शिवगंगा के गमकत माटी-बयार औरी इलैयाराजा

‘का इंहां सांप बा?’ हम इलैयाराजा से पूछनी

बहुत सांझ हो गईल रहे. हमनी तमिलनाडु के शिवगंगा जिला के मेलकाडू गांव के एगो खेत में खड़ा रहनी. हम उंहा इनार खोदे वाला कामगारन से भेंट करे गईल रहनी. इलाका एकदम सूखल औरी धूरा से पाटल रहे. खेती करे खातिर पानी खोजल मस्किल काम रहे. इलैयाराजा उंहें रहत रहलन. पहिले उ अस्थायी नोकरी करत रहलन. बाद बाकी सारा दिन अपना माई-बाप के साथे खेत प रहत रहलन. मने उ दिन में दू पारी में कार करत हलन. अभी उनके उमिर 23 बरीस बा.

हमरा बोली में डर फिकिर बूझ के इलैयाराजा मुस्कियाये लगलन. उ बतवलन कि कुछे दिन पहिले ‘नागराज’ इ इलाका में आईल रहलन. जैसही हम टहले के बिचार छोड़े के बात कईनी, इलैयाराजा झट से टरच निकाल लहलें.

उ कहलें, “हम रउआ साथे आएम” हमनी फेर चल दहनी. हमनी के गोड़ टरच के अंजोर से बनल गोल घेर में चलत रहे औरी हमनी के मूंह प ठंडा हवा लागत रहे.

हवा में भींजल माटी गमकत रहे. घाम से तवल दिन के बाद इ एगो ठंडा रात रहे. बेंगा (मेंढ़क) के बोली के बाद हमरा खाली इलैयाराजा के सांस सुनात रहे. उ मुस्कियात हमरा से कहलन, “हमरा हमेसा से दमा रहे”. ऐतरे, उ बहरा के हवन. बाकिर उ सिवगंगा के खूब नीमन से जानेलें. जब उ बहुत लईका रहलन त उनकर माई-बाप सेलम से आ के इंहां बस गईल. उ सड़क के हर मोड़, रोड प चलत मोटरसाईकिल, औरी ओकरा के चलावे वाला लोग के खूब नीमन से चीन्हत रहलें. उ कहलन, “23 साल पहिले इंहां जमीन बहुत सस्ता रहे. हमार माई-बाप सलेम में आपन जमीन-जायदाद बेच के इंहां 50,000 में दस एकड़ जमीन कीनल. रउआ मालूम बा कि अब हमनी हर एकड़ प 3 से 4 लाख के आमदनी क लेनी?” इ कहत उ आपन टरच वाला हाथ दहिने-बावें घुमवलन, जेकरा अंजोर में टैपिओका आ ऊंख के खेत लउके लागल.

“पहिले इ झार-झंखाड़ से भरल जंगल रहे. हमार परिवार एकरा के अपना हाथे साफ़ कईल. रउआ हउ ट्यूबलाईट के नीचे के इनार लउकता? उ हमरा चितप्पा (चाचा) के घर ह. औरी ओकरा पीछे हऊ घर लउकता? जौन नारियल के गाछ के पाछे लुकाइल बा? उ हमार घर ह.”

उ बड़ा मन से ‘हमार घर’ कहलन. इ एगो पक्का के मकान रहे, जौना में बिजली रहे, जौन नौ साल पहिले इंहा आई रहे. बहुत तेजी से आगे आ के नयका जमाना इंहां बस गईल. उ अपना मुंह प मुस्की लिहले आपन पाकिट ठोक के कहलन, “रउआ इंहां प कहीं हर बैल ना लउकी! औरी ना कवनो लैंडलाइन टेलीफोन लउकी, खाली मोबाइल फोन लउकी.”

इ सब चीज गांव के जिनगी के सायद बदल देले होई-जेकरा ला सहरी लोग तरसे ला- बाकिर इलैया राजा इ नयका बेरा के साथे बहुत खुस रहलन. एकरा से उनकर जिनगी आसन हो गईल. उ कहेलन, “पहिले हमनी ऊंख के अपना हाथे काटीं. अब इ काम एगो मशीन क देले. एगो मशीन कटेला त दूसर ओकरा के गोट्टा क देला. औरी इ सब में बेसी समय ना लागेला!” इ सब नायका मशीन से समय के जौन बचत होला, इलैयाराजा ओकर बडाई करेलन. इ सब सुबिधा से पहिले, बहुत कम्मे उमिर में उ अपना खेत में पसीना अ समय खूब दहवले बाड़न.

