سولاپور کے ایک کسان کی تاریک دنیا

ایک ایکڑ کے اپنے انگور کے باغ میں پہنچتے ہی مالوجی چوہان کو کسی سہارے کی ضرورت نہیں پڑتی۔ وہ اپنے دوست سنتوش ہِنگمیرے سے الگ جا کر کھڑے ہو جاتے ہیں اور اپنی آنکھوں کے بجائے اپنے تجربہ اور علم کی بنیاد پر اپنا راستہ طے کرتے ہیں۔ تقریباً ۳۱ سال کے مالوجی بینائی سے معذور ہیں، لیکن اپنی زمین کے سائز اور اس کے ہر حصہ سے بخوبی واقف ہیں۔

وہ انگور کی بیل کو پکڑ کر لوہے کے ایک ستون کی طرف اشارہ کرتے ہوئے پوچھتے ہیں، ’’کیا آپ اس ٹہنی کو دیکھ رہے ہیں؟‘‘

ہم تھوڑی دیر کے لیے پس و پیش میں مبتلا ہو جاتے ہیں، ’’کون سی؟‘‘

اس المیہ پر مسکراتے ہوئے مالوجی آگے کی طرف جھکتے ہیں اور ایک تازہ اُگے ہوئے پودے کی ٹہنی کو آہستہ سے اٹھاتے ہیں، جس کی نوک پر پانچ تازہ پتیاں مُڑی ہوئی ہیں۔ انگلیوں سے اسے سہلاتے ہوئے وہ دھیرے سے کہتے ہیں، ’’یہ ٹھیک سے نہیں بڑھی ہے۔ اس میں پھل نہیں آئیں گے۔ جڑیں سڑ گئی تھیں۔ مہینوں تک انہیں ٹھیک سے دھوپ نہیں ملی ہے۔‘‘

وہ ایک بیل ہی ان کے ایک ایکڑ کے پورے انگور کے باغ کی کہانی بیان کر دیتی ہے، جو ان کے والدین دھنا جی اور پشپا بائی کے پانچ ایکڑ آبپاشی والے کھیت کا حصہ ہے۔ اس سال انگور کی فصل نہیں ہوگی۔ کھیت میں گنّے کی نئی پود اور دیگر پھل دار درخت بھی سڑ رہے ہیں۔ فیملی نے مجموعی طور پر تقریباً ۱۰ لاکھ روپے کے نقصان کا اندازہ لگایا ہے۔ اس سے ان کی مالی حالت کم از کم ایک دہائی پیچھے چلی جائے گی۔

یہ تباہ کن نقصان ۲۰۲۵ کے مانسون کے دوران ہوئی حد سے زیادہ بارش کا نتیجہ ہے، جب بارش رکنے کا نام ہی نہیں لے رہی تھی۔ نہ جام گاؤں میں، نہ پورے سولاپور ضلع میں، اور نہ ہی مراٹھواڑہ کے بیڈ اور دھارا شیو ضلعوں میں۔ نومبر ۲۰۲۵ کی شروعات تک سویابین کے کھیت اور انگور کے باغ پوری طرح تباہ ہو چکے تھے۔ جو نہریں سال کے زیادہ تر وقت سوکھی رہتی تھیں، وہ اس خشکی والے علاقہ میں طغیانی پر تھیں۔

مئی ۲۰۲۵ کے وسط سے لے کر اکتوبر کے آخر تک مغربی مہاراشٹر اور مراٹھواڑہ نے لگاتار اور طویل مدت تک ہونے والی بارش کا سامنا کیا۔ پھر ۱۹ سے ۲۵ ستمبر کے دوران حالات مزید سنگین ہو گئے، جب بادل پھٹنے اور اچانک آئے سیلاب نے کھڑی فصلوں، باغات، مٹی، مویشیوں اور کچھ معاملوں میں انسانی زندگی تک کو تباہ کر دیا۔ پورے سولاپور ضلع میں اہکاروں نے ۴۷ ہزار ہیکٹیئر سے زیادہ میں لگی فصلوں کو ناقابل تلافی نقصان کے طور پر درج کیا۔

یہ اعداد و شمار گنّے کے کھیتوں اور انگور کے باغوں میں دھیرے دھیرے پھیل رہی سڑن کی پوری تصویر نہیں دکھاتے، جہاں صرف کچھ دنوں کی اضافی نمی پورے سال کی محنت کو ختم کر سکتی ہے۔ انگور اور گنّا اس ضلع کی زرعی اقتصادیات کی ریڑھ ہے۔

