ಬಿಹಾರದ ಅಗ್ನಿಪಥ: 'ನನ್ನಿಂದ 26 ವರ್ಷಕ್ಕೆ ನಿವೃತ್ತನಾಗಲು ಸಾಧ್ಯವಿಲ್ಲ'

ವಿಕಾಸ್‌ ಕುಮಾರ್ ಕೋವಿಡ್‌ -19 ಸಾಂಕ್ರಾಮಿಕ ಪಿಡುಗಿನ ಕಾರಣದಿಂದಾಗಿ ಸೈನ್ಯಕ್ಕೆ ಸೇರುವ ಸಲುವಾಗಿ ಪಡೆಯುತ್ತಿದ್ದ ದೈಹಿಕ ಸಾಮರ್ಥ್ಯ ತರಬೇತಿಯನ್ನು ನಿಲ್ಲಿಸಬೇಕಾಯಿತು. 2022ರ ಆರಂಭದಲ್ಲಿ ಅವರು ತನ್ನದೇ ರೀತಿಯಲ್ಲಿ ಮತ್ತೆ ತರಬೇತಿಯನ್ನು ಆರಂಭಿಸಿದರು. ಇದರ ಭಾಗವಾಗಿ ಅವರು ಆರ್ರಾಹ್‌ ವಿಮಾನ ನಿಲ್ದಾಣದ ಮೈದಾನದಲ್ಲಿರುವ 40 ಮೀಟರ್‌ ಟ್ರ್ಯಾಕಿನಲ್ಲಿ 4ರಿಂದ 5 ಸುತ್ತು ಓಡುವುದನ್ನು ಸಹ ಮಾಡುತ್ತಿದ್ದರು. ಇದು ಒಟ್ಟು 1.6 ಕಿಲೋಮೀಟರ್‌ ದೂರ. "ನಾನು ಆ ದೂರವನ್ನು ಸುಮಾರು 5 ನಿಮಿಷ 20 ಸೆಕೆಂಡುಗಳಿಂದ 5 ನಿಮಿಷ 25 ಸೆಕೆಂಡುಗಳಲ್ಲಿ ಮುಗಿಸುತ್ತೇನೆ" ಎಂದು ಅವರು ಹೇಳುತ್ತಾರೆ.

ನಂತರ ಅವರು ದಿನಕ್ಕೆ 5-6 ಬಾರಿ ತಮ್ಮ ಓಟವನ್ನು ಪುನರಾವರ್ತಿಸುತ್ತಿದ್ದರು. ಹೀಗೆ ಓಡುವಾಗ ಸಮಯದ ಮೇಲೆ ಕಣ್ಣಿಟ್ಟಿರುತ್ತಿದ್ದರು. ಇದರ ಜೊತೆಗೆ ಅವರು ವೇಗವಾಗಿ ಒಂದೇ ಬಾರಿಗೆ 8-10‌ ಕ್ವಿಕ್ ಪುಲ್‌ ಮಾಡುತ್ತಿದ್ದರು. ಇದಲ್ಲದೆ ಸ್ಕ್ವಾಟ್‌, ಪುಶ್‌ - ಅಪ್‌ ರೀತಿಯ ಹಲವು ವ್ಯಾಯಾಮಗಳನ್ನು ಸಹ ಮಾಡುತ್ತಿದ್ದರು. “ನಾನು ಸೈನ್ಯದ ಫಿಸಿಕಲ್‌ ಫಿಟ್ನೆಸ್‌ ಟೆಸ್ಟಿನಲ್ಲಿ ಭಾಗವಹಿಸಿದ್ದರೆ [ಸೇನಾ ನೇಮಕಾತಿ] ನನ್ನ ಎದೆಯ ಮೇಲೆ ʼಎಕ್ಸಲೆಂಟ್‌ʼ ಎನ್ನುವ ಗುರುತು ಬಿದ್ದಿರುತ್ತಿತ್ತು” ಎಂದು ಅವರು ಹೇಳುತ್ತಾರೆ. ಅಭ್ಯರ್ಥಿಯೊಬ್ಬ ನಿಗದಿತ ಸಮಯಕ್ಕಿಂತ ಮುಂಚಿತವಾಗಿ ಓಟದ ಗುರಿಯನ್ನು ತಲುಪಿದರೆ ಸೇನಾ ಅಧಿಕಾರಿಗಳು ಆ ಪದವನ್ನು ಅವರ ಎದೆಯ ಮೇಲೆ ಮುದ್ರೆ ಒತ್ತುತ್ತಾರೆ.

ವಿಕಾಸ್‌ ನೇಮಕಾತಿ ದೈಹಿಕ ಪರೀಕ್ಷೆಯಲ್ಲಿ ಸಾಧನೆ ತೋರಲು ಸಿದ್ಧರಾಗಿದ್ದರು.

ಆದರೆ 2022ರ ಜೂನ್‌ ತಿಂಗಳು ಎನ್ನುವುದು ಅನೇಕ ಯುವಕರ ಪಾಲಿಗೆ ಕೊವಿಡ್‌ - 19 ಗಿಂತಲೂ ಹಾನಿಕಾರಕವಾಗಿತ್ತು. ಆ ತಿಂಗಳಿನಲ್ಲಿ ನಡೆದ ವಿದ್ಯಮಾನವು ಸಾಂಕ್ರಾಮಿಕ ಪಿಡುಗಿನ ರೀತಿಯದ್ದಲ್ಲವಾದರೂ, ಅದರ ಪರಿಣಾಮ ಅದಕ್ಕಿಂತಲೂ ತೀವ್ರವಾಗಿತ್ತು.

ಅದನ್ನು ಅಗ್ನಿಪಥ್‌ ಎಂದು ಕರೆಯಲಾಗಿತ್ತು. ವಿಕಾಸ್‌ ಈ ಪರೀಕ್ಷೆಯಲ್ಲಿ ಅದ್ಭುತ ಸಾಧನೆ ಮಾಡಿದರೆ ಅವರ ಎದೆಯ ಮೇಲೆ ʼಎಕ್ಸಲೆಂಟ್‌ʼ ಎನ್ನುವ ಮುದ್ರೆಯನ್ನು ಒತ್ತಲಾಗುವುದಿಲ್ಲ, ಬದಲಿಗೆ ಅವರ ಯೂನಿಫಾರ್ಮ್‌ ಮತ್ತು ಇತರ ವಸ್ತುಗಳ ಮೇಲೆ ʼಅಗ್ನಿವೀರ್‌ʼ ಎನ್ನುವ ಮುದ್ರೆಯನ್ನು ಒತ್ತಲಾಗುತ್ತದೆ.

“ಆರಂಭದಲ್ಲಿ, ಕೋವಿಡ್ -19 ಸಾಂಕ್ರಾಮಿಕ ರೋಗವು ಎರಡು ವರ್ಷಗಳ ಕಾಲ ಮುಂದುವರೆಯಿತು, ಈಸಮಯದಲ್ಲಿ ನಾನು ಮನೆಯಲ್ಲಿಯೇ ಇರಬೇಕಾಗಿತ್ತು, ಇದರ ಪರಿಣಾಮವಾಗಿ ದೈಹಿಕ ವ್ಯಾಯಾಮದ ಅಭ್ಯಾಸವನ್ನು ನಿಲ್ಲಿಸಬೇಕಾಯಿತು. ನಂತರ, ಸಾಂಕ್ರಾಮಿಕ ಪಿಡುಗು ಕೊನೆಗೊಳ್ಳುವ ಹೊತ್ತಿಗೆ ಸರ್ಕಾರವು ಅಗ್ನಿಪಥ್ ಯೋಜನೆಯನ್ನು ಪರಿಚಯಿಸಿತು” ಎಂದು ಅವರು ಹೇಳುತ್ತಾರೆ.

ಜೂನ್ 14, 2022ರಂದು, ಕೇಂದ್ರ ಸಚಿವ ಸಂಪುಟವು ಅಗ್ನಿಪಥ್ ನೇಮಕಾತಿ ಯೋಜನೆಗೆ ಅನುಮೋದನೆ ನೀಡಿತು, ಇದನ್ನು ಆಕರ್ಷಕ ಉಪಕ್ರಮ ಎಂದು ವಿವರಿಸಲಾಗಿದೆ. ಈ ಕಾರ್ಯಕ್ರಮವು ನಿಯಮಿತ ಸಿಬ್ಬಂದಿಗೆ 15 ವರ್ಷಗಳ ಪ್ರಮಾಣಿತ ಸೇವಾ ಅವಧಿಗೆ ಬದಲಾಗಿ, ನಾಲ್ಕು ವರ್ಷಗಳ ಅವಧಿಗೆ ಯುವ ಜನರನ್ನು ಸೈನ್ಯಕ್ಕೆ ಸೇರಿಸಿಕೊಳ್ಳಲು ಅನುಮತಿಸುತ್ತದೆ. ಈಯೋಜನೆಯಡಿ ನೇಮಕಗೊಂಡವರನ್ನು ಅಗ್ನಿವೀರರು ಎಂದು ಕರೆಯಲಾಗುತ್ತದೆ.

ವಿಕಾಸ್ ಈ ಕೇವಲ ನಾಲ್ಕು ವರ್ಷಗಳ ಉದ್ಯೋಗದ ಕಲ್ಪನೆಯಿಂದ ಗೊಂದಲಕ್ಕೆ ಒಳಗಾಗಿದ್ದಾರೆ. "ನಾನು 26ನೇ ವಯಸ್ಸಿನಲ್ಲಿ ನಿವೃತ್ತಿ ಹೊಂದಲು ಸಾಧ್ಯವಿಲ್ಲ" ಎಂದು ಅವರು ಹೇಳುತ್ತಾರೆ.

ಕೇಂದ್ರ ಸರ್ಕಾರವು ಈಯೋಜನೆಯನ್ನು "ಮೂರು ಸೇವೆಗಳ ಮಾನವ ಸಂಪನ್ಮೂಲ ನೀತಿಯಲ್ಲಿ ಹೊಸ ಯುಗವನ್ನು ಪ್ರಾರಂಭಿಸುತ್ತದೆ" ಎಂದು ಬಣ್ಣಿಸಿದೆ.

