ஆஷா ஓகலே: 1936-2025

”ஒவி செய்யுள்களில் தொடர்ந்து பணியாற்ற விரும்புகிறேன்.”

இதை சொல்லும்போது எண்பது வயதுகளின் பிற்பகுதியில் ஆஷாதய் இருந்தார். கீழே விழுந்து அடிபட்டதிலிருந்து மீண்டு வந்து கொண்டிருந்த அவர், மடிக்கணிணி பயன்படுத்த சிரமப்பட்டார். எனவே கையால் எழுதப்படும் மொழிபெயர்ப்பு முறைக்கு நாங்கள் மாறினோம். 80-லிருந்து 100 செய்யுள்களை கொண்ட பிரிண்ட் அவுட்டில் அவர் எழுதுவார். அது முடிந்ததும் அடுத்ததில் மொழிபெயர்ப்பார்.

அவருடன் இப்பணியில் ஜிதேந்திர மெய்த் வேலை பார்த்து, செய்யுள்களை தரவுதொகுப்பில் பதிவேற்றினார்.

“ஒரு நூலகர் என்பவர், புத்தகங்களை பராமரிக்கும் நபர் என்பதுதான் கல்லூரி நாட்கள் வரை என்னுடைய புரிதலாக இருந்தது. ஆனால் 1996-ல், ஆஷாதய் ஓகலேவை ஹேமாதய் ரயிர்கரின் வீட்டில் சந்தித்தபோது, இந்த (குறுகிய) புரிதல் மறைந்தது,” என்கிறார் ஜிதேந்திர மெய்த். ஆஷாதய்யுடன் இணைந்து முப்பது வருடங்களாக அரவைக்கல் பாடல்களை மொழிபெயர்க்கும் பணியில் அவர் இயங்கினார். 1996ம் ஆண்டு தொடங்கி ஆஷாதய்யின் கடைசி நாட்கள் வரை.

பிரஞ்ச் மொழி மற்றும் நூலக அறிவியலில் முதுகலை பெற்றிருக்கிறார் ஆஷா ஓகலே. மராத்தி மற்றும் பிரஞ்ச் மொழி எழுத்துகளை ஆங்கிலத்துக்கு மொழிபெயர்க்கும் பணியை பல காலம் செய்து வந்திருக்கிறார். 1963ம் ஆண்டில் பட்டப்படிப்பு முடித்தபிறகு, அவர் லிவர்பூல் பொது நூலகத்தின் பயிற்சி பணியாளராக பணியாற்றினார். மொரிஷியஸ் பல்கலைக்கழக நூலகத்தில் 1972 தொடங்கி 1979 வரை பணியாற்றினார். 1981ம் ஆண்டில், அவர் ஆவணப்படுத்தும் அலுவலராகவும் நூலகராகவும் புனேவின் கோகலே அரசியல் மற்றும் பொருளாதார நிறுவனத்தில் 1996ம் ஆண்டில் பணி ஓய்வு பெறும் வரை பணியாற்றினார். 1983 முதல் 2008 வரை, கய் பொய்தெவின் மற்றும் ஹேமா ராயிர்கர் ஆகியோருடன் இணைந்து சமூக அறிவியல்களுக்கான கூட்டு ஆய்வு மையத்தில் மொழிபெயர்ப்பு மற்றும் செய்தி ஆசிரியர் பணிகளை அவர் மேற்கொண்டார்.

செப்டம்பர் 13, 2025 அன்று ஆஷா ஓகலே தன் 89 வயதில் மறைந்தார்.

அன்புமிக்க தாயாக, ஆஷாதய் அனைவருடனும் அன்போடு பேசுவார். குடும்பத்தை பற்றி விசாரிப்பார். “ஆஷா தய் எனக்கு ஒரு களஞ்சியம் போல. அவரை சந்திக்கும் ஒவ்வொரு முறையும், நான் புதிதாக ஒரு விஷயத்தை கற்றுக் கொள்வேன்,” என்கிறார் ஜிதேந்திரா.

அவரின் பணி விரிவான, செறிவான, தெளிவான பணி ஆகும். எண்ணற்ற புத்தகங்களை அவர் வகைப்படுத்தி, அரவைக்கல் பாடல் பணியின் இணை நிறுவனர்களான டாக்டர் கய் பொய்தெவின் மற்றும் ஹேமா ராயிர்கர் ஆகியோரின் வீடான ராயிர்கர் பங்களாவில் ஒரு நூலகத்தை உருவாக்கினார்.

“அவருக்கு பிரியாவிடை கொடுக்க எனக்கு மிகவும் கஷ்டமாக இருந்தது. உறுதியான நபரான அவர், எவருக்கும் தலை வணங்கியதில்லை. வாழ்க்கையின் சவால்களை தைரியமாகவும் முழு நம்பிக்கையோடும் எதிர்கொண்டவர். அவரின் இந்த தன்மைதான் என்னை ஊக்குவித்தது. இன்று அவர் வேறு ஒரு பயணத்துக்கு நகர்ந்து விட்டார். இருந்தும், அவரின் இருப்பை என்னை சுற்றி நான் உணர முடிகிறது. அவரின் எண்ணங்கள் எப்போதும் ஒளி கொடுத்து, வாழ்க்கை முழுவதும் என்னுடன் இருக்கும்,” என்கிறார் ஜிதேந்திரா மெய்த்.

ஆஷா தய் மறைவில், விலைமதிப்பற்ற ஒரு சக ஊழியரையும் நண்பரையும் நாங்கள் இழந்திருக்கிறோம். அரவைக்கல் பாடல்கள் பணியில் அவரது பணி அரும்பணி. கவிதைகளை மொழிபெயர்க்கும்போது, அவற்றின் நுட்பங்களை பற்றி ஆஷா தய் பேசுவார். ஒவி கவிதை அர்த்தம் பற்றிய அவரது பார்வையை சொல்வார். குறிப்பிட்ட பாடலை உருவாக்கும்போது பெண்ணின் மனதில் இருந்தவற்றை பற்றிய அவரது சிந்தனையை பகிர்ந்து கொள்வார்.

ஆஷா தய், பெரியளவில் வாசிப்பவர். அறிஞர்கள், சிந்தனையாளர்கள் எழுத்துகளையும் பல தளங்களிலான ஆய்வுக் கட்டுரைகளையும் வாசிப்பார். இவைதாம் அவரின் சிந்தனையிலும் வார்த்தைகளிலும் எழுத்துகளிலும் ஆழத்தை கொடுத்தன.

மேதா கலே அவரை நேர்காணல் செய்த காணொளியும் பாரியில் பணிபுரிபவர்களுக்கும் எல்லா மொழிபெயர்ப்பாளர்களுக்கும் அவர் பெரும் ஊக்கமாகவும் பெண்கள் மற்றும் சமூகத்துக்கான சிறந்த கற்றல் வழியாகவும் இருப்பதை உறுதி செய்கிறது.