قدرتی آفات کے ماروں کا سہارا بنی ہیلپ لائن

جیسے ہی ان کے سیل فون کی گھنٹی بجنی شروع ہوتی ہے، ۲۰ سالہ کریٹ تیزی سے ڈیسک ٹاپ کے سامنے بیٹھ جاتے ہیں، اپنا ہیڈ فون درست کر کے قلم اٹھاتے ہیں، اور اپنی ڈائری کھولتے ہیں۔

’’نمسکار، شیوار ہیلپ لائن،‘‘ وہ پرسکون لیکن مستحکم آواز میں کہتے ہیں۔

دوسری جانب سے مہاراشٹر کے ناندیڑ ضلع کے ایک گاؤں سے تعلق رکھنے والی ادھیڑ عمر کی خاتون کسان، پاروتی بول رہی ہیں۔

’’میں آپ کی کیسے مدد کر سکتا ہوں؟‘‘ کریٹ نے مراٹھی میں بات کرتے ہوئے پوچھا۔ وہ پونے کے ایک کالج میں بی اے سائیکولوجی (نفسیات) کے تیسرے سال کے طالب علم ہیں۔ ان کا تعلق اصلاً پربھنی کے ایک گاؤں سے ہے۔

پاروتی ہچکچاتی ہیں۔ ان کی آواز کانپ رہی ہے۔

’’بارش نے ہماری تمام فصلوں کو تباہ کر دیا ہے،‘‘ وہ کہتی ہیں۔ ’’سویا بین، تور ...بکریاں بھی ختم ہو گئیں، اب کوئی کام نہیں ہے۔‘‘ فیملی کی مستقل آمدنی کے ذرائع – یعنی کاشتکاری، مویشی، موسمی مزدوری سب پانی میں ڈوب گئے۔ قرض کی رقم ادا نہیں ہوئی۔ امید بھی ڈوبتی نظر آ رہی ہے۔ وہ دریافت کرتی ہیں کہ کیا وہ آئندہ ربیع کی فصل کے لیے مونگ کے بیج فراہم کر سکتے ہیں۔

’’اگر ہمیں بیج مل جاتے ہیں، تو ہم کم از کم موسم گرما میں اپنی کفالت کر سکیں گے،‘‘ وہ وجہ بتاتی ہیں۔

بطور ہیلپ لائن انٹرن کریٹ پچھلے دو مہینوں سے تقریباً ہر روز ایسی ہی کہانیاں سن رہے ہیں۔ وہ تندہی سے ان کی ضروریات کو نوٹ کرتے ہیں، ان کے کنبے اور گاؤں کی برادری کے بارے میں معلومات حاصل کرتے ہیں، اور انہیں بتاتے ہیں کہ وہ اس ہیلپ لائن کے سربراہ کو ان کے کنبے کی ضروریات سے آگاہ کر دیں گے۔ کریٹ نومبر ۲۰۲۵ میں اس ہیلپ لائن میں بطور انٹرن کام کر رہے تھے۔

’’کاہی تری جرور ہوئیل، کالجی کرو نکا [کچھ نہ کچھ ضرور ہوگا، آپ فکر نہ کریں]،‘‘ وہ انہیں نرمی سے کہتے ہیں۔ کال کرنے والی خاتون اس نوجوان کا بے حد شکریہ ادا کرتی ہیں، لیکن اس سے پہلے کہ وہ فون بند کر یں، وہ التجا کرتی ہیں، ’’یا بہینی کڈے لکش ٹھیوا دادا [بھائی اس بہن کو یاد رکھنا]۔‘‘

وہ جواب میں کہتے ہیں، ’’کالجی گھیا [اپنا خیال رکھیں]۔‘‘

دوپہر میں شروع ہونے والی گفتگو ۱۰منٹ میں ختم ہو جاتی ہے۔ لیکن تکلیف کا منظر دونوں طرف بنا رہتا ہے۔

’’ہم کام کر کے سیکھ رہے ہیں،‘‘ کریٹ کہتے ہیں۔ ان کے اپنے گھر کی صورت حال بھی کچھ مختلف نہیں ہے۔ یہی وجہ ہے کہ وہ کال کرنے والوں کی غیر یقینی صورتحال سے واقف ہیں۔

شیوار ہیلپ لائن کا دو کمروں پر مشتمل خاموش دفتر، جو ایک غیر منافع بخش شیوار فاؤنڈیشن کے زیر انتظام کسانوں کی ہیلپ لائن ہے، پونے کے کوتھروڈ علاقہ کے ایک تنگ تجارتی بلاک کی چوتھی منزل پر واقع ہے۔ باہر شور مچانے والی ٹریفک کی آوازیں ابھر رہی ہیں۔ ایک اور کال ۷۹۵۵۷۷۱۱۱۵ پر آتی ہے۔ اور اس کے بعد ایک اور کال آتی ہے۔ کریٹ اپنے ہیڈ فون کو پیچھے کی طرف سرکاتے ہیں اور اگلی شکایت کا انتظار کرتے ہیں۔

پچھلے دو مہینوں میں غیر معمولی طور پر بھاری مانسونی بارش نے شیوار ہیلپ لائن کو کسانوں کی بکھرتی ہوئی دنیا میں ایک امید کی کرن بنا دیا ہے۔ عام دنوں میں اس ہیلپ لائن پر دو درجن تک کالیں آتی ہیں۔ کچھ کالیں ایک گھنٹہ سے بھی زیادہ لمبی ہوتی ہیں۔

مہاراشٹر کا نقشہ، ہیلپ لائن کے پوسٹر، نوٹس اور دستاویزات دفتر کی دیواروں پر آویزاں ہیں، جو انٹرنوں کو مصیبت زدہ لوگوں کے پس منظر کی یاددہانی کراتے ہیں۔ یہ ہیلپ لائن قلیل وسائل لیکن ہمدردی کے بے پناہ جذبے کے تحت چلائی جاتی ہے۔ اس کی بڑی وجہ زبانی تشہیر اور سوشل میڈیا ہے، جو اس نمبر کو دور دور تک پہنچا چکے ہیں۔

