बाघ, आदमी आ बिकास के घातक तिकोन

मनोज चौधरी के दुनिया पल भर में उजड़ गइल.

“माई आ घरवाली लोग हम्मर दुनिया रहे. आ अब देखीं, परिवार में हम आ बस दू गो बच्चा बचल बा, बाकी सब स्वाहा हो गइल,” चंद्रपुर गांव के आपन घर में बइठल पैंतीस बरिस के मनोज कहलन.

“माई आ हमार मेहरारू भोरे जंगल खातिर निकलल, त हम आ लरिकवा सब सुतले रहीं.” 10 मई, 2025 के दिन, एकरा कुछे घंटा बाद खबर आइल कि 60 बरिस के कांता बुधाजी चौधरी आ 30 बरिस के शुभांगी के बाघ मार देलक. हमला ओह लोग के गांव से दू किमी दूर जंगल में भइल रहे. उनकर पड़ोस में रहे वाली कोई 50 बरिस के सारिका शालिक शेंडे भी एह हमला में मारल गइली.

तीनों मेहरारू लोग, दोसर कइएक लोग संगे तेंदू के पत्ता बीने जंगल गइल रहे.

महाराष्ट्र के चंद्रपुर जिला के मेंढा (माल) गांव में रहे वाला हजारन लोग के बीच ई खबर आग जेका फइल गइल. माहौल में मातम छा गइल. गांव के जादेतर लोग मनोज जेका छोट किसान, चाहे भूमिहीन मजूर लोग बा. ई लोग साल के कुछ महीना काम खातिर महाराष्ट्र के दोसर शहर, चाहे महाराष्ट्र से बाहिर चल जाला. हर बरिस मार्च, अप्रिल आ मई में घर के खरचा पूरा करे खातिर ई लोग जंगल जाके तेंदू पत्ता आ महुआ के फूल बीन लावेला.

सिंदेवाही तहसील के एह गांव के नाम, सरकारी कागज में मेंधमाल गुजरी बा, बाकिर गांव के बाहर जे तख्ती लागल बा, ओह पर ‘मेंढा (माल)’ नाम लिखल बा. गांव ताडोबा अंधारी टाइगर रिजर्व (टीएटीआ) लगे पड़ेला. एकर कोर इलाका 625 वर्ग किमी ले फइलल बा आ बफर इलाका 1,102 वर्ग किमी ले बा.

बन बिभाग के ताजा जानकारी के हिसाब से चंद्रपुर जिला में 223 बाघ, आ टीएटीआर में मोटा-मोटी 120 से 125 बाघ बा. गांव के लोग बतावता कि अइसन पहिल बेर भइल बा जब मेंढा में बाघ लोग के जान ले लेले बा.

पुलिस आ फॉरेस्ट ऑफिसर के हवाला से गांव के लोग बतइलक कि तीनों मेहरारू पर जब बाघिन हमला कइलक त ओकरा संगे ओकर तीन ठो छोट बच्चा सब भी रहे.

घटना के बाद गांव में हड़कंप मच गइल, कहूं-कहूं छोट-मोट विरोध प्रदर्सनो भइल. नेता लोग आके सदमा आ दुख में डूबल परिवार आ गांव वाला के सांत्वना देलक.

दस मई के ऊ भोर इयाद करत मनोज के हाथ-पांव फेरु ठंडा होखे लागत बा, मुंह-माथ पर बेचैनी, डर, गोस्सा देखाई पड़ता. उनकर लरिका लोग अभी छोट बा, सोहम 10 आ अराध्या 8 बरिस के बाड़ी. ओह लोग के माथ से माई के साया उठ गइल. ऊ इयाद करे लगलन, ओह दिनवा भोर के 11 से बेसी बाजत रहे. ऊ गांव के लगे एगो ईंट-भट्ठा पर दिहाड़ी करे निकलल रहस. तबहिए एगो रिस्तेदार चिंता करत उनका लगे पहुंचल. पता चलल तीनों मेहरारू लोग अबले घरे ना लउटल बा. ऊ लोग रोज भोरे 9.30 बजे ले जंगल से लउट, घर आ जात रहे.

