گجرات کے سَلایا تک پہنچی امریکہ-ایران جنگ کی چنگاری

’’ابّا جھوٹ بولتے تھے کہ، جے دریا ما رہتا ہوئے ایمنے موت نو ڈر نا ہوئے [جو دریا میں رہتا ہو، اسے موت کا ڈر نہیں ہوتا]۔ یہ بات وہ اُس وقت کہتے تھے جب میں نے ۱۷سال کی عمر میں بطور ملاح نوکری حاصل کی تھی،‘‘ ۴۳ سالہ نذیر جونَس بھایا اپنے ہاتھوں کو غور سے دیکھتے ہوئے کہتے ہیں۔ یہی وہ ہاتھ ہیں جنہوں نے ایم ایس وی الفیض نورِ سلیمانی نامی جہاز کو ڈوبنے سے پہلے مسلسل چھ ماہ تک چلایا تھا۔ وہ اس ہولناک لمحے کو یاد کرتے ہیں جب آبنائے ہرمز سے گزرتے ہوئے، کپتان کی ہدایت پر جہاز چلاتے وقت ایک میزائل ان کے جہاز سے آ ٹکرایا۔

’’ابّا جھوٹ بولتے تھے،‘‘ وہ پھر دہراتے ہیں۔ ’’میں تو لانچ (جہاز) میں پانی دیکھ کر ہیبت کھا گیا تھا۔ یہ ۸ مئی، ۲۰۲۶ کی رات ۱۲ بجے کے بعد کا وقت تھا۔ ایسا لگ رہا تھا کہ وہ میزائل ہمیں مارنے کے لیے ہی آئی تھی۔ ایران نے ہمیں آبنائے ہرمز سے گزرنے سے نہیں روکا تھا۔ اس لیے غالب امکان یہی ہے کہ یہ حملہ ان کی طرف سے نہیں کیا گیا تھا۔ ہم نے زوردار دھماکہ کی آواز سنی، اور لمحوں میں جہاز آگ کے شعلوں میں گھِر گیا۔‘‘ نذیر ہر جملے کے درمیان طویل وقفہ لیتے ہیں۔ وہ اپنی آبائی زبان کچھّی سندھی کے بجائے ملی جلی ہندی اور گجراتی میں بات کر رہے ہیں۔ ہم گجرات کے دوارکا ضلع کے ساحلی شہر سلایا میں واقع ان کے ایک منزلہ گھر میں بیٹھے ہیں۔

’’دھماکہ کی شدت سے دو ملاح ہوا میں اڑ گئے،‘‘ نذیر اپنی بات جاری رکھتے ہوئے کہتے ہیں۔ ’’ان میں سے ایک، الطاف طلب کیر (۴۰ سالہ)، جن کا دایاں ہاتھ جسم سے الگ ہو گیا تھا، جاں بحق ہو گئے۔ ایک اور ملاح شدید زخمی ہو گیا کیونکہ اس کا چہرہ جہاز کے ٹینک سے ٹکرا گیا تھا۔ اُس دن جہاز پر ہم کل ۱۸ افراد سوار تھے۔ حملے کے بعد جہاز میں پانی بھرنا شروع ہو گیا۔ جہاز ڈوبنے سے پہلے، ہمارے پاس اپنا سامان، حتیٰ کہ موبائل فون تک اٹھانے کا وقت نہیں تھا۔ ہم سب نے سمندر میں چھلانگ لگا دی اور لوہے کی سلاخوں سے گھیرے ہوئے ایک پلاسٹک کے پانی کے ٹینک کو پکڑ کر اپنی جان بچانے کی کوشش کرتے رہے۔ اگلے سات گھنٹے تک ہم اسی کے سہارے پانی پر تیرتے رہے۔ میں سردی سے بری طرح ٹھٹھر رہا تھا۔ مجھے لگ رہا تھا کہ اگر میزائل نے نہیں مارا، تو خلیجِ عمان کا یخ بستہ پانی ہم سب کی جان لے لے گا۔‘‘ نذیر اپنے ۶۰ برس سے زائد عمر کے والد جونَس بھایا کے ساتھ بیٹھے ہیں، جو تقریباً ۴۰ سال تک بحری جہازوں کے انجن روم میں کام کرتے رہے اور اب جزوی طور پر مفلوج ہیں۔ نذیر اپنی والدہ صبیرہ سے نظریں چرانے کی کوشش کر رہے ہیں۔ وہ ان کے سامنے بیٹھی اپنے بیٹے کی جان بچنے کی یہ کہانی ایک بار پھر سن رہی ہیں اور ان کے چہرے پر گہری اداسی نمایاں ہے۔

