बिनास के तिनकोना : बघवा, मनखे अऊ बिकास

मनोज चौधरी के संसार बिखरे मं कुछेक घड़ी लागिस.

चंद्रपुर गाँव के अपन घर मं 35 बछर के मनोज कहिथे. “मोर दाई अऊ मोर सुवारी मोर संसार रहिन अऊ अब मोर तीर सिरिफ दू झिन लइका बांचे हवय.”

“जब मोर महतारी अऊ सुवारी जंगल गे रहिन, वो बखत मंय अऊ मोर दूनों लइका सुतत रहेन.” कुछु घंटा बीते, 10 मई 2025 के दिन, ओ बछर के कांता बुधाजी चौधरी अऊ 30 बछर के शुभांगी, अपन गाँव ले डेढ़ कोस दूरिहा जंगल मं बघवा के हमला मं मारे गीन. ओकर परोसिन करीबन 50 बछर के सारिका शालिक शेंडे बघवा के तीसर शिकार रहिस.

तीनों माईलोगन मन दीगर लोगन मन के संग तेंदू पत्ता टोरे जंगल गे रहिन.

महाराष्ट्र के चंद्रपुर जिला के हजार ले जियादा आबादी वाले गाँव मेंढा (माल) मं गमी मं बूड़ गे. इहाँ के अधिकतर लोगन मन छोटे किसान धन मनोज जइसने भूमिहीन मजूर आंय, जेन मन सीजन के हिसाब ले राज भर मं धन देस भर के सहर मन मं काम करे चले जाथें. हरेक बछर फागुन, चइत अऊ बइसाख (मार्च,अप्रैल अऊ मई) मं, अपन आमदनी मं इजाफा करे जंगल ले तेंदू पत्ता टोरथें अऊ मऊहा बीनथें.

सिंदेवाही तहसील मं बसे ये गाँव ला सरकारी रिकार्ड मं मेंढामाल गुजारी के नांव ले दर्ज करे गे हवय, फेर गाँव के बहिर लगे एक ठन बोर्ड मं येला ‘मेंढा (माल)’ लिखाय हवय. ये ह ताडोबा अंधारी बघवा अभ्यारण्य (टीएटीआर) के तीर बसे हवय. जऊन ह 625 वर्ग किमी मं हवय अऊ आबादी वाले अभ्यारण्य के तीर करीबन 1,102 वर्ग किमी के बफर इलाका हवय.

वन विभाग के नवा आंकड़ा के मुताबिक, चंद्रपुर जिला मं 223 बघवा हवंय, जेन मं करीबन 120-125 बघवा टीएटीआर इलाका मं हवंय. गाँव के लोगन मन के मुताबिक, ये पहिली बेर रहिस जब मेंढा (माल) मं कोनो ला कोनो बघवा मारे रहिस.

गाँव के लोगन मन पुलिस अऊ जंगल के अफसर मन के हवाला देवत बताईन के तीन झिन माईलोगन ला एक झिन माई बघवा अऊ ओकर तीन ठन लइका मन मार डारिन.

अतक झिन के मरे ले हंगामा मच गे, कुछु बखत विरोध-प्रदर्सन होइस अऊ इहाँ के विधायक अऊ जिला के दीगर नेता मन मरे लोगन के परिवार ला अऊ गाँव के लोगन मन ला मनाय बर उहाँ रुके ला परिस.

मनोज 10 मई के बिहनिया ला सुरता करत कहिथे, जेकर चेहरा मं संदेहा, डर, रिस अऊ चिंता झलकत हवय. ओकर लइका मन नान-नान हवंय – शोहम 10 बछर के हे अऊ आराध्या 8 बछर के – अऊ वो मन अब बिन मह्तारी के बड़े होंही. वोला सुरता हवय के वो दिन बिहनिया के 11 बज चुके रहिस अऊ वो ह गाँव के तीर मं ईंटा भट्ठा रहिस जिहां मजूरी करथे, तभेच एक झिन रिस्तेदार आइस अऊ संसो करे लगिस. तीनों माईलोगन मं घर नइ लहूटे रहिन. वो मन अक्सर बिहनिया 9.30 बजे तक ले घर लहूट आवंय.

जब 12 बजे तक ले तीनों नजर नइ आइन, फेर आने माईलोगन मन अपन बखत मं घर लहूट आय रहिन, त मनोज अऊ ओकर संगवारी मन जंगल मं खोजे मं लाग गीन, फेर वो मन के कोनो सुराग नइ मिलिस. गाँव के लोगन मन तुरते वन विभाग ला खबर करिन; जंगल रेंजर अऊ गाँव के लोगन मन के टोली खोजे मं लाग गीन. आखिर मं, संझा करीबन 4 बजे खेत ले कुछेक दूरिहा जंगल मं वो मन के लाश मिलिस. माईलोगन मन 15 मीटर दूरिहा मं मरे परे रहिन, भारी जखम लगे रहिस; गाँव के लोगन मन के कहना आय के तीन ठन पीला समेत वो माई बघवा (बाघिन) के आगू सायदे वो मन लड़े सके होंही.