दोसर मेहरारू लोग आपन रोज के टाइम से लउट गइल रहे. बाकिर ऊ लोग दुपहरिया दू बजे ले घरे ना पहुंचल रहे. मनोज आ उनकर संगी लोग जंगल खोजे पहुंचल. ओह लोग के कवनो अता-पता ना मिलत रहे. गांव के लोग तुरंत हरकत में आइल आ जल्दी से बन विभाग के एह बात के खबर पहुंचइलक. फेरु फॉरेस्ट रेंजर आ गांव के लोग अलग-अलग टोली बना के खोजबीन करे लागल. आखिर में 4 बजे के आस-पास पुछारी जंगल में ओह लोग के लाश मिलल, खेत से तनिए दूर. मेहरारू लोग के बेजान देह बहुते खराब हालत में 15 मीटर के दूरी पर अलग-अलग पड़ल रहे. अंदाजा लगावल गइल कि तीन ठो छोट-छोट बच्चा वाली बिसाल बाघिन के घातक हमला से बचे के एको मौका ना मिलल.

अगिला दिन दाह संस्कार खातिर समूचा गांव आ लगे के गांव के लोग उमड़ पड़ल.

पारी जब जून, 2025 में गांव पहुंचल त उहंवा के लोग अबहियो सदमा में रहे.

सब कोई इहे सोचत रहे कि जब मेहरारू लोग झुक के पत्ता बीनत होई, तबे बाघिन पाछू से हमला कर देले होई. बाघिन के काटे से सभे के देह के दसा बिगड़ गइल रहे. गांव वाला के लागत रहे कि बाघिन ओह लोग के गरदन से पकड़लक, जइसन कि बाघ सब आपन शिकार पकड़ेला. बाकिर बन बिभाग के अधिकारी लोग कहता कि ई आदमखोर ना रहे. बाघिन मरल देह झाड़ी में छोड़ आपन बचवन संगे भाग गइल. बन बिभाग एकरा एगो दुर्घटना बतावता.

“ओह दिन के घटना में हमहूं हो सकत रहीं,” साठ बरिस के कांताबाई शेंडे कहली. उनका आपन सहेली के गइला के बहुते दुख बा, बाकिर ऊ देवता-पित्तर के धन्यबादो करत बाड़ी कि ऊ बच गइली. कांताबाई रिस्तेदार बाड़ी आ सारिका शेंडे के बगल में रहत रहस. हर साल गरमी में दुनो सखि लोग मिलके जंगल जात रहे आ पत्ता सब तुड़ के लावत रहे.

तेंदू (डायोस्पायरोस मेलानोजाइलन) के पत्ता के लपेट के बीड़ी बनेला. गांव में जंगल लगे रहे वाला लोग खातिर ई कमाई के स्थायी साधन बा. कांताबाई के कहनाम बा कि एह हादसा से लोग के मन टूट गइल. अब तेंदू पत्ता तुड़े के जाई? अइसन अनहोनी से उनका आ गांव के दोसर लोग के कमाई के नुकसान हो गइल बा. मेहरारू लोग त एतना डेरा गइल बा कि जंगल में जाए के सोचिए नइखे सकत. मेंढा में तेंदू पत्ता के सीजन के, 2025 में ई मात्र तेसर दिन रहे.

तेंदू तुड़े के सीजन मार्च से मई ले रहेला. बाकिर अलग-अलग गांव में ई सीजन अलग अलग होखेला आ तबले चलेला जबले इलाका के गाछ से सभे पत्ता जमा ना कर लेवल जाव. एहि से सीजन 15 दिन से तीन महीना ले चल सकेला.

चंद्रपुर जिला में मार्च से मई 2025 के बीच टीएटीआर क्षेत्र में अलग-अलग हिस्सा (इलाका वाला, चाहे गैरसंरक्षित इलाका) में बाघ आ चीता के हमला में 24 लोग के मौत हो चुकल बा. ई सबले गरम आ बिना पानी वाला महीना होखेला जब गांव के लोग महुआ के फूल आ तेंदू के पत्ता तुड़े खातिर जंगल जाला. इहे घरिया आदमखोर जानवर सब शिकार आ पानी के खोज में भटकत रहेला.

“जंगल में बाघ बा, ई त हमनी जानत रहीं. केतना बेरा सुने में आइल, बाघ एकरा मार देलक, बाघ ओकरा मार देलक. हमनियो के इलाका में त केतना बाघ सब घूमत रहेला,” दाढ़ी बढ़इले मनोज आपन घरवाली आ माई के फोटो फ्रेम पकड़ले कहलन. “बाकिर सपनो में ना सोचले रहीं कि ई पहाड़ हमरे पर टूट जाई.”

मेंढा से कोई 50 किमी पर 58 बरिस के बिलास जांभुले भी इहे सोचत बाड़न. उहो कबो ना सोचले रहस कि उनका आपन बड़ भाई, विनायक के अरथी के कान्हा देवे पड़ी.

