'जंगल छिना जाई, त हमनी बिला जाएम'

श्रीनाथ सिंह खरवार अधौरा के बीहड़ जंगल के ऊ खामोशी अजुवो याद करत बाने, जब ऊ आ उनकर साथी तेंदू (डायोस्पायरोस मेलानोक्सिन) के पतई तुड़े जंगल में जा लोग. ऊ सन्नाटा जल्दीए उनकर साथी आदिवासियन के बातचीत अऊर गीतन से गूंज उठे. श्रीनाथ कहेलन, “हमनी के आपन आपन घर से खाना अऊर पानी साथे लेकर जाइंके आ आपस में हंसी-बोली बात करी के, अऊर देखते देखते पूरा जंगल जईसे जी उठे.” ऊ ए उत्सव जइसन माहौल के याद करके ई बात बतवने.

सैंतालीस साल के श्रीनाथ लगभग अढाई दशक पुरान याद के ताजा करत बाने. हमनी दूनू जानी अधौरा के पहाड़ियन के ओर जाए वाला एगो बस में साथे बईठल बानी. ई बस बिहार के दक्षिणी जनपद कैमूर के मुख्यालय भभुआ से सुबेरे-सुबेरे चलल. बस में यात्रा कर रहल ज्यादेतर लोग ऊ आदिवासी हवें जे रोजगार के तलाश में बहरा जाने आ अब आपन गांवे लौट रहल बाने.

श्रीनाथ अपने गांव चनपुरा लौटत बाने. अब ऊ बिहार से कटल पड़ोसी राज्य झारखंड के पतरातू में एगो सीमेंट कारखाना में काम करत हवे. एसे पहिले ऊ दिल्ली आ महाराष्ट्र जईसन लामे के राज्यन के कारखाना में भी काम करी भइल बाने, लेकिन अब नाही. ऊ कहेलन, “दिल्ली आ महाराष्ट्र के तुलना में पतरातू से घरे जल्दी पहुंचल आसान ह."

सूरज निकल गइल बा आ घुमावदार सड़की पर बस धीरे-धीरे अधौरा के पहाड़ियन पर चढ़ रहल बा. रस्ता भर उष्णकटिबंधीय शुष्क आ साल के जंगलन के बड़का पेड़ आपन पियर पतई झार दिहले बा आ उनकर ढांढ़ी कंकाल जईसन लऊक रहल बा. पहाड़ी पर चढ़ला के कुछवे मिनट बाद मोबाइल नेटवर्क गायब हो गइल. इन्हा अब भारत संचार निगम लिमिटेड (बीएसएनएल) के नेटवर्क ही काम करी.

श्रीनाथ हमेशा से परदेसी ना रहने.

ऊ आ उनकर परिवार, इन्हा ले कि अधौरा विकास खंड के सगरो आदिवासी परिवार, तेंदू पतई के साथे दूसर छोट मोट जंगली उत्पाद पर निर्भर रहे. "हमनी के कम से कम दिन के तीन सौ रुपिया कमा ली के. हमार माई-बाऊ जी, हमार भाई आ हम एक साथे महीना भर पतई तुड़ के निम्मन पईसा कमाई के," ऊ कहेलन.

ई सब बदल गईल जब कैमूर वन्य अभ्यारण्य सन् 2000 में अधिसूचित भईल. एगो बनिया, जेके जादेतर तेंदू एहिजा से मिले, पेड़न के नुकसान आ पलायन के बात कहेलन, "अस्सी फीसदी से बेसी पेड़ अभ्यारण्य में चली गईल."

सन् 2000 के बाद, राज्य के वन विभाग जंगली उत्पाद के बेचा-बेची आ भंडारा पर कठोरता लगा दिहलस. "अभ्यारण्य बनले से तेंदू के पतई के तुरला पर रोक लाग गइल," श्रीनाथ कहेलन. अधौरा के आदिवासी जेके ठेकेदार जून के महीना में पतई तुड़ाई करे खाती सेटियवले रहे, उनकर लगे एकबएक काम ना रहल. एक रुपिया पर पचासगो तेंदू के पतई तुड़ी के बंडल बनवला के काम बंद हो गईल. तेंदू के पतई से जादेतर बीड़ी बनेला.

वन अधिकार अधिनियम, 2006 (एफआरए) (धारा 3(1)(c)) अनुसूचित जनजातियन के मालिकाना हक के साथ-साथ गौण वन उपज (छोट मोट जंगली उत्पाद) ले पहुंचला, ओके जुटवला, इस्तेमाल आ ओकर निपटान कईला के हक देला, जेके पारंपरिक रूप से गांव के सीवान के भीत्तर-बाहर जुटावल जाए. एफआरए ग्राम सभा के जंगल में रहे वाला अनुसूचित जनजातियन के अधिकार तय करे के हक देला.

