कुप्प, भंइसी अऊ कबड्डी

अधिकतर परिवार पहिली मवेसी बिसो लेथें अऊ ओकर चारा के चिंता बाद मं करथें. फेर जसविंदर कौर अऊ ओकर घरवाला जगसीर सिंह येकर उलट करत हवंय.

वो मन अपन भइंसी के चारा राखे बर एक ठन कुप्प (खरही/ पैरागुड़ा कस) बनावत हवंय, जेन ला वो मन ये बखत बिसोय नइ सकत हवंय. वो मन येला येकर सेती घलो करत हवंय काबर के ये बछर तुड़ी (गहूँ कुट्टी) के दाम करीबन 75 फीसदी गिरगे हवय. साल 2024 मं एक क्विंटल तुड़ी 800 ले 1,000 रूपिया मं बेचावत रहिस; ये सीजन मं येकर दाम गिरके 200-250 रूपिया क्विंटल होगे हवय.

येकरे सेती ये जोड़ा ह सोचिस के मवेसी ला संगरूर जिला के चांगलीवाला गाँव मं अपन घर मं लाय के पहिली ओकर बर चारा बिसोके राख लेय बने होही.

परिवार ला उपराहा पोसन चाही – ओकर मन के 27 बछर के बेटा उभरत कबड्डी चैंपियन आय अऊ घर के भंइसी के एक गिलास गोरस काम के होही. 50 बछर के जसविंदर कहिथें, बढ़िया आहार, खासकरके हमर बेटा बर जेन ह गाँव मं कबड्डी खेलथे.” जोड़ा के दू झिन बेटी हवंय, एक के बिहाव होगे हवय अऊ दूरिहा मं रहिथे, दूसर 25 बछर के गगन, जेन ह एम.ए. कर ले हवय, अऊ कुछेक बछर पहिली अपन महतारी के बीमार परे के बाद ले घर संभाल हवय.

जब घर के लोगन मन कुप्प बनाय के फइसला करिन, त वो मन जसगीर के ममा गुरमेल सिंह ला बलाइन. 60 बछर के सियान माहिर कारीगर के अंदाजा हवय के वो ह बीते 40 बछर मं 2,000 ले जियादा कुप्प बनाय हवय. वो ह कहिथे, “गहूँ लुवई के बाद के महीना मं हमन हरेक दिन कम से कम दू ठन कुप्प बनावत रहेन.”

कुप्प, चारा/ कुट्टी राखे बर गोल ऊंच आकार के (पैरागुड़ा कस), कम खरचा वाले, कुछु दिन के ढांचा आय. कभू पंजाब के गाँव-देहात के जरूरी हिस्सा रहे कुप्प अब मुस्किल ले कोनो जगा देखे बर मिलथे. दिल्ली ले पंजाब के चांगलीवाला तक ले ट्रेन मं बइठे, मोला बनेच कम कुप्प देखे बर मिलिस.

गुरमैल बनाय के काम ला देखे बर तियार होगे, अऊ परिवार के कुप्प बन गे. 45 बछर ले जियादा के तजुरबा के संग – अधिकतर सिरी (कमिहा/ बंधुआ बनिहार) बनके – वो ह ये बूता ला बढ़िया ढंग ले जानथे. ये परिवार रामदासिया सिख समाज (पंजाब मं अनुसूचित जाति के रूप मं बांटे गे) ले हवय, जेन ला पारंपरिक रूप से गहूँ कुट्टी के जमाय के काम देय गे हवय, जेन ला नइ त जरा देय जाथे धन कल-कारखाना मन मं बारे के काम मं लाय जाथे.

कुप्प पराली (पैरा) जराय के जगा एक ठन पर्यावरन –मुताबिक उपाय घलो आय काबर के ये ह बेकार गहूँ कुट्टी ला चारा बना देथे. ये ह जोंधरा चारा ला कम करथे. काबर के येला बहिर बनाय जाथे, येकरे सेती ये ह छोटे घर मन के रहे के जगा ला घलो खाली राखथे.

बीच अप्रैल, फसल लुये के महीना भर बाद के बखत हवय. सुनहरा-पींयर रंग के खेत नजर आवत तक ले बगरे हवंय. बिहनिया-बिहनिया रामदसिया सिख समाज के माईलोगन मन गहूँ लुवाय खेत मं सीला बीनत हवंय. अपन घर के बहिर, वो मन अनाज ले भूसी निकारे बर छज (सुपा) धरे बइठे हवंय. कभू-कभू वो मन अपन घर के तीर के रोड मं गहूँ ढेंठा ला राख देथें, जेकर ले आवत-जावत गाड़ी कुचर देथें. पढ़व: लू के मार झेलत छज

ये ह गुरमेल के 2025 सीजन के पहिला कुप्प आय.