“जवन दिन उनकर मौत भइल, उहे मनहूस भोर हमनी चरचा करत रहीं कि अबकी महुआ के सीजन बहुते फीका लागता,” विलास कहलन. ब्रहमपुरी तहसील के चिचखेड़ा गांव के पुलिस पाटिल. (पुलिस पाटिल गांव में कानून ब्यवस्था देखे वाला जिला कलेक्टर के नियुक्त कइल आदमी होखेला.) “ऊ महुआ बीने गइलन, आ कबो ना लउटन,” ऊ कहलन.

विलास खेती-बाड़ी करेलन आ महुआ के छोट कारोबारी ठहरलन. गांव के लोग जंगल से फूल बीन के लावेला आ उनके बेच देवेला. महुआ खाए, दवाई आ दारू बनावे के काम आवेला. उनकर कहनाम बा कि उनकर भाई, जे 13 अप्रिल, 2025 के बाघ के शिकार हो गइलन, दू एकड़ के जमीन पर खेती करत रहस. खेती के कमाई से घर ना चलत रहे, एह से ऊ महुआ आ तेंदू पर निर्भर रहस.

“खेती-बाड़ी से त कवनो कमाई ना होखत रहे,” जामभुले कहलन. खेती से ओतना फायदा काहे ना मिलत रहे, कारण के ऊ एगो लिस्ट बता देलन- कम पैदावार, जादे खरचा, दाम मिले में देरी आ आमदनी के वैकल्पिक साधन के कमी. ऊ कहेलन, “महुआ आ तेंदू से घर खातिर कमो ना त दू महीना पर 25,000 से 30,000 रुपइया के कमाई हो जाला.”

परलोक वासी विनायक 60 बरिस के रहस. ऊ अपना पाछू घरवाली, बच्चाला आ लइकी आशीष छोड़ के गइल बाड़न. उनका परिवार के बन बिभाग से 10 लाख रुपइया के मुआवजा मिलल रहे. बच्चाला कहेली, “मुआवजा से हम्मर आदमी वापस ना आ जइहन.”

जांभुले परिवार चिचखेड़ा गांव में दबदबा रखे वाला अनुसूचित जाति, माना समुदाय से आवेलन. जादे करके गांव के लोग छोट आ सीमांत किसान लोग बा. आ गरमी में आजीविका खातिर लकड़ी छोड़ के दोसर वन उपज (नॉन-टिंबर फॉरेस्ट प्रोड्यूस, एनटीएफपी) पर निर्भर रहेला.

जांभुले के मरला से समूचा गांव दहशत में आ गइल बा. लोग महुआ आ तेंदू लावे खातिर जंगल जाएल छोड़ देले बा. एह तरह से अबकी के सीजन अइसहीं खतम हो गइल. हर परिवार के एह बरिस 25,000 रुपइया के घाटा भइल, विलास कहेलन. उनकरो नुकसान भइल बा. काहे कि ऊ आपन फसल जोड़ के ब्यापारी के ना दे सकलन. उनका कमीशनो ना मिल पाइल.

मवेसी सब के मौत त रोज के बात बा. बाकिर चिचखेड़ो में पहिले बाघ दू लोग के मार चुकल बा.

चिचखेड़ा पंचायत के एगो छोट बस्ती, पाथरी एह गांव से जादे दूर ना पड़े. इहंवा के मोटा-मोटी हर घर में मार्च-अप्रिल-मई में महुआ आ तेंदू पत्ता बीने के काम होखेला. अबकी साल कइएक परिवार ई काम ना क सकल. पछिला नवंबर में, चंद्रभान लोखंडे, 60 बरिस के दलित किसान के उनका घर से मात्र दुइए किमी पर एगो बाघ मार देले रहे.

उनकर बेटी माया के ऊ मनहूस दिन इयाद आवता, “ऊ दुपहरिया में हमनी के मवेसी सब के चरावे गइल रहस.” उनक माई शांताबाई चुपचाल देवाल पर टंगल आपन घरवाला के फोटो ताकत बाड़ी. ऊ बतइली, “उनका पर बाघ हमला कइलक. हमनी संगे जे भइल, ओकरा बाद अब त एह साल जंगल में जाए के हिम्मते ना भइल.” हर साल एह परिवार के महुआ आ तेंदू से 25,000 रुपइया के कमाई हो जाला. ऊ आगू कहली, “हमनी के ढेरे नुकसान हो गइल.”

ताडोबा के जंगल के दक्खिन आ पस्चिम किनारा से लागल एह जगह पर कमाई के पूरा ब्यवस्था संकट में आ गइल बा, सुधाकर महाडोरे फरिया के बतावत बाड़न. सुधाकर, मेड़की गांव (2011 के जनगणना में मेंडकी नाम से दर्ज) से आवे वाला समाजसेवी बाड़न. ऊ जंगल के अधिकार आ गांव के लोग के रोजी-रोटी खातिर काम करे वाला ‘अक्षय सेवा संस्था’ चलावेलन.

