کُپّ، بھینس اور کبڈّی

زیادہ تر لوگ پہلے مویشی خریدتے ہیں، اور اس کے بعد ہی چارے کے انتظامات کے بارے میں سوچتے ہیں۔ مگر جسوِندر کور اور ان کے شوہر جگسیر سنگھ اس کے بالکل برعکس کر رہے ہیں۔

وہ بھینس کا چارہ رکھنے کے لیے کُپّ بنا رہے ہیں، جسے وہ ابھی خرید نہیں سکتے۔ ان کے ایسا کرنے کی وجہ یہ ہے کہ اس سال توڑی (خشک چارہ کے طور پر استعمال ہونے والے کٹے ہوئے گیہوں کا بھوسا) کی قیمت تقریباً ۷۵ فیصد تک کم ہو گئی ہے۔ سال ۲۰۲۴ میں ایک کوئنٹل توڑی ۸۰۰-۱۰۰۰ روپے میں فروخت ہوئی تھی۔ موجودہ موسم میں اس کی قیمت گھٹ کر ۲۰۰-۲۵۰ روپے فی کوئنٹل ہو گئی ہے۔

تو سنگرور ضلع کے چانگلی والا گاؤں میں ان میاں بیوی نے سوچا کہ مویشی کو گھر لانے سے پہلے چارہ خرید کر رکھ لینا ہی بہتر ہے۔

فیملی کو اضافی تغذئی غذا چاہیے۔ ان کا ۲۷ سال کا بیٹا ایک ابھرتا ہوا کبڈی چمپیئن ہے اور فیملی کی بھینس سے حاصل ہونے والے ایک گلاس دودھ سے اس میں مدد ملے گی۔ جسوِندر کور (۵۰ سالہ) کہتی ہیں، ’’بہتر غذا چاہیے، خاص کر بیٹے کے لیے جو گاؤں میں کبڈی کھیلتا ہے۔‘‘ ان کی دو بیٹیاں ہیں، ایک شادہ شدہ ہے اور دور رہتی ہے، دوسری ۲۵ سال کی گگن نے ماسٹرز کی تعلیم مکمل کر لی ہے اور کچھ سال پہلے اپنی ماں کے بیمار پڑنے کے بعد سے گھر سنبھال رہی ہے۔

اس فیملی نے جب کُپّ بنانے کا فیصلہ کیا، تو انہوں نے جگسیر کے ماموں گُرمیل سنگھ سے بات کی۔ تقریباً ۶۰ سال کے تجربہ کار کاریگر گُرمیل کے مطابق، انہوں نے گزشتہ ۴۰ برسوں میں ۲۰۰۰ سے زیادہ کُپّ بنائے ہیں۔ وہ کہتے ہیں، ’’گندم کی کٹائی کے بعد کے مہینوں میں ہم روزانہ کم از کم دو کُپّ بناتے تھے۔‘‘

کُپّ دراصل چارہ رکھنے کے لیے گنبد نما اور کم لاگت والا ایک عارضی ڈھانچہ ہوتا ہے۔ کبھی پنجاب کے گاؤوں میں اٹوٹ حصہ رہا یہ کُپّ اب مشکل سے ہی ملتا ہے۔ دہلی سے پنجاب کے چانگلی والا تک ٹرین سے جاتے ہوئے پاری کو یہ بہت کم دکھائی دیے۔

گرمیل جب اسے بنانے کے لیے تیار ہو گئے، تبھی فیملی کے لیے کُپّ حقیقت بن پایا۔ تقریباً ۴۵ سے زیادہ سال کے تجربہ کار اور زیادہ تر ایک سِری (بندھوا زرعی مزدور) رہ چکے گرمیل اس کام کو بخوبی جانتے ہیں۔ اس فیملی کا تعلق رام داسیا سکھ برادری (پنجاب میں درج فہرست ذات کے طور پر درج) سے ہے، جو روایتی طور پر کانٹے دار ڈنٹھلوں کے رکھ رکھاؤ کا کام کرتے رہے ہیں، جن کو ویسے یا تو جلایا جاتا ہے یا صنعتی ایندھن میں استعمال کیا جاتا ہے۔

