असमानता के जुग मं खेती

साल 1984 मं जब मंय किसान मन के घर मन मं जाय रहंय, वो बछर फ्रंटलाइन सुरु होय रहिस, त मोला हर घर मं सबले पहिली एक गिलास तुरते दुहे गोरस मिलय. बुड़ती महाराष्ट्र के कुछु हिस्सा मं, घर ले बिदा होवत एक अऊ गिलास दे जावत रहिन. समंदर तीर के आंध्रप्रदेश मं, गोरस अक्सर चांदी के गिलास मं परोसे जाय –जऊन ह पहुना ला मान के चिन्हारी रहिस, अऊ गिलास ह किसान के संपन्नता ला बतावय.

तमिलनाडु के किसान परिवार मन प्योर पीतल के गिलास मं गोरस देवंय. कभू-कभू, वो पीतल के गिलास मं बढ़िया फिल्टर कॉफी रहय. 1990 के सड़क तक ले, कतको राज मं, चांदी के गिलास के जगा स्टेनलेस स्टील के गिलास आ गीस. 1991 के बाद, वो मन तुरते दुहे गोरस देवत रहिन, फेर अक्सर टूटे-फूटे कप मन मं पीये ला मिलय. 1990 के दसक के बीच मं, मंय अपन आप ला कांच के गिलास मं पीयत पांय.

साल 2000 तक गोरस के जगा चाहा (चाय) आ गीस. महाराष्ट्र के विदर्भ इलाका मं 2003-04 तक करिया (लाल) चाय रहिस. चाहा मं शक्कर के मात्रा- जेन ह पारंपरिक मया अऊ मां के चिन्हारी आय –कम होवत जावत रहिस. वो दसक के बीच तक कांच के गिलास नंदा गे रहिस. अब करिया चाहा थोकन प्लास्टिक के कप मं मिले लगिस जेन ह ट्रेन अऊ बस टेसन मं मिलथे.

साल 2018 मं, जब मंय स्वतंत्रता सेनानी गणपति बाल यादव ले महाराष्ट्र के सांगली मं ओकर घर जाके भेंट करेंय. कुछु घंटा के गोठ-बात के बाद, वो ह मोला तुरते दुहे गोरस पीया के बिदा करिस. गीलट के एक ठन गिलास मं.

गिलास अऊ येकर गिरत जावत रूप ह कृषि अर्थव्यवस्था के गिरावट के एक ठन रूपक आय. ये ह तउन आर्थिक नीति मन के बिनासकारी असर ला घलो उजागर करथे, जेकर सहारा मं निजी कंपनी मन गोरस के दाम (अऊ दीगर सब्बो उपज) ला गिरा दिन . ये सब्बो ठीक उहीच बखत होवत रहिस जब “बजार आधारित दाम तय” करे के डिंढोरा पीटे गीस. अऊ ग्राहेक ला महंगा दाम मं समान बेचे जाय लगिस.

ये ह चेत धरे बनाय नीति मन रहिन. येकर कुछु नीति सेती किसान मन के लाखों नान नान लइका, कमजोर लइका मन बिन गोरस के रही गीन. किसान के लइका मं गोरस पीये ले मना कर देवत रहिन काबर के गोरस के आखिरी बूंद ला बेच के घर के जरूरत के दीगर समान बिसोय जावत रहिस. फेर, ये ह सिरिफ गोरसेच के बात नो हे. कपसा ला देखव. 1970 के सड़क के बीच मं, विदर्भ इलाका के एक किसान एक धन दू क्विंटल कपसा बेच के 10-12 ग्राम (एक तोला) सोना बिसो लेवत रहिस. ये ओकर बेटी के बिहाव मं काम आवय. आज, वो ह 10 क्विंटल कपसा बेच के घलो 10 ग्राम सोना बिसो नइ सकय.

महाराष्ट्र मं घोषित न्यूनतम समर्थन मूल्य (एमएसपी)7,122 रूपिया क्विंटल पाछू हवय, फेर बनेच कम किसान ला 6,500 रूपिया ले जियादा मिलथे. पूरा एमएसपी के संग घलो, वोला 10 क्विंटल बर 71, 220 रूपिया मिलही- जेन ह आज के 10 ग्राम सोना के दाम ले घलो कम हवय. सीधा कहे जाय त वो मन 1 क्विंटल बेच के 1 ग्राम सोना घलो बिसोय नइ सकंय.