एह लोग के कमाई-खोराक के तरीका कुछ एह हिसाब से बा: खेतिहर लोग जुलाई से सितंबर ले खेती करेला आ फेरु सितंबर से दिसंबर, चाहे मार्च ले बाहर कमाए चल जाला. जेकरा खेत पर पानी पटावे (सिंचाई) के साधन बा ऊ गांव लउट आवेला आ दिसंबर से बीच मार्च ले सरदी वाला फसल उगावेला. बीच मार्च से बीच जून ले ऊ लोग जंगल से महुआ, तेंदू जइसन चीज सब बीन के लावेला आ बेच के घर चलावेला. इहंवा जादे करके साल में एके बेर धान बोवल जाला.

खेत-खलिहान में जानवर सब के उत्पात चलते पैदावार पर आफत आइल बा. लोग पूरा साल बाघ आ तेंदुआ जइसन आदमखोर जानवर के दहशत में जियता. “एह साल केतना लोग के जान चल गइल. डरे जंगल जाएल बंद कर देवे से लोग के कमाई छूट गइल बा,” महादोर कहलन. मजबूरी में लोग खेती-बाड़ी करे खातिर महाजन से करजा लेत बा आ एकर जंजाल में फंसे लागल बा. “ना त गरमी के मौसम में खेती-बाड़ी करके ठीक-ठाक खरचा निकल आवत रहे.”

इलाका में फइलल आतंक चलते मजूरियो खातिर लोग कम मिल रहल बा, महादोर कहेलन. “जान जोखिम में डाल के मरद, चाहे मेहरारू सब खेत पर मजूरी करे काहे जाई?” ऊ पूछतारन. उनकरा हिसाब से, “खेत आ जंगल धान में खरहा जइसन अइसे गूंथल बा कि रउआ पते ना चली बघवा कहंवा घात लगा के बइठल होई.”

महाराष्ट के पूरबी विदर्भ इलाका में पड़े वाला चंद्रपुर जिला इंसान आ बाघ के खूनी भिड़ंत के गढ़ बा. पछिला बीस बरिस में इहंवा मोटा-मोटी 2,000 लोग बाघ, चाहे तेंदुआ के शिकार हो चुकल बा. केतना जना गंभीर रूप से जख्मी भइल बा. ई सब जानकारी चंद्रपुर जिला के मुख्य बन संरक्षक (क्षेत्रीय) से मिलल बा. पढ़ीं: “अबकी अकाल चोर गोड़ पर आइल बा”

मिल रहल जानकारी के हिसाब से जनवरी 2021 से अबले बाघ आ तेंदुआ 175 लोग के आपन शिकार बना चुकल बा.

एह संकट के पाछू दू चीज काम कर रहल बा. पहिल, बिकास के नाम पर बड़का-बड़का प्रोजेक्ट आवे से जंगल सब तबाह हो रहल बा, आ जनावर सब के रहे-खाए के ठिकाना उजड़ रहल बा. दोसरा ओरी, छोट आ सीमांत किसान लोग के मुसीबत ई बा कि खेती से ओह लोग के घर नइखे चलत. एहि से ऊ लोग के मजबूरी में अलग से लकड़ी, पत्ता, फूल-फल, जड़ी-बूटी जइसन जंगल के चीज से कमाई करे पड़ रहल बा.

आ गरमी अइला पर बाघ के इलाका में आदमी लोग के घुसे से रगड़ा आउर बढ़ जाला. किसान के बारहो मास खेत आ मवेसी के भारी नुकसान सहे पड़ेला.

मेंढा (माल) गांव टीएटीआर के अहाता से दक्खिन में कुछ किमी पर नयका बनल अइल-फइल नागभिद-सिंदेवाही रोड पर पड़ेला. आउर ई रस्ता बाघ-चीता जइसन जंगली जनावर सब के आरक्षित इलाका से होके गुजरेला. ब्रह्मपुरी आ मुल-साली संगे जुड़ल चंद्रपुरी जिला के ई दू ठो तहसील में रउआ सघन इंसानी बसावट मिली जेकरा बीच-बीच में जंगल के हिस्सा भी बा. एक-दोसरा में गुंथाइल बस्ती आ जंगल चंद्रपुर के पहचान बा. ई तहसील सब टीएटीआर के दक्खिन आ दक्खिन-पस्चिम ओरी पड़ेला. इलाका बड़का-बड़का प्रोजेक्ट के झंझट से अबही तनी बचल बा. बाकिर पस्चिम, उत्तर आ दक्खिन-पूरबी हिस्सा में मेगा-प्रोजेक्ट चलते बाघ-चीता के घूमे-फिरे के रस्ता बंद हो गइल बा.

