دیوتاؤں کا میلہ

کئی معنوں میں یہ غیبی مجلس ہے۔

نارائن پور میں ہر سال منعقد ہونے والے ماولی میلہ میں بستر خطہ کے کئی دیوی دیوتاؤں کی جھانکی لگتی ہے۔ یہ سالانہ مڑائی (دیوتاؤں کا اجتماع) نارائن پور ضلع کے نارائن پور شہر میں فصل کٹائی کے بعد منعقد کی جاتی ہے، جس اس علاقہ کی ۷۰۰ سال پرانی روایت ہے۔

چھتیس گڑھ کے بستر اور اس کے ارد گرد کے علاقوں سے کئی آدیواسی خاندان اور برادیاں اپنے اپنے دیوتاؤں کو لے کر آتی ہیں۔ ان کا یہ خوش نما سفر ناچتے اور گاتے مکمل ہوتا ہے، جن میں ابوجھماڑ سے لے کر کانکیر جیسے دور افتادہ علاقوں سے بھی کئی خاندان آتے ہیں۔

لوگ اپنے خاندانی دیوتاؤں کو اس مڑائی میں لاتے ہیں۔ یہاں کے آدیواسی اپنے آباء و اجداد کو بھی دیوتا مانتے ہیں، اور ماولی میلہ میں ایک خاندان کے دیوتا کی دوسرے خاندان کے دیوتا سے ملاقات ہوتی ہے۔ آدیواسی دیوتا بھی انسانوں کی طرح برتاؤ کرتے ہیں، اور ان کے بھی رشتہ دار ہوتے ہیں جو ایک دوسرے سے ملتے ہیں، گلے لگتے ہیں اور آپس میں مل کر جشن مناتے ہیں۔

نارائن پور میں رہنے والے ایک بزرگ وشوناتھ دیوانگن بتاتے ہیں، ’’یہ ہفتہ بھر چلنے والا میلہ ہے۔‘‘ وشوناتھ دیوانگن آدیواسی نہیں ہیں، لیکن ان کے جیسے بہت سارے غیر آدیواسی بھی اس میلہ کو دیکھنے آتے ہیں۔

یہ جشن ماولی ماتا کے میلہ سے شروع ہوتا ہے اور اس کے بعد آس پاس کے دیگر دیوتاؤں کی آمد ہوتی ہے۔ اسے بھی پڑھیں: گنگریل میں بے گھر کر دی گئی دیوی کا رقص

میں یہاں فروری کی ایک صبح پہنچا تھا۔ دن کافی گرم تھا۔ نارائن پور میں بازار کے پاس بنے عوامی میدانوں میں لوگوں کا مجمع تیزی سے اکٹھا ہو رہا تھا۔ ہزاروں لوگ بسوں، ٹیکسیوں سے آ رہے تھے۔ کئی لوگ وہاں کل سے لگاتار پیدل چلتے ہوئے پہنچے تھے۔ کئی لوگوں کے پیروں میں تو چپل بھی نہیں تھی۔

گاگرو لال، نارائن پور ضلع کے لال سُنار گاؤں سے آئے ہیں، اور عمر کی آٹھویں دہائی کو پار کر چکے ہیں۔ وہ موٹر گاڑی سے آئے ہیں۔ وہ مسکراتے ہوئے کہتے ہیں، ’’میں بوڑھا ہو گیا ہوں، اس لیے دیوتاؤں کو اٹھا کر چل نہیں سکتا۔ ہمارے نوجوان لڑکے دیوتا لے کر آئے ہیں۔‘‘ گاگرو لال، موریا گونڈ برادری سے تعلق رکھتے ہیں۔ بڑھاپے کی وجہ سے ان کے منہ میں تھوڑے ہی دانت بچے ہیں، ’’میری بیوی بھی بہت بوڑھی ہے، اس لیے وہ گھر پر رک گئی۔ یہاں نہیں آ پائی۔‘‘

دوپہر تک زیادہ تر خاندان اپنے دیوتاؤں کے ساتھ وہاں پہنچ چکے تھے جو اب ایک دوسرے سے مل رہے ہیں۔ کچھ لوگ دیوتاؤں کو پھول چڑھا رہے ہیں۔ کہا جاتا ہے کہ دیوتاؤں کو پھول کافی پسند ہیں!

