چھتیس گڑھ کی ذائقہ دار مُسکینی دال

’’بارش کے بعد مُسکینی کے سبز اور نازک پتوں کا ذائقہ زیادہ میٹھا ہو جاتا ہے۔ دھوپ [گرمیوں] میں یہ پتے جھلس کر سخت ہو جاتے ہیں،‘‘ کوشلیہ کہتی ہیں۔ وہ اپنے باورچی خانہ میں ہیں۔ یہ باورچی خانہ ان کے دو کمروں کے پکے مکان کے برآمدے کا ایک کھلا حصہ ہے۔ بات چیت کے دوران وہ ایک پریشر کوکر میں پانی میں دھلی ارہر کی دال کے ساتھ مُسکینی، ایک دو ہری مرچیں، ہلدی پاؤڈر اور نمک ملاتی ہیں۔

’’ارہر اور چنے کی دال کے ساتھ مسکینی کی بھاجی بہت ذائقہ دار بنتی ہے،‘‘ کوشلیہ مزید کہتی ہیں۔ مُسکینی کے پتوں کے مختلف پکوانوں کی ترکیبیں ہمارے ساتھ شیئر کرنے میں انہیں خوشی محسوس ہوتی ہے۔ یہ چھتیس گڑھ کے جنگلوں میں اگنے والا ایک جنگلی پودا ہے، جسے اکثر دال کے ساتھ پکایا جاتا ہے۔ کوکر کی تین یا چار سیٹیوں کے بجنے کا انتظار کرتے ہوئے کوشلیہ دال میں بگھاڑ لگانے کی غرض سے لہسن کی ایک پوری کلی چھلینے، ٹماٹر، پیاز اور چند سوکھی لال مرچیں کاٹنے کے لیے پانکی کا استعمال کرتی ہیں۔ پانکی روایتی گھروں میں سبزیاں کاٹنے کے لیے لکڑی کے چھوٹے تختہ سے منسلک لوہے کی ایک دھار دار بلیڈ ہوتی ہے، جسے پہنسل بھی کہا جاتا ہے۔

’’میرے گاؤں میں بہت ساری جنگلی بھاجیاں [سبزیاں] پائی جاتی ہیں۔ میری والدہ کو معلوم ہے کہ کس موسم میں کون سی سبزی چننی ہے۔ اگرچہ ان میں سے بہت سی بھاجیاں پورے سال اگتی ہیں، لیکن کچھ خاص موسموں میں ان کا ذائقہ سب سے بہتر ہوتا ہے،‘‘ کوشلیہ بتاتی ہیں۔ وہ اب امانکا میں رہتی ہیں، جہاں جون سے اگست تک تِہری پُھٹو (مشروم کی ایک مقامی قسم) وافر مقدار میں اگتی ہے۔ اس سے ذائقہ دار کھانا بنانے کے لیے محض پیاز، ٹماٹر اور مرچوں کے ساتھ بھوننا ہوتا ہے۔ ’’میں انہیں دونوں ہاتھوں میں بھر کر گھر لے جاتی ہوں۔ اس کا ذائقہ گوشت جیسا ہوتا ہے،‘‘ وہ کہتی ہیں۔

کوشلیہ گِڈلیہری کا تعلق مہاسمند ضلع کے جھلپ گاؤں سے ہے، جو بارنوا پاڑہ کے پہاڑی جنگلاتی سلسلوں کے قریب واقع ہے۔ بچپن میں انہوں نے اپنی ماں کو جنگلی سبزیاں تلاش کرتے اور پکاتے دیکھا تھا۔ شادی کے بعد وہ سال ۲۰۰۸ میں رائے پور منتقل ہو گئی تھیں اور اب امانکا نامی ایک دلت بستی میں رہتی ہیں۔ ’’فیملی کا کوئی دوسرا فرد اب چیزیں اکٹھا نہیں کرتا،‘‘ وہ یہ کہتے ہوئے مزید بتاتی ہیں کہ ان کے شوہر کھانے پینے کی چیزیں نہیں خریدتے ہیں۔ ’’وہ کہتے ہیں کہ ہری سبزیاں اتنی مہنگی ہیں کہ ہمیں سبزی کھانی ہی نہیں چاہیے۔‘‘