दूसर बिहनिया जम्मो गाँव अऊ तीर-तखार के लोगन मन माटी-काठी बर जुर गीन.

जून 2025 मं जब पारी ह जाय रहिस त गांव अभू घलो सदमा के हालत मं रहिस.

जब माइलोगन मन पाना टोरे मं लगे रहिन, त बाघिन ह पाछू ले हमला करे होही. वो मन के देह के कतको टुकड़ा होगे रहिस, अऊ गाँव के लोगन मन ला लगत रहिस के वो मन ला घेंच ला धरे गे रहिस, जइसने बघवा अपन शिकार ला धरथे. फेर जंगल अफसर मन के कहना आय के ये कोनो आदमखोर नइ रहिस. बाघिन ह अपन शिकार ला झाड़ी मं छोड़ के जंगल मं चले गीस. वन विभाग येला एक ठन अलहन बतावत हवय.

“वो बिहनिया मंय घलो होय सकत रहेंय,” 60 बछर के कांताबाई शेंडे कहिथे, अपन सहेली मन बर दुख जतावत हवय, फेर भगवान करिस के वो ह जींयत हवय. कांताबाई सारिका शेंडे के रिस्तेदार अऊ परोसी रहिन; शेंडे अऊ चौधरी दूनोंच ओकर परोस मं रहिथें. हरेक धूपकल्ला मं, वो मन संग मिलके तेंदूपत्ता टोरे जावत रहिन.

तेंदू (डायोस्पायरोस मेलानॉक्सिलोन) के पत्ता ले बीड़ी बनाय जाथे अऊ ये ह जंगल के तीर रहेइय्या गाँव के लोगन मन बर एक ठन तय आमदनी आय. कांताबाई कहिथे के ये घटना ह तेंदूपत्ता टोरई ला अचानक ले बंद कर दीस, जेकर सेती वोला अऊ दीगर लोगन मन ला पइसा के नुकसान उठाय ला परिस. डर अतक जियादा रहिस के कोनो घलो माईलोगन ह ओकर बाद कभू जंगल जाय के हिम्मत नइ करिस. वो ह मेंढा (माल) मं साल 2025 के तेंदू पत्ता टोरई के तीसर दिन रहिस.

वइसे टोरे के महिना फागुन ले बइसाख (मार्च ले मई) तक होथे, फेर टोरे के बखत हर गाँव मं अलग-अलग होथे अऊ केंदू छेपा ले पाना निकरत रहे तक ले चलत रहिथे. येकरे सेती, एक सीजन एक पाख ले लेके तीन महिना तक ले चल सकथे.

चंद्रपुर जिला मं फागुन ले बइसाख साल 2025 तक ले टीएटीआर (छोटे धन बड़े झाड़ जंगल) के अलग-अलग जगा मन मं बघवा अऊ चितरी बघवा (तेंदुआ) के हमला मं 24 झिन के मऊत दरज करे गे हवय. ये सबले सूक्खा अऊ गरम महिना होथे, जब गाँव के लोगन मन मऊहा बीने अऊ तेंदूपत्ता टोरे बर जंगल मं जाथें. इही वो बखत घलो होते जब बड़े शिकार करेइय्या जानवर खाय-पीये बर किंजरत रहिथें.

दाढ़ी वाले मनोज अपन सुवारी अऊ महतारी के फ़्रेम वाले फोटो धरे कहिथे, “हमन ला पता रहिस के जंगल मं बघवा हवंय – मंय कतको घटना घटे ला सुने रहेंय जेन मं बघवा के हमला मं लोगन मन के परान चले गे रहिस; हमर इलाका मं घलो बनेच अकन बघवा किंजरत हवंय. फेर हमन कभू सोचे नइ रहेन के हमन उपर अइसने बिपत आ परही.”

मेंढा (माल) ले करीबन 17 कोस दूरिहा (50 किमी), एक ठन दीगर घटना ला बतावत, 58 बछर के विलास जाम्भुले ह घलो कभू सोचे नइ रहिस के वो ह अपन भैय्या विनायक के अतक जल्दी काठी-माटी मं जाय ला परही.

ब्रह्मपुरी तहसील के चिचखेड़ा गाँव के पुलिस पाटिल विलास कहिथे,“जेन दिन वो ह गुजरगे, बिहनिया हमन येकर बात करत रहेन के मऊहा के ये सीजन कतक अलसाहा हवय.” (पुलिस पाटिल मतलब जइसने के कोटवार). वो ह कहिथे, वो ह मऊहा बीने बर निकरे रहिस अऊ कभू लहूट के नइ आइस.”

