غیر برابری کے دور میں زراعت اور کاشتکار

سال ۱۹۸۴ میں جب ’فرنٹ لائن‘ (انگریزی رسالہ) کی شروعات ہوئی تھی، میں تب سے کسانوں کے گھر جا رہا ہوں۔ ہر گھر میں تازہ دودھ کے ساتھ استقبال کیا جاتا تھا۔ مغربی مہاراشٹر کے کچھ حصوں میں، گھر سے واپسی کے وقت مزید ایک گلاس دودھ دیا جاتا تھا۔ آندھرا پردیش کے ساحلی علاقوں میں اکثر چاندی کے گلاس میں دودھ دیا جاتا تھا، جو مہمان کی عزت نوازی کا اظہار کرنے کا طریقہ تھا، ساتھ ہی کسان کی بہتر حالت کو بھی بیان کرتا تھا۔

تمل ناڈو کے کسان خاندانوں میں آپ کو پیتل کے صاف گلاسوں میں دودھ دیا جاتا تھا۔ کبھی کبھی، پتیل کے اس گلاس میں شاندار فلٹر کافی دی جاتی تھی۔ سال ۱۹۹۰ کی دہائی آتے آتے، کئی ریاستوں میں چاندی کے گلاس کی جگہ اسٹین لیس اسٹیل کے گلاس آ گئے۔ سال ۱۹۹۱ کے بعد بھی کسان تازہ دودھ پینے کو دیتے تھے، لیکن اب چینی مٹی کے ٹوٹے برتن میں نظر آنے لگے تھے، تو کبھی کنارے سے ٹوٹے اکھڑے پیالے ہوتے تھے۔ نوے کی دہائی کے وسط تک، میں نے خود کو شیشے کے گلاس میں دودھ پیتا ہوا پایا۔

سال ۲۰۰۰ تک، دودھ کی جگہ چائے نے لے لی۔ مہاراشٹر کے ودربھ میں، ۲۰۳-۰۴ میں دودھ کی جگہ کالی چائے آ گئی۔ چائے میں چینی کی مقدار – جو عام طور پر عزت و محبت کی نشانی ہوا کرتی تھی – گھٹتی گئی۔ دہائی کے وسط تک آتے آتے شیشے کا گلاس غائب ہو گیا تھا۔ کالے چائے اب کم مقدار میں پلاسٹک کے اُن پیالوں میں آنے لگی تھی جنہیں آپ ٹرینوں اور بس ڈپو میں دیکھتے ہیں۔

میں سال ۲۰۱۸ میں، مجاہد آزادی بال یادو سے مہاراشٹر کے سانگلی میں واقع ان کے گھر پر ملا۔ کئی گھنٹوں تک چلے انٹرویو کے بعد، انہوں نے مجھے تازہ دودھ پلا کر وداع کیا، جو المونیم کے گلاس میں دیا گیا تھا۔

گلاس اور ان کے معیار میں کمی کا سفر زرعی معیشت کے زوال کا بیانیہ ہے۔ یہ ان اقتصادی پالیسیوں کے تباہ کن اثرات کو بھی ظاہر کرتا ہے، جس کے سہارے پرائیویٹ کمپنیوں نے دودھ (اور تمام دیگر پیداوار) کی قیمتوں کو نیچے دھکیلا ہے۔ یہ سب اس وقت ہو رہا تھا جب ’’بازار پر مبنی قیمت کے تعین‘‘ کا ڈھول پیٹا گیا، اور صارفین کو مہنگی قیمتوں پر چیزیں بیچی جانے لگیں۔

یہ پوری توجہ کے ساتھ تیار کی گئی پالیسیاں تھیں۔ ان میں سے کچھ کے سبب تو کسان خاندانوں کے کم عمر کے لاکھوں نوجوانوں، کمزور بچوں کو بغیر دودھ کے رہنا پڑا۔ کسانوں کے بچوں کو اپنے ہی مویشیوں کا دودھ نہیں مل سکا، کیوں کہ ضروری اخراجات کے لیے پورا دودھ بیچنا پڑتا تھا۔ ایسا صرف دودھ کے ساتھ نہیں ہوا۔ کپاس کی کہانی دیکھئے۔ ستّر کی دہائی کے وسط میں ودربھ علاقہ کا کوئی کسان ایک کوئنٹل یا دو کوئنٹل کپاس بیچتا تھا اور ۱۰-۱۲ گرام سونا خرید لیتا تھا، جو اس کی بیٹی کی شادی کے وقت کام آ جاتا تھا۔ آج وہی کسان اگر ۱۰ کوئنٹل کپاس بھی بیچ دے، تو ۱۰ گرام سونا نہیں خرید سکتا۔

