ملک کے نقشہ سے غائب ہوتا ایک گاؤں

لاہول اسپیتی میں ہیرا لال راسپا روز صبح کو اپنے کھیت جاتے ہوئے کافی بے چینی محسوس کرتے ہیں۔ وہ کہتے ہیں، ’’مجھے بڑی گھبراہٹ ہوتی ہے کہ کہیں آج میرا کھیت تھوڑا اور تو نہیں دھنس گیا؟ معلوم نہیں کل کیا ہوگا؟‘‘

لاہول اسپیتی خطہ کے لنڈور گاؤں کے ۵۵ سالہ آدیواسی کسان ہیرا لال راسپا نے اپریل ۲۰۲۵ میں اپنی ڈھائی بیگھہ زمین پر آلو کی فصل لگائی تھی۔ لیکن مئی آتے آتے ان کے کھیت کی تقریباً آدھی زمین لگاتار چوڑی ہوتی دراڑ میں دھنس کر غائب ہو گئی۔

بچی ہوئی زمین پر ان کی فصل اب بھی کھڑی ہے اور فی الحال اس میں کوئی خرابی نہیں آئی ہے۔ لیکن راسپا کو کوئی خاص امید نہیں ہے۔

اپریل کے آخر سے لے کر اکتوبر تک کا وقت لاہول اسپتی کی وادی میں رہنے والوں کے لیے کافی اہم ہوتا ہے، کیوں کہ یہ علاقہ برفباری کی وجہ سے تقریباً چھ مہینے پوری طرح بند ہو جاتا ہے۔ اس لیے جب گرمی کا مہینہ آتا ہے تو یہاں کے لوگ اپنے کھیتوں میں اناج اور نقدی فصلیں لگاتے ہیں۔

عام طور پر جون کو کڑی محنت اور امید کا مہینہ تصور کیا جاتا ہے، لیکن اس سال اس دوران یہاں خوف کا ماحول چھایا رہا۔ لوگ کھیتوں میں پسینہ بہاتے رہے، لیکن ان کا دل بے چین تھا۔

راسپا کہتے ہیں، ’’ہر دن، ہر ہفتے میرا کھیت تھوڑا تھوڑا غائب ہو رہا ہے۔ جب تک آلو تیار ہوں گے، شاید تب تک پورا کھیت غائب ہو چکا ہوگا۔‘‘

وہ گہری لمبی سانس چھوڑتے ہوئے کہتے ہیں، ’’ہمارے گھر، ہمارے کھیت، ہمارے باغ، سب ہمارے ہاتھ سے پھسلتے جا رہے ہیں۔ ہمیں سمجھ نہیں آتا کہ بھگوان ہمیں کیوں سزا دے رہے ہیں؟ ہم لِنڈور کے لوگ ایک طرح سے نرک (جنہم) کی سزا بھگت رہے ہیں۔‘‘

یہ مسئلہ زمین دھنسنے کا ہے۔ لاہول اسپیتی میں زمین ڈھلان کی طرف دھنستی جا رہی ہے، جو زمین کے نیچے موجود مٹی کے ڈھانچوں کی دوبارہ ترتیب یا ان کے ٹوٹنے کی وجہ سے ہوتا ہے۔

لِنڈور، جو بھاگا ندی کے معاون چشمہ جہالما کے کنارے واقع ہے، کبھی ۵۰۰ بیگھے (۱۲۵ ایکڑ) سے زیادہ زرعی زمین والا گاؤں تھا۔ صرف پچھلے دو سالوں میں ہی ۱۰۰ سے زیادہ بیگھے کی زمین پاس بہنے والے چشمہ میں غرقاب ہو چکی ہے۔ گاؤں کے آبائی باغات، کو کبھی سیب، خوبانی اور آلو بخارہ کے گھنے درختوں سے بھرے رہتے تھے، اب غائب ہو رہے ہیں۔ پچھلی نسلوں کے ذریعہ لگائے گئے ہزاروں درخت اب اکھڑے پڑے ہیں یا کھسکتی زمین نے انہیں نگل لیا ہے۔ دور افتادہ علاقہ میں واقع اس گاؤں میں ایک استوپ (بدھ مذہب کا مقدس مقام) ہوا کرتا تھا، جو اس گاؤں کی پہچان تھا، لیکن اب وہ بھی ڈھے چکا ہے۔