विलास किसान अऊ मऊहा कोचिया आय, जेन ह गाँव के लोगन मन के बीने मऊहा ला बिसोथे. मऊहा खाय, दवई अऊ मंद/दारु बनाय के काम आथे. वो ह बताथे के ओकर भाई, जेन ला 13 अप्रेल 2025 के दिन बघवा खा गे, दू एकड़ जमीन मं खेती करय अऊ घाम के बखत मं घर बर दू पइसा जोरे मऊहा बीने अऊ तेंदूपत्ता टोरय.

जाम्भुले कहिथे, “खेती मं कोनो आमदनी नइ ये,” अऊ खेती ला फायदा नइ होय के कतको कारन गिनाय लगथे: कम उपज, बढ़त लागत, कम दाम अऊ कोनो उपराहा आमदनी नइ. वो ह कहिथे, ये (मऊहा अऊ तेंदूपत्ता) एक परिवार ला दू महिना मं कम से कम 25,000-30,000 रूपिया के आमदनी दे देथे.

गुजरे विनायक 60 बछर के रहिस; ओकर परिवार मं ओकर सुवारी बच्छला अऊ बेटा आशीष हवंय, जेन ला वन विभाग ले 10 लाख रूपिया के मुआवजा मिले रहिस. बच्छला कहिथे, “येकर ले मोर घरवाला लहूट नइ आवय.”

जाम्भुले मन, माना समाज के आंय, जेन ह अनुसूचित जनजाति (एसटी) आय अऊ चिचखेड़ा गाँव मं येकर दबदबा हवय. गाँव के अधिकतर लोगन मन छोटे अऊ सीमांत किसान आंय जेन मन घाम के सीजन मं जीविका बर गैर-लकरी वन उपज (एनटीएफपी) के भरोसे रहिथें.

जाम्भूले के गुजरे के बाद ले दीगर गाँव वाले मन के मन मं डर बस गे हे : वो मन मऊहा अऊ तेंदू बर जंगल जाय बंद कर दे हवंय,अऊ सीजन उहिंचे सिरागे: विलास बताथे के ये बछर हरेक परिवार ला 25,000 रूपिया के नुकसान होइस. वोला घलो नुकसान होवत हे, काबर के वो उपज संकेल के बेपारी ला देय नइ सकिस.

वइसे मवेसी के मारे जाय आम बात आय, फेर चिचखेड़ा मं पहिली घलो बघवा ह दू झिन ला मार डारे चुके हवय.

ये गाँव ले जियादा दूरिहा मं नइ, चिचखेड़ा पंचायत के एक ठन नान कन बस्ती पाथरी हवय, जिहां करीबन हरेक परिवार फागुन-चइत-बइसाख महिना मं मऊहा अऊ तेंदू टोरथे. ये बछर, कतको परिवार मन छोड़ दे हवंय. बीते कार्तिक (नवंबर) मं, 60 बछर के दलित किसान चंद्रभान लोखंडे के अपन घर ले सिरिफ डेढ़ कोस दूरिहा एक ठन खेत मं बघवा के हमला मं परान चले गीस.

ओकर बेटी माया सुरता करत कहिथे, “वो मंझनिया हमर मवेसी मन ला चारा देय बर गे रहिस.” ओकर दाई शांताबाई भिथि मं टंगाय अपन घरवाला के फ्रेम चढ़े फोटू ला कलेचुप देखत रहिस. वो ह कहिथे, उहाँ ओकर उपर हमला होय रहिस. हमर संग ये अलहन होय के बाद ले हमन ये बछर जंगल नइ जाय सकेन.” हरेक बछर, परिवार ला मऊहा बीने अऊ तेंदू पत्ता टोरई मं 25-25 हजार के कमई होवत रहिस. वो ह बतावत जाथे के ये भारी नुकसान आय.

ताडोबा जंगल के दक्खिन अऊ बूड़ति सरहद ले लगे ये इलाका के जीविका बिपत मं हवय, लकठा के मेड़की गाँव (जेन ला साल 2011 के जनगणना मं मेडकी के रूप मं सूचीबद्ध करे गे हे) के एक झिन समाजिक कार्यकर्ता सुधाकर महाडोरे बताथें. वो ह वन अधिकार अऊ जीविका उपर केन्द्रित संगठन, ‘अक्षय सेवा संस्था’ चलाथें.