गुरमेल कहिथें, “ हमन लकरी के खूंटी मन ला भूंइय्या मं गोल घेर मं ठोंकथन, वोला रस्सी ले बांधथन अऊ ओकर बाद तुड़ी डार देथन.” गोल घेरा येकर उपर रहिथे के कतक भूसी/कुट्टी राखे ला हवय. वो ह कुप्प ला मजबूत बनाय अऊ धसके ले बचाय बर माखुर के सूक्खा काड़ी (कोरई) मन के एक धार घलो लगाथें. वो ह कहिथे, “हर कोनो अइसने नइ करय. पहिली, कपसा के कोरई बउरे जावत रहिस.” फेर कीरा लगे सेती कपसा के खेती कम होगे हवय, येकरे सेती ये ह सुभीता मं नइ मिलय.

ये कुप्प जियादा बड़े नइ ये अऊ ये मं करीबन 16 क्विंटल कुट्टी राखे जा सकथे, जेन ह एक ठन भंइसी बर अगर-उछर आय जेन ला वो ह घर मं लाय के बिचार करत हवंय. जसविंदर कहिथे, “ये ह हरियर चारा [जेन ला वो मन बिसोहीं] के संग मेंझार के बछर भर चलही.”

अब बखत आगे हवय के परिवार के जम्मो झिन ये मं मदद करेंय, गुरमैल काम बताय लागथे.

वो ह तुड़ी के परत बनाय बर धान के पैरा ला संकेलथे अऊ कहिथे, “सूखी, गीलीआ नाहीं [सूक्खा, ओद्दा पैरा नइ].”

जसविंदर आगू कहिथे, हमन तरी ले गहूँ के कुट्टी हेरबो अऊ ढेरी ला फिर ले पैरा ले तोप देबो. ये ह धीरे धीरे खाल्हे मं चले जाही.”

गुरमैल आज घलो हरेक काम अपन हाथ ले करथे, अऊ कहिथे के ओकर जवानी मं मसीन काम मं लाय ओकर बर सोच ले बहिर के बात रहिस. 1980 के दसक मं, नौ झिन आने लोगन मन के संग मिलके, वो ह पांच एकड़ गहूँ के 80 क्विटल तुड़ी राखे बर एक ठन कुप्प बनावत रहिस. वो ह दिन भर मं दू ठन कुप्प बनावत रहिस अऊ वोला 50 रूपिया रोजी मिलत रहिस.

कुप्प कारीगर सुरता करथे, “हमन दू दिन सरलग, दिन-रात, बगेर सुते काम करत रहेन. भसक जावय, उठावन अऊ फिर ले बूता करन.”

ओकर कड़क आवाज बिहनिया के उमसवाले हवा मं गूंजत हवय, रस्सी अऊ लकरी के खूँटी मन ला धरे अपन भतीजा अऊ चचेरा भाई ला काम ला बतावत हवय. वो मन ले सात झिन मिलके काम करत हवंय, तुड़ी लावत हवंय अऊ पैरा बिछावत हवंय. वो मन रस्सी ला कसत, आगू बढ़त ढेरी के चरों कोती किंजरत हवंय. जसगीर ऊपर चढ़थे, पैरा ला समान करके बगराथे, कलारी अऊ अपन गोड़ ले वोला खाल्हे कोती दबाथे.

“कोई चा-पानी तो पुछ लो [कोनो चाहा-पानी त पूछ लेय]?” गुरमैल बिहनिया करीबन 10 बजे ले अपन काम सुरु करे के करीबन दू घंटा बीते नारियाके कहिथे.

जसविंदर अपन काम रोकके सब्बो बर गिलास मं पानी लाथे. वो ह गुरमेल के 30 बछर के सुवारी सोमा रानी संग मिलके पैरा संकेले अऊ तूड़ी के बीड़ा बांधे के करत रहे हवय. रामदासिया सिख परिवार मं, एक जमान मं माईलोगन मन मिलके कुप्प बनावत रहिन, मरद लोगन मन अनाज मंडी मं हमाली करत रहिन.

करीबन घंटा भर बाद, गुरमैल एक पईंत अऊ चाय माँगथे अऊ पारी ला बताथे के चाय-पानी मांगे मजूर के हक आय. वो ह मुचमुचावत कहिथे, “एह कुप्प बनन दा काम बेशरम होके करना पेंद है [कुप्प बनाय के काम कठिन आय अऊ मांगे बर बेसरम होय ला परथे.”