ہِنگمیرے کہتے ہیں، ’’اس پورے خطہ میں انگور کے باغوں کو زبردست نقصان ہوا ہے۔‘‘ ہِنگمیرے، مالوجی کو راہ دکھانے سے زیادہ ان کا ساتھ دینے کے لیے ساتھ رہتے ہیں۔

ستمبر ۲۰۲۵ کے وسط تک خشک سالی سے بدحال سولاپور کی زرعی زمین پوری طرح پانی میں ڈوب چکی تھی۔ عام طور پر زیادہ بارش والے اس مانسون میں جون سے ستمبر کے درمیان ضلع میں ۶۰۰ ملی میٹر سے زیادہ بارش درج ہوئی، جو اس کی طویل مدتی اوسط بارش کا تقریباً ۱۲۵ فیصد تھی۔ جس علاقہ میں کسان بارش کو ملی میٹر میں شمار کرتے ہیں، وہاں اتنی زیادہ بارش غیر معمولی تھی۔

جب ۱۹ ستمبر کو آسمان کھل کر برسا، تو بیحد تیز بارش کے دور شروع ہوئے، جن کی اس علاقہ کی تاریخ میں کوئی مثال نہیں ملتی۔ تین دنوں تک بادل پھٹنے کے واقعات نے کسانوں کو کٹائی کے درمیان ہی گھیر لیا، جب وہ اس کے لے بالکل بھی تیار نہیں تھے۔

اس کے بعد، ۲۴ ستمبر کو جام گاؤں کے پاس ماڈھا تحصیل کے مہِس گاؤں میں بارش کے پیمائشی مرکز میں ۲۴ گھنٹوں کے اندر چونکا دینے والی ۱۷۴ ملی میٹر بارش درج کی گئی، جو اس علاقہ میں سب سے زیادہ تھی۔ پاس کے روپلے خورد (۱۴۲ ملی میٹر) اور کُرڈو واڑی (۱۳۱ ملی میٹر) مراکز پر بھی اسی طرح حد سے زیادہ بارش درج ہوئی، جس نے جڑوں کو ڈبو دیا، بند کو توڑ دیا اور مالوجی جیسے کسانوں کے انگور کے باغوں کو پانی سے بھری خندقوں میں تبدیل کر دیا۔

مالوجی یاد کرتے ہوئے کہتے ہیں، ’’سگلی زمین کھرَوڈون گیلی پاوسامُلے [بارش کی وجہ سے پوری زمین بہہ گئی]۔‘‘ بقول ان کے، کئی دنوں تک کوئی بھی گھر سے باہر نہیں نکل سکا۔

نیشنل ریسرچ سنٹر فار گریپس (این آر سی سی) کے سائنس دانوں نے اکتوبر میں مہاراشٹر کے انگور کے مختلف باغوں کا جائزہ لیا اور آگاہ کیا کہ لمبے عرصہ تک ہوئی بارش اور ناکافی دھوپ کی وجہ سے اس سال ریاست میں کسانوں کی پیداوار ۵۰ فیصد تک کم ہو سکتی ہے۔ معائنہ کے دوران سولاپور، دھارا شیو اور پونے کی جونّر تحصیل کے انگور کے تمام باغ اب بھی پانی سے بھرے ہوئے تھے۔

مہاراشٹر ملک کی تقریباً ۸۰ فیصد انگور کی پیداوار کے لیے ذمہ دار ہے، جس کا رقبہ تقریباً ڈیڑھ لاکھ ہیکٹیئر میں پھیلا ہوا ہے۔ عام حالات میں ان باغوں سے فی ایکڑ ۱۲ سے ۱۶ ٹن انگور کی پیداوار ہوتی ہے۔ لیکن سائنس داں ۲۰۲۵-۲۶ سیزن میں اوسطاً اس کی نصف پیداوار ہونے کا اندازہ لگا رہے ہیں۔ بہت زیادہ نمی، پھپھوندی کا حملہ اور دھوپ کی کمی نے کلیوں کے بڑھنے کو بری طرح متاثر کیا ہے، جس سے کسانوں کی آمدنی آدھا سے بھی کم رہ گئی ہے۔ مالوجی جیسے کسانوں کے مطابق، انگور کے لیے دھوپ، پانی جتنا ہی ضروری ہے۔