ये गिरावट अऊ बदलाव घलो आर्थिंक नीति मन के सेती देखे गीस. लागू करे गे नीति अऊ ओकर तरीका ह इहींचे अऊ दुनिया के अधिकतर देस के कतको वर्ग उपर घलो असर डारिस. हमन 1991 ले ये खुल्ला खेल ला होवत देखेन. दुनिया भर मं येकर ले ये जिनिस मन देखे गीन:

गरीब मन के सेती बने महत्तम क्षेत्र अऊ कार्यक्रम मन ले सरकार पाछू हट गीस. गरीब तबका ला मिलेइय्या सब्सिडी मं भारी कटौती करे गीस, फेर अमीर अऊ कॉर्पोरेट मन के झोला मं ‘प्रोत्साहन’ के नांव ले भारी सब्सिडी डार दे गीस.

खेती मं सरकारी निवेश मं गिरावट. खेती के करजा के खेती ले खेती के कारोबार डहर तेजी ले जाय. संसाधन ला गरीब मन ले लेके अमीर मन ला भारी पैमाना मं देय. किसान मन के करजा मं भारी बढ़ोत्तरी. अऊ अब तक ले देखे नई गेय उबत कॉर्पोरेट ताकत. छत्तीसगढ़ मं नदी के 6 कोस ले जियादा डूबान हिस्सा समेत कतको सार्वजनिक संसाधन मन के निजीकरण.

करीबन हरेक चीज के निजीकरण, इहाँ तक के अकल अऊ आत्मा के घलो. अऊ स्थानीय शासन ला कमजोर करे, जिहां पंचायती राज ह कॉर्पोरेट ताकत के खिलाफ लड़ई सुरु करिस अऊ हार गे. जइसने के आरबीआई के पूर्व गवर्नर वाई. वी.रेड्डी कहिथे: हमन कतको ग्रामीण विकास योजना मन ला देखे हवन फेर गाँव के विकास ला कम.

अऊ, ये मं कोनो संदेहा नइ ये, के हमन असमानता मं अचमित ढंग ले बढ़ोत्तरी ला देखत हवन. 10 दिसंबर, 2024 तक (फोर्ब्स के मुताबिक) भारत के 217 डालर अरबपति मन के संयुक्त मूल्य 1,041 बिलियन डालर रहिस. हमन इहाँ एक ट्रिलियन डॉलर के बात करत हवन. ये आंकड़ा भारत के कृषि बजट 17.91 बिलियन डॉलर ले करीबन 58 गुना हवय. अऊ हमर कुल बजट व्यय 562 बिलियन डालर ले करीबन 1.8 गुना हवय. येकर बारे मं सोचव: 217 मइनखे (अबादी के 0.000015 फीसदी) करा सकल घरेलू उत्पाद के करीबन एक तिहाई के बरोबर संपत्ति आय.

साल 1991 ले लेके अब तक के दसक मं हमन किसान मन ला अपन जीविका के काम ले कमजोर होवत देखे हवन. सरकारी मंडी मन ला सरलग कमजोर करे गे हवय. सरकारी क्षेत्र के योजन बना के, अव्यवस्थित बिनास, जेन ह बदला मं खेती अऊ किसान मन ला भारी खराब ढंग ले नुकसान पहुंचाय हवय. खाय के जिनिस के उपज अऊ लोगन मन ला मिले उपर भयानक असर परे हवय.