مہاراشٹر میں کپاس کی کم از کم امدادی قیمت (ایم ایس پی) ۷۱۲۲ روپے فی کوئنٹل ہے، لیکن کچھ کو ہی ۶۵۰۰ روپے سے زیادہ مل پاتا ہے۔ پوری ایم ایس پی بھی مل جائے، تو انہیں ۱۰ کوئنٹل کے عوض ۷۱۲۲۰ روپے ملیں گے، جو آج کی تاریخ میں ۱۰ گرام سونے کی قیمت سے کم ہے۔ صاف لفظوں میں کہیں تو، وہ ایک کوئنٹل کپاس فروخت کر کے ایک گرام سونا نہیں خرید پائیں گے۔

یہ گراوٹ اور ’’تبدیلی‘‘ بھی اقتصادی پالیسیوں کی وجہ سے دیکھی گئی۔ نافذ کی جا رہی پالیسیوں اور طریقہ کار نے یہاں اور دنیا کے زیادہ تر ممالک کے کئی دیگر طبقوں پر بھی اثر ڈالا۔ ہم نے ۱۹۹۱ سے یہ کھلا کھیل ہوتے دیکھا۔ دنیا بھر میں یہ باتیں دیکھی گئیں۔

ان شعبوں اور اسکیموں سے حکومت نے کنارہ کشی اختیار کر لی، جن سے غریبوں کا بھلا ہوتا تھا۔ غریب طبقوں کو ملنے والی سبسڈی میں بڑی کٹوتی کرتے ہوئے، امیروں اور کارپوریٹ کمپنیوں کو ’’ترغیب‘‘ کے نام پر بھاری سبسڈی دی گئی۔

زراعت میں حکومت نے پیسہ لگانا کم کر دیا۔ زرعی شعبہ کے مالی قرضوں کو زراعت سے وابستہ کاروباروں میں جھونک دیا گیا۔ بڑے پیمانے پر وسائل کو غریبوں سے چھین کر امیروں کو دے دیا گیا۔ کسان بھاری قرضوں میں دبتے چلے گئے۔ اور کارپوریٹ کمپنیوں کی طاقت بڑھتی ہی گئی۔ کئی عوامی وسائل کی نجکاری کر دی گئی، جس میں چھتیس گڑھ میں ۱۹ کلومیٹر تک بہنے والی ایک ندی شامل ہے۔

ہرچیز کو پرائیویٹ ہاتھوں میں سونپ دیا گیا، یہاں تک کہ دانشوری اور روح کا بھی پرائیویٹائزیشن ہو گیا۔ اور مقامی نظام حکومت کی اندیکھی کی گئی، اور پنچایتی راج کو کارپوریٹ طاقتوں کے خلاف کھڑا کر کے اسے شکست دے دی گئی۔ جیسا کہ آر بی آئی (ریزرو بینک آف انڈیا) کے سابق گورنر وائی وی ریڈی کہتے ہیں: ہم نے دیہی ترقی کی باتیں سنی ہیں، لیکن دیہی ترقی ہوتے ہوئے نہیں دیکھا۔