کُپّ پرالی جلانے کا ماحولیات کے موافق متبادل بھی ہے، کیوں کہ یہ بیکار گیہوں کے ڈنٹھلوں کو دوبارہ استعمال میں لا کر انہیں چارے میں تبدیل کرتا ہے۔ یہ مکئی سے حاصل کردہ چارے کی ضرورت کو بھی کم کرتا ہے۔ چونکہ اسے باہر بنایا جاتا ہے، اس لیے چھوٹے گھروں میں رہنے کی جگہ بھی بچ جاتی ہے۔

وسط اپریل میں فصل کی کٹائی کو مہینہ گزر چکا ہے۔ سنہرے پیلے رنگ کے کھیت افق تک پھیلے ہوئے ہیں۔ صبح صبح رام داسیا سکھ برادری کی عورتوں کو فصل کی کٹائی کے بعد کھیتوں میں بچے ہوئے گیہوں چنتے دیکھا جا سکتا ہے۔ اپنے گھروں کے باہر وہ بھوسے سے اناج الگ کرنے کے لیے چھج لے کر بیٹھی ہیں۔ کبھی کبھی وہ اپنے گھروں کے پاس گاؤں کی سڑک پر ڈنٹھل ڈال دیتی ہیں، تاکہ گزرنے والی گاڑیوں سے سوکھے پودے کچل جائیں اور اناج الگ ہو جائیں۔ پڑھیں: ’اس گرمی میں چھج بیچنا مشکل ہے‘

یہ گرمیل کا ۲۰۲۵ کے سیزن کا پہلا کُپّ ہے۔

گرمیل کہتے ہیں، ’’ہم لکڑی کے کھونٹوں کو دائرہ کار شکل میں زمین میں ٹھونکتے ہیں، انہیں رسی سے باندھتے ہیں اور پھر اس میں توڑی ڈال دیتے ہیں۔‘‘ اس دائرہ کار شکل کا سائز اس بات پر منحصر ہوتا ہے کہ کتنا بھوسا جمع کرنا ہے۔ وہ کُپّ کو مضبوط بنانے اور اسے گرنے سے بچانے کے لیے خشک تمباکو کے پودوں کی ایک پرت بھی لگاتے ہیں۔ وہ بتاتے ہیں، ’’ہر کوئی ایسا نہیں کرتا۔ پہلے خشک کپاس کے پودے استعمال کیے جاتے تھے۔‘‘ مگر کیڑوں کے حملے کی وجہ سے کپاس کی کھیتی کم ہو گئی ہے، اس لیے وہ آسانی سے نہیں ملتے۔

یہ کُپّ زیادہ بڑا نہیں ہے اور اس میں تقریباً ۱۶ کوئنٹل اناج رکھا جا سکتا ہے۔ یہ اُس بھینس کے کھانے کے لیے کافی ہے جسے وہ گھر لانا چاہتے ہیں۔ جسوندر کہتی ہیں، ’’فیملی کے ذریعہ خریدے جانے والے سبز چارے کے ساتھ اسے ملا کر پورے سال چلایا جائے گا۔‘‘

اس میں گھر کے افراد کے شامل ہونے اور مدد کرنے کا وقت ہے۔ اس لیے گرمیل کام سونپتے ہیں۔

وہ توڑی کی پرت چڑھانے کے لیے دھان کی پرالی اکٹھا کرتے ہیں اور کہتے ہیں، ’’سوکھی، گیلیا نہیں [خشک، گیلی نہیں]۔‘‘

ان کی بات کو آگے بڑھاتے ہوئے جسوندر کہتی ہیں، ’’ہم تلی سے گیہوں کا بھوسا نکالیں گے اور ڈھیر کو دوبارہ پرالی سے ڈھانپ دیں گے۔ یہ آہستہ آہستہ نیچے چلا جائے گا۔‘‘

گرمیل آج بھی سارا کام ہاتھ سے کرتے ہیں اور کہتے ہیں کہ جب وہ نوجوان تھے، تب مشین کے استعمال کی بات تصور سے پرے تھی۔ سال ۱۹۸۰ کی دہائی میں مزید نو لوگوں کے ساتھ وہ پانچ ایکڑ سے حاصل کردہ گیہوں سے ۸۰ کوئنٹل توڑی رکھنے کے لیے ایک کُپّ بناتے تھے۔ وہ ایک دن میں دو کُپّ بناتے تھے اور انہیں ۵۰ روپے یومیہ مزدوری ملتی تھی۔