ಆದರೆ ನಿಜದಲ್ಲಿ ಈ ಯೋಜನೆ ಸೇನೆಗೆ ಸೇರಬಯಸುವ ಲಕ್ಷಾಂತರ ಯುವಕರ ವೃತ್ತಿಜೀವನವನ್ನು ಅಪಾಯಕ್ಕೆ ತಳ್ಳಿತು.

ವಿಕಾಸ್‌ ತನ್ನ ತಂದೆ ಹಾಗೂ ತಾತನನ್ನು ಸಮವಸ್ತ್ರದಲ್ಲಿ ನೋಡಿದವರು, ಮತ್ತು ಅವರಂತೆಯೇ ತಾನೂ ಸೈನಿಕನಾಗಬೇಕು ಎನ್ನುವ ಕನಸು ಕಂಡಿದ್ದರು.

"ಫೌಜ್ ಮೇ ಜಾನಾ ಮೇರೆ ಬಚ್ಪನ್ ಕಾ ಸಪ್ನಾ ಥಾ. ಹಮ್ ದೂಸ್ರೆ ಕಿಸೀ ಜಾಬ್ ಕೆ ಬಾರೇ ಮೇ ಸೋಚ್ತೇ ಹೀ ನಹೀ ಥೀ [ಸೇನೆಗೆ ಸೇರುವುದು ನನ್ನ ಕನಸಾಗಿತ್ತು. ನಾನು ಬೇರೆ ಕೆಲಸ ಮಾಡುವ ಯೋಚನೆ ಕೂಡಾ ಮಾಡಿದವನಲ್ಲ]” ಎಂದು ವಿಕಾಸ್ ತಾನು ದೈಹಿಕ ಫಿಸಿಕಲ್ ಫಿಟ್ನೆಸ್‌ ಪರೀಕ್ಷೆಗೆ ತಯಾರಿ ನಡೆಸುತ್ತಿದ್ದ ಅರ್ರಾಹ್ ನಗರದ ನಿರ್ಜನ ವಿಮಾನ ನಿಲ್ದಾಣದ ಮೈದಾನವನ್ನು ನೋಡುತ್ತಾ ಹೇಳುತ್ತಾರೆ. ಬಿಹಾರದ ಭೋಜ್ಪುರ ಜಿಲ್ಲೆಯಲ್ಲಿರುವ ಅರ್ರಾಹ್ ‌ಅವರು ಹುಟ್ಟುವ ಮೊದಲಿನಿಂದಲೂ ಪ್ರಮುಖ ಸೇನಾ ನೇಮಕಾತಿ ಕೇಂದ್ರ. ಅವರ ಸ್ವಂತ ಊರಾದ ರತನ್ ದುಲಾರಪುರ್ ಅರ್ರಾಹ್ ಬ್ಲಾಕಿಗೆ ಸೇರುತ್ತದೆ.

2019ರಲ್ಲಿ ಮೆಟ್ರಿಕ್ಯುಲೇಷನ್ ಪರೀಕ್ಷೆ ಬರೆದ ಅವರಿಗೆ ಆಗ ಕೇವಲ 16 ವರ್ಷ. ಈಗ 21 ವರ್ಷದ ಅವರು ಹೇಳುತ್ತಾರೆ: “ಪಾಪಾ ಕೋ ಆರ್ಮಿ ಕಿ ವರ್ದಿ ಮೇ ದೇಖಕರ್‌ ಗರ್ವ್‌ ಹೋತಾ ಥಾ … ಆರ್ಮಿ ಕಿ ವರ್ದಿ ಪೆಹನ್ನೇ ಸೇ ಅಲಗ್‌ ಹೀ ಫೀಲಿಂಗ್‌ ಆತಿ ಹೈ [ಅಪ್ಪನನ್ನು ಸೇನೆಯ ಉಡುಪಿನಲ್ಲಿ ನೋಡುವಾಗ ಅವರ ಕುರಿತು ಹೆಮ್ಮೆ ಎನ್ನಿಸುತ್ತಿತ್ತು…. ಸೇನಾ ಸಮವಸ್ತ್ರವನ್ನು ಧರಿಸುವುದು ನಿಮ್ಮಲ್ಲಿ ವಿಶೇಷ ಭಾವನೆಯನ್ನು ಮೂಡಿಸುತ್ತದೆ.]”

ವಿಕಾಸ್‌ ಮೆಟ್ರಿಕ್‌ ಪಾಸ್‌ ಆಗುವ ಹೊತ್ತಿಗೆ ಅವರ ಅಣ್ಣ ಸೈನ್ಯದಲ್ಲಿ ಭರ್ತಿಯಾಗಿದ್ದರು. ಇದು ಅವರ ಕನಸಿಗೆ ಇನ್ನಷ್ಟು ಬಲವನ್ನು ತುಂಬಿತು.

ಅವರು ತನ್ನ ಊರಿನಿಂದ ವಿಮಾನ ನಿಲ್ದಾಣದ ಮೈದಾನಕ್ಕೆ ತಮ್ಮ ಮೋಟಾರ್‌ಬೈಕಿನಲ್ಲಿ ಒಂಬತ್ತು ಕಿಲೋಮೀಟರ್ ಪ್ರಯಾಣಿಸಿ, ತೀವ್ರವಾದ ದೈಹಿಕ ತರಬೇತಿಯಲ್ಲಿ ತೊಡಗಿಸಿಕೊಳ್ಳುತ್ತಿದ್ದ ಸಮಯವನ್ನು ನೆನಪಿಸಿಕೊಳ್ಳುತ್ತಾರೆ.

ಆದರೆ ಅಗ್ನಿಪಥ್‌ ಅವರ ಕನಸನ್ನು ಕೊಂದಿತು. ಅಲ್ಲಿಗೆ ಅವರು ದೈಹಿಕ ತರಬೇತಿಗೆ ಹೋಗುವುದನ್ನು ನಿಲ್ಲಿಸಿದರು. "ನನ್ನ ಆರು ತಿಂಗಳ ಫಿಟ್ನೆಸ್ ತರಬೇತಿ ವ್ಯರ್ಥವಾಯಿತು. ನನಗೆ ಮೋಸ ಹೋದಂತೆ ಅನ್ನಿಸಿತು” ಎಂದು ಅವರು ಹೇಳುತ್ತಾರೆ.

ಈ ಬೇಸರದ ಹೊರತಾಗಿಯೂ ಅವರು ಒಂದು ಹಂತದಲ್ಲಿ ಅವರು 'ಸಂಬಂಧದ ಕೋಟಾ' ಅಡಿಯಲ್ಲಿ ಅಗ್ನಿವೀರ್ ಆಗಿ ಸೇರಲು ನಿರ್ಧರಿಸಿದರು. ಆದರೆ ಕುಟುಂಬ ಅದಕ್ಕೆ ಒಪ್ಪಿಗೆ ನೀಡಲಿಲ್ಲ.

ಸಂಬಂಧದ ಕೋಟಾ ಸೇನೆಯಲ್ಲಿರುವ ಅಥವಾ ಸೇವೆ ಸಲ್ಲಿಸುವಾಗ ಹುತಾತ್ಮರಾದವರ ಸಂಬಂಧಿಕರಿಗಾಗಿ ಇರುವ ಮೀಸಲು ಸೌಲಭ್ಯ. ಈಕೋಟಾದಡಿ ಸೈನ್ಯದಲ್ಲಿ ಉದ್ಯೋಗ ಪಡೆಯಲು ಸಂಬಂಧಿತ ಸೇನಾ ದಾಖಲೆಗಳ ಕಚೇರಿಯಿಂದ ನೀಡಲಾದ 'ಸಂಬಂಧ ಪ್ರಮಾಣಪತ್ರವನ್ನು' ಪಡೆಯಬೇಕು, ಇದಕ್ಕೆ ಸಂಬಂಧಪಟ್ಟ ದಾಖಲೆ ಅಧಿಕಾರಿ ಸಹಿ ಮಾಡಿರಬೇಕು.

“ಅಣ್ಣನ ಬಳಿ ಸಂಬಂಧಿಕರ ಪ್ರಮಾಣಪತ್ರವನ್ನು ತರುವಂತೆ ಕೇಳಿದೆ ಆದರೆ ಅವನು ಸೈನ್ಯದಲ್ಲಿ ಅಗ್ನಿವೀರ್‌ ಆಗಿ ಸೇರಿದರೆ ಯಾವುದೇ ಬೆಲೆಯಿಲ್ಲ. ಹೀಗಾಗಿ ಸೇರುವುದು ಬೇಡ ಎಂದು ಹೇಳಿದ” ಎಂದುಅವರು ಹೇಳುತ್ತಾರೆ.

ಅವರು ಈಗ ಬಿಹಾರ ಪೊಲೀಸ್, ಗಡಿ ಭದ್ರತಾ ಪಡೆ (ಬಿಎಸ್ಎಫ್) ಅಥವಾ ಇತರ ಸರ್ಕಾರಿ ಉದ್ಯೋಗವಕಾಶಗಳತ್ತ ಗಮನ ಹರಿಸಿದ್ದಾರೆ.

"ನಾನು 26ನೇ ವಯಸ್ಸಿಗೆ ನಿವೃತ್ತಿ ಹೊಂದಲು ಸಾಧ್ಯವಿಲ್ಲ" ಎಂದು ಅವರು ಹೇಳುತ್ತಾರೆ.

“ʼಫೌಜಿ ಸಾಹೇಬ್‌ʼ ಬದಲು ʼಅಗ್ನಿವೀರ್‌ʼ ಎಂದು ಕರೆಸಿಕೊಳ್ಳಲು ಯಾರು ಇಷ್ಟಪಡುತ್ತಾರೆ?” ಎಂದು ಅವರು ಕೇಳುತ್ತಾರೆ.