چونتیس سالہ کوشلیہ چھتیس گڑھ کے دارالحکومت رائے پور کے ایک نجی رہائشی اسکول میں باغبانی کا کام کرتی ہیں۔ یہاں، اپنی ماں کی طرح وہ بھی جنگلی پتوں والی سبزیاں تلاش کرتی ہیں، جو پوری ریاست کے باورچی خانوں کے اہم جزو ہیں۔ ادھر ادھر چہل قدمی کرتے ہوئے وہ مختلف پودوں، بیلوں اور جھاڑیوں کی طرف اشارہ کرتی جاتی ہیں، اور ہر ایک کے لیے ایک پکوان کی فوری ترکیب بتاتی جاتی ہیں: ’’لہسن اور مرچوں کے ساتھ اُلاہ بھاجی پکتی ہے اور بوہڑ بھاجی املی کے ساتھ بہترین طریقے سے تیار کی جاتی ہے۔ یہ تمام بھاجیاں دھان کے کھیتوں میں یا نہر کے کنارے اگتی ہیں۔ کوئی ان کی کاشت نہیں کرتا۔‘‘

کمرچھٹھ کے تہوار کے لیے ’’میں یہاں [اسکول کیمپس] سے سات سے آٹھ طرح کی پتیاں جمع کرتی ہوں،‘‘ کوشلیہ کہتی ہیں۔ چھتیس گڑھ میں یہ تہوار بھادو (اگست-ستمبر) کے مہینے میں خواتین کی طرف سے منایا جاتا ہے، جس میں بچے کی محفوظ پیدائش، صحت مند بچے اور تولیدی صحت کے لیے دعا کی جاتی ہے اور دن بھر کا اپواس رکھا جاتا ہے۔

وہ مزید کہتی ہیں، ’’میری ماں اپنے کھیت سے جمع کیے ہوئے پسہر چاول (لال جنگلی چاول) بھیجتی ہیں،اسی وجہ سے میں اپواس کے لیے شاید ہی کوئی چیز خریدتی ہوں۔‘‘ جب وہ عورتیں اپواس توڑتی ہیں تو وہ سبزیاں، پھل اور چاول کھاتی ہیں۔ یہ چیزیں ہل سے ان چھوئی اور تجارتی کاشت کے نظام سے باہر کی ہوتی ہیں۔

کوشلیہ کے شوہر جیتو، جن کی عمر چالیس کی دہائی کے اوائل میں ہے، یومیہ اجرت پر کام کرتے ہیں اور ہفتہ میں تقریباً ۲۰۰۰ سے ۲۵۰۰ روپے کما لیتے ہیں۔ جبکہ کوشلیہ کی تنخواہ ۸۰۰۰ روپے ماہانہ ہے۔ ان کے تین بچے ہیں – ایک بیٹا اور دو جڑواں بچے (ایک لڑکا اور ایک لڑکی) – جنہیں بھاجی کھانا پسند ہے۔ کوشلیہ مسکراتے ہوئے کہتی ہیں، ’’بھاجیاں بنانا اس قدر آسان ہے کہ میری گیارہ سالہ بیٹی بھی انہیں بنانا جانتی ہے۔ مرچ، لہسن اور ٹماٹر کا بگھاڑ لگاؤ اور کوئی بھی ذائقہ دار بھاجی تیار ہو جاتی ہے۔‘‘

’’جو لوگ انہیں پہچانتے ہیں لے کر کھالیں گے، لیکن جو نہیں جاتنے وہ کچرا سمجھیں گے،‘‘ وہ مزید کہتی ہیں۔ ’’اگر وہ کھیتوں میں گھاس مار دوا نہ ڈالیں تو یہاں کمر تک جنگلی سبزیاں ہوتیں۔‘‘ اس دوران پریشر کوکر اپنی آخری سیٹی بجاتا ہے۔ کھانا تیار ہے۔

ترجمہ نگار: شفیق عالم