یہ کالیں مہاراشٹر کے بارش سے تباہ ہوئے گاؤوں اور اس سے باہر کے علاقوں سے بھی آتی ہیں۔ ان میں چھوٹے کسان، عورتیں اور بچے، گاؤوں سے شہروں میں تعلیم حاصل کرنے آئے طلباء جو پشتینی زمین کے قرضوں سے بندھے ہیں، اور ایسے مزدور شامل ہیں جن کے پاس آگے دیکھنے کو کچھ نہیں بچا ہے۔ تقریباً ہر کال کرنے والے کی ایک ہی کہانی ہے: نقصان، قرض، ذلت، اضطراب، خوف۔ زیادہ تر کال کرنے والوں نے سرکاری افسران یا سیاسی رہنماؤں تک پہنچنے کی ناکام کوشش کی ہے۔ ٹیم ان لوگوں کو ترجیح دیتی ہے جن کے ذہن میں خودکشی کے خیالات آتے ہیں۔

دوپہر ۲ بجے تک دوسرے انٹرن اور کاؤنسلر دفتر پہنچ جاتے ہیں اور ڈیسک ٹاپ کے سامنے اپنی نشستیں سنبھال لیتے ہیں۔

یہ ٹیم نوجوان انٹرنز پر مشتمل ہے، جن میں سے زیادہ تر کا پس منظر کاشتکاری ہے اور وہ علم نفسیات کا مطالعہ کر رہے ہیں، جیسے کہ کریٹ، یا جالنہ کے ایک گاؤں سے تعلق رکھنے والے ان کے ۲۱ سالہ ساتھی سریش، یا دیہی گڑھ چرولی سے تعلق رکھنے والے گریش۔

’’زیادہ تر کال کرنے والے مدد لینے سے ہچکچاتے ہیں،‘‘ کالز کے درمیان پاری سے بات کرتے ہوئے کریٹ کہتے ہیں۔ ’’وہ سمجھتے ہیں کہ یہ ان کے وقار کے منافی ہے، لیکن جب سارے راستے بند ہو جاتے ہیں تو وہ ہمیں کال کرتے ہیں۔‘‘

اگلی کال ناندیڑ کے گاؤں کی ایک پریشان حال نوعمر خاتون کی ہے، جو پونے میں زیر تعلیم ہیں۔

’’میں پونے میں۱۰-۱۲سہیلیوں کے ساتھ ایک کمرہ شیئر کرتی ہوں… لیکن میرے پاس کرایہ ادا کرنے، ٹفن خریدنے کے لیے پیسے نہیں ہیں؛ ہم میں سے کسی کے پاس پیسے نہیں ہیں؛ میرے والدین کے پاس بھیجنے کے لیے کچھ نہیں بچا، بارش نے سب کچھ تباہ کر دیا ہے۔‘‘

کرایہ ادا کرنے اور کھانے کے لیے وہ ایک ماہ کے لیے مالی مدد مانگتی ہیں۔

ان کا نام جلد ہی ایک الگ فہرست میں شامل کیا جائے گا جس کا انتظام ہیلپ لائن کرتی ہے، جس میں خصوصی طور پر پونے کی یونیورسٹیوں میں زیر تعلیم نوجوان مرد اور خواتین ہیں جن کا تعلق مہاراشٹر کے دیہی علاقوں سے ہے، اور اب انہیں فوری طور پر کرایہ ادا کرنے، خوراک حاصل کرنے اور مالی مدد کی اشد ضرورت ہے۔

ایک اور کال دھاراشیو سے تعلق رکھنے والے ایک چرواہے کی ہے جس کی بکریاں، جو اس کا واحد ذریعہ معاش تھیں، سیلاب میں بہہ گئیں۔ وہ ٹوٹ چکے ہیں، اس کی روزی روٹی ختم ہو گئی ہے۔ وہ اپنے خوف کے نیچے دب گئے ہیں۔

گزشتہ ۲۳ ستمبر سے ۲۳ اکتوبر، ۲۰۲۵کے دواران ہیلپ لائن کا ڈیش بورڈ ڈیٹا ایک سنگین کہانی بیان کرتا ہے۔ اس دوران ہیلپ لائن کے ذریعہ ۱۰ ہزار کے قریب کالیں ریکارڈ اور اٹینڈ کی گئیں۔ شیوار کو اس عرصہ میں کالوں کی بہتات کو سنبھالنے کے لیے مزید رضاکاروں کی خدمات حاصل کرنی پڑیں۔ سب سے خراب دن میں ۸۹۴ کالیں آتی تھیں۔ ان میں سے کم از کم ۱۸۰ لوگ خود کو شدید نقصان پہنچانے پر غور کر رہے تھے۔

ونائک ہیگنّا یاد کرتے ہیں، ’’ہم کالوں کے بوجھ کے نیچے دب گئے تھے۔‘‘ ونائک ہیگنا (۳۱ سالہ) شیوار کے بانی اور سی ای او ہیں۔ ایک تربیت یافتہ ماہر نفسیات اور سماجی کارکن ہونے کے ساتھ ساتھ وہ دیہی بحران پر گہری نظر رکھتے ہیں۔

کالوں کی تعداد نے ہیگنا اور باحوصلہ نوجوانوں کی ان کی ٹیم کی ہمت کو پست نہیں کیا۔ جس چیز نے انہیں ہلا کر رکھ دیا، وہ تھا موسم کی حالیہ خرابیوں کی وجہ سے پیدا ہونے والی مصیبت کی شدت، جو انسانی غلطیوں اور غیر موجود اور مکمل طور پر غیر مستعد سرکاری اداروں کی کوتاہیوں کا نتیجہ تھی۔

’’ان کالوں سے ہمیں پورے مہاراشٹر میں لوگوں کی افسوسناک حالت کا پتہ چلتا ہے،‘‘ سال ۲۰۲۳ کے چیوننگ فیلو رہ چکے ہیگنّا اپنی ہیلپ لائن کے دفتر میں پاری کو بتاتے ہیں۔ اس دوران وہ وقفہ وقفہ سے کالوں کو اٹینڈ کرتے ہیں اور اپنی باحوصلہ ٹیم کو ہدایات دیتے رہتے ہیں۔ ’’بحران بہت گہرا ہے،‘‘ وہ کہتے ہیں۔

