गजब के जोंधरी बोली

बिहाव के बाद जब रीना परतेती ह पहिली बेर लोनादेई गाँव मं अपन ससुराल मं पांव धरिस, त वो ह अकबका के रहिगे.

“घर के नान नान लइका मन घलो मोर महतारी भाखा [गोंडी] बिन अटके गोठियावत रहिन,” ओ ह सुरता करत बताथे. फेर रीता अपन गोंड समाज के भाखा ला लटेपटे समझे पावत रहिस, काबर के “ मोर गाँव [मोया] मो कोनो घलो गोंडी बोलर नइ रहिस, 34 बछर के ये आदिवासी किसानिन कहिथे.

लोनदेई के करीबन 80 फीसदी आबादी गोंड जनजाति के हवंय. वो ह बताथे, “जउन मन गोंड समाज ले नइ यें, ओ मन घलो इहीच भाखा मं गोठियाथें.”

रीना के भांचा-भांची, भतीजा-भतीजी मन ओकर ले हँसी-मजाक करत चिढ़ावंय, “मामी को गोंडी बोलते नहीं आती, चाची को गोंडी बोलते नहीं आती!” वो ह ये बात ला सुरता करत हँस परथे अऊ कहिथे, “पहिली पहिली मंय भारी अटकत रहेंय, फेर आखिर मं मंय अपन महतारी भाखा मं गोठियाय सुरु कर देंय.”

गोंडी द्रविड़ भाखा आय जेन ह न सिरिफ मध्य प्रदेश मं, फेर मध्य भारत के कतको दीगर जगा मं घलो भारी बोले जावत रहिस. आज यूनेस्को ह वोला बिपत मं परे एक ठन भाखा के रूप मं राखे हवय. वइसे गोंड समाज के राज के सबले बड़े आदिवासी समाज मन ले एक आय, ओकर बाद घलो ओकर मन के भाखा उपर खतरा हवय.

पढ़ई-लिखई अऊ काम बूता करे बर शहर चले जवेइय्या गोंडी बोलेइय्या कतको लोगन मन, समाज ले अलग-थलग पर जाय के डर ले, अब हिंदी जइसने दीगर बोलचाल के भाखा मं गोठियाय जियादा पसंद करत हवंय. समाजिक कार्यकर्ता रामनाथ उइके बताथे के हरेक दू गोंड आदिवासी मन ले सिरिफ एकेच झिन साक्षर हवय, अऊ ये समाज मं स्कूल छोड़ेइय्या के दर घलो बनेच जियादा हवय.

पढ़व: गोंडी भाखा हमर धरम घला अऊ जात घला’

लोनादेई के करीबन 1,000 दीगर बासिंदा मन के जइसनेच, रीना अऊ ओकर घरवाला मंत्रम घलो किसान आय. वो मन एक एकड़ मं खेती करथें, जेन मं वो मन अपन खाय बर जोंधरा कमाथें. पांढुर्ना तहसील के लोनादेई मं बने ओकर मन के घर, खेत ले तिरेच मं हवय.

जेन दिन पारी ओकर मन ले भेंट करे रहिस, ये जोड़ा ला बरसा होय ले खेत मं लगे फसल के खइता होय के चिंता करत रहिस.

भारी बादर छाय रहिस, बिजली कड़के के बाद, हल्का झड़ी धर ले रहिस. रीना अऊ मंत्रम, करीबन पक चुके मक्का (जोंधरा) ला देखे बर लउहा-लउहा खेत कोती जावत रहिन

“छुई, छौर, बूच, तोता...” शब्द एक के बाद एक निकरत जाथे. जोंधरा के रुख के हरेक हिस्सा के काम मं आय गोंडी नांव के संगे संग रीना के हाथ घलो चलत रहिथे. बरसा थमगे हवय अऊ अब बखत हवय गोंडी सीखे के . रीना हमन ला ‘छुई’ दिखाथे, जेन ला लउहा-लउहा छीलके तुरते, मोटी कस उज्जर दाना निकारथे – ये दाना मन बूच के बीच ले चमकत रहिथे. रीना हमन ला बताथे के ‘छुई’ जोंधरी/ जोंधरा के बहिर के पाना होथे – जेन ला गोंडी मं ‘पताउद’ घलो कहे जाथे – फेर ‘बूच’ रेशम जइसने धागा के ज्जुफ्फा आय जेन ह जोंधरी/ जोंधरा रुख के मुड़ी मं लटके रहिथे: गोंडी उपर अपन बढ़िया पकड़ ला लेके ओकर मन मं धीर गरब झलकथे.

“जोंधरी/ जोंधरा के रुख के कोनो घलो हिस्सा खइता नइ जावय, इहाँ तक के ओकर ‘टोटा’ घलो नइ, 49 बछर के मंत्रम कहिथे. ‘टोटा’ के मतलब वो हिस्सा ले आय जेन ह बीजा निकारे के बाद बांचथे.

