سبزی فروش امولو کی محنت بھری زندگی

امولو کہتی ہیں، ’’میں ایسی ماں بننا چاہتی ہوں جو صبح اپنے بچوں کو اسکول کے لیے جگائے، ان کے لیے اچھا کھانا پکائے، ان کے ساتھ زیادہ سے زیادہ وقت گزارے۔ لیکن مجھے ان کے بیدار ہونے سے چار گھنٹے قبل ہی گھر سے نکلنا پڑتا ہے، اور جب میں رات کو تاخیر سے لوٹتی ہوں تب بھی وہ سو ہی رہے ہوتے ہیں۔ پورے ہفتہ میرے دماغ میں بس یہی چلتا رہتا ہے کہ اتوار کب آئے گا، جب مجھے ۸ گھنٹے کی نیند ملے گی، دن میں تین وقت کا کھانا ملے گا اور بچوں کے ساتھ گھر پر تھوڑا وقت گزار پاؤں گی۔‘‘ لیکن آج کام کا دن ہے، اور ہم باتیں کرتے ہوئے شمالی چنئی کے تیرو ووٹّری یور علاقہ کی ایک تنگ گلی سے گزر رہے ہیں۔ وہ سبزیوں سے لدے اپنے ٹھیلہ کو دھکہ دے رہی ہیں۔ میں کالج سے گھر لوٹ رہی ہوں۔

صبح گھر سے نکلتے وقت بھی میں نے امولو کو دیکھا تھا، اور اب دوپہر میں لوٹتے ہوئے بھی میں نے انہیں اسی سڑک پر پایا۔ ملائم پونم ساڑی پہنے ہوئے امولو تقریباً ۱۰۰ کلو وزن والے اپنے ٹھیلہ کو پوری طاقت سے دھکہ دیتے ہوئے وہاں سڑک پر کھڑی تھیں۔ یہ سال ۲۰۲۴ کی گرمیاں ہیں۔ تیرو وَلّور ضلع میں درجۂ حرارت ۴۰ ڈگری سیلسیس سے اوپر جا چکا ہے اور اس موسم کا سب سے گرم دن ۳ء۴۴ ڈگری سیلسیس درج کیا گیا ہے۔ ان حالات میں بھی ۴۱ سالہ اس سبزی فروش کے روزانہ کے معمول میں کوئی تبدیلی نہیں آئی ہے۔ ہندوستان میں سڑکوں پر گھوم گھوم کر سامان بیچنے والی تقریباً ایک کروڑ خواتین ہیں، جن میں سے ۴۰ فیصد عورتیں کام کے دوران شدید گرمیوں کا سامنا کرتی ہیں۔ امولو بھی ان میں سے ایک ہیں۔ اور اس طرح کے کام کرنے والے دیگر ۶۸ فیصد لوگوں کی طرح امولو بھی لو میں بغیر آرام کیے لگاتار کام کرتی ہیں، جس کے دوران وہ اکثر دوپہر کا کھانا بھی نہیں کھا پاتی ہیں۔

دن بھر میں امولو سو سے بھی زیادہ گلیوں سے ہو کر گزرتی ہیں – تپتی دھوپ میں وزنی ٹھیلہ کو دھکیلتے ہوئے، اور صارفین کی توجہ مبذول کرانے کے لیے اپنے ٹھیلہ پر رکھی سبزیوں کے نام مترنم آواز میں پکارتی ہیں۔ وہ کہتی ہیں، ’’دن بھر چیخنے کے بعد میرے کان بھر جاتے ہیں۔ لیکن اتنی گرمی کے باوجود اگر لوگ مجھ سے خریدتے ہیں، تو مجھے بچی ہوئی سبزیاں بیچنے کی طاقت مل جاتی ہے۔ کئی دفعہ اتنا پیدل چلنے کے بعد بھی میں [دن میں کئی بار وہ اتنا فاصلہ طے کرتی ہیں] صرف ۲۰-۳۰ روپے کی ہی سبزی بیچ پاتی ہوں۔ کبھی کبھی تو میں سڑک کے درمیان فٹ پاتھ پر ہی بیٹھ کر رونے لگتی ہوں۔ پھر کچھ منٹ بعد آنسو پونچھتی ہوں اور امید کے ساتھ دوبارہ بیچنے لگتی ہوں۔‘‘