تقریباً تین دہائیوں سے، مہاراشٹر، خاص طور پر ودربھ اور مراٹھواڑہ کے علاقے، شدید زرعی بحران کی زد میں ہیں۔ اس کا اظہار کسانوں کی خودکشیوں کی آنے والی مسلسل کہانیوں کی شکل میں ہوتا ہے۔ جب سے نیشنل کرائم ریکارڈ بیورو (این سی آر بی) نے ہندوستان میں سالانہ حادثاتی اموات اور خودکشی (اے ڈی ایس آئی) کی رپورٹوں کا ریکارڈ رکھنا شروع کیا ہے، تب سے خود کشی کے۶۰ ہزار سے زیادہ معاملے سامنے آئے ہیں۔ اس سال شدید بارشں کے بعد آنے والے سیلاب میں ریاست کے بڑے حصوں میں فصلوں کی بڑے پیمانے پر تباہی ہوئی۔ یہ کسانوں کو درپیش چیلنجوں کے سلسلے میں تازہ ترین کڑی ہے۔

’’موسمیاتی تباہی صرف ایک معاشی بحران نہیں ہے،‘‘ ہیگنا کہتے ہیں، ’’یہ ایک ذہنی صحت کی وبا بھی ہے۔‘‘

گزشتہ ۲۴ ستمبر، ۲۰۲۵ کو بھاری بارش کے درمیان، ۴۲ سالہ لکشمن گوسانے نے قریبی قصبہ سے اپنی بیوی شیو کنیا کو آخری کال کی تھی۔ وہاں وہ اشیائے خوردنی خریدنے گئے تھے۔

وہ ایک معمولی کسان تھے اور بطور مزدور جو بھی کام انہیں مل سکتا تھا، کر لیتے تھے۔ ان کا خواب اپنی بیٹی ویشنوی اور بیٹے شیو شنکر کو تعلیم دلانا تھا۔ ویشنوی سولاپور ضلع کے بارشی قصبہ میں فارمیسی میں ڈپلومہ کے آخری سال میں ہیں۔ شیو شنکر دھاراشیو میں تکنیکی تعلیم کے ڈپلومہ کے دوسرے سال میں ہیں۔

کال کے بعد گوسانے واپس نہیں آئے۔ اگلی صبح جب بارش جاری تھی، وہ گاؤں کی سڑک سے ملحق ایک کھیت میں مردہ پائے گئے۔ ان کی لاش بھیگ رہی تھی، ان کا سامان کا تھیلا گنے کی جھاڑیوں میں تیر رہا تھا، ان کے پڑوسی سومناتھ آندلکر نے اس رپورٹر کو بتایا۔ انہوں نے مقامی سیاسی رہنماؤں کے نام ایک اپیل کے ساتھ ایک نوٹ چھوڑا تھا، جس میں اپنے بچوں کی تعلیم مکمل کرنے میں مدد کی درخواست کی تھی۔

نہ تو گوسانے نے اور نہ ہی ان کے کنبے نے شاید کبھی اس ہیلپ لائن کے بارے میں سنا ہو۔ اگر سنا ہوتا تو شاید وہ زندہ ہوتے۔

سولاپور کی بارشی تحصیل میں واقع گاؤں دَہیٹنے مسلسل ہونے والی بارش کے دوران غم میں ڈوب گیا، اور اچھی فصل کی تمام امیدیں خاک میں مل گئیں۔ گوسانے ایک بارانی کسان تھے، جو اپنی ڈیڑھ ایکڑ زمین پر سویابین کی کاشت کرتے تھے۔ اسی سال کے اوائل میں انہوں نے بواسیر کے آپریشن پر تقریباً پچاس ہزار روپے خرچ کیے تھے۔ ان پیسوں کا انتظام انہوں نے دوستوں اور رشتہ داروں سے قرض لے کر کیا تھا۔ دوسری طرف شیو کنیا نے سیلف ہیلپ گروپس سے قرض لیا، جس کی کل رقم ۵۰ ہزار روپے بنتی ہے۔

صدمہ میں ڈوبی ہوئیں شیو کنیا پاری کو بتاتی ہیں کہ کس طرح سے حالات پوری طرح بے قابو ہو چکے تھے۔ وہ مزدوری کر کے اپنا گزارہ چلاتی ہیں۔ بیڈ اور دھاراشیو اضلاع کی سرحد پر واقع گاؤں میں وہ اپنے دو کمروں کے تنگ مکان میں رہتی ہیں۔

گوسانے فیملی کو اپنے بچوں کی تعلیم، بشمول ہاسٹل میں قیام، طعام اور کالج کی فیس کے لیے ماہانہ ۱۳ ہزار روپے درکار تھے۔ اس سال کی مسلسل بارش کے پیش نظر، اس جوڑے کو نہ تو کھیتوں میں کام ملا اور نہ ہی قصبوں میں۔ ان کی اپنی فصل بھی تباہ ہو گئی۔ یہ ایک ایسا ضلع ہے جو گنے اور انگور کی کھیتی کے لیے مشہور ہے، لیکن اس خشک علاقہ میں چھوٹے کسانوں کی ایک بڑی تعداد ایسی ہے جنہیں آبپاشی تک رسائی نہیں ہے۔ یہ کسان سویابین، مکئی، جوار اور دیگر غذائی فصلیں کاشت کرتے ہیں، لیکن یہاں زمین کی پیداواری صلاحیت انتہائی کم ہے۔

’’ہمارے پاس مایوسی کے سوا کچھ نہیں تھا،‘‘ ان کی بیوی، جو اپنی ہی پرچھائیں بن چکی ہیں، آہستہ سے کہتی ہیں۔ اپنے بچوں کی تعلیم کے لیے وہ اپنا غم بھول کر اپنے کام پر واپس آ چکی ہیں۔

جس دن گوسانے کی موت واقع ہوئی تھی، مقامی اخبارات نے قرب و جوار کے علاقوں میں خودکشی کے باعث مزید چار مزید اموات کی اطلاع دی تھی۔ سولاپور ضلع میں اگست ۲۰۲۵ کے آخر تک تیز بارش ہوئی تھی۔ ۲۰ سے ۲۵ ستمبر کے درمیان ضلع میں ۸ء۳۶۵ ملی میٹر بارش درج کی گئی تھی۔ ریاستی اعداد و شمار سے معلوم ہوتا ہے کہ یہ ماہ کی طویل مدتی اوسط ۳۰ ملی میٹر سے ۱۲۵۳ فیصد زیادہ ہے۔ سرکل کے لحاظ سے تبدیلی سخت اور تکلیف دہ تھی۔