تقریباً ۷۴ سال کے دیوی سنگھ اپنے کمرے کے بالکل درمیان میں آئی دراڑ کو دکھاتے ہوئے کہتے ہیں، ’’ذرا دیواروں کو دیکھو، الگ ہوتی جا رہی ہیں۔ چھت تو کسی بھی دن گر سکتی ہے۔ رات کو سوتے ہیں تو اتنا بھی بھروسہ نہیں رہتا کہ صبح آنکھ کھلے گی یا نہیں۔‘‘

لِنڈور میں چاروں طرف آپ کو گھر تھوڑا جھکے ہوئے دکھائی دیں گے۔ انہیں دیکھ کر لگے گا کہ یہ گھر کبھی بھی گر سکتے ہیں۔ گھروں کی دیواروں، چھتوں اور نیچے فرش سے چیرتی ہوئی گہری دراڑیں نکلتی دکھائی دیں گی۔ لوگوں نے اپنے بستر اور دیگر سامانوں کو گھر کے اُن حصوں میں جمع کر کے رکھا ہے جو اب بھی کچھ محفوظ لگتے ہیں۔ باقی حصہ چھوڑ دیا گیا ہے۔ گھروں کے باہر جو پگڈنڈیاں کبھی ایک پڑوسی سے دوسرے پڑوسی کے گھر تک جاتی تھیں، اب اچانک کسی گہری کھائی سے ملتی ہوئی نظر آتی ہیں۔

کھیت بھی تباہ ہو چکے ہیں۔ کہیں زمین میں چوڑی دراڑیں بن گئی ہیں، کہیں وہ نیچے کھسک گئی ہے۔ دیوی سنگھ کہتے ہیں، ’’ایسا لگتا ہے گویا زمین ہماری زندگی کو آہستہ آہستہ نگل رہی ہو۔‘‘ انہیں یاد آتا ہے کہ ان کے گھر کے پیچھے کبھی سیب اور خوبانی کا باغ ہوا کرتا تھا۔ ’’اب نہ پیڑ بچے ہیں، نہ وہ زمین۔ سب کھسک چکا ہے۔ ہم اپنی ہی یادوں کو غائب ہوتے دیکھ رہے ہیں۔‘‘

یہاں کے باشندوں کا ماننا ہے کہ یہ مسئلہ اگست ۲۰۲۳ کی بھاری بارش کے بعد پیدا ہوا ہے۔ دیوی سنگھ یاد کرتے ہیں، ’’بارش تیز تھی، لیکن ایسی بھی نہیں کہ ہم نے پہلے کبھی نہ دیکھی ہو۔ اصل تبدیلی تو نالے میں آئی تھی۔ اس میں پہلے سے ہی تیز بہاؤ تھا اور اُس بارش کے بعد وہ بالکل بے قابو ہو گیا۔ اس کے کچھ ہی دنوں بعد زمین میں دراڑیں دکھائی دینے لگیں، اور پھر وہ لگاتار چوڑی ہوتی چلی گئیں۔‘‘

راسپا کے لیے یہ آفت دو کمروں والے گھر کو درمیان سے چیر چکی ہے۔ وہ کہتے ہیں، ’’ایک پورا کمرہ تو دراڑوں کی وجہ سے اب تقریباً الگ سا ہو گیا ہے۔ ہمیں اس کا سارا سامان باہر نکالنا پڑا۔ معلوم نہیں گھر کا باقی حصہ کب تک صحیح سلامت رہے گا۔‘‘

راسپا کہتے ہیں، ’’ہمارے جذبات اس گاؤں کے ہر کھیت، ہر درخت اور ہر گھر سے جڑے ہوئے ہیں۔‘‘ لنڈور میں رہنے والے سبھی ۱۴ خاندان مسلسل جذباتی تناؤ میں زندگی بسر کر رہے ہیں۔ چاروں طرف ٹوٹتے گھر اور بکھرتی زمینیں ہیں۔ لوگ بتاتے ہیں کہ ۲۰۲۳ سے اب تک کچھ بزرگوں کو دل کا دورہ بھی پڑ چکا ہے۔

دسمبر ۲۰۲۳ میں، منڈی میں واقع انڈین انسٹی ٹیوٹ آف ٹیکنالوجی (آئی آئی ٹی) کی ایک ٹیم نے لنڈور میں زمین دھنسنے کے واقعات کی وجہ جاننے کی کوشش کی۔