اور، ظاہر ہے کہ ہم غیر برابری میں لگاتار حیران کن اضافہ ہوتے دیکھ رہے ہیں۔ گزشتہ ۱۰ دسمبر، ۲۰۲۴ (فوربس کے مطابق) تک، ہندوستان کے ۲۱۷ ارب پتیوں (کم از کم ایک بلین ڈالر کے مالک کے پاس مشترکہ طور پر ۱۰۴۱ بلین ڈالر (۱۰۴۱۰۰ کروڑ) کی ملکیت تھی۔ ہم یہاں ایک ٹریلین ڈالر سے زیادہ کے اعداد و شمار کی بات کر رہے ہیں۔ یہ ۹۱ء۱۷ بلین ڈالر کے ہندوستان کے زرعی بجٹ کا ۵۸ گُنا ہے۔ اور ۵۶۲ بلین ڈالر کے ہمارے کل بجٹ کا تقریباً ۸ء۱ گُنا۔ اس بار پر غور کریں: ۲۱۷ لوگوں (یعنی کل آبادی کے ۰۰۰۰۱۵ء۰ فیصد) کے پاس جی ڈی پی کے تقریباً ایک تہائی کے برابر اثاثہ ہے۔

سال ۱۹۹۱ کے بعد کی دہائیوں میںہم نے دیکھا ہے کہ کس طرح کسانوں کے گزارہ کے لیے ضروری چیزوں کی اندیکھی کی گئی ہے۔ سرکار کے ذریعہ چلائی جا رہی منڈیوں کو دھیرے دھیرے ختم کیا گیا ہے۔ پبلک سیکٹر کو منظم اور ناجائز طریقے سے برباد کیا گیا ہے، جس سے زراعت اور کسانوں کو بہت نقصان پہنچا ہے۔ غذائی پیداوار اور اس کی دستیابی پر بہت برا اثر پڑا ہے۔

زرعی یونیورسٹیوں کو کمیونٹی پر مرکوز اداروں سے کارپوریٹ کمپنیوں کی لیباریٹری میں تبدیل کر دیا گیا ہے، جو کافی ڈراؤنی بات ہے۔ کسانوں سے قرض حاصل کرنے کے روایتی ذریعے چھین لیے گئے، جس سے لاکھوں کسانوں کو نئے پرانے ساہوکاروں کے پاس جانے پر مجبور ہونا پڑا۔ کسانوں کو ملنے والی قیمتیں گرتی رہیں، جب کہ بازار میں سامان کی قیمتیں آسمان چھو رہی تھیں۔ ایک مطالعہ کے مطابق، سال ۲۰۰۳ اور ۲۰۱۳ کے درمیان وردربھ میں کپاس کی کھیتی کی لاگت میں اضافہ دیکھا گیا اور ایک ایکڑ کپاس کی کھیتی کی کل لاگت ۲۵۰-۳۰۰ فیصد بڑھ گئی؛ کچھ معاملوں میں تو اس سے بھی زیادہ۔ لیکن کسانوں کی آمدنی کی بات کریں، تو وہ لاگت کے سامنے کچھ بھی نہیں۔ بیجوں کی قیمت نے ہی ان کی حالت پست کر دی۔

کسانوں کی آمدنی؟ خود نیشنل سیمپل سروے (این ایس ایس) کے ۷۷ویں دور کے تازہ ترین اعداد و شمار بتاتے ہیں کہ کاشتکار خاندان ہر مہینے اوسطاً تقریباً ۱۰ ہزار ۲۱۸ روپے کماتے ہیں۔ کیا منظم شعبہ میں کوئی ایسی نوکری ہوگی جس میں اس سے کم از کم دوگنی تنخواہ ملتی ہو؟ اور غور کریں، یہ پورے خاندان کی آمدنی ہے، انفرادی آمدنی نہیں ہے۔ سال ۲۰۱۷ میں، نریندر مودی حکومت نے وعدہ کیا تھا کہ اگلے پانچ سال میں کسانوں کی آمدنی دوگنا کردیں گے۔ حقیقت میں تو ۲۰۱۲-۱۳ اور ۲۰۱۸-۱۹ کے درمیان کھیتی سے ہونے والی آمدنی میں ۱۰ فیصد کی کمی دیکھی گئی۔ زراعت پر مبنی خاندان تو اب مزدوری کر کے اور مویشی پروری کے ذریعہ زیادہ کماتے ہیں۔

جیسا کہ ترقی پذیر ماہرین اقتصادیات نے درج کیا ہے، م نے قیمتوں کی عالم کاری ہوتے دیکھی ہے اور آمدنیوں کی ہندوستان کاری ہی ہوئی۔