امید ہی وہ چیز تھی، جس نے امولو کو تقریباً آٹھ سال قبل اپنا لکڑی کا ٹھیلہ خریدنے کے لیے آمادہ کیا۔ اس سے پہلے وہ تعمیراتی مقامات پر بطور مزدور کام کرتی تھیں۔ انہوں نے پانچ سال کی عمر سے ہی کام کرنا شروع کر دیا تھا اور دن بھر کی مزدوری کے عوض مشکل سے ۲۰۰ روپے کما پاتی تھیں۔ اس وقت ان کے بچے چھوٹے تھے اور پڑھائی کر رہے تھے۔ امولو زیادہ پیسے کمانا چاہتی تھیں اور انہیں امید تھی کہ سبزی بیچنے سے یہ ممکن ہو پائے گا۔

امولو کہتی ہیں، ’’شروع میں یہ کافی مشکل تھا۔ مجھے بار بار بخار آ جاتا تھا۔ اور کئی بار تو بہت تھکان کی وجہ سے سڑک پر کھڑے کھڑے ہی جھپکی لے چکی ہوں۔ وقت کے ساتھ مجھے اس کی عادت ہو گئی ہے۔ لیکن بغیر آرام کیے لگاتار کام کرنے کا اثر میری صحت پر پڑ رہا ہے۔‘‘ وہ روزانہ رات کو ڈھائی بجے سے پیروں پر کھڑی رہتی ہیں۔ تیرو وَلّور ضلع کے اپنے گاؤں کیلر کنڈی گئی (جسے کے جی کنڈی گئی بھی کہا جاتا ہے) سے وہ تقریباً ۶۰ کلومیٹر کا سفر طے کر کے شمالی چنئی کے تیرو ووٹری یور علاقہ میں سبزیاں اور پھل بیچنے آتی ہیں۔ موسم کی پرواہ کیے بغیر، وہ دن بھر اپنے ٹھیلہ کے ساتھ گلیوں میں گھومتی رہتی ہیں۔

وہ کہتی ہیں، ’’ڈاکٹر کہتے ہیں کہ میرے جسم میں خون کی کمی [اینیمیا] ہے اور مجھے ٹھیک سے کھانا اور سونا چاہیے۔ لیکن بدقسمتی سے میری زندگی مجھے ایسی سہولیات فراہم نہیں کرتی۔ میں ہی اپنے گھر کی واحد کمانے والی فرد ہوں۔ امولو کے شوہر، ۴۵ سالہ دیوراج دہاڑی مزدور ہیں۔ انہیں مسلسل کام نہیں ملتا اور جو بھی کمائی ہوتی ہے، وہ اسے شراب نوشی میں خرچ کر دیتے ہیں۔ اس کی وجہ سے امولو پر فیملی کی دیکھ بھال کرنے کے ساتھ ساتھ مالی ذمہ داری نبھانے کا دوہرا بوجھ آ گیا ہے۔

