’پسینے کا ایک قطرہ لاکھ ٹکے کا‘

جے ساکھلے اُن لوگوں کے بارے میں گیت گا رہی ہیں جو روزگار کی تلاش میں گاؤں سے ممبئی جاتے ہیں، اور اُن ماؤں کے دل کا حال بیان کر رہی ہیں جو اپنے بیٹوں کی محنت بھری زندگی کے بارے میں سوچ کر پریشان ہوتی رہتی ہیں

’’گاؤں کی بہت سی عورتوں نے اپنے بیٹوں کو کپڑا ملوں میں کام کرنے کے لیے ممبئی جاتے ہوئے دیکھا۔ جب وہ مشینوں پر کام کرتے، تو بازو پھیلا کر کلائیوں کو بار بار مروڑتے،‘‘ اس سال (۲۰۲۴) جون میں فون پر بات کرتے ہوئے کُسُم تائی سوناونے نے ان اووی (دیہی لوک گیتوں) کے بارے میں بتایا۔ ’’کچھ مرد تعمیراتی مقامات پر مزدوری کرتے، سروں پر بجری یا سیمنٹ کی بوریاں ڈھوتے۔ شام ڈھلتے ڈھلتے وہ اتنا تھک چکے ہوتے کہ ایسا محسوس ہوتا گویا اُن کی ہڈیاں بھی نچوڑ لی گئی ہوں۔ اور ماں کے دل میں یہی خیال آتا کہ اُس کے بیٹے کے پسینے کا ایک قطرہ بھی لاکھ روپے کے برابر ہے۔‘‘

پھر تھوڑی دیر رُک کر، اُنہوں نے دھیمے لہجہ میں کہا، ’’کچھ تو ایسے بھی تھے جو شہر کی نالیاں صاف کر رہے تھے۔‘‘

پونے ضلع کے مُلشی تعلقہ کے نندگاؤں کی رہنے والی کُسُم تائی اُس وقت موجود تھیں، جب گرائنڈ مِل سانگز پروجیکٹ کی ابتدائی ٹیم نے جے ساکھلے کے گائے ہوئے یہ گیت دو دہائی قبل ریکارڈ کیے تھے۔ یہ گانے اکتوبر ۱۹۹۹ میں آڈیو ٹیپ پر محفوظ کیے گئے تھے اور بعد میں ڈیجیٹل شکل میں منتقل کر دیے گئے۔ جے ساکھلے، مُلشی کے لوہارڈے گاؤں کی رہنے والی تھیں۔ سال ۲۰۲۱ میں ان کا انتقال ہو گیا۔ ان کے کچھ دیگر گیت پاری پر شائع ہو چکے ہیں (ملاحظہ کریں: کسان اور بارش کا گیت)

اس قسط میں شامل نو اووی ہمیں اُس دور میں لے جاتے ہیں جب مہاراشٹر کے دیہی علاقوں سے لوگ روزگار کی تلاش میں بمبئی (اب ممبئی) ہجرت کیا کرتے تھے۔ تاریخی شواہد یہ بتاتے ہیں کہ اٹھارہویں صدی کے وسط میں جب بمبئی ایک اہم تجارتی شہر کے طور پر اُبھرنے لگا، اور انیسویں صدی میں جب بندرگاہ ٹرسٹ اور کپڑے کی ملیں قائم ہوئیں، تو ملک کے مختلف حصّوں سے لوگ روزگار کی تلاش میں یہاں آنا شروع ہوئے۔ مہاراشٹر کے اندرون علاقوں، خاص طور پر کونکن، پونے، ناسک، ستارا اور مغربی گھاٹ کے دیہاتوں سے ہزاروں لوگ بہتر زندگی کی امید میں بمبئی کا رُخ کرنے لگے۔

ممبئی کی زندگی کے قصّے اور دیہی طرزِ زندگی سے اُن کا موازنہ، ان اشعار کی بنیاد بنتے ہیں۔ ایک گیت ان مجبوریوں کو آشکار کرتا ہے جو ایک نئے طرزِ حیات کے ساتھ آئیں، اور جس نے انسانی رشتوں میں – حتیٰ کہ بہن بھائیوں کے درمیان بھی تبدیلیاں پیدا کر دیں۔ شہر میں بسنے والے افراد کے درمیان ہر لین دین میں ایک تجارتی پہلو شامل ہو گیا تھا۔ زندگی کی یہ تلخ حقیقت، گاؤں کے روایتی، خاندانی اور جذبۂ خلوص پر مبنی ماحول کے بالکل برعکس نظر آتی ہے، جو وہاں کی معمول کی روش ہوا کرتی تھی۔