سال ۲۰۲۴ تک، چار لاکھ سے زیادہ کسان اپنی جان لے چکے ہیں – پالیسیوں سے پیدا ہوئے بحران کے سبب۔ یہ ایک سرکاری ڈیٹا ہے – اور اصل تعداد سے بہت کم ہے۔

کسانوں اور زرعی مزدوروں کی جان بوجھ کر کی گئی خستہ حالت کے سبب، ۲۰۰۱ اور ۲۰۱۱ کی مردم شماری میں ہندوستان میں بڑے پیمانے پر جاری مہاجرت کی بات سامنے آئی۔ کھیتی اور زرعی معیشت کے ڈوبنے کے سبب، کروڑوں لوگوں نے اپنے گاؤوں کو چھوڑ کر شہروں اور چھوٹے قصبوں کا رخ کیا۔ اسے بری خبر نہیں مانا گیا۔ نہ ہی اسے کسی نے ٹھیک سے کور کیا، سوائے ’فرنٹ لائن‘ (رسالہ) اور ’دی ہندو‘ (انگریزی اخبار) کے۔ ’’ہمیں کروڑوں کسانوں کو زراعت سے باہر کرنا ہوگا،‘‘ نیو لبرل ماہرین اقتصادیات کہتے تھے۔ ٹھیک ہے۔ لیکن کیا آپ نے ان کروڑوں لوگوں سے پوچھا تھا؟ کیا ان کے پاس کوئی اور چارہ تھا؟ انہیں کون سے مواقع کی پیشکش کی گئی تھی؟

اگر آپ کو ایسا لگتا ہے کہ بہت سے کسانوں کو زرعی کاموں سے ہٹانا ضروری ہے، تو اس فیصلہ میں انہیں شامل کیے بغیر آپ ایسا نہیں کر سکتے۔ آپ زراعت اور کسانوں کی زندگی کو برباد کر کے یہ کام نہیں کر سکتے۔

ڈیولپمنٹ اکنامسٹ پروفیسر کے ناگ راج کہتے ہیں کہ ایسا تبھی سوچا جا سکتا ہے، جب ’’(ا) زرعی پیداوار میں بہتری آئے؛ (ب) دیہی اور شہری علاقوں میں معیاری روزگار کے مواقع پیدا ہوں؛ اور (ج) سبھی کو بہتر تعلیم اور طبی خدمات حاصل ہوں، تاکہ ہنرمند اور صحت مند افرادی قوت تیار ہو سکے۔ لیکن حقیقت میں بالکل اس برعکس کے ہوا۔ اور پھر مشکلوں کے سبب دیہی علاقوں میں بڑے پیمانے پر ہو رہی مہاجرت کا استعمال آپ زراعت میں ’اصلاح‘ کے ثبوت کے طور پر کرتے ہیں!‘‘

غور طلب ہے کہ آزادی کے بعد سے ہر مردم شماری میں ہندوستانی کسانوں کی آبادی میں اضافہ ہوا ہے، جس میں ۱۹۹۱ کی مردم شماری بھی شامل ہے۔ اسکے بعد، ایک حیران کر دینے والی گراوٹ دیکھی گئی ہے۔ سال ۲۰۱۱ کی مردم شماری میں کل وقتی کسانوں کی تعداد میں ۷۲ لاکھ کی کمی دیکھی گئی۔ سال ۲۰۱۱ کی مردم شماری میں ایسے کسانوں کی تعداد میں ۷۷ لاکھ کی مزید کمی درج کی گئی۔

مختصراً کہیں تو، ’’نئی‘‘ اقتصادی پالیسیوں کو اپنانے کے بعد کے پہلے ۲۰ سالوں میں، ہندوستان کے کسانوں کی آبادی تقریباً ڈیڑھ کروڑ گھٹ گئی۔ یعنی ہر ۲۴ گھنٹے میں اوسطاً ۲۰۰۰ سے زیادہ کل وقتی کسان کاشتکاری چھوڑ رہے تھے۔ اگر ایسا کسی بھی دیگر پیشہ میں ہوا ہوتا، خاص کر کسی شہری کاروبار کے ساتھ، تو ہر جگہ ہنگامہ ہو جاتا۔ لیکن جب بھی اس کا ذکر ہوا، تو کارپوریٹ کے مفاد میں کام کرنے والے ماہرین اقتصادیات کی آواز ہی حاوی سنائی دی۔ اور انہوں نے کہا کہ یہ اچھی بات ہے۔

