एक कटोरी मुसकेनी दाल

कौसल्या दीदी कहेली, “बरखा पड़ला के बाद वाला हरियर आ मोलायम-मोलायम मसकेनी साग जादे स्वदगर लागेला. कड़क घाम में पात जर जाला आ कड़ा हो जाला.” ऊ आपन दू कमरा वाला पक्का घर के बरंडा में खुलल में बनल रसोई में बइठल बतियावत बाड़ी. एगो प्रेसर कूकर में अरहर दाल धो के डलाएल बा. ओकरा साथे मुसकेनी, दू-चार ठो हरियर मरिचाई, हरदी पाउडर आ नून भी पड़ेला.

कौसल्या बतावत बाड़ी, “मुसेकनी भाजी (साग) अरहर आ चना दाल संगे नीमन लागेला.” ऊ बहुत खुस होके बतावत बाड़ी कि ई साग कइएक तरहा से बनेला. छत्तीसगढ़ में अपने से उग आवे वाला जंगली मुसकेनी दाल संगे एगो खास तरीका से बनावल जाला. जबले कुकर तीन से चार सीटी मारी, ऊ दाल छौंक खातिर पनिकी (हंसुआ) से लहसून, टमाटर, पियाज आ सूख्खल लाल मरिचाई काटे में लाग गइल बाड़ी. पनिकी लकड़ी पर लागल ब्लेड होखेला जेकरा से गांव-घर में तरकारी काटल जाला.

कौसल्या बतावत बाड़ी, “हम्मर गांव में तरह-तरह के जंगली साग मिल जाला. माई जानेली कब कवन साग तुड़े के चाहीं. अइसे त ई साग सब पूरा साल उगत रहेला. एकर स्वाद खास सीजन में जादे नीमन लागेला.” आमानाका में, जहंवा ऊ आजकल रहेली, जून से अगस्त ले तीहरी फुटु (देसी किस्म के कुकुरमुत्ता) खूब उगेला. एकरा बस पियाज, टमाटर आ मरिचाई में भुंज लींहीं, एकदम स्वदगर चीज खाए खातिर तइयार मिली. उ कहेली, “हम रोज एक मुट्ठी ले आइला. स्वाद में त ई मीट जइसन लागेला.”

कौसल्या गिडलहरी महासमुंद जिला के झलप गांव से बाड़ी, जे बारनवापारा के जंगल-पहाड़ लगे पड़ेला. लरिकाई में ऊ आपन माई के जंगल से साग-पात खोज के लावत आउर घर में पकावत देखले बाड़ी. सन् 2008 में बियाह भइला पर ऊ रायपुर चल अइली. उहंवा अब ऊ दलित बस्ती, आमानाका में रहेली. “घर में हमरा अलावे आउर केहू बाहिर से कुछो तुड़ के, बीन-बटोर के ना लावे. हमार मरद त बजार से तरकारियो लेवे ना जास. उनका लागेला एतना मंहग तरकारी खइला से त आदमी बिन खइले रहे.”

चउतीस बरिस के कौसल्या छत्तीसगढ़ के राजधानी रायपुर के एगो प्राइवेट स्कूल में मालन बाड़ी. ऊ आपन माइए जइसन जंगली साग-पात खोजत रहेली, जेकरा बिना छत्तीसगढ़ के चूल्हा-चौका सब सून रहेला. चलत-चलत ऊ तरह-तरह के झाड़, बेल, लत्तर सब देखावत चलत बाड़ी. संगे-संगे एकरा पकावे के तरीको बतावत चलत बाड़ी. “उल्लाह भाजी के लहसून आ मरिचाई संगे बनाएम त बहुते मजा आई. बोहर भाजी में इमली डाल के नीमन लागेगा. ई सभ भाजी धान के खेत लगे के नहर किनारे उगेला. एकरा केहू ना उगावे.”

कमरछठ पर्व खातिर, कौसल्या कहली, “हम इहंवा (स्कूल के अहाता के भीतरी) से सात-आठ तरह के पत्ता तुड़ के ले जाइला.” ई पर्व भादो (अगस्त सितंबर) के महीना में छत्तीसगढ़ में महतारी लोग करेला. एह में दिन भर उपवास कइल आ माई से मनता मांगल जाला कि जचगी ठीक से होखे, बच्चा निरोग होखो आ जच्चा सलामत रहो.

ऊ कहेली, “माई आपन खेत के पसहर (लाल जंगली चाउर) भेजेली. हमरा ब्रत में कुछो कीने के जरूरत ना पड़े.” मेहरारू लोग तरकारी, फल आ भात जइसन चीज खाके ब्रत तुड़ेला. इहंवा नियम बा कि खावे वाला सब चीज बाजार से कीनल ना होके के चाहीं, चाहे हल से जोताइल ना होखे के चाहीं.

कौसल्या के घरवाला जीतू, चालीस के आस-पास, दिहाड़ी मजूर बाड़न. उनका हफ्ता में कोई 2,000 से 2,5000 रुपइया के कमाई हो जाला. कौसल्या के पगार 8,000 रुपइया बा. ओह लोग के तीन ठो संतान- एगो बेटा आ जुड़वा बच्चा (एगो लइका आ एगो लइकी) लोग बा. सभे मजा में साग खा रहल बा. कौसल्या हंसत कहेली, “साग बनावल बड़ा आसान बा. हमार ग्यारह बरिस के लइकियो साग बना लेवेली. करे के का बा, बस मरिचाई, लहसून आ टमाटर से छौंक दीहीं. आ देखीं सादा साग कइसन चहटगर बन जाई.”

“जेकरा पता बा, कवन साग का बा, ऊ घरे ले जाई आ बना के खाई. दोसर लोग एकरा कचरा समझेला,” ऊ कहली. “जदि खेत में जंगली घास मारे वाला दवाई ना छिड़काइल रहित, त ई जंगली साग सब हमनी के कमर ले उगल रहित.” बतियावत-बतियावत कूकर आपन अंतिम सीटी दे देले बा. लीहीं, दाल खाए खातिर एकदम गरमागरम तइयार बा.

अनुवाद: स्वर्ण कांता