شیوار ہیلپ لائن کے دفتر میں ستمبر کے آخر تک فون کالوں کی تعداد میں بے تحاشہ اضافہ ہوا، یہ بات واضح تھی کہ لوگ صرف فصلوں کے نقصان یا مالی تباہی کی اطلاع نہیں دے رہے تھے۔ وہ اس سے کہیں زیادہ سنگین صورتحال کا اظہار کر رہے تھے، جن میں کسی ناگہانی کا صدمہ، موسمیاتی خرابی کے نفسیاتی اثرات، محدود وسائل کے لیے تصادم، امداد اور باز آبادکاری کی فریاد، بچوں کی تعلیم کے لیے مدد، حتٰی کہ کپڑوں اور چادروں کی مانگ بھی شامل تھی۔

پچھلے سال ۲۰ سے ۲۸ ستمبر کے درمیان، آٹھ دنوں تک خلیج بنگال سے آنے والی طاقتور موسمی ہواؤں کی وجہ سے مراٹھواڑہ اور مغربی مہاراشٹر میں ایک کے بعد ایک شدید بارشوں کا سلسلہ شروع ہو گیا تھا، جس کی وجہ سے عام طور پر خشک رہنے والے دریا کے کنارے منہ زور ندی بن کر کھیتوں کو تہ و بالا کر کے بہہ نکلے۔ دراصل، یہ کھیت تاخیر سے آنے والے مانسون کے بعد ابھی سنبھلنا ہی شروع ہوئے تھے۔ اس علاقہ کے لوگوں نے خشک سالی کا مقابلہ کیا تھا، لیکن سیلاب کا کبھی نہیں۔

گاؤں والے بار بار بیان کرتے ہیں کہ کس طرح چھوٹی، مانوس دھارائیں متشدد ندیاں بن گئیں اور ان کے کھیتوں، گھروں اور گاؤں کو مکمل طور پر تباہ کر دیا۔ کیسے کئی دنوں تک بارش نہیں رکی اور چھوٹے تالاب اور جھیلیں امنڈنے لگیں۔

دھاراشیو ضلع میں صرف ایک ہفتہ میں معمول سے ۳۷۶ فیصد زیادہ بارش ہوئی۔ یہ اعداد و شمار تباہی کے پیمانے کو کسی بھی سرکاری بیان سے کہیں بہتر طریقے سے بیان کرتے ہیں۔

سرکاری تخمینہ کے مطابق، ۴۴ لاکھ ہیکٹیئر سے زیادہ کی خریف فصلوں (یا مراٹھواڑہ کے آٹھ اضلاع میں کل بوائی والے رقبہ کے ایک تہائی) کو ناقابل تلافی نقصان پہنچا ہے، جب کہ پوری ریاست میں ۴۲ء۷۵ لاکھ ہیکٹیئر اراضی کو نقصان پہنچنے کا تخمینہ لگایا گیا ہے۔ اس کے علاوہ سیلاب میں تقریباً ۳۶۰۰ مکانات کو نقصان پہنچا، ۲۲۴ انسانی جانوں کا زیاں ہوا اور ۶۰۰ مویشی غائب ہوئے۔

سیلاب کے ماحولیاتی، سماجی اور جذباتی اثرات بھی دور رس ہیں۔ یہ ندی کنارے کے نباتات کو بہا دیتا ہے، ندی کے کناروں کو تباہ کر دیتا ہے، اور پینے کے پانی کے ذرائع کو آلودہ کر دیتا ہے۔ یہ پانی کے چشموں، زیر زمین پانی کے ازسرنو ذخیرہ، اور آبی اخراج کے منطقوں کے درمیان قدرتی رابطہ کو بھی ختم کر دیتا ہے۔ سماجی طور پر، سیلاب دیہی ضرر پذیری کو گہرا کرتے ہیں۔ کنبے فصلوں، مویشیوں، ذخیرہ شدہ اناج، اور ضروری دستاویزات سے محروم ہو جاتے ہیں۔ بہت سے لوگ قرضوں اور ہجرت کے چکروں میں جکڑ جاتے ہیں کیوں کہ بار بار نقصانات سے ان کی مدافعت ختم ہو جاتی ہے۔

’’سماجی، ثقافتی، سیاسی اور معاشی حالات قدرتی آفات کے دوران لوگوں کی ذہنی صحت کا تعین کرتے ہیں،‘‘ ڈاکٹر سُبھاشیش بھدرا کہتے ہیں۔ وہ نیشنل انسٹی ٹیوٹ آف مینٹل ہیلتھ اینڈ نیورو سائنسز (این آئی ایم ایچ اے این ایس)، بنگلورو میں ڈیزاسٹر مینجمنٹ میں نفسیاتی و سماجی امداد کے شعبہ کے پروفیسر اور سربراہ ہیں۔ انہوں نے گزشتہ ۲۵ سالوں سے ملک میں کچھ انتہائی تباہ کن قدرتی آفات میں تحقیق اور دماغی صحت کی نگہداشت کی قیادت کی ہے۔ وہ خبردار کرتے ہیں کہ آپ ذہنی صحت کی نگہداشت کو دوسرے عوامل سے علاحدہ کر کے نہیں دیکھ سکتے۔ اس لیےنگہداشت کو انفرادی، خاندانی اور برادری کی سطح پر، خاص طور پر قدرتی آفات کے دوران، لانے کی ضرورت ہے۔

’’لوگ اچانک صدمہ سے کتنی جلدی باہر نکل پائیں گے، اس کا انحصار اس بات پر ہوتا ہے کہ آفات سے پہلے کی مجموعی تیاریوں کی نوعیت کیا ہے، کس پیمانے پر تیاری کی گئی ہے، اور آفت کے دوران اور اس کے بعد فراہم کیے جانے والے امدادی نظام کس حد تک مؤثر تھے،‘‘ وہ کہتے ہیں۔

انہوں نے مزید کہا کہ برادریوں کے درمیان آپسی میل جول جتنا بہتر ہوگا، مزاحمتی صلاحیت اتنی ہی بہتر ہوگی۔

لاتور میں مقیم صحافی، مصنف، اور موسمیاتی تبدیلی کے معلم اتل دیئول گاؤنکر کہتے ہیں، ’’۱۵ستمبر، ۲۰۲۵ کو بیڈ ضلع کے گاؤں کیج میں صبح ۶ بجے سے شروع ہو کر دو گھنٹوں میں ۱۵۰ ملی میٹر بارش ہوئی تھی؛ گاؤں کے پانی کے رساؤ کے ٹینک میں دباؤ کی وجہ سے شگاف پڑ گیا اور پانی زور کے ساتھ چاروں طرف سے پھیل گیا۔ درخت اکھڑ گئے، پانی کی دھاراؤں نے پورے گاؤں کو غرقاب کر دیا۔‘‘