अधौरा में अईसन लागत बा कि एफआरए बेअसर हो गइल बा, जेसे जंगल पर पोसुवा हज़ारन लोगन के रोजी रोटी बर्बाद हो गईल.

"साल के छह से सात महीना हमनी रोजी रोटी खातिर जंगली उत्पाद पर निर्भर रहत रहीं. हमनी के महुआ, पियार, हर्रे इत्यादि जुटा के बेचत रहीं. ए आमदनी से हमहन के दवाई-दारू, तेल मर्चा मसाला आ कपड़ा कीनात रहे," बहेरा गांव के सुकाऊ सिंह खरवार कहेलन.

ई पचास साल के आदिवासी आगे बतावेलन: "का करीं के, एहिजा एक्को कारखाना नईखे जहां हमनी के काम मिली सके."

बिहार जाति सर्वेक्षण 2022–2023 के अनुसार, बिहार में 33 समुदायन के कुल आदिवासी आबादी 21 लाख ह. अविभाजित बिहार में आदिवासियन की आबादी बड़ी ढेर रहे, जेसे उनकर कहल बात सुनल जात रहे. बाकिर, फेर साल 2000 में बिहार से झारखंड के अलगा होखले के बाद, राज्य में ए सबके गिनती जादे कम भईल बा.

राज्य में कबीला कम बाने ऐसे सरकार बड़ा मुश्किल से ए सबपर ध्यान देले.

एकरा बनिस्पत झारखंड में, आदिवासियन के आबादी जादे बा, राज्य सरकार 'झारखंड स्टेट फ़ॉरेस्ट डेवलपमेंट कॉर्पोरेशन लिमिटेड' (एगो सरकारी कंपनी) के बिचौलवी से ओ सबसे छोट मोट जंगली उत्पाद कीनेले.

साथे साथ झारखंड सरकार 2023 में 'सिदो-कान्हू कृषि एवं वन उत्पाद संघ यूनियन' बनवलस काहे से कि ओसे छोट जंगली उत्पादन के ब्रांडिंग कइल जा सके अऊर ओके बेचे के लिए बजार भी दिहल जा सके. झारखंड सरकार ईहो बाती पर ध्यान देहले बा कि आदिवासियन के न्यूनतम समर्थन मूल्य (MSP) भी मिले, बाकिर बिहार में अईसन व्यवस्था नईखे.

राज्य में आदिवासी समाज के विधायकी लड़े खातिर खाली दूगो सीट बा, जबकि लोकसभा (सांसदी लड़े खातिर) के एक्को सीट के कोटा नईखे.

सुकाऊ सिंह कहेलन, "जब चुनाव आवेला, जंगली उत्पाद के बेचे खातिर सरकारी केंद्र खोले के वादा कईल जाला; फेर चुनाव के बीतते सब बात भुला दिहल जाला. पहाड़ी के लोगन पर केहू ध्यान नाही देला."

कैमूर वन्यजीव अभयारण्य (डब्ल्यूएलएस) विंध्य पर्वतमाला के हिस्सा ह, जेके कैमूर रेंज के नाम से भी जानल जाला. विंध्य रेंज मध्य प्रदेश के कटंगी से शुरू होला अऊर कैमूर से होके रोहतास जिला के सासाराम में खतम हो जाला.

1500 वर्ग किलोमीटर में फईलल कैमूर वन्यजीव अभयारण्य, अधौरा ब्लॉक के 100 से ऊपर आदिवासियन के गांव के पोसले रहे. एहिजा के लोग कहेला सन् 2000 के पहिले जब अभयारण्य बने के घोषणा भइल रहे तब 90 फीसदी से ऊपर तेंदू एहिजा से आवे. पहिले तेंदू के तुड़ाई बंद भईल. फेर जंगली उत्पाद आ जरौनी के लकड़ी पर रोक लागल.

आदिवासियन के रोजी रोटी अब्बो जंगले पर पोसाए के बा, बाकिर रोक टोक होखला से ई लोग खुलेआम सामान बेचले से डेराने आ लाचारी में कम दाम पर आपन सामान बेच देले. जादेतर लोग कैमूर जनपद के प्रशासनिक मुख्यालय भभुआ से लमसम 70 किलोमीटर दूर बरकठा में हर हफ्ता लागे वाला हाट (बजार) के दिन अगोरेने. ई हाट हर अतवार के सड़की के दुनू किनारे लागेला एइजा खईला पियला के समान से लेके रसोई लेके जरूरी सामान भी मिलेला. इन्हा चिरौंजी, महुआ आ दूसर जंगली उत्पाद कीने 6-7 बनिया (सगरो गैर-आदिवासी) आवेने.