بعد میں، نارائن پور کی گلیاں کسی رنگ برنگے منظر میں بدل جاتی ہیں جب دیوتاؤں کی جھانکی شہر کی مرکزی سڑک سے گزرتی ہے۔ لوگ راستہ کے دونوں جانب قطار میں کھڑے ہو کر دیوتاؤں کو پھول چڑھاتے ہیں اور پرارتھنا کرتے ہیں۔ اس کے بعد یہ جلوس شہر میں لگنے والے ہفتہ واری بازار کی طرف بڑھ جاتا ہے، جو اس جشن کا مرکز ہوتا ہے۔

ایک بزرگ گُمتی پجاری اپنی فیملی کے ساتھ میدان میں آرام کر رہی تھیں۔ انہوں نے بتایا، ’’پہلے ہم بیل گاڑیوں میں میلہ دیکھنے آتے تھے۔ میلہ پہلے بھی خوبصورت ہوتا تھا، اب بھی ہے۔‘‘

درختوں کے سایہ تلے دیوتاؤں کا مقام بنایا گیا ہے، جہاں میلہ کے دوران سبھی دیوتا آرام کرتے ہیں۔ آس پاس ٹینٹ لگے ہیں اور لوگ اجتماعی کھانے کی تیاری کر رہے ہیں۔ نقارہ، ڈھول، مہوری جیسے گونڈ آلات موسیقی کی آوازیں فضا میں گونج رہی ہیں۔ لال چینٹی کی چٹنی اور مقامی پھولوں سے بنے روایتی گونڈ کھانے فروخت ہو رہے ہیں۔ ساتھ ہی، آدیواسی پوشاک اور زیورات بھی بیچے جا رہے ہیں۔

گونڈوانا سماج اس میلہ کا اہتمام کرتا ہے اور گاؤں والوں کو میلہ سے ایک دن پہلے اپنے دیوی دیوتاؤں کے ساتھ آنے کی دعوت بھیجتا ہے۔ اس دوران ان کے کھانے پینے اور ٹھہرنے کا سبھی انتظام گونڈوانا سماج ہی کرتا ہے، جو گونڈ لوگوں کا ایک ثقافتی ادارہ ہے۔

بستر، آدیواسیوں کی اکثریت والا علاقہ ہے، جہاں کی ۷۶ فیصد آبادی گونڈ لوگوں کی ہے، جن میں ابوجھماڑیا، گونڈ، بھترا، موریا گونڈ، ہلبا، دھُروا جیسے کئی درج فہرست قبائل شامل ہیں۔ بستر اپنی بیش قیمتی اور زندہ آدیواسی ثقافت، مڑائی میلوں اور ہفتہ واری بازاروں کے لیے جانا جاتا ہے، جو یہاں کے جنگلات، زرعی ثقافت اور لوگوں کے معاش سے گہرائی سے جڑا ہے۔

میلہ کے پاس ہی ابوجھماڑ علاقہ ہے، جو برسوں سے ریاستی مسلح دستوں اور ماؤ نوازوں کے درمیان تصادم کا بڑا مرکز رہا ہے۔

’’پہلے کا دور کچھ اور تھا، اب کچھ اور ہے۔‘‘

گاگرو لال مزید کہتے ہیں، ’’اب تو لکھا پڑھی راج ہے۔‘‘ جب کہ پہلے آدیواسیوں کا راج تھا۔ ان کے کہنے کا مطلب تھا کہ کیسے غیر آدیواسی لوگ پڑھ لکھ کر سمجھ دار ہو گئے ہیں۔ وہ مسکراتے ہوئے کہتے ہیں، ’’ہم تو اَن پڑھ ہیں۔‘‘

میں نے ان سے پوچھا کہ کیا انہیں اور ان کی بیوی کو ریاست کی بڑھاپے کی پنشن ملتی ہے؟ اور اگر ہاں، تو کتنی؟

انہوں نے بتایا، ’’ہاں، مجھے اور میری بیوی، ہم دونوں کو ۳۵۰ روپے کی پنشن ملتی ہے۔‘‘

مگر اب تو پنشن ۵۰۰ روپے ہو گئی ہے!

جواب میں انہوں نے کہا، ’’میں تو سال میں ایک بار نکالتا ہوں، ابھی نکالا نہیں ہے، اس لیے پتہ نہیں۔‘‘

اس وقت تک جلوس نارائن پور کے ہفتہ واری بازار، یعنی میلہ کی جگہ پر پہنچ چکا ہے۔ بازار کا طواف کرنے میں اسے کچھ گھنٹے لگتے ہیں۔

ایک بزرگ عورت ویدبتی پٹیل اپنی بیٹی کے ساتھ میلہ دیکھنے آئی تھیں۔ وہ بتاتی ہیں، ’’موریا ناچ ہو رہا تھا اور مونجرا مانجھی ڈھول کی گڑم گڑم دُھن پر ناچ رہے تھے۔‘‘ وہ ہنستے ہوئے کہتی ہیں، ’’پہلے میلہ بہت اچھا ہوتا تھا! ہم جوان تھے اور پوری رات ناچتے تھے۔‘‘

نارائن پور میں رات بھر چلے ناچ گانے کے پروگرام کے بعد اب زیادہ تر لوگ سو چکے ہیں۔ لیکن ابوجھماڑ سے آئے کچھ نوجوان اب بھی ڈھول بجا رہے ہیں اور ناچ رہے ہیں۔

ترجمہ نگار: قمر صدیقی