अब ‘निराई गीत’ केहू ना गावे

रीना परतेती बियाह भइला पर पहिल दफे लोनादेई गांव, आपन ससुराल पहुंचलती त चकरा गइली.

“घर के छोट-छोट लरिको सब हमार बोली (गोंडी) में फट-फट बतिया लेत रहे,” उनका इयाद आइल. बाकिर तब रीना के खुद आपन गोंड समाज के ई बोली पूरा समझ ना आवत रहे, काहेकि “हमार गांव मोया में केहू गोंडी ना बोलत रहे,” 34 बरिस के आदिवासी किसान बतइली.

लोनादेई के मोटा-मोटी 80 फीसदी आबादी गोंड बा. ऊ बतावेली, “आ जे गोंड नइखे, उहो कवनो ना कवनो तरह से गोंडी बोल आ समझ लेवेला.”

रीना के भतीजा-भतीजी आ भगिना-भगिनी लोग उनका खेल-खेल में चिढ़ावत कहेला, “मामी के गोंडी बोले ना आवे, चाची के गोंडी बोले ना आवे!” ई सब बात याद क के ऊ हंसे लगली, “पहिले त हम बोले में हकलात रहीं. बाकिर धीरे-धीरे हमहूं सबसे आपन माई-बोली, गोंडी में बतियावे लगनी.”

गोंडी बहुते पुरान द्रविड़ भाषा बा. पहिले ई खाली मध्य प्रदेसे ना, पूरा मध्य भारत में खूब बोलल जात रहे. आज हालत ई बा कि ई यूनेस्को के संकट में पड़ल भाषा के सूची में गिने जाए लागल बा. गोंड भले प्रदेस के सबले बड़ आदिवासी समाज में गिनाला, बाकिर उनकर बोली पर संकट में बा.

पढ़े-लिखे आ कमाए खातिर शहर गइल केतना गोंडी लोग उहंवा अलग-थलग पड़े के डर से अब गोंडी ना बोले, बलुक हिंदी जइसन दोसर भाषा में बोलल पसंद करेला. समाज सेवक रामनाथ उइके के हिसाब से दू ठो गोंड आदिवासी में से खाली एके आदमी पढ़ल-लिखल मिली. इहंवा स्कूल छोड़ देवे वाला के गिनती बहुते जादे बा.

पढ़ीं: ‘गोंडी हमनी के धरम, हमनी के जात बा’

लोनादेई के कोई हजार बसइया लोग जइसन, रीना आ मंतराम भी खेती-किसानी करेला. ऊ लोग एक एकड़ जमीन जोत के आपन गुजर-बसर खातिर भुट्टा (मकई) उगावेला. पंधुर्ना तहसील के लोनादेई में ओह लोग के घर खेत से तनिके दूर होई.

पारी भेंट करे गइल, त दूनो प्राणी खेत में मोटा-मोटी तइयार हो चुकल मकई के बरखा से बचावे के चिंता में लागल रहे.

आसमान में करिया-करिया बदरा घेर लेले बा. गरज संगे बूंदा-बांदी होखे लागल बा. रीना आ मंतराम घबरा के जल्दी से खेत ओरी भागल, ताकि करीब-करीब पाक चुकल मकई के हाल देख सके.

“छुई, छौर, बूच, टोटा...” रीना भुट्टा के अलग-अलग हिस्सा के नाम एक-एक करके पुकारत जात बाड़ी. ऊ नाम के संगे-संगे भुट्टा के ऊ हिस्सो सब देखावत जात बाड़ी.

उनचास बरिस के मंतराम कहेलन, “भुट्टा के पौधा के कवनो भाग बेकार ना जाए, इहंवा ले कि टोटा भी काम में आ जाला.” ऊ दाना निकलला के बाद बचल भुट्टा के ठूंठ के बारे में कहत बाड़न.

टोटा (ठूठो कहाला) भुट्टा के खाली डंठल होखेला. एकरा अक्सरहा चूल्हा जरावे, आ सरदी में आग तापे के काम में लावल जाला. बूच आ चुई बाद में गाय आ बकरी सब के टोटा संगे खिया देवल जाला. भुट्टा के पौधा में लागल फूल छाउर कहाला, मंतराम हमनी के बतावत जात बाड़न.