‘टोटा’ (जेन ला ‘'थूं’ घलो कहिथें) जोंधरी/ जोंधरा के काड़ी होथे ओला रांधे बखत बारे के काम आथे अऊ जाड़ बखत तापे बर काम मं लाय जाथे. ‘बूच’ अऊ ‘छुई’ ला बाद मं ‘टोटा’ के संग मिलाके गाय अऊ छेरी मन के चार के काम आथे. जोंधरा के रुख के फूल ला ‘छौर’ कहे जाथे - मंत्रम हमन ला सिखावत रहिथे.

छिंदवाड़ा ला मध्य प्रदेश मं 'जोंधरी/ जोंधरा शहर’ के नांव ले जाने जाथे. कर्नाटक के बाद, ये राज ह ये फसल उपजेइय्या दूसर सबले बड़े राज आय.

जोंधरी/ जोंधरा एक ठन घास के किसिम आय. ये जिला के किसान मन बर ये ह जियादा फायदा वाले अऊ नगदी फसल के रूप मं हवय. रीना अऊ मंत्रम जइसने,ये जिला के गोंड लोगन मन मेंझरा खेती करथें – ओ मन सोयाबीन, कुसियार, कपसा के संगे संग उरीद,राहेर जइसने दार अऊ बरबटी/झुनगा जइसने साग-भाजी घलो कमाथें. बीते कुछेक बछर मं, जुवार अऊ गहूँ के उपज बनेच गिरगे हवय. मंत्रम बताथे, “ सिरिफ उहिच लोगन मन गहूँ के उपज बनेच मिलथे जेकर मन करा ट्यूबवेल के सुविधा हवय.”

परिवार ह संतरा रुख लगाय के बिचार करत हवय. रीना कहिथे, “ येकर ले हमन ला बढ़िया दाम मिलथे अऊ अवे य्या चार पांच बछर तक ले उपज घलो जियादा होथे.” गाँव के आने किसान मन घलो धीरे-धीरे संतरा के खेती कोती जावत हवंय, काबर के कंपनी ह दीगर फसल के बनिस्बत जियादा दाम देथे अऊ पूरा के पूरा फसल बिसो लेथे.

बिहाव के बाद जब रीना लोनादेई आइस, त देखिस के जोंधरा के उपज बनेच कम हवय. ये ह बछर भर मं तीन ले डेढ़ क्विंटल तक ले होवत रहिस. वो ह कहिथे, ‘जब ये मं गोबर खातू अऊ यूरिया सही नाप मं मिलाय जाथे, त माटी रसहा हो जाथे.”

पहिली, हरेक गोंड के छानी मं जोंधरी/ जोंधरा जे जुफ्फा लटकत रहय, जेन ला बरसा के पानी, कीरा-मेकरा अऊ जानवर मन ले बचाय बर सूती कपड़ा ले तोपे जावत रहिस. आज, अधिकतर परिवार ये पारंपरिक रिवाज ला मानत नइ यें, काबर के बजार मं बिजहा पाकिट मं सुभीता ले मिल जाथे.

“हमन ला [गोंड मन ला] जोंधरी/ जोंधरा पिसान के रोटी भारी रुचथे; ये हमन देह ला बने राखथे अऊ मजबूत बनाथे , अऊ भारी ताकत वाले होथे , रीना कहिथे. वो ह बतावत जाथे, “सावन [जून ले सितंबर] के बखत भारी भाग-दऊड़ के होथे, काबर के जोंधरी/जोंधरा के रुख ह तेजी ले बढ़थे, अऊ बन-कचरा घलो.” निंदई इसने बूता आय जेन ला अधिकतर सिरिफ माईलोगन मन करथें.

मोर सास मोला बताथे के वो बखत ओ मन निंदई गीत’ गावंय. फेर मोला कोनो गीत नइ आवय, वो ह झेंपत हँसे लगथे. ये बखत हमर करा ‘निंदानासक/ सर्वनास दवई’ त हवेच हवय ना ?

बखत के संगे संग, जोंधरी/ जोंधरा के खेत ले बन-कचरा खतम होगे, अऊ निंदई गीत – ठऊका वइसनेच जइसने खेती के दीगर कतको रीत-चलन – अब नंदागे हवय.

ये कहिनी मूल रूप ले हिंदी मं लिखे गे रहिस.

रिपोर्टर, 'प्रदीपन एनजीओ’के रामनाथ गोंड अऊ छिंदवाड़ा के ‘परार्थ समिति एनजीओ’ के संस्थापक-सदस्य मंजिरी चंदे के ये कहिनी मं मदद करे बर आभार जतावत हवय. वो ह गोंडी भाखा मं अनुवाद मं मदद करे सेती रीना परतेती, किरण आदमचे अऊ दीक्षा इनवाती के घलो आभार जतावत हवय.

पारी के नंदावत जावत भाखा परियोजना (ईएलपी), अजीम प्रेमजी यूनिवर्सिटी ले मिले मदद के हिस्सा आय. येकर मकसद भारत के खतरा मं परे भाखा मन ला, ओकर बोलेइय्या मन के बात ला अऊ अनुभव के दस्तावेजीकरन करे आय.

अनुवाद: निर्मल कुमार साहू