نیشل کرائم ریکارڈ بیورو (این سی آر بی) کے اعداد و شمار کے مطابق، سال ۲۰۲۲ میں زرعی کاموں پر منحصر کل ۱۱۲۹۰ انسانوں نے خودکشی کر لی تھی۔ یعنی روزانہ ۳۰ کسان خودکشی کر رہے ہیں، اور ہر گھنٹے ایک سے زیادہ کسان۔ سال ۲۰۲۲ میں ہوئی کسانوں کی خودکشی کی تعداد سال ۲۰۲۱ کی ۱۰ ہزار ۸۸۱، ۲۰۲۰ کی ۱۰ ہزار ۶۷۷ اور ۲۰۱۹ کی ۱۰ ہزار ۲۸۱ کی تعداد سے زیادہ تھی۔

کووڈ۔۱۹ وبائی مرض کے دوران، ’’اُلٹی مہاجرت‘‘ دیکھنے کو ملی۔ شہروں میں چھوٹے موٹے کام کرنے والے کروڑوں دیہاتی – جن میں سے بہت سے لوگ ماہر کسان بھی تھے – کووڈ وبائی مرض کے دوران اپنے گاؤں لوٹ گئے۔ مئی ۲۰۲۰ میں، ریلوے نے بتایا کہ صرف ۲۵ دنوں میں ان کی شرمک ٹرینوں نے ۹۱ لاکھ مزدوروں کو ان کے گھر چھوڑا تھا۔

اسے دیکھ کر کافی تکلیف ہوئی۔ ’’وہ واپس کیوں جا رہے ہیں؟ یہ تو بہت خطرناک بات ہے۔ شہروں میں رہنے سے کورونا سے بہتر سیکورٹی ملے گی…‘‘ لیکن اصل میں یہ درد شہروں سے سستے مزدوروں کو واپس جاتے دیکھ کر پیدا ہوا تھا۔ ’’وہ واپس کیوں جا رہے ہیں‘‘ یہ صحیح سوال نہیں تھا۔ بہتر سوال تو یہ ہوتا کہ وہ اپنے گاؤوں کو چھوڑ کر آئے ہی کیوں تھے؟

اس کا جواب صرف دو لفظوں میں دیا جا سکتا ہے: زرعی بحران۔

وبائی مرض کے دوران اس تکلیف دہ مہاجرت کی نوبت ہی نہیں آتی اگر زرعی بحران کے سبب شہروں میں مہاجرت نہیں ہو رہی ہوتی۔ گھر لوٹے مہاجر مزدوروں کے سبب مہاتما گاندھی دیہی روزگار گارنٹی اسکیم (منریگا) پر بھاری دباؤ پڑا، اور حکومت کو اس مد میں زیادہ پیسہ خرچ کرنے کو مجبور ہونا پڑا۔ لیکن ایک بار پھر سے اس اسکیم کی مالی اور تمام دیگر سطحوں پر اندیکھی کی جا رہی ہے۔

بحران اتنا گہرا ہوتا گیا کہ کئی بڑے کسان آندولن بھی کھڑے ہوئے۔ ان میں سے پہلا آندولن (تحریک) پچھلی دہائی میں ہوا جس میں ۴۰ ہزار سب سے غریب، بنیادی طور پر آدیواسی کسانوں نے مارچ ۲۰۱۸ میں ناسک سے ممبئی تک تاریخی مارچ نکالا۔ سب سے تازہ آندولن، سال ۲۰۲۰-۲۱ میں دہلی کی سرحدوں پر ہوا۔ کیا مبینہ قومی دھارے کے میڈیا نے آپ کو بتایا کہ یہ گزشتہ ۳۰ برسوں میں پوری دنیا میں ہوا سب سے پرامن، سب سے جمہوری اور سب سے بڑا آئینی احتجاجی مظاہرہ تھا؟ عالمی سطح پر آکیوپائی وال اسٹریٹ تحریک کی بات کی جاتی ہے، جس میں بس کچھ اصول پسند نوجوان شامل تھے، اور انہیں نو (۹) ہفتوں کے بعد ہی نیویارک کے زکوٹی پارک سے باہر نکال دیا گیا تھا۔ دہلی میں کسان آندولن ۵۴ ہفتوں تک چلا، اور جب تینوں زرعی قوانین کو ردّ کر دیا گیا، تب جا کر ختم ہوا۔

