کیکڑے کی دعوت

ان میں سے چھ کیکڑے آپ کی ہتھیلی میں آ جاتے ہیں۔ تھوڑی مرچ اور نمک کے ساتھ پیسنے پر وہ بہت ذائقہ دار لگتے ہیں۔ اس لیے، رام پرساد اور اس کے دوستوں نے کیچڑ کیکڑوں (اسکائیلا سیراٹا) کو ایک پلاسٹک کی بوتل میں پھنسایا ہے، اور اب ان کی دعوت اڑانے کی تیاری کر رہے ہیں۔

یہ لڑکے درختوں کے گھنے سایہ کے نیچے بیٹھے ہیں، جو آندھرا پردیش کے شری ستیہ سائیں ضلع میں بنجارہ برادری کی بستی ملکواری پلّی تانڈہ میں تپتی دھوپ سے راحت دے رہا ہے۔ جن کیچڑ کیکڑوں کو وہ پکانے والے ہیں انہیں ’ہرا کیکڑا‘ اور ’مینگرو کیکڑا‘ کے نام سے بھی جانا جاتا ہے اور وہ ہندوستان کے مشرقی ساحل پر پائے جاتے ہیں۔

امڈگور بلاک کی یہ پرسکون جگہ ایک وادی میں آباد ہے، جہاں درختوں کے نیچے دھان کے کھیت، ٹماٹر اور مرچ کے پودے لگے ہوئے ہیں۔ ایک طرف یہ سرسبز نظارہ ہے، وہیں ہمیں بتایا گیا ہے کہ یہاں بورویل ۸۰۰ سے ۱۲۰۰ فٹ تک گہرے ہیں۔ پھر بھی، فصلوں کی سینچائی دن میں صرف آٹھ گھنٹے تک ہی ہوتی ہے۔

بنجارہ کسان اور سرپرست رمیش نائک نے پاری کو بتایا کہ وہ تعمیراتی مقامات پر کام کرنے یا سیویج صفائی کے لیے تقریباً ۷۰۰ کلومیٹر کا سفر کر کے کیرالہ کے کوچی تک جاتے ہیں۔ ’’ہم سیویج کی صفائی کرتے ہیں۔ بہت بدبو آتی ہے، لیکن مزدوری اچھی ہے،‘‘ وہ بتاتے ہیں۔

پانی اور دیگر وسائل کی کمی کے سبب فصل کٹائی کے بعد کسانوں کو کام کی تلاش میں مہاجرت کرنی پڑتی ہے؛ ان کے بچے رہائشی اسکولوں میں بھیجے جاتے ہیں۔ گاؤں میں صرف ایک پرائمری اسکول ہے، جس کی وجہ سے ملکواری پلّی تانڈہ کے زیادہ تر بچے امڈگور، تُمّلا، اوبُل دیور چیروو اور کدیری جیسے قریبی قصبوں اور شہروں کے اسکولوں میں پڑھتے ہیں۔

دشہرے کی چھٹیاں ختم ہو چکی ہیں، اور لڑکے اگلے دن اسکول واپس جا رہے ہیں۔ جانے سے پہلے، کھیتوں میں کیکڑے پکانے کا بچپن کا کھیل وہ آخری بار کھیلیں گے۔

ایم موتی لال اور شریکانت نائک قریب میں رہنے والے ایک کسان سے نمک مانگ لائے ہیں، جو پرانے اخبار میں بڑی صفائی سے رکھا ہوا ہے۔ آس پاس کے تمام کسان مندر کی تعمیر کے لیے ریت جمع کرنے پڑوس کے گاؤں گئے ہوئے ہیں، وہیں دوسرے لوگ اپنے کھیتوں میں پمپ سے پانی چلا رہے ہیں۔

بھانو نائک اور لکھت نائک تازہ توڑی گئی مرچ کو کوٹ کر نمک میں ملاتے ہیں۔

کھانا تیار کرنے کا وقت ہو چکا ہے۔

رام پرساد کے ہاتھ کافی تیزی سے چلنے لگتے ہیں: وہ کیکڑوں کو نکالتا ہے، ان کے پنجے اور پیروں کو الگ کرتا ہے، اور ٹہنیاں، سوکھی پتیاں اور گھاس اکٹھا کرتا ہے۔ لوہت، بھانو، لکھت، شریکانت اور موتی لال بھی اس کی مدد کرتے ہیں۔ رام پرساد کیکڑوں کو سوکھی گھاس کے ڈھیر میں رکھتا ہے اور گھاس میں آگ لگا دیتا ہے۔ کچھ ہی منٹوں میں آگ بجھ جاتی ہے، اور وہ بڑے احتیاط سے راکھ میں سے جلے ہوئے کیکڑوں کو باہر نکالتا ہے۔

لوہت پھاوڑے میں لگنے والے ہینڈل کو دھوتا ہے، تاکہ پکے ہوئے کیکڑوں کو مرچ اور نمک کے ساتھ پیسا جا سکے۔ ’’دھوگڑا وانتِنگ، دھوگڑا وانتِنگ [پیسو! پیسو!]!‘‘ وہ چیختے ہیں۔ گور بولی (جسے لمباڈی بھی کہا جاتا ہے) میں ’دھوگڑا وانت‘ کا مطلب ’’پیسنا‘‘ ہے۔

کیکڑے اب تیار ہیں، اور لڑکے انہیں جلدی سے چٹ کر جاتے ہیں۔

’’انکا کاوالا [اور لیں گے]، سر؟‘‘ لوہت پوچھتا ہے۔ ہمارا ہچکچاہٹ سے بھرا جواب سن کر دو لڑکے تالاب کی طرف دوڑ پڑتے ہیں، اور ایک بڑے کیکڑے اور آٹھ اوسط سائز کے کیکڑوں کے ساتھ لوٹتے ہیں۔

ان میں سے سب سے بڑی عمر کا چرن نائک ہمیں کیکڑوں کی ادویاتی خوبیوں کے بارے میں بتاتا ہے۔ وہ ہینڈ بال کھیلتا ہے اور وشاکھاپٹنم کے پاس ارکو اسپورٹس اسکول میں پڑھتا ہے۔ وہیں بھانو، اوبل دیور چیروو قصبہ کے ایک انگریزی میڈیم اسکول میں پڑھتا ہے۔

’’ہم سب کل ہاسٹل واپس جا رہے ہیں۔ پاپا مجھے اور میرے بھائی کو اوبل دیور چیروو چھوڑیں گے، پھر کدیری سے کوچی کے لیے ٹرین پکڑ لیں گے،‘‘ وہ بتاتا ہے۔

بارش ہونے والی ہے، اور لڑکے کھیتوں سے ہو کر اپنے گھروں کی طرف دوڑ پڑتے ہیں۔

ترجمہ نگار: قمر صدیقی