حملے کے بعد ڈوب جانے والا تین سال پرانا، تقریباً ۳۰۰۰ ٹن سامان اٹھانے کی گنجائش رکھنے والا یہ بڑا لکڑی کا روایتی بحری جہاز (ڈھو) سلایا میں ہاتھ سے تیار کیے جانے والے مشہور جہازوں میں شمار ہوتا تھا۔ اس کی تعمیر میں آندھرا پردیش سے آئے ہوئے چند کاریگروں کے ساتھ ساتھ بڑی تعداد میں مقامی کاریگر بھی شامل تھے، جنہیں جام سَلایا کے نام سے جانا جاتا ہے۔ یہ کچھی مسلمان ہیں، جن کے آباء و اجداد تقریباً دو سو سال قبل کچھّ کے مانڈوی اور مُندرا علاقوں سے ہجرت کر کے دوارکا میں آباد ہوئے تھے۔

اس برادری کی روزی روٹی کا انحصار بحری جہاز رانی کی صنعت پر ہے۔ قصبے کے زیادہ تر مرد یا تو جہاز بناتے ہیں، یا ان پر ملاح کے طور پر کام کرتے ہیں، یا پھر سامان چڑھانے اور اتارنے کا کام کرتے ہیں۔ یہ جہاز ہندوستان، متحدہ عرب امارات، عمان، یمن، ایران، صومالیہ، جبوتی اور اریٹریا کے درمیان مال ڈھوتے ہیں۔ جو لوگ ان جہازوں پر کام نہیں کرتے، وہ خلیجِ کچھ میں گھول (کروکر مچھلی، جس پر سیاہ دھاریاں ہوتی ہیں) اور ڈھول دارا مچھلیوں کا شکار کرتے ہیں۔

سلایا میں تیار کیے گئے تقریباً ۲۰۰ ’وہان‘ یا ’لانچ‘ (بڑے مال بردار بحری جہاز) آبنائے ہرمز سے گزرتے ہیں۔ عام طور پر ملاح ستمبر سے مئی تک جہازوں پر کام کرتے ہیں، جبکہ جون سے اگست کے دوران مانسون کے باعث ہندوستانی حکام بحیرۂ عرب میں کشتیوں اور جہازوں کو چلانے کی اجازت نہیں دیتے۔

نذیر کہتے ہیں، ’’میرا معاہدہ ۱۳ ماہ کا تھا، لیکن میں مئی میں ہی واپس آ گیا۔ یہی میرا آخری سفر تھا۔ میں نے اپنی بہنوں کی شادیوں اور اپنے گھر کی تعمیر مکمل کرنے کے لیے ساڑھے چار لاکھ روپے بچائے تھے، مگر سب کچھ سمندر میں ڈوب گیا۔ اب میرے پاس نہ پاسپورٹ ہے اور نہ ہی ملاح کا شناختی کارڈ۔‘‘ یہ کہتے ہوئے نذیر ہمیں اپنا پرانا شناختی کارڈ دکھاتے ہیں۔

نذیر کو جہاز کے مالک کی طرف سے ماہانہ ۵۰۰۰ روپے تنخواہ ملتی ہے، لیکن اصل آمدنی اس وقت ہوتی ہے جب وہ شارجہ، یمن اور صومالیہ میں سامان لادنے اور اتارنے کا کام کرتے ہیں۔ اس کام کے عوض غیر ملکی تاجر انہیں فی ٹن ۱۰ درہم دیتے ہیں۔ ان کی مجموعی آمدنی کام کی دستیابی، سامان کی مقدار، زرِ مبادلہ کی شرح اور جہاز پر موجود عملے کے افراد کی تعداد پر منحصر ہوتی ہے، کیونکہ یہ رقم سب کے درمیان تقسیم کی جاتی ہے۔ تاہم، ایک ایسے قصبہ میں جہاں تعلیم، بنیادی سہولیات اور روزگار کے مواقع محدود ہیں، نذیر کے لیے یہ کام ایک پُرکشش ذریعۂ معاش تھا۔