یہ اووی (لوک گیت) غالباً آزادی سے پہلے کے دور میں کہے گئے تھے اور گاؤں کی عورتوں میں نسل در نسل زبانی روایت کے ذریعے منتقل ہوتے رہے۔ پہلے شعر میں ماں کو اس بات پر فخر ہے کہ اُس کا بیٹا انگریزی بولنے لگا ہے – وہی زبان جو کبھی ’’صاحبان‘‘ کی پہچان تھی – اور اب اُسے عزت سے کرسی پر بیٹھنے کی پیشکش کی جاتی ہے۔ دوسرے اووی میں گانے والی ممبئی جیسے گنجان شہر کا موازنہ ایک ایسی جگہ سے کرتی ہے، جہاں ہر گلی شیشے کے گلاسوں سے بھری ہوئی نظر آتی ہے۔ اتنے زیادہ لوگ ہیں کہ سب ایک جیسے دکھائی دیتے ہیں؛ ماں کے لیے اپنے بیٹے کو پہچاننا مشکل ہو جاتا ہے۔ تمام گلاس ایک جیسے لگتے ہیں، مگر پیاس صرف وہی گلاس بجھا سکتا ہے جو اُس کا بیٹا ہے۔ وہ گویا یوں پوچھتی ہے: ’وہ کون سا گلاس ہے جو میرا بیٹا ہے؟‘

تیسرے شعر میں نغمہ سرا (راویہ) ایک ایسی چیز کو دیکھتی ہیں جو اُنہیں انوکھی لگتی ہے، اور ایک ایسے رواج کو محسوس کرتی ہیں جو اُن کی روایات کے برخلاف ہے۔ ممبئی کی گلیوں میں نظر آنے والے نلکوں (ٹونٹیوں) کی طرف اُن کی توجہ جاتی ہے۔ اُنہیں احساس ہوتا ہے کہ یہاں عورتوں کو نہ تو کنویں سے پانی نکالنا پڑتا ہے، اور نہ ہی دریا سے پانی لانے کے لیے لمبی دوری طے کرنی پڑتی ہے – جیسا کہ گاؤں میں اُنہیں کرنا پڑتا۔ دوسرے مصرع میں وہ کہتی ہیں کہ ایک عورت جو کھانا کھلانے کا ڈھابہ (کھانول) چلاتی ہے، وہ اپنے سگے بھائی سے بھی کھانے کے دام وصول کرتی ہے – جو گاؤں میں ہرگز معمول نہ تھا۔ اس شعر میں ممبئی کی زندگی میں تجارت زدہ تعلقات اور ہر رشتے میں معاشی پہلو کی جھلک نمایاں ہوتی ہے۔

چوتھے شعر میں راویہ کہتی ہیں کہ انہوں نے اپنے بیٹے کی تلاش میں پورے ممبئی کی خاک چھانی، یہاں تک کہ وہ ’’بائیں جانب‘‘ کولابیاچی ڈانڈی (’کولابا کی پٹی‘) تک جا پہنچیں۔ یہ دراصل ممبئی کے قدیم برطانوی علاقہ ’کولابا‘ کا حوالہ ہے، جو شہر کے جنوبی سرے پر واقع ہے۔

درج ذیل تین اشعار میں جے ساکھلے ایک عورت کی ممبئی ہجرت کی داستان بیان کرتی ہیں۔ گاؤں میں وہ اپنے بالوں میں تیل لگانے کی استطاعت نہیں رکھتی تھی، مگر شہر آنے کے بعد اُس کی زندگی بدل چکی ہے۔ اب وہ زمین پر نہیں بیٹھتی، جیسا کہ گاؤں میں بیٹھا کرتی تھی۔ مگر اُسے اپنا گاؤں یاد آتا ہے۔ ممبئی میں جہاں بہت سے لوگ مچھلی کھاتے ہیں، وہ جب واپس اپنے گاؤں آتی ہے تو کھیتوں میں کُردو (ایک ساگ) تلاش کرتی ہے۔ جب وہ ممبئی جانے کے لیے گاؤں سے روانہ ہوتی ہے تو خوشی سے سنورتی ہے، اچھے کپڑے پہنتی ہے۔ مگر ابھی راستے ہی میں، جب وہ خوبصورت کھنڈالہ گھاٹ سے گزرتی ہے تو اُس کے دل و دماغ میں خیالوں کی ایک لہر دوڑ جاتی ہے۔ اُسے آنے والے مشکل دنوں کا احساس ہونے لگتا ہے، اور وہ اپنے ماں باپ کو یاد کرتی ہے – جو شہر کی تنہا زندگی میں اُس کے ساتھ نہیں ہوں گے۔

آخری دو اووی میں جے ساکھلے ایک ماں کے جذبات کو آواز دیتی ہیں، جو اپنے نوجوان بیٹے کے لیے دل گرفتہ ہے – جو ممکنہ طور پر ممبئی کی کسی کپڑے کی مل میں کام کرتا ہے۔ وہ کہتی ہیں کہ پیسہ درختوں پر نہیں اُگتا، اور ان کا بیٹا روزانہ اس قدر سخت محنت کرتا ہے کہ اُس کے جسم کی ہڈیاں تک توانائی سے خالی ہو جاتی ہیں۔ کتنے ہی دن مسلسل کام کرنے کے بعد بھی اُسے بہت تھوڑی مزدوری ملتی ہے۔ مگر ماں کی نظر میں اس کے بیٹے کی محنت، اُس کا پسینہ، لاکھ روپے کے برابر ہے۔