ناسک کے بڑے کسان اور ایکسپورٹر توشار دَوَنگے کہتے ہیں، ’’انگور کی ایک ایکڑ کھیتی کی کل لاگت، جس میں بیلوں کا ڈھانچہ بنانا بھی شامل ہے، ایک سیزن میں تقریباً ساڑھے تین سے چار لاکھ روپے تک پہنچتی ہے۔ قسم کے مطابق فی ایکڑ ۸ سے ۱۵ ٹن پیداوار حاصل ہوتی ہے، لیکن اس سال پیداوار آدھی رہ گئی ہے۔‘‘

مالوجی کہتے ہیں، ’’ہماری فکر صرف اس سال کی فصل کے برباد ہونے کی نہیں ہے، بلکہ اگلے سال تک گزارہ کیسے ہوگا، یہی سب سے بڑا سوال ہے۔‘‘

مالوجی پیدائشی نابینا نہیں تھے، بلکہ ۱۶ سال کی عمر میں گلوکوما نامی بیماری کے سبب آہستہ آہستہ ان کی بینائی کم ہونی شروع ہونے لگی، جو چشمی عصب (آپٹک نرو) کو نقصان پہنچاتی ہے اور علاج نہ ہونے پر آنکھوں کی روشنی چلی جاتی ہے۔ پہلے ان کی محیطی بینائی کمزور ہوئی، پھر بائیں آنکھ کی روشنی چلی گئی۔ گاؤں میں نہ ان کے والدین اور نہ ہی وہ خود اس بیماری کی سنگینی کو سمجھ پائے۔ طبی سہولیات دور اور ان کی رسائی سے تقریباً باہر تھی، کیوں کہ آنکھوں کا سب سے قریبی اسپتال سولاپور میں، تقریباً ۵۰ کلومیٹر دور ہے۔

وہ یاد کرتے ہوئے کہتے ہیں، ’’۲۰۱۸ میں ایک دن میں ماڈھا قصبہ سے گھر لوٹا، جہاں میں ایک دوست سے ملنے گیا تھا۔ تب مجھے بالکل دکھائی نہیں دے رہا تھا۔‘‘ اس واقعہ نے ۲۳ سالہ مالوجی کو اندر تک ہلا کر رکھ دیا۔ اگلے دن وہ کھیت میں اکیلے روتے رہے، یہ سمجھ نہیں پا رہے تھے کہ ان کے ساتھ کیا ہو گیا۔ اپنے سب سے مشکل لمحات میں انہوں نے اپنی جان لینے تک کے بارے میں سوچا۔ پاس کے مندر کے ایک دوست نے بار بار فون کر کے مداخلت کی، جب تک کوئی کھیت تک پہنچ کر انہیں گھر نہیں لے آیا۔

ابتدائی دنوں میں ان کے والدین اور گاؤں کے دوست ان کا سہارا بنے، کیوں کہ وہ خود چل نہیں پاتے تھے۔ انہیں اپنی موٹر سائیکل چلانا بھی چھوڑنا پڑا۔ مالوجی کے والد دھنا جی تسلیم کرتے ہیں کہ وہ اپنے بیٹے کے درد کو پوری طرح سمجھ نہیں پائے۔ دھنا جی نے پاری سے کہا، ’’پن آمہالے کلّیچ ناہی [ہم کبی سمجھ ہی نہیں پائے]۔‘‘

مالوجی کی بینائی ختم ہونے کے ساتھ اسی وقت ان کی زمین پر خشکی نے مشکلوں میں مزید اضافہ کر دیا۔ وہ کہتے ہیں، ’’اُس سال (۲۰۱۸) کھیت میں تربوز کی فصل تھی، کوئی خریدار نہیں تھا اور قرض ادا کرنا تھا۔‘‘ بارش نہ ہونے کے سبب پوری فصل خراب ہو گئی۔

کئی مہینوں کی مایوسی کے بعد مالوجی نے خود انحصاری کا فیصلہ کیا۔ ایک چھڑی اور عزم مصمم کے سہارے انہوں نے آوازوں کی بنیاد پر گاؤں کے راستوں کو پہچاننا سیکھ لیا۔ کچھ دنوں تک وہ سانگلی کے تاسگاؤں کے پاس چرواہوں کے ساتھ رہے، جہاں انہوں نے راستے یاد کیے اور حالات کے مطابق خود کو ڈھالنا سیکھا۔ انہوں نے کی پیڈ فون چلانا سیکھ لیا اور درجنوں ضروری فون نمبر یاد کر لیے۔ اس دوران وہ اکثر گر بھی جاتے تھے۔

