ذات کے سبب پانی سے محروم

دشرتھ موسہر کے گھر سے محض ۱۰۰ میٹر کے فاصلہ پر ایک ہینڈ پمپ ہے۔ دن بھر کوئی نہ کوئی ہینڈ پمپ چلاتا رہتا ہے۔ گاؤں کی عورتیں وہاں غسل کرتی ہیں اور وہیں کپڑے بھی دھوتی ہیں۔

لیکن حکومت کے ذریعہ لگائے جانے کے باوجود اس ہینڈ پمپ سے دشرتھ موسہر کی فیملی پانی نہیں لے سکتی۔ پلامو کے وُرنار گاؤں کے رہنے والے دشرتھ موسہر کا تعلق دلت برادری سے ہے، اس لیے سرکاری نل ان کی پہنچ سے دور ہے۔

دشرتھ موسہر نے بتایا، ’’ہمن کے گاری دیوے لے، کہے لے نا کہ کہیں اور سے پنیو بھرے [وہ ہمیں گالیاں دیتے ہیں اور ہمیں کہیں اور سے پانی بھرنے کو کہتے ہیں]۔‘‘ انہوں نے یہ بھی بتایا کہ ان کے پانی کے برتن کو پھینک دیا جاتا ہے۔

ہینڈ پمپ کے پاس ہی رام اوتار چودھری کا گھر ہے۔ جب اس رپورٹر نے ان سے موسہروں کے ساتھ کھلے عام ہو رہے بھید بھاؤ کے بارے میں پوچھا، تو انہوں نے کہا، ’’انہیں منع اس لیے کیا جاتا ہے کیوں کہ وہ صفائی نہیں رکھتے۔ کوئی ایسا پانی پئے گا کیا؟‘‘ وُرنار کی کل ۲۷۴۹ لوگوں کی آبادی میں سے تقریباً ایک تہائی موسہر ہیں (مردم شماری ۲۰۱۱ کے اعداد و شمار کے مطابق)۔

اس لیے پانی بھرنے کے لیے موسہر لوگوں کو تین کلومیٹر دور ایک دھان کے کھیت تک جانا پڑتا ہے، جس کے ایک کونے میں دو فٹ گہرے گڑھے سے ان کے پینے کے پانی کی ضرورت پوری ہوتی ہے۔ وہ دن بھر میں کئی بار یہاں آ کر اپنی پیاس بجھاتے ہیں۔

پانی لانے کا کام دشرتھ کے ۵۰ رکنی خاندان کا ہے، جہاں سر پر پانی کا برتن لیے دو سال کی بچی سے لے کر بڑوں تک سبھی دکھائی دے جائیں گے، یہ ذمہ داری ہر کوئی پورے دل سے پوری کرتا ہے۔ خاندان کے عمر دراز لوگ المونیم کے چھوٹے برتنوں سے پانی انڈیل کر بڑے ڈبوں میں بھرتے ہیں، جب کہ بقیہ افراد صبر و تحمل کے ساتھ انتظار کرتے ہیں کیوں کہ ذرا سی غلطی سے کیچڑ پانی میں گھلنے لگتا ہے، جس کے بعد انہیں گھنٹوں تک پانی کے صاف ہونے کا انتظار کرنا پڑتا ہے۔

برتنوں میں پانی بھر کر اسے واپس لانا کوئی آسان کام نہیں ہے کیوں کہ اس کے لیے انہیں تقریباً تین کلومیٹر لمبے پتھریلے اوبڑ کھابڑ راستے کو طے کرنا ہوتا ہے۔ چڑھائی کی وجہ سے درمیان میں سانس پھولنے لگتی ہے اور انہیں درمیان میں رک کر سانس پر قابو پانے کا انتظار کرنا پڑتا ہے۔

دشرتھ کی بیوی اُرملا دیوی کہتی ہیں، ’’غسل کرنے اور کپڑے دھونے کے لیے ہمیں اور بھی دور جانا پڑتا ہے۔‘‘

پورا خاندان وُرنار اور اس کے آس پاس کے علاقوں میں بھیک مانگ کر گزارہ کرتا ہے۔ دشرتھ پلاسٹک کی پرانی بوتلیں بھی اکٹھا کر کے اس سے کچھ پیسہ کماتے ہیں۔ وہ کہتے ہیں، ’’ہمن مانگیلا اور کھائیلا [ہم بھیک مانگ کر گزارہ کرتے ہیں]۔‘‘

موسہر ہندوستان کی سب سے محروم دلت برادریوں میں سے ایک ہیں۔ بہار (جس سے الگ ہو کر جھارکھنڈ سال ۲۰۰۰ میں ایک نئی ریاست بنا) میں انہیں مہا دلت کے زمرہ میں رکھا گیا ہے۔ دشرتھ کے خاندان میں کسی کے بھی پاس راشن کارڈ نہیں ہے، اس لیے انہیں سرکاری راشن بھی نہیں ملتا۔ ان کے پاس منریگا جاب کارڈ تو ہے، لیکن انہیں آج تک اس کا کوئی فائدہ نہیں ملا۔ کام نہ ملنے کی وجہ سے انہیں مجبوراً بھیک مانگ کر گزارہ کرنا پڑ رہا ہے۔

ہر جھونپڑی میں آٹھ سے دس لوگ رہتے ہیں، اور اس پہاڑی پر ایسی پانچ جھونپڑیاں ہیں۔ محض ایک کمرہ کی یہ جھونپڑیاں بانس سے بنائی گئی ہیں، جنہیں پرانی پلاسٹک شیٹ سے ڈھانپ دیا گیا ہے۔ جھونپڑی کے اندر ایک کونے میں برتن رکھےہوئے ہیں، دوسرے کونے میں کپڑے رکھنے اور سونے کے لیے چٹائی بچھی ہوئی ہے۔ جھونپڑی کے باہر پلاسٹک کی بوتلوں سے بھری بوریاں رکھی ہیں اور چار سؤر (خنزیر) بندھے ہوئے ہیں۔

ان کے ووٹر آئی ڈی اور آدھار کارڈ ۲۰۱۹ کے اسمبلی انتخابات سے عین قبل بنوائے گئے تھے۔ دشرتھ پاری کو بتاتے ہیں، ’’ایک بڑا آدمی [لیڈر] کار سے آیا تھا اور اس نے ہمارا ووٹر آئی ڈی، آدھار کارڈ بنوایا اور بولا کہ ووٹ کے بعد ہمیں راشن ملے گا۔ لیکن جب ڈیلر کے پاس گئے تو اس نے ہمیں گالیاں دے کر بھگا دیا۔‘‘

نام نہاد اونچی ذات سے تعلق رکھنے والے رام اوتار کہتے ہیں، ’’یہ تو سرکاری چاپا کل [ہینڈ پمپ] ہے، کوئی کیوں روکے گا؟ لیکن آپ کو اسے صاف رکھنا ہوگا، ٹھیک؟ وہ سب گندگی بہت پھیلاتا ہے۔ تو کوئی بھرنے دے گا پانی؟‘‘ رام اوتار اپنی چارپائی پر بیٹھے ہوئے تھے اور گفتگو کے دوران موسہروں کے خلاف ذات پر مبنی تبصرے کرنے لگے۔

انہوں نے اپنا ہاتھ ہلاتے ہوئے میری بات کاٹی اور کہا، ’’آپ کہاں پڑے ہیں موسہر اوسہر کے چکّر میں! چھوڑئے نا او سب کو؟‘‘

ترجمہ نگار: قمر صدیقی