मध्य प्रदेस के छिंदवाड़ा कॉर्न सिटी के नाम से मसहूर बा. कर्नाटक के बाद, मध्य प्रदेस मकई उगावे में देस भर में दोसरा नंबर पर बा.

मकई असल में घास (पोएसी) कुल से आवेला. एह जिला के किसान लोग खातिर ई जादे फायदा आ सही कमाई वाला फसल बन गइल बा. रीना आ मंतराम जेका, जिला के दोसर गोंड लोग मिलल-जुलल (मिश्रित) खेती करेला. ऊ लोग गेहूं, सोयाबीन, भुट्टा आ कपास संगे बरबेटी जइसन तरकारी, उड़द, तुअर जइसन दालो सब उगावेला. समय संगे ज्वार आ गेहूं के पैदावार घटत चल गइल. मंतराम कहेलन, “देखीं, गेहूं उहे लोग ठीक से उगा पावता, जेकरा लगे ट्यूबवेल के सुविधा बा.”

ई परिवार संतरा के कलम (पौधा) लगावे के सोच रहल बा. रीना बतइली, “एकरा से हमनी के अच्छा पइसा मिली आउर अगला चार से पांच बरिस तक अच्छा मात्रा में संतरा भी मिलत रही.” गांव के दोसर किसान लोग भी धीरे-धीरे संतरा के खेती करे लागल बा. कइएक कंपनी संतरा खातिर दोसर फसल से जादे पइसा देवे के तइयार बा. केतना बेरा त ऊ लोग संतरा के पूरा-पूरा खेते कीन लेवेला.

रीना बियाह करके लोनादेई अइली, त पइली कि भुट्टा बहुते कम होखत रहे. साल में बस डेढ़ से तीन क्विंटल. उ कहेली, “गोबर खाद आ यूरिया मिला देवल जाव, त माटी के ताकत बढ़ जा आ फसल खूब नीमन होखेला.”

पहिले बिया जोगा के रखे खातिर मकई के घरे-घरे छज्जा पर टांग देवल जात रहे. बरखा, कीड़ा-मकोड़ा आ दोसर जीव-जंतु से बचावे खातिर ई कपड़ा से तोपल रहत रहे. अब मकई के बिया बजार में पैकेटबंद मिल जाला, एही से जादेतर परिवार में ई चलन नइखे बचल.

“गोंड लोग के मकई के रोटी बड़ा भावेला. एकरा से देह खूब बरियार बनेला. ई बहुते पौष्टिक भी होखेला,” रीना कहेली. ऊ इहो बतावेली, “सावन (जून से सितंबर) में हमनी के बइठहूं के समय ना रहे. मकई बहुते जल्दी-जल्दी बढ़ेला आ खरो-पतवार खूब हो जाला.”

“सास बतावत रहस कि ऊ लोग खेत से खर-पतवार साफ करे घरिया ‘निदाई गीत’ (निराई गीत) गावत रहे,” रीना कहली. “बाकिर हमरा एक्को ना आवे,” अइसन कहत ऊ खिखियाए लगली. “आजकल त घास खतम करे वाला दवाई मिल जाला नू?”

मकई के खेत से खर-पतवार हटावे वाला दवाई त आ गइल, बाकिर निदाई गीत जइसन पुरान परंपरो धीरे-धीरे समाप्त हो गइल.

कहानी मूल रूप से हिंदी में लिखल गइल बा.

रिपोर्टर छिंदवाड़ा के प्रदीपन संस्था के रामनाथ उइके आ परार्थ समिति एनजीओ के संस्थापक सदस्य मंजिरी चांदे के मन से आभार व्यक्त करे के चाहत बानी. ऊ रीना परतेती. किरण अडामचे आ दीक्षा इनवती के गोंडी भाषा समझावे में मदद करे खातिर खास धन्यबाद करे के चाहत बानी.

पारी के लुप्तप्राय भाषा प्रोजेक्ट (ईएलपी), अजीम प्रेमजी यूनिवर्सिटी के सहजोग से चले वाला एगो खास पहल बा. एकर मकसद भारत के संकटग्रस्त भाषा के, ओकरा बोले वाला आम अवाम आ ओकर जिनगी के अनुभव के सहारे दर्ज कइल बा.