अइसन नईखे कि उनकर भोर अख़बार आ कॉफ़ी के साथे आरामकुर्सी प बइठल होला. उ गाछ, ओधी के लगे जा के निहुर के ओकर तुराई, छंटाई, औरी सफाई करेलन. उ औरी उनकर परिवार धान, तरकारी औरी फूल के खेती करेला. “भिन्डी औरी भंटा रोज तूरे के परेला. भंटा त एक दू दिन छोडीयो द, त भिड़ी त ना.. इ एक दुईये दिन में कड़ा हो जाला.” इतना कह के उ हंसलन. औरी उनकरा साथे हमहूं हंस दहनी. भिंडी चीन्हे के बारे में सोचे लगनी. जौना से दोकानदार के त नफरत बा औरी किननीहार के पसंद बा. (भिंडी के उपर से तूरीन, जे इ ठीक से नईखे टूटत त इ बेकार बा!)

एकरा बाद उपज (हर सब्जी कुछ किलो) के बेच दहल जाला. उ कहेलन, “हमार बाबूजी रोज हमार माई के अपना दुपहिया से बजार ले जालन. उनकरा के उंहा छोड़ के अपने खेत प चल जालन. सब बिकइला के बाद हमार माई सामिलात में चले वाला औटो से घरे लवट आयेली.” औरी जब उनकर माई वापिस आवेली तब ले इलैयाराजा दिन के दुसरका पारी में आधा बेर बिता देले रहेलन. इ बेरा में उ तरे-तरे के दूसर बाहरी कार करेलन. साँझ के 6 बजे जब ले उ घरे आवेलन, तब ले मवेसियन के चारा दे के दूध दूहा गईल रहेला.

इंहां के ढेर लोग गाय, बकरी, औरी मुर्गी पोसेला. इ इलाकन में गाय बेसी कर के जर्सी औरी संकर नसल के होलीं कुल. काहे से कि ऊ बेसी दूध देलीं कुल. बस ओकनी के ताजा घास, तिलहन जइसन नीमन भोजन मिलत रहे. बाकिर इ हमेसा नईखे हो सकत.

इंहां हमेसा बरखा ना होला. इलैयाराजा हमरा के समझा के बतवलन. “इंहां के माटी बहुत नीमन बा. सबकुछ नीमन से उगेला. मस्किल पानी के बा. देखीं ना, हमरा चचा के 60 फीट गहीर इनार में खाली चारे फीट पानी बा. एहीसे, हमनी एकर इस्तेमाल पानी के गोट्टा करे ला कारेनी. बोरवेल से पानी निकालल जाला. इंहां 800 से 1000 फीट ले गहीर बोरवेल के खोदाई होला..” हम इ कुल आंकड़ा के बूझे के चहनी, बाकिर इ मस्किल बुझाईल.

खाली परल खेत देख के नीमन ना लागल. कुछ बरीस पहिले, नीमन बरखा के चलते बहुत बेसी पैमाना में लोग धान बोअल. फसलो बहुत नीमन भईल. लेकिन पछिला दू साल से बरखा बहुत कम भईल बा. औरी पानी के धरती में समाते जयिला से जमीन ओहीतरे परती छोड़ दहल गईल. बाकिर तब्बो लोग ऊंख बोअल सुरू कईले बा. ड्रिप सिंचाई से खेती सुरु भईल बा. इ कवनो भयानक बिडम्बना से कम नईखे. इ बहस के इलैयाराजा मुस्कीयात “हम का कर सकतानी” वाला भाव से छोड़ दहलन.

रात हो गईल रहे. घट्टा में झोनी चमकत रहे. सड़क के नापत मोटरसायकिल कुल अपना-अपना घरे चल गईल रहे. हमनी वापस घुमनी, औरी ऊंख, टैपियोका के खेत आ उनकर चाचा के इनार से होत आवे लगनी. हवा ठंडा रहे औरी ओकरा साथही एगो बड़ा नीमन गमक रहे. हम सांस भीतर खींच के “मम्म” आ खुस हो के उनकरा ओर घूम के कहनी कि इंहां हरदी के खेत बा नू, जहां से हमनी चलतानी? ऊ एकदम से हंस दहलन औरी टरच के अंजोर ऊबड़-खाबड़ रोड प हेन्ने-होन्ने परे लागल. उ बतवलन, “हवा में कवनो गमक नईखे, कीटनासक के गंध बा जौन हम बिहाने डलले रहनी!”

अनुवाद: स्मिता वाजपेयी