ആശ ഒഗളെ: 1936-2025

“ഓവിസുകളുടെ പരിഭാഷ തുടരാൻ എനിക്ക് ആഗ്രഹമുണ്ട്.”

ഇത് പറയുമ്പോൾ ആശാതായിക്ക് എൺപത് കഴിയാറായിരുന്നു. ഒരു വീഴ്ചയിൽനിന്ന് ഭേദപ്പെട്ടുവരുന്ന സമയമായിരുന്നു അത്. ലാപ്ടോപ്പ് ഉപയോഗിക്കാൻ ബുദ്ധിമുട്ട് നേരിട്ടു അവർക്ക്. അതുകൊണ്ട് ഞങ്ങൾ കൈകൊണ്ടെഴുതിയ പരിഭാഷകളിലേക്ക് മാറി. ഒരു സമയം 80-100 ഈരടികളുള്ള പരിഭാഷകൾ അവർ ചെയ്തുകൊണ്ടിരുന്നു. അത് കഴിഞ്ഞ്, അടുത്തതിലേക്ക് കടക്കും. അതായിരുന്നു അവരുടെ രീതി.

ചെയ്തുതീർന്ന പരിഭാഷകൾ പതിവായി ഡേറ്റാബേസിലേക്ക് മാറ്റിക്കൊണ്ട് ജിതേന്ദ്ര മയ്ഡ് അവരുടെകൂടെത്തന്നെ ഉണ്ടായിരുന്നു.

“കൊളേജുകാലം വരെ എൻ്റെ ധാരണ, ഒരു ലൈബ്രേറിയൻ എന്നാൽ, പുസ്തകങ്ങളെ ശ്രദ്ധയോടെ സൂക്ഷിക്കുന്ന ആൾ എന്നായിരുന്നു. എന്നാൽ 1996-ൽ ഹേമതായി റായിർകറുടെ വീട്ടിൽവെച്ച് ആശാതായ് ഒഗളെയെ കണ്ടുമുട്ടിയപ്പോൾ ഈ ധാരണ മാറി,” ജിതേന്ദ്ര മയ്ഡ് പറയുന്നു. നാല് പതിറ്റാണ്ടോളം കാലം - 1996 മുതൽ ആശാതായിയുടെ അവസാനകാലംവരെ – ഗ്രൈൻഡ്മിൽ സോംഗുകൾ പരിഭാഷപ്പെടുത്തുന്നതിൽ അദ്ദേഹം അവരുടെ കൂടെ പ്രവർത്തിച്ചു.

ഫ്രഞ്ച് ഭാഷയിൽ എം.എ.യും ലൈബ്രറി സയൻസിൽ ഡിപ്ലോമയുമുണ്ടായിരുന്നു ആശ ഒഗളെയ്ക്ക്. മറാത്തിയും ഫ്രഞ്ചും ഇംഗ്ലീഷിലേക്ക് പരിഭാഷപ്പെടുത്തുന്നതിൽ ദീർഘകാല പരിചയവും അനുഭവസമ്പത്തുമുണ്ടായിരുന്നു അവർക്ക്. 1963-ൽ ബിരുദാനന്തരം ലിവർപൂൾ പബ്ലിക്ക് ലൈബ്രറിയിൽ ഇൻ്റേണായി അവർ ജോലി ചെയ്തു. 1972 മുതൽ 1979 വരെ മൗറീഷ്യസ് യൂണിവേഴ്സിറ്റി ലൈബ്രറിയിലും. 1982-ൽ അവർ പുണെയിലെ ഗോഖലെ ഇൻസ്ടിട്യൂറ്റ് ഓഫ് പൊളിറ്റിക്സ് ആൻഡ് ഇക്കണോമിക്സിൽ ഡോക്യുമെൻ്റേഷൻ ഓഫീസറും ലൈബ്രേറിയനുമായി പ്രവർത്തിച്ചു. 1983 മുതൽ 2008-വരെ ഗിയ് പൊയിത്വ, ഹേമ രായിർകർ എന്നിവരോടൊപ്പം അവർ സെൻ്റർ ഫോർ കോ-ഓപ്പറേറ്റീവ് റിസർച്ച് ഇൻ സോഷ്യൽ സയൻസസിനുവേണ്ടി എഡിറ്റോറിയൽ, പരിഭാഷാ ജോലികൾ ചെയ്തു.

2025 സെപ്റ്റംബർ 13-ന്, 89-ആം വയസ്സിൽ ആശ ഒഗളെ അന്തരിച്ചു.

