नरायनपुर मं देंवता मन के भेंट-घाट

ये ह एक ठन देंवता मन के सभा आय. कतको नजरिया ले.

बस्तर इलाका के कतको देवी-देंवता बछर भर मं एक बेर नारायणपुर जिला मुख्यालय मं, मावलीमेला मं जुरथें. हरेक बछर मड़ई (देंवता मन के जुरे) फसल लुये के बाद होथे अऊ बताय जाथे के ये ह 700 बछर ले घलो जियादा जुन्ना आय.

छत्तीसगढ़ के बस्तर इलाका अऊ ओकर तीर तखार के इलाका मन ले देवी-देंवता मन ला अलग-अलग आदिवासी परिवार अऊ समाज सुदूर अबूझमाड़ (जिसे अबूजमाड़ अऊ अबूझमार घलो लिखे जाथे) ले लेके दूरिहा के कांकेर तक ले इहाँ लाथें अऊ लेके जाथें. वो मन के रवानगी अऊ अवई के परघनी गाजा-बाजा अऊ नाच के संग होथे.

ये मड़ई मं लोगन मन अपन कुलदेंवता मन ला लेके आथें. इहाँ के आदिवासी अपन पुरखा मन ले घलो अपन देंवता मानथें अऊ मावलीमेला मं एक परिवार के देंवता दूसर परिवार के देंवता मन ले भेंट करथें. आदिवासी मन के देंवता मइनखे मन कस मान बेवहार करथें, अपन नाता गोता के लोगन मन ले भेंट घाट करथें, जोहार-पैलगी करथें अऊ सब्बो मिलके तिहार मनाथें.

नरायनपुर के बासिंदा, गैर-आदिवासी, सियान विश्वनाथ देवांगन कहिथें, “ये ह हफ्ता भर तक ले चलेइय्या मेला आय.” कतको कई गैर-आदिवासी घलो ये मड़ई ला देखे बर आथें.

येकर सुरवात मावलीमाता [देवी माता] के मेला ले होथे अऊ ओकर बाद तीर- तखार के आने देवी-देंवता मन के आय ले होथे. येला घलो पढ़व: गंगरेल मड़ई मं जुरथें जम्मो देंवता

मंय माघ (फरवरी)के तिपत बिहनिया इहाँ हबरे हवं. नारायणपुर के बड़े अकन सार्वजिनक मैदान बजार तीर मं हवय अऊ तेजी ले भरत हवय. हजारों लोगन मन बस अऊ टेक्सी ले आवत हवंय अऊ कतको लोगन मन एक दिन पहिलीच ले अपन गाँव ले रेंगत इहाँ आवत हवंय. कतको लोगन मन जुच्छा गोड़ घलो हवंय.

गगरू लाल अस्सी बछर के हवंय अऊ नारायणपुर जिला के लालसुहनार गाँव के आंय. वो ह मोटर गाड़ी ले आय हवंय. मुरिया गोंड कहिथे, “मंय डोकरा सियान होगे हवं, ते पायके देंवता मन ला लेके रेंगे नइ सकंव. हमर छोटे लइका मन हमर कुलदेंवता ला लाये हवंय.” ओकर हँसी मं कुछु दांत मन झलक परथे, वो ह कहिथे, “मोर मंगलनीन चले फिरे नइ सकय, येकरे सेती वो ह घरेच मं हवय.”

मंझनिया तक ले अधिकतर परिवार अऊ वो मन के देंवता मन हबर चुके होथें अऊ एक-दूसर ले भेंट-घाट मं मगन हो जाथें. कुछेक लोगन मन देंवता ला फूल ले परघनी करत हवंय. कहे जाथे के देंवता मन ला फूल भारी भाथे!

बाद मं, नारायणपुर के गली मन आनी बानी के रंग के खेल तमाशा मं बदल जाही जब देव- देंवता मन के जुलूस शहर के मेन रोड ले होवत गुजरही. जइसने जुलूस हफ्ता बजार डहर जाय ला बढ़ही- जेन तिहार के माई ठीहा आय, लोगन मन कतार मं ठाढ़ होके पूजा-पाठ करहीं अऊ फूल चढ़ाहीं.

"पहिली हमन बइलागाड़ी मं मेला देखे ला जावत रहेन,” सियान हल्बा आदिवासी गुमटी पुजारी, जेन ह अब अपन परिवार के संग मैदान मं सुस्तावत हवय, मोला बताथे. वो ह कहिथे, “मेला हमेसा अचमित करेइय्या होथे, पहिली घलो अऊ आज घलो.”