घर के लोगन मन वोला मया ले ‘मेला’ कहिथें, जेकर मतलन आय मेला, काबर के “ओ रौनक लगा देता है [ ओकर आय ले रौनक छा जाथे.]” ओकर भतीजा, शेंटी जेन ह बीस बछर के हवय, वोला चिढ़ाथे: “तंय चाय मांगत रहिथस, फेर पियस नइ. वो ह तीन पईंत चाय बनवाय हवय, अऊ हरेक बेर जुड़ा जाथे.”

मंझनिया तक, चार घंटा के मिहनत अऊ आधा घंटा पानी गिरे सेती रुके के बाद, कुप्प बनके तियार हो जाथे – सुनहरा, उल्टा चाड़ी के आकार के. ओकर बाद सब्बो झिन जसविंदर के घर मं खाय बर जुरथें: चपाती (रोटी), रामकेलिया के साग अऊ पताल के चटनी.

खाय के बाद, परछी मं खटिया मं बइठे, ओकर कपड़ा अब तक ले पछीना–धूर्रा ले सनाय रहिस, गुरमैल ह पारी ला बताइस के कम खरचा के ये ढांचा, “बरसात बखत घलो बने रहिथे, काबर के येकर चरों डहर डारे पैरा पानी ला सोंख लेथे अऊ भीतर के तुड़ी ला कोनो नुकसान करे बगेर सूखा जाथे.

पछीना ले नुहाय जगसीर, जेन ह कतको घंटा कुप्प भीतरी बूता करे रहिस, ये बखत बिन पलस्तर वाले खोली मं फराटा (टेबल पंखा) के आगू बइठे हवय. वो ह कहिथे, “किथे बहार तूडी दिगेगी, किथे तुड़ी नाल कमरा भरदो [जब तुड़ी खोली मं भरे जा सकथे, त खुल्ला मं तुड़ी राखे के काय जरूरत]?”

वो ह ये डहर आरो करत हवय के कतको पशुपालक अब तुड़ी ला खाली खोली मं राखे पसंद करथें. ये सुभीता के अऊ बदरी-पानी ले घलो बचाथे; कुछु लोगन मन येला खेत मं बड़े-बड़े करिया पालीथीन बैग (पनपनी झिल्ली) मं भरके राखथें.

फेर ये परिवार करा कोनो आने उपाय नइ ये. जगसीर कहिथे, “हमर घर भीतरी समान राखे के जगा नइ ये. सब्बो खोली भरे हवय.” वो ह अपन दू खोली के पक्का घर के बता करत हवय, जेन ला हालेच मं 5.5 लाख रूपिया के करजा ले के बने हवय.

जगसीर के बेटा करमप्रीत, मजूर आय अऊ सीजन मं तूड़ी दोहारथे. वो ह तूड़ी कटेइय्या मशीन मालिक मन के संग बूता करथे. वो ह तूड़ी ला ट्रैक्टर-ट्राली मं भरके घर मं राखे के काम करथे. अपन कुप्प ला भरे बर, ये परिवार कुछु पइसा देथे, अऊ करमप्रीत वोला खेत ले प्लाट तक पहुँचाथे, जेकर ले लेगे के भाड़ा बांच जाथे.

ये बचत काम के आय काबर के घर के खरचा सीजन के काम बूता अऊ मनरेगा के कभू-कभार मिलेइय्या मजूरी ले चलथे. जगसीर लहरागागा के थोक अनाज मंडी मं हमाली करत रहिस, फेर बढ़त उमर अऊ माड़ी पीरा सेती वो ह ये बूता छोड़ दीस. वो ह कभू-कभार मनरेगा के बूता करते धन रोजी मं धान रोपा लगाय के. जसविंदर घलो अपन लंबा बीमारी ले उबरे के बाद धान के रोपा लगाथे.

बीते बखत जब ये परिवार ह भंइसी पोसे रहिस, त वो ह बेबखत अचानक मर गीस. ये ह साल 2022 मं गाँठ वाले चमड़ी के रोग लगे बखत होय रहिस, जेन ह राज भर मं करीबन 1,800 मवेसी मन के परान ले ले रहिस.