वो मन के जीविका अइसने चलथे : लोगन मन असाढ़ ले भादों (जुलाई ले सितंबर) तक खेती करथें; ओकर बाद भादों ले अग्घन धन फागुन (सितंबर ले दिसंबर धन मार्च) तक बहिर चले जाथें; जेकर करा पानी के सुविधा हवय, वो मन गाँव लहूट आथें अऊ अग्घन ले आधा फागुन (दिसंबर ले आधा मार्च) तक ले जड़कल्ला के फसल कमाथें. अऊ बीच फागुन ले बीच जेठ (जून) तक ले मऊहा अऊ तेंदू पत्ता समेत कतको किसिम के जंगल के उपज संकेलथें. अधिकतर लोगन मन बछर भर मं सिरिफ धान कमाथें.

अब, जानवर मन के हमला सेती वो मन के उपज खतरा मं परे हवय; अऊ लोगन मन बछर भर बड़े सिकार करेइय्या जानवर –बघवा अऊ चितरी बघवा – के डर ले हलाकान हवंय. महाडोर कहिथें, “ये बछर जइसने, सरलग मइनखे मन के परान जाय के घटना सेती, कतको लोगन मन जंगल मं नइ जाके अपन आमदनी के नुकसान उठाय हवंय.” एकरे सेती खेती के सीजन के तियारी बर महाजन मन के करजा के भरोसे होवत जावत हवंय. “नइ त, घाम के बखत के कमई ले वो मन ला खेती बर खातू-दवई बिसोय मं मदद मिलथे.”

महाडोर कहिथे के ये डर ह ये इलाका मं बनिहार-भुतियार मिले उपर घलो असर डारे हवय. वो ह सवाल करत कहिथे, “जब माइलोगन धन मरद लोगन मन ला पता हवत के ये ह खतरा ले भरे आय, त वो मन बनिहारी काबर करहीं?” वो ह कहिथे, “खेत अऊ जंगल अतक लगे हवंय के कोनो ला कभू पता नइ चलय के बछर भर कोनो बखत कोनो बघवा तीर मं घात लगाके बइठे हवय धन नइ.”

महाराष्ट्र के उत्ती विदर्भ इलाका के चंद्रपुर जिला खूनी अऊ बढ़त जावत मइनखे-बघवा मं आमना-सामना होय के ठीहा बने हवय. चंद्रपुर जिला के मुख्य वन संरक्षक (क्षेत्रीय) के आफिस ले मिले आँकड़ा के मुताबिक, बीते बीस बछर मं इहाँ बघवा धन चितरी बघवा के हमला मन मं करीबन 2,000 लोगन मन के परान गीस, अऊ कतको दीगर जंगली जानवर मन के हमला मं भारी जख्मी होय हवंय. पढ़व: ये ह नवा किसिम के अकाल आय

आंकड़ा मन ले पता चलथे के पूस (जनवरी) 2021 ले बघवा अऊ चितरी बघवा के हमला मन मं 175 लोगन मन मारे जा चुके हवंय

दू ठन बड़े काम के तरीका येला भड़कावत हवंय. एक कोती, बड़े बुनियादी ढाँचागत अऊ विकास परियोजना मन जंगल के कारीडोर ला टोरत हवंय अऊ जंगली जीव-जन्तु के ठीहा मन ला घलो ; दूसर कोती, छोटे अऊ सीमांत किसान मन भारी आर्थिक रूप ले हतास होवत जावत हवंय, जेकर सेती वो मन के जंगल भरोसे जीविका उपर आसरा बढ़त जावत हवय.

फेर धूपकल्ला मं आमना-सामना होय के घटना बाढ़ जाथे, काबर के वो बखत लोगन मन बघवा मन के ठीहा मं चले जाथे, उहिंचे जंगली चरेइय्या जानवर मन के सेती किसान मन ला बछर भर फसल के अऊ मवेसी के भारी नुकसान घलो उठाय ला परथे.

मेंढा (माल) गाँव चौड़ा अऊ नवा बने नागभीड-सिंदेवाही रोड मं बसे हवय, जेन ह टीएटीआर के सरहद ले कुछेक कोस दक्खिन मं हवय अऊ रिजर्व ले बघवा मन के बगरे बर एक ठन बड़े कारीडोर के हिस्साआय. ये दूनों तहसील, ब्रम्हपुरी और मुल-सावली के संग मिलके, जिला के सबले खराब ढंग ले असर वाले तहसील आंय, जिहां घन आबादी वाले बस्ती अऊ खेत हवंय, जेन ह चंद्रपुर के चिन्हारी आय. ये तहसील टीएटीआर के दक्खिन अऊ दक्खिन-बूड़ति दिग मं बसे हवंय, अऊ बड़े परियोजना के बोझा नइ ये, जेन ह बघवा अऊ चितरी बघवा मन के बूड़ति, भंडार अऊ इहाँ तक ले दक्खिन-बूड़ति दिग के हिस्सा मं बगरे ला बनेच ढंग ले रोके अऊ खतरा मं डार दे हवय.