देवस्थल (वो जगा जिहां ये तिहार बखत देवता एके संग आराम करथें) मं छांव वाले कतको जुन्ना रुख मं हवंय. तंबू ताने गे हवय अऊ लोगन मन रांधे मं लगे हवंय. नगाड़ा, ढोल अऊ महुरी (ताल बाजा) के संह संग फूंक बाजा ले गोंड संगीत के आवाज गूँजत हवय. गोंड लोगन मन के खायके जइसने माटा (चापड़ा) अऊ इहाँ के फूल ले बने व्यंजन बेंचे बर रखाय हवय.आदिवासी मन के जेवर अऊ देवी-देंवता मन ला चढ़ाय के सामान घलो बिकत हवय.

ये आयोजन गोंडवाना समाज डहर ले करे जाथे, जेन ह गाँव के लोगन मन ला वो मन के देवी-देंवता के संग नेवता देथे अऊ वो मन ले एक दिन पहिली आये के अरज करथे. खाय –पिये अऊ रहे के सब्बो बेवस्था गोंड समाज के सांस्कृतिक समाज, लोगन मन करथें.

बस्तर इलाका परमुख रूप ले आदिवासी बहुल इलाका आय – इहाँ के 76 फीसदी लोगन मन गोंड आंय, जेन मं जिनमें अबूझ मारिया गोंड, भतरा, मुरिया गोंड, हल्बा, धुरवा अऊ अनुसूचित जनजाति के रूप मं सूचीबद्ध आने समाज मन हवंय. बस्तर अपन पोठ अऊ जीवंत आदिवासी संस्कृति, मड़ई-मेला (देवी-देंवता मंन के मेला) अऊ हफ्ता मं भरेइय्या हाट (बजार) सेती जाने जाथे, जेन ह लोगन मन के जिनगी अऊ जीविका, तीर के जंगल अऊ खेती किसनी ले गहिर ले जुड़े हवय.

मेला के लकठाच मं अबूझमाड़ हवय, जेन ह कतको बछर ले, सरकार अऊ माओवादी के बीच मं लड़ई के सबले बड़े जगा रहे हवय.

“पहिली ये ह अलग रहिस अऊ अब ये ह अलग हवय.”

गुमटी पुजारी आगू बतावत जाथे के “अब लिखापढ़ी राज [पढ़े-लिखे लोगन मन के राज] हवय, फेर पहिली आदिवासी मन के राज रहिस. वो ह ये बात उपर जोर देवत रहिस के कइसने गैर-आदिवासी लोगन मन शिक्षित अऊ समझदार होगे हवंय. वो ह मुचमुचावत कहिथे,”हमन पढ़े-लिखे नो हन.”

मंय ओकर ले पूछेंय के काय वोला अऊ ओकर घरवाली ला सरकार के वृद्धावस्था पेंशन मिलथे, मिलथे त कतक?

वो ह बताइस, “हव, मोला अऊ मोर मंगलनीन ला 350-350 रूपिया पेंशन मिलथे.”

फेर अब पेंशन 500 रूपिया हवय!

ओकर जुवाब रहिस, “मंय बछर भर मं एक पईंत पइसा निकारत रहेंय, मंय अब तक ले पइसा नइ निकारे हवं, ते पायके मोला येकर कोनो जानकारी नइ ये.”

ये बखत तक ले जुलूस आयोजन के जगा - नरायनपुर के हफ्ता बजार- हबर चुके रइतिस. बजार के चक्कर लगाय मं जुलूस ला कुछु घंटा अऊ लाग जाथे.

अपन बेटी के संग मेला देखे आय एक झिन महतारी वेदबती पटेल सुरता करथे,”ढोल के गड़म गड़म धुन मं मुरिया नृत्य अऊ मुंजरा मांझी नाचत रहंय.” वो ह आगू बतावत जाथे, “पहिली मेला भारी सुग्घर लागय! हमन जवान रहेन अऊ रतिहा भर नाचे के मजा लेवत रहेन.”

नरायनपुर मं, रात भर नाचे-गाये के बाद, अधिकतर लोगन मन सुत चुके हवंय. फेर अबूझमाड़ के कुछु जवान लइका मन अभू घलो ढोल बजाय अऊ नाचे मं मगन हवंय.

अनुवाद: निर्मल कुमार साहू