ಈ ಹಿಂದೆ, ಅಭ್ಯರ್ಥಿಗಳು ಆರಂಭಿಕ ಹಂತವಾಗಿ ದೈಹಿಕ ಸಾಮರ್ಥ್ಯ ಪರೀಕ್ಷೆಗೆ ಒಳಗಾಗಬೇಕಾಗಿತ್ತು. ಫಿಟ್ನೆಸ್ ಮಾನದಂಡಗಳನ್ನು ಪೂರೈಸಿದವರಿಗೆ ಮಾತ್ರ ಲಿಖಿತ ಪರೀಕ್ಷೆಗಳನ್ನು ತೆಗೆದುಕೊಳ್ಳಲು ಅವಕಾಶವಿತ್ತು. ಅಗ್ನಿಪಥ್ ಯೋಜನೆಯನ್ನು ಪರಿಚಯಿಸುವುದರೊಂದಿಗೆ, ಈಕಾರ್ಯವಿಧಾನವನ್ನು ಪರಿಷ್ಕರಿಸಲಾಯಿತು. ಆಕಾಂಕ್ಷಿಗಳು ಈಗ ಮೊದಲು ಕಂಪ್ಯೂಟರ್ ಆಧಾರಿತ ಆನ್ಲೈನ್ ಲಿಖಿತ ಪರೀಕ್ಷೆಯನ್ನು ಪೂರ್ಣಗೊಳಿಸಬೇಕು. ಮತ್ತು ಈಹಂತದಲ್ಲಿ ಉತ್ತೀರ್ಣರಾದವರು ಮಾತ್ರ ದೈಹಿಕ ಸಾಮರ್ಥ್ಯ ಪರೀಕ್ಷೆಗಳಿಗೆ ಅರ್ಹರಾಗುತ್ತಾರೆ.

ಸೇನೆಯ ದೈಹಿಕ ಸಾಮರ್ಥ್ಯ ಪರೀಕ್ಷೆಗಳು ಕಠಿಣವಾಗಿರುತ್ತವೆ.

ಭಾರತೀಯ ಸೇನೆಯ ಅಧಿಕೃತ ವೆಬ್ಸೈಟಿನಲ್ಲಿಒದಗಿಸಲಾದ ಮಾಹಿತಿಯ ಪ್ರಕಾರ, ಲಿಖಿತ ಪರೀಕ್ಷೆಯಲ್ಲಿ ಯಶಸ್ವಿಯಾಗಿ ಉತ್ತೀರ್ಣರಾದ ಮಹಿಳಾ ಅಭ್ಯರ್ಥಿಗಳು 1.6 ಕಿ.ಮೀ ಓಟವನ್ನು 7 ನಿಮಿಷ 30 ಸೆಕೆಂಡುಗಳ ಕಾಲ ಮಿತಿಯೊಳಗೆ ಪೂರ್ಣಗೊಳಿಸಬೇಕಾಗುತ್ತದೆ. ಈ ರನ್ನಿಂಗ್ ಟೆಸ್ಟ್ ಒಟ್ಟು 60 ಅಂಕಗಳನ್ನು ಹೊಂದಿರುತ್ತದೆ. ಹೆಚ್ಚುವರಿಯಾಗಿ, ಅಭ್ಯರ್ಥಿಗಳು 10 ಅಡಿ ಉದ್ದ ಜಿಗಿತ ಮತ್ತು ಮೂರು ಅಡಿ ಎತ್ತರ ಜಿಗಿತ ಎರಡಕ್ಕೂ ಅರ್ಹತಾ ಮಾನದಂಡಗಳನ್ನು ಪೂರೈಸಬೇಕು.

ಪುರುಷ ಅಭ್ಯರ್ಥಿಗಳು 1.6 ಕಿ.ಮೀ ಓಟವನ್ನು ಐದು ನಿಮಿಷ ಮೂವತ್ತು ಸೆಕೆಂಡುಗಳ ಸಮಯ ಮಿತಿಯೊಳಗೆ ಪೂರ್ಣಗೊಳಿಸಬೇಕಾಗುತ್ತದೆ. ಈಸ್ಪರ್ಧೆಗೆ ಒಟ್ಟು 60 ಅಂಕಗಳನ್ನು ನಿಗದಿಪಡಿಸಲಾಗಿದೆ. ಬೀಮ್ ಪುಲ್-ಅಪ್ ವ್ಯಾಯಾಮದಲ್ಲಿ, ಅಭ್ಯರ್ಥಿಗಳು ಗರಿಷ್ಠ 10 ಪುಲ್-ಅಪ್‌ ಸಾಧಿಸಿದರೆ 40 ಅಂಕಗಳನ್ನು ಗಳಿಸಬಹುದು ಮತ್ತು ಕನಿಷ್ಠ ಆರು ಪುಲ್-ಅಪ್‌ ಗಳಿಸಿದರೆ 16 ಅಂಕಗಳನ್ನು ನೀಡಲಾಗುತ್ತದೆ.

ಇದಲ್ಲದೆ, ಅಭ್ಯರ್ಥಿಯು ಒಂಬತ್ತು ಅಡಿ ಉದ್ದದ ಕಂದಕದ ಮೇಲೆ ಜಿಗಿಯಬೇಕು. ಇದನ್ನು ಅನುಸರಿಸಿ, ಜಿಗ್-ಜಾಗ್ ಬ್ಯಾಲೆನ್ಸಿಂಗ್‌ ಪರೀಕ್ಷೆ ಇರುತ್ತದೆ, ಇದರಲ್ಲಿ ಅನಿಯಮಿತವಾಗಿ ಜೋಡಿಸಲಾದ ಮರದ ತುಂಡುಗಳ ಸರಣಿಯ ಉದ್ದಕ್ಕೂ ವೇಗವಾಗಿ ನಡೆಯಬೇಕು, ಪ್ರತಿಯೊಂದೂ ಸರಿಸುಮಾರು 10 ಅಡಿ ಉದ್ದ ಮತ್ತು ಒಂದು ಅಡಿ ಅಗಲವಿರುತ್ತದೆ. ಈ ಪರೀಕ್ಷೆಗಳಿಗೆ ಯಾವುದೇ ಅಂಕಗಳನ್ನು ನೀಡಲಾಗುವುದಿಲ್ಲವಾದರೂ, ನೇಮಕಾತಿಗೆ ಅರ್ಹತೆ ಪಡೆಯಲು ಇವುಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸುವುದು ಅತ್ಯಗತ್ಯ.

ಇಂತಹ ಕಠಿಣ ತರಬೇತಿಗಳನ್ನು ನುರಿತ ಭೋದಕರಿಲ್ಲದೆ ಸಾಧಿಸುವುದು ಸಾಧ್ಯವಿಲ್ಲ.

ಈ ʼಅಗತ್ಯ ಅರ್ಹತಾ ಮಾನದಂಡವುʼ ಜಿಲ್ಲೆಯೊಳಗಿನ ದೈಹಿಕ ಸಾಮರ್ಥ್ಯ ತರಬೇತಿ ಸಂಸ್ಥೆಗಳಿಗೆ ಗಮನಾರ್ಹ ಬೇಡಿಕೆಯನ್ನು ಸೃಷ್ಟಿಸಿದೆ.

ರಾಮ್ನಾ ಮೈದಾನ, ವೀರ್ ಕುಂವರ್ ಸಿಂಗ್ ಕ್ರೀಡಾಂಗಣ, ವಿಮಾನ ನಿಲ್ದಾಣ ಮೈದಾನ, ಜೈನ್ ಕಾಲೇಜು ಮೈದಾನ ಮತ್ತು ಅರ್ರಾಹ್ ನಗರದ ಇತರ ಪ್ರಮುಖ ತೆರೆದ ಸ್ಥಳಗಳು ಒಂದು ಕಾಲದಲ್ಲಿ ನೂರಾರು ಯುವ ಜನರಿಂದ ತುಂಬಿರುತ್ತಿದ್ದವು, ಅವರು ತಮ್ಮ ತರಬೇತುದಾರರ ಜಾಗರೂಕ ಮೇಲ್ವಿಚಾರಣೆಯಲ್ಲಿ ಎರಡರಿಂದ ಮೂರು ಗಂಟೆಗಳ ಕಠಿಣ ತರಬೇತಿಯನ್ನು ಪಡೆಯುತ್ತಿದ್ದರು. ಆದರೆ ಅಗ್ನಿಪಥ್ ಯೋಜನೆಯ ಆಗಮನದ ನಂತರ, ಈಅನೇಕ ಯುವಕರು ಮಿಲಿಟರಿಯಲ್ಲಿ ಉದ್ಯೋಗದ ಕನಸನ್ನು ಮರೆತು ಬೇರೆ ಕೆಲಸಗಳತ್ತ ಗಮನಹರಿಸುತ್ತಿದ್ದಾರೆ.

ಯುವಕರ ಈ ಭ್ರಮನಿರಸನವು ದೈಹಿಕ ತರಬೇತಿ ಸಂಸ್ಥೆಗಳ ಮೇಲೆ ನಕಾರಾತ್ಮಕ ಪರಿಣಾಮ ಬೀರಿದೆ.

ಹಿಂದಿನ ಲೇಖನಗಳಲ್ಲಿ ಪರಿಯ ವರದಿಗಾರರು ತಿಳಿಸಿರುವಂತೆ, ಸಶಸ್ತ್ರ ಪಡೆಗಳಿಗೆ ಸರಾಸರಿ ವಾರ್ಷಿಕ ನೇಮಕಾತಿ 2020ನೇ ಇಸವಿಯ ತನಕ ಸರಿಸುಮಾರು 61,000.