साल 2018 मं भारतीय वन्यजीव संस्थान के करे गे एक ठन अध्ययन ले बड़े ढंग ले आरो मिलथे के महाराष्ट्र के उत्ती विदर्भ के जंगल के इलाका, जेन मं टीएटीआर के इलाका घलो सामिल हवय, टूटत जंगल मन के एक ठन कड़ी आय जेन मं जंगली जीव-जन्तु के कारीडोर टूटे हवंय. रिपोर्ट मं नक्सा के मदद ले बताय गे हवय के रिजर्व जंगल के एरिया के बहिर के जंगल रकबा अऊ बढ़िया गुन ले कमतियात जावत हे, जेकर बड़े कारन कतको बुनियादी ढाँचा परियोजना, रोड अऊ सरलग बढ़त लोगन मन के बस्ती बसे आय.

पर्यावरन अऊ राजनीतिक कार्यकर्ता अऊ सेवा भावी संस्था इको-प्रो के संस्थापक बंडू धोत्रे कहिथें के जिला के पर्यावरन तंत्र के हालत खस्ता हवय अऊ संरक्षित अऊ क्षेत्रीय दूनों किसिम के जंगल के इलाका के लकठा मं रहेइय्या सबले कमजोर समाज बर येकर नतीजा बिनास वाले होवत हवंय. धोत्रे कतको बछर ले ये बिपत उपर नजर राखत हवंय अऊ कहिथें के ये ह अऊ घलो बिकट होवेइय्या हे.

बहस मन मं एक ठन बड़े बात जेन ला अक्सर नजर अंदाज करे देय जाथे, वो आय ये इलाका मं सरलग बढ़त नवा खदान- खास करके टीएटीआर के बूड़ति हिस्सा डहर, जेन ला वर्धा घाटी कहे जाथे.

कोयला अऊ चूना पथरा अऊ लौह अयस्क समेत दीगर कतको खनिज ले भरपूर चंद्रपुर जिला मं 30 ले जियादा कोयला खदान हवंय, जेकर संचालन खासकरके वेस्टर्न कोल-फील्ड्स लिमिटेड (डब्ल्यूसीएल) ह करत हवय. वारोरा, राजुरा, बल्लारपुर अऊ घुग्घुस तहसील मं ये खदान हवंय. येकर छोड़, नवा निजी खुला खदान, आधा दर्जन सीमेंट कारखाना, एक ठन लोहा कारखाना, वाशरी, राख के ढेरी अऊ घलो बनेच कुछु हवंय. येकर ले पर्यवरन तंत्र अऊ आर्थिक तबाही के एक ठन बड़े अकन खतरा पैदा हो जाथे.

टीएटीआर के दक्खिन-बूड़ति किनारा मं बसे भटाड़ी गाँव मं, जेन ह बघवा अभयारण्य मं जाय के मूल जगा मोहरली नांव के गाँव ले कुछेक कोस दूरिहा मं हवय, कतको नवा कोयला खदान हवंय. अऊ लोगन मन पर्यावरन अऊ वन मंज़ूरी सेती घलो दुवाब बनावत हवंय.

वेस्टर्न कोलफील्ड्स लिमिटेड (डब्ल्यूसीएल) डहर ले संचालित भटाड़ी खदान मन, बड़े बड़े खंचवा आय, जेन ह कभू बघवा मन के माई ठीहा रहिस ये इलाका ला रातोंरात धूर्रा अऊ कोयला के समुंदर कस चुंवा बना दे गीस. खंचवा मन के तीर मं खड़े होके, ताडोबा के जुन्ना रुख-रई के मनभावन नजारा ला देखे जा सकथे.

ये रिपोर्टर चंद्रपुर मं पले-बढ़े हवय; 1980 के दसक मं शहर ला घेरे मिंझरे अऊ पतझड़ जंगल अब मजूर मन के बढ़त भीड़ भड़क्का वाले बस्ती, चरों कोती कचरा के ढेरी, कतको बड़े-बड़े ट्रक के आवाजाही चिक्कन लाल रोड मं लुका जाथें. तुंहर घलो नजर परे बिना रहे सकय के रोड किनारा मं लगे रूख मन मं लाल धूर्रा के परत चढ़ गे हवय. इहाँ तक के चंद्रपुर सुपर थर्मल पावर स्टेशन (सीएसटीपीएस)के बड़े अकन अहाता घलो- जेन ह करीबन 3,000 मेगावाट वाले महाराष्ट्र के सबले बड़े अहाता वाले आय – आज शहर के एक ठन हिस्सा आय, अऊ ये जगा मं कतको बघवा रहिथें, काबर के ये थर्मल प्लांट टीएटीआर इलाका मं आथे.