راکشس واڑی گاؤں میں گنیش سوپان گڈدے کا کنواں گاد کے نیچے دب گیا تھا، اور جب پانی کم ہوا، تو انہوں نے اپنے کھیت کو فٹبال کے برابر کے پتھروں سے ڈھکا پایا۔ ’’ان پتھروں اور چٹانوں کو ہٹانے اور اپنی زمین کو دوبارہ قابل کاشت بنانے میں کئی دن، شاید مہینوں لگیں گے،‘‘ یہ کہتے ہوئے دیئول گاؤنکر مزید کہتے ہیں، ’’میرے خیال میں کسان کو پتھروں سے بھری ۱۵۰-۲۰۰ ٹریکٹر ٹرالیاں ملیں گی، لیکن ان کے پاس آدمی اور مشین کی خدمات حاصل کرنے کے پیسے نہیں ہیں۔‘‘

موسمیاتی سائنس دانوں، زرعی ماہرین اور سول سوسائٹی کے گروپوں کے اکتوبر ۲۰۲۵ کے ایک قرطاس ابیض (وہائٹ پیپر) میں دلیل دی گئی ہے کہ مراٹھواڑہ کا سیلاب – اور اس سے پیدا ہونے والا ذہنی صحت کا بحران – صرف بارش کا نتیجہ نہیں تھا، بلکہ انتظامی ناکامی کی وجہ سے بھی تھا۔ انتہائی موسمیاتی واقعات، ماحولیاتی کمزوری اور انسان ساختہ پانی کی رکاوٹوں سے ٹکرا گئے۔ ستمبر میں خطہ میں ۳۰۵ ملی میٹر بارش ریکارڈ کی گئی، جو کہ معمول سے ۲۰۴ فیصد زیادہ ہے۔ بیڈ، پربھنی، لاتور، ہنگولی اور ناندیڑ جیسے اضلاع نے نئے ریکارڈ بنائے۔

لیکن یہ تباہی پہلے ہی شروع ہو گئی تھی۔ جون-جولائی میں بارش کی کمی کی وجہ سے مٹی پر دباؤ بنا، اس کے بعد اگست میں اچانک بارش میں اضافہ سے آبی ذخائر بھر گئے جب کہ زمین پانی جذب کرنے سے قاصر تھی۔ ستمبر کے اواخر تک، گاد سے بھری ندی، چھوٹے پل، پانی کی نکاسی کی لائنوں کو روکنے والی سڑکیں اور ڈیم (باندھ) کے ناقص اخراج نے شدید بارش کو (جیسا کہ رپورٹ میں کہا گیا ہے) ’’ایک ایسے سیلاب میں بدل دیا جسے روکا جا سکتا تھا۔‘‘

رپورٹ میں کہا گیا ہے کہ مراٹھواڑہ اب ایک ہموار خشک سالی والا خطہ نہیں ہے، بلکہ یہاں موسم کی انتہا رہتی ہے، جہاں لمبے خشک موسم کے دور کے بعد اچانک ہونے والی شدید بارش کے دور أتے ہیں۔

ان نتائج کی تصدیق مہاپور اہوال سیلابی رپورٹ (نومبر ۲۰۲۵) بھی کرتی ہے، جو نیشنل الائنس آف پیپلز موومنٹس (این اے پی ایم) کی زمینی سطح کی تحقیق پر مبنی ہے۔ دیئول گاؤنکر اس تحقیق کے رکن تھے۔ اس میں متوازن مانسون سے مختصر، لیکن شدید بادل توڑ بارش (کلاؤڈ برسٹ) جیسی تبدیلیوں کی دستاویز سازی کی گئی ہے۔

یہ رپورٹ کسانوں (مردوں اور عورتوں) کی شہادتوں سے بھری ہوئی ہے، جو خلا میں گھورتے نظر آتے ہیں، اور اپنی زندگی بھر کی جمع پونجی اور برسوں کی محنت کے نقصان اور اپنے چھوٹے چھوٹے خوابوں کے ٹوٹنے کی حقیقت سے بنرد آزما ہیں۔

’’ہماری چھ ایکڑ زمین پر کاشت کی گئی پیاز کی فصل تباہ ہو گئی،‘‘ سولاپور کے پاتھری گاؤں کی گنگا بائی بنڈگر افسوس ظاہر کرتے ہوئے کہتی ہیں۔ ان کے کھیت اور گھر دونوں پانی سے گھرے ہوئے تھے۔ ’’حکومتی امداد کے دس ہزار روپے اس نقصان کی تلافی کیسے کر سکتے ہیں؟ ہم اس رقم سے کیا خرید سکتے ہیں؟ ہم زندہ کیسے رہیں؟‘‘

گنگا بائی اُن سینکڑوں خاندانوں میں سے ایک ہیں، جو شدید پریشانی کا شکار ہیں۔

مقامی لوگوں کا کہنا ہے کہ کئی بستیوں میں اچانک پانی کے ریلے آئے، جس کی وجہ سے لوگوں کو سنبھلنے کا موقع ملنے سے پہلے ہی ان کے گھر اور کھیت ڈوب گیے۔ یہی وجہ ہے کہ اس رپورٹ میں اسے “مصنوعی سیلاب” کہا گیا ہے، جو محض بارش کا نتیجہ نہیں ہے، بلکہ انسانی سرگرمیوں سے پیدا ہونے والی رکاوٹوں کا حاصل جمع ہے۔ یہ رکاوٹیں ہیں بند نالے، پانی کے بہاؤ کے لیے بہت تنگ پل، بغیر منصوبہ بندی کے بنائی گئی دیہی سڑکیں جو پشتوں کا کام دینے لگیں، اور دلدلی زمینوں کا تقریباً ختم ہو جانا، جو کبھی اسپنج کی طرح پانی جذب کر لیا کرتی تھیں۔ دونوں رپورٹیں اس بات کی نشاندہی کرتی ہیں کہ اگر اصلاحی اقدامات نہ کیے گئے تو مراٹھواڑہ ایک ہی موسم میں دو انتہاؤں، خشک سالی اور سیلاب، کے درمیان معلق رہے گا۔

جب مسلسل بارش اور سیلاب نے مراٹھواڑہ اور مغربی مہاراشٹر کو تہ و بالا کر دیا تو شیوار ہیلپ لائن کے فون صرف گھنٹوں تک نہیں، بلکہ کئی دنوں تک لگاتار بجتے رہے۔