പരിചയപ്പെടുന്നവരോടെല്ലാം ഒരമ്മയുടെ സ്നേഹത്തോടെ സംസാരിക്കുകയും അവരുടെ കുടുംബത്തിൻ്റെ ക്ഷേമവിവരങ്ങൾ അന്വേഷിക്കുകയും ചെയ്തു ആശ തായ്. “ആശ തായ് എന്നെ സംബന്ധിച്ചിടത്തോളം ഒരു വിജ്ഞാനകോശമായിരുന്നു. ഓരോ തവണ കാണുമ്പോഴും, അവരിൽനിന്ന് എന്തെങ്കിലുമൊന്ന് പഠിക്കാൻ എനിക്ക് സാധിച്ചിരുന്നു,” ജിതേന്ദ്ര പറയുന്നു.

ബൃഹത്തും, വിശദാത്മകവും ക്രമമുള്ളതുമായിരുന്നു അവരുടെ തൊഴിൽ ശൈലി. ഗ്രൈൻഡ്മിൽ സോംഗ്സ് പ്രൊജക്ടിൻ്റെ (ജി.എസ്.പി.) സഹസ്ഥാപകരായ ഡോ. ഗിയ് പൊയിത്വയുടേയും ഹേമ രായിർകറിൻ്റേയും വസതിയായ രായിർകർ ബംഗ്ലാവിൽ അവർ പുസ്തകങ്ങളുടെ വലിയൊരു ശേഖരം പട്ടികപ്പെടുത്തിവെക്കുകയും ഒരു ലൈബ്രറി ഒരുക്കുകയും ചെയ്തു.

“അവർക്ക് അന്ത്യയാത്ര നേരാൻ എനിക്ക് സാധിക്കില്ല. നല്ല ധൈര്യമുള്ള ആളായിരുന്നു അവർ. ആരുടെ മുമ്പിലും തലകുനിക്കാതെ, ജീവിതത്തിലെ വെല്ലുവിളികളെ ധീരമായും ആത്മവിശ്വാസത്തോടെയും നേരിട്ടിരുന്ന ഒരാൾ. ഈ വ്യക്തിത്വം എനിക്ക് ധൈര്യം നൽകിയിട്ടുണ്ട്. ഇന്ന് അവർ മറ്റൊരു യാത്രയിലാണ്. എന്നിട്ടും എനിക്ക് ചുറ്റും അവരുടെ സാന്നിധ്യമുള്ളതുപോലെ തോന്നുനു. എൻ്റെ ജീവിതത്തിലുടനീളം അവരുടെ ചിന്തകൾ വെളിച്ചം വീശുകയും നിലനിൽക്കുകയും ചെയ്യും,” ജിതേന്ദ്ര മേയ്ഡ് പറയുന്നു.

ആശ തായിയുടെ മരണത്തോടെ നമുക്ക് നഷ്ടപ്പെട്ടത്, വിലമതിക്കാനാവാത്ത ഒരു സഹപ്രവർത്തകയേയും സുഹൃത്തിനേയുമാണ്. ജി.എസ്.പി.യിലേക്കുള്ള അവരുടെ സംഭാവന വളരെ ബൃഹത്തായിരുന്നു. ഈരടികൾ പരിഭാഷപ്പെടുത്തുമ്പോൾ ആ വിഷയത്തിൻ്റെ സങ്കീർണ്ണതയെക്കുറിച്ചും ഈരടിയുടെ നേരർത്ഥത്തെക്കുറിച്ചുള്ള തൻ്റെ ധാരണയെക്കുറിച്ചും, ആ പ്രത്യേക പാട്ട് രചിച്ച ആ അറിയാത്ത പൂർവ്വികയുടെ മനസ്സിലുണ്ടായിരുന്നേക്കാവുന്ന മനോചിന്തകളെക്കുറിച്ചുമൊക്കെ ആശാ തായ് ചർച്ച ചെയ്യുക പതിവായിരുന്നു.

ധാരാളം വായിക്കുമായിരുന്നു ആശ തായി. വിവിധ വിഷയങ്ങളെക്കുറിച്ച് വലിയ ചിന്തകരും ബുദ്ധിജീവികളും എഴുതിയ അന്വേഷ്ണാത്മകമായ പുസ്തകങ്ങൾ അവർ വായിച്ചിരുന്നു. ആ ചിന്തകളുടെ ആഴമുള്ളതായിരുന്നു ആശ തായിയുടെ വാക്കുകളും എഴുത്തുകളും.

പാരിയിലെ അവരുടെ സഹപ്രവർത്തകർക്കും എല്ലാ പരിഭാഷകർക്കും എന്നും പ്രചോദനമായിരുന്നു അവരുടെ ജീവിതവും കർമ്മമേഖലയും എന്ന് അടിവരയിടുന്നതാണ് മേധ കാലെയുമായി അവർ നടത്തിയ ഈ വീഡിയോ അഭിമുഖം. സ്ത്രീകൾക്കും സമൂഹത്തിനും പലതും പഠിക്കാനുള്ള അനുപമമായ സ്രോതസ്സുകൂടിയാണ് അവരുടെ ജീവിതം.