ಜೂನ್ 2022ರಲ್ಲಿ ಪರಿಚಯಿಸಲಾದ ಅಗ್ನಿಪಥ್ ಯೋಜನೆಯಡಿ, ನೇಮಕಾತಿಗಳ ಸಂಖ್ಯೆ ಸುಮಾರು 46,000ಕ್ಕೆ ಇಳಿದಿದೆ. ಇದಲ್ಲದೆ, ಈ ಉಪಕ್ರಮವು ಸಶಸ್ತ್ರ ಪಡೆಗಳಲ್ಲಿ ಪೂರ್ಣಕಾಲಿಕ ವೃತ್ತಿಜೀವನವನ್ನು ಬಯಸಿದ್ದ ಅನೇಕ ಗ್ರಾಮೀಣ ಯುವಕರ ಆಕಾಂಕ್ಷೆಗಳನ್ನು ಭಗ್ನಗೊಳಿಸಿದೆ. ಪ್ರಸ್ತುತ ಯೋಜನೆಯ ಪ್ರಕಾರ ಅಗ್ನಿವೀರರಾಗಿ ನಾಲ್ಕು ವರ್ಷ ಸೇವೆ ಸಲ್ಲಿಸಬಹುದು. ಸೇವೆ ಪೂರ್ಣಗೊಂಡ ನಂತರ ನೇಮಕಗೊಂಡ ನಾಲ್ವರಲ್ಲಿಒಬ್ಬರನ್ನು ಮಾತ್ರ ಸಾಮಾನ್ಯ ಸೈನ್ಯಕ್ಕೆ ಸಂಯೋಜಿಸಲ್ಪಡಲಾಗುತ್ತದೆ.

ಆ ವಾಸ್ತವದೊಂದಿಗಿನ ಮುಖಾಮುಖಿಯು ವಿಕಾಸ್ ಕುಮಾರ್ ಅವರ ಆಕಾಂಕ್ಷೆಗಳನ್ನು ಛಿದ್ರಗೊಳಿಸಿತು. ಅವರ ಮಾತಿನಲ್ಲಿ ಆ ನೋವು ಪ್ರತಿಬಿಂಬಿಸುತ್ತದೆ, "ಮೇ ಇತ್ನೇ ಸದ್ಮೇ ಮೇ ಥಾ ಕೀ ದೋ-ತೀನ್‌ ಮಹೀನೇ ತಕ್‌ ಗ್ರೌಂಡ್‌ ಮೇ ಜಾನಾ ಚೋಡ್‌ ದಿಯಾ ಥಾ ಔರ್‌ ಆಗೆ ಕೀ ಪಡಾಯಿ ಮೇ ಫೋಕಸ್‌ ಕರ್ನೇ ಲಗಾ [ನಾನು ಬಹಳ ಆಘಾತಕ್ಕೆ ಒಳಗಾಗಿದ್ದೆ. ಎರಡು ಮೂರು ತಿಂಗಳವರೆಗೆ ಕ್ಷೇತ್ರಕ್ಕೆ ಮೈದಾನದತ್ತ ಹೋಗುವುದನ್ನೇ ನಿಲ್ಲಿಸಿದ್ದೆ. ನನ್ನ ಗಮನವನ್ನೆಲ್ಲ ಪೂರ್ತಿಯಾಗಿ ಓದಿನತ್ತ ತಿರುಗಿಸಿದ್ದೆ]” ಎಂದು ಅವರು ಹೇಳುತ್ತಾರೆ.

ಇದಲ್ಲದೆ ಈ ಯೋಜನೆಯಡಿನೀಡಲಾಗುವ ಸಂಬಳವೂ ಕಡಿಮೆ.

ಅಗ್ನಿವೀರ್ ಆಗಿ ಕೆಲಸಕ್ಕೆ ಸೇರಿದ ನಂತರ, ಮೊದಲ ವರ್ಷದಲ್ಲಿ ಮಾಸಿಕ 30,000 ರೂ.ಗಳ ಸಂಬಳವನ್ನು ಪಡೆಯುತ್ತಾರೆ, ಇದು ನಾಲ್ಕನೇ ವರ್ಷದ ವೇಳೆಗೆ 40,000 ರೂಪಾಯಿಗಳಿಗೆ ಏರಬಹುದು. ಪ್ರತಿ ತಿಂಗಳು, ಈವೇತನದ 30 ಪ್ರತಿಶತವನ್ನು ಅಗ್ನಿವೀರ್ ಕಾರ್ಪಸ್ ನಿಧಿಗೆ ಹಂಚಿಕೆ ಮಾಡಲಾಗುತ್ತದೆ, ಸರ್ಕಾರವೂ ಈ ನಿಧಿಗೆ ಕೊಡುಗೆಯನ್ನು ನೀಡುತ್ತದೆ. ನಾಲ್ಕು ವರ್ಷಗಳು ಪೂರ್ಣಗೊಂಡ ನಂತರ, ಅಗ್ನಿವೀರರಿಗೆ ಕಾರ್ಪಸ್ ನಿಧಿಯಿಂದ ಸೇವಾ ನಿಧಿಯಾಗಿ 11.71 ಲಕ್ಷ ರೂ.ಗಳ ತೆರಿಗೆ ವಿನಾಯಿತಿ ಮೊತ್ತವನ್ನು ನೀಡಲಾಗುತ್ತದೆ.

ಆ ಸೇವಾ ನಿಧಿ 'ಪ್ಯಾಕೇಜ್' ನ 50 ಪ್ರತಿಶತ ಮೊತ್ತವು ಅಗ್ನಿವೀರರ ಸ್ವಂತ ಸಂಬಳದಿಂದ ಬರುತ್ತದೆ ಎಂಬುದನ್ನು ಗಮನಿಸಿ. ಮತ್ತು ಅದರಲ್ಲಿ ಅವರ ಕೊಡುಗೆಯಿಂದ ಬರುವ ಬಡ್ಡಿಯೂ ಒಂದಷ್ಟು ಸೇರಿರುತ್ತದೆ.

ಒಬ್ಬ ಅಗ್ನಿವೀರ್ ಮೊದಲ ವರ್ಷದಲ್ಲಿ ತಿಂಗಳಿಗೆ 21,000 ರೂಪಾಯಿಗಳ ಸಂಬಳವನ್ನು ಪಡೆಯುತ್ತಾನೆ. ಈಮೊತ್ತವು ಎರಡನೇ ವರ್ಷದಲ್ಲಿ ರೂ. 23,100 ಕ್ಕೆ ಏರುತ್ತದೆ, ಮೂರನೇ ವರ್ಷದಲ್ಲಿ ರೂ. 25,500ಕ್ಕೆ ಏರುತ್ತದೆ ಮತ್ತು ನಾಲ್ಕನೇ ಮತ್ತು ಅಂತಿಮ ವರ್ಷದಲ್ಲಿ ರೂ. 28,000ಕ್ಕೆ ಕೊನೆಗೊಳ್ಳುತ್ತದೆ.

ಅಗ್ನಿವೀರರು ಸಶಸ್ತ್ರ ಪಡೆಗಳಲ್ಲಿ ತಮ್ಮ ಸೇವಾ ಅವಧಿಯ ಸಂಪೂರ್ಣ ಅವಧಿಗೆ 48 ಲಕ್ಷ ರೂ.ಗಳ ಜೀವ ವಿಮಾ ರಕ್ಷಣೆಯನ್ನು ಪಡೆಯುತ್ತಾರೆ. ಇದಕ್ಕೆ ವ್ಯತಿರಿಕ್ತವಾಗಿ, ಸಾಮಾನ್ಯ ಸೈನಿಕ ಪ್ರತಿ ವರ್ಷದ ಸೇವೆಗೆ 15 ದಿನಗಳ ವೇತನದಲ್ಲಿ ಲೆಕ್ಕಹಾಕಲಾದ ಗ್ರಾಚ್ಯುಟಿಗೆ ಅರ್ಹನಾಗಿರುತ್ತಾನೆ, ಜೊತೆಗೆ 50 ಲಕ್ಷ ರೂ.ಗಳ ವಿಮಾ ರಕ್ಷಣೆಯನ್ನು ಹೊಂದಿರುತ್ತಾನೆ. ಹೆಚ್ಚುವರಿಯಾಗಿ, ಸಾಮಾನ್ಯ ಸೈನಿಕರು ಪಿಂಚಣಿಗೆ ಅರ್ಹರು. ಆದರೆ ಅಗ್ನಿವೀರರಿಗೆ ಗ್ರಾಚ್ಯುಟಿ ಅಥವಾ ಪಿಂಚಣಿ ಪ್ರಯೋಜನಗಳು ಸಿಗುವುದಿಲ್ಲ.

ಸೇನೆಯ ಸಾಮಾನ್ಯ ಸೈನಿಕನು ಸಿಪಾಯಿ ಮಟ್ಟದ ಸೇವೆಗೆ ಸೇರಿದಾಗ 25,000 ರೂ.ಗಳ ವೇತನವನ್ನು ಪಡೆಯುತ್ತಾನೆ. ಸುಬೇದಾರ್ ಶ್ರೇಣಿಗೆ ಸೇರಿದರೆ 50,000 ರೂಪಾಯಿಗಳವರೆಗೆ ಸಂಬಳ ದೊರೆಯುತ್ತದೆ. ಇದಲ್ಲದೆ, ತುಟ್ಟಿಭತ್ಯೆ ಮತ್ತು ಸಾರಿಗೆ ಭತ್ಯೆ, ವಾರ್ಷಿಕ ಸಮವಸ್ತ್ರ ಭತ್ಯೆ, ನಿರ್ದಿಷ್ಟ ಸ್ಥಳದಲ್ಲಿ ನಿಯೋಜನೆ ಮತ್ತು ಮುಂತಾದ ಹಲವಾರು ಸೌಲಭ್ಯಗಳಿವೆ. ಭಾರತೀಯ ಮಿಲಿಟರಿ ಸಿಬ್ಬಂದಿ ಉಚಿತ ವೈದ್ಯಕೀಯ ಸೌಲಭ್ಯಗಳು, ನಿವೃತ್ತಿಯ ನಂತರ ಜೀವಮಾನದ ಪಿಂಚಣಿ ಮತ್ತು ಸೇವೆಯ ಸಮಯದಲ್ಲಿ ಮತ್ತು ನಿವೃತ್ತಿಯ ನಂತರ ಸಶಸ್ತ್ರ ಪಡೆಗಳ ಅಂಗಡಿಗಳಲ್ಲಿ ರಿಯಾಯಿತಿ ದರದಲ್ಲಿ ಸರಕುಗಳ ಖರೀದಿಗೆ ಅವಕಾಶವನ್ನು ಪಡೆಯುತ್ತಾರೆ.