دسہرہ کے آغاز سے لے کر دیوالی کے اختتام تک (اکتوبر کے آخر تک) ہیگنّا گھر نہیں گئے۔

’’مسلسل ۳۳ دن ہم جنگ جیسے حالات میں تھے،‘‘ وہ یاد کرتے ہیں۔

وہ دفتر کے فرش پر سوتے تھے۔ دن میں ایک بار کھاتے تھے یا کئی بار کھاتے ہی نہیں تھے۔ صرف سانس لینے کے لیے ہی کبھی باہر نکلتے تھے۔ اب بھی جب وہ ان دنوں کے بارے میں بات کرتے ہیں، تو ان کی آواز نرم پڑ جاتی ہے۔ ’’زمین سیلاب میں ڈوبی ہوئی تھی، اور لوگ اپنی اپنی فکروں میں۔‘‘ پھر بھی ہیلپ لائن کو فروغ حاصل ہوا، اس لیے نہیں کہ فون یا کمپوٹر کی تعداد بڑھی، بلکہ ہیگنّا کے اس عزم کی وجہ سے کہ وہ ذہنی صحت کی امداد کو کسی لگژری کے طور پر نہیں دیکھتے۔

وہ کہتے ہیں کہ ہر کال کرنے والا انتہائی خطرے میں تھا، اور خود کو نقصان پہنچانے کے بارے میں سوچ رہا تھا۔ ’’ہم کسی بھی فون کال کو مسترد کرنے کے متحمل نہیں تھے؛ کیوں کہ اس کا نتیجہ جانی نقصان کی صورت میں برآمد ہو سکتا تھا،‘‘ وہ یاد کرتے ہیں۔ بعض اوقات وہ دباؤ محسوس کرتے، لیکن کالوں کی اہمیت انہیں اپنا کام جاری رکھنے پر مجبور کرتی تھی۔ ’’میں سوچتا، اگر تھکن کی وجہ سے کال نہ اٹھاؤں تو ممکن ہے کوئی اپنی زندگی ختم کر لے، اور حقیقت میں ایسا ہی ماحول تھا۔ میں نے ہمیشہ اچھا محسوس کیا کہ میں نے کال کا جواب دیا، کیوں کہ ایک جان بچ گئی۔‘‘ صرف وہ ہی نہیں، بلکہ ہیلپ لائن کے تمام دیگر ممبران بھی اسی جذبے کے ساتھ کام کر رہے تھے۔

بہت سے نامعلوم عطیہ دہندگان اور شیوار ہیلپ لائن کے دوست وسائل فراہم کر کے انتہائی محتاج کنبوں کو مدد پہنچاتے رہے۔ آج بھی، وہ فیاض عطیہ دہندگان سے درخواست کرتے ہیں کہ وہ ان محتاج کسانوں کی مدد کے لیے نقد یا اشیاء بھیجیں، جو کسی امداد کے منتظر ہیں۔

ہیگنّا اور ان کی ٹیم خود اپنے ذہنی دباؤ سے نمٹنے کے لیے مشاورت (کاؤنسلنگ) حاصل کرتے ہیں۔ وہ کہتے ہیں، ’’ہمیں اپنے لیے بھی ایک سپورٹ سسٹم کی ضرورت ہے؛ چونکہ اس میں اخراجات شامل ہیں، اس لیے ہم فی الحال یہ نہیں کر سکتے۔‘‘

وہ کہتے ہیں کہ اس سال کی دیوالی مختلف تھی، لیکن ہر سال کسی نہ کسی وجہ سے کچھ کسان شدید پریشانی کا شکار ہوتے ہیں۔ ’’میں نے پچھلے دس برسوں میں ایک بھی دیوالی نہیں منائی،” کاؤنسلر ہیگنّا کہتے ہیں۔ “اکتوبر میں ایک دن ہمیں ۱۰ بجے رات سے صبح ۶ بجے تک ۴۷ کالیں موصول ہوئیں۔ ہر کال کرنے والے کے ذہن میں خودکشی کا خیال تھا۔‘‘

ایک دن، تقریباً آدھی رات کے ۱۲ بجے، جب انٹرن جا چکے تھے، ہیگنّا اپنے کیبن میں بیٹھے دن بھر کے نوٹس ترتیب دے رہے تھے کہ فون بج اٹھا۔ انہوں نے سوچا کہ کال کو نظر انداز کر دیں، لیکن ایسا نہیں کیا۔

فون پر سولاپور کے ماڈھا بلاک کا ایک نوجوان تھا۔ وہ آہستہ آہستہ بول رہا تھا، اس کی سانس اکھڑ رہی تھی۔ وہ رات کے گزرنے اور اپنے کنبے کے افراد کے گہری نیند میں جانے کا انتظار کر رہا تھا۔

اُس نے کہا، ’’سر، میں سوچ رہا ہوں…اگر میں آج رات سو جاؤں تو شاید مجھے دوبارہ جاگنا ہی نہیں چاہیے۔‘‘

ہیگنّا بتاتے ہیں، ’’میری تمام تھکن اور خیالات غائب ہو گئے؛ میں کرسی میں سیدھا بیٹھ گیا اور اسے کہا کہ اپنی کہانی سنائے۔” اس کی کہانی بھی الگ نہیں تھی۔ اچانک آیا سیلاب، برباد ہو چکی سویا بین کی فصل، بیمار ماں، صبح کے وقت آئے قرض وصول کرنے والے ایجنٹ، اور ناکامی کی ناقابل برداشت شرمندگی۔

دونوں ۳۵ منٹ تک باتیں کرتے رہے۔ انہوں نے نہ صرف باتیں کیں، بلکہ بعض اوقات خاموش بھی رہے۔

’’آخر میں اس نے کہا، ‘کم از کم آپ نے مجھے سنا، اور آپ پہلے شخص ہیں جس نے مجھ سے یہ نہیں کہا کہ مضبوط بنو’۔‘‘

ہیگنّا نے اُس رات اپنے دل میں کہا – ایک جان بچ گئی۔

وہ کہتے ہیں، “بس سنو، نصیحت نہ کرو، لیکچر نہ دو، ان کا ہاتھ پکڑو، جب بھی کال آتی ہے تو میں خود سے یہی کہتا ہوں۔”

موسمیاتی تبدیلی کی پیدا کردہ افراتفری میں، ذہنی اور جذباتی صحت کو بحال کرنا شاید سب سے بڑا انقلابی عمل ہے۔