28 साल के शाहिद अफरीदी भी अईसने एगो बनिया हवें, जे जंगली उत्पाद कीने खातिर हर हफ्ता हाट में आवेने. एकरा पहिले उनकर अब्बा ई उत्पाद कीने. ऊ कहेलन, "आदिवासी आपन उत्पाद शहर के बजार में नाही ले जा सकेलें काहे से कि वन विभाग ओ सबपर कार्यवाही करी दी. ओ सबके देहात के बजार में निम्मन दाम ना मिलेला."

अफरीदी समझावेने कि पहिले से जंगली उत्पाद कीनल बेचल मुश्किल हो गईल बा काहे से कि ई उत्पाद पर कड़ा कानून लागी गइल बा. "पहिले हम हम एही बजार से दू बैलगाड़ी उत्पाद लेके जाई. अबकी त बस एक्के गाड़ी भर पाएल ह."

2022 में अफरीदी के दोकान पर छापा पड़ल आ कुंटल के कुंटल महुआ आ दूसर जंगली उत्पाद जब्त क लीहल गइल. एसे बनियन में डर समाइल बा, आ दाम अऊरु नीचे गिर गईल बा.

"ई लोग (वन्य अधिकारी) हमनी के महुआ के पेड़ छुए नाही देला लोग. अऊरी अब ऊ लोग हमहन के जरौनी भी नाही छुए देला लोग. अगर हमनी के जंगल चली जानी के त ऊ हमहन के धमकावेला लोग," लाल बिहारी उरांव कहेलन. ऊ दिहाड़ी मजदूर हवें जे, बरकठा हाट में जंगली उत्पाद पैक करेने. "आदिवासियन के जंगल पर अधिकार ह. अगर ई लोग हमहन के जाए ना दी लोग त बेचारा आदिवासी त मरी जईहैं. जंगलन के वजह से आदिवासी खुश बाने."

श्रीनाथ कहेलन कि पहिले समान बेचे खातिर कहीं ले चली जाइं के अऊर निम्मन दाम मिली जा. "अब हलात वईसन नाही रही गईल बा. हम महुआ, पियार (पायरस पशिया), हर्रे (टर्मिनलिया चेबुला) आ दूसर उत्पाद के ट्रकन में लादी के गया के शेरघाटी ले जाइंके काहे से कि ओहिजा निम्मन दाम मिले.

लेकिन ई काम अब बंद हो गईल बा. अब त ट्रक वाला भी रस्ता में छापा पड़ला के डर से जंगली उत्पाद नाही ढोवेने.

हमनी के आपन उत्पाद चोरी छुपे बेचे पर मजबूर बानी. जबकि महुआ बजारी में 80 रुपिया प्रतिकिलो बिकाला, हमहन के एके आस पास के बनियन के 50 रुपिया किलो से कम पर बेचे के पड़ेला. अब त हमहन के बस में पांच किलो से बेसी महुआ ले जाए के अनुमति नाही मिलेला," श्रीनाथ आगे कहेलन.

दिसंबर 2025 में, अधौरा ब्लॉक के बहेरा गांव के नागरिक 12 साल के कैर सिंह खरवार जंगल में आपन बीस गो बकरी चरावे गइल. जंगली जानवर से सुरक्षा खातिर ऊ अपनी साथे एगो टांगी (कुल्हाड़ी) ले गइल रहे.

सांझ के जब ऊ लौटल रहे, अधिकारी लोग ओहिजा पहुंचल, कैर सिंह खरवार के दु झापड़ देके ओकर टांगी छोर (छीन) लीहल गईल.

ओकर चाचा सुकाऊ सिंह खरवार कहेलन, "ओकरी साथे तीन आ चार लोग अऊर रहे जे आपन आपन बकरी चरा के लौटत रहे. सबके टांगी छोर लिहल गईल, कुछ लोगन के दू बेर झपड़ियावल गईल, कई लोग के चार बेर.

उनकर परिवार और गांव के समुदाय बेइज्जती आ लाचारी महसूस कईल लोग. अधौरा के आदिवासी गांवन में डर, रीस (गुस्सा) आ असमंजस महसूस करेला लोग.

सरोदाग गांव के लगे कोरवा आदिवासी बस्ती में, आधा दर्जन से ढेर पुरनियां आ बूढ़ आदिवासी मेहरारू पारी के बतवली कि वन विभाग के रोका टोकी से उनकर जिनगी मुश्किल हो गईल बा. ऊ लोग एक साथ बतावल कि कईसे वन विभाग के साहब लोग कई बेर ओ सबके टांगी छोर लिहले रहने. एगो टांगी 400 रुपिया के मिलेला आ यह जरौनी के लकड़ी आ सुरक्षा खातिर जरूरी बा.