ಅಗ್ನಿವೀರರಿಗೆ ಈ ಯಾವುದೇ ಭತ್ಯೆಗಳು, ಉಚಿತ ಸೇವೆಗಳು ಮತ್ತು ಪ್ರಯೋಜನಗಳು ಸಿಗುವುದಿಲ್ಲ. ಮತ್ತು ಅವರು ಹೋರಾಟದಲ್ಲಿರುವಾಗ ತೀರಿಕೊಂಡರೆ ಅವರ ಕುಟುಂಬಕ್ಕೆ ಅಗ್ನಿವೀರನ ಸಾವಿಗೆ ಪರಿಹಾರವನ್ನು ನೀಡಲಾಗುವುದಿಲ್ಲ.

*****

ಹಾಗಾದರೆ ಇವರ ಭವಿಷ್ಯವೇನು?

ಭವಿಷ್ಯ ಕೊನೆಯಾಗಿದೆ. "ಅಗ್ನಿಪಥ್ ಯೋಜನೆ ನನ್ನ ವೃತ್ತಿಜೀವನವನ್ನು ಕೊನೆಗೊಳಿಸಿದೆ" ಎಂದು ಆರು ಅಡಿ ಎತ್ತರದ ಫಿಸಿಕಲ್ ಫಿಟ್ನೆಸ್ ತರಬೇತುದಾರ ಜಾದೂ ಯಾದವ್ ಹೇಳುತ್ತಾರೆ. ನಮ್ಮ ಮಾತುಕತೆ ಅರ್ರಾಹ್ ನಗರದ ಅಂಚಿನಲ್ಲಿ ಹೊಸದಾಗಿ ನಿರ್ಮಿಸಲಾದ ಅವರ ಮನೆಯಲ್ಲಿ ನಡೆಯುತ್ತಿತ್ತು. ದೂರದ ಹಳ್ಳಿಗಳಿಂದ ಬರುವ ಸೇನಾ ಅಭ್ಯರ್ಥಿಗಳಿಗೆ ವಸತಿಗೃಹವಾಗಿ ಈ ಮನೆಯನ್ನು ವಿನ್ಯಾಸಗೊಳಿಸಲಾಗಿತ್ತು. ಈ ಮನೆ ಅಭ್ಯರ್ಥಿಗಳ ಸಿದ್ಧತೆಗಳ ಸಮಯದಲ್ಲಿ ಅವರಿಗೆ ವಸತಿ ಸೌಕರ್ಯವನ್ನು ಒದಗಿಸುತ್ತದೆ ಎಂದು ಅವರು ವಿವರಿಸುತ್ತಾರೆ.

2021ರಲ್ಲಿ, ಜಾದೂ ಯಾದವ್ ಫಿಸಿಕಲ್ ಫಿಟ್ನೆಸ್ ತರಬೇತುದಾರರಾಗಿ ವೃತ್ತಿಜೀವನವನ್ನು ಮುಂದುವರಿಸುವ ನಿರ್ಧಾರವನ್ನು ತೆಗೆದುಕೊಂಡರು. ಜಿಮ್ ಉಪಕರಣಗಳ ಉತ್ಪಾದನೆಗೆ ಹೆಸರುವಾಸಿಯಾದ ಉತ್ತರ ಪ್ರದೇಶದ ಮೀರತ್ ನಗರದಿಂದ ಅವರು ಬ್ಯಾಟಲ್‌ ರೋಪ್ಸ್, ಸ್ಪೀಡ್‌ ಹಡ್ಡಲ್ಸ್, ಬಾಕ್ಸ್ ಜಂಪ್ಸ್, ಮ್ಯಾಟ್ ಮತ್ತು ಇತರ ವ್ಯಾಯಾಮ ಉಪಕರಣಗಳನ್ನು ಬಹಳ ಉತ್ಸಾಹದಿಂದ ತರಿಸಿದರು.

ಇದೆಲ್ಲದಕ್ಕಾಗಿ ಅವರು 5 ಲಕ್ಷ ರೂಪಾಯಿಗಳನ್ನು ವ್ಯಯಿಸಿದ್ದರು. ಆದರೆ ಅದೆಲ್ಲವೂ ಈಗ ಮನೆಯಲ್ಲಿ ಎಲ್ಲೆಂದರಲ್ಲಿ ವ್ಯರ್ಥವಾಗಿ ಬಿದ್ದಿವೆ.

ಈಗ ಆ ಉಪಕರಣಗಳನ್ನು ಕಂಡಾಗಲೆಲ್ಲ ಅವರಲ್ಲಿ ವಿಷಾದವೊಂದು ಮೂಡಿ ಮರೆಯಾಗುತ್ತದೆ.

"ನಾನು ಸ್ಥಳೀಯ ಬಡ್ಡಿ ವ್ಯಾಪಾರದವರಿಂದ ಶೇಕಡಾ 4ರಷ್ಟು ಮಾಸಿಕ ಬಡ್ಡಿಯಲ್ಲಿ 4 ಲಕ್ಷ ರೂಪಾಯಿಗಳ ಸಾಲ ತೆಗೆದುಕೊಂಡಿದ್ದೆ (ಅಂದರೆ, ವಾರ್ಷಿಕ ಶೇಕಡಾ 48ರದರ). ಅದಕ್ಕೆ ನನ್ನ ಉಳಿತಾಯದಿಂದ ಒಂದು ಲಕ್ಷವನ್ನು ಸೇರಿಸಿದೆ" ಎಂದು ಜಾದೂ ಹೇಳುತ್ತಾರೆ. "ನಾವು ಛೋಟಾ ಹಾಥಿ (ಅರ್ಥಾತ್ ಸಣ್ಣ ಆನೆ, ಟಾಟಾ ಏಸ್‌ ಗಾಡಿಯನ್ನು ಹೀಗೆ ಕರೆಯಲಾಗುತ್ತದೆ) ತೆಗೆದುಕೊಂಡು ಮೀರತ್ ನಗರದಿಂದಉಪಕರಣಗಳನ್ನು ತಂದಿದ್ದೆವು. ಇದೆಲ್ಲವನ್ನೂ ತರಿಸಿದಾಗ ನನಗೆ ನನಗೆ ಬಹಳ ಸಂತೋಷವಾಗಿತ್ತು" ಎಂದು ಈ 30 ವರ್ಷದ ತರಬೇತುದಾರ ಹೇಳುತ್ತಾರೆ.

ಮೂವರು ಸಹೋದರರು ಮತ್ತು ನಾಲ್ವರು ಸಹೋದರಿಯರಲ್ಲಿ ಕಿರಿಯವರಾದ ಜಾದೂ, ಸೇನೆಗೆ ಸೇರಲು ಬಯಸುವ ಯುವಕರಿಗೆ ತರಬೇತಿ ನೀಡಲು ವಿಮಾನ ನಿಲ್ದಾಣದ ಮೈದಾನದಲ್ಲಿ ಫಿಸಿಕಲ್ ಅಕಾಡೆಮಿಯನ್ನು ನಡೆಸುತ್ತಿದ್ದಾರೆ.

“ನಾನು ಓಟದಲ್ಲಿ ಮುಂದಿದ್ದೆ. ಹೀಗಾಗಿ ಸೇನೆ ಸೇರಲು ಬಯಸುವ ಯುವ ಆಕಾಂಕ್ಷಿಗಳಿಗೆ ತರಬೇತಿ ನೀಡಲು ಯೋಚಿಸಿದೆ. ನಾನು ಯುಪಿಯ ಸಂಸ್ಥೆಯೊಂದರಿಂದ ದೈಹಿಕ ತರಬೇತಿಯಲ್ಲಿ ಪದವಿ ಪಡೆದಿದ್ದೇನೆ" ಎಂದುಅವರು ಹೇಳುತ್ತಾರೆ.

ಅವರು ಪ್ರತಿದಿನ 200 ಯುವಕರ ನಾಲ್ಕು ಬ್ಯಾಚುಗಳಿಗೆ ತರಬೇತಿ ನೀಡುತ್ತಿದ್ದರು. ಈ ಪೈಕಿ ಶೇ.90ಕ್ಕೂ ಹೆಚ್ಚು ಯುವಕರು ಸೇನೆಗೆ ಸೇರಲು ತಯಾರಿ ನಡೆಸುತ್ತಿದ್ದರು. "ನಾನು ತಿಂಗಳಿಗೆ 50,000 ರೂಪಾಯಿಗಳಷ್ಟನ್ನು ಸಂಪಾದಿಸುತ್ತಿದ್ದೆ" ಎಂದು ಅವರು ನೆನಪಿಸಿಕೊಳ್ಳುತ್ತಾರೆ.

ಅಗ್ನಿಪಥ್ ಯೋಜನೆ ಬಂದ ನಂತರ, "ದೈಹಿಕ ತರಬೇತಿ ತೆಗೆದುಕೊಳ್ಳುವ ಯುವಕರ ಸಂಖ್ಯೆ ಅರ್ಧಕ್ಕಿಂತ ಕಡಿಮೆಯಾಗಿದೆ. ಆಗುಂಪಿನಲ್ಲಿಯೂ ಕೇವಲ 10-12 ಹುಡುಗರು ಮಾತ್ರ ಸೈನ್ಯಕ್ಕೆ ಸೇರಲು ಸಿದ್ಧರಿದ್ದಾರೆ. ಉಳಿದವರು ಬಿಹಾರ ಮತ್ತು ಜಾರ್ಖಂಡ್ ಪೊಲೀಸ್‌ ಉದ್ಯೋಗಕ್ಕೆ ತಯಾರಿ ನಡೆಸುತ್ತಿದ್ದಾರೆ" ಎಂದು ಅವರು ಹೇಳುತ್ತಾರೆ.