لنڈور عظیم ہمالیائی سلسلہ کوہستان کے درمیان آباد ایک گاؤں ہے، جہاں کے علاقے اوبڑ کھابڑ ہیں، ڈھلانیں تیز ہیں، اور اونچائی والے علاقوں میں گلیشیئر پھیلے ہوئے ہیں۔ سال ۲۰۲۵ کی اس تحقیق کے مطابق، ۱۹۵۰ سے ۲۰۲۳ کے درمیان جون، جولائی اور اگست کے مہینوں میں درجہ حرارت میں مسلسل اضافہ درج کیا گیا ہے۔ ریکارڈ یہ بھی بتاتے ہیں کہ اس دوران بارش بھی زیادہ ہوئی ہے۔ مٹی کی حرارت میں بھی اضافہ ہوا ہے، اور جولائی میں برف کے جمنے میں بھی کمی دیکھی گئی ہے، جو درجہ حرارت میں ہوئے اضافہ کا اشاریہ ہے۔

گاؤں والے یہ تبدیلی اپنی آنکھوں سے دیکھ سکتے ہیں۔ ہیرا لال راسپا کہتے ہیں، ’’پہلے گلیشیئر ہمارے پیچھے دیوار کی طرح کھڑے رہتے تھے۔ اب وہ صاف طور پر چھوٹے ہو گئے ہیں، اور برف کی پرت تو تقریباً غائب ہی ہو چکی ہے۔‘‘

کم برف اور زیادہ بارش ہونے سے برف تیزی سے پگھلتی ہے۔ اس کی وجہ سے پانی کا بڑا حصہ تنگ نالے میں بہنے لگتا ہے۔ یہ نالے لِنڈور کے لیے شہ رگ کی طرح بھی ہیں اور قدرتی طور پر پانی کے نکلنے کا ذریعہ بھی۔ راسپا کہتے ہیں، ’’یہ نالے اب ہر وقت پانی سے لبالب بھرے ہوتے ہیں۔ گزشتہ دس سالوں میں ہم نے اسے کبھی اتنی تیزی سے بہتے نہیں دیکھا۔‘‘

سائنس دانوں کا کہنا ہے کہ جہالما میں پانی کے بہاؤ میں یہ تیزی کٹاؤ کو تیز کر دیتی ہے۔ اس سے نازک مٹی ڈھیلی پڑتی ہے اور وہ دراڑیں گہری ہوتی جاتی ہیں جو پورے لنڈور کو چیر رہی ہیں۔

دسمبر ۲۰۲۳ میں جیولوجیکل سروے آف انڈیا (جی ایس آئی) کے ذریعہ کی گئی ایک اور تحقیق میں پایا گیا کہ لنڈور اور اس کے ارد گرد کی ڈھلانیں ڈھیلے ملبے پر ٹکی ہیں، جسے صرف چکنی مٹی نے روک رکھا ہے۔ ایسی نرم مٹی تیز بارش کے دوران آسانی سے کٹنے لگتی ہے۔ گاؤں کے گھر زیادہ تر مقامی پتھر اور مٹی سے بنے ہیں، اور ان کی بنیاد اکثر دو میٹر سے بھی کم گہری ہوتی ہے۔ یہ طرز تعمیر انہیں زمین کے دھنسنے کے تئیں مزید حساس بنا دیتا ہے۔

جی ایس آئی کی رپورٹ کے مطابق، لنڈور میں زمین کے مسلسل دھنسنے کے پیچھے کئی عوامل کارفرما ہیں۔ ان میں مٹی اور ارضیاتی ڈھانچہ کی کمزوری، گھروں کی تعمیر میں اپنائی گئی کمزور تکنیکیں، اور قدرتی چشمے سے متعلق عوامل اہم ہیں۔ سائنس دانوں کے مطابق، لنڈور میں ڈھلانوں کا غیر مستحکم ہونا عام طور پر بھاری بارش کے دور میں دیکھا جاتا ہے۔ جب اس میں گلیشیئر کا پگھلنے والا پانی اور سینچائی کا بہاؤ بھی شامل ہو جائے، تو حالات مزید خراب ہو جاتے ہیں۔ ان تمام ذرائع سے لگاتار ہوتا پانی کا رساؤ مٹی کو پوری طرح بھگو دیتا ہے۔ اس سے مٹی کی پکڑ اور مضبوطی کمزور پڑ جاتی ہے، یعنی وہ اپنی ہی اندرونی ہلچلوں کا سامنا نہیں کر پاتی۔ اسی کمزوری کے سبب زمین میں دراڑیں پیدا ہوتی ہیں اور آہستہ آہستہ پورا علاقہ دھنسنے لگتا ہے۔