امولو نے اپنے اوپر خرچ نہ کرنا سیکھ لیا ہے۔ وہ کہتی ہیں، ’’جب میں باہر ہوتی ہوں، تو زیادہ تر صرف پانی پی کر ہی گزارہ کر لیتی ہوں۔ کبھی کبھی صبح کچھ سبزیاں فروخت کر لینے کے بعد، بہت ہی کم موقعوں پر ۳۰-۴۰ روپے خرچ کر کے ایک ڈوسا کھا لیتی ہوں۔ لیکن دوپہر کا کھانا کھانے میں مزید ۱۰۰ روپے لگ جاتے ہیں۔ مجھے اتنی کمائی کرنے میں بہت وقت لگتا ہے، اس لیے میں وہ پیسے اپنے اوپر خرچ نہیں کرتی۔ میں گھر لوٹنے تک انتظار کرتی ہوں اور فیملی کے لیے کھانا بناتی ہوں۔ اکثر وہی پورے دن میں میرا واحد کھانا ہوتا ہے۔‘‘ امولو کے ۱۸ سال کے بیٹے دیپک کی ۱۰ویں جماعت کی پڑھائی چھوٹ گئی تھی۔ حال ہی میں اس نے اپنی ماں کا ہاتھ بٹانے کے لیے پاس کی ایک فیکٹری میں کام کرنا شروع کیا ہے۔ ان کی ۱۷ سال کی بیٹی ہرینی ۱۲ویں جماعت میں پڑھتی ہے۔ لیکن فیملی کے خرچ اور بچت کی ذمہ داری امولو ہی نبھاتی ہیں۔ اس وقت وہ اپنے گھر میں بیت الخلاء بنوا رہی ہیں، جو پہلے نہیں تھا۔ اس کی مرمت اور تعمیر کا خرچ ان کی بچت سے چل رہا ہے، اور وہ اس کام کے لیے اپنے شوہر کو مزدوری بھی دیتی ہیں۔

ان کی زندگی ہمیشہ سے مشکلوں بھری رہی ہے، بالکل میری ماں کی طرح، جو ہمیں پڑھانے کے لیے دن بھر کئی گھروں میں کھانا بناتی رہی ہیں۔ امولو سے میری شناسائی بھی میری ماں کے ذریعہ ہی ہوئی ہے۔ وہ گزشتہ تقریباً تین برسوں سے ان سے سبزیاں خرید رہی ہیں۔ اکثر میں نے دیکھا ہے کہ جب میری ماں اپنی ضرورت کی سبزیاں چھانٹ رہی ہوتی ہیں، تب دونوں آپس میں باتیں کرتی رہتی ہیں۔

اس لیے جب اس دوپہر میں امولو کو اب بھی گلیوں میں محنت کرتے ہوئے دیکھتی ہوں تو میں ان سے ان کے دن کے بارے میں پوچھتی ہوں اور ہم باتیں کرنے لگتے ہیں۔ اس کے بعد کے پچھلے کچھ مہینوں میں، میں نے یہ سفر ان کے ساتھ کئی بار طے کیا ہے، اور اکثر اپنا کیمرہ بھی ساتھ رکھا ہے۔

ان کے ساتھ چلتے ہوئے مجھے سمجھ آتا ہے کہ ایک خاتون سبزی فروش ہونا کتنا مشکل ہے، خاص کر ایسے شہر میں جسے عورتوں کی حفاظت یا ضرورتوں کی ذرا بھی پرواہ کیے بغیر ڈیزائن کیا گیا ہے۔ وہ کہتی ہیں، ’’میں پورا دن چلتی رہتی ہوں اور میری توانائی کا واحد ذریعہ پانی ہی ہوتا ہے۔ پیشاب کی حاجت ہونے پر عوامی بیت الخلاء کہیں دکھائی نہیں دیتا۔ اس لیے مجھے کھلے عام، دن کے روشنی میں، سنسان جگہیں ڈھونڈ کر پیشاب کرنا پڑتا ہے۔ اور مجھے ڈر لگتا ہے۔ حیض کے دوران یہ اور بھی مشکل ہو جاتا ہے۔ اُن دنوں مجھے اتنی الرجی اور زخم ہو جاتے ہیں کہ میں چل بھی نہیں پاتی۔‘‘

چنئی کی گلیوں میں پورا دن گزارنے کے بعد بھی، شام تک تمام سبزیاں فروخت نہیں ہو پاتیں۔ تب ہم شمالی چنئی کے وِمکو نگر کی طرف چلتے ہیں۔ وہاں امولو اپنا ٹھیلہ سڑک کے کنارے کھڑا کر دیتی ہیں اور پہیوں میں زنجیر ڈال کر تالا لگا دیتی ہیں۔ بچی ہوئی سبزیاں پلاسٹک کے کریٹ میں رکھ کر وہ وہاں سے کاورئی پیٹئی کے لیے ٹرین پکڑتی ہیں۔ یہ سفر تقریباً ۴۵ منٹ کا ہوتا ہے۔