وہ یاد کرتے ہیں، ’’ہم دو دن لگاتار دن رات بغیر سوئے کام کرتے تھے۔ گر پڑتے، اٹھتے اور پھر سے کام کرتے۔‘‘

ان کی کرخت آواز صبح کی حبس بھری ہوا میں گونجتی ہے اور وہ رسیاں اور لکڑی کے کھونٹے سنبھال رہے اپنے بھتیجوں اور چچیرے بھائی کو ہدایت دیتے ہیں۔ ان میں سے سات مل کر کام کرتے ہیں اور توڑی لاتے ہیں اور پرالی بچھاتے ہیں۔ وہ رسیاں کستے ہیں، بڑھتے ڈھیر کے چاروں طرف چکّر لگاتے ہیں۔ جگسیر اوپر چڑھتے ہیں، پرالی کو برابر کر کے پھیلاتے ہیں اور اپنے پیروں سے ہموار کرتے ہیں۔

گرمیل صبح کو تقریباً ۱۰ بجے کام شروع ہونے کے دو گھنٹے بعد پکارتے ہیں، ’’کوئی چائے پانی تا پوچھ لو؟‘‘

جسوِندر اپنا کام روک کر سبھی کے لیے پانی لاتی ہیں۔ وہ گرمیل کی ۳۰ سالہ بہو سوما رانی کے ساتھ کام کرتے ہوئے پرالی اکٹھا کرنے اور توڑی کے گٹھر باندھنے کے درمیان ایک کے بعد ایک کام کر رہی ہیں۔ رام داسیا سکھ کنبوں میں پہلے عورتوں کا ایک ساتھ جمع ہو کر کُپّ بنانا عام بات تھی، جب کہ مرد اناج منڈی میں کام کرتے تھے۔

تقریباً ایک گھنٹہ بعد گرمیل پھر سے چائے مانگتے ہیں اور پاری کو بتاتے ہیں کہ چائے پانی مانگنا مزدور کا حق ہے۔ وہ مسکراتے ہوئے کہتے ہیں، ’’اے کُپّ بنن دا کام بے شرم ہو کر کرنا پیندا اے۔ [کُپّ بنانے کا یہ کام بے شرم ہو کر کرنا پڑتا ہے۔]‘‘

گھر کے لوگ انہیں پیار سے ’’میلا‘‘ کہتے ہیں، جس کا مطلب ہے صاف، کیوں کہ ’’او رونق لگا دیندا اے۔ [ان کے ہونے سے رونق رہتی ہے۔]‘‘ ان کا ۲۰ سال کا بھتیجہ شینٹی انہیں چِڑھاتا ہے: ’’آپ چائے مانگتے رہتے ہو مگر پیتے نہیں۔ اس نے تین بار چائے بنائی اور ہر بار ٹھنڈی ہو گئی۔‘‘

دوپہر تک چار گھنٹے کی محنت اور بارش کے ۳۰ منٹ کے بریک کے بعد کُپّ بن کر تیار ہو گیا ہے، ایک سنہرے کون کی طرح۔ پھر سبھی لوگ جسوندر کے گھر میں دن کا پہلا کھانا – روٹی، بھنڈی کی سبزی اور ٹماٹر کی چٹنی کھانے کے لیے اکٹھا ہوتے ہیں۔

وہ سایہ دار آنگن میں چارپائی پر بیٹھے ہیں۔ ان کے کپڑے اب بھی مشقت کی وجہ سے گرد آلود ہیں۔ گرمیل پاری کو بتاتے ہیں کہ یہ کفایتی ڈھانچہ، ’’بارش میں بھی کھڑا رہتا ہے، کیوں کہ اس کے چاروں طرف جمع پرالی پانی کو جذب کر لیتی ہے اور اندر کی توڑی پر اثر ڈالے بغیر سوکھ جاتی ہے۔‘‘

پسینے میں سرابور جگسیر نے گھنٹوں کُپّ کے اندر گزارے، اب بنا پلاسٹر والے کمرے میں ایک گھومتے ہوئے فرّاٹا (پیڈسٹل پنکھے) کے سامنے بیٹھے ہیں۔ وہ بتاتے ہیں، ’’کِتھے باہر توڑی ڈِگیگی، کِتھے توڑی نال کمرہ بھر دو [جب توڑی سے کمرہ آسانی سے بھر سکتا ہے، تو کھلے میں توڑی رکھنے کی کیا ضرورت ہے]؟‘‘