ٹھنڈ اور گرمی کے بدلتے دور بھی دراڑوں کو مزید بڑھا دیتے ہیں۔ اکثر کئی دنوں تک سوکھا رہتا ہے اور پھر اچانک تیز بارش ہو جاتی ہے۔ اس اٹھا پٹک سے مٹی پر تناؤ پڑتا ہے اور وہ پھٹنے لگتی ہے۔ ان دراڑوں سے پانی نیچے تک اتر جاتا ہے۔ زمین ضرورت سے زیادہ بھیگ جاتی ہے اور اس کی پکڑ کمزور ہو جاتی ہے۔ لنڈور میں اسی وجہ سے اب گہری دراڑیں نہ صرف ان جگہوں پر دکھائی دے رہی ہیں جہاں پہلے زمین کے کھسکنے کا خدشہ رہتا تھا، بلکہ ان علاقوں میں بھی دکھائی دینے لگی ہیں جنہیں لوگ پہلے محفوظ اور مستحکم مانتے تھے۔

سائنس دانوں نے صلاح دی کہ علاقہ کی لگاتار نگرانی کی جائے، پانی کے نکلنے کے نظام کو بہتر بنایا جائے، ڈھلانوں کو عارضی طور پر مضبوط کیا جائے اور گھروں اور ڈھانچوں میں مزید سہارے جوڑے جائیں۔ انہوں نے یہ بھی کہا کہ کسی بھی انجینئرنگ حل پر آگے بڑھنے سے پہلے زمین کے اندر کی حالت کو اچھی طرح سمجھنے کے لیے ارضی و تکنیکی مطالعہ ضروری ہے۔

ضلع انتظامیہ نے ان میں سے کئی صلاحوں پر کام شروع کر دیا ہے۔ سب سے پہلے روایتی سطحی سینچائی کے نظام کو دھیرے دھیرے بند کیا جا رہا ہے، جس میں کُلہوں یعنی مٹی کی تنگ نہروں سے پانی کھیتوں تک پہنچایا جاتا تھا۔ لنڈور کے اوپر سے ہو کر پڑوسی گاؤوں کی طرف جانے والی ایسی پانچ بڑی کُلہوں کا راستہ اب پائپ لائن کے ذریعہ موڑا جا رہا ہے، تاکہ پہلے سے ٹوٹی پھوٹی زمین میں اور پانی نے رِسے اور حالت مزید نہ بگڑے۔

ان قدموں کے باوجود لنڈور کی صورتحال میں کوئی خاص تبدیلی نہیں آئی ہے۔ زمین اب بھی دھیرے دھیرے کھسک رہی ہے۔

جن گھروں کو نقصان پہنچا ہے، ان میں سے کئی خاندانوں کو حکومت نے ایک لاکھ روپے کا معاوضہ دیا ہے۔ لیکن زیادہ تر لوگوں کے لیے یہ رقم بہت کم ہے۔ راسپا کہتے ہیں، ’’یہ زمین ہی ہماری واحد پونجی ہے، ہمارا واحد سہارا ہے۔ ایک لاکھ روپے سے کیا ہوگا، جب ہماری پوری زندگی ہی ہاتھ سے نکل رہی ہے؟ یہ کچھ بھی نہیں ہے۔ ہم بار بار حکومت سے مدد کی فریاد کر چکے ہیں، لیکن لگتا ہے ہماری یہ کوششیں بھی ان دراڑوں میں کھوتی جا رہی ہیں، جن میں ہمارے گاؤں کھوتے جا رہے ہیں۔‘‘

گاؤں والوں کا کہنا ہے کہ انہوں نے اس مسئلہ کو ہر کسی کے سامنے رکھا۔ مقامی افسروں سے لے کر ضلع انتظامیہ اور ریاست کے وزیروں تک کے دروازے کھٹکھٹائے۔ انہوں نے عرضیاں دیں، میٹنگوں میں حصہ لیا، کئی بار وفد کو روانہ کیا، لیکن حکومت کی طرف سے ابھی تک کوئی ٹھوس قدم نہیں اٹھایا گیا۔