ٹرین میں امولو خواتین والے ڈبے میں چڑھتی ہیں۔ وہ کہتی ہیں، ’’جن دنوں سبزیوں کی فروخت اچھی نہیں ہوتی اُن دنوں میں ٹرین میں ہی بچی ہوئی سبزیاں بیچنے کی کوشش کرتی ہوں۔‘‘ ٹرین سے اترنے کے بعد وہ ایک آٹو پکڑنے کے لیے تقریباً ایک کلومیٹر پیدل چلتی ہیں، جو انہیں پُدو ووئل گاؤں کے بس اسٹینڈ تک لے جاتا ہے۔ بسوں کا وقت بے ترتیب رہتا ہے، اس لیے ۱۰ سے ۶۰ منٹ تک انتظار کرنا پڑتا ہے۔ بس ملنے کے بعد انجاتمّن گُڈی بس اسٹاپ تک پہنچنے میں تقریباً ۲۰ منٹ لگتے ہیں۔ وہاں سے کیلر کنڈی گئی گاؤں میں واقع امولو کا گھر ابھی مزید ۲ کلومیٹر دور ہے۔ اگر بیٹا گھر پر ہوتا ہے تو وہ اپنی ماں کو دوپہیہ گاڑی سے لینے آ جاتا ہے۔ لیکن زیادہ تر دنوں میں امولو یہ فاصلہ بھی پیدل ہی طے کرتی ہیں۔ اس میں مزید ۲۵ منٹ جُڑ جاتے ہیں۔

گھر تک کا یہ لمبا سفر پورا کرتے کرتے رات کے تقریباً ۹ بج جاتے ہیں۔ دن کے آخر میں ان کے پاس تھوڑے سے پیسے، ہاتھ میں کچھ بچی ہوئی سبزیاں اور سامنے گھر کا ڈھیر سارا کام ہوتا ہے۔ جب تک وہ کھانا بناتی ہیں، فیملی کو کھلاتی ہیں، صفائی کرتی ہیں اور سونے کی تیاری کرتی ہیں، تب تک رات کے ۱۱ بج جاتے ہیں۔

صبح بہت جلدی ہو جاتی ہے۔ محض چار گھنٹوں کے اندر وہ صبح کے کام کے لیے اٹھ جاتی ہیں جو تھکا دینے والا ہوتا ہے۔ امولو کہتی ہیں، ’’روزانہ جب میں اٹھتی ہوں، تو ایسا لگتا ہے جیسے میں کبھی سوئی ہی نہیں۔ لگتا ہے بس پل بھر کے لیے آنکھ بند کی تھی اور اگلا دن شروع ہو گیا۔‘‘ ہر صبح انہیں اپنے گھر سے تقریباً ۴ سے ۵ کلومیٹر دور واقع چِنّم بیڈو گاؤں کے تھوک بازار میں ڈھائی بجے رات تک پہنچنا ہوتا ہے۔ اس کے لیے وہ دیگر خواتین سبزی فروشوں کے ساتھ ۵۰ روپے دے کر ایک ٹرک سے جاتی ہیں۔ وہ کہتی ہیں، ’’میں سرخ آنکھوں اور پوری طرح مرجھائے چہرے کے ساتھ بازار کی طرف دوڑتی ہوں۔ لیکن جیسے ہی تیز روشنی، افراتفری اور خریدنے کے لیے جمع بھیڑ دیکھتی ہوں، میں پھر سے تروتازہ ہو جاتی ہوں۔ کسانوں سے تازہ سبزیاں خریدتی ہوں، زیادہ قیمت ہونے پر مول تول کرتی ہوں اور اس امید میں سودا کرتی ہوں کہ بیچتے وقت تھوڑا منافع ہو سکے۔ میں اس بات کو بھی یقینی بناتی ہوں کہ سب سے تازہ مال فروخت ہو جانے سے پہلے ہی لے لوں۔‘‘