ان کا اشارہ یہ ہے کہ کئی مویشی پرور اب توڑی کو خالی کمروں میں رکھنا پسند کرتے ہیں۔ یہ سہولت آمیز اور موسم سے حفاظت کا متبادل ہے۔ کچھ لوگ اسے کھیتوں میں بڑے کالے پالی تھین بیگ میں رکھتے ہیں۔

لیکن اس فیملی کے پاس کوئی متبادل نہیں ہے۔ جگسیر کہتے ہیں، ’’ہمارے پاس اندر سامان رکھنے کی جگہ نہیں ہے۔ ہمارے تمام کمرے بھرے ہوئے ہیں۔‘‘ وہ اپنے دو کمروں والے پختہ مکان کا ذکر کرتے ہیں، جو حال ہی میں ساڑھے پانچ لاکھ روپے کے قرض سے بنا ہے۔

جگسیر کا بیٹا کرم پریت مزدور ہے اور موسم آنے پر توڑی ڈھونے کا کام کرتا ہے۔ وہ توڑی کاٹنے والی مشینیں چلانے والوں کے ساتھ کام کرتا ہے۔ وہ توڑی کو ٹریکٹر ٹرالیوں میں بھر کر گھروں میں رکھنے میں مدد کرتا ہے۔ اپنا کُپّ بھرنے کے لیے فیملی توڑنے کاٹنے کے عوض کچھ سو روپے ادا کرتی ہے اور کرم پریت اسے کھیت سے پلاٹ تک لے جاتا ہے، جس سے نقل و حمل کا خرچ بچ جاتا ہے۔

یہ بچت کارگر ہے، کیوں کہ فیملی کا خرچ صرف موسمی کام اور منریگا کے تحت کبھی کبھی ملنے والی مزدوری سے چلتا ہے۔ جگسیر لوہرا گاگا کی تھوک اناج منڈی میں مزدوری کرتے تھے، مگر بڑھتی عمر اور گھٹنوں کے درد نے انہیں کام چھوڑنے پر مجبور کر دیا۔ وہ کبھی کبھی منریگا کا کام کرتے ہیں یا یومیہ اجرت پر دھان روپتے ہیں۔ جسوندر بھی اپنی طویل علالت سے صحت یاب ہونے کے بعد دھان کی روپائی کرتی ہیں۔

پچھلی بار جب فیملی نے بھینس رکھی تھی، تو اس کی اچانک اور غیر متوقع موت ہو گئی تھی۔ یہ ۲۰۲۲ میں جلد کی بیماری پھیلنے کے دوران ہوا، جس نے ریاست میں تقریباً ۱۸۰۰ مویشیوں کی جان لے لی تھی۔

تب فیملی کے پاس ایک بھینس اور دو گائیں تھیں۔ جسوندر کی ساس گیج کور تقریباً ۶۰ سال کی ہیں۔ وہ پاری کو بتاتی ہیں کہ مذکورہ بیماری سے پہلے ہر گھر میں کم از کم دو تین جانور پالے جاتے تھے۔ بعد میں، انہوں نے بتایا، ’’کئی مر گئے اور کئی خوف کی وجہ سے فروخت کر دیے گئے۔‘‘

جگسیر مزید کہتے ہیں، ’’لوگوں نے ڈنگر [بیکار جانور] پالنے بند کر دیے ہیں کیوں کہ یہ بہت مہنگا ہو گیا ہے۔ جب جانور دودھ دے رہا ہوتا ہے، تو وہ اپنے چارے کا خرچ بھی نہیں نکال پاتا۔‘‘

مویشیوں کی ۲۰ویں گنتی (۲۰۱۸ سے ۲۰۱۹) کے مطابق، پنجاب میں ۲۵ لاکھ ۳۱ ہزار مویشی اور ۴۰ لاکھ ۱۵ ہزار بھینسیں تھیں۔ اکیسویں گنتی ۲۰۲۴ میں شروع ہوئی۔ اس میں صاف کمی دکھائی دیتی ہے، تقریباً ۱۰ فیصد کم مویشی اور بھینسیں۔