सन् 2018 में वाइल्डलाइफ इंस्टीच्यूट ऑफ इंडिया के कइल एगो अध्ययन से पता चलेला कि महाराष्ट्र के पूरबी विदर्भ के जंगली इलाका, जेकरा में टीएटीआर के इलाको शामिल बा, अब छोट-छोट टुकड़ा में बंट गइल बा. आ इहंवा के जंगली जानवर के सब रस्तो बाधित हो गइल बा. टाइगर रिजर्व के बाहिर पड़े वाला जंगल, जे टेरीटोरियल फॉरेस्ट कहल जाला, साल दर साल सिकुड़ रहल बा, आकार आ गुण दुनो में. ई सब खास करके बिकास के काम, सड़क आ बढ़त इंसानी बसावट चलते हो रहल बा. रिपोर्ट में रंगीन नक्सा देखा के ई सब बात साफ-साफ बतावल गइल बा.

एह जिला के माटी, पानी आ हवा के हाल पस्त बा. बंदु धोत्रे के हिसाब से आज एकर खराब असर जंगल किनारे बसल कमजोर समाज पर सबले जादे पड़ रहल बा, चाहे ऊ आरक्षित इलाका होखे, चाहे क्षेत्रीय इलाका. पर्यावरण आ राजनीतिक कार्यकर्ता धोत्रे इको-प्रो नाम के एगो संस्था चलावेलन. बरिसन से ऊ एह संकट के साक्षी रहल बाड़न. उनका अफसोस बा कि समस्या आउर गंभीर भइल जा रहल बा.

बात-बहस में अक्सरहा एक ठो बात हरमेसा नजरअंदाज कर देवल जाला कि एह इलाका में नयका खदान सब कुकुरमुत्ता जेका उग रहल बा, खास करके टीएटीआर के पस्चिमी हिस्सा ओरी, जे वरधा घाटी कहाला.

चंद्रपुर में चूना पत्थर आ लोहा अयस्क सहित कोयला आ दोसर मुख्य खनिज प्रचुर मात्रा में पावल जाला. एहिजा 30 से जादे कोयला खदान बा. एह सब खदान के वरोरा, राजुरा, बल्लारपुर आ घुग्गुस तहसील में वेस्टर्न कोल-फिल्ड्स लिमिटेड (डब्ल्यूसीएल) चलावेला. एही में कुछ आउर गिनती जुड़ गइल बा- प्राइवे ओपन कास्ट खदान, आधा दरजन सीमेंट कारखाना, स्पंज आयरन प्लांट, वाशरी आ ऱाख के ढेर. ई सब मिलाके बनेला जन-जंगल-जमीन के तबाही के नुस्खा- जेमें ना त पर्यावरण बचता, ना ढंग के रोजी-रोटी मिलता.

टीएटीआर के दक्खिन पच्छिम सिरा पर भटाड़ी गांव में लाइन से नयका कोयला खदान बा. ई टाइगर रिजर्व में घुसे के मेन गेट मानल जाए वाला मोहारली नाम के गांव से दुइए-तीन मील दूर पड़ेला. आउरी परियोजना खातिर लोग पर्यावरण आ वन विभाग में दउड़ धूप कर रहल बा.

वेस्टर्न कोलफिल्ड्स लिमिटेड (डब्ल्यूसीएल) के भटाडी खदान रातों-रात बाघन के बड़ ठिकाना उजाड़ के ओकरा धूर आ कोयला के गहिर अन्हार खाई बना देलक. ओकरा किनारा पर ठाड़ होके ताडोबा के निरमल हरियाली देखल जा सकेला.

रिपोर्टर चंद्रपुरे में पलल-बढ़ल बाड़न. अस्सी के जमाना में ई इलाका जंगल से चारो ओरी घिरल रहत रहे, एकदम सघन आ पतझड़ वाला. बाकिर अब ऊ सब बिला गइल बा. अब त एह जगहा पर मजूर के बस्ती पसर गइल बा, चारो ओरी ऊंच-ऊंच ढेर, ट्रक सब के आवाजाही आ सड़क लाल-लाल माटी से चिपचिपाइल मिलेला. रोड किनारे लागल गाछ सब पर माटी-धूर के मोट परत जमल देखाई दीही. महाराष्ट्र के सबले बड़ पावर प्लांट चंद्रपुर सुपर थर्मल पावर स्टेसन अब शहर के हिस्सा बन गइल बा. ई मोटा-मोटी 3,000 मेगावाट बिजली तइयार करेला. ई कैंपस आजो ना मालूम केतना बाघ सब के ठिकाना बा., काहेकि ई पावर प्लांट टीएटीआर के अंचरा में पड़ेला.

