بہار میں اگنی پتھ: ’میں ۲۶ سال کی عمر میں ریٹائر نہیں ہوسکتا‘

کووڈ۔۱۹ وبائی مرض کی وجہ سے وکاس کمار کو ہندوستانی فوج میں شامل ہونے کے لیے جسمانی فٹنس کی ٹریننگ روکنی پڑی تھی۔ سال ۲۰۲۲ کے آغاز میں انہوں نے اپنی یومیہ ورزش کا سلسلہ دوبارہ شروع کیا۔ اس میں ۶ء۱ کلومیٹر کا فاصلہ طے کرنے کے لیے آرہ ہوائی اڈے کے ۴۰۰ میٹر کے رننگ ٹریک پر ۴-۵ چکر لگانا شامل تھا۔ ’’میں یہ فاصلہ تقریباً ۵ منٹ ۲۰ سیکنڈ سے ۵ منٹ اور ۲۵ سیکنڈ میں طے کر لیتا تھا،‘‘ وہ بتاتے ہیں۔

اس کے بعد اس عمل کو وہ دن میں ۵-۶ بار دہراتے تھے۔ اس دوران ان کی نظر ہمیشہ اپنی گھڑی پر رہتی تھی۔ اس کے علاوہ ۸-۱۰ پل اپ، متعدد اٹھک بیٹھک، پش اپ اور دیگر ورزشوں کا ایک سلسلہ ہوتا تھا۔ ’’اگر میں نے جسمانی فٹنس ٹیسٹ [فوج کی بھرتی] میں حصہ لیا ہوتا تو میرے جسم پر ’بہترین‘ کا نشان لگا ہوتا،‘‘ وہ کہتے ہیں۔ اگر کوئی امیدوار وقت سے پہلے مطلوبہ فاصلہ طے کر لیتا، تو فوجی اہلکار اس لفظ کو اس کے سینے پر چسپاں کر دیتے تھے۔

وکاس بھرتی کے جسمانی ٹیسٹ میں کامیابی کے لیے تیار تھے۔

لیکن جون ۲۰۲۲ کی واقعات کی وجہ سے ان کے خواب ٹوٹتے ہوئے نظر آئے۔ یہ ایسے واقعات تھے جو بہت سے نوجوانوں کے لیے کووڈ۔۱۹سے بھی زیادہ مہلک ثابت ہوئے۔ یہ کوئی وبائی بیماری نہیں تھی بلکہ پالیسی کی وجہ سے پیدا ہونے والی بیماری تھی۔

اسے اگنی پتھ اسکیم کا نام دیا گیا۔ اور، اگر وہ اس ٹیسٹ میں بہترین کار کردگی کا مظاہرہ کرتے ہیں تو ان کے سینے پر ’بہترین‘ کی مہر نہیں لگے گی- بلکہ ان کے یونیفارم اور دیگر چیزوں پر صرف ’اگنی ویر‘ کی مہر لگے گی۔

’’کووڈ۔۱۹ وبائی مرض دو سال تک جاری رہا اور مجھے گھر میں بند رہنا پڑا، اس لیے جسمانی ورزش رک گئی۔ اور جب یہ وبائی مرض ختم ہوا تو حکومت نے اگنی پتھ اسکیم کا اعلان کر دیا،‘‘ وہ کہتے ہیں۔

مرکزی کابینہ نے ۱۴ جون ۲۰۲۲ کو ایک ’پرکشش‘ بھرتی اسکیمکے طور پر اگنی پتھ کو منظوری دی۔ اس اسکیم کے تحت فوج میں نوجوانوں کو باقاعدہ کیڈر (جن کی سروس کم از کم ۱۵سال کی ہوتی ہے) کی بجائے صرف چار سال کے لیے شامل کیا جائے گا۔ انہیں اگنی ویر کہا جائے گا، جس کے لفظی معنی ، ’آتشیں جنگجو‘ کے ہوتے ہیں۔

وکاس کے لیے صرف چار سال کی ملازمت کا خیال حیران کر دینے والا ہے۔ ’’میں ۲۶ سال کی عمر میں ریٹائر نہیں ہوسکتا،‘‘ وہ کہتے ہیں۔

مرکزی حکومت نے اس اسکیم کو یہ کہہ کر مشتہر کیا کہ اس سے ’’تینوں افواج کی انسانی وسائل کی پالیسی میں ایک نئے دور کا آغاز ہوگا۔‘‘