گاؤں کے لوگ انہیں ’بابا‘ کہہ کر بلانے لگے، کیوں کہ وہ انہیں ایک مضبوط اور پر اعتماد شخص کے طور پر دیکھنے لگے تھے۔ وہ سماجی طور پر سرگرم رہے اور مراٹھا ریزرویشن کی تحریک کے دوران یکجہتی کا مظاہرہ کرتے ہوئے احتجاجی مظاہروں میں بھی شامل ہوئے۔ وہ یاد کرتے ہیں کہ اپنے گاؤں میں احتجاج کی علامت کے طور پر انہوں نے خود کو گردن تک ریت میں دبا لیا تھا، جس نے گاؤں کے لوگوں کو کافی متاثر کیا۔

سال ۲۰۲۱ میں مالوجی نے پربھنی کی رہنے والی نابینا خاتون مُکتا پوار سے شادی کی، جنہوں نے چار سال کی عمر میں خسرہ کی وجہ سے اپنی بینائی کھو دی تھی۔ مُکتا نے گریجویشن تک کی تعلیم مکمل کی، اسپیشل ٹیچر کے طور پر ٹریننگ حاصل کی اور معذوری کے شکار بچوں کے درمیان کام کیا تھا۔

یہ شادی ان کی زندگی میں استقامت اور امید لے کر آئی۔ مالوجی نے نامیاتی کھیتی اپنائی، خود بائیو کلچر تیار کیے اور یو ٹیوب اور ماہرین سے صلاح لے کر نئی کھیتی کے نئے طریقے سیکھے۔ وہ کہتے ہیں، ’’ہمارے خواب چھوٹے تھے، لیکن ہم بہت خوش تھے۔‘‘

پچھلے سال، ۱۴ ستمبر ۲۰۲۵ کو مُکتا نے اپنے پہلے بچہ کو جنم دیا۔ ان کا بچہ صحت مند ہے، لیکن ابھی انہوں نے اس کا نام نہیں رکھا ہے۔ مالوجی کے لیے یہ گویا زندگی میں پھر سے روشنی لوٹ آنے جیسا تھا۔

کچھ ہی دنوں بعد آسمان کھل کر برس پڑا، اور ۱۹ سے ۲۱ ستمبر کے درمیان پہلے سے ہی پانی سے بھری زمین تیز بہتی ندی میں تبدیل ہو گئی۔ گنّے کے کھیت ڈوب گئے۔ موسمی ندیاں طغیانی پر آ کر اپنا راستہ بدل گئیں اور مینڈوں (بندوں) اور اوپری زرخیز مٹی کو بہا لے گئیں۔

دھنا جی کی یادداشت میں پہلی بار فیملی کا کھلا کنواں پوری طرح بھر کر بہہ نکلا۔ ہوا اور دھوپ کے متوازن دور پر منحصر مالوجی کا انگور کا باغ کافی دنوں تک پانی میں ڈوبا رہا۔

مالوجی کہتے ہیں، ’’میرے پاس کھیت پر لوٹنے کی ہمت ہی نہیں بچی تھی۔‘‘ وہ تقریباً دو مہینے تک کھیت سے دور رہے۔ ان کے والدین نے لوٹ کر جو کچھ بچایا جا سکتا تھا، اسے بچانے کی کوشش کی۔ پورے مہاراشٹر میں کسانوں نے ماحولیاتی عدم استحکام سے ہوئی اسی طرح کی تباہی کی کہانی بیان کی ہے۔ پڑھیں: قدرتی آفات کے ماروں کا سہارا بنی ہیلپ لائن

فصل کے نقصان کے ساتھ مویشیوں کی موت نے حالات کو مزید سنگین بنا دیا۔ اب مالوجی کی فیملی پر تقریباً ۱۵ لاکھ روپے کا قرض ہے، جو بینکوں، پرائیویٹ ساہوکاروں اور دوستوں سے لیا گیا ہے۔