ہیگنّا کولہاپور کے ایک چھوٹے گاؤں میں پلے بڑھے ہیں۔ یہاں کا کیلنڈر بارش کے ادوار، فصلوں، اور ان سے جڑے خاموش المیوں کے گرد گھومتا تھا۔

کالج میں، انہوں نے زراعت کا مطالعہ کیا، اور بعد میں علم نفسیات میں تربیت حاصل کی، لیکن وہ کہتے ہیں کہ ان کی تعلیم کہیں زیادہ پہلے شروع ہوئی تھی – ان کسانوں کی خاموشیوں میں، جو شاذ و نادر ہی اپنے درد کی بات کرتے تھے۔

’’میں بھی یہاں کے عام چلن کی طرح ریاستی یا مرکزی پبلک سروس کمیشن کی نوکریوں کی تیاری کا راستہ اختیار کرتا۔‘‘ ہیگنّا کہتے ہیں، ’’میرے اساتذہ نے مجھے کچھ بڑا کرنے کی ترغیب دی تھی۔‘‘

شاید ان کے اساتذہ نے ان میں ایک پرعزم نوجوان کو دیکھا تھا، جو عوامی خدمت کے جذبے سے سرشار تھا۔

ایک سال تک وہ محدود بجٹ پر پوری ریاست میں سفر کرتے رہے، گاؤں میں رہتے ہوئے اپنے مستقبل کے کام کی رہنمائی حاصل کرتے اور گاؤں کے لوگوں سے سیکھتے رہے۔ انہوں نے دیہی نوجوانوں پر توجہ دی، جو تعلیم یافتہ، بے روزگار اور مواقع سے محروم ہیں۔ ہیگنّا کے بقول، شیوار ہیلپ لائن خود بخود وجود میں آئی، اور وہ دھاراشیو میں بس گئے، جہاں انہوں نے متاثرہ کسانوں کی مدد کے لیے کسی شخص یا ادارہ کو نہیں دیکھا۔

سال ۲۰۱۷ میں شیوار ہیلپ لائن کا پائلٹ پروگرام ۲۵ گاؤوں سے شروع کیا گیا۔

ابتدائی دن سخت تھے۔ پرانی میز اور کرسی، ایک ہی فون، چند مقامی رضاکار، اور ایک نوجوان جو خود سیکھنے کی کوشش کر رہا تھا کہ لوگوں کو اپنی جان لینے سے کیسے روکا جائے۔

آہستہ آہستہ فون کالوں کی تعداد میں اضافہ ہونے لگا۔ یہ کالیں ان مردوں کی ہوتی تھیں جو قرض کی رقم واپس نہیں کر پائے تھے، ان عورتوں کی تھیں جن کے شوہروں نے خودکشی کر لی تھی، اور ان طلباء کی تھی جو مالی سہولت نہ ملنے کی وجہ سے تعلیم کا سلسلہ ترک کر رہے تھے۔

دھاراشیو مہاراشٹر کے سب سے خشک اور بارش کی کمی والے اضلاع میں سے ایک ہے، اور یہ علاقہ نام نہاد ’’سایہ باراں‘‘ ژون میں آتا ہے۔ کووڈ۔۱۹ وبائی مرض کے دوران اور اس کے بعد مشکلیں مزید گہری ہو گئیں۔

انہوں نے ایف ڈی کیو آئی یعنی کسانوں کے بحران کا اشاریہ تیار کیا، تاکہ کال کرنے والوں کو کم، معتدل، اور زیادہ خطرے والے درجوں میں تقسیم کیا جا سکے۔ زیادہ خطرے والے افراد کا خیال وہ خود رکھتے ہیں اور ان کے ساتھ مسلسل رابطہ میں رہتے ہیں۔

ہیگنّا کے مطابق، ہیلپ لائن شروع کرنے کے بعد ان کی ٹیم نے کم از کم ۲۷ مختلف وجوہات کی نشاندہی کی ہے، جن کی وجہ سے مہاراشٹر کے دیہی لوگ ذہنی دباؤ میں مبتلا رہتے ہیں، اور ان وجوہات کو پالیسی ساز حلقوں میں اکثر نظر انداز کر دیا جاتا ہے۔ وہ کہتے ہیں، ’’ان وجوہات میں سے ایک وہ مسلسل جھگڑا ہے جو پڑوسی کسانوں کے ساتھ کھیتوں کی سڑکوں تک رسائی کو لے کر ہے، جسے ضلع کے افسران برائے محصولات آسانی سے حل کر سکتے ہیں۔‘‘

کاؤنسلنگ کا طریقہ تینوں صورتوں میں الگ الگ ہوتا ہے۔ وہ کہتے ہیں، ’’کال کرنے والوں کو تین مختلف زمروں میں تقسیم کرنے کے بعد ہم طریقہ کار کا انتخاب کرتے ہیں۔‘‘ ان کا کہنا ہے کہ کال کرنے والوں کی اتنی بڑی تعداد خود اس خیال کی تصدیق ہے، لیکن چونکہ وہ ابھی سیکھ رہے ہیں، اس لیے وقت کے ساتھ یہ طریقہ کار اور بہتر ہو جائیں گے۔

ہیگنّا دو محاذوں پر کام کرنے پر زور دیتے ہیں۔ ایک، ذہنی صحت کی رہنمائی، اور دوسرا، گاؤں کی سطح پر مداخلت۔ وہ کہتے ہیں، ’’ہمیں اُن محرکات اور عوامل پر توجہ دینی ہوگی جو ذہنی صحت کے بحران کو ہوا دیتے ہیں۔‘‘

دباؤ ہر جگہ موجود ہے اور ماحولیاتی ہنگامی صورتحال کی وجہ سے ان میں مزید اضافہ ہو گیا ہے، جیسا کہ سینکڑوں گاؤوں میں پورے مانسون کے دوران دیکھا گیا، مگر ۱۵ سے ۲۵ ستمبر کے درمیان زیادہ شدت کے ساتھ محسوس کیا گیا۔