وزیر اعظم مودی کا دعویٰ تھا کہ وہ ’’کسانوں کے ایک چھوٹے سے حصہ‘‘ کو راضی کرنے میں ناکام رہے کہ یہ قانون ان کے مفاد میں لائے گئے ہیں۔ انہوں نے یہ نہیں بتایا کہ کسانوں کو راضی کرنے کے لیے آنسو گیس، پانی کی تیز بوچھاریں، لوہے کے کانٹے دار تاروں، بڑے بڑے بیریکیڈز، لاٹھی چارج کا استعمال کیا گیا تھا اور کسانوں کو ان کے ٹریکٹروں سے آگے بڑھنے سے روکنے کے لیے قومی شاہراہ کو کھود دیا گیا تھا۔

سال ۱۹۹۱ کے بعد کے تیس سالوں میں زرعی بحران تو بڑھا ہی ہے، بلکہ بڑے پیمانے پر کاشتکار برادری کی حالت بھی خستہ ہو چکی ہے۔ بے روزگاری اور مہاجرت کے ساتھ ساتھ پانی، صحت اور تعلیم کا بحران بھی منہ اٹھائے کھڑا ہے۔ مسائل یہیں تک محدود نہیں ہیں۔ اور ان سب کے درمیان، کسانوں (زرعی مزدوروں سمیت) کی خودکشی جاری ہے۔ اس کے جواب میں حکومت نیشنل کرائم ریکارڈ بیورو کے طریقہ کار میں ہی تبدیلی کرنے لگتی ہے۔ اس کا نتیجہ یہ نکلا ہے کہ ۲۰۱۴ کے بعد کا کسانوں کی خودکشی کا ڈیٹا گزشتہ ۱۹ سال کے ڈیٹا سے میل نہیں کھاتا۔

کسانوں کی خودکشی کا معاملہ زرعی بحران نہیں ہے؛ وہ زرعی بحران کا سب سے تکلیف دہ نتیجہ ہے۔ وہ زرعی بحران کی دین ہے، اس کی ابتدا کا سبب نہیں۔ وہ اس کا اثر ہے، اس کی وجہ نہیں۔

صرف پانچ الفاظ میں زرعی بحران کو سمجھا جا سکتا ہے: زراعت پر کارپوریٹ کا قبضہ۔

جس راستہ پر چل کر اس کارنامہ کو انجام دیا گیا ہے اسے پروفیسر کے ناگ راج پانچ لفظوں میں بیان کرتے ہیں: گاؤوں کی کاروباری لوٹ کھسوٹ۔ اور اس کا نتیجہ کیا ہوا ہے وہ بھی پانچ لفظوں میں سامنے ہے: تاریخ کی بڑی نقل مکانی۔ شاید پوری انسانی تاریخ میں سب سے بڑی۔

جب دنیا میں کسانوں کی سب سے بڑی جماعت وجود کی لڑائی لڑ رہی ہو، تو واضح ہے کہ ہم درحقیقت تہذیب کے بحران سے گزر رہے ہیں۔ اس کی پیمائش صرف پیداوار میں کمی سے، یا انسانی زندگی کے زبردست نقصان سے نہیں کی جا سکتی، بلکہ ختم ہوتی انسانیت اور ہمارے تحمل کے محدود ہوتے دائروں میں دیکھی جانی چاہیے۔

یہ اسٹوری سب سے پہلے ۲۵ دسمبر، ۲۰۲۴ کو ’فرنٹ لائن‘ رسالہ میں شائع ہوئی تھی۔

ترجمہ نگار: محمد قمر تبریز