धोत्रे कहिथे, “एक ह एक ठन गड़बड़ी आय.” ओकर मानना ​​आय के हाल के बदलाव मन के सेती बघवा मन के बेवहार मं कतको बदलाव आवत हवंय. “बघवा मन के नवा पीढ़ी जंगल मं नइ, लोगन मन के बस्ती के बीच मं पलत हवय,” वो ह कहिथें. “ये ह कंक्रीट, कोयला अऊ धूर्रा के जंगल आय.”

जंगल ले भरे जिला के चरों डहर के रोड मन ला अइसने चाकर/चऊड़ा करे गे हवय के न सिरिफ बघवा मन के आवाजाही, फेर वो मन के चारा के आवाजाही घलो खराब ढंग ले अड़ंगा डारे हवय. ये बखत बनत गोसीखुर्द सिंचाई परियोजना के एक ठन बड़े जउनि पार के नहर ह ये नजारा ला अऊ घलो जियादा नुकसान पहुंचाय हवय. येकर छोड़, चंद्रपुर-गोंदिया नैरो गेज पटरी ला ब्रॉड गेज मं बदले ले, जेन ह घन जंगल अऊ बघवा मन के ठीहा ले होवत गुजरते, जंगली जीव-जन्तु मन के आवाजाही मं अऊ घलो असर डारे हवय. धोत्रे कहिथे के ये पटरी मं आके कतको बघवा ट्रेन के आगू आके मर चुके हवंय.

चंद्रपुर के बाघवा मन के उपर ये विकास काम के उल्टा असर परत हवय- कतको बघवा, ओकर पीला अऊ चितरी बघवा मन ला खतरा वाले जानवर के रूप मं मानके मार देय जाथे धन वो मन ट्रेन के आगू जान गंवा देथें. इहीच बखत, खदान अऊ दीगर कंपनी मन हरेक दिन अपन जगा बनावत हवंय. अध्ययन ले पता चलथे के ये ह देस भर मं प्रबंधन के समस्या आय, खासकरके बड़े बघवा अभयारण्य मन के तीर-तखार मं.

चंद्रपुर जिला के मुख्य वन संरक्षक (क्षेत्रीय) जितेंद्र रामगांवकर कहिथें, “ ये ह जुन्नाच समस्या के बढ़े रूप आय.” वइसे लोगन मन के जीविका सेती जरूरी बिकास धन बुनियादी ढांचा ला नजरअंदाज नइ करे जाय सकाय , फेर वो मन के कहना आय के जरूरी ये आय के संतुलन कइसने बनाय जाय. “ ये ह दुनिया भर मं एक ठन असमंजस आय.” ओकर बाद घलो, वो ह कहिथें के जानवर मन के हमला –बघवा, तेंदुआ धन दीगर जंगली जानवर – मं लोगन मन के परान जाय के आंकड़ा कतको उपाय के बाद कम होवत जावत हे, जेन मं परिवार ला रसोई गैस देय ले लेके जलावन लकरी के भरोसे नइ रहे अऊ सौर बाड़ा लगाय तक ले सामिल हवय.

विभाग के अनुमान के मुताबिक, चंद्रपुर मं कुल मिलाके करीबन 250 बघवा हवंय, जेन मं टीएटीआर के भीतरी के बघवा घलो सामिल हवय – ये इलाका बर ये ह एक ठन अचमित करेइय्या आंकड़ा आय, उत्ती के हिस्सा (ब्रम्हपुरी, नागभीड़) अऊ दक्खिन के हिस्सा (सिंदेवाही, सावली धन मूल) के इलाका के जंगल बघवा मन के आबादी ले भरे हवंय जेन मं टूटत जंगल मन ला अपन नवा ठीहा बनावत हवंय.

रामगांवकर कहिथे, “टीएटीआर मं बघवा मन के आबादी घना हो चुके हवय, अऊ बघवा मन इहाँ के दीगर इलाका मं बगरत जावत हवंय. ये ह एक ठन बिकट समस्या आय: एक कोती, लोगन मन के आबादी बढ़त हवय, अऊ दूसर कोती, बघवा अऊ दीगर शिकार करेइय्या जानवर मन के आबादी घलो बढ़त हवय. करीबन 1,102 वर्ग किमी के कोर अऊ बफर इलाका मं घलो इहीच हालत हवय.

रामगांवकर कहिथे, “ये बछर घलो अधिकतर मऊत जंगल के भीतरीच होय हवंय.” वइसे विभाग धन जानवर ला दोस देय आसान आय फेर वो ह कहिथे के असल बात ये आय के बदकिस्मती अऊ टाले जवेइय्या अलहन वो बखत होथें जब लोगन मन नियम ला टोरत जंगल भीतरी खुसर जाथें.