مویشیوں کی گھٹتی تعداد اور سستے چارے کے متبادل نے توڑی کی مانگ کم کر دی ہے۔ ڈاکٹر پرکاش برار کہتے ہیں، ’’توڑی کے سستے متبادل کے طور پر ڈیری والے مویشیوں کو دھان کا بھوسا کھلایا جا رہا ہے۔‘‘ لدھیانہ میں واقع گرو انگد دیو ویٹیرینری اینڈ اینیمل سائنسز یونیورسٹی میں توسیعی تعلیم کے ڈائرکٹر برار کہتے ہیں، ’’پیشہ ور ڈیریاں دودھ دینے والے مویشیوں کو کھلانے کے لیے مکئی سے حاصل کردہ چارہ استعمال کر رہی ہیں۔‘‘

جسوندر سبز چارے کا ذکر کرتے ہوئے کہتی ہیں، ’’پہلے ہم کم از کم کھیتوں یا اس کے کنارے سے ککھ کنڈے (گھاس کا حصہ) اکٹھا کر پاتے تھے۔ اب کسان اتنا (کیمیکل) چھڑکاؤ کرتے ہیں کہ کچھ نہیں بچتا۔ جن کے پاس زمین ہے وہ زمیندار ہمیں اپنی زمین پر سبز چارہ اُگانے کے لیے ۱۲۰۰ روپے کا سودا کرتے ہیں۔‘‘

مویشی کا مالکانہ حق رکھنے والے بے زمین خاندان عام طور پر زمینداروں کے ساتھ بٹائی دار کا انتظام کرتے ہیں۔ وہ تین مہینے کے لیے کرایے پر زمین کا ٹکڑا لے لیتے ہیں اور اس پر سال بھر چارہ اُگاتے ہیں۔ مگر اس سے زیادہ پیداوار نہیں ہوتی۔ انہوں نے پاری کو بتایا، ’’اکثر یہ صرف ۱۰ بنڈل ہی ہوتا ہے۔ ایک غریب آدمی باقی چارہ کہاں سے لائے گا؟ اس لیے غریبوں نے اپنے جانور چھوڑ دیے ہیں اور گاؤں کی ڈیری سے دودھ خریدتے ہیں۔‘‘

سائنس داں برار اس بات سے متفق ہیں کہ چھوٹے پیمانہ پر مویشی پروری میں محنت زیادہ ہے اور مالی اعتبار سے یہ کم کارگر ہے، کیوں کہ ’’منظم ڈیریاں سستا اور زیادہ سہولت آمیز دودھ مہیا کرا دیتی ہیں۔‘‘ چانگی والا گاؤں کی ایک مقامی ڈیری سے ایک لیٹر گائے کا دودھ ۴۰ روپے میں ملتا ہے، جب کہ بھینس کے دودھ کی قیمت ۶۰ روپے ہے۔ مقامی لوگوں کے مطابق، ڈیری یا پڑوس سے دودھ خریدنے پر بھی اتنا ہی خرچ آتا ہے۔

لیکن دودھ دینے والے جانور پالنے سے اصلی دودھ مل جاتا ہے۔ گرمیل کہتی ہیں، ’’ہم تو اپنی غذا سے ہی چل پاتے ہیں۔ مکھنی، مکھن اور گھی۔‘‘

فیملی نے ابھی تک بھینس خریدنے کے لیے تلاش شروع نہیں کی ہے، لیکن جسوندر کو یقین ہے کہ اس سے فرق پڑے گا۔ یہ دودھ نہ صرف ان کے کبڈی کھیلنے والے بیٹے کے لیے فائدہ بخش ہوگا، بلکہ ریلوے میکینک کے بطور تیار کرنے کے لیے بھی اسے تغذیت فراہم کرے گا۔ یہ نوکری فیملی کے لیے ایک مستقل آمدنی کے وعدہ کی طرح ہے۔

مضمون نگار اس اسٹوری تک پہنچنے میں ان کی میزبانی اور رہنمائی کے لیے کرشنا اور ان کے گھر والوں کا شکریہ ادا کرتی ہیں۔

یہ اسٹوری مرنالنی مکھرجی فاؤنڈیشن (ایم ایم ایف) کی فیلوشپ کی مدد سے کی گئی ہے۔

ترجمہ نگار: قمر صدیقی