دراصل اس اسکیم نے ہندوستانی فوج میں شامل ہونے کی امید رکھنے والے لاکھوں نوجوانوں کے کریئر کو خطرے میں ڈال دیا ہے۔

وکاس اپنے والد اور دادا کو فوجی یونیفارم میں دیکھتے ہوئے بڑے ہوئے تھے اور انہی کی طرح ایک فوجی بننے کا خواب دیکھا تھا۔

’’فوج میں جانا میرے بچپن کا سپنا تھا۔ ہم دوسرے کسی جاب کے بارے میں سوچتے ہی نہیں تھے،‘‘وکاس آرہ شہر کے ویران ہوائی اڈے کے میدان کی طرف دیکھتے ہوئے کہتے ہیں، جہاں وہ جسمانی فٹنس ٹیسٹ کی تیاری کیا کرتے تھے۔ بہار کے بھوجپور ضلع کا آرہ شہر ان کی پیدائش سے بہت پہلے سے فوج کی بھرتی کا ایک اہم مرکز رہا ہے۔ ان کا اپنا گاؤں رتن دلار پور آرہ بلاک کے تحت آتا ہے۔

وکاس ۲۰۱۹ میں میٹرک کے امتحان میں شریک ہوئے تھے۔ اس وقت ان کی عمر صرف ۱۶ سال تھی۔ اب وہ ۲۱ سال کے ہوچکے ہیں اور ان کا کہنا ہے، ’’پاپا کو آرمی کی وردی میں دیکھ کر گرو (فخر محسوس) ہوتا تھا… آرمی کی وردی پہننے سے الگ ہی فیلنگ آتی (احساس ہوتا) ہے۔‘‘

وکاس کے خواب کو مزید تقویت اس وقت ملی جب ان کے بڑے بھائی نے فوج میں شمولیت اختیار کی۔ ایسا کرنے والے وہ اپنے خاندان کی تیسری نسل کے فرد تھے۔ اسی وقت وکاس نے میٹرک کا امتحان پاس کیا تھا۔

وکاس ان دنوں کو یاد کرتے ہیں جب وہ اپنے گاؤں سے نو کلومیٹر دور ہوائی اڈے کے میدان میں جسمانی ٹریننگ حاصل کرنے موٹر سائیکل پر سوار ہو کر جایا کرتے تھے۔

لیکن اگنی پتھ نے ان کے جوش کو سرد کر ڈالا ہے۔ انہوں نے جسمانی ٹریننگ کے لیے جانا چھوڑ دیا ہے۔ ’’میری چھ ماہ کی فٹنس ٹریننگ بیکار گئی۔ میں ٹھگا ہوا محسوس کر رہا ہوں،‘‘ وہ کہتے ہیں۔

تاہم، اس کے باوجود، ایک موقع پر انہوں نے ’رشتہ دار کوٹہ‘ کے تحت اگنی ویر کے طور پر فوج میں شمولیت اختیار کرنے کا فیصلہ کیا تھا، لیکن ان کے گھر والوں نے اس کے بارے میں نہیں سنا تھا۔

رشتہ دار کوٹہ ان نوجوانوں کے لیے ہے جن کے رشتہ دار ہندوستانی فوج میں ہیں یا اس میں خدمات انجام دیتے ہوئے شہید ہوئے ہیں۔ اس کوٹہ کے تحت فوج میں ملازمتوں کے لیے، متعلقہ آرمی ریکارڈ آفس سے جاری کردہ ’رشتے کا سرٹیفکیٹ‘ حاصل کرنا ہوتا ہے، جس پر متعلقہ ریکارڈ افسر کے دستخط ہوتے ہیں۔

وہ کہتے ہیں، ’’جب میں نے اپنے بھائی سے رشتہ کا سرٹیفکیٹ حاصل کرنے کے لیے کہا، تو انہوں نے مجھے بتایا کہ فوج میں اگنی ویر ہونے کا کوئی مطلب نہیں ہے اور اس لیے مجھے جوائن نہیں کرنا چاہیے۔‘‘

اب وہ بہار پولیس، بارڈر سیکورٹی فورس (بی ایس ایف) یا دیگر سرکاری ملازمتوں میں داخل ہونے کے اپنے امکانات پر توجہ مرکوز کر رہے ہیں۔