वो बखत, परिवार करा एक ठन भंइसी अऊ दू ठन गाय रहिस. जसविंदर के सास, गेज कौर, जेन ह करीबन साठ बछर के हवय, पारी ला बताइस के महामारी के पहिली, हर घर्मं कम से कम दू धन तीन मवेसी पोसे जावत रहिस. वो ह बताथे, “डेर्रा के कतको मर गीन अऊ कतको बेंचागे.”

जगसीर आगू बतावत कहिथे, “लोगन मन डांगर (ढोर/ मवेसी) पोसे बंद कर दे हवंय काबर के ये भारी महंगा होगे हवय. जब मवेसी दूध देय लागथे, त ओकर चारा के दाम घलो नइ निकरय.”

20 वीं पशुगणना (2018 ले 2019) मं पंजाब मं 25.31 लाख मवेसी अऊ 40.15 लाख भंइसी गिने गीस. साल 2024 मं सुरू होवेइय्या 21 वीं पशुगणना मं साफ गिरती नजर आवत हवय – करीबन 10 फीसदी कम मवेसी अऊ भंइसी.

घटत मवेसी दीगर सस्ता चारा सेती तूड़ी के लेवाली ला कम कर देय हवय. डॉ. प्रकाश बरार कहिथें, “तूड़ी के जगा सस्ता चारा के रूप मं दुधारू मवेसी मन ला धान के भूसी खवाय जावत हवय.” लुधियाना के गुरु अंगद देव पशु चिकित्सा अऊ पशु विज्ञान विश्वविद्यालय मं विस्तार शिक्षा निदेशक बरार कहिथें, “कारोबार करेइय्या डेयरी वाले मन मवेसी मन ला खवाय बर जोंधरा के चारा बऊरत हवंय.”

“पहिली, हमन कम से कम खेत धन पार ले काखकांडे (कांदी/घास) लू लेवत रहेन. फेर अब किसान अतक दवई (कीटनासक) छींचथें के कुछु घलो नइ बांचय: जसविंदर हरियर चारा के बात करत हवय. जमींदार, “जेन मन जमीन मालिक आंय, हमन ला अपन जमीन मं हरियर चारा लुये बर 1,200 तक ले ले लेथें.”

मवेसी पोसेइय्या भूमिहीन परिवार मन अक्सर जमींदार मन ले खेती करे बर करार करथें. वो मन तीन महीना बर कुछु खेत भाड़ा मं लेथें अऊ वो मं बछर भर बर चारा लगाथें. फेर येकर जियादा उपज नइ होवय. जियादा ले जियादा ये ह 10 बीड़ा भरेच होथे. अऊ चारा गरीब मनखे कहां ले लाही? ते पायके, गरीब परिवार मन मवेसी राखे छोड़ दे हवंय अऊ गाँव के डेयरी ले गोरस बिसोथें,” जगसीर ह पारी ला बताथे.

वैज्ञानिक बरार ये बात ले सहमत हवंय के छोटे पैमाना मं पशुपालन जियादा मिहनत के बूता अऊ पइसा घलो कम मिलथे काबर के “संगठित डेयरी वाले मन सस्ता अऊ जियादा सुभीता ले गोरस लाके देथें.” चांगीवाला गाँव के एक ठन डेयरी ले एक लीटर गाय के दूध 40 रूपिया मं मिलथे, फेर भंइसी के दूध के दाम 60 रूपिया हवय. इहाँ के बासिंदा मन के कहना आय के डेयरी धन परोसी ले दूध बिसोय ले इहीच दाम परथे.

फेर अपन घर के मवेसी रहे ले प्योर दूध मिलथे. गुरमैल कहिथे, “ हमर आहार हमर तकत बनाय राखथे: बनेच अकन लेवना अऊ घीव.”

परिवार के लोगन मन अब तक ले वो भंइसी खोजे नइ सके हवंय, जेन ला वो मन बिसोय चाहत हवंय, फेर जसविंदर ला भरोसा हवय के येकर ले कुछु फरक जरूर परही. ये गोरस न सिरिफ ओकर कबड्डी खेलेइय्या बेटा ला मजबूत बनाही, फेर रेलवे मं मैकेनिक के नऊकरी के तियारी करे बखत ताकत घलो दिही, ये नऊकरी मिले ले परिवार ला थिर आमदनी के आस हवय.

लेखिका कृष्णा अऊ ओकर परिवार ला पहुनई अऊ कहिनी के रद्दा बताय सेती आभार जतावत हवय.

ये कहिनी मृणालिनी मुखर्जी फाउंडेशन (एमएमएफ) के फेलोशिप के मदद ले लिखे गे हवय.

अनुवाद: निर्मल कुमार साहू