कृषि विश्वविद्यालय मन के समाज केंद्रित संस्थान ले कॉर्पोरेट कृषि बेवसाय के प्रयोगशाला मन मं काफ्काई शैली मं बदले. किसान मन ले औपचारिक ऋण के व्यवस्थित रूप ले विचलन, जऊन ह करोड़ों लोगन मन ला जुन्ना अऊ नवा साहूकार (महाजन) करा जाय ला मजबूर करिस. किसान मन के उपज के दाम मं घटती, फेर बजार मं बिसोइय्या मन बर दाम अकास ला छूवत रहिस. विदर्भ मं 2003 ले 2013 के बीच मं कपसा के खेती के लागत उपर एक नजर डारे ले पता चलथे के लागत के दाम अऊ एक एकड़ कपसा के खेती के कुल लागत 250-300 फीसदी अऊ कुछु मामला मं येकर ले घलो जियादा बाढ़गे. फेर किसान मन के आमदनी के काय? गर कुछु होईस घला त वो ह खेती के लागत मं होवेइय्या बढ़ोत्तरी के एक अंश के बरोबर आय, खास करके बिजहा के.

अऊ आमदनी? इहाँ तक के नेशनल सेम्पल सर्वे धन एनएसएस के 77 वां पईंत, जेन ह किसान परिवार मन के आखिरी अऊ हाल के नवा सर्वे आय, ले पता चलथे के किसान परिवार मन के महिना के अऊसत आमदनी करीबन 10, 218 रूपिया आय. काय संगठित क्षेत्र मं एके घलो नऊकरी के बारे मं सोचे सकत हव, जेन मं तनखा येकर ले दुगुना न होय? सुरता रखव, ये ह घरेलू आंकड़ा आय, निजी आमदनी नो हे. ये घलो सुरता करव, साल 2017 मं, नरेंद्र मोदी सरकार ह पांच बछर मं किसान मन के आमदनी ला दुगुना करे के वादा करे रहिस.

वइसे, खेती ले होवेइय्या आमदनी मं साल 2012-13 अऊ 2018-19 के बीच मं 10 फीसदी के घटती देखे गीस. अब किसान परिवार मन ला मजूरी, तनखा अऊ पशुपालन ले जियादा आमदनी होथे.

जइसने के प्रगतिशील अर्थशास्त्री मन बताय हवय, हमन दाम के वैश्वीकरण अऊ आमदनी के भारतीयकरण देखे हवन.

हमन जानत हवन के साल 2024 तक ले 4, 00, 000 ले जियादा किसान आत्महत्या कर चुके होहीं, जियादातर नीति-प्रेरित बीपत सेती. ये आंकड़ा सरकारी आय – अऊ बनेच कम आंके गे हे.

किसान अऊ बनिहार मन के जानसमझ के बिनास सेती, जनगणना 2001 अऊ 2011 के बखत मं भारत के अब तक के सबले बड़े पलायन होइस. खेती अऊ बड़े खेती के अर्थव्यवस्था के टूटत जावत सेती, करोड़ों लोगन मन अपन गाँव छोड़ के शहर अऊ छोटे छोटे कस्बा मन मं चले गीन. येला कोनो खराब बात नइ मने गीस. गर कुछु होइस घलो त फ्रंटलाइन अऊ द हिंदू ला छोड़के, बनेच कम कवरेज मिलिस. नवउदारवादी अर्थशास्त्री मन के रोना रहिस, हमन ला लाखों लोगन मन ला खेती ले बहिर निकारे ला परही.” बने आय. फेर काय वो लाखों लोगन मन ले बात करे गीस? काय वो मन करा कोनो उपाय रहिस? वो मन ला काय दीगर उपाय देय गिस?

भलेच तुमन ला लगे के बनेच अकन किसान मन ला खेती ले बहिर निकारे जरूरी आय, फेर तुमन ये फइसला करे मं वो मन के हिस्सेदारी बगेर नइ करे सकव. तुमन अइसने खेती अऊ किसान के जिनगी ला बरबाद करके करे नइ सकव.

प्रगतिशील अर्थशास्त्री प्रो. के. नागराज कहिथें के तुमन येकर बारे मं तभे सोचे सकथो जब तुंहर करा “(ए) खेती के उपज मं सुधार हो: (बी) गाँव-देहात अऊ शहर दूनों जगा मं बढ़िया किसम के रोजगार उत्पन्न करे सकव: अऊ (सी) सब्बो बर बढ़िया शिक्षा अऊ इलाज के प्रावधान होय जेकर ले हुनर वाले बढ़िया काम करेइय्या बनाय जाय सकय. असल मं, ठीक येकर उलट होइस. अऊ तहां ले तुमन गाँव-देहात ले बने अकन बिपत मं परे पलायन ला खेती मं सुधार के सबूत के रूप मं काम मं लाथो!”