’’میں ۲۶ سال کی عمر میں ریٹائر نہیں ہو سکتا،‘‘ وہ کہتے ہیں۔

’’کون ’فوجی صاحب‘کی بجائے ’اگنی ویر‘کہلانا کون پسند کرے گا؟‘‘ وہ دریافت کرتے ہیں۔

اگنی پتھ اسکیم کے نفاذ سے قبل امیدواروں کو پہلے جسمانی فٹنس ٹیسٹ میں حصہ لینا پڑتا تھا۔ فٹنس لیول ٹیست میں کامیابی کے بعد تحریری امتحان میں شریک ہونا پڑتا تھا۔ اس اسکیم کے نفاذ کے بعد یہ عمل بدل گیا۔ اب امیدوار پہلے کمپیوٹر پر مبنی آن لائن تحریری امتحان میں شریک ہوں گے اور اس میں کامیابی کے بعد وہ جسمانی فٹنس ٹیسٹ میں حصہ لیں گے۔

فوج کے جسمانی فٹنس ٹیسٹ سخت ہوتے ہیں۔

ہندوستانی فوج کی ویب سائٹ پر دستیاب دستاویزات کے مطابق تحریری امتحان پاس کرنے والی خواتین امیدواروں کو ۶ء۱ کلومیٹر کی دوڑ ۷ منٹ ۳۰سیکنڈ میں مکمل کرنی ہوتی ہے۔ اس امتحان کے لیے زیادہ سے زیادہ ۶۰ نمبر مقرر کیے گئے ہیں۔ اس کے علاوہ انہیں ۱۰ فٹ لمبی چھلانگ اور تین فٹ اونچی چھلانگ کے ٹیسٹ میں کامیابی حاصل کرنی ہوگی۔

مرد امیدواروں کو ۶ء۱ کلومیٹر کی دوڑ پانچ منٹ ۳۰ ​​سیکنڈ میں مکمل کرنی ہوتی ہے۔ اس کے لیے بھی ۶۰ نمبر مقرر کیے گئے ہیں۔ زیادہ سے زیادہ ۱۰ بیم پل-اپ کے لیے ۴۰ اور کم سے کم چھ کے لیے ۱۶نمبر دیے جاتے ہیں۔

اس کے علاوہ امیدواروں کو نو فٹ لمبی کھائی کو پھلانگنا پڑتا ہے۔ پھر ایک پیچ دار توازن ٹیسٹ ہوتا ہے۔ اس ٹیسٹ میں لکڑی کے ۱۰ فٹ لمبے اور ایک فٹ چوڑے، ناہموار ٹکڑوں پر سے تیز رفتاری سے گزرنا ہوتا ہے۔ ان دونوں ٹیسٹ کے لیے کوئی نمبر نہیں دیا جاتا، لیکن اس میں کامیاب ہونا لازمی ہے۔

امیدواروں کے لیے بغیر رہنمائی کے ایسی سخت ٹریننگ کرنا مشکل ہے، اس لیے انھیں تجربہ کار ٹرینر (استاد) کی ضرورت ہوتی ہے۔

ان ’لازمی اہلیت کے معیار‘ نے ضلع میں جسمانی فٹنس کے تربیتی اداروں کے لیے ایک بہت بڑا بازار پیدا کر دیا تھا۔

رمنا میدان، ویر کنور سنگھ اسٹیڈیم کا میدان، ہوائی اڈہ کا میدان، جین کالج کا میدان اور آرہ شہر کے دیگر کھلے تاریخی میدان اگنی پتھ سے پہلے سینکڑوں نوجوانوں سے کھچا کھچ بھرے رہتے تھے جو کم از کم دو سے تین گھنٹے تک اپنے ٹرینرز کی نگرانی میں پسینہ بہاتے تھے۔ اس اسکیم کے آنے کے بعد نوجوانوں نے فوج سے آنکھیں پھیر لی ہیں۔

نوجوانوں کی اس مایوسی نے جسمانی تربیتی اداروں پر منفی اثرات مرتب کیے ہیں۔

جیسا کہ پاری کے رپورٹروں نے اپنی پچھلی اسٹوریز میں بھی اشارہ کیا ہے کہ ۲۰۲۰ تک مسلح افواج میں اوسط سالانہ بھرتی تقریباً ۶۱ ہزار تھی۔