نذیر کہتے ہیں، ’’میں گزشتہ دو مہینوں سے گھر پر بیٹھا ہوں۔ میں اتنا ڈر گیا ہوں کہ جہاز بنانے والے یارڈ کے قریب بھی نہیں جانا چاہتا۔ گزشتہ دو تین دنوں میں میں نے ماہی گیری کی کشتی پر کام کرنے کی کوشش کی، لیکن جون سے اگست کے درمیان سمندر میں طوفانوں اور سمندری آندھیوں کا خطرہ رہتا ہے، اس لیے ہمیں اجازت نہیں ملتی۔‘‘ لیکن گھر پر بے روزگار بیٹھنا بھی انہیں مسلسل پریشان کیے ہوئے ہے۔ نامکمل گھر، ڈوبی ہوئی جمع پونجی اور ایک غیر یقینی مستقبل انہیں ہر وقت بے چین رکھتا ہے۔

جہاز کے مالک نے ان کے لیے نیا پاسپورٹ بنوانے میں کسی قسم کی مدد کرنے سے انکار کر دیا۔ اب نذیر کو نیا پاسپورٹ حاصل کرنے کے لیے اپنی جیب سے ۷۰۰۰ سے ۱۰ ہزار روپے خرچ کرنے ہوں گے۔ اور دوسرے متاثرین کی طرح انہیں بھی اپنے نقصان کا اب تک کوئی معاوضہ نہیں ملا ہے۔

جہاز مالکان کا کہنا ہے کہ وہ خود بھی شدید مالی نقصان کا شکار ہیں، کیونکہ گزشتہ دو برسوں سے انشورنس کمپنیاں سلایا میں تیار کیے گئے ان روایتی مال بردار جہازوں کا، جو جنگی علاقوں سے گزرتے ہیں، بیمہ کرنے سے انکار کر رہی ہیں۔ حتیٰ کہ جو جہاز پہلے سے بیمہ شدہ ہوں، اگر وہ جنگی علاقوں میں نقصان اٹھائیں تو ان کا معاوضہ بھی ادا نہیں کیا جاتا۔

سلایا کے جہاز مالک سلطان احمد سنگھار کہتے ہیں، ’’جب میرا جہاز تباہ ہوا تو مجھے حکومت کی طرف سے بھی کوئی مدد نہیں ملی۔ میں نے ایک ہندوستانی انشورنس کمپنی کو ۱۳ لاکھ ۵۰ ہزار روپے انشورنس پریمیم کی مد میں ادا کیے، مگر اس کے باوجود مجھے ایک روپیہ بھی نہیں ملا۔ میرے جہاز سے عمان کے کوسٹ گارڈ کے ذریعہ بچائے گئے عملے کے ویزوں اور سفری ٹکٹوں کے تمام اخراجات بھی مجھے اپنی جیب سے ادا کرنے پڑے۔‘‘ وہ اپنے جہاز ’حاجی علی‘ کا ذکر کر رہے ہیں، جو صومالیہ سے دبئی جا رہا تھا اور آبنائے ہرمز میں میزائل حملے کا شکار ہونے والا ایک اور جہاز تھا۔ اس جہاز میں ۴۸۰ مویشی اور ۱۸۰۰ بھیڑ بکریاں موجود تھیں، جنہیں حج کے موقع پر ہونے والی سالانہ قربانی کے لیے لے جایا جا رہا تھا۔

اعجاز اکبر سنگھار (۳۰) اور جہاز پر موجود دیگر ۱۴ افراد کو ایک واٹس ایپ گروپ کے ذریعے معلوم ہوا کہ ایم وی ایس فیضِ سلیمانی چار روز قبل میزائل حملے کے بعد ڈوب چکا ہے۔ لیکن اس وقت تک حاجی علی ۱۳ مئی ۲۰۲۶ کو پہلے ہی سمندر میں روانہ ہو چکا تھا۔ اعجاز بتاتے ہیں، ’’رات کے تین بجے تھے اور ہمیں اپنی منزل تک پہنچنے میں ابھی پانچ گھنٹے باقی تھے کہ عمان کے ساحل کے قریب ایک میزائل ہمارے جہاز سے آ ٹکرایا۔ ہمارے موبائل فون میں اتنا بیلنس بھی نہیں تھا کہ ہم اپنے ہندوستانی جہاز مالک کو فون کر سکتے، اس لیے ہم نے صومالیہ کے تاجر کو اطلاع دی۔ ہم سب بری طرح ڈر گئے تھے۔ ہم جانوروں کی جان بچانے کے لیے بے بسی سے نکلتی چیخیں سن رہے تھے۔ لائف بوٹ میں صرف ۱۲ افراد کی گنجائش تھی، لیکن ہم ۱۴ افراد اسی پر کھڑے رہے، یہاں تک کہ عمان کے کوسٹ گارڈ پہنچے اور ہمیں بحفاظت بچا لیا۔‘‘

