छत्तीसगढ़ मं मुस्केनी भाजी अऊ दार के मीठ साग

कौशल्या कहिथे, “पानी गिरे के बाद मुस्केनी के हरियर कोंवर पाना भारी मिठाथे. घाम मं पाना मन जर जाथें अऊ चेम्हर हो जाथें.” वो अपन दू खोली के पक्का मकान के परछी के खुल्ला जगा मं चूल्हा पारे हवय. गोठियावत वो ह प्रेशर कुकर मं धोवाय राहर के दार, मुस्केनी, हरियर मिर्चा, हरदी गुड़ा अऊ नून डारथे.

कौशल्या बतावत जाथे, “मुस्केनी भाजी राहेर अऊ चना दार के संग भारी मीठ लागथे,” मुस्केनी भाजी ले बने कतको साग ला बतावत वो खुस हवय – मुस्केनी जेन ह जंगली भाजी आय, येला अक्सर दार के संग खाय जाथे. जब वो ह तीन धन चार सिटी बजे ला अगोरत रहिथे, त वो ह दार के फोरन बर लेसुन के कली, पताल, गोंदली अऊ सुक्खा मिर्चा निकार लेथे, येकर बर वो ह पनिकी (पइंसुल) काम मं लाथे – घर मन मं पारंपरिक रूप ले साग-भाजी काटे करे बर पनिकी बउरे जाथे.

कौशल्या बताथे, “मोर गाँव मं कतको जंगली भाजी बनेच होथे. मोर दाई जानथे के कोन सीजन मं कोन भाजी टोरे ला हवय. वइसे कतको भाजी बछर भर जामथे, फेर कुछु खास सीजन मं ये ह सबले जियादा मिठाथे.” आमानाका मं जिहां वो ह ये बखत रहिथे, जेठ ले सावन (जून से अगस्त) के बीच मं तिहरी फुटु अब्बड़ फूटथे, थोकन गोंदली, पताल अऊ मिर्चा मं बघारे ले ये ह गजब मिठाथे. वो ह कहिथे, “मंय मुट्ठा भर येला घर ले जाथों. ये ह मटन कस मिठाथे.”

कौशल्या गिदलेहरी महासमुंद जिला के झलप ले हवय जेन ह बारनवापारा जंगल के डोंगरी मन के लकठा मं हवय. बालपन मं वो ह अपन दाई ला जंगल ले साग-भाजी टोर के लावत अऊ रांधत देखे रहिस. साल 2008 मं बिहाव के बाद वो ह रइपुर (रायपुर) चले आइस अऊ अब वो ह दलित बस्ती आमानाका मं रइथे. वो ह कहिथे, “घर मं कोनो अऊ समान नइ लावय,” वो ह बताथे के ओकर घरवाला किराना सामान घलो नइ बिसोवय.“वो ह कहिथे के हरियर साग-भाजी अतक महंगा हवय के हमन साग खाय के मन नइ करन.”

चौंतीस बछर के कौशल्या छत्तीसगढ़ के रजधानी रायपुर मं हास्टल वाले निजी स्कूल के बगीचा मं काम करथे. इहाँ, अपन दाई जइसने, वो ह घलो जंगली भाजी खोजत रइथे, जेन ला राज भर मं हरेक घर मं खास करके खाय जाथे. खोजत वो ह अलग-अलग झाड़ी, नार अऊ डारा डहर आरो करथे, अऊ हरेक के रांधे के तरीका बताथे: “लेसून अऊ मिर्चा के संग उलाह भाजी. अऊ अमली के संग बोहर भाजी सबले बढ़िया बनथे. ये सब्बो भाजी धान के खेत मन मं धन नहर के तीर मं जामथें. कोनो घलो येकर खेती नइ करय.”

कमरछठ बर कौशल्या कहिथे, “मंय इहाँ [स्कूल के अहाता मं] सात-आठ किसिम के भाजी संकेल लेथों.” छत्तीसगढ़ मं भादों (अगस्त-सितंबर) के महिना मं माइलोगन मन बढ़िया संतान, तन्दुरुस्त लइका अऊ जचकी के बाद बढ़िया सेहत बर पूजा करत दिन भर उपास रइथें.

वो ह कहिथे,“मोर दाई ह हमर खेत ले संकेले पसहर चऊर पथोठे, ते पाय के मंय उपास बर कुछु बिसोय सकथों.” जब वो मन उपास टोरथें, त बिन जोत वाले खेत ले कमाय चऊर अऊ साग-भाजी अऊ फर खाथें.

40 बछर के, कौशल्या के घरवाला जीतू,रोजी मजूरी करथे, हफ्ता मं वो ह करीबन 2,000-2,500 रूपिया कमाथे फेर कौशल्या ला 8,000 रूपिया महिना तनखा मिलथे. ओकर तीनों लइका- एक बेटा अऊ जुड़वाँ लइका ( बाबू अऊ नोनी)- साग के मजा लेवत हें, कौशल्या मुचमुचावत कहिथे, “भाजी बनाय भारी सुभीता के आय, इहाँ तक के मोर ग्यारा बछर के बेटी घलो येला बनाय जानथे. सिरिफ मिर्चा, लेसुन अऊ पताल के बघार अऊ कोनो घलो भाजी भारी मीठ लागही.”

“जेन मन जानथें के ये काय आय, वो मन येला टोर के खा लिहीं, बाकि लोगन मन येला कचरा समझहीं,” वो ह बतावत जाथे. “गर वो मन खेत मं दवई (खरपतवारनाशक) नइ डारतीन, त हमर कनिहा भर तक ले साग-भाजी भरे रइतिस.” ये बोले बखत कुकर के आखिरी सीटी बजथे. अब साग बनगे हवय.

अनुवाद: निर्मल कुमार साहू