جون ۲۰۲۲ میں اگنی پتھ کے نفاذ کے بعد یہ تعداد تقریباً ۴۶ ہزار نوجوانوں تک پہنچ گئی تھی۔ مزید یہ کہ اس اسکیم نے فوج میں باقاعدہ کریئر کی امیدیں ختم کر دی ہیں، جو بہت سے دیہی نوجوانوں کے لیے بہت اہمیت کی حامل تھی۔ اب ان کے پاس صرف چار سال کی مدت ہوگی، جس کے بعد صرف ایک چوتھائی جوان ہی فوج کے باقاعدہ کیڈر میں شامل ہوں گے۔

اس حقیقت نے وکاس کمار کے خوابوں کو چکنا چور کر دیا۔ ’’مجھے اس قدر صدمہ پہنچا کہ میں نے دو تین ماہ کے لیے فیلڈ پر جانا ہی چھوڑ دیا اور مزید پڑھائی پر توجہ مرکوز کرنا شروع کر دیا،‘‘ وہ کہتے ہیں۔

اور پھر اس میں کمائی بھی ہے۔

فوج میں شمولیت کے بعد پہلے سال میں اگنی ویر کو ۳۰ ہزار روپے ماہانہ تنخواہ ملے گی، جو چوتھے سال ۴۰ ہزار روپے تک پہنچ جائے گی۔ اگنی ویر کارپس فنڈ کے مد میں اس رقم سے ہر ماہ ۳۰ فیصد کی کٹوتی ہوگی۔ حکومت بھی اس میں کٹوتی کے برابر کی رقم کا اضافہ کرے گی۔ چار سال بعد اپنی خدمات سے سبکدوش ہوتے وقت ایک اگنی ویر، کارپس فنڈ سے سیوا ندھی کے طور پر ٹیکس سے مستثنیٰ ۱۱ لاکھ ۷۱ ہزار روپے کی رقم کا حقدار ہوگا۔

خیال رہے کہ سیوا ندھی کے اس پیکیج کا ۵۰ فیصد حصہ اگنی ویر کی اپنی تنخواہ سے آتا ہے اور اس کا تھوڑا سا حصہ اس کی شراکت پر ملنے والے سود سے۔

اس طرح، کسی اگنی ویر کے ہاتھ میں تنخواہ کے طورپر پہلے سال میں ماہانہ ۲۱ ہزار روپے ملتے ہیں۔ دوسرے سال میں ۲۳ ہزار ۱۰۰ روپے، تیسرے سال میں ۲۵ ہزار ۵۰۰ روپے، اور چوتھے اور آخری سال میں سب سے زیادہ ۲۸ ہزار روپے ملتے ہیں۔

اگنی ویروں کو مسلح افواج میں ان کی خدمات کی مدت کے لیے ۴۸ لاکھ روپے کا لائف انشورنس کور فراہم کیا جاتا ہے۔ کسی باقاعدہ سپاہی کو ہر سال اس کی خدمات کے لیے سال میں ۱۵ دن کی گریچویٹی ملتی ہے، اور اسے ۵۰ لاکھ روپے کا انشورنس کور فراہم کیا جاتا ہے۔ اس کے علاوہ ایک فوجی کو پنشن بھی ملتی ہے۔ اگنی ویر نہ تو گریچویٹی کا حقدار ہے نہ ہی پنشن کا۔

ہندوستانی فوج کے ایک باقاعدہ سپاہی کو سپاہی کی سطح پر شمولیت کے لیے ۲۵ ہزار روپے ماہانہ تنخواہ ملتی ہے۔ اگر وہ صوبیدار کے عہدے تک پہنچ جاتا ہے، تو یہ رقم ۵۰ ہزار روپے تک بڑھ سکتی ہے۔ اس کے علاوہ کئی ماہانہ بھتے جیسے مہنگائی اور ٹرانسپورٹ بھتہ، یونیفارم کے لیے سالانہ بھتہ، مخصوص فیلڈ ایریا پوسٹنگ وغیرہ ملتے ہیں۔ ہندوستانی فوجی اہلکاروں کو مفت طبی سہولیات، ریٹائرمنٹ کے بعد تاحیات پنشن، اور سروس کے دوران اور ریٹائرمنٹ کے بعد مسلح افواج کے اسٹورز پر سامان کی رعایتی خریداری تک رسائی بھی ملتی ہے۔

اگنی ویر کو ان سہولیات، مفت خدمات اور فوائد میں سے کچھ بھی نہیں ملتا ہے۔ اور ان کے اہل خانہ اگنی ویر کی خدمات کے دوران موت کے بعد معاوضہ کے حقدار نہیں ہوتے ہیں۔

