ഞണ്ട് സദ്യ

നിങ്ങളുടെ കൈപ്പത്തിയിൽ ആറെണ്ണത്തിനെ കൊള്ളും. അല്പം മുളകും, ഉപ്പുമിട്ടാൽ രുചികരമായ വിഭവമായി മാറു. അതുകൊണ്ട്, രാമപ്രസാദും അവൻ്റെ കൗമാരപ്രായക്കാരായ കൂട്ടുകാരും ചളിയിൽ കാണുന്ന ഞണ്ടുകളെ (സ്കൈല സെരാട്ട) ഒരു പ്ലാസ്റ്റിക്ക് കുപ്പിയിലാക്കി, സദ്യയുണ്ണാനുള്ള തയ്യാറെടുപ്പിലാണ്.

മരങ്ങളുടെ തണുപ്പിൽ കുട്ടികളിരുന്നു. ആന്ധ്ര പ്രദേശിലെ ശ്രീ സത്യസായി ജില്ലയിലുള്ള മലകവരിപ്പള്ളി താണ്ട എന്ന ബഞ്ജാര കോളണിയിലെ കനത്ത ചൂടിൽനിന്ന് അത് അവർക്ക് ആശ്വാസം നൽകി. ഇന്നത്തെ വിഭവങ്ങളിൽ താരം – ചളിയിലെ ഞണ്ടുകളാണ്. പച്ച ഞണ്ടെന്നും മാൻഗ്രൂവ് ഞണ്ടെന്നും - വിളിക്കുന്ന ഞണ്ടുകൾ. ഇന്ത്യയുടെ കിഴക്കൻ തീരപ്രദേശത്താണ് ഇവയെ കണ്ടുവരുന്നത്.

അമഡ്ഗുർ മണ്ഡലിലെ ഈ ശാന്തമായ സ്ഥലം ഒരു താഴ്വരയിലാണ് സ്ഥിതി ചെയ്യുന്നത്. ചെറിയ മലകളാൽ ചുറ്റപ്പെട്ട നെൽപ്പാടങ്ങളും, തക്കാളി, മുളക് പാടങ്ങളുമെല്ലാമുള്ള ഒരിടം.

നിർമ്മാണജോലിയോ അഴുക്കുചാൽ വൃത്തിയാക്കൽ പണിയോ ചെയ്യാൻ, 700 കിലോമീറ്റർ താണ്ടി, കേരളത്തിലെ കൊച്ചിയിലേക്ക് പോകാറുണ്ടെന്ന്, ആ കുട്ടികളിലൊരാളുടെ അച്ഛൻ, ബഞ്ജാര കർഷകനായ രമേഷ് നായക് പാരിയോട് പറഞ്ഞു. “ഞങ്ങൾ അഴുക്കുചാൽ വൃത്തിയാക്കാറുണ്ട്. വൃത്തികെട്ട മണമാണെങ്കിലും നല്ല പൈസ കിട്ടും,” അദ്ദേഹം പറയുന്നു.

ജലത്തിൻ്റേയും മറ്റ് വിഭവങ്ങളുടേയും ദൗർല്ലഭ്യമാണ്, വിളവെടുപ്പ് കഴിഞ്ഞാൽ, ജോലി തേടി കുടിയേറ്റം നടത്താൻ കർഷകരെ നിർബന്ധിതരാക്കുന്നത്. കുട്ടികളെ ബോർഡിംഗ് സ്കൂളിലേക്ക് അയയ്ക്കുന്നുണ്ട്. ഗ്രാമത്തിൽ ഒരു പ്രാഥമിക വിദ്യാലയം മാത്രമേ ഉള്ളൂ എന്നതിനാൽ, മലകവരിപ്പള്ളി തണ്ടയിലെ മിക്ക കുട്ടികളും അമഡഗുർ, തുമ്മല, ഒബുല ദേവര ചെരുവു, കദിരി തുടങ്ങിയ, സമീപത്തെ പട്ടണങ്ങളിലും നഗരങ്ങളിലുമുള്ള സ്കൂളുകളിലാണ് പഠിക്കുന്നത്.

ദസറ അവധികൾ കഴിഞ്ഞ്, കുട്ടികൾ നാളെ സ്കൂളുകളിലേക്ക് തിരിച്ചുപോകും. അവസാനദിവസം, പാടത്തുനിന്ന് ഞണ്ടുകളെ പിടിച്ച് പാകം ചെയ്ത് ആഘോഷിക്കുകയായിരുന്നു അവർ.