ಜಾದೂ ಪ್ರಸ್ತುತ ತಿಂಗಳಿಗೆ 15,000ರಿಂದ 20,000 ರೂಪಾಯಿಗಳವರೆಗೆ ಸಂಪಾದಿಸುತ್ತಾರೆ, ಮತ್ತು ಈ ಆದಾಯವು ಸ್ಥಿರವಾಗಿರುವುದಿಲ್ಲ. ಈ ಹಿಂದೆ, ದೈಹಿಕ ಸಾಮರ್ಥ್ಯ ಪರೀಕ್ಷೆಗಳು ಆರಂಭಿಕ ಅವಶ್ಯಕತೆಯಾಗಿದ್ದವು, ಇದು ಯುವ ಜನರನ್ನು ವರ್ಷವಿಡೀ ತಯಾರಿ ಮಾಡಲು ಪ್ರೇರೇಪಿಸುತ್ತಿತ್ತು. ಆದರೆ ಈಗ ಅಭ್ಯರ್ಥಿಗಳು ಲಿಖಿತ ಪರೀಕ್ಷೆಯಲ್ಲಿ ಉತ್ತೀರ್ಣರಾದ ನಂತರವೇ ದೈಹಿಕ ತರಬೇತಿಯಲ್ಲಿ ತೊಡಗುತ್ತಾರೆ. ಅಂತೆಯೇ, ಬಿಹಾರ ಪೊಲೀಸ್ ನೇಮಕಾತಿಗೆ, ಲಿಖಿತ ಪರೀಕ್ಷೆಗಳನ್ನು ಮೊದಲು ನಡೆಸಲಾಗುತ್ತದೆ ಮತ್ತು ಈಪರೀಕ್ಷೆಯಲ್ಲಿ ಉತ್ತೀರ್ಣರಾದವರಿಗೆ ಮಾತ್ರ ದೈಹಿಕ ಅರ್ಹತಾ ಪರೀಕ್ಷೆಯನ್ನು ತೆಗೆದುಕೊಳ್ಳಲು ಅವಕಾಶವಿದೆ.

ಲಿಖಿತ ಪರೀಕ್ಷೆಯಲ್ಲಿ ಉತ್ತೀರ್ಣರಾದ ಅಭ್ಯರ್ಥಿಗಳು ಎರಡರಿಂದ ಮೂರು ತಿಂಗಳ ಅವಧಿಗಷ್ಟೇ ನನ್ನ ದೈಹಿಕ ತರಬೇತಿ ತರಗತಿಗಳಿಗೆ ಹಾಜರಾಗುತ್ತಾರೆ. ಲಿಖಿತ ಮತ್ತು ದೈಹಿಕ ಪರೀಕ್ಷೆಗಳ ನಡುವೆ ಸರ್ಕಾರವು ಎರಡರಿಂದ ಮೂರು ತಿಂಗಳ ಅವಧಿಯನ್ನು ನಿಗದಿಪಡಿಸುವುದರಿಂದ ಈ ಕಾಲಮಿತಿ ನಿಶ್ಚಿತವಾಗಿದೆ ಎಂದು ಅವರು ವಿವರಿಸುತ್ತಾರೆ.

ಇದರಿಂದಾಗಿ ನಾನು ಈಗ ತಿಂಗಳುಗಟ್ಟಲೆ ನಿರುದ್ಯೋಗಿಯಾಗಿ ಇರಬೇಕಾಗುತ್ತದೆ” ಎಂದು ಅವರು ಹೇಳುತ್ತಾರೆ. ಇದೀಗ ಅವರು ತಮ್ಮ ಹೆಂಡತಿ, ಮೂರು ವರ್ಷದ ಮಗ ಮತ್ತು ಒಂದು ವರ್ಷದ ಮಗಳಿಂದ ಕೂಡಿದ ಕುಟುಂಬದ ಅಗತ್ಯಗಳನ್ನು ಪೂರೈಸಲು ಸಾಧ್ಯವಾಗದೆ ಪರದಾಡುತ್ತಿದ್ದಾರೆ.

ಈಗ ಜಾದೂ ಯಾದವ್‌ ಭೋಜ್ಪುರಿ ಸಂಗೀತ ಕ್ಷೇತ್ರದಲ್ಲಿ ತಮ್ಮ ಅದೃಷ್ಟ ಪರೀಕ್ಷೆಗೆ ಪ್ರಯತ್ನಿಸುತ್ತಿದ್ದಾರೆ.

ಪ್ರತಿ ಸಂಜೆ, ನಾನು ಜಾರ್ಖಂಡ್ ರಾಜ್ಯದ ಝರಿಯಾದಿಂದ ಖರೀದಿಸಿದ ಹಾರ್ಮೋನಿಯಂ ಬಳಸಿಕೊಂಡು ಸಂಗೀತ ಶಿಕ್ಷಕರ ಮಾರ್ಗದರ್ಶನದಲ್ಲಿ ಹಾಡುಗಾರಿಕೆ ಅಭ್ಯಾಸಕ್ಕೆ ಎರಡು ಗಂಟೆಗಳ ಕಾಲ ಮೀಸಲಿಡುತ್ತಿದ್ದೇನೆ ಎಂದು ಅವರು ಅವರು ಹೇಳುತ್ತಾರೆ. ಅವರ ದನಿ ಹಾರ್ಮೋನಿಯಂ ಸ್ವರದೊಂದಿಗೆ ಸುಂದರವಾಗಿ ಹೊಂದಿಕೆಯಾಗುತ್ತಿತ್ತು.

“ಭೋಜ್ಪುರಿ ಗಾಯಕರು ತಮ್ಮ ಹಾಡುಗಳನ್ನು ಯೂಟ್ಯೂಬ್‌ ರೀತಿಯ ಆನ್ಲೈನ್‌ ವೇದಿಕೆಗಳಲ್ಲಿ ಬಿಡುಗಡೆ ಮಾಡುವ ಮೂಲಕ ಒಳ್ಳೆಯ ಆದಾಯವನ್ನು ಗಳಿಸುತ್ತಿದ್ದಾರೆ, ಬಹುಶಃ ನಿರಂತರ ಪ್ರಯತ್ನದ ಮೂಲಕ ನಾನೂ ಒಂದಷ್ಟು ಆದಾಯ ಗಳಿಸಲು ಸಾಧ್ಯವಾಗಬಹುದು. ಅಗ್ನಿಪಥ್‌ ಯೋಜನೆ ಬಂದ ಮೇಲೆ ದೈಹಿಕ ತರಬೇತಿಯ ಉದ್ಯೋಗವನ್ನು ನಂಬಿಕೊಂಡು ಬದುಕು ನಡೆಸುವುದು ಕಷ್ಟವಾಗುತ್ತಿದೆ” ಎಂದು ಅವರು ಹೇಳುತ್ತಾರೆ.

ಈ ನಡುವೆ ಅರ್ರಾಹ್‌ ಪ್ರದೇಶದ ಫಿಸಿಕಲ್‌ ಫಿಟ್ನೆಸ್ತರಬೇತುದಾರರಾಗಿರುವ 38 ವರ್ಷದ ಮೋಹನ್ ಸಿಂಗ್ ಈಗ ಕ್ರೀಡೆಯತ್ತ ಗಮನ ಹರಿಸುತ್ತಿದ್ದಾರೆ.

"ನಾನು ಐದು ವರ್ಷಗಳ ಹಿಂದೆ ದೈಹಿಕ ತರಬೇತಿ ತರಗತಿಗಳನ್ನು ಪ್ರಾರಂಭಿಸಿದೆ, ಆ ಸಮಯದಲ್ಲಿ 300 ಯುವಕರನ್ನು ವಿದ್ಯಾರ್ಥಿಗಳನ್ನಾಗಿ ಹೊಂದಿದ್ದೆ, ಆದರೆ ಈಗ ನಾನು ಅದನ್ನು ನಿಲ್ಲಿಸಿದ್ದೇನೆ" ಎಂದು ಅವರು ಹೇಳುತ್ತಾರೆ. "ಅಗ್ನಿಪಥ್ ಬಂದ ನಂತರ, ಒಬ್ಬನೇ ಒಬ್ಬ ಯುವಕ ಸೈನ್ಯಕ್ಕೆ ಸೇರಲು ತಯಾರಿ ನಡೆಸುತ್ತಿಲ್ಲ. ಯುವಕರು ಹತಾಶರಾಗಿದ್ದಾರೆ. ದೈಹಿಕ ಸಾಮರ್ಥ್ಯ ತರಬೇತಿ ವ್ಯವಹಾರ ಪೂರ್ತಿಯಾಗಿ ಸ್ಥಗಿತಗೊಂಡಿದೆ.

ದೀರ್ಘಕಾಲದಿಂದ ಕ್ರೀಡೆಯ ಬಗ್ಗೆ ಒಲವನ್ನು ಹೊಂದಿರುವ, ರಜಪೂತ ಸಮುದಾಯಕ್ಕೆ ಸೇರಿದ ಕಲಾ ಪದವೀಧರ ಮೋಹನ್ ಸಿಂಗ್ ಅವರು ಥಾಯ್ ಬಾಕ್ಸಿಂಗ್ ಅಭ್ಯಾಸದಲ್ಲಿಯೂ ತೊಡಗಿಸಿಕೊಂಡಿದ್ದಾರೆ. 'ಮುವಾಯ್ ಥಾಯ್' ಎಂದು ಕರೆಯಲ್ಪಡುವ ಈಸಮರ ಕಲೆಯು ಥೈಲ್ಯಾಂಡ್‌ ದೇಶದಲ್ಲಿ ತನ್ನ ಬೇರುಗಳನ್ನು ಹೊಂದಿದೆ ಮತ್ತು ಹಲವಾರು ಶತಮಾನಗಳಷ್ಟು ಹಳೆಯದು. ಅಭ್ಯಾಸದ ಸಮಯದಲ್ಲಿ ತಮ್ಮ ಮುಷ್ಟಿ, ಮೊಣಕೈ, ಮೊಣಕಾಲು ಮತ್ತು ಪಾದಗಳನ್ನು ಬಳಸಿ ಎದುರಾಳಿಯನ್ನು ಮಣಿಸಲಾಗುತ್ತದೆ. ಇದನ್ನು ಎಂಟು ಅಂಗಗಳ ಕಲೆ [ಅಥವಾ ವಿಜ್ಞಾನ] ಎಂದೂ ಕರೆಯಲಾಗುತ್ತದೆ.