*****

تو، ان کا مستقبل کیسا ہے؟

’’مستقبل میں کچھ نہیں ہے۔ اگنی پتھ اسکیم نے میرا کریئر ختم کر دیا ہے،‘‘ چھ فٹ لمبے جسمانی فٹنس ٹرینر جادو یادو کہتے ہیں۔ ہم نے آرہ شہر کے مضافات میں ان کے نو تعمیر گھر میں ان سے بات کی۔ وہ کہتے ہیں، ’’اس مکان کو دور دراز کے گاؤوں سے تعلق رکھنے والے فوج میں شمولیت کے خواہش مند امیدواروں کے قیام کے لیے ایک لاج کے طور پر بنایا گیا تھا۔‘‘

جادو نے ۲۰۲۱ میں جسمانی فٹنس ٹرینر کے طور پر اپنا کریئر بنانے کا فیصلہ کیا تھا اور انہوں نے بڑے جوش و خروش کے ساتھ اتر پردیش کے میرٹھ (جم کے سامان بنانے کا ایک مرکز) سے جنگی رسیاں، اسپیڈ ہڈلز، باکس جمپس، گدے اور ورزش کے دیگر ساز و سامان خریدے تھے۔

اس کے لیے انہوں نے ۵ لاکھ روپے خرچ کیے۔ لیکن اب یہ سامان ان کے گھر کی نچلی منزل پر بکھرے ہوئے بیکار پڑے ہیں۔

اب جب بھی وہ یہ سامان دیکھتے ہیں، انہیں افسوس ہوتا ہے۔

’’میں نے ایک مقامی سود خور سے ۴ فیصد ماہانہ سود کی شرح [یعنی ۴۸ فیصد کی سالانہ شرح] پر ۴ لاکھ روپے کا قرض لیا تھا۔ اس رقم میں اپنی بچت سے ایک لاکھ کا اضافہ کیا،‘‘ جادو کہتے ہیں۔ ’’ہم نے ایک چھوٹا ہاتھی [لفظی طور پر چھوٹا ہاتھی، لیکن یہاں ایک میٹاڈور وین کا حوالہ دیا] لیا اور میرٹھ سے سامان لے کر آئے۔ یہ سب حاصل کر کے مجھے بہت خوشی ہوئی،‘‘ ۳۰ سالہ ٹرینر کہتے ہیں۔

تین بھائیوں اور چار بہنوں میں سب سے چھوٹے، جادو فوج میں شامل ہونے کے خواہشمند نوجوانوں کو تربیت دینے کے لیے ہوائی اڈہ کے میدان میں ایک فزیکل اکیڈمی چلاتے رہے ہیں۔

’’میں دوڑنے میں اچھا تھا اس لیے میں نے فوج میں شامل ہونے کے خواہشمند نوجوانوں کو تربیت دینے کا فیصلہ کیا۔ انہیں مناسب کوچنگ دینے کے لیے، میں نے یوپی کے ایک انسٹی ٹیوٹ سے فزیکل ٹریننگ میں گریجویشن کیا،‘‘ وہ کہتے ہیں۔

وہ روزانہ ۲۰۰ نوجوانوں کے چار بیچز کو تربیت دیتے تھے۔ ان نوجوانوں میں سے ۹۰ فیصد سے زیادہ نوجوان ہندوستانی فوج کے لیے تیاری کر رہے ہوتے تھے۔ وہ یاد کرتے ہیں: ’’میری ماہانہ آمدنی ۵۰ ہزار روپے تھی۔‘‘

جب اگنی پتھ نافذ ہوا تو، ’’جسمانی ٹریننگ حاصل کرنے والے نوجوانوں کی تعداد آدھی سے بھی کم رہ گئی۔ اس گروپ میں سے بھی صرف ۱۰-۱۲ لڑکے فوج میں بھرتی ہونے کے خواہشمند ہوتے ہیں۔ باقی بہار اور جھارکھنڈ پولیس کے لیے تیاری کر رہے ہوتے ہیں،‘‘ وہ کہتے ہیں۔