مالوجی اور مُکتا کو ایک اور جھٹکا لگا۔ زچگی کے بعد مُکتا کو صحت سے متعلق پریشانیاں ہوئیں اور وہ بچے کو اپنا دودھ نہیں پلا سکیں۔ اب ان کا بچہ بیبی فوڈ پر منحصر ہے، جو مہنگا بھی ہوتا ہے اور آسانی سے دستیاب بھی نہیں ہوتا۔

مالوجی کہتے ہیں، ’’ہمیں اسے بار بار خریدنا پڑتا ہے، اور یہ کافی مہنگا بھی ہے۔‘‘

مُکتا عارضی طور پر پربھنی میں واقع اپنے میکے لوٹ گئیں، جہاں ان کی فیملی کو بھی ۲۰۲۵ کے مانسون میں فصل کا نقصان اٹھانا پڑا تھا۔ جام گاؤں میں تنہا رہ گئے مالوجی مالی دباؤ اور تنہائی کا سامنا کرتے رہے۔

وہ کہتے ہیں، ’’مجھے فکر تھی کہ اپنے بچے کی دیکھ بھال کیسے کروں گا۔ ان دوستوں سے اور کتنا قرض مانگوں جو خود بھی مشکل میں ہیں؟‘‘

اکتوبر کی ایک دیر شام، جب وہ پوری طرح ٹوٹ چکے تھے، انہوں نے کسانوں کے لیے چلنے والے شیوار ہیلپ لائن پر فون کیا۔ ایک رضاکار نے پورے تحمل کے ساتھ ان کی بات سنی۔ مالوجی کہتے ہیں، ’’اُس وقت کیا گیا وہ فون کال مجھے بچا گیا۔ میں پھر کبھی اُس راستے پر نہیں جاؤں گا۔‘‘

دیہی مہاراشٹر میں مالوجی کی کہانی ہزاروں ایسے خاندانوں کی کہانی سے مطابقت رکھتی ہے، جن کے خواب ٹوٹ گئے ہیں اور جو ذہنی پریشانیوں کا سامنا کر رہے ہیں۔

وہ واضح الفاظ میں کہتے ہیں، ’’مجھے اپنی بینائی کے کھونے کی فکر نہیں ہے۔ میری اصلی چنوتیاں بازار کی غیر یقینی، موسم کی بے ترتیبی، سرکاری اندیکھی اور مثبت مواقع کی کمی ہیں۔‘‘

سرکاری راحت، جو تقریباً ۱۰ ہزار روپے کی ہے، کافی ثابت نہیں ہو رہی ہے۔ مالوجی انگور کے اپنے باغ کے کچھ حصوں کی چھنٹائی اور دوبارہ روپائی کرنے اور بچے ہوئے موسم میں جلدی آمدنی دینے والی سبزیاں اُگانے کا منصوبہ بنا رہے ہیں۔ وہ گھنٹوں تک ماہرین، نرسریوں اور کسانوں سے فون پر بات کر کے آگے کا راستہ طے کرنے کی کوشش کرتے ہیں۔

ادھر مُکتا بینک یا دیگر شعبوں کی نوکریوں کے لیے مقابلہ جاتی امتحانات کی تیاری کر رہی ہیں۔ وہ کہتی ہیں، ’’مجھے نوکری کی ضرورت ہے۔‘‘

کھیتی کی صورتحال اب بھی غیر یقینی کی شکار ہے – تباہ شدہ مٹی، بے ترتیب مانسون اور کمزور مالی حالت کے درمیان مستقبل تاریک دکھائی دے رہا ہے۔

نومبر ۲۰۲۵ کی شروعات ہے، اور دوپہر کے تقریباً ۱۲ بجے ہیں۔ موسم میں ٹھنڈک کا احساس بنا ہوا ہے اور مٹی اب بھی نم ہے۔ مالوجی اپنے انگور کے باغ میں کھڑے ہیں، ایک ہاتھ لوہے کے کھمبے پر ٹکائے ہوئے اور انگلیاں نرم پتیوں کو آہستہ سے چھو رہی ہیں۔

وہ کہتے ہیں، ’’میں اپنے پودوں کو دیکھ نہیں سکتا، میں انہیں محسوس کرتا ہوں۔‘‘

ماحولیاتی آفات، ادارہ جاتی تساہلی اور بازار کی غیر یقینی صورتحال والے سال میں مالوجی چوہان اپنی زندگی اور پودوں میں اُگ آئی سب سے چھوٹی ہری امید کو تھامے ہوئے ہیں۔

ترجمہ نگار: قمر صدیقی