धोत्रे के कहनाम बा, “इहंवा सब कुछ उलट-पुलट हो गइल बा.” उनकर सोचनाई ई बा कि बाघ सब के चाल-चलन में हाल के समय में बदलाव आवे से स्थिति बहुते गंभीर बन गइल बा. “बघवा सब के नयका नस्ल जंगल में ना, बलुक गांव-सहर के बीच पला रहल बा,” ऊ कहेलन. “सीमेंट, कोयला आ धूर के जंगल में.”

एगो घना जंगल वाला इलाका में सड़क सब अइसन चौड़ा कर देवल गइल बा कि खाली बाघे आ तेंदुआ ना, बलुक ओकर खुराको (शिकार) के आवाजाही बाधित हो गइल बा. गोसेखुर्द सिंचाई परियोजना के तहत नदी के दहिना किनारा पर बन रहल बड़का नहर के काम एह इलाका के आउरो नास करके धर देले बा. ओकरा पर से आफत ई कि चंद्रपुर-गोंदिया रेलवे के पुरनका पतरका लाइन के मोट लाइन बनावे के काम हो रहल बा. ई लाइन घनघोर जंगल आ बाघ सब के ठिकाना से होके गुजरत बा. इहो से जंगली जनावर सब के आवाजाही पर आफत आइल बा. कइएक बाघ सब एह रेल के पटरी पर कट के मर जात बा, धोत्रे बतावत बाड़न.

चंद्रपुर के बाघ सब पर एह तरह के तरक्की के उलटा असर पड़ल बा. केतना जंगली बाघ, ओकर बच्चा आ तेंदुआ सब लाइन पर कट के मर जाता, आ केतना के समस्या कहके खतम कर देवल जाता. एही बीच इलाका में रोज-रोज खदान आ दोसर कंपनी सब के गिनती आ दबाव बढ़त चल जा रहल बा. रिसर्च बतावत बा कि ई समस्या सिरिफ चंद्रपुरे के नइखे, बलुक सगरे भारत के टाइगर रिजर्व वाला इलाका के आम प्रबंधनो के इहे हाल बा.

चंद्रपुर जिला के मुख्य वन अधिकारी (क्षेत्रीय), जीतेंद्र रामगांवकर बतावत बाड़न, “पुरनका झंझट अबहियो चालू बा.” ऊ कहेलन कि जीविकोपार्जन खातिर बिकास आ ढांचा जरूरी त बा, बाकिर असल समस्या एह सब के बीच संतुलन साधल बा. “ई दुनिया भर में चुनौती बन चुकल बा.” तबो, ऊ कहेलन, बाघ, तेंदुआ आ दोसर जंगली जनावर सब के हमला में आदमी के मरे के घटना कम हो रहल बा. ई सब जलावन के लकड़ी पर निर्भरता कम करे खातिर घरे-घरे रसोई गैस उपलब्ध करावे आ सोलर फेंस लगावे के असर बतावल जाता.

चंद्रपुर में कुल मिला के कुछ 250 बाघ होई. एकरा में ताडोबा अंधारी टाइगर रिजर्व के भीतरी रहे वाला बाघो शामिल बा. एह इलाका में बाघन के गिनती अचरज में डाले वाला बा. पूरबी हिस्सा (ब्रह्मपुर, नागभीड़) आ दक्खिन हिस्सा (सिंदेवाही, सावली चाहे मुल) में पड़े वाला स्थानीय जंगल में बाघ सब डेरा जमावत बा. ई लोग छितराइल जंगल में आपन ठिकाना बना लेले बा.

रामगांवकर कहतारन, “टीएटीआर के जंगल त बाघन से भर गइल बा.” आ अब ई लोग लगे के जंगल में फइल रहल बा. एह से मामला जटिल भइल जा रहल बा. इहंवा एक ओरी त इंसान के आबादी बढ़ रहल बा, दोसर ओरी बाघ, शेर, तेंदुआ जइसन मांसाहारी जनावरो के गिनती बढ़ रहल बा. उहो कोई 1,102 वर्ग किमी के एके कोर आ बफर इलाका में.

“इहो साल जादेतर मौत जंगल के भीतर भइल बा,” रामगांवकर कहलन. अइसे त बन बिभाग, चाहे जनावर सब के दोष देवल आसान बा, बाकिर सच्चाई त ई बा कि जब लोग नियम तुड़ के जंगल में घुसेला, अइसन हादसा तबे होखेला.