جادو کی آمدنی اب صرف ۱۵سے ۲۰ ہزار روپے ماہانہ رہ گئی ہے، اور یہ بھی باقاعدہ نہیں ہے۔ پہلے جسمانی فٹنس ٹیسٹ انٹری پوائنٹ ہوتے تھے، اس لیے نوجوان پورے سال تیاری کرتے تھے۔ اب امیدوار تحریری امتحان میں کامیابی کے بعد ہی جسمانی ٹریننگ میں شامل ہوتے ہیں۔ بہار پولیس کے لیے بھی درخواست دینے کے بعد پہلے تحریری امتحان لیا جاتا ہے اور ان میں پاس ہونے پر ہی امیدوار جسمانی اہلیت کے امتحان میں شامل ہوسکتے ہیں۔

وہ کہتے ہیں، ’’جو لوگ تحریری امتحان میں کامیاب ہوتے ہیں، وہ صرف دو سے تین ماہ کے لیے میری فزیکل پریکٹس کلاسز میں شامل ہوتے ہیں۔ اس کی وجہ یہ ہے کہ حکومت تحریری ٹیسٹ اور فزیکل ٹیسٹ کے درمیان دو سے تین ماہ کا وقت دیتی ہے،‘‘ وہ کہتے ہیں۔

وہ بتاتے ہیں، ’’اس وجہ سے میں مہینوں تک بے روزگار رہتا ہوں۔‘‘ جس سے ان کے کنبے کی ضروریات کو پورا کرنا مشکل ہو جاتا ہے۔ ان کا کنبہ ان کی اہلیہ، تین سالہ بیٹے اور ایک سالہ بیٹی پر مشتمل ہے۔

اس لیے اب جادو یادو بھوجپوری میوزک انڈسٹری میں اپنی قسمت آزما رہے ہیں۔

’’ہر شام میں ایک میوزک ٹیچر کے ساتھ دو گھنٹے تک گانے کی مشق کرتا ہوں، ہارمونیم میں خود بجاتا ہوں جسے میں نے جھارکھنڈ کے جھریا سے خریدا تھا،‘‘ وہ ساز نکالتے ہوئے کہتے ہیں۔ ان کی آواز ہارمونیم کی آواز کے ساتھ اچھی طرح ہم آہنگ ہو جاتی ہے۔

’’بھوجپوری گلوکار آن لائن گانے ریلیز کر کے یوٹیوب سے اچھی کمائی کر رہے ہیں،‘‘ وہ کہتے ہیں، ’’مجھے لگتا ہے کہ اگر میں اسے باقاعدگی سے کروں تو میں بھی کچھ کمائی کرسکتا ہوں… اگنی پتھ اسکیم کی وجہ سے جسمانی تربیت میں کریئر بنانا اب ناممکن ہے۔‘‘

دریں اثناء، آرہ کے ایک اور جسمانی فٹنس ٹرینر ۳۸ سالہ موہن سنگھ اب کھیلوں پر توجہ مرکوز کر رہے ہیں۔

’’میں نے پانچ سال پہلے جسمانی تربیت کا کورس شروع کیا تھا۔ اس وقت میرے پاس ۳۰۰ نوجوان تھے، لیکن اب میں نے اسے روک دیا ہے،‘‘ وہ کہتے ہیں۔ ’’اگنی پتھ کی آمد کے بعد ایک بھی نوجوان فوج کے لیے تیاری نہیں کر رہا ہے۔ وہ مایوس ہو چکے ہیں۔ جسمانی فٹنس کی ٹریننگ کا کاروبار بند ہو گیا ہے۔‘‘

راجپوت برادری سے تعلق رکھنے والے موہن سنگھ ایک آرٹس گریجویٹ ہیں، اور ہمیشہ کھیلوں میں دلچسپی رکھتے تھے۔ وہ تھائی باکسنگ کھیلا کرتے تھے۔ ’موئے تھائی‘ ایک مارشل آرٹ ہے جس کی ابتدا تھائی لینڈ میں صدیوں پہلے ہوئی تھی۔ اس میں مد مقابل عام طور پر ضرب، سویپ اور کلنچ تکنیک اپناتے ہیں اور لڑتے ہوئے مٹھی، کہنیوں، گھٹنوں اور پنڈلیوں کا استعمال کرتے ہیں۔ اس کھیل کو ’’آٹھ اعضاء کا آرٹ [یا سائنس]‘‘ بھی کہا جاتا ہے۔