ಆದರೆ ಮೋಹನ್ "ನನಗೆ ಸರ್ಕಾರದಿಂದ ಯಾವುದೇ ರೀತಿಯ ಬೆಂಬಲ ಸಿಗಲಿಲ್ಲ ಜೊತೆಗೆ ನನ್ನ ಕುಟುಂಬವು ಸಹ ಕ್ರೀಡೆಯನ್ನು ವೃತ್ತಿಯಾಗಿ ನೋಡದ ಕಾರಣ ಈ ಕನಸನ್ನು ಕೈ ಬಿಡಬೇಕಾಯಿತು" ಎಂದು ಅವರು ಹೇಳುತ್ತಾರೆ.

"ಆದರೆ ಯುವಕರು ತಮ್ಮ ಸೈನ್ಯಕ್ಕೆ ಸೇರುವ ಕನಸನ್ನು ಕೈಬಿಡುವುದು ನನಗೆ ಇಷ್ಟವಿರಲಿಲ್ಲ, ಹೀಗಾಗಿ ನಾನು ಅವರಿಗೆ ತಿಂಗಳಿಗೆ ಕೇವಲ 200 ರೂಪಾಯಿಗಳ ಶುಲ್ಕಕ್ಕೆದೈಹಿಕ ತರಬೇತಿ ನೀಡಲು ಪ್ರಾರಂಭಿಸಿದೆ" ಎಂದು ಅವರು ಹೇಳುತ್ತಾರೆ.

ಅಗ್ನಿಪಥ್ ಜಾರಿಗೆ ಬಂದ ನಂತರ, ತರಬೇತಿ ಬಹುತೇಕ ನಿಂತುಹೋಗಿದೆ. "ಈಗ ಫಿಸಿಕಲ್ ಅಕಾಡೆಮಿಯನ್ನು ಕ್ರೀಡಾ ಸಂಸ್ಥೆಯಾಗಿ ಪರಿವರ್ತಿಸಿದ್ದೇನೆ. ವೇಟ್ ಲಿಫ್ಟಿಂಗ್, ಬಾಕ್ಸಿಂಗ್, ಕುಸ್ತಿ ಮುಂತಾದ ಕ್ರೀಡೆಗಳನ್ನು ಕಲಿಸಲು ತಜ್ಞರನ್ನು ನೇಮಿಸಿಕೊಂಡಿದ್ದೇನೆ" ಎಂದು ಮೋಹನ್ ಸಿಂಗ್ ಹೇಳುತ್ತಾರೆ.

ಅವರು ಅಗ್ನಿಪಥ್‌ ಯೋಜನೆಯನ್ನು ತೀವ್ರವಾಗಿ ಟೀಕಿಸುವುದರ ಜೊತೆಗೆ ಈ ಯೋಜನೆಗೆ ಯುವಕರಿಗೆ ಒಳ್ಳೆಯದಲ್ಲ ಎನ್ನುತ್ತಾರೆ

ಬಿಹಾರದ ಅನೇಕ ಕೆಳ ಮಧ್ಯಮ ವರ್ಗದ ಕುಟುಂಬಗಳು ಸರ್ಕಾರಿ ಉದ್ಯೋಗಗಳ ಮೇಲೆ, ವಿಶೇಷವಾಗಿ ಸಶಸ್ತ್ರ ಪಡೆಗಳಲ್ಲಿನ ಉದ್ಯೋಗಗಳ ಅವಲಂಬಿತವಾಗಿವೆ. ಉದಾಹರಣೆಗೆ, ಮಕ್ಕಳು 10ನೇ ತರಗತಿ ಪರೀಕ್ಷೆಯ ನಂತರ, ಸೈನ್ಯದಲ್ಲಿ ಕೆಲಸ ಸಿಕ್ಕರೆ, ತಮ್ಮ ಕುಟುಂಬದ ಮುಂದಿನ ಹಲವಾರು ತಲೆಮಾರುಗಳ ಭವಿಷ್ಯವು ಸ್ಥಿರಗೊಳ್ಳುತ್ತದೆ ಎಂಬ ಭರವಸೆಯೊಂದಿಗೆ ಸೈನ್ಯಕ್ಕೆ ಸೇರಲು ತಯಾರಿ ಪ್ರಾರಂಭಿಸುತ್ತಾರೆ.

“ಆದರೆ ಅಂತಹ ಕುಟುಂಬಗಳಿಗೆ ಅಗ್ನಿಪಥ್‌ ಯೋಜನೆ ಇಷ್ಟವಿಲ್ಲ. ನಾಲ್ಕು ವರ್ಷಗಳ ನಂತರ ಕೆಲಸ ಇಲ್ಲವೆನ್ನುವುದೇ ಇದಕ್ಕೆ ಕಾರಣ. ಅದರ ನಂತರ ಅವರು ಮತ್ತೊಂದು ಸರ್ಕಾರಿ ನೌಕರಿಗೆ ಪ್ರಯತ್ನಿಸುವಷ್ಟು ಸಾಮರ್ಥ್ಯವನ್ನು ಹೊಂದಿರುವುದಿಲ್ಲ" ಎಂದು ಅವರು ಹೇಳುತ್ತಾರೆ.

2024ರಸಾರ್ವತ್ರಿಕ ಚುನಾವಣೆಯಲ್ಲಿ ಭಾರತೀಯ ಜನತಾ ಪಕ್ಷ (ಬಿಜೆಪಿ) ಗಳಿಸಿದ ಮತಗಳ ಸಂಖ್ಯೆಯಲ್ಲಿ ಬಿಹಾರದ ಯುವಕರಲ್ಲಿನ ಆಕ್ರೋಶವು ಪ್ರತಿಬಿಂಬಿತವಾಗಿದೆ. ಬಿಹಾರದಲ್ಲಿ, ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟ (ಎನ್‌ಡಿಎ) 2019ರಲ್ಲಿ ಗೆದ್ದಿದ್ದ 39 ಸ್ಥಾನಗಳಲ್ಲಿ 9 ಸ್ಥಾನಗಳನ್ನು ಕಳೆದುಕೊಂಡಿದೆ. ಬಿಜೆಪಿ ಐದು ಸ್ಥಾನಗಳನ್ನು ಕಳೆದುಕೊಂಡರೆ, ನಿತೀಶ್ ಕುಮಾರ್ ಅವರ ಜೆಡಿಯು ನಾಲ್ಕು ಸ್ಥಾನಗಳನ್ನು ಕಳೆದುಕೊಂಡಿದೆ.

ಅರ್ರಾಹ್ ಲೋಕಸಭಾ ಕ್ಷೇತ್ರದ ಎರಡು ಬಾರಿಯ ಬಿಜೆಪಿ ಸಂಸದ, ಮಾಜಿ ಕೇಂದ್ರ ಸಚಿವ ಮತ್ತು ಅಧಿಕಾರಿ ಆರ್.ಕೆ.ಸಿಂಗ್ ಅವರು ಕಮ್ಯುನಿಸ್ಟ್ ಪಾರ್ಟಿ ಆಫ್ ಇಂಡಿಯಾ ಎಂಎಲ್ (ಲಿಬರೇಷನ್) ನಾಯಕ ಸುಧಾಮ ಪ್ರಸಾದ್ ವಿರುದ್ಧ ಸೋತಿದ್ದಾರೆ. 2019ರಲ್ಲಿ ಆರ್ ಕೆ ಸಿಂಗ್ ಸುಮಾರು 1.5 ಲಕ್ಷ ಮತಗಳ ಅಂತರದಿಂದ ಗೆದ್ದಿದ್ದರು. 2024ರಲ್ಲಿ ಅವರು ಸುಧಾಮ ಪ್ರಸಾದ್ ವಿರುದ್ಧ ಸುಮಾರು 60,000 ಮತಗಳಿಂದ ಸೋತರು.

2024ರ ಫಲಿತಾಂಶಗಳ ನಂತರ ಮತ್ತು ಅಗ್ನಿಪಥ್ ಯೋಜನೆಗೆ ಸಂಬಂಧಿಸಿದಂತೆ ಯುವಕರು ಮತ್ತು ಅವರ ಕುಟುಂಬಗಳಲ್ಲಿ ಹೆಚ್ಚುತ್ತಿರುವ ಅಸಮಾಧಾನಕ್ಕೆ ಪ್ರತಿಕ್ರಿಯೆಯಾಗಿ, ಬಿಹಾರದಲ್ಲಿ ಬಿಜೆಪಿಯ ಮೈತ್ರಿ ಪಾಲುದಾರರಾಗಿರುವ ನಿತೀಶ್ ಕುಮಾರ್ ಅವರ ಜನತಾದಳ (ಯುನೈಟೆಡ್) ಈ ಯೋಜನೆಯಲ್ಲಿ ಪರಿಶೀಲನೆ ಮಾಡಲು ಕರೆ ನೀಡಿತು.