चेतव के भारत मं किसान मन के अबादी अजादी के बाद ले हरेक जनगणना मं बढ़े हवय, जेन मं 1991घलो सामिल हवय. ओकर बाद एक ठन अचमित करेइय्या गिरावट आइस. साल 2001 के जनगणना मं पूरा धन “माई किसान” के संख्या 7.2 मिलियन के गिरती देखे गीस, हव मिलियन. साल 2011 के जनगणना मं ओकर संख्या मं अऊ गिरावट दरज करे गीस जेन ह 7.7 मिलियन रहिस.

सार मं कहे जाय, “नई” आर्थिक नीति मन ला अपनाय के बाद पहिली 20 बछर मं भरत के किसान अबादी मं करीबन 15 मिलियन के कमी आइस. मतलब अऊसतन, हरेक 24 घंटा मं 2,000 ले जियादा पूरा (धन माई किसान) किसान खेती छोड़त रहिन. गर अइसने करीबन कोनो दीगर बेवसाय मं होय रइतिस, खास करके शहरी आधारित बेवसाय अऊ पेशा मन मं, त तुमन कभू येकर अंत सुने नइ सकतेव. फेर जिहां तक ले सार्वजनिक चर्चा के बात आय, त कॉर्पोरेट मुताबिक अर्थशास्त्री मन के आवाज हावी रहिस. अऊ वो मन कहिन के ये ह एक ठन बढ़िया बात आय.

नेशनल क्राइम रिकॉर्ड ब्यूरो (एनसीआरबी) के आंकड़ा मन के मुताबिक, साल 2022 मं खेती मं लगे कुल 11,290 लोगन मन आत्महत्या करिन. ये ह हरेक दिन कम से कम 30 किसान मन के आत्महत्या धन हरेक घंटा मं एक ले जियादा किसान मन के आत्महत्या के बरोबर आय. साल 2022 के आंकड़ा 2021 मं दरज करे गे 10, 881 आत्महत्या, 2020 मं 10, 677 अऊ 2019 मं 10, 281 आत्महत्या ले जियादा हवय.

कोविड-19 महामारी मं "रिवर्स माइग्रेशन" बखत ये ह एक ठन खराब तरीका ले आगू आइस. शहर मं छोट-मोठ बूता करेइय्या गाँव-देहात के लाखों लोगन मन अपन गाँव लहूट आइन. मई 2020 मं, सिरिफ 25 दिन मं, रेलवे ह बताथे के ओकर श्रमिक (लेबर/मजूर) ट्रेन ह 9.1 मजूर मन ला वो मन के घर तक पहुंचाइस.

येकर ले हिरदे ह कलप गे. वो मन काबर लहूटत हवंय? ये ह भारी खतरा भरे आय. शहर मं वो मन के बांचे के संभावना जियादा हवय... फेर पीरा असल मं हमर शहर मन मं सस्ता मिहनत के सिरा जाय ला लेके रहिस. “वो मन काबर लहूटत हवंय” ये सवाल सही नइ रहिस. सवाल ये होना रहिस के आखिर वो मन अपन गाँव छोड़के इहाँ काबर आय रहिन?

येकर जुवाब दू आखर मं हवय: कृषि संकट.

गर पहिलीच ले शहर डहर पलायन नइ होय रइतिस त ये उल्टा पलायन नइ होतिस. भारी पैमाना मं पलायन सेती महात्मा गांधी राष्ट्रीय ग्रामीण रोजगार गारंटी योजना (मनरेगा) उपर भारी भार परिस अऊ सरकार ला ये मं जियादा पइसा खरचा करे बर मजबूर होय ला परिस. फेर ये योजना ला एक पईंत अऊ वित्तीय अऊ दीगर रूप ले दुब्बर करे जावत हे.