لنڈور کی جغرافیائی حالت پہلے سے ہی کمزور رہی ہے، لیکن حالیہ برسوں میں موسم کے بدلتے پیٹرن نے گاؤں والوں کو زمین کے دھنسنے کے تئیں مزید بے سہارا بنا دیا ہے۔

راسپا، جنہوں نے پوری زندگی لنڈور میں گزاری ہے، کہتے ہیں، ’’پہلے یہاں زیادہ برف پڑتی تھی اور بارش کم ہوتی تھی۔ اب ہر سال برف کم ہوتی جا رہی ہے، اور جب بارش ہوتی ہے تو اچانک، زوردار اور بے قابو ہوتی ہے۔ ایسا موسم ہم نے پہلے کبھی نہیں دیکھا تھا۔‘‘

راسپا کی یہ بات کہ ان کے آباء و اجداد نسلوں تک اس گاؤں میں رہے ہیں، پھر بھی زمین کبھی اس طرح نہیں پھٹی، اسی نتیجہ سے میل کھاتی ہے، جسے سائنس داں لمبے عرصے کے اعداد و شمار سے ثابت کر چکے ہیں۔

سنٹرل یونیورسٹی آف جموں کے شعبہ ماحولیاتی سائنس کے پروفیسر، ڈاکٹر سنیل دھر بتاتے ہیں کہ ماحولیاتی تبدیلیوں نے بارش کے پیٹرن کو بدل دیا ہے، جس سے کہیں کہیں حد سے زیادہ بارش ہو رہی ہے اور زمین دھنسنے کے واقعات میں اضافہ ہو رہا ہے۔ وہ کہتے ہیں، ’’لاہول اسپیتی میں روایتی طور پر بہت کم بارش ہوتی تھی، لیکن اب یہاں بارش میں اضافہ ہو رہا ہے اور اس کے نتائج بیحد خطرناک ہیں۔‘‘

سال ۲۰۲۴ میں جرنل آف انڈین سوسائٹی آف رِموٹ سینسنگ میں شائع ایک مقالہ سے پتہ چلا کہ اس علاقہ کی گلیشیئل جھیلیں ۲۰۱۴ کے بعد سے تیزی سے پھیل رہی ہیں۔ اس کی براہ راست وجہ گلیشیئروں کا تیزی سے پگھلنا ہے۔ اس کی وجہ سے پانی میں تیزی سے ہونے والا اضافہ اب سنگین خطرہ بنتا جا رہا ہے۔ اسی سال کی شروعات میں جہالما نالہ کے پاس ایک گلیشیئل جھیل پھٹنے کے واقعہ سے پانی کے نکلنے والے راستوں کو بھاری نقصان پہنچا۔ اس کے ملبے اور سیلاب کے پانی نے دریائے چناب کے روانی کو بھی متاثر کیا۔

ماحولیات کے ماہرین کا کہنا ہے کہ لنڈور کی حالت ایک وارننگ کی طرح دیکھی جانی چاہیے۔ علاقہ میں ۸۲۸ میگاواٹ صلاحیت والے کم از کم ۲۲ نئے ہائڈرو پاور پروجیکٹس اور دیگر بنیادی ڈھانچہ سے متعلق تعمیراتی منصوبوں پر کام ہو رہا ہے۔ ماہرین کی دلیل ہے کہ ماحولیاتی طور پر حساس اس علاقہ میں اس قسم کے تعمیراتی کاموں سے یہ بحران مزید گہرا ہو سکتا ہے۔

’سیو دی ہمالیاز پالیسی‘ مہم کے بانی گمان سنگھ کہتے ہیں، ’’لاہول بیحد حساس علاقہ ہے اور اس کے کوہستانی سلسلے کافی حساس ہیں۔ لنڈور تو پہلے ہی زمین دھنسنے کے واقعات کی چپیٹ میں ہے۔ اگر یہ بڑے پروجیکٹس بغیر کسی ماحولیاتی حفاظتی اقدام کے یونہی چلتے رہے، تو اور بھی کئی گاؤں اس تباہی کی چپیٹ میں آ جائیں گے۔‘‘