"ಅಗ್ನಿವೀರ್ ಯೋಜನೆಯ ಬಗ್ಗೆ ಮತದಾರರಲ್ಲಿ ಆಕ್ರೋಶವಿದೆ. ಜನರು ಆಕ್ಷೇಪಣೆ ಹೊಂದಿರುವ ವಿಷಯಗಳನ್ನು ಯೋಜನೆಯಿಂದ ತೆಗೆದುಹಾಕಬೇಕೆಂದು ನಮ್ಮ ಪಕ್ಷ ಬಯಸುತ್ತದೆ" ಎಂದು ಜೆಡಿಯು ನಾಯಕ ಕೆ ಸಿ ತ್ಯಾಗಿ ನ್ಯೂ ಇಂಡಿಯನ್ ಎಕ್ಸ್ಪ್ರೆಸ್‌ ಪತ್ರಿಕೆಗೆ ತಿಳಿಸಿದ್ದರು.

2022ರಲ್ಲಿ ಅಗ್ನಿಪಥ್ ಯೋಜನೆಯ ಪರಿಚಯವಾಯಿತು. ಇದು ಹಿಂದಿನ ವರ್ಷದ ಸಾಮಾನ್ಯ ನೇಮಕಾತಿಯ ಸಮಯದಲ್ಲಿ ಆಯ್ಕೆ ಪ್ರಕ್ರಿಯೆಯ 1ನೇ ಹಂತವನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ ಅಭ್ಯರ್ಥಿಗಳ ಮೇಲೂ ಪ್ರತಿಕೂಲ ಪರಿಣಾಮ ಬೀರಿತು. ಅನೇಕ ಅಭ್ಯರ್ಥಿಗಳು ಈಗಾಗಲೇ 2021ರಲ್ಲಿ ಸವಾಲಿನ ದೈಹಿಕ ಪರೀಕ್ಷೆಗಳಲ್ಲಿ ಉತ್ತೀರ್ಣರಾಗಿದ್ದರು, ಲಿಖಿತ ಪರೀಕ್ಷೆ ಮಾತ್ರ ಬಾಕಿ ಉಳಿದಿತ್ತು. ಆದರೆ, ಕೇಂದ್ರ ಸರ್ಕಾರವು ಅವರ ಆಯ್ಕೆಗಳನ್ನು ರದ್ದುಗೊಳಿಸಿ, ಈಹಿಂದೆ ಪರೀಕ್ಷೆಗಳಲ್ಲಿ ಉತ್ತೀರ್ಣರಾದ ಎಲ್ಲಾ ಅಭ್ಯರ್ಥಿಗಳು ಪರಿಷ್ಕೃತ ಯೋಜನೆಯಡಿ ಸಂಪೂರ್ಣ ಆಯ್ಕೆ ಪ್ರಕ್ರಿಯೆಗೆ ಹೊಸದಾಗಿ ಒಳಗಾಗಬೇಕಾಗುತ್ತದೆ ಎಂದು ಹೇಳಿತು.

ಈ ನಿರ್ಧಾರವು ಹಲವಾರು ಯುವಕರು ಆತ್ಮಹತ್ಯೆ ಮಾಡಿಕೊಳ್ಳಲು ಕಾರಣವಾಗಿದೆ ಎನ್ನುವುದು ಮೋಹನ್ ಸಿಂಗ್ ಅಭಿಪ್ರಾಯ. ಅಗತ್ಯ ವೈದ್ಯಕೀಯ ಮತ್ತು ಇತರ ಪ್ರಮಾಣಪತ್ರಗಳನ್ನು ಮಾಡಿಸಿಕೊಡುವ ಭರವಸೆ ನೀಡಿದ ಮೋಸಗಾರ ದಲ್ಲಾಳಿಗೆ ಹಣ ನೀಡಲು ಈ ಅಭ್ಯರ್ಥಿಗಳು ಸಾಲ ಮಾಡಿಕೊಳ್ಳುವುದರ ಜೊತೆಗೆ ಮನೆಯಲ್ಲಿನ ಭೂಮಿಯನ್ನು ಸಹ ಮಾರಿದ್ದಾರೆ. ಇವರಲ್ಲಿ ಅನೇಕರು ಎರಡನೇ ಬಾರಿ ಪ್ರಯತ್ನಿಸಲು ವಯಸ್ಸಿನ ಮಿತಿಯನ್ನು ಮೀರಿದ್ದರು.

ಅರ್ಹ ಅಭ್ಯರ್ಥಿಗಳನ್ನು ಹೊರಗಿಟ್ಟ ನಿರ್ಧಾರದ ವಿರುದ್ಧ ನ್ಯಾಯಾಲಯಗಳಲ್ಲಿ ಹೋರಾಡಲಾಯಿತು, ದರೆ ದೆಹಲಿ ಹೈಕೋರ್ಟ್ ಈ ಯೋಜನೆಯ ಸಿಂಧುತ್ವವನ್ನು ಎತ್ತಿಹಿಡಿಯಿತು. ಮತ್ತು ದೆಹಲಿ ಹೈಕೋರ್ಟ್ ಆದೇಶವನ್ನು ಪ್ರಶ್ನಿಸಿ ಸಲ್ಲಿಸಿದ್ದ ಅರ್ಜಿಗಳನ್ನು ಸ್ವೀಕರಿಸಲು ಸುಪ್ರೀಂ ಕೋರ್ಟ್ ನಿರಾಕರಿಸಿತು

ಒಬಿಸಿ ಸಮುದಾಯಕ್ಕೆ ಸೇರಿದ 23 ವರ್ಷದ ಬಿಟ್ಟು ಯಾದವ್ ಪರೀಕ್ಷೆಯಲ್ಲಿ ಅರ್ಹತೆ ಪಡೆದವರಲ್ಲಿ ಒಬ್ಬರು. "2021ರಲ್ಲಿ, ನಾನು ಓಟ ಮತ್ತು ಇತರ ದೈಹಿಕ ಪರೀಕ್ಷೆಗಳನ್ನು ನಾನು ಯಶಸ್ವಿಯಾಗಿ ಪೂರೈಸಿದ್ದೆ. ಲಿಖಿತ ಪರೀಕ್ಷೆಯಷ್ಟೇ ಬಾಕಿ ಉಳಿದಿತ್ತು - ಆದರೆ ಅಗ್ನಿಪಥ್ ಘೋಷಣೆಯಾದ ಕಾರಣ ನೇಮಕಾತಿಯನ್ನು ರದ್ದುಗೊಳಿಸಲಾಯಿತು" ಎಂದು ಅವರು ಹೇಳುತ್ತಾರೆ. ಅವರು 21 ವರ್ಷಗಳ ಗರಿಷ್ಠ ಮಿತಿಯನ್ನು ದಾಟಿದ್ದರಿಂದ ಅಗ್ನಿವೀರ್ ಯೋಜನೆಯಡಿ ಮತ್ತೆ ಉದ್ಯೋಗಕ್ಕೆ ಪ್ರಯತ್ನಿಸುವುದಕ್ಕೂ ಸಾಧ್ಯವಾಗಲಿಲ್ಲ.

ಇಂದು ಅವರು ಜಾರ್ಖಂಡ್‌ ರಾಜ್ಯದ ಉಕ್ಕು ಉತ್ಪಾದನ ಘಟಕವೊಂದರಲ್ಲಿ ಕೆಲಸ ಮಾಡುತ್ತಾರೆ. “ಸೈನ್ಯಕ್ಕೆ ಸೇರುವುದು ನನ್ನ ಕನಸಾಗಿತ್ತು. ಆದರೆ ಅಗ್ನಿವೀರ್‌ ನನ್ನ ಕನಸಿಗೆ ಮಣ್ಣು ಹಾಕಿತು” ಎಂದು ಅವರು ಹೇಳುತ್ತಾರೆ.

ಕೃಷಿಕರಾಗಿರುವ ಅವರ ತಂದೆಯ ಮೂರು ಗಂಡು ಮಕ್ಕಳಲ್ಲಿ ಬಿಟ್ಟು ಕಿರಿಯವರು. ಅವರ ಇಬ್ಬರು ಅಣ್ಣಂದಿರು ಖಾಸಗಿ ವಲಯದಲ್ಲಿ ಕೆಲಸ ಮಾಡುತ್ತಾರೆ. ಅವರ ತಂದೆ ತನ್ನ ಕಿರಿಯ ಮಗನಾದರೂ ಸರ್ಕಾರಿ ಕೆಲಸಕ್ಕೆ ಸೇರಬೇಕು ಎನ್ನುವ ಆಸೆಯನ್ನು ಹೊಂದಿದ್ದರು. ಸೈನ್ಯ ಸೇರಿ ಜವಾನನಾಗುವ ಕನಸನ್ನು ಹೊಂದಿದ್ದ ಬಿಟ್ಟು ಅಪ್ಪನ ಕನಸನ್ನೂ ನೆರವೇರಿಸಿದಂತಾಗುತ್ತದೆ ಎನ್ನುವ ಅನಿಸಿಕೆಯೊಂದಿಗೆ ಸೈನಿಕ ನೇಮಾಕಾತಿಗೆ ಸಂಬಂಧಿಸಿದ ತರಬೇತಿಗಳನ್ನು ಪಡೆಯುತ್ತಿದ್ದರು.

“ಈಗ ಸರ್ಕಾರಿ ಉದ್ಯೋಗಕ್ಕೆ ಪ್ರಯತ್ನಿಸುವಂತೆ ಮನೆಯಲ್ಲಿ ಸಾಕಷ್ಟು ಒತ್ತಡವಿದೆ. ನಾನು ಮನೆಯವರಿಂದ ದೂರವಿರುವ ಸಲುವಾಗಿಯೇ ಜಾರ್ಖಂಡ್‌ನ ಈ ಉಕ್ಕಿನ ಕಾರ್ಖಾನೆಗೆ ಸೇರಿಕೊಂಡೆ” ಎನ್ನುತ್ತಾರೆ ಬಿಟ್ಟು.

“ಒಂದು ವೇಳೆ ಜಾರ್ಖಂಡ್‌ಗೆ ಹೋಗದೆ ಇದ್ದಿದ್ದರೆ ಒತ್ತಡಕ್ಕೆ ಒಳಗಾಗಿ ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದೆ.”

ಅನುವಾದ: ಶಂಕರ. ಎನ್. ಕೆಂಚನೂರು