बिपत के ये भारी हालत मं किसान मन के बड़े विरोध-प्रदर्सन घला देखे ला मिलिस. ये मं पहिला बीते दसक मं होइस, जब मार्च 2018 मं नासिक ले मुंबई तक 40,000 भारी गरीब, खास करके आदिवासी किसान मन एतिहासिक पदयात्रा करिन. हालेच मं 2020-21 मं दिल्ली के मुहटा मं होय किसान आन्दोलन चौंकेइय्या रहिस. काय मुख्यधारा के मीडिया मन तुमन ला कभू बताइन के ये ह बीते 30 बछर मं दुनिया मं कहूँ घलो होय सबले बड़े शांतिपूर्ण, लोकतांत्रिक अऊ संवैधानिक विरोध रहिस? दुनिया भर मं मशहूर ऑक्युपाई वॉल स्ट्रीट आंदोलन मं सिरिफ हजारों आदर्शवादी नवा पीढ़ी सामिल रहिस, जेन मन ला सिरिफ नौ हफ्ता बाद न्यूयॉर्क के ज़ुकोटी पार्क ले बहिर खदेड़ दे गीस. दिल्ली मं किसान मन के विरोध 54 हफ्ता तक ले चलिस अऊ तीन कृषि कानून ला निरस्त करे के बादेच सिरोइस.

प्रधानमंत्री मोदी ह दावा करिस के ये ह येकरे सेती होइस काबर के वो ह “किसान मन के नान कन वर्ग” ले ये समझाय मं फेल होगे के ये कानून वो मन के हित मं हवय. वो ह ये नइ बताइस के किसान मन ला मनाय बर आंसू गैस, पानी के बौछार, कनाट वाले तार, बड़े-बड़े कंटेनर बैरिकेड, लाठीचार्ज अऊ किसान मन ला ले जावत ट्रैक्टर मन ला आगू जाय ले रोके बर राष्ट्रीय राजमार्ग ला खोदे जइसने हथकंडा अपनाय गेय रहिस.

1991 के बाद के तीन दसक मं, खेती उपर बिपत त बढ़ेच हवय, बनिहार-भुतियार मन के हालत घलो खराब हो चुके हवय. येकर संगे संग रोजगार संकट, पलायन संकट, पानी, इलाज अऊ शिक्षा संकट घला ठाढ़े हवय. अऊ घला कतको हवय. अऊ ये सबके के बीच मं किसान मन (बनिहार समेत) के आत्महत्या करे चलत हवय . येकर जुवाब मं सरकार नेशनल क्राइम ब्यूरो के काम करे के तरीकाच मं फेरबदल करे लगथे. येकर नतीजा ये होईस के साल 2014 के बाद के किसान मन के आत्महत्या के आंकड़ा बीते 19 बछर के आंकड़ा ले मेल नइ खावत हे.

तथ्य: आत्महत्या मन के मामला कृषि संकट नो हे; वो येकर सबले दुखद नतीजा आंय. वो ह कृषि संकट के नतीजा आंय, येकर मूल नो हे. वो येकर असर आय,ओकर कारन नो हे.

सिरिफ पांच आखर मं कृषि संकट ला समझे जा सकथे : खेती मं कॉर्पोरेट के कब्जा.

प्रोफेसर के, नागराज के बोली मं कहे जाय त जेन तरीका ले येला हासिल करे जाथे, वो आय गाँव-देहात इलाका मं लुटेरा व्यावसायीकरन. वो तरीका के नतीजा आय हमर इतिहास के सबले बड़े विस्थापन. हो सकत हे मानव इतिहास के सबले बड़े विस्थापन.

जब दुनिया मं छोटे जोत वाले किसान मन के सबले बड़े मंडली अपन जिनगी ला बचाय बर जूझत होय, त तुमन ला लागथे के हमन असल मं सभ्यतागत संकट के सामना करत हवन. अइसने संकट जेन ला सिरिफ उपज के नुकसान धन इहाँ तक के मइनखे के जिनगी के भयंकर नुकसान बाबत नापे नइ जाय सकय, फेर हमर अपन मानवता के नुकसान, हमर दया-मया, हमर मानवता के कमतियात सरहद बाबत नापे जा सकथे.

ये लेख के एक ठन संस्करण पहिली पईंत 25 दिसंबर, 2024 मं फ्रंटलाइन पत्रिका मं छपे रहिस.

अनुवाद: निर्मल कुमार साहू