आशा ओगाले: 1936 – 2025

“मंय ओवी अनुवाद के काम ला करत रहे ला चाहूँ.”

आशाताई ये बात बताय बखत 80 बछर के उमर के सिरताही बेरा मं रहिस. वो ह एक ठन अल्हन के बाद बने होवत रहिस अऊ वोला लैपटॉप मं काम करे मुस्किल लागत रहिस. ते पायके, हमन हाथ ले अनुवाद करे के तरीका अपनायेन – वो ह 80 ले 100 दोहा के पन्ना मं अनुवाद लिखय. एक खेप के काम सिरोय के बाद, वो ह दूसर खेप के काम सुरु करत रहिन.

जितेंद्र मैद ह ये अनुवाद मन ला लेके ओंकर संग मिलके काम करिन अऊ वोला डेटाबेस मं अपडेट करिन.

जितेंद्र मैद कहिथें, “कालेज के बखत मं मोर बिचार रहिस के लाइब्रेरियन ह एक ठन गंभीर किसम के मइनखे होथे जेन ह किताब मन के देखभाल करथे. फेर साल 1996 मं जब मंय हेमाताई रायरकर के घर आशा ताई ओगाले ले मिलेंय, त मोर ये बिचार ह बदल गे.” वो ह करीबन 30 बछर तक ले – 1996 ले लेके ओकर आखिरी साँस तक – जांता गीत के अनुवाद के काम ला आशा ताई के संग करिस.

आशा ओगाले ह फ्रेंच मं एम.ए करे रहिन अऊ लाइब्रेरी साइंस मं डिप्लोमा घलो हासिल करे रहिन. वोला मराठी अऊ फ्रेंच ले अंगरेजी अनुवाद करे के लंबा अनुभव रहिस. साल 1963 मं बीए करे के बाद, वो ह लिवरपूल पब्लिक लाइब्रेरी अऊ साल 1972 ले 1979 तक ले मॉरिशस यूनिवर्सिटी लाइब्रेरी मं इंटर्न के रूप मं काम करिन. साल 1981 मं, वो ह पुणे मं गोखले इंस्टीट्यूट ऑफ पॉलिटिक्स एंड इकोनॉमिक्स मं डॉक्यूमेंटेशन ऑफिसर अऊ लाइब्रेरियन के रूप मं काम करिन अऊ साल 1996 मं रिटायर होय तक ले उहिंचे काम करत रहिन. साल 1983 ले 2008 तक ले, वो ह गाय पोइतेविन अऊ हेमा रायरकर के संग मिलके सेंटर फॉर कोऑपरेटिव रिसर्च इन सोशल साइंसेज मं एडिटर अऊ ट्रांसलेटर के रूप मं काम करिन.

आशा ओगाले के 13 सितंबर 2025 मं 89 बछर के उमर मं निधन होगे.

महतारी कस सब्बो के देखरेख करेइय्या आशा ताई सब्बो ले दया-मया संग गोठियांय अऊ ओकर घर परिवार के हालचाल पूछंय. जितेन्द्र कहिथे, “आशा ताई मोर बर गियान के खजाना रहिन. ओकर ले भेंट होय के हरेक बखत मोला नवा सीखे ला मिलय.”

ओकर काम सबके समझ के, बड़े अऊ साफ सुथरा रहिस. वो ह किताब मन के बड़े अकन संग्रह ला जतन करके रखिस अऊ राइकर बंगला मं एक ठन लाइब्रेरी बनाइस. ये बंगला डॉ. गाय पोइतेविन अऊ हेमा रायरकर के घर आय, जेन ह ग्राइंडमिल सॉंग्स प्रोजेक्ट (जीएसपी) के सह-संस्थापक आंय.

जितेंद्र मैद कहिथें, “ओंकर आखिरी बिदाई बखत मोला भारी मुस्किल होइस. वो ह भारी मजबूत मइनखे रहिन, वो ह कभू ककरो आगू मुड़ी नइ झुकाइस अऊ जिनगी के हरेक चुनोती के डटके अऊ पूरा आत्मविस्वास ले जूझिस.ओंकर ये खासियत मोर बर प्रेरणा स्रोत रहिस. आज वो ह एक ठन नवा दुनिया बर निकरगे हवंय. ओकर बाद घलो, मोला लागथे के वो ह मोर तीर-तखारेच मं हवंय. ओंकर बिचार मोला नवा रद्दा दिखावत रइही अऊ मोर जम्मो जिनगी मोर संग रइही.”

आशा ताई के गुजर जाय ले हमर एक झिन नोहर सहकर्मी अऊ संगवारी के कमी होगे हवय. ओंकर गीएसपी बर योगदान के कोनो तोल नइ ये. दोहा मन के अनुवाद करे बखत, आशाताई बिसय के बारीकी, ओवी के शाब्दिक अरथ अऊ वो गीत ला रचे बखत माईलोगन के मन मं काय बिचार रहत रहिस, ये सब्बो बात ला लेके चर्चा करत रहिन.

आशा ताई ला किताब पढ़े के भारी सऊक रहिस – वो ह विचारक अऊ विद्वान मन के रचना मन ला अऊ कतको बिसय के शोधवाले लेख पढ़य. येकर ले ओंकर बात अऊ लेखन मं विचार के गहिर ह झलकत रहिस.

मेधा काले के करे गे ओंकर ये वीडियो इंटरव्यू ये बात ला अऊ घलो पुख्ता करथे के ओंकर जिनगी अऊ ओंकर काम, ओंकर संग काम करेइय्या मन के, सब्बो अनुवादक मन के, माईलोगन मन के अऊ समाज बर प्रेरणा के सबले सुग्घर स्रोत आंय.