सबसे पहिल बात त ई कि लोग के अकेले, चाहे छोट टोली में जंगल में कबो ना जाए के चाहीं, दोसर बात, बन बिभाग लोग के समझावेला कि भोरे-भोरे जंगल जाइल बहुते खतरनाक बा. काहेकि उहे घरिया आदमखोर जनावर सब जादे चौकन्ना रहेला. “लोग के मालूम रहे कि ओह लोग के इलाका में एगो बाघिन आपन तीन ठो बचवा संगे मौजूद बा. जदि ऊ लोग खतरा भांपित आ भोरे-भोरे जंगल ना जाइत, त ई हादसा रोकल जा सकत रहे,” रामगांवकर कहेलन.

कहे के मतलब, महाराष्ट्र के गांव-देहात में अर्थब्यवस्था चौपट भइल जा रहल बा. रोजी-रोटी के किल्लत बढ़ रहल बा. आउर ई जिला अपवाद नइखे. ई सब परिस्थिति आदमी आ बाघ के बीच झगड़ा आउर बढ़ा रहल बा. हरिऩ, जंगली सुअर आ नीलगाय जइसन घास-पात पर जिए वाला जनावर सब चलते खेती संकट में बा आउर साल भर के पैदावार पर एकर खराब असर पड़ रहल बा.

जिला के गांव-देहात के 34,000 से जादे परिवार महुआ आ तेंदू पत्ता जंगल से बीन के लावे के काम करेला. ऊ बतावेलन कि ई काम खाली टीएटीआर के इलाके ना, पूरा जिला में होखेला.

बन बिभाग ठिकेदार लोग के बीच जंगल के इलाका बांट देवेला. ऊ लोग गांव के गरीब परिवार से पत्ता तुड़वावेला. फेरु गांव में बिचौलिया आ ब्यापारी लोग पत्ता कीनेला. बाकिर असल बात त ई बा कि पत्ता तुड़े के जोखिम ठिकेदार ना, मजूर लोग पर आवेला. एह काम से ठिकेदार लोग करोड़न रुपइया कमावेला.

नीरज हातकर के कहनाम बा, “महाराष्ट्र के सहर आ गांव दुनो में लोग के मन लायक रोजगार नइखे मिलत.” नीरज अर्थशास्त्री बाड़न आ राज्य के गांवन में पसरल गरीबी आ अभाव पर हाले में एगो किताब लिखले बाड़न. “एहि से ऊ लोग मजबूरी में कमाई करे खातिर जंगल आ प्राकृतिक संसाधन के दोहन के आसरे बा.” इहंवा ले कि वेस्टर्न घाटो के गांव में, उनका हिसाब से ई निर्भरता तेजी से बढ़ रहल बा.

“महाराष्ट्र के अर्थव्यवस्था भारत के समूचा राज्य के बीच सबले बड़ अर्थव्यवस्था मानल जाला. बाकिर इहंवा गांव के जड़ बिकास, रोजगार के कमी, आ अमीर-गरीब के बीच भारी खाई जइसन समस्या मौजूद बा,” हाटेकर फ्रंटलाइन पत्रिका में पछिला बरिस लिखले रहस.

अध्ययन बतावत बा कि चंद्रपुर, महाराष्ट्र के कोई बदहाल जिला नइखे, तबो गांव-देहात के जड़ बिकास आ किसान लोग के समस्या इहंवा ओतने गहिर बा. कारण जिला में ढेरे खदान आ भारी उद्योग मौजूद होखे के बावजूद स्थानीय लोग के खास रोजगार नइखे मिलत.

मेंढा (माल) में दुनो शोकाकुल परिवार धारमिक अनुष्ठान में लागल बा. रिपोर्टर एक दिन पहिले, 14 जून, 2025 के गांव पहुंचल रहस. गांव के लोग एह अनुष्ठान के वघई देवी शांति पूजा कहेला. वघई बाघिन माता बाड़ी. लोग के रक्षा खातिर उनकर गोस्सा के शांत करे के जरूरत बा.

पड़ोसी आ रिस्तेदार लोग समूचा गांव खातिर बड़का भोज के तइयारी कर रहल बा. मेहरारू लोग काम बांट लेले बा. केहू हरियर तरकारी छीलत-काटत बा, त केहू चाउर बीन के धो रहल बा. चाउर इहंवा के बड़का फसल मानल जाला. केहू चपाती बनावे खातिर गेहूं के आटा गूंथत बा.