सुकृति कोरवा, 35, के टांगी विभाग छोरले रहे. ऊ कहेली: "हमनी पर जंगल के पेड़ कटला के इल्जाम लगावल गइल. बाकिर, अगर जरौनी लेके नाही जाईल जाई त हमनी के खाना कईसे पाकी?" सुकृति के पैंतालीस बरिस के मरद, सुरेंदर कोरवा परदेसी मजूरा हवें. ए दुनू जानी के एगो लईका आ एक्के लईकी ह; दुनू लग्गे के सरकारी स्कूल में जाने. बिहार में बस 1,37 कोरवा आदिवासी बाने. ई लोग विशेष रूप से कमजोर जनजातीय समूह हवें.

"हमनी के जंगल में गईला आ जंगल में उगे वाली चीज सब जुटवला के आजादी मिले के चाही, हमनी के सरकार से बस एतने बिनती बा," सुकृति पारी से बातचीत में बतवली.

संजीव रंजन, कैमूर के डिविजनल फॉरेस्ट ऑफिसर (डीएफओ), ई सब इलजाम के गलत बतावेने कि वन विभाग सख्ती करेले. "जंगली उत्पाद जुटवला पर कवनो पाबंदी नईखे, ना त आदिवासियन से टांगी छोरल गइल बा. हमनी के त बस ओ सबके पेड़ कटला से मना कईले बानी."

अधौरा जंगल के टाइगर रिज़र्व बनावला के योजना बा. अउर एहिजा बाघ लऊकल भी बाने. नेशनल टाइगर कंजर्वेशन अथॉरिटी (एनटीसीए) ई प्रस्ताव के "सैद्धांतिक" मंजूरी दे देहले बाने, काहे से कि राज्य में बाघन के संख्या बढ़ गईल बा.

वाल्मीकि टाइगर रिज़र्व (VTR) अब्बो बिहार राज्य में बाघन खातिर एक्के पार्क ह. ई हिमालय के शिवालिक पर्वतमाला में बसल बा. वीटीआर 1994 में प्रोजेक्ट टाइगर के हिस्सा बनल आ एहीजा बाघन के संख्या तेजी से बढल बा. 2006 में ई 10 से बढ़ी के 2022 में 54 हो गईल. पढ़ीं: बाघ आईल बाघ आईल

एगो अऊरी रिज़र्व माने ओ जंगलन के बंद कईल जवन आदिवासियन आ जंगल में रहे वाला दूसर लोग के जिनगी खातिर जरूरी बा. परेशान सुकाऊ सिंह पारी के बतावेने, "अगर एहिजा अऊर बाघ लायल जाई, त हमनी के जंगल में कईसे जायल जाय? हमहन के जियले के तरीका त बदली जाई."

डीएफओ संजीव रंजन कहेलन कि विभाग अगोरत बा. "राज्य सरकार से हरा झंडी के इंतजार बा. फेर कैमूर डब्ल्यूएलएस के टाईगर रिजर्व के हिसाब से जानल जाई."

सुकृति कोरवा ए बाती से रिसियाइल बाड़ी कि जानवरन के रहे-सहे के इंतज़ाम त कईल जाता, बाकिर सरकार ओ लोगन के परेशानी के कवनो चिंता नईखे जिनकर जिनगी जंगल पर निर्भर बा. ऊ कहेली, "बाघ आ बानर के रहे के व्यवसथा कईल जाता, बाकिर सरकार हमनी के बारे में तनिको नईखे सोचत."

उनके डर बा कि अगर एहिजा टाइगर रिज़र्व बनी जाई, त एहिजा रहे वाला आदिवासियन के जान हरमेसा खतरा में रही. "हमनी के जंगल में रहे वाला लोग बानी आ अगर एहिजा बाघ रहिहैं, त ऊ हमनी के खा जहीहैं."

आदिवासी समुदाय जंगल में आए-जाए पर वन विभाग के रोका टोकी बढ़ला के आपन अस्तित्व पर बड़ी बड़वन खतरा मानत बाने.

जब सांझ होखे लागल तब हम सुकाऊ सिंह से पावलग्गी कईनी कि हम फेर आपन यात्रा करी सकी. ऊ पारी से कहेलन, "अगर सरकार हमनी के जंगल छीनी ली, हमनी के बिला जाएम, बचम ना."

ई कहानी तक्षशिला पारी सीनियर फेलोशिप 2025 के अंतर्गत छापल गइल रहे