सबले पहिली बात, वो मन ला कभू छोटे टोली धन अकेल्ला जाय ला नइ चाही; दूसर, विभाग ह लोगन मन ले बिनती करत हवय के वो मन बिहनिय- बिहनिया झन जायें, जब बड़े शिकार करेइय्या जानवर शिकार खोजत रहिथें. रामगांवकर कहिथे, “लोगन मन ला पता रहिस के वो मन के तीर तखार मं एक ठन बाघिन अपन तीन ठन लइका के संग किंजरत हवय. गर वो मन उहाँ जाय नइ रइतीन, खासकरके बिहनिया मं, त ये अलहन मन ला रोके जा सकत रहिस.”

वइसे, महारष्ट्र के गाँव-देहात के इलाका मं आर्थिक बदहाली बढ़त हवय अऊ ये जिला घलो येकर ले बांचे नइ ये. मइनखे-बघवा मं ठन जाय ह ये बिपत ला अऊ बढ़ा देथे. बरहा, हिरन अऊ नीलगाय जइसने चरेइय्या जानवर मन के सरलग हमला खेती-किसानी मं बाधा बन जाथे अऊ बछर भर के फसल के उपज उपर घलो असर डारथें.

वो ह बताथे के जिला मं गाँव-देहात के 35,000 ले परिवार – न सिरिफ टीएटीआर इलाका मं – मऊहा बीने अऊ तेंदूपत्ता टोरे मं लगे हवंय.

विभाग ह ठेकेदार ला जंगल के इलाका देथे ; ठेकेदार पत्ता टोरे बर इहाँ के लोगन मन ला काम मं राखथे; ओकर बाद काम ला आगू बढ़ाय मं कोंचिया धन गाँव के बेपारी मन लग जाथें. खतरा ठेकेदार नइ उठावय, टोरेइय्या मन उठाथें. कुल मिलाके ये कारोबार सैकड़ों करोड़ रूपिया के आय.

अर्थशास्त्री अऊ राज के गाँव के गरीबी अऊ अभाव उपर हालेच मं लिखे गे एक ठन किताब के लेखक नीरज हाटेकर कहिथें, “लोगन मन ला महाराष्ट्र के शहर धन देहात मं कोनो बने रोजगार मिलत नइ ये. येकरे सेती वो मन जंगल अऊ प्राकृतिक संसाधन मन के दोहन समेत हर वो चीज के भरोसे हवंय जेकर ले वो मन ला कमई होय.” वो ह कहिथे के बूड़ति घाट के गाँव मन मं घलो येकर आसरा बढ़त हवय;

हाटेकर ह बीते बछर फ्रंटलाइन पत्रिका मं लिखे रहिस, “महाराष्ट्र के अर्थव्यवस्था राज मन मं सबले बड़े बने हवय, फेर गाँव के इलाका मन मं थिर रोजगार, रोजगार के कमी अऊ अमीर अऊ गरीब जिला मं भारी फेरफार, ले जूझे ला परत हवय.”

अध्ययन ले पता चला हवय के चंद्रपुर राज के सबले गरीब जिला मन ले नो हे, फेर गाँव-देहात के इलाका मं थिर आमदनी नइ होय अऊ किसान मन के बदहाली ओतक खराब नइ ये. येकर कारन ये आय के जिला मं कतको खदान अऊ कल-कारखान हवंय, फेर इहाँ के बड़े आबादी येकर कोनो मं घलो भागीदार नइ ये.

मेंढा (माल) मं, दूनों दुखियारी परिवार एक ठन पूजा के तियारी करत हवंय. ये रिपोर्टर ह 14 जून 2025 के एक दिन पहिली ये गाँव गेय रहिस. गाँव वाले मन येला वाघई देवी शांति कहिथें - वाघई बाघिन देवी आय, हो सकत हे ओकर कोप लगे होय अऊ लोगन मन के सुरच्छा सेती वोल मनाय जरूरी आय.

परोसी अऊ नाता-गोता के लोगन मन जम्मो गाँव ला भंडारा देय बर रांधे मं लगे हवय. कतको माईलोगन मन काम बाँट लेय हें –कुछेक मन साग-भाजी निमारत अऊ काटत हवंय, कुछेक मन चऊर, जेन ह इहाँ के माई फसल आय, निमारत अऊ धोवत हवंय; कुछू मन रोटी बनाय बर गहूँ के पीसान ला गूँथत हवंय.

कांताबाई ह पारी ला बताइस के ये पूजा 13 दिन चलेइय्या श्राद्ध पूजा ले अलग आय, जब वो दुखियारी शेंडे परिवार के दुवार मं बइठे गहूँ आटा के गोल लोइ बनावत रहिस. वो ह कहिथे, “ये ह वाघई देवी के शांति बर आय जेकर ले वो ह कोनो आन ला फिर कभू बिपत झन पहुँचाय.” अऊ गुजरे माईलोगन मन ला श्रद्धांजलि देय सेती घलो आय, वो ह बतावत जाथे.