لیکن موہن کو ’’یہ خواب ترک کرنا پڑا کیونکہ مجھے سرکاری مدد نہیں ملی اور میرے گھر والوں نے بھی کھیلوں کو کریئر کے طور پر نہیں دیکھا،‘‘ وہ کہتے ہیں۔

’’لیکن میں نہیں چاہتا تھا کہ نوجوان فوج میں شامل ہونے کے اپنے خوابوں کو ترک کر دیں، اس لیے میں نے انہیں صرف ۲۰۰ روپے ماہانہ اجرت پر جسمانی ٹریننگ دینا شروع کیا،‘‘ وہ کہتے ہیں۔

اگنی پتھ کے وجود میں آنے کے بعد ٹریننگ تقریباً بند ہو چکی ہے۔ ’’اب میں نے فزیکل اکیڈمی کو اسپورٹس انسٹی ٹیوٹ میں تبدیل کر دیا ہے۔ میں نے ویٹ لفٹنگ، باکسنگ، ریسلنگ وغیرہ جیسے کھیل سکھانے کے لیے ماہرین کی خدمات حاصل کی ہیں،‘‘ موہن سنگھ بتاتے ہیں۔

وہ اگنی پتھ کو اپنی تنقید کا نشانہ بناتے ہوئے کہتے ہیں کہ یہ نوجوانوں کے لیے ٹھیک نہیں ہے۔

بہار میں متوسط ​​طبقہ کے بہت سے گھرانے سرکاری ملازمتوں پر منحصر ہیں، خاص طور پر مسلح افواج کی ملازمتوں پر۔ مثال کے طور پر دسویں جماعت کے امتحانات کے بعد بچے فوج کی تیاری شروع کر دیتے ہیں، اس امید پر کہ اگر انہیں فوج میں نوکری مل گئی تو ان کے کنبے کی اگلی کئی نسلوں کا مستقبل مستحکم ہو جائے گا۔

’’لیکن جن لوگوں کو اگنی پتھ کے تحت ملازمتیں مل رہی ہیں ان کے اہل خانہ خوش نہیں ہیں، کیونکہ وہ جانتے ہیں کہ وہ چار سال بعد نوکری سے ہاتھ دھو بیٹھیں گے۔ اور اس کے بعد ان میں اتنی سکت نہیں ہوگی کہ وہ دوبارہ کسی اور سرکاری نوکری کے لیے تیاری کر سکیں،‘‘ وہ کہتے ہیں۔

بہار کے نوجوانوں کا غصہ ۲۰۲۴ کے عام انتخابات میں بھارتیہ جنتا پارٹی (بی جے پی) کے لیے منفی نتائج سے ظاہر ہوتا ہے۔ بہار میں، نیشنل ڈیموکریٹک الائنس (این ڈی اے) نے ۳۹ میں سے ۹ سیٹیں کھو دیں، جو اس نے ۲۰۱۹ میں انڈیا الائنس سے جیتی تھیں۔ بی جے پی کو پانچ اور نتیش کمار کی جنتا دل (یونائیٹڈ) کو چار سیٹوں کا نقصان ہوا۔

آرہ لوک سبھا سیٹ پر بی جے پی کے دو بار کے رکن پارلیمنٹ، سابق مرکزی وزیر اور نوکر شاہ آر کے سنگھ کو کمیونسٹ پارٹی آف انڈیا ایم ایل (لبریشن) لیڈر سداما پرساد سے شکست کا سامنا کرنا پڑا۔ آر کے سنگھ نے ۲۰۱۹ میں تقریباً ڈیڑھ لاکھ ووٹوں کے فرق سے کامیابی حاصل کی تھی۔ سال ۲۰۲۴ میں وہ سداما پرساد سے تقریباً ۶۰ ہزار ووٹوں سے ہار گئے۔

سال ۲۰۲۴ کے نتائج کے فوراً بعد اگنی پتھ کے خلاف نوجوانوں اور ان کے اہل خانہ کے غصے کو محسوس کرتے ہوئے بہار میں بی جے پی کی اتحادی، نتیش کمار کی جنتا دل (یونائیٹڈ) نے اس اسکیم پر نظرثانی کا مطالبہ کیا۔

’’اگنی ویر اسکیم پر ووٹروں میں غصہ ہے۔ ہماری پارٹی چاہتی ہے کہ جن کوتاہیوں پر لوگوں کو اعتراض ہے، انہیں دور کیا جائے،‘‘ نیو انڈین ایکسپریس نے جے ڈی یو لیڈر کے سی تیاگی کا حوالہ دیتے ہوئے لکھا تھا۔