دو ماہ گزرنے کے باوجود اعجاز اب بھی شدید ذہنی صدمے میں مبتلا ہیں۔ ان کی والدہ کبھی نہیں چاہتی تھیں کہ وہ سمندر میں کام کریں، کیونکہ ان کے شوہر ۲۰۰۲ میں خلیجِ عمان میں ڈوب کر جاں بحق ہو گئے تھے۔ لیکن اعجاز نے دسویں جماعت کے بعد تعلیم جاری نہیں رکھی، اور سلایا میں روزگار کے دوسرے مواقع بھی موجود نہیں تھے۔ اسی وجہ سے وہ اپنے چچا سلطان کے جہاز پر کام کرنے لگے۔ مگر اب وہ دوبارہ کسی بحری جہاز پر کام نہیں کرنا چاہتے۔

سلطان کہتے ہیں، ’’اعجاز میرا بھتیجا ہے، اور وہ اکیلا نہیں جو یہ کام چھوڑنا چاہتا ہے۔ میرا پورا عملہ خوفزدہ ہے۔ میرا دوسرا جہاز حاجی علی-۱ اکتوبر ۲۰۲۶ میں روانگی کے لیے تیار ہوگا، لیکن پرانا عملہ اس پر دوبارہ کام کرنے کے لیے آمادہ نہیں ہے۔‘‘ وہ مزید کہتے ہیں، ’’جاری جنگ کے باعث بہت سے نوجوان ملاح دبئی سے واپس آ گئے ہیں، حالانکہ وہ جانتے ہیں کہ جون سے اگست کے دوران سلایا میں رہنے کا مطلب بے روزگاری ہے، کیونکہ اس عرصے میں بحریہ اور کوسٹ گارڈ بندرگاہ سے جہاز روانہ کرنے کی اجازت نہیں دیتے۔ زندگی سے بڑھ کر کچھ نہیں، ہم انہیں زبردستی کام پر نہیں لگا سکتے۔‘‘

سلطان کے جہاز بنانے والے یارڈ سے تقریباً دو کلومیٹر کے فاصلہ پر سلایا کے سُمبھانیا برادران، شاقب حاجی امین (۳۰) اور عظیم حاجی امین (۳۳) کا گھر ہے۔ دونوں دبئی سے واپس آ گئے ہیں۔ وہ گزشتہ پانچ برس سے سیاحت کے شعبے میں ڈنر کروز پر خدمات انجام دے رہے تھے۔ مارچ ۲۰۲۶ کے اوائل میں کسی نے ان کے موبائل فون پر پام جمیرہ پر ہونے والے ڈرون اور میزائل حملوں کی ویڈیوز بھیج دیں۔ شاقب کا موبائل دبئی پولیس کے ہاتھ لگ گیا، جس کے بعد انہیں گرفتار کر لیا گیا اور وہ ۷۷ دنوں تک دبئی کی جیل میں رہے۔

شاقب کہتے ہیں، ’’وہ دن انتہائی ذلت آمیز تھے۔ جیل کے اندر ہر چیز بہت مہنگی تھی۔ اپنے گھر والوں سے صرف پانچ منٹ بات کرنے کے لیے مجھے ۱۰ درہم ادا کرنے پڑتے تھے۔ میرے بوڑھے والد نے بڑی مشکل سے رقم کا انتظام کر کے مجھے رہائی دلوائی۔ میرا ضبط شدہ موبائل بھی واپس نہیں ملا۔ میرے منیجر نے بھی میرا ساتھ چھوڑ دیا، اور متحدہ عرب امارات کی حکومت نے مجھ پر ایک سال کے لیے دبئی آنے پر پابندی لگا دی ہے۔‘‘