എം.മോത്തിലാലും ശ്രീകാന്ത് നായകും സമീപത്തുള്ള ഒരു കർഷകനിൽനിന്ന് ഉപ്പ് കൊണ്ടുവന്നിട്ടുണ്ട്. ഒരു പഴയ പത്രത്തിൽ അത് ഭംഗിയായി പൊതിഞ്ഞിരിക്കുന്നു. ചുറ്റുവട്ടത്തുള്ള കർഷകരിലധികവും, ഒരു അമ്പലത്തിൻ്റെ നിർമ്മാണത്തിനുള്ള മണ്ണെടുക്കാൻ സമീപത്തുള്ള കോളണിയിലേക്ക് പോയിരുന്നു. പാടത്ത് വാട്ടർ പമ്പുകൾകൊണ്ട് നനയ്ക്കുകയായിരുന്നു മറ്റ് ചിലർ.

ഭാനു നായകും ലികിത് നായകും ഒരു പിടി മുളക് ഉപ്പിലേക്ക് ചേർത്തു.

ഇനി പാചകത്തിനുള്ള സമയമായി

രാമപ്രസാദ് വിവിധ പണികളുടെ തിരക്കിലാണ്. ഞണ്ടുകളെയെടുത്ത്, അതിൻ്റെ നഖവും കാലും വേർപെടുത്തി, ചുള്ളിക്കമ്പുകളും ഉണങ്ങിയ ഇലകളും പുല്ലും ശേഖരിച്ചു. ലോഹിത്, ഭാനു, ലികിത്, ശ്രീകാന്ത്, മോത്തിലാൽ എന്നിവരും സഹായിക്കുന്നുണ്ട്. രാമപ്രസാദ് ഞണ്ടുകളെ ഉണങ്ങിയ ഒരു പുൽക്കൂമ്പാരത്തിലിട്ട് തീ കൊളുത്തി. ഏതാനും നിമിഷങ്ങൾക്കുശേഷം, തീ കെട്ടപ്പോൾ, അവൻ, കരിഞ്ഞ ഞണ്ടുകളെ ചാരത്തിൽനിന്ന് പുറത്തെടുത്തു.

ഒരു കരണ്ടിയുടെ പിടികൊണ്ട് ലോഹിത്, വേവിച്ച ഞണ്ടും, മുളകും, ഉപ്പും, തിരുമ്മി ഒരു ചട്ടണിയുണ്ടാക്കുകയാണ്. അരയ്ക്കുമ്പോൾ “ധോഗാഡവന്തിംഗ്” എന്ന് അവർ കൂട്ടത്തോടെ ഉരുവിടുന്നു. ഗോവർ ബോലിയിൽ (ലംബഡി എന്നും അറിയപ്പെടുന്നു) അതിൻ്റെ അർത്ഥം “അരയ്ക്കുന്നു’ എന്നാണ്.

ഞണ്ട് ചട്ടിണി തയ്യാറായി. ആൺകുട്ടികൾ പെട്ടെന്ന് അതകത്താക്കി.

“കുറച്ചുകൂടി വേണോ സർ” ലോഹിത് ചോദിച്ചു. ഞങ്ങൾ ഒന്ന് മടിച്ചപ്പോൾ അവരിൽ രണ്ടുപേർ കുളത്തിലേക്ക് കുതിച്ച്, മറ്റൊരു വലിയ ഞണ്ടും എട്ട് ഇടത്തരം ഞണ്ടുകളുമായി വന്നു.

ഞണ്ടിൻ്റെ ഔഷധഗുണങ്ങൾ ഞങ്ങൾക്ക്, അവരിലെ മുതിർന്ന കുട്ടി ചരൺ നായക് പറഞ്ഞുതന്നു. കൈപ്പന്ത് കളിക്കാരനായ അവൻ, വിശാഖപട്ടണത്തിനടുത്തുള്ള അരകു സ്പോർട്ട്സ് സ്കൂളിലാണ് പഠിക്കുന്നത്. ഒബുല ദേവര ചെരുവു പട്ടണത്തിലെ ഒരു ഇംഗ്ലീഷ് മീഡിയം സ്കൂളിലാണ് ഭാനു.

“ഞങ്ങളൊക്കെ നാളെ ഹോസ്റ്റലിലേക്ക് തിരിച്ചുപോകും. അച്ഛൻ എന്നെയും സഹോദരനേയും ഒബുല ദേവര ചെരുവിൽ വിട്ട്, കാദിരിയിൽനിന്ന് തീവണ്ടിയിൽ കൊച്ചിയിലേക്ക് പോകും,” അവൻ പറയുന്നു.

മഴക്കോള് കണ്ടപ്പോൾ കുട്ടികൾ പാടത്തിലൂടെ ഗ്രാമത്തിലേക്കും വീട്ടിലേക്കും ഓടിപ്പോയി.

പരിഭാഷ: രാജീവ് ചേലനാട്ട്