وہ بازار کے ایک سرے کی جانب ہری سبزیاں خریدنے کے لیے دوڑتی ہیں اور دوسرے سرے کی جانب آم لینے کے لیے۔ تقریباً دو گھنٹے تک ادھر ادھر بھاگنے کے بعد وہ ۶۰ سے ۸۰ کلو سبزیوں کے ساتھ وہاں سے نکلتی ہیں۔ انہیں وہ ایک دوسرے ٹرک میں لادتی ہیں، جسے وہ ۶-۷ دیگر خواتین سبزی فروشوں کے ساتھ شیئر کرتی ہیں۔ دن کی شروعات میں ان کا بجٹ اکثر ۱۵۰۰ روپے کا ہوتا ہے۔ اس سے وہ کتنا سامان لے پائیں گی، یہ موسم کے ساتھ بدلتا رہتا ہے۔ گرمیوں میں وہ زیادہ سبزیاں اور پھل خرید پاتی ہیں۔ لیکن بارش کے موسم میں سپلائی کم ہوتی ہے اور قیمتیں زیادہ ہو جاتی ہیں، جس سے انہیں کم خریداری کرنی پڑتی ہے۔ فروخت کے وقت وہ بازار کی قیمتوں کے مطابق ہی دام رکھتی ہیں۔ خرید اور نقل و حمل کی لاگت نکالنے کے بعد، دن کے آخر میں ان کا اوسط منافع ۵۰۰ سے ۸۰۰ روپے کے درمیان رہتا ہے۔ لیکن ایسے دن بھی ہوتے ہیں جب انہیں کچھ بھی نہیں ملتا۔

’’ان سبزیوں کا انتظام کرنے کے لیے میں بغیر تھکے محنت کرتی ہوں، پھر پورے دن بے شمار گلیوں میں پیدل گھومنے اور گھر گھر جا کر بیچنے کے لیے ۴۵ کلومیٹر سے زیادہ کا سفر کرتی ہوں۔ لیکن سماج میں میرے جیسی خواتین کی محنت کو نہ تو دیکھا جاتا ہے، نہ اس کی عزت کی جاتی ہے۔ گاہک بہت ہی جارحانہ طریقے سے مول تول کرتے ہیں اور سب سے کم دام پر زور دیتے ہیں۔ وہی لوگ جو سپر مارکٹ میں طے شدہ قیمت بلا چون و چرا مان لیتے ہیں، ہمارے پاس آتے ہی ہر روپیہ پر شکایت کرتے ہیں اور بحث کرنے لگتے ہیں،‘‘ وہ کہتی ہیں۔ وہ یہ بات مجھ سے اس وقت کہہ رہی ہیں جب سامان لادنے کے بعد تھوڑا سنبھل کر بیٹھتی ہیں۔ لگاتار بھاگ دوڑ کی وجہ سے ان کی سانس اب بھی تیز چل رہی ہے۔

وِمکو نگر پہنچنے سے پہلے، ٹرک میں انہیں مزید ڈیڑھ گھنٹے کا سفر کرنا ہوگا، جس کے لیے ۵۰۰ روپے دینے پڑتے ہیں۔ وہ کہتی ہیں، ’’دیپک کے لیے بہتر زندگی کو یقینی بنانے اور بیٹی کو اچھی تعلیم دلانے کے لیے میں خود کو لگاتار آگے دھکیلتی رہتی ہوں۔ جسم تھکا ہونے کے باوجود روزانہ کام پر جانے کی یہی ایک واحد وجہ ہے۔‘‘ ہماری گفتگو کے درمیان ہی ان کی آنکھ لگ جاتی ہے۔ یہ نیند بس ایک پل کا سہارا ہے، اگلے ایک اور لمبے اور محنت بھرے دن سے پہلے۔

ترجمہ نگار: قمر صدیقی