ఆశా ఓగ్లే: 1936 - 2025

"నేను ఒవీ అనువాదాలపైనే కృషిని కొనసాగించాలనుకుంటున్నాను."

ఈ మాటలు చెప్పే సమయానికి ఆశాతాయి తొంభై ఏళ్ళకు దగ్గరపడుతున్నారు. కింద పడిపోవటంతో అయిన గాయం నుండి కోలుకుంటోన్న ఆమెకు ల్యాప్‌టాప్ ఉపయోగించడం కష్టంగా ఉంది. దాంతో, మేం చేతి రాత అనువాదాలకు మారాం. 80 నుండి 100 ద్విపదలు ముద్రించిన కాగితంపై ఆమె తన అనువాదాలను రాసేవారు. ఆ బ్యాచ్ పూర్తయిన తర్వాత, ఆమె తర్వాతి దానిపై పనిచేసేవారు.

ఈ అనువాదాలపై ఆమెతో కలిసి పనిచేసిన జీతేంద్ర మైడ్, వాటిని డేటాబేస్‌లోకి అప్‌డేట్ చేశారు.

"ఒక గ్రంథాలయాధికారి అంటే పుస్తకాలను జాగ్రత్తగా చూసుకునే ఒక గంభీరమైన వ్యక్తి అనేది కళాశాల రోజుల వరకు నాకున్న అవగాహన. కానీ 1996లో నేను హేమాతాయి రాయిర్‌కర్ ఇంట్లో అశాతాయి ఓగ్లేను కలిసినప్పుడు, ఈ [సంకుచితమైన] అవగాహన మాయమైపోయింది," అని జీతేంద్ర మైడ్ చెప్పారు. 1996 నుండి ఆమె చివరి రోజుల వరకు దాదాపు మూడు దశాబ్దాల పాటు విసుర్రాయి పాటలను అనువదించడంలో ఆయన ఆశా తాయితో కలిసి పనిచేశారు.

ఆశా ఓగ్లే ఫ్రెంచ్‌లో ఎమ్.ఎ., లైబ్రరీ సైన్స్‌లో డిప్లొమా పట్టా పొందారు. మరాఠీ, ఫ్రెంచ్ భాషలను ఆంగ్లంలోకి అనువదించడంలో ఆమెకు సుదీర్ఘమైన అనుభవంతో పాటు అనుబంధం కూడా ఉంది. 1963లో పట్టభద్రురాలైన తర్వాత ఆమె 1972 నుండి 1979 వరకు లివర్‌పూల్ పబ్లిక్ లైబ్రరీ, మారిషస్ విశ్వవిద్యాలయ లైబ్రరీలలో ఇంటర్న్‌గా పనిచేశారు. 1981 మొదలుకొని, 1996లో పదవీ విరమణ చేసే వరకు ఆమె పుణేలోని గోఖలే ఇన్‌స్టిట్యూట్ ఆఫ్ పాలిటిక్స్ అండ్ ఎకనామిక్స్‌లో డాక్యుమెంటేషన్ అధికారిగానూ, గ్రంథాలయాధికారిగానూ పనిచేశారు. 1983 నుండి 2008 వరకు ఆమె గీ పొయిత్వా, హేమా రాయిర్‌కర్‌ల సన్నిహిత సహకారంతో సెంటర్ ఫర్ కోఆపరేటివ్ రీసెర్చ్ ఇన్ సోషల్ సైన్సెస్ కోసం సంపాదకీయ, అనువాద పనులను నిర్వహించారు.

ఆశా ఓగ్లే సెప్టెంబర్ 13, 2025న 89 సంవత్సరాల వయసులో మరణించారు.

అందరితో ఆప్యాయంగా మాట్లాడే ఆశా తాయి, ఒక తల్లిలాగా శ్రద్ధగా, వారి కుటుంబ సభ్యుల క్షేమసమాచారాల గురించి కూడా అడుగుతారు. "ఆశా తాయి నాకొక ఎన్‌సైక్లోపీడియా వంటివారు. నేను ఆమెను కలిసిన ప్రతిసారీ, ఏదో ఒకటి కొత్తగా నేర్చుకుంటాను," జీతేంద్ర చెప్పారు.

ఆమె పని సమగ్రంగా, వివరంగా, చక్కగా ఉండేది. గొప్ప పుస్తకాల సేకరణను వర్గీకరించి, విసుర్రాయి పాటల ప్రాజెక్ట్ (జిఎస్‌పి) సహ వ్యవస్థాపకులైన డాక్టర్ గీ పొయిత్వా, హేమా రాయిర్‌కర్‌ల నివాసమైన రాయిర్‌కర్‌ బంగ్లాలో ఒక గ్రంథాలయాన్ని ఆమె ఏర్పాటు చేశారు.

"ఆమెకు నా చివరి వీడ్కోలు చెప్పడం నాకు చాలా కష్టంగా ఉంది. ఆమె చాలా దృఢమైన వ్యక్తి, ఎప్పుడూ ఎవరికీ తలవంచలేదు, జీవితంలోని ప్రతి సవాలును ధైర్యంగా, పూర్తి విశ్వాసంతో ఎదుర్కొన్నారు. ఈ వ్యక్తిత్వ లక్షణం నాకు చాలా స్ఫూర్తినిచ్చింది. ఈ రోజున ఆమె భిన్నమైన ప్రయాణంలో సాగిపోయారు. అయినప్పటికీ, నా చుట్టూ ఆమె ఉనికిని నేను అనుభవిస్తున్నాను. ఆమె ఆలోచనలు ఎల్లప్పుడూ వెలుగును ప్రసరిస్తూ నా జీవితాంతం నాతోనే ఉంటాయి," అన్నారు జీతేంద్ర మైడ్.

ఆశా తాయి రూపంలో మనం ఒక అమూల్యమైన సహోద్యోగిని, స్నేహితురాలిని కోల్పోయాం. జిఎస్‌పి కోసం ఆమె చేసిన కృషి అపారమైనది. ద్విపదలను అనువదించేటప్పుడు, విషయంలోని చిక్కులను, ఆ ఒవీలోని సాహిత్యపరమైన అర్థాన్ని, నిర్దిష్టమైన ఆ పాటను సృష్టించేటప్పుడు ఒక స్త్రీ మనస్సులోని ఆలోచనలను గురించి ఆశా తాయి చర్చించేవారు.

ఆశా తాయి విస్తృతంగా చదివేవారు. ఆమె ఆలోచనాపరుల, మేధావుల రచనలను, వివిధ అంశాలపై పరిశోధనాత్మక వ్యాసాలను చదివేవారు. ఇది ఆమె మాటలలో, రచనలలో ఆలోచనకు గాఢతను ఇచ్చింది.

ఆమె జీవితం, ఆమె పని PARIలోని ఆమె సహోద్యోగులకు, అనువాదకులందరికీ ప్రేరణగా నిలిచాయని; మహిళలకు, సమాజానికి నేర్చుకునేందుకు అద్భుతమైన వనరుగా ఉన్నాయనే వాస్తవాన్ని మేధా కాళే ఆమెతో చేసిన వీడియో ఇంటర్వ్యూ బలపరుస్తోంది.