سال ۲۰۲۲ میں اگنی پتھ کے نافذ ہونے کے بعد ایسے لوگوں کو بھی صدمہ پہنچا جنہوں نے عام بھرتی کے آخری سال میں بھرتی کے پہلے مرحلہ کو عبور کر لیا تھا۔ بہت سے امیدواروں نے ۲۰۲۱ میں مشکل جسمانی ٹیسٹ پاس کر لیے تھے۔ صرف تحریری امتحانات باقی تھے۔ پھر مرکزی حکومت نے ان کی بھرتی کو منسوخ کر دیا اور کہا کہ جو لوگ پہلے ہی ٹیسٹ پاس کر چکے ہیں انہیں بھی نئی اسکیم کے تحت نئے سرے سے اس ٹیسٹ کے عمل سے گزرنا ہوگا۔

موہن سنگھ کا کہنا ہے کہ ان کا خیال ہے کہ ’’اس فیصلہ کی وجہ سے بہت سے نوجوانوں نے خودکشی کرلی کیونکہ انہوں نے مطلوبہ طبی اور دیگر سرٹیفیکیشن دلانے کا وعدہ کرنے والے دھوکہ باز دلالوں کو پیسوں کی ادائیگی کے لیے قرض لیا تھا اور زمینیں فروخت کر دی تھیں۔ اس کے علاوہ، فوج میں داخل ہونے کی آخری کامیاب کوشش میں بہت سے امیدواروں کی عمریں آخری حد سے تجاوز کر گئیں۔‘‘

کامیاب امیدواروں کے اخراج پر تلخی کے باعث اس فیصلہ کو عدالتوں میں چیلنج کیا گیا۔ لیکن دہلی ہائی کورٹ نے اسکیم کے جواز کو برقرار رکھا۔ اور سپریم کورٹ نے دہلی ہائی کورٹ کے حکم کو چیلنج کرنے والی درخواستوں پر غور کرنے سے انکار کر دیا۔

ایک او بی سی برادری سے تعلق رکھنے والے ۲۳ سالہ بٹو یادو ان امیدواروں میں شامل تھے جنہوں نے ٹیسٹ میں کوالیفائی کیا تھا۔ ’’میں نے سال ۲۰۲۱ میں دوڑ اور دیگر جسمانی ٹیسٹ دونوں میں کوالیفائی کیا۔ صرف تحریری امتحان باقی رہ گیا تھا، لیکن اگنی پتھ کے نفاذ کے بعد بھرتی منسوخ کر دی گئی،‘‘ وہ کہتے ہیں۔ وہ اگنی ویر کے تحت فوج میں شمولیت کی کوشش بھی نہیں کرسکے کیونکہ ان کی عمر ۲۱ سال کی بالائی حد سے تجاوز کر چکی تھی۔

آج وہ جھارکھنڈ کی ایک اسٹیل مینوفیکچرنگ یونٹ میں کام کرتے ہیں۔ ’’فوج میں شمولیت میرا جنون تھا،‘‘ وہ کہتے ہیں۔ ’’لیکن اگنی پتھ نے میرا کریئر تباہ کر دیا۔‘‘

وہ تین بھائیوں میں سب سے چھوٹے ہیں۔ ان کے والد ایک کسان ہیں۔ ان کے دوسرے بھائی پرائیویٹ سیکٹر میں کام کرتے ہیں، لیکن ان کے والد چاہتے تھے کہ وہ سرکاری ملازمت اختیار کریں۔ لہٰذا، انہوں نے ہندوستانی فوج میں شامل ہونے کے لیے تیاری کرنے کا فیصلہ کیا کیونکہ اس سے دو خواب پورے ہو جاتے: خود فوجی جوان بننے کے اور والد کے سرکاری نوکری کے۔

بٹو کہتے ہیں، ’’سرکاری نوکری حاصل کرنے کے لیے ان پر گھر سے بہت دباؤ ہے۔ دراصل، میں نے اپنے گھروالوں سے دور رہنے کے لیے جھارکھنڈ کے اس اسٹیل پلانٹ میں نوکری حاصل کی تھی۔‘‘

’’اگر میں جھارکھنڈ نہ جاتا تو ذہنی دباؤ کی وجہ سے خودکشی کر لیتا۔‘‘

ترجمہ نگار: شفیق عالم