دوسری طرف، جب عظیم گرفتاری سے بچ نکلنے میں کامیاب ہوئے تو انہیں متوقع ۷۰۰۰ درہم کے بجائے صرف ۳۰۰۰ درہم ہی ملے۔ اچانک وطن واپسی اور آمدنی ختم ہو جانے کے باعث دونوں بھائیوں کو اپنے بچوں کو کھمبھالیہ کے ایک نجی اسکول سے نکال کر سلایا کے سرکاری اسکول میں داخل کرانا پڑا۔

عظیم کہتے ہیں، ’’جولائی میں جا کر مجھے ایک گیراج میں موٹر سائیکلوں پر رنگ کرنے کا کام ملا۔ لیکن سلایا ایک چھوٹا قصبہ ہے؛ کچھ دن گاہک آ جاتے ہیں اور کچھ دن بالکل نہیں آتے۔ میرے بھائی کے برعکس، دبئی حکومت نے میرا ویزا منسوخ نہیں کیا۔ لیکن اب جبکہ جنگ دوبارہ شدت اختیار کر رہی ہے، میں اپنی جان خطرے میں ڈال کر واپس نہیں جا سکتا۔ اب میں یہیں رہ کر کسی نہ کسی طرح گزر بسر کرنے کی کوشش کروں گا۔‘‘

شاقب اپنے پرانے ڈنر کروز کا انسٹاگرام پیج دکھاتے ہوئے کہتے ہیں، ’’ہمارے دادا کبھی سلایا کے امیر ترین لوگوں میں شمار ہوتے تھے، لیکن جب ان کے دو جہاز سمندر میں ڈوب گئے تو ہمارا خاندان سب کچھ کھو بیٹھا۔ اس کے بعد میرے والد اور چچاؤں کو دوسرے روزگار تلاش کرنا پڑے، اور ہم اپنی تعلیم بھی مکمل نہ کر سکے۔ گزشتہ تین چار برسوں میں جا کر میری زندگی بہتر ہونا شروع ہوئی تھی۔ میری خواہش تھی کہ اپنے بیٹے کو وہ اچھی تعلیم دوں جو مجھے نصیب نہ ہو سکی، مگر اب ملازمت ختم ہونے اور دبئی میں داخلہ پر پابندی لگنے کے بعد میرا یہ خواب بھی ٹوٹ گیا ہے۔‘‘

دوسری جانب، نذیر بھی فوری طور پر دوبارہ سمندر میں جانا نہیں چاہتے، خواہ حالات معمول پر ہی کیوں نہ آ جائیں۔ وہ کہتے ہیں، ’’اللہ نے ایک بار میری جان بچا کر مجھے زندگی کا دوسرا موقع دیا ہے۔ ضروری نہیں کہ وہ دوبارہ بھی مجھے بچا لے۔ لیکن مجھے اپنا گھر بھی مکمل کرنا ہے اور اپنی بہنوں کی شادیاں بھی کرنی ہیں، اس لیے آخرکار مجھے دوبارہ جانا ہی پڑے گا۔‘‘ وہ کچھ پرانی تصویریں دکھاتے ہوئے کہتے ہیں کہ شاید تین یا چار سال بعد انہیں پھر سے سمندر میں جانا ہوگا۔

تاہم، ان کی والدہ صبیرہ اس بات سے مطمئن نہیں ہیں۔ وہ کہتی ہیں، ’’یہ ہمارے آباء و اجداد کا پیشہ ہے۔ میرے بھائی، والد، شوہر اور دادا سب نے یہی کام کیا ہے۔ سلایا کی عورتیں اس بات کی عادی ہیں کہ ان کے مرد کئی کئی ماہ تک سمندر میں رہتے ہیں۔ مجھے سمندر پر بھی بھروسہ ہے اور ان جہازوں پر بھی جو ہمارے اپنے لوگوں نے اپنے ہاتھوں سے بنائے ہیں، لیکن مجھے میزائلوں پر کوئی بھروسہ نہیں۔ میرا دل نہیں چاہتا کہ میرا بیٹا دوبارہ سمندر میں جائے۔ پیسہ تو دوبارہ کمایا جا سکتا ہے، مگر اگر میرا بیٹا کھو گیا تو وہ مجھے واپس کیسے ملے گا؟‘‘