कांताबाई शेंडे परिवार के खुलल अंगना में सानल आटा से छोट-छोट लोइया बनावत पारी के बतइली कि ई अनुष्ठान 13 दिन के श्रद्धा पूजा से अलग बा. “वघई देवी के शांति खातिर ई पूजा हो रहल बा जेसे ऊ फेरु आउर केहू के नुकसान ना पहुंचावस.” ऊ इहो बतइली कि बाघ के शिकार भइल मेहरारू लोग के श्रद्धांजलि भी देवल जा रहल बा.

गांव के लोग आपस में पइसा जुटा के बाघिन आ ओकर बच्चा के मूरति मुस्किल से एक किमी दूर, स्थापित कइले बा. मूरति मेंढा-चारगांव गांव के जोड़े वाला दू किमी के रोड किनारे एगो झाड़ी वाला जंगल में लगावल गइल बा. मानल जाला कि एकरा से बाघ माता आ उनकर बच्चा के क्रोध शांत होई आउर गांव के लोग से टकराव कम हो जाई. चंद्रपुर में अइसन वघई मंदिर जगह जगह बा. लोग मानेला कि बाघिन गोस्सा होखे, आ केहू आदमी के चोट पहुंचइले होखे, त पूजा कइल जरूरी बा.

मेंढा में आज से पहिले एकर जरूरत ना पड़ल रहे.

एह तरह के संकट के बीच, एगो राहतो के कहानी बा.

जवना दिन मेंढा में तीन ठो मेहरारू लोग बाघ के शिकार भइल, मोटा-मोटी उहे घरिया, वंदना विनायक गजभिये नाम के किसान पर बाघ के हमला भइल. ऊ पड़ोस के चारगांव के लगे के जंगल में तेंदू पत्ता बटोरे गइल रहस. भगवान के सुकर रहे, ऊ बच गइली.

वंदना बतावत बाड़ी, “ऊ नर बाघ रहे.” 50 बरिस के ई मेहरारू ओह घड़ी के इयाद करत बाड़ी जब मौत उनका से दुइए कदम दूर रहे. “हमर भाग नीमन रहे. जब बाघ पाछू से हमला कइलक त हम मुंहे भरे गिर गइनी. ई सब देख के हमार टोली के मेहरारू लोग जोर-जोर से चिचियाए लागल. ओह लोग के आवाज से बघवा डेरा गइल आ हमरा छोड़ के जंगल में भाग गइल.”

ओह घरिया भोर के 7.30 से 8 बाजल होई.

बाघ उनका लहूलुहान करके भाग गइल रहे. घाव से हर-हर खून बहला के बावजूद ऊ आपन पूरा हिम्मत बटोर के ठाड़ हो गइली. आ धीरे-धीरे तनिए दूर अकबकाएल ठाड़ आपन सहेली लोग के टोली ओरी बढ़ली. ऊ बतावेली, “हमनी उहंवा घरे लउटे से पहिले तनी देर खातिर बइठनी.”

घरे पहुंचते वंदना बेहोस हो गइली. आनन-फानन में उनका सिंदेवाही सरकारी अस्पताल ले जाइल गइल. उहंवा टांका लगावल गइल, सूइया पड़ल आउर तीन दिन ले एडिमट करके रखल गइल. बाद में इंफेक्सन से बचे खातिर हर हफ्ता आके इंजेक्शन लेवे पड़ल. अबही आउरो इंजेक्शन लगे के बाकी बा.

तबियत ठीक करे खातिर ऊ सिंदेवाही से मोटा-मोटी 30 किमी दूर चिमूर तहसील में मोटेगांव आपन भाई के घरे आ गइल बाड़ी. “अब हम कबो तेंदू पत्ता बीने ना जाएम,” छड़ी पकड़ले मायका में आराम करत ऊ कहली.

माथा पर मोलायम पीयर कपड़ा बन्हले वंदना के कहनाम बा कि बाघ के हमला में उनकर माथा में 40 ठो टांका लगावे पड़ल. “ऊ हमार गरदन ना पकड़ सकल,” ऊ कहली, आ अचरज करे लगली कि ऊ कइसे जिंदा बच गइली.

एह कड़ी में जयदीप हार्दिकर के दोसर स्टोरी सब पढ़ल जाव:

‘अबकी अकाल चार गोड़ पर आइल बा’

अन्हरिया रात में खतरा के घंटी

खेलडोडा में मचान पर एगो रात

चंद्रपुर में खेती-किसानी खूनी पेशा काहे बन गइल?

किसानन खातिर लड़े वाला मामा के तनिको चैन नइखे!

‘पहिले समस्या महंगाई रहे, अब हाथी बा’

अनुवाद: स्वर्ण कांता