ہیلپ لائن اپنے پہلے چیلنج یعنی ذہنی صحت کے وبائی مسئلہ کو حل کرتی ہے۔ لیکن وہ دباؤ جو لوگوں کو ذہنی مسائل کے بھنور میں دھکیلتے ہیں، طویل مدتی حل کے متقاضی ہیں؛ خواہ وہ حقیقی زمینی سطح پر کیے جانے والے اقدامات ہوں یا پالیسی اصلاحات۔ ہیگنّا نے ایک غیر منافع بخش ادارہ، شیوار فاؤنڈیشن قائم کیا۔ ان کا کہنا ہے کہ اس کے ذریعہ کسانوں اور نوجوانوں کو یکجا کر کے تعمیری اقدامات پر کام کیا جائے گا۔

’’مثال کے طور پر،‘‘ وہ کہتے ہیں، ’’ہم نے دھاراشیو میں بیوہ خواتین کو متحرک کیا ہے، جنہیں کام کی ضرورت ہے۔ ہمیں نجی اور عوامی شعبے سے مواقع پیدا کر کے ان کے مالی دباؤ کو کم کرنا ہوگا۔‘‘

ان کا مقصد ایک زرعی-نفسیاتی-سماجی ماڈل تیار کرنا ہے، جسے شیوار ماڈل کہا جائے گا۔ ساتھ ہی، وہ کہتے ہیں کہ فاؤنڈیشن کسانوں کے لیے ایک قابلِ نقل اور آسانی سے دستیاب ذہنی صحت کی مدد کا ماڈل بنانے کی کوشش کرے گا۔ کم از کم اتنا ہونا چاہیے کہ دباؤ میں مبتلا افراد کے لیے کاؤنسلر موجود ہوں جو ان کی بات سن سکیں۔ ’’جب زراعت پر دباؤ بڑھتا ہے تو یہ سماجی دباؤ میں اضافہ کرتا ہے اور ذہنی صحت پر اثر انداز ہوتا ہے۔ اس لیے، چوبیسوں گھنٹے دستیاب فون لائن شدید ردعمل سے بچاؤ میں مددگار ثابت ہوتی ہے،‘‘ وہ کہتے ہیں۔

ہیگنّا جہاں تک ممکن ہوتا ہے، متعلقہ ضلع کلکٹروں اور ریاستی محکمے کے اہلکاروں سے رابطہ قائم کرتے ہیں اور کسانوں کو حکومت سے جوڑتے ہیں تاکہ وہ ریاستی امداد سے فائدہ اٹھا سکیں۔ کئی اہلکار مددگار ثابت ہوتے ہیں۔ پھر بھی، وہ کہتے ہیں کہ ردعمل ناکافی ہے۔ ’’ہمیں اس کام کو توجہ کے ساتھ مزید تیزی سے پھیلانے کی ضرورت ہے۔‘‘

ہیگنّا کہتے ہیں، ’’اس سال کے آغاز میں ناندیڑ میں ایک باپ اور اس کے بیٹے کی خودکشی نے مجھے ہلا کر رکھ دیا۔ میں نے سوچا کہ یہ ہیلپ لائن پوری ریاست کے لیے ہونی چاہیے، اور اسی لیے ہم نے اپنا مرکز پونے منتقل کر دیا۔‘‘

پچھلے سال ایک فراخ دل عطیہ کنندہ نے ان کی مدد کی، تاکہ وہ پونے منتقل ہو جائیں اور ایک مرکزی نظام قائم کریں جس کی توسیع پورے مہاراشٹر میں کی جا سکے۔ سال ۲۰۲۳ سے، جب موسمی تغیرات مزید شدید ہوئے، تو انہوں نے محسوس کیا کہ آئندہ بحران خشک سالی سے کہیں زیادہ پیچیدہ ہوگا۔ اس کے لیے وسیع پیمانے، ٹیکنالوجی اور ایک مرکزی نظام مددگار ثابت ہوں گے۔ ستمبر ۲۰۲۵ میں ان کی پیشن گوئی درست ثابت ہوئی۔

تاہم، موسمیاتی پالیسی کے سلسلہ میں ذہنی صحت کی نگہداشت حکومتی اقدامات کا اب تک حصہ نہیں بنے ہیں۔ ہیلپ لائن کے پاس کام کا اپنا بوجھ ہے، جس میں ہزاروں کالیں، سینکڑوں قریب سے بچنے والے واقعات شامل ہیں۔ یہ واقعات اس بات کا ثبوت ہیں کہ جب تک یہ اقدامات نہیں کیے جاتے ہیں اس وقت تک کیا کچھ ہو سکتا ہے۔ ہیگنّا پرامید ہیں کہ معاشرہ اسے ایک فوری پالیسی اقدام کے طور پر دیکھے گا۔

’’شاید آپ کی مٹی جلد ٹھیک نہ ہو پائے، لیکن آپ زندگیوں کو بچانے اور انہیں دوبارہ آباد کرنے کے قابل بنا سکتے ہیں،‘‘ وہ مزید کہتے ہیں۔

شیوار ہیلپ لائن، ان کے نزدیک، موسم سے مطابقت اور بحرانی صورتحال کا جوابی اقدام ہے۔ جیسا کہ اس مانسون کے دوران اور اس کے بعد آنے والے غیر معمولی سیلاب کے دوران ثابت ہوا۔

’’جب آپ دن کے آخری لمحوں میں فون پر ایک لمبی خاموشی سنتے ہیں،‘‘ ہیگنا کہتے ہیں اور کچھ وقفہ تک خاموش رہنے کے بعد مزید کہتے ہیں، ’’آپ جانتے ہیں کہ وہ شخص مدد کی تلاش میں ہے اور پر امید ہے۔‘‘

(تمام رضاکاروں اور فون کال کرنے والوں کے نام تبدیل کر دیے گئے ہیں۔)

اگر آپ کے دل میں خودکشی کا خیال آتا ہے یا کسی ذہنی تناؤ میں مبتلا ہیں، تو براہ کرم قومی ہیلپ لائن، کِرن پر 18005990019 پر فون کریں۔ یہ چوبیسوں گھنٹے کی مفت سروِس ہے۔ آپ اپنے قریب کی ہیلپ لائنوں پر بھی رابطہ کر سکتے ہیں۔

موسمیاتی تبدیلی اور ذہنی صحت پر پاری کی یہ ملک گیر سیریز ماری والا ہیلتھ انیشیٹو کے تعاون سے تیار کی گئی ہے۔ اس سیریز کے تحت دیہی ہندوستان اور شہروں میں رہنے والے دیہی مہاجرین کی ذہنی اور مجموعی صحت اور معاش پر موسمیاتی تبدیلی کے اثرات کی تحقیقات کی جائے گی۔

ترجمہ نگار: شفیق عالم