لنڈور میں ابھی جو ہو رہا ہے، وہ تو ابھی ایک شروعات ہے۔

لنڈور میں جو دراڑیں سب سے پہلے نظر آئیں، اب وہ آس پاس کے گاؤوں تک پھیلنے لگی ہیں۔ راپڈنگ، جہالما، پھُڈا، جوبرنگ، جسرتھ اور تاڈنگ جیسے گاؤوں میں بھی اب زمین پھٹنے کے نشان دکھائی دینے لگے ہیں۔ کئی کسانوں نے پاری کو بتایا کہ ۲۰۲۵ کے مانسون کے دوران سیلابی جہالما نالے میں اچانک باڑھ آ گئی، جس سے گاؤں سے باہر آنے جانے کے تمام راستے بند ہو گئے۔ یہ وہی وقت ہوتا ہے، جب کسان اپنی فصلوں کی کٹائی کرتے ہیں۔ اس سے ان کسانوں کو بڑی مار جھیلنی پڑی، جو اسی دوران بازار میں مٹر اور آلو کی اپنی فصل فروخت کر کے سال بھر کی آمدنی جمع کرتے ہیں۔

سڑکوں کا بڑا حصہ فی الحال بہہ چکا ہے۔ تقریباً ایک لاکھ ۳۰ ہزار ہیکٹیئر زرعی زمین پر لگی فصلیں تباہ ہو چکی ہیں۔ گہراتے بادلوں کے ساتھ یہ خوف مزید بڑھتا جا رہا ہے۔

ہماچل پردیش کے سابق وزیر زراعت اور لاہول کے رہنے والے ڈاکٹر رام لال مارکنڈے کہتے ہیں، ’’ہمارا علاقہ قدرتی آفات سے لگاتار متاثر ہو رہا ہے۔ ماحولیاتی تبدیلی کا اثر اب صاف دکھائی دیتا ہے۔ لنڈور اس مسئلہ کی خطرناک مثال ہے، لیکن اب تقریباً ہر گاؤں اس کی چپیٹ میں آنے لگے ہیں۔ یہ واقعات الگ الگ نہیں ہیں۔ یہ ایک ادارہ جاتی مسئلہ ہے۔

جہالما کے رہائشی راہل دوشی بھی اسی فکرمندی کا اظہار کرتے ہیں۔ وہ کہتے ہیں، ’’لنڈور میں زمین دھنسنے کی وجہ سے نکلنے والا ملبہ سیدھے ہمارے گاؤں سے ہو کر بہنے والے چشمے میں مل جاتا ہے۔ اس سے ہمارے یہاں سیلاب آ جاتا ہے۔ ہم سب، جو نیچے کی طرف رہتے ہیں، اس کی چپیٹ میں آ جاتے ہیں۔ اگر اس مسئلہ کا جلد ہی کوئی مستقل حل نہیں تلاش کیا گیا، تو اس خوف کے سایہ میں کئی لوگوں کو زندگی بسر کرنے پر مجبور ہونا پڑے گا۔‘‘

ماہرین کا کہنا ہے کہ عارضی حل کو صرف تھوڑے وقت کے لیے سنبھالا جا سکتا ہے۔ لیکن اس سے مستقل حل حاصل ہونے والا نہیں ہے۔ ڈاکٹر مارکنڈے کہتے ہیں، ’’لنڈور کو بچانے کے لیے حکومت کو کوئی اجتماعی حل تلاش کرنا ہوگا۔ صرف اُن لوگوں کو معاوضہ دینا کافی نہیں ہے، جنہوں نے سب کچھ کھو دیا ہے۔ ضروری یہ ہے کہ لوگوں کو اپنی نسلوں سے ملی زمین اور وراثت چھوڑ کر جانے کی نوبت ہی نہ آئے۔‘‘

ہیرا لال راسپا کے پاس نہ کوئی سہارا ہے، نہ دوسرا کوئی متبادل ہے۔

اپنے کھیت کی بچی ہوئی زمین پر کھڑے ہو کر وہ کہتے ہیں، ’’کھیتی ہی ہمارا کام ہے، ہم نے اسی پر زندگی بسر کی ہے۔ اب وہی زمین ہمارے پیروں کے نیچے سے کھسک رہی ہے۔ جب یہ بھی چلی جائے گی، تو ہم کہاں جائیں گے؟ ہمارے پاس کتنا وقت ہے، ہمیں نہیں معلوم۔ ہمارے پاس ان میں سے کسی سوال کا کوئی جواب نہیں ہے۔‘‘

ترجمہ نگار: قمر صدیقی