मुस्किल ले कुछु फर्लांग दूरिहा, गाँव के लोगन मन बरार करके मेंढा (माल) अऊ चारगाँव (वड़गे) गाँव के दूबटिहा करा झाड़ीदार जंगल के बीच, दू ठन अलग-अलग सीमेंट ले बने चौरा मं एक मं बाघिन अऊ ओकर लइका मन के मूर्ति स्थापित करे हवंय. ये ह बाघिन बर एक ठन श्रद्धांजलि आय, भलेच वो ह जानलेवा बाघिन होय. चंद्रपुर मं अइसने कतको वाघई मंदिर हवंय, इहाँ के कतको लोककथा मुताबिक, गर कोनो बाघिन रीस मं हवय अऊ वो ह कोनो मइनखे ला नुकसान पहुंचाय हवय, त वोला शांत करे बर पूजा करे ला चाही.

मेंढा (माल) ला अब तक ले येकर जरूरत नइ परे रहिस.

अतक सारा उपद्रव के बीच, एक ठन दुब्भर कहिनी बच निकरे के घलो आय.

जऊन दिन मेंढा (माल) मं तीन झिन माइलोगन मन मारे गीन, करीबन उहिच बखत, चारगांव (वड़गे) गाँव के तीर के जंगल के इलाका मं तेंदूपत्ता टोरे बर गेय किसानिन वंदना विनायक गजभिये उपर बघवा ह हमला कर दीस. ओकर किस्मत रहिस के वो ह बांच गीस.

“वो ह एक ठन एंर्रा बघवा रहिस,” 50 बछर के वंदना कहिथे, अऊ वो बखत ला सुरता करथे जेन ह वोला मऊत ले छीन लीस. वो ह सुरता करथे, “ये मोर टोली के दीगर माईलोगन मन के सेती रहिस, जेन मन ये देखतेच नरियाय अऊ हल्ला करे सुरु कर दीन के बघवा ह मोर ऊपर पाछू ले हमला करे हवय अऊ मंय मुंह के भार गिर परेंय. येकर ले वो जानवर ह डेर्रा गीस; वो ह मोला गिराय के बाद जंगल कोती भाग गे.”

बिहनिया करीबन 7:30-8 के बखत रहिस.

बघवा के भागतेच, वंदना ह हिम्मत करिस अऊ भारी गहिर जखम अऊ लहू ले लथपथ होय के बाद घलो, वो ह ठाढ़ होगे. वो ह कुछु दूरिहा मं ठाढ़े माईलोगन मन के टोली डहर गीस, जेन मन अकबकाय रहिन. वो ह कहिथे, “मंय कुछेक घड़ी उहिंचे बइठे रहेंय, ओकर बाद हमन घर लहूट गेन.”

घर हबरतेच वंदना अचेत होगे अऊ वोला सिंदेवाही के सरकारी अस्पताल ले जाय गीस, जिहां वोला टांका लगाय गीस, सूजी (इंजेक्शन) लगाय गीस अऊ तीन दिन तक ले भर्ती करे गीस, ओकर बाद वोला छुट्टी दे देय गीस. तब ले ओकर इलाज चलत हवय अऊ वो ह हर हफ्ता घाव सूखाय बर सूजी लगवाथे. वो ह कहिथे के अऊ सूजी लगे बांचे हवय.

वो ह अपन इलाज बर सिंदेवाही ले करीबन 10 कोस दूरिहा चिमूर तहसील के मोटेगांव मं अपन भाई के घर चले गे. अपन मायका मं लउठी धरे चलत, वो ह कहिथे, “मंय अब कभू तेंदूपत्ता टोरे नइ जांव.”

नरम पिंयर लुगरा पहिरे वंदना बताथे के बघवा के हमला मं ओकर मुड़ मं 40 ठन टांका लगे रहिस. वो ह कहिथे, “बघवा मोर घेंच ला धरे नइ सकिस,” अऊ वो ह हैरान हवय के वो ह कइसने बांच गीस.

जयदीप हार्डिकर के श्रृंखला के दीगर कहिनी मन ला पढ़व:

ये ह नवा किसिम के अकाल आय

जंगली जानवर ले हलाकान किसान ला पोंगा के भरोसा

खोलदोड़ा: मचान मं झपकी लेवत रतिहा

चंद्रपुर: दहशत मं खेती-किसानी

किसान मन के हक सेती लड़त ‘डुक्करवाले मामा’

‘महंगाई के मार ऊपर हाथी के भार’

अनुवाद: निर्मल कुमार साहू