط انسان تھیں، کبھی کسی کے آگے نہیں جھکیں اور انہوں نے زندگی کے ہر چیلنج کا ہمت اور پوری خود اعتمادی کے ساتھ سامنا کیا۔ ان کی شخصیت کی یہ خوبی میرے لیے حوصلہ کا باعث ہے۔ وہ اب ایک الگ سفر پر نکل گئی ہیں۔ پھر بھی میں اپنے ارد گرد ان کی موجودگی محسوس کرتا ہوں۔ ان کے خیالات ہمیشہ مجھے روشنی دیں گے اور زندگی بھر میرے ساتھ رہیں گے۔‘‘

آشا تائی کی شکل میں ہم نے ایک بیش قیمتی شریک کار اور دوست کھویا ہے۔ ان کا جی ایس پی میں بہت بڑا تعاون رہا ہے۔ او وی کا ترجمہ کرتے وقت آشا تائی موضوع کی باریکیوں، ایک او وی کے لفظی معنی پر اپنے خیالات اور اس مخصوص گیت کی تخلیق کرتے وقت ایک عورت کے ذہن میں آنے والے خیالات پر بات کیا کرتی تھیں۔

آشا تائی ایک اچھی قاری تھیں۔ وہ مصنفوں اور دانشوروں کی تخلیقات، مختلف موضوعات پر تفتیشی مضامین پڑھا کرتی تھیں۔ اس سے ان کے الفاظ اور تحریر میں خیالات کی گہرائی آ جاتی تھی۔

میدھا کالے کے ذریعہ لیا گیا ان کا ویڈیو انٹرویو اس حقیقت کی تصدیق کرتا ہے کہ ان کی زندگی اور کام پاری میں ان کے ساتھیوں، سبھی ترجمہ نگاروں کے لیے حوصلہ کا باعث ہے اور خواتین اور معاشرہ کے بارے میں سیکھنے کا ایک عمدہ ذریعہ ہے۔

ترجمہ نگار: قمر صدیقی