केकड़ा के भोज

ई छव गो केकड़ा राउर हाथ में समा जाई. एकरा में तनी मरिचाई-नून मिला के पीस देहम, त बहुते स्वादिष्ट लागी. एहि से रामप्रसाद आउर उनकरा संगे स्कूल में पढ़े वाला लइका लोग मिल के कीचड़ वाला केकड़ा (स्काइला सेराटा) के एगो पिलास्टिक वाला बोतल में फंसइलक ह. आउर अब ओकर भोज करे के तइयारी में लाग गइल बा.

लइकन के टोली जरत घाम से बचे खातिर खूब घना गाछ के छांव में बइठल बा. ई जगह आंध्र प्रदेस के श्री सत्य साई जिला के एगो बंजारा बस्ती, मलकवारिपल्ली तांडा बा. इहंवा आज के भोज के हीरो बा, माटी (कीचड़) वाला केकड़ा. एह केकड़ा के ‘हरियर केकड़ा’, आ ‘मैंग्रोव केकड़ा’ भी कहल जाला. ई भारत के पूरबी तट पर मिलेला.

अमडगुर मंडल के ई शांत कोना एगो घाटी में पड़ेला जहां पहाड़ सब के नीचे धान के खेत, टमाटर आउर मरिचाई के बगइचा लागल बा. बाकिर एतना हरियाली देख के लागी कि पानी के कमी ना होई. बाकिर सांच बात त ई बा कि इहंवा के बोरवेल 800 से 1200 फीट गहिराई ले खोदल बा. तबो खेत में पटावे खातिर दिन भर में मात्र आठ घंटा पानी मिलेला.

टोली के लरिकन में से एगो के बाप आ बंजारा खेतिहर रमेस नायक पारी से बतवलें कि ऊ काम करे खातिर मोटा-मोटी 700 किमी दूर केरल के कोच्चि जालन, कबो मिस्त्री के त कबो नाला सफाई के. ऊ बतावत बाड़न, “हमनी सीवेज के सफाई करिला. बदबू त बहुते आवेला, बाकिर मजूरी सही मिल जाला.”

पानी आ दोसर कुदरती संसाधन के कमी चलते खेतिहर लोग फसल कटनी के बाद काम करे खातिर बाहर चल जाला. ऊ लोग आपन लरिकन सब के बोर्डिंग स्कूल में भेज देवेला. गांव में बस एके गो प्राइमरी स्कूल होखे के चलते मलकवारीपल्ली तांडा के जादेतर बच्चा सब पढ़े खातिर अमडगुर, तुम्मला, ओबुल देवर चेरुवु आ कदिरी जइसन लगे के कस्बा आ सहर के स्कूल में जाला.

दसहरा के छुट्टी खतम हो गइल बा. लइका लोग अगिला दिन से स्कूल जाए लागी. खेत में केकड़ा पकड़े आ पकावे के लरिकाई वाला खेल आज अंतिम बेरा खेलल जाई.

एम. मोतीलाल आउर श्रीकांत नायक लगे रहे वाला एगो खेतिहर के इहंवा से नून मांग के लेके आइल बाड़न. नून पुरान अखबार के एगो टुकड़ा में सइहार के लपेटल बा. लगे के सब किसान लोग मंदिर बनावे खातिर बालू लावे पड़ोस के गांव गइल बा, आ कुछ लोग आपन खेत में पंप चला के पानी पटा रहल बा.

भानु नायक आ लिखित नायक ताजा-ताजा तुड़ल हरियर मरिचाई के कूट के नून में मिलावत बा.

अब पकावे के बारी बा.

रामप्रसाद तेजी से काम में लग गइल बाड़न. केकड़ा सब के झटपट बाहिर निकाल के ओकर पंजा आ टंगड़ी अलग कइलन. फेरु सूखल टहनी, पत्ता आ घास-पात बटोरे लगलन. लोहित, भानु, लिखित, श्रीकांत आ मोतीलाल भी पूरा जोर लगा के मदद करे में लाग गइल. रामप्रसाद बनावल केकड़ा के सूखल घास में रख के आग लगा देत बाड़न. तनिए देर में आग बुझ जात बा, त ऊ ध्यान से राख में भुनाइल केकड़ा सब के बाहिर निकाल लेलन.

लोहित कुदारी के डंडा के धो के एकरा से आग में पकावल केकड़ा के मरिचाई आ नून संगे पीसे वाला बाड़न. “धोगड़ावान्तिंग, धोगड़ावान्तिंग (कूच! कूच!)” ऊ चिल्लाए लगलन. गोर बोली (लंबाडी) में ‘धोगड़ावांत’ के मतलब “कूचल” बा.

केकड़ा तइयार बा. लइका लोग ओकरा फट से सफाचट कर जाता.

“इंका कावाला (आउर लेहम), जजमान?” लोहित पूछत बाड़न. हमनी के तनी संकोच से भरल जवाब सुनके दू ठो लइका लोग पोखरा ओरी दउड़त बा. ऊ लोग एगो आउर बड़ केकड़ा आ आठ मांझिल आकार के केकड़ा लेके आवता.

लइकन के टोली में उमिर में सबले बड़ चरन नायक हमनी के बतइलन कि केकड़ा में कइएक रोग के दूर करे वाला गुण होखेला. ऊ अपने हैंडबॉल खेलेलन आउर विशाखापट्टनम के लगे अरकु स्पोर्ट्स स्कूल में पढ़ेलन. उहंई भानु, ओबुल देवर चेरुवु कस्बा के एगो अंगरेजी माध्यम स्कूल में पढ़ेलन.

“हमनी कल हॉस्टल लउट रहल बानी. बाऊजी हमरा आ हमार भाई के ओबुल देवर चेरुवु छोड़ दीहन. एकरा बाद ऊ कदिरी से कोच्चि खातिर ट्रेन पकड़ लीहन,” ऊ बतइलन.

पानी बरखे वाला बा, लइका सब खेत पार करत आपन घर ओरी धउड़ पड़ल बा.

अनुवाद: स्वर्ण कांता